أحزاب الطراطير لهفوا اللحاليح وقالوا يا فكيك

[se_ Elsyed]

إستنيت إن حد من الزملاء يعلق على الخبر الخطير اللي جاء في الجمهورية بالأمس ووضعته في موضوع عزل أيمن نور .. ولكن لم يحدث حيث إنه جاء في سياق التحدث عن خطط أحزاب الطراطير في الإنتخابات البرلمانية القادمة .. والخبر على أجزاء بيقول

قررت جميع الأحزاب السياسية "21 حزبا" خوض انتخابات مجلس الشعب التي ستجري في نوفمبر المقبل بما في ذلك الأحزاب التسعة التي شاركت في انتخابات رئاسة الجمهورية.

علي صعيد آخر قرر 5 رؤساء أحزاب ممن خاضوا انتخابات الرئاسة عدم خوض الانتخابات البرلمانية وفي مقدمتهم نعمان جمعة رئيس حزب الوفد وأحمد الصباحي رئيس حزب الأمة واسامة شلتوت رئيس حزب التكافل وفوزي غزال رئيس حزب مصر 2000 وابراهيم ترك رئيس الحزب الاتحادي.

وفي تكملة تاني بتقول

تسعي بعض هذه الأحزاب حاليا للدخول في تحالفات مشتركة من خلال التنسيق بالنسبة للمرشحين في الدوائر الانتخابية وخاصة التحالف الثلاثي بين الوفد والتجمع والناصري وتشكيل لجنة مشتركة للاتفاق علي توزيع الدوائر وعدم التنافس في الدائرة الواحدة

بالله عليكوا .. إذا كنا ما صدقنا الناس عرفوا أسامي 9 أحزاب من اللي موجودين غير الحزب الوطني .. وكل شويه كان يطلع كل رئيس حزب منهم يقول بؤين عشان يحلل النص أرنب اللي لهفوا - حار ونار -

يقوم 5 منهم ينسحبوا وما يرشحوش نفسهم وكإنهم بيطلعوا لنا لسانهم وبيقولوا " ضحكنا عليكم وخدنا فلوسكم " :sad:

وبعدين إذا كانوا هم جميعاً حتى الأمس القريب ما كانوش معروفين على الإطلاق .. يبقى لما ينزلوا حد من أحزابهم الإنتخابات يبقى الناس هاتعرفه ؟

وإذا ما كانش رئيس الحزب يبقى هو القدوة ويقود معركة انتخابات مجلس الشعب ويدعم بقية الأعضاء المُترشحين معه .. يبقى مين هايدعمهم ؟ وازاي هايوصل فكر حزبه للناس في الشارع ؟

طبعاً الموضوع كده إتحسم تماماً لصالح الحزب الوطني كالمعتاد .. اللي واقف يتفرج على عرايس الماريونيت اللي صنعها بنفسه وبيرقصها ويشقلبها وقت ما يحب .. وكل فترة كده بيرمي لها عضمه تتلهي فيها .. بلا سياسة بلا وجع دماغ

ألم يكن أولى بالدولة الرشيدة بدل ما تعدل المادة 76 وتظبطها على مقاسها .. إنها كانت تحاول إصلاح تلك الأحزاب الوهمية .. إن شالله لو كانت إشترطت إن الحزب اللي يخوض الإنتخابات البرلمانية ولا يحصل على الأقل على 5 مقاعد ( بنقول 5 بس يا جماعة من مجموع 445 على مستوى الجمهورية كلها ) يتم حله وتسريح أعضاءه ورئيسه ( اللي يسرح بعجوه .. واللي يسرح بأمشاط وفليات .. أهو كل واحد يسرح بالحاجة اللي بيحبها وممكن يُبدع فيها ) وإستبداله باحزاب أقوى ولها فكر وبرامج وسياسة واضحة ..

انا بأحلم طبعاً .. لإن الحزب الوطني الحاكم مش عايز كده .... وإمبارح لما ظهر له منافس له أظافر صغيرة وإبتدي يخربش زي حزب الغد .. إبتدوا ينخربوا له على أي مصيبه يبعتوه فيها طالما تطاول على أسياده وما بقاش أليف زي حزب الوفد النعماني المعتق أو إرتضى إنه يلعب دور الطرطور في الفيلم السياسي المصري السخيف الذي سئمنا من مشاهدته لمدة 24 عام ...

[achnaton]

شوف يا ابو عمر ..

المسرحية المرة دى .. دى مسرحية الخريف .. المعاده من سنوات طويله .. والمضمون نجاحها كما سبق .. فى كل عهود المماليك .. المماليك الجدد والمماليك القدامى .. وكل اللى حيتغير فى الموضوع الاسماء .. لأن ابطال هذه المسرحية المشؤمة .. وبمجرد ما بيترفع الستار عن اول عرض .. بيشرف عزائيل ويلم .. بالطول وبالعرض .. ويفضل النص والموضوع .. من غير ابطال

فى الفساد مزروع .. ولما بيزهر .. ويظلل .. يلم الابطال الجداد فى الضلايه .. وترفع الستار .. وانت زى ما بتقول .. طراطير الاحزاب كل واحد منهم حياخد كام كرسى للنواب .. لكن دول حيكونوا على الفرازة .. ومجهزين أعظم تجهيز .. ومدربين تمام التمام .. على استخدام الايادى مخده فى مجلس النوام .. وفى بداية الفصل الاول حتتغير الوزارة .. وحيتولى صفصف رئاسة التشكيل الجديد واللى يؤمر بيه جمى والهانم حيبقى فى ايده زى الخاتم .. وكده تسليك .. وكده توليع .. ومعظم الاحزاب الموجوده من غير اسنان .. واللى كان شادد حيله .. وطلع له اسنان .. آدى انت شايف .. اللى بيعملوه فيه ..!! وطبعا عشان تمشى المسرحية بلا مشاكل.. كان لازم يمنعوه بكل اصناف المعاول .. عشان يوقفوا نموه .. وهو حزب الغد ..

المخرج يا حسرة عليه مش شايف اننا عدينا الالفين وبقينا الفين وخمسه .. والناس فى مكان بتسمع كل همسه .. ورمت طوبة الجرائد القومية .. واعلام الهبراء الحرامية .. ولا نافعه معاهم قنواة ارضية ولا فضائية .. حيكتموا نفس واحد .. حيطلع بداله ميه .. ومش بعيد إن جيمى يركب .. وتساعده ماما .. بعد ما يعلن الكبير انه صحته تعبانه .. والبلد وصلت بر الامان .. بعد المشاكل بتاعة زمان .. لأنه استلم البلد خربانه .. وفلسانه .. شوف بقى مرتب الموظف الوقت وصل كام .. 3 مليون يا ابو السيد فى الشهر.. ما يلمهمش رئيس وزارة شريف فى دهر .. دا حتى مرتب رئيس الجمهوية ما بتعداش كام ميه .. وعشان كده كنا بنستلف من اللى يسوى واللى ما يسواش واصبحت ديونا بالبلايين .. داخلى وخارجى ولكن قوللى راحت فين !!؟؟

الفيلم ده اتعرض ايام ناصر .. وايام السادات .. ونظامنا الحالى اخذ منهما العظات والعبرات .. بداها ناصر بالغاء الاحزاب .. وسد جميع الابواب لا حد يخرج من البلد الا بتصريح .. واللى كان قاعد فى قصر اداله بداله عشه صفيح .. ووزع القصور والفلل المصادرة .. مقرات لهيئة التحرير .. واللى يجى ببلاش يروح بلاش استولى عليها كلها حزب " ابو صباع " وبعض احزاب الطراطير ..

ياريت يا ابو عمر تاخذ اجازة وتيجى معانا مصر .. نتفرج على اول عرض .. ونسمع الهتافات والتسقيف .. فى نهاية هذا الخريف .. وآهى فرصه نزور أولياء الله الصالحين .. ونتوسل الى المولى الكريم فى مساجدهم باللى فى بالى وبالك .. قول بقى آمين .. ونكمل بكره

[se_ Elsyed]

الف رحمه ونور عليك يا عمي أخناتون ..

كان نفسي قوي عم محي ( أخناتون ) وعم محمود ( الأفوكاتو ) يكونوا موجودين في اللحظة دي

وأنا متأكد إنهم ياما حلموا بها زينا

-------------------------------------

مش هو ده ناجي الشهابي اللي في 5 بس في حزبه وماحدش يعرف شكله حتى وطلع قال دي مش ثورة ده لعب عيال وإحنا مش ممكن نشترك في وقفات زي بتاعت 25 يناير دي ؟

واللي وشه يقطع الخميرة من البيت رفعت السعيد قال كذلك هو أيضاً

والأن ... أصبحوا من المفاوضين ومن علية القوم .. لعله يأخد له ورك أو صدر كنتاكي في الزحمة دي

مين حزب الأتحاد أسامه شلتوت ده ؟

حد يعرفه يا رجاله ؟

نقطه بجد اتفق معاك فى الخوف منها جدا

ناس كتير دلوقتى عايزه تنط على تورته المكاسب و هما اساسا معملوش حاجه و لا ليهم حتى اى ثقل يعتد بيه

دى ناس عايزه تاخد المكاسب على الجاهز

و دول من اعداء الثوره زيهم زى الجانب التانى بالضبط

عايزين نحى الثوره من اشجار اللبلاب دى

مش عارفه شباب الثوره هيلاقوها منين و لا منين

من النظام التنح الى مش عايز ينكسر قدام اراده الشعب

و لا من القوى الدوليه الى كل الى يهمها حمايه مصالها و الباقى يولع و مستعديين يتحالفوا مع الشيطان علشان دا يتحقق

و لا من الناس الى من الشعب الى بقت تشتم فيهم دلوقتى علشان و بقى حسنى مبارك ابوهم و تاج راسهم كمان على حسب ما مبيفتخروا

و لا من سارقى جهود الاخرين الى عايزين ينعموا بالمكاسب و يعترف بيهم و هما اساسا مدفعوش ضريبه دا من دمهم زى باقى الشهدا

يا رب نقدر نحافظ على الثوره الجميله دى من غير ما اى طرف من الاطراف السابقه ما يخطفها مننا

يا رب

ومع ذلك

أنا مع أي رأي وأي تهدئة على خلفية :

- تنحي رأس الفساد مبارك

- عودة الأستقرار لمصر

- عدم مشاركة اي حد ما ضحاش في الثورة دي في أي مفاوضات أو في الحياة السياسية من اصله ..

أقسم بالله ناجي الشهابي ده من يوم 25 يناير وهو سوبر ستار في التليفزيون الأباحي المصري وهاتك يا شتيمة في العيال البايظة اللي أهلها ما عرفوش يربوها وطالعين التحرير يعملوا دوشه .... وفي الخلفية يطبل له رفعت السعيد

وغيرهم وغيرهم من المتسلقين اللي مش بياخدوا حتى صوتهم لما بينزلوا أي إنتخابات

من الناس ( لا حول ولا قوة إلا بالله .. والله دموعي تنساب لا إرداياً الأن ) ... من الناس اللي لم نجدهم في أي كارثة حلت بالوطن عبارات بتغرق قطارات بتتحرق ولا صخرة بتقع على نافوخ الناس تطربقه ولا مظاهرات لكفاية أو 6 أبريل او شهداء القمع البوليسي أو تزوير للإنتخابات

إتحاد دستوري إيه وجيل إيه وزفت إيه ؟

فلتذهبوا أنتم أيضاً إلى مزبلة التاريخ بصحبة مبارك ..

نحن لا نريد أراجوزات كل همهم البريستيج وإن الأخ رئيس حزب - زي رئيس جمهورية نفسه - يلبس البدلة الزفره ويعلق كارنية على صدره ويكتب عليه ( رئيس حزب اللي يحب النبي يزق ) حتى لو كان هو بس اللي عارف إنه رئيس حزب .. ومراته بتفتكره كهربائي سيليسيون

نحن لا نريد ناس كل همهم إنهم يحصلوا على كوته معينة من تأشيرات الحج مجاناً عشان يبيعها في السوق السودا ويرقد على فلوسها للحج اللي بعده

نحن لا نريد ناس سلبيين خايفين على حياتهم ومطوي تحت جناح الحكومة والحزب الوطني ولا الكتكوت المبلول اللي خايف يطلع بره العشه أحسن ييجي له زكام

أتحدى حد من الـ 23 أراجوز دول يمسك الميكرفون ويقول للناس إيه إنجازات حزبة في الحياة السياسية ؟

وإيه هي التضحيات اللي ضحاها عشان الوطن أو الشعب .

أقسم بالله ده كلام كتبته من زمان .. إن لو حزب فيهم كان إهتم مثلاً بقضية الأُمية وسابه من السياسة والهم ده كنا شيلناه فوق رؤسنا .. ونحن جميعاً نعرف أن هناك احزاب زي الخُضر وغيرها تهتم بالبيئة فقط والمحافظة عليها

لكن دول أحزاب - بيئة فعلاً - وجميعهم مهزءون

لإن اللي يرضى على نفسه يبقى أراجوز ... وهزوء وشخص في الظل يتلقى تعليماته من الحكومة وصفوت الشريف رئيس لينة الاحزاب .. يبقى لا يستحق أن يتواجد في الحياة السياسية من أساسه

[aimen]

RT @Moutaz_D:

عشنا وشفنا .. رئيس مخابرات سابق ونائب رئيس حالى (عمر سليمان) بيجتمع ببياع كبده ورد سجون (رجب حميده) لمناقشة أوضاع مصر :P #Egypt #Jan25

[se_ Elsyed]

RT @Moutaz_D:

عشنا وشفنا .. رئيس مخابرات سابق ونائب رئيس حالى (عمر سليمان) بيجتمع ببياع كبده ورد سجون (رجب حميده) لمناقشة أوضاع مصر :P #Egypt #Jan25

عزيزي أيمن

أنا مؤمن بنظرية الاخ لامبروزو ..

مش هاتكلم عن خلقة ربنا - حاشا لله -

لكن بالله عليك

من غير لا خلاف سياسي ولا أنطباعات تدوم - ولا أي منتج من منتجات صابون لوكس -

بُص على الصور دي وقول لي مين رجب حميده .. ومين النائب المحترم علاء عبد المنعم

[se_ Elsyed]

حتى وهما مبلولين .. برضوا لسه مش عارفين يعملوا رجاله

شوفت منظر غريب النهاردة في إجتماع الطراطير مع عمر سليمان

أولاً أنا مش عارف ده مين وده مين لان كلهم رؤساء احزان

تخيلوا اللي كان عاوز يتكلم مع عمر سليمان كان بيرفع صوباعه زي العيل اللي في كي جي ون وعاوز يعمل بيبي وبيستأذن الميس

إخص عليكم حتى وإنتو في الموقف ده مش قادرين تسترجلوا وتشربوا بريل

[hanzalah]

أسوأ مافي ثورة 25 يناير

كان تعاطي القنوات الحكومية والصحف الحكومية

وأسوأ منه تعاطي السيدرئيس الدولة الهالك

وأسوأ منه كان تلك الزفة من عواجيز الفرح الذين تسابقوا على فتات موائد اللئام عشان ياخدوا لهم تصويره تحت صورة الرئيس

وأسوأ منه تدخل مهابيل ايران على الخط - بخطبة جمعه عربي - وكلاب خامنئي ليفسدوا علينا فرحتنا

وأسوأ منه هبل ودجل وتخبط و طبيخ حمضان من قيادات الاخوان

وأسوأ منه خيبة صفوت الشريف و أنس الفقي في الكذب الذي لايتجمل

وأسوأ منه .. خيانة الامانة من قيادات الشرطة المصرية التي احتفلنا بشهداءها الابرار

الذين ماتوا في الاسماعيلية وهم يقاومون المحتل الانجليزي

وأجمل مافي ثورة 25 يناير

شبابك وعيالك وبناتك يامصر

[جويرية]

اتمني في المرحلة المقبلة لما يبقي في مصر رئيس جديد

تبقي الأحزاب قطاع خاص مش قطاع عام

يعني اللي عايز يعمل حزب براحته مش تصرف عليه الحكومة من اموال دافعي الضارئب

مقارات الأحزاب و المرتبات و الجرائد المعارضة كل ده بتصرف عليه الدولة

انما ليه الدولة بتصرف كل المصاريف دي علي الأحزاب

اهو تشغل الناس بأي جدل ، و تخلق حالة بلبلة فكرية محدش يبقي عارف الحقيقة فين

تم تعديل 7 فبراير 2011 بواسطة جويرية

[se_ Elsyed]

يا ما أنت كريم يا رب العملية نجحت والثورة جابت مفعولها وبقيت أول مره اتفق مع جويريه .

انا مش مصدك .. أنا مش مصدك

------------

الأحزاب القطاع الخاص هي مطلب من مطالب الحياة السياسية النضيفة يا جويرية .. والتي تسمح لأي حد يعمل حزب ... وهو عليه يثبت نفسه ويخوض المعارك السياسية ويدافع عن بقاءه

مش لجنة إسمها لجنة الأحزاب رئسيها هو نفسه في امان الحزب ورئيس مجلس الشورى .. وعنده محلات تصليح جزم وساعات وحاجه تقرف ..