فضفضة سياسية على هامش الإنتخابات الرئاسية

[se_ Elsyed]

أنا فتحت الموضوع ده عشان أتكلم عن مشاعر متضاربة تنتابني وتنتاب جميع المهتمين بأمر بلدهم مصر في فترة الإنتخابات المُقرر لها الإنتهاء غداً ، وهي مواضيع أو نقول أفكار وهواجس مختلفة يمكن ما يكونش في رابط بينها لكن كلها تتمحور حول موضوع الساعة وهو الإنتخابات ..

فلا حديث للناس صباحاً ومساءً إلا عن الإنتخابات ، أنت مُحاصر من جميع الجهات بتلك الأخبار .. أنا عن نفسي أقضي ما لا يقل عن 5 ساعات أما شاشة التليفزيون أو الإنترنت لمتابعة الأخبار والبرامج الخاصة بالإنتخابات ....

في داخلي مشاعر مختلطة ومتناقضة في نفس الوقت ... غريب جداً أن يجتمعك في داخلك التضاد في نفس الوقت !!!!!!!!!..

أكاد أشعر بنفسي أقف في المنطقة الرمادية ... مش فاهم حاجة ومش عارف حاجة ومش قادر أستقرأ الظروف والأحداث التي تحدث حولي ..

ما حدش يضحك عليه لما أقوله إن عندي دلوقت نفس الشعور اللي كان قبل ما تقدم مصر ملف كأس العالم للفيفا ...

تفاؤل وأمل .. وإحنا مش أقل من الدول المتقدمة وخصوصاً جنوب أفريقيا والمغرب .. ووعود من السادة المسئولين رفعتنا فووووووووووووووووووووووووووووووووق وجهزت نفسي إن هاشوف رونالدينهو ورنالدو وأوين وبيكهام وأمشي في شارع عباس العقاد أعاكس البنات بتوع البرازيل اللي لابسين المايوهات صيفاً وشتاءً .. وأأجر شقتي مفروش للمشجعين وأعمل لي قرشين حلوين في الفترة بتاعت البطولة .... إلخ

تشاؤم ... إحنا فين والدول دي فين ويا عم ده الفساد اللي عندنا ريحته واصله للعالم كله .. مش معقول يسيبوا جنوب أفريقيا حبيبتهم أو المغرب اللي بقت مدمنة تقديم ملفات ، ويختارونا إحنا ...

صدمة .. يوم النتيجة من الصفر والكحكة المدورة اللي وقعت على راسنا زي الدش البارد في ليلة شتوية ممطرة ...

كذلك الحال في فيلم الإنتخابات اللي بنعيشه ..

تفاؤل .. إننا ممكن ندوق طعم حاجة إسمها تدوال السلطة وتسقط أسطورة الملك الأله المُخلد أبد الدهر .. وحلم باليوم اللي ممكن أمشي فيه مرفوع الرأس وأقول أنا مصري .. وأشوف أهل بلدي البسطاء الغلابه عايشين عيشه أدميه .. وما أشوفش بعيني ناس بتدور على أكل في صناديق الزبالة .. أو منظر كنت نفسي أصورة بالكاميرا وأعرضه عليكم لشابين يقتتلان مع بعضهما البعض داخل صندوق كبير للزبالة لتنافسهما على أحقية الفوز بأكياس البلاستيك المستعملة والموضوع بداخلها الزبالة ..

تشاؤم .. ده بعيد عن شنبك .. وهو اللي لزق في الكرسي 24 سنة وبقى حته منه تقدر تيجي بعد ده كله وتخلعه ؟. ده يابني لما يموت هايدفنوا الكرسي معاه وإلا يقطعوا لحمه اللي لازق فيه :)

صدمة ... من النتيجة بتاعت بكره وما يتبعها من تداعيات ونتائج وسحل لكل من عارض أو حاول الخروج عن طاعة ولي النعم ....

يُتبع

[se_ Elsyed]

أعتقد إن أكثر فئة ستلقى رواجاً في عملها بعد الإنتخابات هي فئة " الأطباء النفسيين "

- أنا ما أخبيش عليكوا لو أتصدمت ولقيت العملية إنطبخت زي كل مره سوف أكفر بكل المباديء والمصطلحات المتفهيقه التي يحدثونا عنها كل يوم وفي إن مصر في مرحلة ماخض وإنها على وشك الولادة والكلام ده اللي بيحسسني إني في مرحلة النفاس وهو أساساً حمل كاذب .. وسأُصاب بحالة من اللامبالاه وياكش تولع على دماغ صحابها - اللي هما هما .. مش هما أحنا - فأحنا مش أصحاب البلد ولكننا نُعامل ولا كإننا لاجئين وليس لنا أي حقوق .... وفعلاً سنحتاج فترة طويلة حتى نفيق من هذا الكابوس الذي وضعنا فيه أنفسنا .....

[se_ Elsyed]

- منذ إعلان مبارك عن إجراء إنتخابات الرئاسة بين أكثر من مُرشح إنتظرت إني أسمع كلمه من أي حد من العشرة الأوائل على الجمهورية اللي مرشحين نفسهم ..

كلمة واحده ولكن للأسف خذلوني وما بلوش ريقي بها .. فبالله عليكوا حد سمع كلمة واحده عن مطاريد الجبل أو ما نسميهم المصريين المغتربين في الخارج والذين يبلغ عددهم حوالي 5 مليون مصري على أقل تقدير .. يعني حوالي 15 % من إجمالي عدد السكان ومع ذلك ما حدش قال إحنا مصيرنا إيه .. وهل الدولة مستعده لإستقبالنا في أي وقت لو قررنا العودة ؟ وإيه دورنا في التنمية ؟ ولماذا هذا التهميش السياسي والتنفيض اللي بينفضوه لنا في أي مشاركة سياسية ؟ وماذا يُمكن أن تقدمه لنا الدولة لكي نعيش بكرامة في بلاد الله لخلق الله .. يعني هل سيتم تحسين الخدمات اللي المفروض تُقدم من قنصلياتنا وسفاراتنا في الخارج ؟ ولا هايفضل الوضع زي الزفت كما هو الحال وأسوء معاملة ممكن يتعاملها بني أدم هي ما تحدث في سفارات جمهورية الموز ( ج. م . ع سابقاً ) لصاحبها حسني مبارك وأولاده

[أسد]

الشئ الإيجابي في الموضوع أن هناك نشاط سياسي لم يكن موجوداً في مصر في أي يوم من الأيام ..

ليس من المعقول أن يعلن عن إنتخابات للرئاسة فجأة .. فيترشح لها أشخاص مؤهلون جاهزون للتنصب كرئيس لجمهورية مصر العربية ... في بلد حكم ديكتاتوياً كل هذه السنوات ..

بغض النظر عن صلاحية أو عدم صلاحية كل أو أي من المرشحين التسعة في مواجهة مبارك ...

إلا أن هناك كلاماً وإنتقادات لم يكن أحد يتخيل أن تطرح على الهواء في التليفزيونات وفي الصحف وفي المؤتمرات الشعبية ..

أعتقد أن كل مايحدث يصب في مصلحة مصر ..

أظن أن على كل المعارضون .. والسياسيون والمهتمون بالأمر العام في مصر . أن يكونوا أكثر إيجابية وفاعلية خلال الفترة القادمة ..

والمهم .. بل والأكثر أهمية .. أن نصل نحن المصريون إلى إنتخاب مجلس تشريعي محترم ...

مجلس تشريعي قادر على مكافحة ومحاربة وكشف الفساد والفاسدون ...

إن مارد الحريات الذي أطلق من القمقم في مصر ..

لن يستطيع أعظم السحرة إعادته مرة أخرى إلى القمقم ..

[achnaton]

ولا تزعل يا ابو عمر .. التلفزيون الألمانى جاب النتيجة من الكنترول .. وعشان اريحك .. شوف انت واسمعها بنفسك .. للإطمئنان بس .. وان لم تفهم قوللى وانا اقولك .. حتلاقى واحد محطوط فى القفص " الاحتياطى " بتهمة تزوير حاجة اسمها التوكيلات " ويقول الفيلم أن مبارك وقد سيطر على الجيش والشرطة وكل المؤسسات الهامة فى البلد وسيبقى فوق الكرسى الست سنوات القادمة ..

http://www.heute.de/ZDFmediathek/inhalt/20...-wm_dsl,00.html

وشوف واستمتع وحضر يفط التأييد ..

تم تعديل 6 سبتمبر 2005 بواسطة achnaton

[se_ Elsyed]

الخلايا النائمة للحزب الوطني

هو تعبير أطلقته بعد ما رأيت المهازل التي حدثت بالأمس في الإنتخابات ..

- وأقصد بالخلايا النائمة هم أولئك الأشخاص الذين تربوا وترعرعوا في أحضان الحزب الوطني .. وعلمهم الفساد على أصوله وشربوا من نهله لمدة 24 سنة ... وعندما أرادت الباغية أن تتوب وحاولت أن تُقوم من سولك مريديها لم تلقى أي إستجابة فما بنته هي بنفسها خلال ربع قرن لن تستطيع أن تعدله في يوم وليله ..

وبالتالي يا إخوتي الأعزاء وجدنا إمبارح ناس منهم بتشتغل توماتيكي توماتيكي وبيتصرفوا بعفوية متناهية وكإن الفساد والتزوير والبغاء هو القاعدة وغيره هو الإستثناء ...

[se_ Elsyed]

7 سبتمبر هو يوم سقوط ورقة التوت

- جميل جداً أن ترى الإنسان على طبيعته .. عارياً كما ولدته أمه .... ويتصرف بتلقائية وعفوية .. بالفطرة يعني ... كل ده برضوا شاهدناه في الملهاة السوداء بالأمس .. وأستمعنا إلى أصوات من كبار رجال الحزب الوطني وهم يتفاخرون ويتباهوون بجمال الإنتخابات وبنزاهة الإنتخابات وبإن كل حاجة 100 % .. وعلى شاشات التلفاز يُطل عليك شخص إسمه أُسامه سرايا ( رئيس تحرير الأهرام ) وهو عاري تماماً حتى مما يستر عورته ( ده حتى ماكنش لابس حاجة بنسميها بالبلدي بُرقع الحيا ) ليؤكد في الساعة الحادية عشر مساءً بإن الإنتخابات نزيهة ويتحدى أن تكون هناك ورقة إنتخاب مزورة قد وُضعت في الصناديق ( يبقى عايزين إيه تاني ؟ )

- وما أكده شهود العيان بالأمس بإن كوادر وأعضاء الحزب الوطني كانوا يتحركون بكل حرية في اللجان بدون ملابس تستر حتى عوراتهم .. فالبلد بلدهم وهم يفعلون ما يشاؤن بدون حياء .. فقد توقع الجميع بإن حالات التزوير ستكون محصورة في الريف والقرى النائية على اساس إن الآف الصحفيين وآلاف المراقبين من الهيئات الدولية والمحلية المُستقلة اللي مش تبعهم يراقبون الإنتخابات عن كثب .. ولكن ما حدث هو إن هؤلاء الأوباش عديمي الحياء تحدوا الجميع ونفذوا مخططهم في قلب العاصمة القاهرة وعلى مرآى ومشهد من الجميع .. فعندما نعرف بإن كثيراً من اللجان الإنتخابية في القاهرة كان يسيطر عليها أعضاء الحزب ويتواجدون بداخلها وهم يرتدون تي شرتات عليها صورة زعيمهم وقائد مسيرة التزوير .. وكانوا إذا ساورهم الشك في أحد الناخبين فإنهم يضللوه ولا يعطوة إستمارة الترشيح أو كانوا يقومون بإختيار رئيسهم بالنيابة عنه ...

وعندما نرى في تسجيل تليفزيوني موثق بإن إحد دوائر الدُقي كان التصويت فيها على عينك يا تاجر وبالبطاقة الشخصية فقط لأشخاص ليس لديهم بطاقة إنتخابية من الأساس.. فماذا يُمكن أن نُسمي هذا ؟

وعندما يؤكد لك ناخبين بإنهم قد قاموا بالمرور على أكثر من لجنة وقاموا بالترشيح أكثر من مرة .. بعد أن قاموا بإزالة الحبر الفسفوري العجيب بمنتهى السهولة .. فماذا نُسمي هذا ؟

وعندما تّذيق الدولة الآمرين للناخب اللي مش على هواها وتخلية يدور على إسمه من خلال 18 ألأف إسم غير مرتبين ترتيب أبجدي على الأقل ده بعد أن قضى ساعات واقفاً في الطابور حتى يدخل إلى داخل لجنة الإنتخابات .. فماذا تُسمي هذا ( طبعاً الإختراع العصري اللي إسمه مايكروسوف وورد أو إكسل لسه ما وصلش عندنا .. عشان كده بيعملوا كشوف البركة دي !!!!!! )

وعندما تسمع أصوات عديدة بالأمس من أشخاص كنت تحسبهم شُرفاء أو إن لديهم بقايا لشيء إسمه الضمير الحي وهم يقولون " معليش .. أصل دي أو تجربة لنا .. ولازم يحصل بعض التجاوزات أو يوجد بعض الثقوب .. وبإذن الله لازم نصحح أخطاءنا في إنتخابات مجلس الشعب بعد شهري .. وإنتخابات الرئاسة في 2011 ... ونلتفت بقى لمستقبل البلد والعجلة دارت وما حدش بعد كده هايقدر يوقفها .. وإن 7 سبتمبر حد فاصل في تاريخ البلد وفي تاريخ حكم الفرد الواحد والحزب الواحد - وكإن اللي كان بيحصل إمبارح هو إنتصار للأحزاب الأخرى التي نافست الحزب الواحد الحاكم !!!- )

أعتقد بعد كل ذلك فمن الممكن أن نقول بإن ده إعتراف صريح وواضح من الدولة بمشروعية الدعارة والإجرام ... وأعتقد على الدولة بإن تلغي القوانين المُطبقة في مصر وتوفر الملايين اللي بتدفعها رواتب للقضاة ورجال الشرطة والمُشرعين .. وتجعل الناس يعودون إلى الفطرة والتصرف الهمجي الذي لا تحكمه قوانين ولا شرائع وتكون هي القائد والمرشد لهم عن كيفية إختراع الحيل والآلاعيب .. وأي حد هايتكلم في بلدنا الحبيبة مصر بعد كده عن الشرعية وسيادة القانون أو إن ما بُني على باطل فهو باطل .. فبمنتهى البساطة سنقول له إخرس أيها الآفاق ... يا من رأيت بأم عينك العري والعهر والدعارة بعينك ومع ذلك إلتمست لهم العُذر .. كل هذا من أجل أن ينجح الطالب الفاشل الذي لم يذاكر دروسه لمدة ربع قرن وفجأة إنتفض وأراد أن يُعوض ما فاته في أيام قليلة .. وبدل ما يذاكر ويجتهد ويتقي ربنا إتبع أساليب الغش والخداع والنفاق والرياء والإجارم المُنظم .. بس المهم ينجح والمهم يترستق على الكرسي ...

[أبو عزب]

البقاء لله...

فعلا سقطت ورقة التوت عن هؤلاء القوادين الذين أصبح لا هم لهم الا كبت الشعب وهدم ارادته..

وانتظروا جورجيا جديدة قادمة في الطريق بإذن الله...

[Aly]

يا سيد س. س.

ليك حق تزعل والله بس أنا فى رأيي أن العملية واضحة من الأول, لو نزلت الشارع المصرى وشفت كام يافطة معلقة فى الشارع بتنادى بإسم مبارك و الكلام اللى مكتوب له كنت هاتعرف لوحدك النتيجة الطبيعية للإنتخابات, و إن فى أد إيه كم نفاق.

بسم الله الرحمن الرحيم:

إن المنافقين فى الدرك الأسفل من النار و لن تجد لهم نصيرا - النساء 145

يعنى المنافقين تحت خالص فى النار اللى فعلا ما فيش حد هايتشوى أكتر منهم, وجايز ربنا عايز كده علشان لما يتسجل لكل واحد فى كتابه ويقابل ربنا يبقى مش ممكن يكدب ساعتها و يقول ما حصلش, ده حصل و حصل و أكتر من 20 مليون نفاق كمان

[se_ Elsyed]

يا أخي العزيز علي

أنا زعلان عشان عشمونا بالحلق وطلعونا فوووق فوووق فووق السحاب وفجأة شدوا السلم ونزلت على جدور رقبتي ..

طب كانوا سابونا على عمانا زي الأول .. ووالله العظيم ما كنت هازعل لو قعد في الحكم 50 سنة كمان لحد ما يبقى عنده 130 سنة ويبقى أكبر معمر في التاريخ ...

لا حول ولا قوة إلأا بالله

وحسبنا الله ونعم الوكيل

[الأفوكاتو]

عزيزى سى السيد,

أفهم أن تزعل عندما ترى أن نظاما ديمقراطيا قد فشل فى تحقيق آمال الشعب.

و لكن لأننا نعلم مقدما أن النظام ليس نظاما, و أنه ليس ديمقراطيا, فلماذا نزعل؟

يقول مثل مصرى قديم:

إذا جاءك العيب من أهل العيب, مايبقاش عيب.

لا داعى للحسرة, فعلى الباغى تدور الدوائر.

تحياتى لكم جميعا,

و تضامنوا لفضح الفساد, تمهيدا للإطاحة بالحكم الفاسد.

[se_ Elsyed]

في إحد البرامج على قناة أوربت والتي إستضافوا فيها شيء يُدعى أحمد موسى ( نائب ريس تحرير الأهرام ) وقد أطلقته الحكومة على أيمن نور ليطاردة ويعضه ويحاول أن يُلصق به أي تهمه والسلام .. وبالفعل حاول هذا الموسى وسأله سؤال صعب جداً لا يستطيع أحد أن يجيب عليه وقال له : عندنا معلومات مؤكده من الشركة المصرية للإتصالات بتقول إن عندك 23 خط تليفون ( توينتي ثري ) فإيه تفسيرك لهذا ؟ ... أيمن نور بسذاجته وبدل ما يدي له على وشه جاوبوا وقال له الخطوط موجوده فين ..

طبعاً لو تخلينا شركة تعمل في مجال الشباشب والبقاقيب ومقرها العتبة هايكون لديها عدد خطوط تليفون أكثر من هذه ... مش حزب ولا مكتب محاماه ولا منزل شخصية معروفة !!!!..

نييجي للتقيلة بقى .. أول إمبارح كان العالم العلامه والفاهم الفهامة عماد الدين أديب بيتكلم عن مقومات فوز الحزن الوطني ومن ضمن المعلومات اللي قالها إن الحزب الوطني كان عامل مركز قيادة لمتابعة العملية الإنتخابية وده في روكسي .. وإن المركز ده كان فيه ... إمسك أعصابك إنت وهو الصاروخ طالع ... كان فيه 7000 خط تليفون ( سفن ثاوزند ) و 600 جهاز كمبيوتر ..

شوفتوا الجبروت والهمينة تصل لحد فين ؟

يعني سنترال ألماظة عندهم ... وفتحوا فرع من شركة كومباك ..

يقدر بقى حد يسأل فواتير السنترال دي مين اللي بيدفعها .. أو من أين لك هذا يا حزب الدولة ودولة الحزب ؟

[se_ Elsyed]

جريدة المساء والسهرة 10/9

الشعب يحتفل ب "مبارك"

الجماهير الحاشدة زحفت إلي منزله للتهنئة وإعادة مبايعته

أجراس الكنائس تدق .. فرحاً بأول رئيس منتخب

في يوم الوفاء زحفت جماهير الشعب إلي منزل الرئيس المنتخب حسني مبارك بمصر الجديدة تعبيراً عن فرحتها بدخول مصر مرحلة جديدة بعد اختيار حاكمها بالإرادة الحرة والاقتراع السري المباشر.. تعالت هتافات الجماهير علي اختلاف طوائفها مطالبة الرئيس بتحقيق برنامجه الانتخابي علي أرض الواقع.

قالوا: يدنا في يدك نحقق الطموحات ونبني المستقبل بأسلوب علمي يواكب العصر

أنا مش قادر أمسك نفسي ... كفاية بقى .. هما مش عارفين إني مرهف الأحساس وبأعيط لأقل سبب ..

أجراس الكنائس تدق

لأ بقى الحته دي مسروقة من فيلم الناصر محمد حسني مبارك .. بأمارة الست اللي بتوع الحزب الوطني خطفوا إبنها عشان يضغطوا عليها تروح تصوت لمبارك .. فراحت إشتكت له فخلى رجاله يفرجوا عنه عشان شكلهم ما يبقاش وحش .. فراحت تدق أجراس الكنائس وتحمل أغصان الزيتون المخلل إبتهاجاً بهذا الحدث الأكبر ..

قالوا: يدنا في يدك نحقق الطموحات ونبني المستقبل بأسلوب علمي يواكب العصر

لأ طالما الجماهير قالت كده بالحرف الواحد يبقى عندهم حق ولازم نبني المستقبل على اساس علمي يواكب العصر والمغرب كمان ...

الجماهير عمرها ما بتكذب أبداً

[مصرى حر]

يا عينى عليك يا س س يا عم انا معاك ان هما عيشونا فى حلم الديمقراطيه و حريه الإختيار بس انت اكيد كنت حاسس ان فى حاجه غلط

لصلها متجيش كده افش مينفعش

مش هبقى قاعد و مبلط فيها و بعدين مره واحده اخد بالى ان المفروض اعمل انتخابات و الناس تختار اللى يحكمها

ماهو اكيد فى حاجه هى اللى عملت كده

بعدين معلش دى اتزورت المره دى بس كفايه ان احنا نجحنا ان احنا نعمل انتخابات و مع شويه تعب و كام الف يموتو من الضرب و التشريد ممكن ننجح فى اللى احنا عايزينه.

بس انا بقول ان العمليه دى متعديش كده بالساهل لازم يكون فى وقفه و ان اخنا نتكلم و مادام احنا بقينا قدام الأمر الواقع نبدا ندور و نحاسب كل واحد على اى غلط احنا شايفينه و نحسس الناس دى ان احنا موش هننضرب على قفانا تانى و ان احنا موش هنعيش فى الجو المخاباراتى ده مهما حصل