يوميات مشرف فى المنتدى ‍‍‍!!!

[حشيش]

أرجو أن يتقبل الأخوة فى فريق الإشراف موضوعى هذا بصدرٍ رحب وقلب ٍ مفتوح وكف ٍ غير ممدود ومقص ٍ غير مسنون وأعتذر عن عدم كتابة ألقاب مثل أستاذ أو الأخ الفاضل فالمقامات محفوظة والشكك ممنوع والزعل مرفوع mfb:

هشام: يافتاح ياعليم يارزاق ياكريم....صبحنا وصبح الملك لله...شغلانة ما يعلم بيها إلا ربنا... إيدك معايا يالانس علشان نفتح الساعة داخلة على سبعة والنهار شقشق

لانس: سمى انته وادخل ياهش....أنا عايز أنام شوية

هشام: ياجدع قوم بلاش كسل...المواضيع كتيرة ولسه على ما نقرأ ونفرز ونشوف إيه اللى حنخليه وإيه اللى حنحذف منه وإيه اللى حنحرقه بجاز

لانس: أهو سى السيد ورجب ومحمد أبو زيد جم أهم...خليهم يبتدوا معاك على ما احلق دقنى واتشطف

سى السيد: على فكرة ياجماعة الواد حشيش ده زهقنى من عيشتى... أنا مش ملاحق عليه....ده تشوفولكم صرفه معاه

محمد أبو زيد: أنا رأيى إن حشيش ده نعامله معاملة فاقد الأهلية

رجب: حشيش مش فاهم هوه بيقول إيه...الدور والباقى على كليو ومحبط وسى فود وكفاية ...مثقفين زيادة عن النسب المسموح بيها فى أى منتدى....كلام فى الدين شوية والسياسة شوية والإرهاب شوية وابن لادن شوية لما الضغط ابتدى يعلى عليا....انتم عارفين العنيين مفتحة علينا الأيام دى... وعشان يقلوظوا السلطنية علينا تلاقيهم فجأة نقلوا عالموسيقى والفن التجريدى علشان ننسى الكلام التقيل

محمد أبو زيد: أنا شايف إن أخطر الموجودين على الإطلاق لايت هاوس.....عامله ركن للسلطة فى باب المطبخ وسببت لى مشاكل فى البيت مع المدام

داروين: وسع ياجدع أبو الداروين وصل...صباحين وحته....مين بس اللى مزعلكم وانا احذفه من عالخريطة.....أنا فيه إتنين تلاتة اربعة مربيين دقونهم وكل واحد فيهم عامل فيها شيخ الإسلام وهمه فى التوهان خالص....شفت اللى بيقول قتل السياح حلال...ده حنسكت له ولا حنبقى رجالة ونقف وقفة رجالة وكل ماحد منا يشوفوه يروح لازقه إنذار لحد ما يزهق من عيشته ويخلع لوحده

إبن مصر: إحنا معاك يابو اسماعيل.....لازم نقف لهم وقفة رجالة...قتل السياح حرام وجوازعتريس من فؤادة باطل....اللى عايز يجاهد يجاهد هناك فى الخرابة ما يجيش يجاهد هنا فى سينا

إسو: أنا رأيى إن الفرخة وهيا بتعبر الطريق داست على كل اللى قدامها....نتعلم من الفرخة ياجماعة مش عيب....اللى مش عاجباه قواعد الكتابة هنا ندوس عليه أو أقل ما فيها ننتف ريشه

سى السيد: عفارم يا إسو...هيا دى...ننتف ريشه....فكرة بمليون جنيه...بعيد عن الإنذارات واللبش...ننتف ريشهم يعنى نعريهم...هيا دى

سلوى: أنا ضد العنف فى الحوار ياجماعة....مش كل ما نختلف مع واحد فى الرأى ننتف ريشه...خلينا نتحاور معاهم حوار راقى يانقنعهم يا يقنعونا

هشام: يامدام سلوى معلش مع إحترامى فى كام واحد جايين جداد هنا محتاجين شوية ترصيص وظبط زوايا

يتبع

[mohamed]

جامد اوى يا حشيش

الى الامام ونحن وراءك clwn:

mfb: :blink:

تم تعديل 20 نوفمبر 2004 بواسطة mohamed

[se_ Elsyed]

برافو عليك يا شيشو ... هو ده النقد البناء .... إتكلم يا حيشي .. إتكلم بلا خوف ... بلا إيه ؟

برافو عليك .. بلا خوف mfb: me0: ax: ax: ... وصدقني هاتلاقي صدرنا أوسع من صدر بابا اللي إنت بعثت له جواب وماعبركش بأي رد .. وبعت الناس بتوعه عشان يوجيبوا معاك ..

إحنا في بلد ديمقراطي يتمتع فيه كل فرد بحرية التعبير ...

وفي الآخر كلنا عايزين إيه غير مصلحة البلد والمحاورات ...

قول يا حشيش قول .. النهاية قربت وكل شيء هايبقى تمام .

[ماجد]

يا عم حشيش انا بصمتلك بالعشره .....

:blink:

انت فاكهة المنتدى

و لعلى أقول فراولة المنتدى ....

هى فراولة مذكر ولا مؤنث.

على العموم لو طلعت مؤنث .

تبقى فراول المنتدى :huh:

تعرف انا عملت ايه امبارح .

جبت جميع مداخلاتك و قعدت اقراها

و منك لله ..

قعدت اضحك لما جنابى وجعتنى و نمت و انا تعبان

لذلك ......

كلنا ياعم معاك و قول ولا يهمك من المشرفين.

و لو حصل كده fsh::

ولا كده mfb:

فكلنا ها نكون كده clwn:

تم تعديل 20 نوفمبر 2004 بواسطة ماجد

[حشيش]

عقلى الباطن: حاسس إن تأكيدات محمد وماجد إنهم حيقفوا معايا إذا جد فى الأمور أمور حتطلع فشنك وانى أنا اللى حلبس الموضوع لوحدى  :blink: ...... سى السيد عايز يستدرجنى بدعوى الديموقراطية فى الحوار لحد مالاقى نفسى فى معتقل المغول اللى عامله إبن مصر تحت الأرض  mfb: ....لازم أكون حذر  :blink:

عادل أبو زيد: ياجماعة أنا عايزكم تفتحوا عينيكم وتراقبوا الناس كويس.....الفترة دى حرجة وحساسة فى تاريخ المواطنة.... وعايزكم كمان تخزقوا عينين أى واحد يقول على المكان ده (منتدى)...المكان ده إسمه (محاورات المصريين) ;) ......دلوقتى تقدروا تتفضلوا على مكاتبكم جتكوا الغم :angry:

سى السيد هامساً فى أذن لانس: إيه العبارة...مال البيج بوس كارف علينا كده....اللى يسمعه يفتكر إننا بنعبى فى فلوس من ورا الشغلانة دى .... أنا الشغلانة دى لولا إنها عاملالى بريستيج ولا كنت قبلتها .... إنته عارف إنى كان نفسى من زمان أبقى مشرف إن شالله حتى على دورة ميه

لانس: عارف يابو السيد أنا زيك بالظبط ...إنته عارف إنى كان نفسى أدخل كلية الشرطة عشان تبقى فى إيدى سُلطة بس مجموعى فى الثانوية العامة طلع كبير غصب عنى فاضطريت أدخل كلية الهندسة وبعدين كمان مكنتش حتقبل فى الشرطة عشان عندى تقوس فى الساقين :blink:

إسو: ممكن نبطل رغى شوية ونشتغل شويتين....الجدع اللى كاتب موضوع إيه الفايدة من ورا المنتدى ده عايزين نحول أوراقه لفضيلة المفتى

محمد أبو زيد: هوه المفتى فاضى لنا ياإسو :angry: ....المفتى بيحضر من دلوقتى علشان هلال ذى الحجة....إنته عارف إن فيه فرق يوم بينا وبين السعودية.....إحنا نصفى الجدع ده من سكات...فى العزومة الجاية فى جنينه مول يكون إبن مصر وسى السيد راكبين موتوسيكل ومعاهم كلاشنكوف....وأول ما يشوفوه داخل المول يصفوه ويهربوا mfb:

إسو: وأنا عليا حجيب لكم صورته.....حخترق جهاز الكمبيوتر بتاعه وأدعبس فيه على صورة له يكون مخزنها على الجهاز :ph34r:

رجب: أنا ضد التصفية الجسدية....إحنا نعمل معاه زى ما عملوا مع قنديل بتاع جريدة العربى الناصرى.....يعنى وهوه رايح عالمول نخطفه فى عربية ونطلع بيه عالطريق الصحراوى ياخد اللى فيه النصيب ولا من شاف ولا من درى

إبن مصر: تعالوا بسرعة....الحقونى.....شوفتوا الموضوع ده f((:

[se_ Elsyed]

من 103 إلى 905

حشيش إبتدى يتجاوز الخطوط الصفرا يا فندم .. إمبارح يكتب رسالة لأبونا وعمنا كلنا صاحب الضربات الجوية الموجعة في الشعب المصري ... سكتنا وقولنا وماله سيبوه يتكلم إحنا في بلد ديمقراطي حر أو كما يقول البُعده الأمريكان we r in a free country

شويه ولقيناه عمال يسلخ في مشرفين المنتدى .. قصدي المحاورات وأبتدى لسانه يطرطش بكلام هنا وهنا ويفصح عن حقائق وكانه بيبقى معانا في المعمل وإحنا بنطبخ المسائل...

تحب سيادتك نقطع لسانه ونخلي واحدة من سيدات المجتمع قصدي المنتدى تعمل لنا عليه فتة بالخل والتوم وجنبها لسان محمر ...

ولا ناخد اللسان ونعلقه بمسمار على باب المنتدى في باب يالا بينا نتعرف على بعضينا عشان يبقى عبره لمن يحاول ان يُناطح الكِبار .. ( الموقف ده بيفكرني بفيلم مش فاكر إسمه بتاع لبنى عبعزيز وحسين رياض في الدور الوحيد الشرير له وماكنش لايق فيه .. لما قطع لسان الواد ةاللي كان عارف حقيقته .... )

في إنتظار أوامرك يا باشا ...

مشرفكم المخلص أبد الدهر 103 الشهير بـ س س ...

[se_ Elsyed]

حشيش .. عايز أقولك حاجة بجد وجديد والله ..

أخوك صايم الستة البيض اليومين دول .. فأول ما جيت النهاردة أفتح الجهاز ..طبعاً لازم أبص على مواضيعك عشان إنت حبيبي .. قوم إيه عيني كانت لسه مدغششة من قليت النيكوتين بتاع اقهوة الصباح في الدم ... فقريت عنوان الموضوع ده كالتالي " حشيش مشرف في المنتدى " آه والله !!

قولت نعم .. عادل أبو زيد عملها وبدل ما يديني العيدية راح مزحلقني في التشكيل الوزاري الجديد .. وهاقعد في بيتنا وأكل سميط وزبادي وانا اللي قايد لهم صوابعي الحداشر شمع ...وبعدين يختار مين بدالي ... حشيش !!!! أي نعم هو حبيبي بس برضوا لسه له 10 سنين عبال ما يبقى مشرف ...

المهم قولت أسمي وأدخل الموضوع يمكن تكون اوشاعات زي بتاعت الصحف الصفرا .. ولقيت موضوعك الظريف ده اللي بتخبط فيه في الحلل ...

إستمر يا حشيش .. شكلك كده أستويت وهاتقع قريب يا جميل وانا اللي هاستلأفك ...

س س حارس مرمى قديم .

[Cleo]

هشام: يامدام سلوى معلش مع إحترامى فى كام واحد جايين جداد هنا محتاجين شوية ترصيص وظبط زوايا

أفتكر الجملة دى جت على لسان إسو مش هشام.. ;)

[عصام]

من 103 إلى 905

حول ..

من 905 إلى 103 ..

الإشارة وصلت .. ksh::

إسمع يا 103 ..

سيبوه يتكلم ..

ماحدش يعمل له اى حاجة ..

إنتوا عارفين الناس مركزة معانا من ساعة ما فتح الموضوع ده .. mf)

خدوا بالكم الظاهر إنه تقيل أوى .. وفاهم

مش عايز حد يتعرض له .. لازم الناس تحس إن فيه حد بيعبر عنهم .. ودى فرصة مناسبة .. :D

سيبوووووووه خاااااااالص ... <_<

لكن ركزوا معاه من بعيد لبعيد .. :angry:

وعايزكو تجهزوا فضيحة .. .. تظهر لما يعدى الخطوط الحمرا .. ;)

عايز فضيحة كبيرة أوى أوى ...

مخدرات .. &&&& .. أى حاجة .. ودبروا لى سى دى زى بتاعة أبو الفتوح .. أو قضية كده زى بتاعة ابو غزالة .. أى حاجة من النوع ده ..

الحاجات دى تكون على مكتبى الصبح ... mfb:

يورينى بقى لما الناس تعرف إن زعيم التمرد والمتحدث باسمهم .. ممكن يكون له سى دى :blink:

مش باقولك سيبوووووه .... خاااااااالص

[se_ Elsyed]

مخدرات .. &&&& .. أى حاجة .. ودبروا لى سى دى  زى بتاعة أبو الفتوح .. أو قضية كده زى بتاعة ابو غزالة .. أى حاجة من النوع  ده ..

إنت بتتكلم في إيه يا 905 ؟!!!!

مخدرات إيه .. ده أبو الأحاشيش ملك المزاج كله.. يعني مش جديدة عليه ..

وبعدين سي ديهات إيه دي ؟!!! ده انت كده تبقى خدمته خدمة العُمر وممكن حشيش بشهرته وبعقله الجهنمي الأفتكاسي يتربح من بيع السي ديهات ويبقى مليونير في ظرف 3 شهور ...

أنا رأيي نعمل فيه زي ما عملوا في الراجل بتاع الحزب الناصري .. بس المرة دي نستلقطة ونعمل له كمين في البحرين .. وتصور حشيش راجع مصر من غير حاجة خالص ومن غير كرافته كمان زيادة في التعذيب ... شوف إنت بقى هايورينا وشه إزاي بعد كده ..

وده يبقى عبره لأي واحد يتكلم على الإشراف ...

خد إتنين رجاله من على القهوة يا إسو وإطلعوا على المنامة دلوقت في أول طيارة وإعملوا له الكمين في طريق المنامة - المحرق الزراعي واول ما يهل عليكوا بعربيته المميزة الـ 128 ترموا تحتها خشبة وفيها مسامير واول ما ينزل تنفذوا المُخطط ....

حول ...

[se_ Elsyed]

وبعدين أساساً إنت بتتكلم ليه يا سي إسو .. يابني إحنا مش قايلين لك أول ما اتعينت إن رقمك الوظيقي 713 ( تيمناً بالأتوبيس اللي بيروح روض الفرج ) يبقى ليه الخطوط ضربت عندك ؟

ولا سيادتك لقيت 713 زحمة قولت أخد 905 اوهو كلها اتوبيسات والسلام ؟!!!!

[عصام]

وبعدين أساساً إنت بتتكلم ليه يا سي إسو .. يابني إحنا مش قايلين لك أول ما اتعينت إن رقمك الوظيقي 713 ( تيمناً بالأتوبيس اللي بيروح روض الفرج ) يبقى ليه الخطوط ضربت عندك ؟

ولا سيادتك لقيت 713 زحمة قولت أخد 905 اوهو كلها اتوبيسات والسلام ؟!!!!

منك لله يا بعيد روووح ...

يابنى كده الأعضاء ممكن يفقسونا ..

ويعرفوا أنه "لا يشترط الحصول على أى مؤهل للانضمام لفريق الإشراف" .. stnd:: تقوم صورتنا تتهز .. والمستخبى يبان .. eey::

يا بنى هاتفضحنا .. أوتوبيس إيه وروض الفرج إيه ؟ <_<

أقولك .. أسكت خالص (طــــــاخ)

[حشيش]

يجتمع المشرفون حول إبن مصر فى فزع متسائلين (موضوع إيه !؟؟)

إبن مصر: ده موضوع مكتوب فى صفحة الحوادث فى أخبار اليوم مش هنا فى المنتدى sdm:

سلوى: ممكن تتكلم على طول ... أقصر الطرق إلى الحقيقة هى الطريق المستقيم

إبن مصر: قصدك أقصر الطرق إلى السجن f((:

ينتزع هشام الجريدة بقرف من يد إبن مصر قائلاً: ياأخى إنطق إحنا ناقصينك

يقرأ هشام المكتوب فى الجريدة بصوت مرتفع: مقتل عاملة مراحيض بجنينة مول....مسلحان يطلقان النار عليها ويلوزان بالفرار على موتوسيكل....النيابة تعد بفك غموض الجريمة خلال ساعات :rolleyes:

إسو: يعنى بدل ما نصفى الجدع بتاع إيه فايدة الكتابة فى المنتدى قتلنا الولية الغلبانة دى....Hard Luck smk:

إبن مصر: إنته يعنى بقيت أعمى البصر والبصيرة كمان.....إنته مش قلت حتخترق الجهاز بتاعه وتجيب صورته ؟؟؟....الصورة اللى إنته إديتنى أنا وسى السيد نسخة منها كانت صورة الست دى....

إسو: شئ غريب فعلاً دى شبهه تمام mf( ....بس إيه اللى جاب صورتها على الجهاز بتاعه....لازم ألاقى حل للغز ده ;)

عادل أبو زيد: لغز إيه وسخام إيه....الله يخيبكم....ده أنا لو معين أرنوب حسين بتاع حشيش بدالكم كان عمل شغل أنضف من كده....إنتم إيه مواطنين ولا متفرجين :o

داروين: ياجماعة إسو مالوش فى إختراق الأجهزة .... هوه بيحب يهول شويه لكن معندوش فكره... أنا رأيى نجند ماجد ولينوكس وفيروز مقابل مكافأة شهرية ..... خبرتهم كويسة فى المسائل دى

محمد أبو زيد: بلاش فيروز...لو خدت لها جوز اقلام فى القسم حتعترف علينا كلنا

سى السيد: لا حول ولا قوة إلا بالله.....ده أنا عملت فيها رامبو وأول ما شفت الوليه داخلة المول غنيت نشيد الولاء بتاع المنتدى وركعت على ركبى فى وضع الإستنفار وفضيت الكلاشنكوف فيها وبعد مالخزنة فضيت قلت لإبن مصر غطينى على ما أحط الخزنة التانية bk:

لانس: بالمناسبة إيه نشيد الولاء ده :P

سى السيد: (ماما زمانها جايه...جايه بعد شويه...جايبه لعب وحاجات) :o

يتبع

[Lighthouse]

كمل ياحشيش كمل

متابعين :rolleyes:

[ragab2]

رجب: أنا ضد التصفية الجسدية....إحنا نعمل معاه زى ما عملوا مع قنديل بتاع جريدة العربى الناصرى.....يعنى وهوه رايح عالمول نخطفه فى عربية ونطلع بيه عالطريق الصحراوى ياخد اللى فيه النصيب ولا من شاف ولا من درى

انت

غاوى تخبط فى الحكومات والسلام

شوية بابا وشوية ماما

ويظهر انك عاوزتتفسح زى عبد الحليم قنديل بتاع العربى

عشان تصدق ان فيه ديموقراطية

فى المحاورات

[حشيش]

رجب: الله يرحمها ويرحمنا جميعاً .... أنا بره اللعبة ....أنا كنت معترض على الفكرة من الأول :rolleyes:

هشام: مينفعش الكلام ده يادكتره ... إحنا فى مركب واحدة ... يانعيش سوى يانموت سوى f((:

عادل أبو زيد: سيبكم من الموضوع ده دلوقتى ... أنا كنت عايز أناقش فكرة كده معاكم

محمد أبو زيد: فداك أبى وأمى يابن العم ... خير اللهم اجعله خير :o

عادل أبو زيد: هوه قواعد الكتابة فى المحاورات حالياً كام صفحة

سلوى: 25 صفحة تحتوى على 3000 بند ;)

عادل أبو زيد: أنا عايزكم تخلوها 100 صفحة تحتوى على ما لا يقل عن 50000 بند ...لو عرفتم تخلوها أكتر من كده يبقى أحسن

سى السيد: عليا ب 200 صفحة .... رقصنى ياجدع :P

هشام: مش كتير كده يا عمى ... ده اللى مسجل جديد على ما يقراها تكون سنانه وقعت

داروين: ما هوه ده المطلوب ياكنج ... مش عايزين حد يقراها ... وصلت الفكرة يازغللة

سى السيد: فكرة بمليون جنيه ... الكبير كبير صحيح ... أستاذ عادل تسمح لى أقولك ياعمى bk:

لانس: ما تفهمونا إيه العبارة ياخوانا

إسو: يعنى اللى حيسجل جديد لازم يوقع إنه قرا قواعد الكتابة فى المحاورات ووافق عليها ... تمام

لانس: تمام

إسو: طبعاً لما يلاقى 100 صفحة تحتوى على خمسين ألف بند حيروح موقع من غير ما يقرا حاجة...تمام

لانس: تمام

إسو: خلاص سلم لى بقى عالمترو....أى حد يكتب حاجة ما تعجبناش نروح لازقينه إنذار ونقول له إجرى يله روح إقرأ قواعد الكتابة قبل ما تكتب داهية فيك وفى أيامك السوده mf(

إبن مصر: طب إفرض عضو غتيت وابن هرما قرا القواعد كلها قبل ما يوقع :o

محمد أبو زيد: من لم يمت بالسيف مات بغيره .... مين يعادينا ... هيه هيه

يتبع إذا لم يتم حذف الموضوع smk:

[ragab2]

ولا

يهمك ياحشيش

أكمل فكلنا نستمتع على جميع الأوجه

وبمواضيعك المتجددة المشوكة ( المشوقة )

ونشهد أنكم فاكهة المحاورات

وتملك الكلب الأبيض والكلمة الركيكة ( الرقيقة ) الباسمة

وملك الكصة الكصيرة

وبصراحة أنا من قراءك

تحياتى

[SilverSwan]

برغم اني جديده هنا و اكيد في كتير حاجات بتعبر عن شخصيات الاعضاء و المشرفين في كلام ووصف حشيش انا اكيد مش ملمه بيها كلها .. لكن بجد اسمتعت بالموضوع و الفكره كمان ظريفه جدا

:rolleyes:

[حشيش]

عقلى الباطن: لغاية دلوقتى تلاته من المشرفين كانوا لطاف معايا ومحذفوش حاجة :lol: ...... ياخوفى يابدران من الباقى  mfb: ..... لا بد أن أتحلى بالحكمة والحذر كعادتى دائماً  :blink:

[afiona]

:blink: mfb: .... :lol:

رهيب والله رهيب ... غير طبيعى يا حشيس ...