الهبر والتهبيش ومشكلة التفنيش

[se_ Elsyed]

عندنا يا جماعة آفة وظاهرة خطيرة جداً في مصر .. وهي مصيبة إنهاء أي عمل بحيث يظهر بصورة جيدة مهما كان تكلفته .. بمعنى أبسط أنا أتحدث هنا عن ما يُسمى التفنيش أو الإخراج ...

على سبيل المثال ... المشروع الحضاري الضخم الذي لا يُمكن أن ننكره في مصر وهو مترو الأنفاق والذي تم إنفاق ملايين الدولارات على تنفيذه .. نجده الأن في حالة يُرثى لها من حيث النظافة ومن حيث توفير وسائل تهوية للبني آدمين داخله .. وهاحكي لكم موقف حصل معايا .. فقد أضطرت إلى ركوب المترو حوالي 5 مرات في خلال أجازتي بالرغم من إن معايا عربية وده لإني ما أعرفش مُعظم الطرق في مصر .. وبصراحة إتعذبت أخر عذاب وده لإن الجو كان حار جداً وزيادة على ذلك الرطوبة العالية اللي في الجو فتلاقي الواحد على ما يوصل مشواره بيبقى إستحمى من العرق ... وأنا هنا لا أتكلم عن شخص مُرفه عايز يعيش زي البطريق في بيئة باردة ولكن أتكلم عن شيء من إحترام آدمية الناس .. وإذا كنت هنا أتحدث عن موسم الصيف اللي بيبقى فيه الضغط خفيف على المترو .. فما بالنا لما المدارس تبدأ وتلاقي الناس عامله زي السردين في عربات المترو ... فيا سادة يا بتوع المترو ألم تسمعوا عن شيء إسمه تكييف .. وخصوصاً إن المترو بيشتغل بالكهرباء يعني الموضوع مش إعجاز ولا هو قنبلة نووية ..

الغريب بقى إني كنت بأتفرج على برنامج البيت بيتك ولقيتهم مستضفين عصام أفندي شرف وزير المواصلات ولقيت واحد من المواطنين إتصل وإتكلم عن نفس الموضوع وإن الناس بتفطس من الحر وقلة الأدب داخل المترو فرد بكل هدؤ وطلب منه الصبر وقال له الصبر شويه يا أخي فإحنا شغالين على الموضوع ده بس هو محتاج وقت .... يعني كلام عايم ومايع ولا يُسمن ولا يُغني من جوع ..

الموضوع بقه اللي جاي ده يخص عمي الأفوكاتو لإنه مهتم قوي بمسائل الحمامات والحاجات دي ..

طقت في دماغنا مره نروح برج القاهرة .. يالا بينا يا رجاله .. أخدت أولادي ونسيبي جاب أولاده وروحنا البُرج اللي يعتبر من أبرز معالم القاهرة ... بداية تذكرة الدخول بـ 15 ج وتذكرة إصطحاب كاميرة الفيديو بـ 20 ج .. قولنا ما يضٌرش .. من بداية الصعود بالمصعد تلاقي عامل المصعد راكب فوق ودانك وعمال يسلم عليك ويرحب بك وكإنه يعرفك من زمان ومش هايسيبك ولا بالطبل البلدي إلا لما تدي له حاجة .. قولنا ماشي ده غلبان وصاحب عيال .. تنزل من الأسانسير تلاقي سلم صغير بيطلع للبرج ولازم دماغك تخبط في السقف لإنه منخفض جداً والسلم ضيق جداً ومع ذلك تلاقي إتنين أو تلاته عواطلية قاعدين على السلم من غير شغله ولا مشغله .. تطلع تلاقي إتنين قاعدين بملابس رثة ويصعبوا على الكافر وكل وظيفته إنه يحصل فلوس من اللي عايز يبص بصتين في التليسكوب الموجود عشان يتفرج على القاهرة من فوق .. نيجي بقى للبهاريز .. المدام أخدت الولد الصغير للحمام ولقيتها راجعه وهي شايطه وبتحكي لي إن اللي موجود عندهم ده شيء لا يمُت بصلة للحمام مطلقاً فهو عبارة عن مكان ضيق جداً جداً والواحد يدخله بشكل سمبوكسه وقاعدة التواليت متهالكة وتقريباً علموها من ساعة ما بنوا البرج والحنفية اللي في الحيطة لازقينها بجبس - آه والله - والحوض معفن وعشان المصري دايماً مشهور إنه مخترع ومبتكر فجابو قزازة مياه معدنية وقطعوها من النص بشكل قبيح وحطوا فيها شوية صابون سائل لزوم غسل الأيد وطبعاً لا تسأل عن كلينكس وإلا تُعتبر زنديق ..

المهم قرفنا ونزلنا بسرعة .. عدى نسيبي من الباب وأنا جيت أعدي لقيت شوية شباب وشابات لابسين أزرق في أزرق وقفوني أنا وزوجتي وبيحسبونا خلييجين لإنها كانت ترتدي عباية سوداء وأنا أساساً شكلي كارف منهم مع إني خلقة ربنا حتى من قبل ما أجي هنا .. المهم سألونا بكل أدب عن إنطباعتنا عن زيارة البُرج فأنا ما أتكلمتش لإني عارف إن ما فيش حاجة هاتتغير لكن مدام سين سين طلعت فيهم وما خلتلهمش وشاطت فيهم بخصوص الشيء المُسمى حمام .. وشكل العيال دي بتوع شركة بتدير البُرج أو حاجة زي كده ..

وسألت نفسي .. يعني بالله عليكوا مش بثمن تذكرتين تلاتة ممكن يجيبوا سباك ويعملوا حمام محترم بدل ما الأجانب اللي بيزوروا البرج بالمئات يومياً يلاقوا هذا الشيء القبيح ويتندروا ويضحكوا على تخلفنا .. وليه كده ما فيش عندنا شيء بينتهي نهاية سعيدة .. وأهم من ده كله حتى لو غلطنا وأخرجنا شيء جميل ونظيف ليه ما نحافظش عليه عشان يبقى كده على طول ؟ على العكس تمامً بصراحة لما تزور مكان زي دريم بارك تلاقي الحمام فيه شيك وشيء محترم ودائماً نظيف .

يُتبع

[الأفوكاتو]

عزيزى س س ,

لقد تكلمنا جميعا عن التواليتات, و عندما أصل فى سرد رحلاتى إلى تجربة تركيا, فسوف أنشر صورة للتواليتات أيام العصر الرومانى, وهى أكثر فخامة و نظافة من تواليتات مصر حاليا, سواء العامة أم الخاصة, أم المنزلية.( و هذا كلام جاد ليس فيه هزار)

لهذا, و لكون موضوع التواليتات أصبح موضوعا هاما و ملحا,

لماذا لا نخصص باب لهذه "المأساة المشكلة", و نسميه:

تـــــواليتـــــــــــــــات؟

[Folana]

الاخ الفاضل س-س ....موضوعك اعاد لنفسى ذكريات اليمة ...وتتمثل فى اخر زيارة لى للبرج من سنتين تقريبا واللى اقسمت بعدها باغلظ الايمان انى مش حاعتبه تانى ....كنت عايزة اسالك بس انت عرفت تنزل تانى من البرج ازاى ؟؟؟؟؟؟؟؟؟؟؟؟

انا فى زيارتى الاليمة له مع افراد اسرتى واسرة صديقة كانت جاية مصر تقضى اجازتها وشاء حظها العسر انها تيجى معانا البرج ...فضلنا محبوسين فوق اكتر من ساعة ونصف وكنا حنبوس ايد السيد الفاضل سواق الاسانسير انه ياخدنا فى سكته وهو نازل ..وبدأنا نفكر فى استخدام السلالم وياترى له سلالم ولا لأ...كان الاس طوابير طوابير علشان ينزلوا ......وقلت فى نفسى فعلا دخول الحمام مش زى خروجه .....وندرت انى لو ربنا قدر لى انى اغادر هذا البرج مش راح ارجعه تانى ابدا ...

تانى حاجة ...الكافتيريا اللى فوق ..ياترى ماجربتش تدخل فيها ؟؟؟؟ويفرضوا عليك عشامن ايام الفراعنة علشان يفكروك بعظمتهم او تاخد حتة جاتوه عفا عليها الزمن ؟؟..والواضح برضه انها موجودة منذ تأسس البرج ........بس احنا كان حظنا اسعد شوية لاننا ماقطعناش تذكرة زيارة للحمام .....وبالمناسبة لما حظنا ابتسم لنا ونزلنا من البرج سألنا عن كل اللى حضرتك بتشتكى منه ده ...قالوا لنا ان البرج متأجر لواحد عربى الجنسية وهو اللى بيديره لحسابه !!!!!!!!!!!!!!!!!!..حتى لقينا نايت كلوب كده باسم لبنانى بس شكله يعنى مصروف عليه جامد .....مش عارفة لسه البرج متأجر ولا ايه الحكاية !!!!!!!!!!

[se_ Elsyed]

حلو قوي موضوع التواليتات ده يا عم أفوكاتو ..

طب خلينا الأول نعمل باب ونسمية باب " الصرف الصحي " ونعين مُشرف واقف بكلينكس على الباب وكل واحد داخل أو خارج يقوله " شفيتم " :angry2:

الأخت فلانه ..

لأ الحمد لله ما حاولتش ولا مره أكل في المطعم اللي في البرج لأني بأسمع عنه سمع خير .

وبعدين إيه ده هما باعوا البرج ؟

طب ربنا يُستر على الهرم والراجل الغلبان أبو الهول ..

[se_ Elsyed]

مكان تاني دليل على عدم .... ولا بلاش الكلمة دي ... نقول دليل على فشلنا في إخراج أي عمل بشكل حضاري ولائق ..

بالرغم من إعجابي بمدينة العبور إلا إنني لما ذهبت لجهاز المدينة أستفسر عن بعض الأشياء وجدت عجب العُجاب :

1- طبعاً هما واخدين الأرض ببلاش لإنها بتاعتهم .. وده جهاز بدون مبالغة بيتعامل في مليارات الجنيهات من حصيلة بيع الأراضي اللي هي كانت في الأساس رمله وصحراء .. وبصراحة مهتمين بالشجر داخل مبنى الجهاز .. لكن تعالى شوف صالات التعامل مع الجمهور عامله إزاي ؟ بصراحة حاجة تقرف ومافيش مروحه واحده توحد ربنا حطينها للجمهور اللي بيتسلقوا من الحر وكنا نضطر للإنتظار داخل السيارة عشان نتنفس تنفس صناعي في تكييف السيارة... وكذلك الموظفين يا عيني !!!! إزاي عايز موظف يبقى مُنتج ويعمل بإجتهاد وإنت حطوا في سونا ولسه بتشغلة بنظام الملفات بتاعت توت عنخ آمون وما يعرفش حاجه إسمها كمبيوتر .. وكل ملف وملف قد الداهية ؟ إزاي يا ناس ؟ .

بالمناسبة لقيت أنا وواحد صاحبي كان معايا ملفات كتيرة مرمية في الطرقات وبره المباني وفضلنا نتسلى ونقرأ فيها شويه وهي عبارة عن بلاوي سودا وملفات مهمة .. بس تقول لمين ؟ كل دي زيادات وكماليات يا سيد ..

تروح بقى قسم زي المساحة أو الخرائط يجيلك إذبهلال وحول وعبط مغولي من كمية الملفات اللي الموظفين غطسانين فيها واللي لا قدر الله لو إترمى عليها عقب سيجارة هاتبقى كوم فحم ...... منتهى التخلف .

2- واخدين مساحة كبيرة جداً ولكن متقسمه بطريقة متخلفة تدل على إن اللي مصمم الجهاز ده مش مهندس معماري أبداً ولكنه شخص كان أصلة زبال .. فعلاً دي أعتقد إنها حقيقة .. فعشان واحد ينطور كل إدارة في مكان بعيد عن التاني وتلف إنت على رجلك بين الإدارات وكإنك بتسافر وتقطع مشاوير يبقى ده شخص زبال .. لإن ما أبسط إنك تجمع كل الإدارات دي في مكان واحد وتوفر مجهود الناس ... الغريب بقى إنه ممنوع الدخول بالعربية ... بس عشان كان معانا واسطة دخلنا بالعربية وكنا بنتنقل بها بين المباني .

3- روحنا المبنى اللي فيه الخزنة .... إوعى وشك بقى من الخزنة .. اللي على الأقل كل يوم داخل عندهم مليون جنيه كاش غير الشيكات... والله العظيم حالتهم تصعب على شارون .. عبارة عن حجرة بها شباكين حديد وتدخل من جوه في فاصل زجاجي بباب والباب مفتوح وإتنين موظفين قاعدين داخل الحجرة وأمامهم أكوام فلوس متلتلة وماكينة عد فلوس .. والمواطنين واقفين خلف الزجاج لكن الباب مفتوح عادي إتباعاً لسياسة الباب المفتوح ... وبرضوا شغالين يدوي وفي الحر والرطوبة القاتلة ..... شيء يدعو للشفقة والسخرية من العقول المتحجرة في هذه الدولة اللي إسمها مصر ..

يُتبع

[# الساحر #]

يا جماعة بالنسبة لمشروع مترو الانفاق في مصر فهو فعلا مشروع جبار بالنسبة لامكانيات دولة نامية

عدم المحافظة على نظافة المترو و المحطات دة نلوم راكبيه عليه و ليس الحكومة

أزدحامه شيء اساسي أن دل فانما يدل على انه مشروع مفيد يستفيد منه قطاع كبير من الشعب

و بعدين عايز اقوللكم مثلا احنا في مصر مش في السويد او الدنمارك

احنا دولة نامية و كتر خير الحكومة و الجهود المبذوله

و انا كمصري و لكن اعيش في الاسكندرية لما بزور البرج أنا و اصدقائي بنكون في غاية السعادة و لا نلتفت لتوافه الاشياء مثل عامل الاسانسير فهذا العامل لم يفرد عليك شيئا و لكن كل ما فعله انه زود الترحيب و التحية حبتين و دي حاجه كويسة و انتا و ذوقق بقى و كله بيرزق .

و لكن مش كل مغترب مصري يشوف أنجازات و أبنية دول البترول ييجي يعيب في مصر

أنا كنت في الكويت فترة و ادرك التقدم و النظافة بس عمري مانتقدت شيء في مصر و عملت مقارنة بين مصر و أبنيتها و وسائل انتقالها و ابنية و انتقالات الكويت

و الا لازم هنا أعرفكم بكمية البترول الكويتي مع التعداد السكاني هناك و هنا ممكن نكون في مستوى واحد معاهم

و شكرا

[mAs]

الأخ الساحر كتب...

عدم المحافظة على نظافة المترو و المحطات دة نلوم راكبيه عليه و ليس الحكومة

المكان الوحيد الذي يلتزم فية المصريون بالقانون هو المترو...فلا تجد من يرمي منديلاً و يدخن سيجارة..و لو حدث ذلك ستجد عسكري فوق دماغك عاوز 10 ( لحلوح) ونص غرامه، و دة سبب التزام الناس لا أحد يرمي شء ...و لا أحد يدخن، ولكنك لا تستطيع من التراب من الدخول الي أرفة المترو...تأمل القطارات جيدا.. جدران بعض القطارات و حروف نوافذها علية تراب متجمد من من كثرة بقاؤة...

أزدحامه شيء اساسي أن دل فانما يدل على انه مشروع مفيد يستفيد منه قطاع كبير من الشعب

ازدحامة شء اساسي لآن عباقرة التوفير يقومون بزيادة زمن التقاطر عن 6 دقائق الي ما هو أكثر، و أحيانا يصل ال 20 دقيقة بعد الحادية عشر مساء :closedeyes: و طبعا يتزايد أعداد المنتظريين على الرصيف.

و بعدين عايز اقوللكم مثلا احنا في مصر مش في السويد او الدنمارك

وما الفارق بين شعب السويد وشعب مصر ...كلهما له الحق في العيش بكرامة و أن تحترم أدميته وليست السويد و الدنمارك وحدها تستحق ذلك

و انا كمصري و لكن اعيش في الاسكندرية لما بزور البرج أنا و اصدقائي بنكون في غاية السعادة و لا نلتفت لتوافه الاشياء مثل عامل الاسانسير فهذا العامل لم يفرد عليك شيئا و لكن كل ما فعله انه زود الترحيب و التحية حبتين و دي حاجه كويسة و انتا و ذوقق بقى و كله بيرزق .

هو دة اللى جايبنا ورا!..أنت وزوقك بقى وكله بيرزق...كفاية فهلوة...ثم ان العامل ده كان بياخد ما يكفية مكنش عمل كدة...و بعدين حضرتك كمصري لازم تهتم بما سوف يشعر به غير المصري عتد تعرضة لهذا الابتزاز من الفراشين و الحراس وكل موظفي الحكومة المبجلة

هل المطالبة بحمام أدمي و نظيف أصبح رفاهية! دة احنا لو بعنا عربة واحدة من عربيات اللى بالي بالك ممكن ننضف حمامات مصر العامة كلها (و هما مش كتير علي كل حال)

راجع كلماتك يا عزيزي...فلسان حالها يقول (مشى حالك)...هذة مصر الأن و لا نريدها أنت تظل (تمشي حالها)

[Folana]

الاخ الفاضل سى السيد...............علشان تستريح ومنعا للاذبهلال وخلافه ...لازم تعرف ان مافيش خدمات فى البلد ....فى جميع المجالات ..ولا فيه مرور ...ولا فيه امن ..الامن موجود بس حيث يتواجد الكبار والدليل على كده ضرب شرم الشيخ ..بعد مااصحابها المقيمين هناك اضطروا ينزلوا القاهرة علشان واجب وطنى ...والحدق يفهم ........... :closedeyes:

[se_ Elsyed]

صورة أخرى من صور الهبر والتهبيش وزبالة التفنيش في مصر ...

موقع البورصة المصرية التي تتعامل في مليارات الجنيهات ويقولك إنهم مُقيدين في إتحاد البورصات العالمية ومش عارف إيه .. وإن الأجانب مسموح لهم يبيعوا ويشتروا في البورصة ..

وعشان كده بصراحة عملوا لنا موقع رسمي في منتهى الروعة وأقل ما يوصف به إنه عبارة عن مقلب زبالة - سوري في اللفظ -

شيء بشع وناس ماعندهاش ذوق .. فلا معلومات مفيدة ولا سُرعة في تلبية طلب المعلومة .. وتحس إنك بتتعامل مع سلحفاة ... وفقر مدقع في المعلومات اللي بيطلبها اي حد سواء عايز يتعامل مع البورصة أو داخل حتى يتفرج ويشوف الدنيا فيها إيه . وكأن مصر عدمت خبرات أولادها أو ما فيهاش ناس متخصصين في تصميم المواقع وأهم من التصميم هو متابعة الموقع اليومية لتحديثه ..

أقسم بالله بأشوف مواقع شخصية أصحابها مكلفينها على حسابهم لكن بتكون في منتهى الروعة والذوق والسرعة ...

لكن هي ليست مسألة إمكانيات ولكنها مسألة ذوق وناس عندها ضمير ... لكن الظاهر القائمين على البورصة مش فاضيين للتفاهات دي ... فهم مشغولون بطلب وجباتهم الغذايءة من مسكيم بفرنسا ..

وإليكم التحفة المعمارية البورصوية المصرية .... وجتها نيلة اللي عايزه خلف

إوعى البورص ...... ه

[الأفوكاتو]

عزيزى سى السيد,

عندما راجعت موقع الحكومة بعد تعديل الدستور, لم أجد التعديل الأخير فيها, بل وجدته فى موقع خاص بإحدى الجامعات البريطانية, و بالعربى.

عندما حاولت الإطلاع على بعض القوانين المصرية الحديثة فى موقع " التشريعات" و جدته يحيلنى إلى مكتبات الجامعات الأمريكية, و البريطانية, التى لا تنشر القوانين المصرية.

إذن , لماذا نحاول مقارنة العجلة, بالسيارة المرسيدس؟

تقبل تحياتى.

[أسد]

الحقيقة ما أشرت إليه عن بورصة مصر . هو موضوع بالفعل يستحق الحديث عنه ..

فموقع البورصة المصرية شديد الفقر .. وشديد التخلف ..

والغريب .. أن رئيس الوزراء لا هو رجل إقتصاد .. ولا إجتماع ..ولا جيش .. ولا بوليس .. ولا سياسة ولا حاجة خالص ..

هو رجل معلومات ومعلوماتية ..

ولازالت مواقع الحكومة الإلكترونية في منتهى التخلف ولعبط ..

وأعتقد أنها ستستمر ...

إنظروا .. هذا موقع البورصة السعودية ...

لاحظوا الفرق

تداول الأسهم السعودية