هل تعتقد أنه يتم مراقبة المنتدى من قبل الحكومة

[amr2003]

هل الكتابات تراقب ؟!

وإذا كانت تراقب فلماذا ؟!!

هل لقصف رقابنا يوما ما ؟! أم لمعرفة ما يريد الشعب وما يدور فيه ؟!! أم لشيء آخر؟!!

[watany ta7n]

الحكومة لا تخاف إلا من التجمع مثل تجمع الطلاب فى الجامعة أو تجمع العمال فى المصانع

فهذه تسمى قوة شعبية

أما المقالات والصحف فهى بمثابة الضرب فى الميت, أعنى الناس فهمة لكن لا تستطيع فعل شىء, وأكبر مثال على ذلك جرايد المعارضة.

أما نحن فمجموعة من المغلوبين على أمرهم نريد الفضفضة

ورغم معرفتنا الجيدة بذلك نجد الكثييييييير من الأختلاف والمهاجمة والتحدى لبعضنا البعض ,هذا فضلا عن الشطب والحذف لبعض المواضيع.

فإذا أرادت الحكومة مراقبة المنتديات المعارضة للحكومة "خوفا من رد الفعل" فعليها أن تحل مشاكل هذه المنتديات أولا

هذا رأيى مع أحترامى لأراء كل الأعضاء

:inlove:  :inlove:  :inlove:

[freefreer]

مليون فى المية مراقب .. أو بمعنى أكثر صحة .. يتم الأطلاع عليه .. و ليس فقط من قبل الحكومة .. و لكن النت كله مجال أبحاث لكثيرين من طلاب المعلومات .. لو قلت لى مخابرات اسرائيل .. أقولك ممكن .. أمريكا .. ممكن .. اظن انه و بصورة بديهية .. يعتبر مقياس للرأى العام .. فالأجهزة التى تهتم بذلك .. لابد و ان تحاول الأستفادة من المعلومات المجانية التى تتيحها النت و منتديات كهذه

ولا أستبعد ايضا ان يكون محل تجارب .. فيدخل شخص ما و يلقى بمعلومة ما .. ثم يقيس رد الفعل

و احنا حنروح بعيد ليه ؟ .. تذكرت انه منذ سنتين .. جائنى ايميل لواحد قدم نفسه على انه باحث ماجيستير فى العلوم السياسية .. و يرغب فى ان يسألنى عدة أسئلة

ثم سألنى لماذا اشارك بأرائى السياسية .. و ما اتوقعة من وراء ذلك .. و شوية اسئلة كدة مش فاكرها

[amr2003]

لا أعتقد يا أخ  watany ta7n أن المنتدى به هذا الكم من المشاكل ، وحتى إذا كان فيه فهو شيء طبيعي ، لأن أي  مكان سواء جرائد أو صحف أو منتديات لا بد أن تحتوي على أراء متناقضة متضادة ، ولكن لا بد أن يكون الهدف الأول والأخير هو الاستفادة قبل كل شيء . . فإذا جعلنا ذلك نصب أعيننا ولم نأخذ النقاش والاختلاف على محمل التحدي الشخصي ، فلن تكون هناك مشاكل !

[watany ta7n]

ولكن لا بد أن يكون الهدف الأول والأخير هو الاستفادة قبل كل شيء . . فإذا جعلنا ذلك نصب أعيننا ولم نأخذ النقاش والاختلاف على محمل التحدي الشخصي ، فلن تكون هناك مشاكل

شكرا للإيضاح يا أخ عمرو فهذا بالضبط ما أردت قولة

ولكن لازلنا متفقين أن هناك من المشاكل والعدوانية فى الرد ما ينفر بعض الأعضاء فى البقاء والمشاركة

وبالطبع لا يأخذ الأعضاء الخلافات على محمل شخصى ولكن أكثر الأحيان يولد الإختلاف عند بعض الأعضاء  شعور بأن العضو الأخر ينتمى لفكر مضاد, ويبدأ بالهجوم على هذا الفكر بغض النظر عن الموضوع الأساسى

[Faro]

كل منا يراقب ويقرأ ما يكتبه الآخر وفى أحسن النظم الديمقراطية يتم تخزين وحفظ كل مايكتب ويرسل مدة عامين وتم إستخدام ذلك فى كشف بعض الأعمال الإجرامية .

[بنت شعنونة]

هناك مقولة على طريق المطار تقول

"ابتسم فانت في مــــصــــــر"

???

مراقبة ايه بس

صللوا على النبي

:dozingoff:  :lookaround:

[Sherief AbdelWahab]

هناك مقولة على طريق المطار تقول

"ابتسم فانت في مــــصــــــر"

لهذه الأسباب ..أعتقد أن الانسان المصري يموت غالبا..من الضحك!

:D  :D  :D  :D  :D  :D  :D

خلص الكلام

[EBN ELBLD]

الحمد لله انا داخل بأسم مستعار

عليا النعمه انا ما استحمل ألم على أفايا من عز امين الشرطه بتاع اسم الحدايق  وهو بيقول رد عا البيه يابن ال.....

اما علي حته أيد ربنا ما يوريكم !!!! انا مجربتهاش بس سمعت

وعلى رأى المثل جبان عايش احسن من شجاع ميتا يا بويا العمر مش بع زئــه

ربنا يجعل كلامنا خفيف عليه

[ســيد مرزوق]

وأنا على فكرة برضه يا جماعة ..... إسمي مستعار

يعني .... وماخدش ياخد على كلامي

أنا ساعات كده ..... باهلفط في الكلام لما بكون جعااان

إنما البلد زي الفل والحكومة حلوة وطعمة ودمها خفيف على قلبي خالص

ومش زهقان من عيشتي ولا حاجة

ولا هاطق من الغيظ

ولا حاسس بالضياع كمواطن ولا حاجة

أنا حلو خالص

ومبسوط من الحكومة ..... ربنا يخلينا الحكومة

ويحيا الشباب ورئيس الشباب

وكل الكتب الحلوة والمكتبات والكباري الجميلة الكويسة اللي عاملاها الحكومة

وللا الشرطة الخدومة اللي في خدمتنا دايما على قفانا

يوووووه .... مش قولتلكوا ساعات باهلفط

قصدي في خدمتنا دايما .... وبس

وهو إحنا من غير الحكومة الكويسة دي نقدر نعيش أصلا ؟؟؟

وطبعا معاها الحياة لها معنى تاني خالص .....

تعيش الحكومة

ونموت إحنا في ستين داهية

:dozingoff:  :dozingoff:  :dozingoff:  :dozingoff:

[tiger1411]

يا نهار مش طالعاله شمس

احنا كده غاويين نجلد ذاتنا(حلوه دى)زى ما بعض المفكرين بيقولوا

مالها البلد هه؟؟؟؟؟؟؟ما كله زى الفل يعنى عمالين يقولوا لنا فكوا الحزام فكوا الحزام واحنا مصرين نربطه اكتر يبقى مين الغلطان؟؟؟

عمالين يبنوا فى مساكن وينقلوا الناس فيها والناس تسيبها وترجع

تسكن فى المقابر آل ايه بيتونسوا بالاموات يبقى هتعمل ايه الحكومه يعنى؟؟؟

مثل تانى بتراقب مكان زى ده عشان تتعرف على اتجاهات الراى العام

وتعمل الصالح وعلى يدكو أول م الشعب نادى بتوشكى راحوا منفذين ، نادىبالغاء المنطقه الحره فى بور سعيد راحو منفذين ، وكل ما ينادى بتغيير الحكومه لما ريحة بعض الوزرا تفوح يروحو مغيرين(صحيح ممكن التغيير يتاخر شويه صغيره كام سنه يعنى بس فى الاخر بيحصل)يبقىايه المطلوب؟؟؟؟؟؟؟؟؟؟؟؟؟؟؟؟؟؟؟؟؟شعب مفترى صحيح

:inlove:  :inlove:  ;)  :D  :D  :D  :D

[felfel]

للعلم فقط

أستخدام أسم مستعارلايعنى أبدا السرية يمكن لللأجهزة الأمنية لو عنده ناس بتفهم فنيا أن يصل الى نمرة التليفون بتاع الشخص اللى بيخش على المنتدى , ولكن دة يتطلب معلومات من الforum admin بخصوص الlog files اللى بتحدد الIP بتاع الشخص

وبأستخدام الIP الوقت المحدد اللى دخل فية يمكن الرجوع الى الISP لمعرفة الشخص اللى داخل ورقم التليفون كمان

ونهاركم أبيض  ;)  :D  :D  :D

[tiger1411]

ايه ياعم فلفل

قصدك نهاركم أزرق مش كده برضه؟؟؟؟؟؟؟

:sneaky2:  :sneaky2:  :sneaky2:

[mnman]

احمدك يارب... انا مش عايش في مصر.. وبدخل علي النت بخط مباشر مش بالتليفون.. يبقوا يوروني شطارتهم ويجوا عندي.. وربنا يستر علي الي في مصر...

;)  :D  :D

[Khiber]

بس أنا واثق فى رجال القائمون على هذا المنتدى أقصد الأدمنستريشن مش هيتعاون معاهم فى هذه الحاله ش هيقدروا يتوصلوا إلينا

بس أنا خايف من حاجه واحده بس إن سلومه  لقرع أخو عبده مفش يرحب بالأدمنستريشن وسعتها ممكن يعرفوا كل حاجه وربنا يستر

[freefreer]

دانا أفديكم برقبتى ..  :)  .. قال أقر ال  :cool:

[Faro]

أحد الأميريكيين قدم للمحاكمة بتهمة الشروع فى صنع قنبلة ذرية وذلك بسبب دخوله بدون تعمد موقع محظور يتحدث عن تركيب القنبلة , ولكن أفرج عنه لرفض المسئولين الإفصاح عن إسم الموقع .

لقد سمعت ذلك- اليوم - من خلال راديو السيارة .

الإتحاد الأروبي مازال يناقش مشروع - مقدم من بلجيكا - مراقبة الإنترنيت .

[Cleo]

أخواتى الأعزاء......

كل حاجة فى الدنيا بتتراقب حتى الفاكسات و الموبايلات....!!!!!!!!!!!

http://serendipity.magnet.ch/hermetic/cryp...lon/echelon.htm

[arabawy]

احمدك يارب... انا مش عايش في مصر.. وبدخل علي النت بخط مباشر مش بالتليفون.. يبقوا يوروني شطارتهم ويجوا عندي.. وربنا يستر علي الي في مصر...  

:)  :)  :D

وما الفرق لو كنت تعيش في مصر ؟

[arabawy]

.....

اما علي حته أيد ربنا ما يوريكم !!!! انا مجربتهاش بس سمعت

ادعي ربنا ينولهالك