نادي الإيجابيين (أفكار إيجابية)

[عبير يونس]

كل عام و نحن ايجابيون

إلى كل إيجابي و كل إيجابية في المحاورات

دعوة للانضمام إلى نادي الإيجابيين

هيا جميعا

نريد أفكار إيجابية قابلة للتطبيق

الأخ الفاضل مكاوي كان كتب المداخلة دي في موضوع فهارس نادي الإيجابيين

الفاضلة مصرية متغربة

جزاك الله خيراً على الموضوع القيم و على الجمع الرائع

الحقيقة أنا فكرت الموضوع يضم ألإكار إيجابية و أفكار مشاريع تنموية سواء مادية أو اجتماعية و هكذا

لكن ما شاء الله الموضوع أكبر من مما تخيلته .. و إن كنت أقترح ضم الفكرة اللي فكرت فيها

فيا ترى ممكن ولا هيقتصر الموضوع على جمع المواضيع الايجابية؟

أصل الحقيقة أنا نفسي مفتوحة على الايجابية السنة دي .. يا ريت نتعاون و حاسس كمان ان فيه اخوة و أخوات كتير عندهم نفس الروح دي

فوالله بجد يا ريت نستغلها علشان النتيجة هتكون جميلة أوي

مكاوى

يللا

أفكار إيجابية

على بركة الله

نبدأ

[mekkawy]

بسم الله الرحمن الرحيم

الفاضلة مصرية ربنا يكرمك و يعزك

و عشان نكون منهجيين خليني أقول

الصراحة انا عندي اقتراح ابعد من مجرد فكرة .. إحنا ياما قلنا أفكار و ياما سمعنا أفكار لكن القضية في التنفيذ

عازوين نقول فكرة سهلة و بسيطة و ممكنة التنفيذ و نضيف لها واجب عملي في اخر الفكرة .. يعني نقول الفكرة و طرق التنفيذ و الواجب العملي اللي المفروض نقوم بيه

و ان شاء الله كل واحد يكون معانا في الفكرة يقول انه موجود و معانا في الفكرة و ييجي يدي تمام للفكرة و يحكيلنا عمل ايه و حصل معاه ايه و تعليقه ايه و لو عنده تطوير للفكرة دي تحديداً

يا ريت كمان الافكار تكون مجتمعية .. يعني أفكار و أعمال تخدم المجتمع و تخدم أفراده و تخدم المسلمين كأمة و المصريين كشعب

يعني ايه تخدمهم .. يعني تنقل الصورة الحسنة الطبيعية سواء للمسلمين في العالم كله أو للمصريين داخل مصر و خاصة خارجها .. المغتربين يعني

نقول على بركة الله .. هل من مشمر؟

مكاوى

[Dreamwithme]

أنا معاكم وبأفكر في أفكار عملية ومستنية أي أفكار

[mekkawy]

سلام عليكم

ايه يا رجالة

محدش هيفتح نفسنا بحاجة

فكرة .. اضافة للمنهجية اللي هنشتغل بيها اي حاجة كدة عشان نكيك اوف

مكاوى

[لماضة مصرية جدا]

سلام عليكم

ايه يا رجالة

محدش هيفتح نفسنا بحاجة

فكرة .. اضافة للمنهجية اللي هنشتغل بيها اي حاجة كدة عشان نكيك اوف

مكاوى

السلام عليكم و رحمة الله و بركاته

عنجليزي ده يا مورسي

كفارة يا فندم انت طلعت من الجاكوزي امتي...(وش مبسوط و مشدوه و مغيوظ في نفس الوقت...تلاتة في واحد يعني)

جزاكي الله كل خير يا مصرية يا متغربة...في الروح الحلوة اللي عمالة تنوريهالنا النهاردة

بجد في وقتها و محتاجينها

بفكر

ان احنا نعمل توبيك...ا

و نفتح كوشك كده صغير

نصبح فيه علي بعض

بس بشرط

يكون الصباح حلو كده و يدي جرعة تفاؤل

و نفس الحكاية لما نيجي ننام

انا شخصيا بحب انام علي ضحكة....مش عارفة الناس بيحبوا يقضوا يومهم صحوا و نوما و انقلابا من ع السرير ازاي؟؟؟

كتير مننا اول تعامله مع النت بيبقي المحاورات...(وش واحدة مدمنة و بتهرش في دراعها عشان معاد الموقع)

ليه ميكونشي اول اقتحام للمحاورات....توقيع ايجابي....بصباح ايجابي

هفكر و آجي كمان شوية

ع جنب بقي

انا عارفة عكاوي....هيحدفني بطوبة....ما هو قاعد و مقصوع ع الكورسي و عمال يقول منهجية و بتاع...اوعي تحدف....انا عيلة جبانة

مساااااكم إرادة.....بجد أن احنا بخير

[mekkawy]

لمضمض هانم كعب الحاجات .. اختاري انتي براحتك بأة

اقفي كدة .. ايوة يمين شوية .. القفي بأة قالبين الطوب دول .... بووووووم .. متخافوش يا جماعة .. الشهيدة لماضة معانا بس خلعنا عليها اللقب و يا رب تنوله و لو على الفراش

ادخلي يا ابني بأة بالكورال كدة و الموسيقى التصويرية .. بس دف بس بدون الات أحسنلك

و قلنا هنبني و أدي احنا بنينا السد العالي ترم ترم ترم .. قلنا هنبني و ادي احنا بنينا السد العالي تيرالم لم لم :malta:

ايه يا شباب و يا شابات .. ولا واحد يوحد الله .. نوم نوم نوم كدهوت طول الوقت

طب أنا هأبدأ بأة أحط الأفكار و الله المستعان و ربك يعدل المايل و يقوم النايم و يظبط المعوج .. توكلنا على الله

مكاوى .. يتبع

[mekkawy]

السلام عليكم

و بم ان لسة مفيش زبائن (هييجوا ان شاء الله) حتى الان .. نحنتف و نظبط في الموضوع و نحط حتة هنا و نشيل حتة من هنا

الفاضلة مصرية متغربة .. ممكن نضيف لعنوان الموضوع ما يشير إلى إنه متجدد و مثلاً لما نحط فكرة نظهرها في العنوان ان هي دي فكرة اليوم أو الاسبوع أو وات ايفر؟!

كمان ممكن نشيل الأقواس حضرتك من عنوان الموضوع حاسس كدة انها عاملة حاجز .. مش عارف .. مجرد احساس

و إن شاء الله ليكي و لإخواننا كلهم عليا النهاردة يكون فيه مبادرة جميلة أوي على اخر اليوم بس الناس تظهر بس

مكاوى .. مبادرات

[Dreamwithme]

أستاذ مكاوي .........سؤال صغنن أد كده؟ هو أنت ليه خلصت علي لماضة ؟

طب أنا شايفة فكرة كوشك صباح الخير ده جميلة جدا ...... كنت لسه هأكتب وأسميه توبيك صباح الخير يا محاورات وتصبحوا علي خير يا محاورات

وبعدين لقيت قالبين الطوب طايرين وخلصوا علي لماضة :blink:

ليه بس يا أفندم؟!

أنا عندي فكرة عملية شخصية كل واحد يحط لنفسه هدف أنه يبتسم في وجه الأخرين أول مايشوفهم ويحط عدد ابتسامات معين ويحاسب نفسه آخر اليوم جاب كام منهم؟ :)

تنفع الفكرة دي ولا هأحصل لماضة؟ :blink:

[mekkawy]

أستاذ مكاوي .........سؤال صغنن أد كده؟ هو أنت ليه خلصت علي لماضة ؟ blink:

طبعاً اجابة السؤال ده تنقسم لمحورين هامين .. الرفيقة لماضة هانم كعب الحاجات .. تعدت على حقوق الطبع و النشر المحفوظة طبعاً لمؤسسة مكاوى أبو جبل و ولده .. لأنها قدمت فكرة قبل ما نخلص المنهجية .. و هي عرفت غلطتها و اعترفت بيها و اختارت العقوبة لنفسها و إحنا مكاوي ابو جبل قمنا بالتنفيذ سعادتك .. بالك لو مكنتش قالت الكلمتين الزيادة اللي في الاخر دول مكناش عملنالها حاجة خالص :happy: اه و الله .. بس هو كدة في ناس لمضين تلاقي عندهم حتة زيادة كدة بتجيبلهم الكافية .. هع .. مين هناك ؟!!!

بالنسبة بأة لفكرتك فهي فكرة جميلة و تنضم لكشك الرفيق لماضة المبجلة و ممكن نرفقها بكرة تكون أكبر سيكا كدة عشان الناس تتغير فيها حاجة كمان مع الابتسام ... عاوزينها من القلب مش من البوء .. ايه البوء ده؟!! :blink:

مكاوى .. أبو جبل

[mekkawy]

طب على بركة الله نبدأ و لو إن مفيش زباين خالص بس هييجو إن شاء الله .. يتبع

و زي ما اتفقنا إننا هنعمل مبادرة أسبوعية أو يومية نفيد بيها و نستفيد منها .. نفيد المجتمع ككل .. نفيد دعوة للإسلام .. نفيد تحسين و رفعة صورة شعبنا المصري في البلاد المختلفة أو في مصر نفسها .. نستفيد تربية النفس .. نستفيد احترام الناس .. نستفيد أجر العمل ده من عند الله .. نستفيد ....... مفتوحة بأة لكل واحد حسب نيته و نظرته .. يلا نقول باسم الله عشان أنا حابب أخش بالمبادرة وش بدون مقدمات

مكاوى

تم تعديل 9 يناير 2011 بواسطة mekkawy

[mekkawy]

مبادرة أخلاقيات القيادة

كلنا نتعرض لأوفنسات في القيادة و تعديات على راحتنا و حريتنا و قد تكون علينا شخصياً أثناء القيادة .. أثناء الركن .. و ساعات حتى لو انت مش في العربية من اساسه :blink:

هنحط هنا خطوات .. 1 - 2 - 3 نمشي عليها و نحاول نطبقها علشان نحقق ما سبق في المشاركة اللي فاتت.

عاوزين نوصل بنفسنا و من حولنا وحدة واحدة لأخلاقيات عالية في القيادة ننشرها في المجتمع كله و أكيد هنكون أكبر المستفيدين .. نقول بسم الله

1- أول ما تركب عربيتك البس الحزام لو سمحت و متقلش بيخنقني .. خلي الناس تشوفك لابس الحزام عشان تعمل زيك و طبعاً كلنا عارفين .. الحزام أمان :wub:

2- اتعامل مع العربية على إنها آلة أوكشن بس بتحس .. و متعملش زي الناس اللي بتدوس برسيم ما بتدوسش بنزين .. حب العربية تحبك.

3- امشي في حارة بالله عليك ... امشي في حارة واحدة بس و ما تمشيش على الخط اللي في النص و تقفل حارتين .. متفقين يا ريس؟

4- استعمل الاشارات الله يرضى عليك .. خاصة أثناء التنقل بين الحارات حتى لو الطريق فاضي .. استعملها عشان تتعود و عشان تعلم اللي وراك و اللي حواليك .. استعملها حتى لو الدنيا واسعة .. استعمل الاشارات لو داخل شارع فرعي و مفيش جنس مخلوق حواليك . عشان بس تتعود و تعود غيرك.

5- لو جاي حد من وراك و عاوز يعدي .. عديه و ما تعاندش .. هتعديه عشان انت أخلاق و ذوق و صاحب حس .. مش ضعف منك لأ .. دي قوة إنك تتسامح و تساعد الآخرين .. يمكن اللي هتعديه ده في طريقه إنه ينقظ روح .. و ديماً إنوي النية دي عشان لو أنقذ روح تاخد انت ثوابها :)

6- لو في واحد جاي من جنبك و عاوز ياخد الغرزة .. معلش .. خليك كبير بأخلاقك و حلمك و سيبه يعديها بأمان و هدي انتي .. و الله مش هيقلل منك بالعكس هتحس بالانتصار على نفسك لما غلبتها و غلبت الكبر اللي فيك.

7- لو جيت في شارع ضيق و واحد غبى عليك و بقيتوا وش في وش يا انت ترجع يا هو يرجع .. معلش ارجع انت عشان انت مسلم و أخلاق .. و قول لنفسك أنا هأرجعلك عشان أنا مسلم .. مش انت تحب تعدي قبله؟!! خلاص حب لأخيك ما تحب لنفسك .. خليك أخلاق و ارجعله برضى نفس و طيب خاطر ما ترجعش و انت متأفف و ابتسمله كمان :)

يتبع.........

[م تيمور المراغي]

طب على بركة الله نبدأ و لو إن مفيش زباين خالص بس هييجو إن شاء الله .. يتبع

و زي ما اتفقنا إننا هنعمل مبادرة أسبوعية أو يومية نفيد بيها و نستفيد منها .. نفيد المجتمع ككل .. نفيد دعوة للإسلام .. نفيد تحسين و رفعة صورة شعبنا المصري في البلاد المختلفة أو في مصر نفسها .. نستفيد تربية النفس .. نستفيد احترام الناس .. نستفيد أجر العمل ده من عند الله .. نستفيد ....... مفتوحة بأة لكل واحد حسب نيته و نظرته .. يلا نقول باسم الله عشان أنا حابب أخش بالمبادرة وش بدون مقدمات

مكاوى

معاك يا مك بس ليا رأي الاول عاوز اوضحه

يفضل الدخول تحت منظمات اهليه او مؤسسات غير حكوميه قائمه بالفعل ,,

لان الدعوه الى تكوين جمعيه خيريه جديده ليه محاذير امنيه لا تخفى عليك ,, ومراقبه ومتابعه وتحريات احنا في غنى عنها ,,

وانا سمعت تجربة احد الاخوان لما كان شغال مع رساله كانت الدنيا بيس وزي الفل

اول ما فكر في الانفصال وتكوين جمعيه خاصه بيه وبزملائه اتمسك يا كبير واتحط تحت الاسنان

فعلى ايه ؟؟

مادام الهدف في النهايه تقديم الدعم والمسانده يبقى في الجمعيات والمؤسسات الموجودة حاليا الخير وزياده

[mekkawy]

مبادرة أخلاقيات القيادة (2)

8- لو جاي تركن و لقيت واحد منتظر الركنة بردو .. حاول تسيبهاله (صعبة دي أنا عارف) بس خلي عندك إيثار و اتركها لله و من ترك شيئاً لله عوضه الله خيراً منه .. سيبهاله كرم منك و ذوق و محبة.

9- و انت بتركن .. بالله عليك اركن عدل .. اركن صح .. اركن ركنة شيك .. الركنة تعبر عن صاحبها .. ظبط العربة ما ترميش العربية .. و بلاش بالله تركن في ماكنين بالورب .. اركن في الحارة المخصص ليك و اشغل مكانك انت بس متشغلش مكانين.

10- النوووووووور .. بلاش تضرب النور العالي في وش المقابل .. ولا في ضهر اللي قدامك عشان دي بتعميه في المراية و يفضل متأفف و متضايق .. و لو مقابل حد في وشك حاول تهدي النور قدر المستطاع .. دي حركة ذوق أوي منك و هيقدرها ليك.

11- لو في شارع مش طريق سريع و انت ماشي مهدي و لقيت حد بيعدي الشارع على رجليه ما تمدش عشان تسبقه .. سيبه يعدي و أمنله الطريق بالستوب بتاعك عشان غيرك يعرف ان الطريق واقف .. خاصة لو حد كبير أو ست عجوزة أو مش عجوزة .. خليك شنتل. :closedeyes:

12- لو انت ماشي في حارة و قدامك مسافة و الطريق ماشي بالراحة و لقيت واحد عاوز يجي يدخل قدامك و فيه مساحة .. ما تمدش عشان تمنعه .. خليك على سرعتك و سيبه يدخل .. يعني هو لو دخل يبقى عيب؟!! الحركة دي رخمة أوي خاصة لو الشخص ده مديلك اشارة يعني مستأذن.

يتبع بالفوائد إن شاء الله

مكاوى

تم تعديل 9 يناير 2011 بواسطة mekkawy

[mekkawy]

فعلى ايه ؟؟

مادام الهدف في النهايه تقديم الدعم والمسانده يبقى في الجمعيات والمؤسسات الموجودة حاليا الخير وزياده

تسلم يا تيمو على النصيحة الجميلة .. الكورنيش كان ناقصك امبارح :)الجو كان تحـــــــفة

مفيش يا ريس جمعيات ولا حاجة دي مبادرات أخلاقية و نصايح هنا ع الموقع بس .. اللي اتكلمنا فيه ده حاجة تانية خالص و لسة ليه ترتيب تاني

ابعتلك الواد بنسكافيه ع المكتب؟ ;)

مكاوى

[م تيمور المراغي]

ابعتلك الواد بنسكافيه ع المكتب؟ ;)

لا ميرسي عالنيسكافيه اطلع انت وحشتني :happy:

[mekkawy]

الفوائد

1- أنا مسلم أخلاقي عالية و بأعمل كدة عشان ديني أمرني بكدة.

2- جبال حسنااااات متعرفش جت منين .. و هوووووووب حسن الخلق:)

3- أنا مصري محترم و بأمثل بلدي كلها .. الكلام اللي بيتقال أحياناً مش صح .. الصح هو ده حالنا.

4- لو اتطبق الموضوع مننا كلنا و نشرناه في أوساطناهتكون النتيجة.. (و الله يا أخي أحسن واحد بيسوق على الطريق هو المصري) ده هدفنا.

5- مرافقة النبي صلى الله عليه و سلم في الجنة بحسن الخلق و خدمة الناس.

6- تربية النفس و قتل الكبر فيها.

7- ضرب مثال جيد لأولادنا بالمشاهدة و تعليمهم حسن الخلق بدون ما نقول كلمة واحدة.

8- التفوق على النفس الأمارة بالسوء و ده هيديلك قوة غير عادية في هزيمة الشر اللي فيك.

9- نشر الأخلاق و ده ليك منه ثواب من سن سنة حسنة إن شاء الله.

10- مش بس احترام الناس ليك هيزيد احترامك انت لنفسك هيزيد و احترام زوجتك و أولادك ليك.

11- انت نفسك هتكون قدوة للناس و للناشئين و مش محتاجين ندور على قدوة لأننا كلنا هنكون قدوة.

12- المجال مفتوووووح لإدراج الفوائد.

يتبع

مكاوى

تم تعديل 9 يناير 2011 بواسطة mekkawy

[mekkawy]

المطلوب

1- تنفيذ الكلام ده من أول ما تقرأه.

2- اعمل لكل تيب من دول درجة واحدة (1) و ادي لنفسك درجات في نهاية اليوم .. عملت ايه و ما عملتش ايه.

3- كافئ نفسك بفسحة لذيذة .. أكلة حلوة .. كتاب تقرأه .. أي كان نفسك بتحب ايه (بس يكون مفيد) محدش يكافئلي نفسه بسيجارة مثلاً (شاخدلي بالك ياللي في بالي؟) مش أرك يا جماعة :closedeyes:

4- فكر دائماً في تطوير على الأفكار دي و لما توصل لحاجة يا ريت تضيفها هنا .. بيس؟

5- نفذ يوم بيوم و تعالى احكيلنا عملت ايه و حصل معاك ايه و حسيت بإيه لما عملت كدة.

6- لما تيجي تحكيلنا يا ريت تضيف اضافاتك .. يعني اعملوا دي كدة .. رد فعل الناس كان كدة .. ضيفوا دي .. شيلوا دي .. كدة يعني.

7- بالتوفيق يا أحباب :)

مكاوى .. أ.هـ

[أبوعمار]

جزاك الله خيرا يا أخي الفاضل مكاوي

بجد أفكار حلوة وطريقة عرضك لها أكثر من رائع

طالما كلنا ناس مثقفين ومش عاجبنا حالنا

ودايما بنعيب على السلبيات والسلوكيات اللي مأخراناوبتخللي الناس تأخد فكرة مش عاجبانا عن المصريين

ليه مانتغيرش؟

أهم حاجة كل واحد يبدأ بنفسه

والأهم الاستمرار .... "أحب الأعمال إلى الله: أدومها وإن قلّ"

عشان كده أكتر حاجة عجبتني أنك طلبت من الأعضاء المتابعة

عدم المتابعة أكبر المشاكل من وجهة نظري ... لماالشخص يقرأ ويستفيدويقرر يتغير ويبدأ يطبق

وبعدين ................

تلاقي فتور الهمّة

وترجع ريما لعادتها القديمة

نفسي نبدأ نطبق الأخلاقيات العالية دي والسلوكيات المتحضرة

ونفسي كل واحد يبدأ بنفسه ومالوش دعوة بكل اللي حواليه

وياريت فعلا كل واحد يكون عنده ثقة بنفسه انه لو صح وكل الناس غلط ما يتغيرش

الرسول صلى الله عليه وسلم يقول : "لا يكن احدكم امعّة يقول ان أحسن الناس أحسنت وإن أساؤوا أسأت ولكن وطنوا أنفسكم ان أحسن الناس ان تحسنوا وان اساؤوا اجتنبو اساءتهم"

أنا معاك قلبا وقالبا

ولي عودة ان شاء الله لأتحدث عن سلوكيات أخرى أتمنى أن يتحلى بها المسلمين والمصريين بصفة عامة

وفقك الله إلى ما يحب ويرضى

[م تيمور المراغي]

انت مبدع في المسانده النفسيه يا مكاوي وانا اشهد لك

وخلفك يا حبيبي بكل دعم ومسانده- بس ابعدني عن امن الدوله ابوس ايديك ههههههه :happy:

اسال الله سبحانه ان يسدد خطاك وينفعنا بكلماتك

انه قريب مجيب ,,

[mekkawy]

ولي عودة ان شاء الله لأتحدث عن سلوكيات أخرى أتمنى أن يتحلى بها المسلمين والمصريين بصفة عامة

وفقك الله إلى ما يحب ويرضى

السلام عليكم

أبو عمار الغالي

يا ريت يا ريت تجيبلنا 34 فكرة كدة حلوين من عندك (و متسألش ليه 34) نضيفهم على الأفكار دي .. و يا ريت تبدأ تنفذ و تحكيلنا ايه الأخبار

الحقيقة أنا بدأت و هأحكي بس شوية كدة نفسي أشوف مشاركات غيري في الموضوع :) طبعاً بعد حضرتك و أرك الغالي.

تحياتي و دعواتي

مكاوى