سؤال عن استثمار يا اولاد الحلال

[egyptforever]

بعد ان بلغت من العمر ارزله 31 سنه و شهرين

و بعد ان قضيت في الغربه 31 سنه الا شهرين

فكرت اني ارجع مصر

و سمعت عن حته اسمها مرسى علم بيقولوا الاستثمار فيها مستقبله حلو اوي

و خصوصا ان الكوايته هنا بيشتروا فيها من غير حساب

فياترى حد عنده فكره عن الموضوع ده و ايه حكايته بالظبط

اي معلومات مؤكده عن الاراضي و سعرها و المشاريع اللي بتتنفذ فيها

سؤال كمان ( وش واحد انتهازي )

ايه اخبار البورصه في مصر ؟؟ ماشي حالها ولا متستاهلش

اصل البورصه دي الشغله الوحيده اللي بافهم فيها

ساعدوا اخوكم الغلبان

[egyptforever]

يا نهار مش فايت

ده انا جاي و فاكر اني هلاقي شرح تفصيلي مفصل عن مرسى علم

ولا حد يعرف اي حاجه

معلومه لوجه الله هتدخلوا بيها الجنه

حتى البورصه محدش يعرف عنها حاجه

هتضيعوا على مصر مستثمر ب 175 قرش

[Mohammad Abouzied]

مرسى علم فعلا محمية كويتية زي ما بتقول كدا وفيها مطار دولي خاص بناه عبد المحسن الخرافي الكويتي الجنسية والثري المعروف

ومرسى علم فعلا مستقبلها واعد فعلا لو لم تقع فريسة للروتين الحكومي الذي بالتأكيد سوف يصيبها اجلا او عاجلا

وهي حتى الان تقيم مدن ترفيهية للسياح خاصة لقربها من قنا والاقصر واسوان

والمخطط لها ان تكون بوابة مصر الجنوبية لاستقبال ابناء النمور الاسيوية الصاعدة من كوريا ومليزيا وسنغافورة وغيرة من البلاد التي اتخذت من طريق الاصلاح الصلاحي منهجا بعيد عن الفكر اليساري الذي كان سائد لديها من قبل

من الناحية الاعلامية لم تنال منطقة مرسى علم نصيبها العادل مثل مشاريع الغردقة والعين السخنة وباقي الساحل الشرقي للبحر الاحمر

المنتظر في المستقبل تطوير ميناء مرسى علم لتصدير منتجات توشكي للبلاد العربية ودول اسيا وافريقيا

[Mohammad Abouzied]

هذه بعض الاخبار عن مرسى علم

[Mohammad Abouzied]

وهذا موقع محافظة البحر الاحمر

[Mohammad Abouzied]

وهذا موقع مطار مرسى علم

[Mohammad Abouzied]

اذا حبيت اي معلومات اخرى

حددها وانا سوف ابحث لك عنها

[egyptforever]

شكرا يا استاذ محمد على المواقع بس معلش هازعجك شويه كمان

اصل التليفونات الموجوده اصيبت بلعنه البيروقراطيه و محدش بيرد فيها

انا سؤالي عن سعر المتر علشان من 6 شهور كان بيعلنوا عن مرسى علم و الاعلان كان بيقول المتر بدولار

فياترى العمليه دي خلصت ولا لسه موجوده

و هل الحصول على موافقه قرى سياحيه في المنطقه برضه خاضع لكل اجراءات القرى السياحيه في بقيه مصر

و شكرا مقدما

[Cleo]

فيه حد عاقل برضه يحط فلوسه فى البلد دى..!!!!

(وش واحد بيكسر المقاديف بس سمكن سكون عنده حق)

[Sharkiah]

بعد ان بلغت  من العمر ارزله  31 سنه و شهرين

و بعد ان قضيت في الغربه 31 سنه الا شهرين

فكرت اني ارجع مصر

و سمعت عن حته اسمها  مرسى علم بيقولوا الاستثمار فيها مستقبله حلو اوي

و خصوصا ان الكوايته هنا بيشتروا فيها من غير حساب

فياترى حد عنده فكره عن الموضوع ده و ايه حكايته بالظبط

اي معلومات مؤكده عن الاراضي و سعرها و المشاريع اللي بتتنفذ فيها

سؤال كمان ( وش واحد انتهازي )

ايه اخبار البورصه في مصر ؟؟ ماشي حالها ولا متستاهلش

اصل البورصه دي الشغله الوحيده اللي بافهم فيها

ساعدوا اخوكم الغلبان

أخى العزيز

ماتطالب به ـ ومن واقع دراسه ـ هو المستحيل بعينه ، نعم هو تعريف مبسط لكلمه مستحيل ، يعنى ببساطه إمكانيه حدوثه مستحيله

بيعرفوا علم الfinance بكلمات بسيطه وقليله على إنه creation, maintenance and augmentation of value يعنى إزاى أخلق وأحافظ على وأنمى القيمه من خلال العمل إللى ألتحق به كمؤسسه أو كفرد ، وعلشان أحدد أساسا إيه العمل إللى ممكن ألتحق به أو أستثمر فيه فلوسى وأحافظ على وأنمى القيمه فهذا ليس بالشئ الهين إطلاقا ، فلازم أولا أعرف ما هى قدراتى إللى ممكن أترجمها فى صوره سلعه أوخدمه أقدمها لمستهلكين فى سوق معين عندهم الرغبه فعلا أو ممكن خلق الرغبه لديهم فى سلعتى أو خدمتى وماهى الميزه التنافسيه إلى هاأقدمها لهم لكى أحصل على شريحه من منتجيين حاليين همهم أن ينموا شرائحهم وليس فقط الحفاظ عليها ، وإيه هى شروط وضوابط وملابسات الدخول إلى والخروج من السوق وماهو حجمه وماهى حجم المنافسه فيه وماهى إستقراءات أحواله فى المستقبل القريب والبعيد و التطورات المتوقعه لحاله المنافسه والقوانين المنظمه للعمل فيه ، ولو تأكدت من كل ده وإن نتائجه كلها إيجابيه وفى صالحى وإن هناك فرصه معقوله للدخول فى السوق الذى إخترته فهذا ليس كل شئ بل إنه أهونه ، فالصعب والعسير هو تحويل كل ده إلى أرقام أو حقائق كميه حتى أتخذ قرار الإستثمار من عدمه ، كم رأس المال اللازم ؟ كم حجم السيوله المبدئيه اللازمه ؟ ماهى التدفقات الماليه الداخله والخارجه ؟ كم سيبقى من قيمه فى نهايه أجل المشروع ؟ ومن كل ده نستطيع أن نحسب بطرق معقده بعض الشئ العائد المتوقع على رأس المال وهو شئ لاقيمه له فى المطلق بل بمقارنته بأشياء أخرى ومعايير مختلفه حتى يصبح له قيمه تساعد على إتخاذ القرار ، فمثلا من أبسط وأسهل المؤشرات المستخدمه فى هذا الصدد هو مقارنه العائد المتوقع بعائد الفرصه البديله أو ال opportunity cost وهو ببساطه ثانى أفضل بديل بعد المشروع المراد تقييمه ، قد تكون مثلا إيداع رأس المال فى صوره وديعه فى البنك أو شراء سندات حكوميه أو غير حكوميه أو إستثمار فى مشروع آخر

ولذلك فكل ده ياأخى لايمكن أن يأتى من خلال دردشه ولا قعده مع أصحاب ولامناقشه فى محاورات ، ده عايز تعب وعرق ومجهود شهور وأحيانا سنين ، ولو حد عنده خلاصه كل ده متاح فمن البديهى أن يستغلها لنفسه ولو أعطاها للغير يكون بفلوس وليس مجانا ، وهذا ببساطه ماتفعله المكاتب الإستشاريه المتخصصه

أما بقى مرسى علم وإستثمارك هناك فإسمح لى أنا مش فاهم على أى أساس جائتك هذه الفكره ؟ ده هو المستحيل الخامس مش الرابع كمان

ليه ؟؟؟؟؟؟

لأن مرسى علم وكل المناطق السياحيه المرموقه دى الإستثمار فيها من المحتم ـ رغم إنى شخص عادى ولا أملك القدره على الإطلاع على بيانات دقيقه ـ أن يكون على scale عاااااااالى جدا وبرؤوس أموال غايه فى الضخامه

ليه ؟؟؟

لأنه سوق تكون خلاص وأصبح له حدوده ومعالمه وأدبياته وطبيعته من مستهلكين ومنتجين ومعايير جوده ، وهذا السوق أنشأه من العدم وخلق معاييره منتجين من ذوى الوزن الثقيل ومن ذوى رؤوس الأموال الضخمه للغايه ولذلك فدخول مشروع كمنافس لهم من ذوى رؤوس الأموال الصغيره محكوم عليه بالفشل الذريع التام مقدما

ليه ؟؟؟؟؟؟؟

لأن المشروعات الضخمه قدرتها التنافسيه أكبر من المشروعات الصغيره للحد الذى يمكنها من إفتراسها وطردها خارج الأسواق تماما وذلك ببساطه شديده لأن التكلفه الثابته ـ التى لاتتغير بتغير حجم الإنتاج ويستوى فى تكبدها المشروعات الصغيره والكبيره ـ يتم تحميلها على عدد وحدات منتجه أكبر فى حاله المشروعات الضخمه وبالتالى تقل التكلف الكليه للمنتج وبالتالى تزيد الأرباح وبالتالى يستمر تقدم المشروع وتطوره وبالتالى يحتكر الأسواق المشروعات الضخمه (وهذا بالمناسبه هو أول أثر إقتصادى سيئ للعولمه وهو مايثير حفيظه مضادى العولمه فى شتى مشارق الأرض ومغاربها ، فقد إندمجت إكزون مع موبيل ليخسر الكثيرين فى الشركات الصغيره وظائفهم لأن شركاتهم قلت حصصها فى السوق تلقائيا)

الإستثناء لما سبق وقدرتى كمشروع جديد صغير على منافسه العمالقه من ذوى العضلات المفتوله هو أن أخلق سوق جديد ، سلعه جديده أو مايسميه الإقتصاديينincrease of supply وهو مختلف عن الincrease of supply quantity ، يعنى إزاى أخلق عرض جديد أزود به العرض كيفا وليس زياده العرض الحالى كما ، فهل إنت عندك القدره على عمل مشروع تقدم من خلاله فى مرسى علم خدمه أو سلعه لاتقدمها المشروعات العملاقه ؟ مثلا زى ما club med خلق سوق لخدمه فندقيه بدون أى خدمات للنزلاء من أكل وشرب وتجهيزات للغرف ، فقط مرتبه على تبه أسمنتيه وقال أنا أخاطب وأقدم سلعتى لراغبى الترفيه فقط ممن لايريدون خدمات فندقيه وبرع فى تقديم خدمات الrecreation أو الترفيه بكل أنواعه فخلق سوق جديد لنفسه وإستطاع العيش جنبا إلى جنب مع العمالقه

وهناك العديد من الأمثله مثل ما سبق

فهل عندك أنت الجديد الذى ستخلق به سوق فى مرسى علم بجانب العمالقه ؟

أنا لا أثبطك ولا أكسر مجاديفك ، أنا فقط أنبهك لأن الكثيرين ممن أعرفهم خسروا الجلد والسقط فى مغامرات مثل التى تفكر فيها ، منهم واحد على سبيل المثال مهندس زراعى إشترى أرض زراعيه فى الأراضى المستصلحه وتعب وعرق وصرف وفحت وبذر وروى وزرع وحصد ولكنه كان قد أغفل جانب التسويق تماما فلم يستطع مجاراه الحيتان الذين جاءوه بعد ذلك يعرضوا عليه شراء محاصيله بأبخس الأثمان وعندما أراد التملص منهم حتى من باب عدم الرضوخ لإبتزازهم أرسلوا له من قال له هانضربك علقه ماخادهاش حرامى فى مولد

خلينا نتكلم فى مداخله منفصله بالنسبه للبورصه

[egyptforever]

اخي العزيز شرقيه

في البدايه شكرا على التوضيحات و متهيألي كل واحد لازم يستفيد منها

بس بالنسبه لموضوع الاستثمار في مصر فالموضوع مش جديد عليا على الاقل من حيث الدراسه المبدئيه

فالسوق المصري و خصوصا السوق السياحي سوق واعد جدا جدا يمكن الناس اللي في مصر ميعرفوش كده يمكن رغبه من الحكومه انها تمنع اي استثمار مصري و تخلي الاستثمار اجنبي

فموضوع دخولي السوق المصري كان متحدد من اكثر من سنتين و كان المفروض انه هيتم في منطقه سهل حشيش لو تسمع عنها جنب الغردقه بس الظروف وقتها ما سمحتش و اتأجل المشروع

فدخول السوق المصري هو قرار استراتيجي (وش واحد عبقري )

على الرغم من تأكيدات العزيزه كليو ان الموضوع ضياع فلوس ( وش واحد بيكنز الباقي في سويسرا )

اما بالنسبه لمرسى علم ففكره الاستثمار في مرسى علم جتلي من نقطتين مهمين جدا

الاولى : ان الكوايته هنا بيشتروا فيها سيبك من الخرافي اغنر رجل في الوطن العربي انا باكلم عن طبقه رجال الاعمال العاديين و الكوايته – و اسالني عليهم – بيسموا نفسهم يهود الخليج ( احنا بنسميهم يهود العرب ) و اليهودي ميرميش فلوسه في الارض ابدا

النقطه التانيه : و دي نصيحه لكل المصريين المشاركين اي فرصه تتواجد قدام اي واحد لشراء ارض في منطقه جديده و خصوصا في مصر لا يتردد لو جينا مسكنا المناطق الجديده من 30 سنه هنلاقي العجب العجاب 6 اكتوبر – مدينه نصر – التجمع الخامس – القاهره الجديده – العاشر – العبور و غيره و غيره كلها اسعارها بقت خياليه افتكر جدي الله يرحمه اتعرضت عليه سنه 65 ارض في مدينه نصر المتر بقرش صاغ و الراجل استخسر يدفع اكثر من 25 جنيه و خد بس 2500 متر شوف دول النهارده تمنهم كام خصوصا مصر الاستثمار في الجديد مربح علشان مصر بلد كبيره المساحه و توسعها من 30 سنه فاتوا و ل 100 سنه جايين و اكتر هيكون توسع افقي و ده معناه مدن جديده و ارض جديده

اما بالنسبه لمرسى علم و انتهاء الاستثمار فيها فدي عايزه شويه شرح في مداخله خاصه

[egyptforever]

نيجي بقى نتكلم عن مرسى علم بالذات

انا مش خبير سياحي بس خبير بالحكومه المصريه

الحكومه المصريه مادامت اعلنت من 3 شهور عن توافر اراضي للبيع بالمبلغ ده يبقى اكيد الموضوع وراه حاجه

لو كان الاستثمار انتهى في مرسى علم و تشبع مكنش ممكن تتبع اسلوب اجتذاب كبار صغار المستثمرين

على العكس كنت هتلاقي المنطقه اتحولت لمنطقه مقفوله لناس معينه زي جولف السليمانيه و جولف القطاميه

فالحكومه المصريه عندها نظريه جميله جدا و تلاقيها كمان موجوده في البورصه على حسب ما سمعت

لابد من وجود كبار صغار المستثمرين في كل موقع او مشروع الى حين ...............

بالطريقه دي تضمن الحكومه و طبعا رجال الاعمال الكبار وجود ضحيه لتقلبات السوق

اللي طبعا من الطبيعي انهم هيكونوا هذه الفئه من المستثمرين

الحكومه المصريه من جهه اخرى بتربي للمستثمرين الكبار علشان ياكلوا على الجاهز

لو خدت نظره على مناطق السياحه في شرم الشيخ و نويبع و دهب و سيدي عبد الرحمن و سيدي كرير و الغردقه و البحر الاحمر و سهل حشيش هتلاقي نسبه كبيره جدا من اللي اسسوا القرى و المناطق السياحيه دي هو كبار صغار المستثمرين بس مع ظهور المناطق دي كمكاسب سياحيه دخل الحيتان الكبار و خدوا كل حاجه فمرسى علم لسه عليها شويه قبل ما تتحول لمنطقه نفوذ الحيتان الكبيره

طبعا السؤال اللي ممكن يتسأل طيب مادام في النهايه الاستثمار هيضيع ايه لازمه المخاطره ؟؟؟

الرد ان الاستثمار مش هيضيع المهم امتى تحدد الوقت المناسب للخروج من السوق زي ما انت قلت يا اخ شرقيه بس في الحاله دي المكسب هيكون اضعاف مضاعفه في حاله اختيار الوقت المناسب

اخيرا كل الاستثمارات الكبيره بتحتاج الى استثمارات مساعده او مسانده بتهتم باشياء بسيطه مش من مصلحه روؤس الاموال الكبيره انها تدخل فيها و تعطل السيوله فيها هنا بيكون دور كبار صغار المستثمرين

[Sharkiah]

عموما من الواضح إنك عملت إللى أنا كنت بأتكلم فيه :unsure: ، أو جزء كبير منه ، وأنا لم أكن فهمت ذلك ، يعنى إنت لاتتكلم from scratch بل أمضيت وقت فى تجميع معلومات

ولذلك فلا يسعنى إلا تمنى التوفيق لك والدعاء للمولى بأن يجعل النجاح حليفك

ولكن أنا مازلت مختلف معك تماما ـ إسمح لى ـ فالأمر ليس بالبساطه إللى لمستها فى كلامك ، وخاصه لو كنت لاتملك خبره فى مجال المشروعات السياحيه

أما إذا كنت تقصد مجرد شراء أراضى أو مبانى ، فأوافقك ومن دون أى تردد ، خدها من عبدالله وإتكل على الله ففى كل الأزمان والبلدان والثقافات والظروف لايوجد فى أى بقعه فى العالم أضمن من الreal estates للإستثمار ، قاعده لايوجد لها أى إستثناء بدون أى مبالغه ، اللهم إلا خطر الحروب

وأخيرا أرشح لك بشده طرق باب الsmall businesses فى مجال إنت تملك فيه خبره وعلم أو human capital بالمختصر المفيد ، حيث المخاطره أقل والمتطلبات أضيق وفرص التراجع أثناء المضى فى الطريق أكبر

وربنا يرزقك رزقا واسعا بغير حساب

[egyptforever]

طب كمل جميلك و الحقني بموضوع البورصه

علشان انا سمعت ان البورصه في مصر مختلفه كليا و جزئيا ( وش مدرس عربي ) عن باقي دول العالم

لو تعرف اي حاجه عن البورصه المصريه من حيث القواعد و القوانين علشان الموضوع ده مبهم جدا

بالرغم اني بادخل على مواقع وسطاء في مصر بس محدش بيديلي معلومات استفيد منها

جزاك الله خير