إنتخبوا كافور الإخشيدي فهو خير من يمثلكم

[se_ Elsyed]

هذا الموضوع برعاية " هاندي كرافت "

هاندي خليك عندك وما تجيش عندي ..

لأ بجد دي فكرة هاندي كرافت بس أنا سرقتها وقولت له ما تكتبش الموضوع ده بإسلوبك أحسن اديك إنذار وإحتمال نلغي عضويتك كمان عشان كان عايز .... ولا بلاش

المهم إمبارح هاندي كرافت كان بيتغدى عندنا - كالمعتاد - ما هو متعود على كده فالظاهر إن الاكل ضرب في نافوخه وعمل شغل جامد قوي ( وما حدش يسأل هو الاكل كان إيه ... عشان ده سر ) فلقيته بيسألني :

- هاندي : بأقولك يا س س .. إيه رأيك في كافور الإخشيدي ..

- س س : بصراحة زينة الرجال .. وإنسان عصامي بدأ من تحت الصفر ... وبعد ما كان عبد من ضمن العبيد أصبح حاكم بر مصر كلها وكان له شخصية كمان ... أي نعم هو ما كانش مكتمل الرجولة .. لكن نصيبه كده بقى هانعمل له إيه ؟

- هاندي : بس بلاش كلمة راجل دي وحياة والدك .... هنا بقى يا شقيق مربط الفرس .. انا بقى فكرت ومخمخت وتوصلت لنظرية علمية بتقول إن " كافور الإخشيدي هو الحل "

- س س : مش فاهم ... وضح .. أفصح ... يعني قصدك نستنسخ واحد كافور موديل 2005 ولا نعمل إيه بالظبط ؟

- هاندي : يابني إصحى معايا .. نستنسخ إيه هو خروف ....

- س س : طب نعمل إيه يابو العُريف ...

- هاندي : شوف يا سين سين يابني .. انا فكرت بدل ماحنا عايشين في عذاب وبنعاني من ظاهرة التوريث والتقفيص والكلام ده .. إننا لازم نكفور أي حاكم ييجي ..

- س س : آه .... فهمت يعني نوديه الكوافير يكوفر شعره ... صح ؟ وبكده نضمن إن دماغه هاتتظبط صح وهايعرف يفكر بطريقة علمية ومعملية ... لإن حسب خبرتي إن الرجل الصح والمية ميه بيبان من دماغه ... عندك انا مثلاً .. بعون الله أبص البصة لراس الزبون من دول ومستعد أوقلك بيفكر في إيه او إتغدى إيه إمبارح

- هاندي : تصدق بالله ؟ .. إنت هاتعيش وتموت حلاق وتفكيرك لن يتعدى المقصات والامشاط والفليات اللي في الصالون عندك .

س س : طب ليه كده يا فُللي ؟ .. يعني تبقى ما هضمتش الاكل اللي عاملينهولك وعمال تتمرمغ في خير وتغلط فيه ... على العموم إذا انت اطعمت اللئيم تمردا .. ومش هازود بقى او أرد عليك الغلط عشان إنت في بيتي ومش عايز امد إيدي

- هاندي : يابني إفهم ولو لمره واحده في حياتك ... أنا قصدي إن إحنا نشترط على أي حاكم يجيلنا إن أحنا نكفوره ونضمن إن ما يبقاش له ذرية من بعده يورثوا حكمه ، وبالتالي هايبقى ضهره للحيط ومش هايبقى وراه غيرنا .. وبالتالي يخلص في عمله ويطلع كل اللي عنده لصالح العباد والبلاد ..

- س س : هات يابني الشاي خلينا نحبس البؤين دول ... ده إيه الأفكار النيرة دي ؟ إنما قولي .. بابا وماما عارفين إنك بالذكاء ده ؟ ولا دي حاجات طارئة بتحدث نتيجة الإنتفاخ ولا إيه بالظبط ؟... طب فرضنا يا فالح الحاكم جه وهو أساساً مخلف وعنده قرطة عيال ... إزيك بجا ؟

- هاندي وهو يهرش في دماغه : آه صح .. فاتتني دي ، طب بسيطة .... ممكن نحط مادة في الدستور تقول إن الحاكم لازم يكون عازب ولا يعول .

- س س : يا سلام سلم هاندي كرافت بيتكلم ... النبي إيه يا واد ... طب ما عندك يا فالح عبد العزيز بو تفليقه ويوشع والي وفاروق حسني .. ما هم متكفورين خلقه ومع ذلك مطلعين أسلاف الناس .... إزيك بجا ؟

- هاندي : طب اعمل إيه يا س س مانا زهقت من كتر الكلام اللي بأقرأه عن التوريث .. ومن الفٍرا اللي جت للعالم كله .. من بوش الإبن ... للراجل بتاع الأردن .. والمغرب .. والبحرين .. وأذربيجان ... وليبيا .. واليمن ونفاقستان إلخ ... طب أولع في نفسي يا ناس عشان نريح الحكام ؟ ...

- س س : لا تولع في نفسك ولا حاجة إهدا بس كده البلد عايزاك يا هاندي يابني ( أنا أساساً ماكنتش خايف عليه .. وكنت خايف أحسن يعملها ويجري وهو محروق في الشقة عندي زي الفار في وسط حقول الذرة الشامية ويبهدل لي الدنيا ) .. بإذن الله محلوله يا هاندي ... ومصيري أعزمك على غديوه تانية ونطلع بشوية أفكار هي اللي فيها الخلاص ...

[G.G]

لأ,,كافور لا me0:

إحنا عايزين واحد مالوش أخوات ,,

مقطوع من شجرة خالص ,,

و يكون كمان منفر الهيئة,,حتى لا ترتضي به أي واحدة كزوج ,,

و بذلك نضمن أن لا يكون هناك توريث بأى شكل من الأشكال,,

لا ربع ولا ثمن...

أنا أرشح أحدب توتردام :)

[se_ Elsyed]

أنا أرشح أحدب توتردام  tot::

GG

مش شايفه إن ده مش كويس على عقلنا الباطن ..

يعني تصوري نفسك داخله مصلحة حكومية .. او رايحه أستاد الكلية الحربية اللي جنب بيتكوا tot:: تتفرجي على مباراة للاهلي والزمالك وتفاجئي بصورة أحدب نوتردام محطوطة في الخلفية 3 *4 ساعتها هايبقى إيه شعورك ؟

[مهيب]

والله ضحكتنا من القلب يا س س ... آه يا مصر .. بالذمة فى بلد تانية فى العالم ممكن تلاقى شعبها دمه خفيف فى الحالتين حزن أو فرح زى مصر ...

وانا أقول مال جرايدنا دمها يلطش ليه ... طبيعى علشان أمثالك بيكتبوا فى المنتدى مش فى الأهرام ...

على العموم ... الحل اننا نقتنع ان الحكم و السياسة جين .. كروموسوم بينمو أول ما الواحد من دول يقعد على الـ .. العرش ... و على حسب نظرية الدكتور زويل ... ينمو هذا الكروموسوم (خلينا نسميه الحكموفيليا) و يترعرع فى ظل جو سياسى مناسب ... وطبعا من الطبيعى ان الكروموسوم و الجين يورث للأبناء .. و أساسا الحكموفيليا جين سائد مش متنحى ... لأنه لو كان متنحى .. كان نفع التنحى بتاع نااااااااصر ... أن أن .. نااااااااااصر .. تن تن ...

المهم .. و لذلك و لكل تلك الأسباب ... فلازم ابن الحاكم هو اللى يحكم ... لأن الشعب مش عنده كرموسوم الحكموفيليا ...

لو اقتنعنا بده ... هنلاقى اننا سعدا ... وفى نعمة علشان الحاكم بتاعنا مش متكفور .... و نبوس ايدينا شعر و دقن ...

تم تعديل 28 فبراير 2005 بواسطة مهيب

[Sherief AbdelWahab]

لا لكافور الإخشيدي..

انتخبوا خير من يمثلكم ويمثل عليكم..

رجل يحمل عبق التاريخ..

وريحته كمان..

انتخبوا رمزاً من رموز مصر..

زي الهرم والنيل وتيتي عطوة..

انتخبوا

زكي جمعة me0: mc: s-:

خلص الكلام