أطرش في الزفة السياسية

[se_ Elsyed]

بما إن مبارك وحكوماته المتعاقبة مديينا الطرشه وبيحلقوا للشعب وعاملين ودن من طين وودن من عجين ولا يستمعون إلى شعبهم ، فقد قررت فتح موضوع عن حوار الطرشان السياسي .. يعني واحد بيتكلم في السياسة وواحد أطرش وسمعه تقيل ( بدون أي إسقاطات على أشخاص معينين :blush: ) بيرُد عليه :

======================================

مواطن رقم 1 : بيقولك المنافقين زادوا واحد وبقى عندنا شيء إسمه نبيل لوقا بباوي ..

مواطن رقم 2 اللي مصدر الطرشه : إيه بتقول إيه ؟.. الحكومة قررت تشتري حمير حصاوي ؟ ... ونعم القرارات الصائبة أصلهم داخلين على إنتخابات ومحتاجين حمير حصاوي " هيفي ديوتي " عشان تستحمل ..

------------------------------------------------------------

مواطن 1 : بيقولك مبارك هايختار صفوت الشريف لمنصب نائب الرئيس ..

مواطن 2 : بتقول إيه ؟؟ هو مين ده اللي ندل وخسيس ؟

------------------------------------------------------------

مواطن 1 : بيقولك مبارك بيقول إن عصره هو أزهى عصور الديمقراطية ..

مواطن 2 : فعلاً ما أطيب المهلبية بالملوخية ... ويا سلام بقى لو الملوخية كانت بالأنارب .. يا عيني يا عيني ..

------------------------------------------------------------

مواطن 1 : بيقولك الحكومة بتثبت الشعب وبتقلوظ له العمه وقال إيه بتخفض الضرايب ..

مواطن 2 : عندك حق يا بني .. ربنا يكفينا شر النصايب ...

-------------------------------------------------------------

مواطن 1 : بيقولك مبارك وعد إنه لو فاز في الإنتخابات هايغير الدستور ..

مواطن 2 : بتقول إيه ؟ مبارك هايلبس كل واحد طرطور ؟ طب هو أحنا ناقصين ؟ ما أحنا لابسينه خلقه ..

---------------------------------------------------------------

مواطن 1 : بيقولك الحكومة مرقده وبتخطط عشان تقفش كل بتوع حركة كفاية ...

مواطن 2 : بتقول إيه ؟ مين ده اللي يقدر يضربني على قفايه ؟ فشر ما حدش يقدر يعملها إلا برضايه ..

------------------------------------------------------------------

مواطن 1 : بيقولك الحكومة منزعجة جداً من منتدى محاورات المصريين ..

مواطن 2 : إيه بتقول إيه ؟ الحكومة هاتعدم كل الإخوان المسلمين ؟ ... أحسن يا راجل عشان البلد تفضى والحكومة تبرطع براحتها في الأبعدية ..

----------------------------------------------------------------------

مواطن 1 : بيقولك الحكومة عامله مقاولة وبتدفع بسخاء مقابل فتاوى فضيلة شيخ الأزهر ..

مواطن 2 : بتقول إيه ؟ اللي يبيع ضميره بفلوس يبقى متهور وأزعر ؟ عندك حق سيدي المواطن .. لا فوض فوك ..

------------------------------------------------------------------------

مواطن 1 : بيقولك مبارك هايشغل الشعب بإشاعات تغيير مجالس إدارات الصُحف ورؤساء التحرير ..

مواطن 2 : أحسن يا راجل .. فعلاً الباعة الجائلين والمتسولين ماليين ميدان التحرير ...

----------------------------------------------------------------------------

مواطن 1 : بيقولك كمان إن أول واحد هاياخد شلوت هو سمير رجب ..

مواطن 2 : فعلاً الحكومة لازم تعمل قانون وتعاقب قللات الأدب ..

------------------------------------------------------------------------------

مواطن 1 : إنت سامعني يابا ولا عامل فيها زي الأطرش في الزفة ..

مواطن 2 : أنا فعلاً ساعات الفيوزات عندي بتضرب وبيحصل لي هفه ...

-------------------------------------------------------------------------

[se_ Elsyed]

مواطن 1 : بيقولك شريف صبري وروبي هايتفرغوا لقيادة حملة الرئاسة ..

مواطن 2 : بتقول إيه ؟ الحكومة هاتحط في كل لجنة إنتخابية رقاصة ؟ ليه .. هو أحنا رايحين ننتخب رئيس ولا رقيص ؟

---------------------------------------------------------

مواطن 1 : بيقولك جمال مبارك عمل إمبراطوريته دي كلها من مصروفه ..

مواطن 2 : وماله يا سي السيد الشورة شورتك وإعمل اللي تشوفه

----------------------------------------------------------

مواطن 1 : بيقولك كمال الشاذلي فاز السنة اللي فاتت بلقب " مستر فنطاس "

مواطن 2 : أنا فعلاً كل يوم الصبح لازم أقرأ " قل اعوذ برب الناس ...... "

-------------------------------------------------------

مواطن 1 : بيقولك محمد عبعال المشبوة بتاع حزب العدالة أسس حركة قرعه إسمها " الإستمرار من أجل الإزدهار "

مواطن 2 : يا سلاممممممممممممم فكرتني بليالي الحُسين وبأكل الفشه والممبار ...

-------------------------------------------------------------

مواطن 1 : بيقولك إن من أهم أعضاء حرطة الإستمار هو الكدر السياسي شعبولا ..

مواطن 2 : وعرفت منين إني وأنا صغير العيال كانت بتقولي يا هبلوله ؟

-----------------------------------------------------------------

مواطن 1 : بيقولك المطبخ السياسي الرئاسي معتكفين على إعداد خطاب للرئيس يذلنا فيه بإنجازاته ..

مواطن 2 : عندك حق .. الواحد كل فترة لازم يستغفر ربنا من كثرة سيئاته ...

-------------------------------------------------------------