غواص فى بحار....القافية والاشعار

[شاعرالرومانسية]

اية رأيكم ياهل الدار

نبدأ نحكى .. نقول اشعار

عم صلاح وعمنا بيرم

والابنودى.. وفؤاد نجم

فى العامية دول شعرا كبار

يلا نصحصح ونحى لغتنا

فى العامية .. وفى الاشعار

حنبدأ اهو .. واحد يكتب

ووراة رد

مرة بجد ..

ومرة هزار

تم تعديل 4 يناير 2006 بواسطة شاعرالرومانسية

[Tafshan]

ادينى دخلت و قلت .. يا ساتر !

اللى قالع رأسه يغطيها ..

و اللى عامل عاملة .. يخبيها

متفرج .. و بأشوف اخباركم

و اتمزج بجمال اشعاركم

و بأحاول .. لكن على قدى

مانا اصلى طفشان مش شاعر

و في علم الكلمات مش واعر

و بأخنكش فنكيش مسطولة

لو عجبك .. قول لى اقضيها

و لو رخمه ... سيبها و عديها

[khedr]

اخونا الشاعر...... دخل الباب.......... برجله اليمين

اخونا طفشان.. حلف عليه.. ماهاسيبك ...علي اليمين

والكل مستني.. مبارزه الشعر والقوافي... بين الاتنين

احلي كلام.. وارق معاني..... في محاورات المصريين

يا دنيا ... تعالي ..اتفرجي علي ..اولاد مصر الحلوين

لما بيعملوا ...ويبنوا... قولوا في الدنيادي..... مين

يقدر عليهم ..... مين يتحمل...... منافستهم.... مين

من كل الدنيا الف سلام.... وتحيه...... لكل المصريين

وهانت يابلدنا.......هانت .......وهنرجع ليكي سالمين

وايام العزوالمجد تعود ......ونكيد كل........ الحاقدين

اخواني في محاورات المصريين........ انا.. والباقيين

والدنيا كلها.. تشهد لكم....... ده انتم ..... المصريين

اللي علمتم كل الدنيا........وذكر بلدكم... رب العالمين

في كتابه الكريم.. اللي هيدخلهاان شاء الله من الامنين

[شاعرالرومانسية]

عمنا طفشان ..

نورنا وجبلنا اشعاره كمان

بيقول كلامة مش موزون ..

وهو كلام شديد.. فى الجون

حتى بساطتة ..دى حاجة جنان

كمل كمل .. يا عم الطفشان

[هشام الجنيدى]

اسف ان انا جيت متأخر

بس انا باجى اول ما اقدر

واول مقريت الموضوع

قلت انا لازم اجى وأعبّر

اجى اعبّر عن احساسى

او فكره لعبتلى فى راسى

قلت اقولها قبل ما نام

واصبح الاقينى بقيت ناسى

الابره فى كوم قش تتوه

بس اهى موجوده مخرجتش

لو قشه بقشه نكشتوه

تلقو الابره علطول وش

:unsure:

[ام البنات]

شاعر الرومانسيه فاتح موضوع

وببساطه هو شاعر وكلامه مسموع

واخونا طفشان دخل يرمى السلام

يقول مش عارف وكلامه احلى كلام

ميدو خضر رايق وقلمه صاحب افكار

وهشام جنيدى ساب الرباعيات وجه يقول اشعار

وام البنات جيه تزق وتقول وانا وانا كمان

مهى خلاص بقت سايبه واى حد يقول انا فنان

[bentmasria]

عم يا عم يابو الشعار

فكرة نميسة يابو الافكار

الناس هلت والله كتار

ادباء وخطباء كتير وكبار

يكتبوا هنا

اجمل اشعار

واحنا يا باشا يا عم الناس

نستنى كلامكم احساس

نور صفحاتنا وعالراس

كدهو الابداع ..........ولا بلاش

[khedr]

وام البنات جيه تزق وتقول وانا وانا كمان

مهى خلاص بقت سايبه واى حد يقول انا فنان

طبعا فنانه وبنت فنان

كلامك كله يهز الابدان

ويخلي الواحد يقول لك كمان وكمان

يام البنات وكمان ام الشجعان

وعمر الحكايه ما كانت بنات وصبيان

الاصل كله هو .. .... الانسان

[tarek_almeghallawy]

الشعر مش بضاعتي

وانا جاي امشي واخطي

بقول يا ناس خدوني

معاكو لا تفوتوني

ايد في ايد ونثبت

عالحدود ونربط

ممنوع عالأعادي

اللي خان وفرط

والي باع بلادي

ايد في ايد عالكتاب

اللي فيه رب العباد

خط فيه طريق عبيده

[daktara]

أيوه هاقول وهاقول على راحتى

أيدى كمان على كتف اخواتى

مش معقول أضحك كده وحدى

لازم اوزع فى ابتساماتى

كل كلامكم حلو وسكر

مش بتاع التموين واللهِ

خلانى .. من غير ما أفكر

أمسك قلمى وبيكوا أباهى

عيله جميله وصحبه جميله

فى محاورات تفرح ولا أحلى

ساعه بساعه وليله بليله

الأيام وياكوا بتحلى

َِ

[daktara]

عم حرنكش قال لنا مره

تدفعوا كام واديلكوا نصيحه

قلنا ف سرنا إيه راح يجرى

لو قلنا له قزازة ريحه

أصل هدومه ريحتها فظيعه

ورجوله زى المرجيحه

قلنا ادى احنا هنضحك حبه

ونألس على شكله القيحه

ونطمعه بالجايزه ونجرى

وشوارع حتتنا فسيحه

قال لنا إيه تفتكروا حرنكش

على أفكار فى دماغنا قبيحه؟

[شاعرالرومانسية]

شكرا لكل من جه واتكلم

وخلا قلمة فى القلب يعلم

عاوزين بقى نفتح مواضيع..

نتكلم فيها بالشعر .. ونتعلم

[khedr]

كل يومع الصبح اقوم هفتان

ابص علي اخواتي في كل مكان

مين فيهم صحي وفتح من قبلي الدكان

اخويا الشاعر جاي وفي ايده كما ن طفشان

دكتره..طارق...وهشام معاهم....... كمان

بنت مصريه ماسكه ايد ام البنات ومحدش منهم زعلان

ربنا يخليكوا علي طول فاتحين لنا الدكان

ويبعد عننا وعنكم موضوع الاعتذار للاخوان

موضوع الاخوان = موضوع الاعتذار للاخوه السودانيين

[Tafshan]

للرفع

[محمود الشاعر]

يعني الشلة هناك اتلمت وانا اعد وحدي وما جيت

طب كيف يبقى اسمي الشاعر وانا متغطي بظل الحيط

هبقى جبان واخش واعدي والبس بلطو واقول عفريت

ولا أقول واقول وما اخبي على انا شفته هناك فى الغيط

شفت فراشة جميلة حنونة

شفت الوردة فاتحة الايد

شفت الواد المجدع واقف شفت العسكر مادد موت

شفت البت الضحكة بتوسع شفت الشهقة من الجبروت

انت يا شاعر يا رومنطيقي

شكرا ليك خلتني انفس ضيقي

عمنا خضر كمان اتكلم

قول سمعنا كلام متعلم

طفشان ماله هب يا ساتر

قولوا لى أمشي كفايا مشاكل

[Tafshan]

صباح الفل ع القاعدين

م الحوارات لعماد الدين

تعالو نفضف و نقول حبه

مش تأليس .. دردشه و محبه

والصحبه.. اخوات و احبه

حصوه ف عين كل الحاسدين

صباح الفل ع القاعدين

[واحد تاني]

صباحك ورد... وياسمين نادي

شايفك هنا... عمال بتنادي

قلت اخلص شغله قصادي

واجي اصبح ع السامعين

قبل ما حود ع الناحيادي

مريت على موضوع مش عادي

كليو بتلف شوارع زحمة

وتقول اتفسحوا ف بلادي

قمنا معاها هناك رايحين

س س بقى دا حكايته حكايه

عنده الاختراعات دي هوايه

بعد مقص و موس ومرايه

ابتكر ال"حلقولو" ماشين

ولعبة كمان شكلها بوليسية

من سنتين وزيادة منسيه

شانا هتحلها ف الحلقة الجايه :rolleyes:

هرجع اشوف وصلت على فين <_<

[سيزيف]

عم يا شاعر يا رومانسى

بقى كده برضه ؟

تعمل قعده و لمه و ليله

و اخوك شاينر منسى

ع كلن انا كنت معدى

قلت افوت

يمكن طفشان يعزمنى

على واحد شاى مظبوط

و اسحب كرسى و يقعد جنبى

خضر حبيب قلبى

و نشاكس انا و هوه البنوته المصريه

بنت الخير و الحريه

و اذا حصلت كبسه

و ظيطه و لبسه

هاطلع اجرى و اقول اه يانى

وان مسكونى هانكر نفسى

و اعمل ان انا " واحد تانى "