تغيير قانون العمل والعمال السعودي

[se_ Elsyed]

صادق مجلس الشورى السعودي بالأمس على مشروع نظام قانون العمل والعمال السعودي الجديد ..

وبس محتاج فرصة بسيطة امخمخ فيه وأضع لكم نسخة منه هنا .. وأبقى اجوب على أي إستفسار للزملاء العاملين بالمملكة

[Modest]

و نحن في الانتظار يا سي السيد ... حقيقي موضوع مفيد جداً .... جزاك الله خيراً على إفادتنا.

أخوك مايعرفش إن فيه هنا قانون للعمل و العمال من أصله.

[se_ Elsyed]

و نحن في الانتظار يا سي السيد ... حقيقي موضوع مفيد جداً .... جزاك الله خيراً على إفادتنا.

أخوك مايعرفش إن فيه هنا قانون للعمل و العمال من أصله.

إديني فرصة تانية أثبت لك فيها حُبي يا موديست .. أصل لقيتهم 245 مادة .. يعني عيني هاتتمقق على ما أشوف إيه اللي إتغير وإيه اللي جد وكده ..

[MZohairy]

الحقنا ياسي السيد بالمتغيرات يمكن الواحد يلغي فكرة عمان لو الموضوع فيه حاجات بصحيح مش كلام فاضي

[montaser]

السلام عليكم ،،،،

ردا على الأخ إللي بيقول بأنه مفيش قانون من أصله

أحب أن أوضح له بأنه لا توجد دولة في دول العالم تعيش بدون قانون .

جميع القوانين الموجوده في الدول يعمل بها ، وإن كان بعض الأفراد يعملون بما هو في صالحهم بصرف النظر عن ضياع حقوق للآخرين ، فهذا شىء فردي وليس قاعدة عامة تطبق على الجميع .

لقد سمعت من أشخاص يعملون في السعودية ودول الخليج الأخرى ، بأن الشركات التي يعملون بها تطبق القانون بحزافيره في جميع شئون الشركات التي يعملون بها ، من أجازات أو مستحقات وغيره من هذه الأمور .

وأخيرا ،،،،،،،،،، القانون فوق الجميع ،،،،،،،،،

والقانون

[Modest]

السلام عليكم ،،،،

ردا على الأخ إللي بيقول بأنه مفيش قانون من أصله

أحب أن أوضح له بأنه لا توجد دولة في دول العالم تعيش بدون قانون .

و عليكم السلام و رحمة الله و بركاته

شكراً على التوضيح بأنه لا توجد دولة في دول العالم تعيش بدون قانون و على باقي المحاضرة ... بالتأكيد كل دولة بها من القوانين ما يُنَظِم كل أمورها و لكن الأخ اللي انت تقصده قال بالضبط:

أخوك مايعرفش إن فيه هنا قانون للعمل و العمال من أصله

يمكن لإنه لم يحتاج إليه إلى الآن و أيضاً واضح من الأسلوب أنه يتدلل B) على سي السيد ليستفيد منه في معرفة قانون معين صَدَر و يهمه أن يكون مُلِماً به من أهل الاختصاص.

بس كده.

[se_ Elsyed]

هدوا نفسكوا يا جماعة .. في قوانين وكل حاجة .. بس على ما يبدو إن القانون الجديد مش معمول لنا .. لإن طبقاً له ولو طُبق بحذافيره يبقى احنا كلنا ياللي أجانب هانبقى في الباي باي ..

وإلحج لم خلجاتك وبيع الآنترية والغسالة الهاف اتوماتيك عشان تغتنم فُرصة عُمان يابا الحاج زُهيري جبل لا تطول ده ولا دا ...

فشوف اهم مادة في القانون الجديد بتقول لك إيه :

المادة السادسة والعشرون ... البند الثاني : يجب ألا تقل نسبة العمال السعوديين الذين يستخدمهم صاحب العمل عن 75 % من مجموع عُماله ، وللوزير - وزير العمل - في حالة عدم توافر الكفاءات الفنية أو المؤهلات الدراسية أو تعذر إشغال الوظائف بالمواطنين أن يُخفض هذه النسبة مؤقتاً..

والله يكرمك إطلع عُمان وإبقى إستطلع الجو هناك وشوف لإخواتك هنا حاجة ..

وسوف نوافيكم ببقية بنود قانون العمل ...

هنا الرياض ...

[Tafshan]

شوف اهم مادة في القانون الجديد بتقول لك إيه :

المادة السادسة والعشرون ... البند الثاني : يجب ألا تقل نسبة العمال السعوديين الذين يستخدمهم صاحب العمل عن 75 % من مجموع عُماله ، وللوزير - وزير العمل - في حالة عدم توافر الكفاءات الفنية أو المؤهلات الدراسية أو تعذر إشغال الوظائف بالمواطنين أن يُخفض هذه النسبة مؤقتاً..

والله يكرمك إطلع عُمان وإبقى إستطلع الجو هناك وشوف لإخواتك هنا حاجة ..

وسوف نوافيكم ببقية بنود قانون العمل ...

هنا الرياض ...

jmb-)

هنا القانون 2 % مواطنين و مش عاجبنا !!!!

[se_ Elsyed]

الحاجة اللي مارضيتش أقول لكم عليها وبالتأكيد في بعضنا عرف معلومات عنها هي إن وزراء العمل في دول الخليج كانوا لسه عاملين إجتماع موسع قريب يمكن من إسبوعين وبيناقشوا قرارات للحد من العمالة الأجنبية ... أقل ما توصف هذه القرارات بإنها هلامية وخزعبليه وهم جادين في ذلك ..

ولو تحبوا أكلمكم عنها أنا مستعد .. بس ماليش دعوة ماترجعوش تقولوا " ليته سكت " أو منك لله يا س س وجعت بطننا ..

[MZohairy]

الله يفتح عليك ياسي السيد والله العظيم نورت المحكمة

بس مينفعش آخد معايا الأنتريه والغساله الهاف اوتوماتيك لعمان ولا لازم ابيعهم قبل ماسافر؟

وهل كل انواع الانتريهات تم ذكرها في القانون الجديد ولا فيه استثناءات كالجلد مثلا؟

[MZohairy]

خلينا في الجد شويه انا سمعت ياسي السيد ان نقل الكفالات سيتوقف مؤقتا لفتره غير معلومه من أول محرم

ايه معلوماتك؟

ويارب متكونش غامقه زي اللي قبلها

[se_ Elsyed]

خلينا في الجد شويه انا سمعت ياسي السيد ان نقل الكفالات سيتوقف مؤقتا لفتره غير معلومه من أول محرم

ايه معلوماتك؟

ويارب متكونش غامقه زي اللي قبلها

للآسف غامقة غطيس يا با الحاج زُهيري ..

فقد أعطى الوزير الجديد غازي القصيبي مهلة للشركات السعودية حتى نهاية السنة الهجرية الحالية لكي توفق أوضاعها من ناحية الكفالات وبعد كده هاتبقى أيام أسود من قرن الخروب ..

وسيقتصر نقل الكفالات على المهن العُليا الغير مسعودة ومنها على سبيل المثال المهن المتعلقة بالمجال التقني والطبي والباقي بقى يبقى كل واحد مع نفسه وخصوصاً المحاسبين ( إحم إحم ) ومندوبي المبيعات والاعمال الإدارية .. يعني زي كده بالظبط ما تروح لدكتور ويقولك ماتاكلش المحمر والمشمر ولا النشويات وإبعد عن البقول واللحوم الحمر والبيضا والسمك .... وبعد كده كل اللي إنت عايزه .

يعني تصور لما يلغي نقل كفالات العُمال العاديين ..يبقى شركات المقاولات التي تعتمد على تلك النوعية من العمالة وبكثرة يعملوا إيه ؟ .. يعني ما فيش شركة إلا وفيها مئات العمال ما بين حدادين ونجارين وعمال بناء وما إلى ذلك ... وهل يوجد لهم بديل من الشباب السعودي ؟

خد الخبر الطازة ده عندك ...

بيقولك في الخطوط السعودية هايبتدوا يعملوا عملية إحلال للمضيفات الأجنبيات بمضيفات

سعوديات ( لولولولييييييييييييييييييييييييي )

انا متصور السيناريو والحوار التالي بين مضيفة وأحد الركاب :

الراكب ينادي على المضيفة : لو سمحتي ... يا حاججججججججججة ..إنت يا سِتتتتتتتتتتتتت

المضيفة : سم

الراكب : سم الله عدوك يا ستي .

المضيفة : ... إيش فيك وكأن كهربا مسكت في جتتك وعمال تصارخ علينا ....هـــــــا إيش تبغى؟

الراكب : يا مدام أنا بقى لي ساعتين ملزوق في الكُرسي وماحدش عبرنا بكوباية ميه حتى ... إيه إحنا قاعدين في بنزينة ؟

المضيفة : خلاص كافي بلا حكي وكلام فاضي ...... إيش تطلب ... عجِل .. جول ....دجاج ولا لحم ؟

الراكب المسكين وهو يُجيب مذعوراً : لحم من فضلك ...

المضيفة : اللحم بيجيب جنون البجر إنت ووجهك .... ما في لحم .... إيش تبغى .. تكلم ؟

الراكب وهو مازال مذعوراً : خلاص يافندم يبقى دجاج

المضيفة : ما في دجاج كمان .... أجيب لك مويه ..ولا اطجك كف على وجهك ؟.

لقطة سريعة للراكب وهو يُسرع نحو باب الطواريء لكي يرمي بنفسه من على أرتفاع 30 ألف قدم ليهرب من تلك الوجوه يمكن الطيور في السما تبقى احن عليه منهم .

[MZohairy]

هي كده بتسميها غامقه؟

دي بقت كوبيا

هي الكوبيا دي لونها ايه صحيح؟

[Tafshan]

في دبي موضوع نقل الكفاله ده موجود برضوا ، بس احنا بنعمل حاجه ظريفه :

طبعاً وزارة العمل منفصله عن الهجره ، فبنطلب من الموظف يلغى بطاقة العمل بتاعته بس ( على شان لو لغى الفيزا بيأخذ حرمان دخول البلد 6 شهور ) بعد كده بنقدم على موافقه من وزارة العمل .. و لما بتيجي الموافقه بنقدمها + شهادة عدم ممانعه بألغاء الفيزا بدون حرمان من الكفيل القديم و بكده بنتغلب على مشكلة الحرمان و بعد كده نعمل فيزا جديده على نظيف ... ممكن ده يبقى الحل في السعوديه خاصةً ان تقريباً الخليج كله قوانين العمل فيه متشابهه ....

و ما تنساش الشاي بتاعى :blink:

[MZohairy]

لا اعتقد ياأخ طفشان ان القوانين الخاصة بالعمل متشابهة الى هذا الحد في دول الخليج

يعني احنا مثلا معندناش حكاية الحرمان دي

[MZohairy]

همتك شويه ياسي السيد بالاخبار اخوك في الانتظار الحار

الانتظار فتت روحي وشققها

لو قربوا النار من قلبي لأحرقها

محمد زهيري

مكتب العمل

الرياض

[se_ Elsyed]

وإحنا ما يخلصناش يا باشا ...

إليك بعض البنود الجيدة التي تم تغييرها :

أولاً : تم تعريف الآتي :

1- الراتب الأساسي : هو كل ما يُعطى للعامل مقابل عمله بموجب عقد عمل مكتوب او غير مكتوب مهما كان نوع الاجر أو طريقة أدائه مضافاً إليه العلاوات الدورية ..

طب ده مفيد في إيه أو إيه الجديد فيه ؟

أصل الراجل جه في المادة 84 وقال إيه " تُحسب مكافأة نهاية الخدمة على أساس الأجر الأساسي الأخير وتُحسب بالنسبة لمدة الخدمة السابقة على العمل بهذا النظام وفقاً لنظام العمل السابق "

طب إيه الجديد برضوا .. إحنا لسة متلخبطين يا سي سين سين ؟

- أقولكم : كثيييييييييييييييييير من الشركات في السعودية بتقسم مرتب العامل او خلينا نقول الموظف كالآتي :

- راتب أساسي : ولنفرض 2000 ريال

- بدل إنتقال : 500 ريال

- بدل سكن : 750 ريال

- عمولة ثابتة : 300 ريال

فكانوا لما ييجوا يحسبوا نهاية الخدمة بتاعت الشخص لما ييجيس يسيب العمل يروح ضارب عدد أيام خدمته في الراتب الأساسي اللي هو 2000 ريال ..

مع إن ده ظُلم وفي العالم كله المرتب بيتحسب بالإجمالي ومالناش دعوة صاحب العمل مقسمها إزاي ، وده عمل مشكلة من أكثر من 10 سنوات والموضوع اترفع للأمير عبد الله ولي العهد .. حيث إن كان في واحد يمني شغال عند عبد اللطيف جميل وكيل تويوتا لمدة كبيرة جداً ومشوه وإنتوا عارفين اليمنيين شاطرين في التجارة والأمور المالية فصاحبنا كان عامل شييت وكاتب فيها كل مليم كان بياخده من الشركة وبحسبة بسيطة حسب لنفسه نهاية خدمة فطلعت أكثر من مليون ريال ، والشركة حسبوها طلعت فُتات بالنسبة له ... فأشتكى الشركة والموضوع وصل للأمير عبد الله ولم يُبت فيه وبقت العملية عايمة وكل واحد وشطارته في إنه يقف في وش الشركة ويقول لأ ويستحمل طولة مدة التقاضي ..

فقانون العمل الجديد خلاص حسمها وعرف ما هو المقصود بالراتب الأساسي عشان صاحب العمل بقى يفتت الراتب او يعمل عليه تقاسيم موسيقية براحته برضوا المكافأة هاتتحسب على الإجمالي طالما يحصل الموظف عليها بشكل منتظم وبالتالي لو واحد شغال سيلز وله عمولة بيع أو أرباح وكانت تنقص وتزيد حسب حجم مبيعاته يبقى دي ليس لها صفة الإنتظام وماتدخلش في الحسبة .

يُتبع

[Tafshan]

موضوع الراتب الاساسي ده برضو موجود في قانون العمل في الامارات ... مع تعديل بسيط :

مكافأة نهاية الخدمه بتتحسب كالتالى :

لو ان عقد العمل عقد محدد ، (مكتوب فيه كده ) ، لو ترك العامل الشركه قبل انقضاء فترة العقد .. تسقط مكافأته ... اما لو كسرت الشركه العقد ، فللعامل 3 شهور مكافأه

تحتسب المكافأه بالنسبه للعقد المحدد كالتالى :

21 يوم من كل عام في اول 3 سنوات (من الراتب الاساسي) اذا اتم 3 سنوات ، اما اذا لم يتمهم فلا مكافأه له

30 يوم من كل عام اذا امضى العامل 5 سنوات

اما لو ان عقد العمل عقد غير محدد ، فمن حق الطرفين فسخ العقد في اي وقت دون غرامات ...

تحتسب المكافأه بالنسبه للعقد الغير المحدد كالتالى :

21 يوم من كل عام في اول 3 سنوات (من الراتب الاساسي)

30 يوم من كل عام اذا امضى العامل 5 سنوات

[se_ Elsyed]

يا طفشان إحنا عندنا فرع في دبي لكن المركز الرئيسي هنا في الرياض وبالتالي حساباتهم ومستحقاتهم إحنا اللي بنعملها هنا ، وبأتحسر لما بأرجع لقانون العمل عندكوا اللي مدلع العاملين وشايلهم على كفوف الراحة في مقابل إنه اعطى لصاحب العمل تسهيلات برضوا ... يعني نفع وأستنفع ، مش دول تانية تقف جنب صاحب العمل على حساب العامل الغلبان وتخنقه ..

- معليش عايز أوضح نقطة مهم جداً كثيراً ما تسبب لبساً لدى البعض وهي تتعلق في الفرق بين العقد محدد المدة والعقد غير محدد المدة :

- بمنتهى البساطة العقد المحدد المدة هو اول عقد للعامل فإذا أستمر الطرفان ( العامل وصاحب العمل ) في إستكماله يتحول لعقد غير محدد المدة تلقائياً ..

وبالتالي نخلي بالنا بإن هناك شركات بتقوم بتصفية العقد للموظف بمجرد إنتهاءه ..

يعني إيه ؟

يعني انا جيت السعودية على عقد عمل لمدة عام واحد ... و جت الشركة في نهاية العام وقالت لي تعالى هانصفي العقد ده وندفعلك مكافأة نهاية الخدمة ونبقى خالصين ونبدأ عقد جديد وصفحة جديدة ..

وده له عيب وله ميزة :

1- العيب : إني هافضل طول عمري يحسبولي مكافأة تعادل 15 يوم من الراتب سنوياً .. فهنا القانون بيقول إذا كمل العامل 5 سنوات يستحق 15 يوم مدفوعة الراتب عن كل سنة كمكافأة نهاية خدمة وما زاد على 5 سنوات يُحسب على أساس 30 يوم سنوياً ، وهي ميزة للشركات لإنها عمرها ما هاتوصل العامل لحلم الثلاثين يوم ، وعيب للعامل اللي بيدور على قرشين في نهاية فترة عقوبته ينفعوه للزمان .

2- الميزة : في ناس تقولك " يابا إحييني النهاردة وموتني بكره .. وأنا أخد إبني في حضني وأفلسع في أي وقت " وبالتالي لو نزل أجازة وحب ما يرجعش يبقى واخد القرشينات ومتدفي .

طب ليه قانون العمل فرق بين عقد محدد المدة واخر غير محدد المدة ؟

- أولاً عشان يحفظ حق صاحب العمل .. يعني واحد صارف قد كده على تأشيرة العامل عشان يجيبه من بلده وتذاكر وتدريب وخلافه يقوم التاني ييجي يخلع في أي وقت ... طب يعني إيه ؟ يعني قانون العمل قال " إذا قام العامل بفسخ عقد العمل المحدد المدة قبل نهايتة فلا يحق له مكافأة نهاية خدمة ... اللهم إلا إذا كان اكمل عامين متتاليين لدى صاحب العمل ... ففي هذه الحالة القانون بيقول إيه

1- يستحق العامل ثلث مكافأة نهاية الخدمة إذا كان إستقال بعد سنتين وأقل من 5 سنوات .

2- وإذا أستقال بعد 5 سنوات وقبل 10 سنوات خدمة يستحق ثُلثي المكافأة .

3- وإذا أستقال بعد 10 سنوات يبقى من حقه يشبح في صاحب العمل وساعتها يستحق المكافأة كاملة لإن دفعته بيبقوا علقوا لواءات .

نقطة الإختلاف بين السعودية وأعتقد سائر دول الخليج هي إن صاحب العمل من حقه يفسخ العقد مع العامل في أي وقت إن شالله لو كان لمدة 100 عام على شرط إنه يدفع له شهر واحد فقط من المرتب :) :) :rolleyes:

وأستكمالاً لنقطة تحدث عنها طفشان .. فعلى سبيل المثال في الإمارات إذا قام صاحب العمل بفسخ العقد مع العامل فالقانون يُلزمه بدفع 3 شهور من الراتب الإجمالي ( أساسي + سكن + عمولة + إنتقال .. وأي حاجة ثابتة ) أو ونخلي بالنا من أو دي .. او يدفع له الفترة المتبقية من عقده ... أيهما أقل يعني لو فاضل في عقده شهرين يبقى ما يدفعلوش الثلاثة شهور ويدفع الشهرين فقط لا غير ..

تحياتي ،،،،

[MZohairy]

شكرا على المجهود ياسي السيد

هل ده كل التغيير ولا فيه تغيرات اخرى؟

مفيش حاجه على نقل الكفالات أو ان يكون في اقامات حره او اي حاجه جوهريهوخصوصا للي بقالهم اكتر من 10 سنين بالمملكه؟

اي حاجه ياأخي!!!!!!!!!!