Tafshan بتاريخ: 26 مارس 2006 تقديم بلاغ مشاركة بتاريخ: 26 مارس 2006 (معدل) طفشان خيبان عامل فنان حيران ولهان محتاج لحنان شايل قصيص مليان قصاقيص مدهون بالزيت او بالمصيص ... لكن مكسور ... من غير ولا شرخ قصيص معجون بهموم الكون ساعات بيكون جامد موزون و ساعات بيدوب و كأنه صابون بيشيل الفرح ... و كمان الجرح .. من غير ما يغير حتى اللون .. اما صحيح قصيص مجنون ! فاكر قال ... قصاقيصه ح تعيش بيلملم فيها و كأن ما فيش .. فى الكون غير حبة القصاقيص ... و ماله القصيص ؟؟ مش احسن من قصيص بيخون ؟ او احسن من قصيص مركون ؟ قصيص بيشيل .. و طريقه طويل .. من غير ما يغير حتى اللون .. اما صحيح قصيص مجنون ! _____________________________________________________________ كل سنه زي ما انا كل سنه زى ما انا و هى هي كله واحد سنه رايحة و سنه جاية بكرة تكبر ... بكرة تعقل بكرة تفرج .. بكرة تقفل ! بكرة بكرة .. و كل بكرة بتختفى الاحلام شوية كل سنه زي ما انا و هى هى *** كل سنه تغيب وشوش و تجيب وشوش كل مالقى بجد مجدع الاقية فشوش يوم بنسهر ويا ضحكة و يوم نجيب الناس تحوش ناس يموتو في الخناقة و ناس يخافوا ما يختشوش كله راح لحال سبيلة و دنيا فانيه كل سنه زى ما انا و هى هى *** كنت بأفرح ... كنت بأستنى الميعاد شموع و زينه و تورته و يتلموا الولاد و وشوش بأشوفها بس كل عيد ميلاد ده الوقت بأفرح لما حد يفتكر الميعاد ساعات ارد و انت طيب و سعات ارد و اقول له طيب ! ساعات بفكر ... مين ح يفضل يفتكرنى مره تانية كل سنه زي ما انا و هى هى ________________________________________ دكهمه دخلوا الانتخابات .. دكهمه دخلوا الانتخابات .. دكهو و عائلته من البهوات و ان جيتوا للحق دكهو احق يحكمنا بحق و يجيب الحق و ان كان بالحق في بينا احق ما كانش اتحكم و لا كان فات دكهمه دخلوا الانتخابات دكهو حنين قوى و لطيف بياعنى عيالى و ادانى رغيف مشانى حافى من غير تكاليف وسيايته لهف و لطش و هات دكهمه دخلوا الانتخابات دكهمه جابوا كمان طراطير زمامير زغاريط و حاجات بتطير طرطور منفوش و كلامه فشوش و تشوفوا تقول حيهد جيوش و النكته التانى لابس طربوش بيقولوا كلام و لا في الحكايات و عيزينى احضر الانتخابات من بكرة ح ارشح نفسي رئيس و اخذ قرشين من نفسي و اهيص او يمكن تضرب و ابقى رئيس على شعب بيعبد اي ملوك حتى لو كان مملوك صعلوك تصبح افعاله كلها كرامات من يوم ما بيكسب الأنتخابات لكن بالحق دكهو احق يحكمنا بحق و يجيب الحق و ان كان بالحق في بينا احق ما كانش اتحكم و لا كان فات دكهمه دخلوا الانتخابات ______________________________________ عروسه حلاوه في السوق حكاية مالهاش نهاية و لا بداية مدهونه بوية و منديل بأوية زينت العرايس القلب سكر .. ملفوف كوريشة احمر و اخضر نادت عليا و ناديت عليها .. قلت يا بويا عايز عروسه ابويا قال لى .. ما تأخذش اللى الدبان عليها عمال يعف الفرح ساعة لما تأكلها و ابقى قابلنى لما تخف زقيت ابويا و مديت ايدية و قعدت اكل في العروسه وجعتلى بطنى .. صدقت ابويا و على الدكاترة عمال الف و عرفت ان القلب حنضل مدهون ببوية عشان تبيع حتى الكوريشة كانت رخيصة و الماركه سكه و اللون فظيع ندمت ايوه .. على الاكل لأ ندمت بس عشان حلمت و كنت فاكر لما ح اخذها القلب ينظف و يبقى سكر ما كنتش اعرف ان اللى قبلى في الاصل وسخ و القلب عكر بكيت كثير من غير دموع و رسمت ضحكه منورة ما عدش ينفع الرجوع او لحظه ابص فيها وراء ____________________________________________ اعجب حكاية .. انك تدى من غير لازمه للى بيأخذ و ما بيديش لأن صاحبنا في الوقت الازمه يقولك اسف .. ممعيش ! لما بتدى و هو بيأخذ انت بتدى اللى اديته له و تفضل تدى و هو بيأخذ تفضل تنقص و هو يذيد لحد ما يجي اليوم و تفارق انت تصالح ... هو يكيد و لما بتزهق و تقول ماشى هو بيندم بالتأكيد يرجع يبكى عليك و يعيط تاخذه في حضنك .. يقرص فيك و لما القرصه بتوجع قلبك انت تسامح .. هو يذيد و ترجع تدى من غير لازمة للى بيأخذ و مابيديش اطلب منه .. يمكن تأخذ يمكن تعبه يعز عليه يمكن لما ح تأخذ منه يبقى يحطك جوه عينيه اوعى تفرط مره في حقك لو ضاع حقك ح يفضل ايه اكتم حبك جوه في قلبك لما حبيبك يقسى عليك و لما حبيبك يضعف اضعف و افرش حبك من حوليك ساعتها ح يوصل حبك قلبه و يبطل يأخذ و ما يديش بس يا خوفى ساعتها لقلبك يبدأ ياخذ و ما يديش ____________________________________________________________ مغرور انا ... زي البشر انسان انا زي البشر ح احكى حكايتى و قصتى مغرور انا .. زي البشر فرحان بجاهى و قوتى لما يجينى الخير .. بتعايق و اشرك الناس فى فرحتى ولما تجينى مصيبة .. اضايق ابكى و اشكى بلوتى اسأل معونه ده وده اندب في حظى و قسمتى ليه بس حظي يكون كده مين اللى بوظ فرحتى و لما بتقفل بأفتكر ساعتها بس ربنا .. انكر و ابعد حبتين و اذيد في ظلمى شويتين اجري بسرعة على صديق يأحذنى سكه مضلمه انسى شوية بلوتى و السكة تبقى متعتى لحد ما انسى روحت فين و البلوى تبقى ...بلوتين و الحل يبقى .. مستحيل ساعتها اصرخ و اقول يا رب الحقنى منها يا معين البلوى منى ... مش حد تانى .. و انت ارحم الراحمين و في لحظه .. عفوه ... ميت ذراع تحضن في خوفي و شدتى تشد قلبى من الضياع تمسح دموعى و ازمتى و البلوى تبقى من عدم و تختفي من سكتى و ابكى انا من الندم على ان قلبي كان حجر فرحان بجاهى و قوتى مغرور انا ... زي البشر _______________________________________________________________ ارض الغريب يا ارض الديابه و الغلابه و اللى مسنـود و اللـى مـا لهـش ظهـر... يا ارض العزب و السريات و اللى واكلها بدقه و اللى بيموت من الفقر ... يا شمس المغارب و نسمة عصارى و دوشه و تراب و سكر و صبر .. بـحــبــك بـعـبـلــك بـخــيــرك و شـــــرك ... و مـهــمــا بـنـبـعــد بـيـوحـشـنـا حـضــنــك .. و لــمـــا نــقـــرب بـيـوحـشـنـا شــوقــنــا .. نــهــرب و نــرجـــع لـحــضــن الـغــريــب ... فـــــــــــــي ارض الــــغــــريـــــب .. فلـوس بالزكايـب و بدلـه ايطالـى و لقمـة هانيـة تأكلهـا لوحـدك تعد الليالى في زنزانـه وردى و تضحـك و تبكـى و لا حـد سمعـك و الفقرى كرشى يسيب الولايـم و يحلـم ببصلـة مـع صحـن فـول تــمــري يــــا غــربــة و عــمـــري يــمـــر و عـسـلــك بـيـلـسـع و كــمــان طـعـمــه مــــر و لـــمـــا بــنــرجــع يـكـرشــنــا بـيـتــنــا نــهــرب و نــرجـــع لـحــضــن الـغــريــب ... __________________________________________________ يا فكرة و تايهة يا فكرة و تايهة ما بين السطور بنادى عليك و ألف و أدور بشبه عليك و ازعق و انادى تلفي لى ظهرك و تقولى لى غور! يا فكرة و تايهة ما بين السطور *** حلفتك بقلمى و ورقى و حبرى حلفتك تغنى و تحي لي املى حلفتك تردى او حتى تصدى و تشفى المواجع اللى جوه الصدور يا فكرة و تايهة ما بين السطور *** ما عنك ما جيتِ يا فكرة تغم و حتى ان نديتِ ح اطنش و الِم عزالى و ح امشى و قبل ما امشى ح تيجي لي فكرة تشق الصخور و ارجع انادى ... و ارجع اهاتى .. و تفضل حياتى .... تلف و تدور و ادور وراها ... و العن خطاها .. و افضل معاها .. ما بين السطور __________________________________________________ غاوية تلخبطينا يا دنيا غاوية تلخبطينا ترفعينا ... و تهبدينا لما نحلم بتلومينا تعسفينا و تقرفينا و لما نزهق تغري فينا تعشمينا و تحرمينا .. و لما نبعد تفرحينا نيجي تانى .. تكبسينا تانى نرجع للهلاوس و الوساوس تهري فينا تانى نحلم باللى رايح و اللى راحو من عينينا تانى راجعه تلخبطينا ترفعينا ... و تهبدينا تانى راجع للمواجع تشفى فينا و تفشفشينا لأ يا دنيا مش ح اطاوع مش ح اسيبك تشترينا اللى باقى من سرابك خرقة بيضاء تلفلفينا خرقة فاضية من الجيوب مش ح نأخذ حاجه لينا و اللى فاضل منا عنده يا يواسينا ... يا يجازينا ..... _________________________________________ بيبكى بيبكى في القلوب الحلم بيحكى عن دروب بتلم خطاوى م الحنين دايبين غناوى بس من غير اسم تنادى ع اللى فات و تجيب ليالى من لقاء و لهيب تولع في القلوب الشوق و تطفي في العقول الفهم يا غنوة قالها قلبى زمان يا حلوة جوه قلبى مكان يشيلك مهما غبت سنين معايا بس من غير جسم ___________________________________________ واحدة في الغربة .. كل الوشوش .. واحدة بس القلوب مش واحدة .. فيها اللى بيحسب بالواحدة و فيها اللى بيرسم على واحدة و فيها اللى بيرقص ع الواحدة و فيها اللى يغشك واحدة واحدة و الغريبة .. رغم اننا بنقسم لقمة واحدة و هدمة واحدة و نعمة واحدة ما بتجمعناش كلمة واحدة توقفنا وقفة واحدة علي شان حقيقة واحدة : كلنا سكتنا واحدة قال ... اي حبيبتى .. هلا تسامحين قلباً قد وشى بجنوح عشقاً على عينى قد غشى فما رأيت خفقان قلبك مرحباً و ما رأيت بأن وهمى قد مشى اي حبيبتى ..بل اعتذر .. من حقى ان ابقى حذر .. فالقدر رهين خالقه و العشق محرقة البشر و ان كان آلمك اعتذارى فقلبى عن عذري يعتذر اي حبيبتى ... ان هواكِ لهيب ينتشر ملء ثنايا القلب و للعمر يحتكر يهدر بحمم الحب وبالشوق ينفجر ان شئتِ تثيرين نبضاً فنبضك سيستعر .. ولو شئتِ تملئين قلباً فقلبك ينتحر .. اي حبيبتى ... بل اعتذر ! ________________________________________________________ فيديو كليب افتكست قصيدة ولعة تسلى اكثر من كيلو لب يومين كده و اعملها غنوة و كمان ح اصور فيديو كليب و الم جنبى كام بنت خايبه و افضل كده ارقص و اشب الغنوة ترقع في السوق تطرقع تأخذنى و اطلع لفوق و اقب من يوم ما اخذت الشهادة قاعد ع القهوة انفخ و العن و اسب اصل الشهادة م عادتش نافعة تجيب لي شغله و لا حتى احب و من ساعتها .. و بقالى فترة مستنى هجره او حد يدرى سيبينى قاعد كأنى حشرة لا ليها لازمه و لا ليها قلب و عشان كده بطلت ادور و حلمى اصور فيديو كليب ___________________________________________________ الكون ضيق اوقات بحس الكون ضيق لافف حولين قلبى بيعصر .. حابس في العين دمعه و اثنين و الاهه في صدري بتزيق ساعتها بحس الكون ضيق ! زامت و مقرّط .. و سنين العمر بتتفرط الفرح غريب .. و الجرح قريب ... و احباب على حبي بتتريق ساعتها بحس الكون ضيق ! الحب .. تراب و الخِل سراب .. و بخيبتى بدور ع الاحباب بقى ده معقول ؟ يشد جبال حبل رُقَيّق و ساعتها نقول الكون ضيق ! لازم ح يضيق .. ما دام بتطيق .. و بتغفر جرح اي صديق احكم بالعدل .. سيبك م الندل .. و كل وهم بيتهيأ .. و عمر الكون ما يكون ضيق ! _________________________________________________________ بنتفرق و نتهرب ... بنتفرق كثير .. و نتغرب اكثر .. و عمر الحلم في قلوبنا ..ما يتكسر! الومك و لا الوم مصير مكتوب و متقدر احاسبك و لا احاسب طريق مرسوم و اتحسر بنتفرق .. و نتغرب عارفه ليه يا عمرى .. انت ليه سافرتى ؟ عشان تذيدى حبي بشوقى لو بعدتى بقلبى ح اكون معاكِ و جنبك مهما غبتى لو غربنى زمانى ح احبك فين ما كنتِ و لو ضيعتى شراعى قلبك ح يكون سفينتى الومك و لا الوم مصير مكتوب و متقدر احاسبك و لا احاسب طريق مرسوم و اتحسر بنتفرق .. و نتغرب غريبة يا حبيبة . . . قلبى ملين دموع مشتاق لك يا حبيبة و انت وسط الضلوع يحلم بيوم لقاكَِ و لقاكِ يذيدنى جوع و النار زي ما تحرق برضو بتقيد شموع الومك و لا الوم مصير مكتوب و متقدر احاسبك و لا احاسب طريق مرسوم و اتحسر بنتفرق .. و نتغرب <<صيف 1994>> ________________________________________________ مات الولد ! مات الولد مات اللى كان ظهر و سند مات اللى كان حامى الحمى من غير ما يقبل اوسمه .. او حتى سمعه في البلد .. مات الولد ! مات اللى كان زنده الامان صدره الحنان .. قلبه يساع لما يضيق الزمان .. و ساعة المصيبة : ثابت وتد ... مات الولد ! مات لما ساب للكلاب الباب سابها بتنهش في حشايا و غاب راح للغريب و سابنا هنا اغراب رايح بيبنى .. و سايبنا هنا بنتهدد مات الولد ! __________________________________________________________________ افضل موتاتى تحمل عليــــــــا بأنـــاتــــك تحملنــى اليك ابتسامــاتى تحمل عليا بحكـــــايـــاتـــك تكسرنـى اذوب في آهاتـى و ما كنت بجـــاهلٍ ما تنكــر و كنــت تحــب مـــعانـاتـى قد كنت افتـــش عن وهــماً فتـشـت وجـــدت نهايـاتـى يا قلباً كنــــت ليـــــــا قمراً ارجـوه في عتــمة ليـلاتـى لينير العمر و ما يخبـــــــو من قـــهر الدرب و ويلاتى قد كنت هلاكاً في دربــــــي و قتــلت بعبثــِك ضحـكاتى و اليوم تعود بدمعــــــــاتٍ تتوســـــل تطلــب رحماتــى انسيت الامس و ما يحمــل من ظلمٍ يحفــــر قسمـاتــى انسيت الجرح و ما يقــذف من حمــم تدمـــى طرقاتـى انسيت غدّاً قدا كــنــــــــت اعــوّل عليــه برجـــواتـى اليوم تعـــــــــود بدمـعــاتٍ لتدمـــــر اخــر جــولاتــى قد جئت لتعطى اخـتـياراتــاً لتقرر افــضـــــل موتاتــى _______________________________________________ اعشـــــــقٌكِ ... في نومِــــكِ فقط اعشـــــــقٌكِ ... في نومِــــكِ فقط و لا اريد لكِ من نومكِ ان تستفيقٍ فأن فقتِ اخــــاف ان تكونى بشر و ما انا لحب البشــــر بالعشــــيقِ مغدورةً عهودِهم مسجورةً قلوبهِم منزوعةً ضمائرِهم محبوكة التلفيق من اجل هذا انئــــى بجانبــــــي فما اتخذت لدربـــي منـــهم رفيــقِ و من اجل هذا اتخذتك حبيبتــى و رجــــوت الله لــــــكِ الا تفــــيقِ الحــب .. قـــــــرح القلوب يبثه جرحــــاً تقـــــيح بمــرارةَ التمزيقِ و الصدق كلمة الانبياء جميعــهم فلن تــــجدِ من دونـــهم له تحـــقيقِ فلماذا التعــــلق اذاً بمــــــــــوبقٍ او التـــــعلــل بما ليـــس له تطبيقِ عذراً ... افضل وهماً نائمــــــــاً عن واقعــــاً يناقـــض التصـديــــقِ _______________________________________________________ و ماذا يمنعِك .. و ماذا يمنعِك .. احترامك الزائف .. ام ان وقارُك يقمعِك .. اين يسكن فيكِ الغضب ؟ اين يعمل فيك الضجر ؟ اتلومى على حرصى ام تلومين الغضب ! ان قرْبكِ من ضلوعى .. ليس قضبان السجان .. ليس حرمان الرهبان .. لستِ بأمه .. بل سيدة ذاك القصر .. ان تغضبين .. لن امنعك و ان ترغبين .. فلن ادفعك! حدثُك كغيرك من بنات حواء نبذل .. تتهمينا بالرياء نحنوا .. تشتكين من العناء ! نعشق .. توصيمينا بالغباء ! بل اغضبِ حتى يتفتت فيكِ الكِبرْ و تنفجر دموعكِ .. انهاراً من حِبرْ ... لن اكون هناك .. اسمع لعناتكِ مسبقاً اشتم شياط معاناتك .. حريقاً مُطبقاً .. و تعودى .. لتبكى اهتماماتى تتمنى الموت على صدرى ترتدين طوعاً اصفادى و لكن الوقت قد فات فما عاد القلب يحتمل .. فلتغضبين كما شئتِ .. ان كنت تستطيعين الغضب ِ ___________________________________________________ مصري و متغرب انا مصري و متغرب شايلها حمل فوق كتفى و بأستغرب .. بكسر صخر بسنانى و بأتقرب .. لحضن ترابها من تانى و تتهرب .. يأخذنى غريب في احضانه ابنى و اعلى اوطانه ابيع له العمر يدينى رغيف بالشهد متشرب ... تمر ايامى و سنيني تذيد من حيرتى و حنيني يفر الدمع من عينى و ان جابوا سيرتها باتكهرب .. اقول ملعون ابو الغربه و الجاه و فلوسهم ع الصرمه انا راجع بكره للغالية ان جعت اعض في ترابها .. اتاريها قافلة ابوابها .. و ارجع تانى للغربه و سنين العمر تتسرب .. و الف و ادور في موالى .. مانا اصلى مصري ... و متغرب ! ******** مصري انا و متغرب بأعيد و ازيد موال سنين تفوت و تعدى و اهو حالنا هو الحال نقول سنين و بتقضى .. بتضرب .. و تقلب .. نرضى .. نستنى طينك ينطق .. وما فيش كلام ينقال... اسكت و اروح للصبر ابنى لي هناك فيه بيت ضيق و زى القبر حيطانه ميه و زيت ادفن هناك العمر و احلف بعمرى ما جيت قلبى هناك جنبها رغم الهموم حمال عاشق تراب ارضها مش فارقة عنده المال ميت هنا .. و عندها .. بيحلا له راحت البال لكن قراض ارضها خلى قعادى محال جينا بلاد الصبر نأكل في لقمه حلال و لما يأخذنا الشوق نبكى نقول موال نحلم نعيش لو يوم معاه السكه بتقرب بس الفراق محتوم ... و ح افضل مصري ... و متغرب ! ______________________________________________________________ عم الخواجه عم الخواجه بقشش و حل الكيس جاب شيكولاته لجل العيال ما تهيص نهاره لبن و السمنه بالفناطيس فرحوا العيال .. و لبسنا كلنا قراطيس ! عم الخواجه بقشش و حل الكيس عم الخواجه قال انا حر و براحتى اشتم و العن سلاحى ذراعى و صراحتى و مهما تعمل عمرك ما ح تهز مصلحتى بأشارة اهدك .. و تبقى روحت فطيس عم الخواجه بقشش و حل الكيس عم الخواجه عارف حياتى ضنك وكِّل عيالى بدل القريش فلمنك و هو يأخذ و يروح يعبي التنك و اهى ماشيا معدن .. ملعون ابو التفليس عم الخواجه بقشش و حل الكيس عم الخواجه لحم اكتافى من خيره لبسنى هدمه و وكلنى وسط خنازيره و علمنى ارطن لغوة بلاده و احكى له خذ منى شرفى ... و صدر لنا التهليس عم الخواجه بقشش و حل الكيس عم الخواجه ما عادتش فارقة معاه بعد اما مرغ روس العباد في بلاه زود بجاحته و بيشتم رسول الله و بقينا خيخة ... لكل نجس و خسيس طول ما احنا لسه بنستنى يحل الكيس . __________________________________________________________ سيدنا الأفندى سيدنا الافندي مثقف جداً بيكلمنا بالجرانين و انا فقير اباً عن جداً حالتى تصعب ع الكافرين طول اليوم عمال بيهاتى اشى مقالات .. و اشى حادى بادى .. و انا بتابع شغله يوماتى رغى فى رغى سياسه و دين سيدنا الافندي مثقف جداً بيكلمنا بالجرانين .. سيدنا الافندي ابن ذوات عمره ما داق العيش الحاف كل حبايبه من البهوات ساندين ظهره في يوم ما يخاف و انا مضروب دائماً على بطنى لو وارب بابه .. بيخبطنى و كام لحلوح ...بطلوع الروح يدوب بيكفوا نجيب الستر اما اللقمة .. سطر و سطر بنفتها في الشاى .. راضيين سيدنا الافندي مثقف جداً بيكلمنا بالجرانين .. سيدنا الأفندى نافش ريشه عامل اسطى ع الغلبان بيقول انى مسبب فقره و مقضيها شاى و دخان تبقى العيشة قحط في قحط و يبصلي في سجايري الفرط و كمان شايي يصبح علقم من غير اي كلام او شرط في زمن الخيبة بالمجان نصرف طوبه لكل جعان الله يرحم ... الله يعين في زمن اللحمه في الفتارين سيدنا الافندي مثقف جداً بيكلمنا بالجرانين .. تم تعديل 26 مارس 2006 بواسطة Tafshan الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
tarek_almeghallawy بتاريخ: 26 مارس 2006 تقديم بلاغ مشاركة بتاريخ: 26 مارس 2006 طفشان فنان راسي ونبهان بيجيب أجوان بكلام ألوان فلسفة وسياسة رومانسي كمان مرات زعلان مرات فرحان شايل في الغربة لوطنه حنان طفشان لكن إنسان رابط هذا التعليق شارك المزيد من خيارات المشاركة
Tafshan بتاريخ: 27 مارس 2006 كاتب الموضوع تقديم بلاغ مشاركة بتاريخ: 27 مارس 2006 طفشان فنان راسي ونبهانبيجيب أجوان بكلام ألوان فلسفة وسياسة رومانسي كمان مرات زعلان مرات فرحان شايل في الغربة لوطنه حنان طفشان لكن إنسان متشكر على تشجيعك يا فندم :wub: الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
shahd بتاريخ: 27 مارس 2006 تقديم بلاغ مشاركة بتاريخ: 27 مارس 2006 طفشان لست ادري ما اقول حقا رائع ما تكتبه سلمت اناملك ودام ابداعك اخي الفاضل طـــــــفولــــة شــــــهـــد رابط هذا التعليق شارك المزيد من خيارات المشاركة
الرافعي بتاريخ: 27 مارس 2006 تقديم بلاغ مشاركة بتاريخ: 27 مارس 2006 طفشان ساب (معلش عفريت كومار حاضر وهو اللي بيكتب مش أنا) طفشان ده مش طفشان .... طفشان هنا من زمان كلامه حلو جنان وأنا من غيره زعلان (مش يامن) وإيييييييييييييييييييييييييييييييييييييه شعبان العنتبلي قال رسول الله صلى الله عليه وسلم : ( ما كان الرفق في شيء إلا زانه ، ولا نزع من شيء إلا شانه) ( صحيح الجامع 5654). رابط هذا التعليق شارك المزيد من خيارات المشاركة
Tafshan بتاريخ: 27 مارس 2006 كاتب الموضوع تقديم بلاغ مشاركة بتاريخ: 27 مارس 2006 متشكر يا شهد على تشجيعك ... في الحقيقة انا قلت الم كل الطفشانيات بتوعى هنا بدل ما يضيعوا :wub: عم حلاوة .. ايه الحلاوة دى :wub: يا عم انا كده ح اخذ مقلب في نفسي و اقول انى بأعرف اكتب بجد :P ربنا يخليكم ليا :P الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
وليد صفوت بتاريخ: 27 مارس 2006 تقديم بلاغ مشاركة بتاريخ: 27 مارس 2006 طفطف رابط هذا التعليق شارك المزيد من خيارات المشاركة
سمـ مصر ــا بتاريخ: 29 مارس 2006 تقديم بلاغ مشاركة بتاريخ: 29 مارس 2006 طفشان كلماتك رائعة وقلمك مبدع وسلسل يدخل بهدوء ليعيش بنا صورة تراها ونعيشها معك كلماتك عن الغربة أعجبتى وليس هى فقط بل كل ما كتبت فى انتظار جديدك ايها المبدع جينا بلاد الصبر نأكل في لقمه حلال و لما يأخذنا الشوق نبكى نقول موال نحلم نعيش لو يوم معاه السكه بتقرب بس الفراق محتوم ... و ح افضل مصري ... و متغرب ! رابط هذا التعليق شارك المزيد من خيارات المشاركة
Tafshan بتاريخ: 1 مايو 2006 كاتب الموضوع تقديم بلاغ مشاركة بتاريخ: 1 مايو 2006 ثورجى ... ثورجى هلفوت في الخيط معقود تسمعوا و تقول : قدها و قدود و تلاقى طريقه دائماً مسدود على شان بيغنى نغمه نشاز عن ناس تستاهل الحرق بجاز ثورجى شبّيح .. و كلامه قبيح بيزعّل اه .. اكمِنه صريح بينط السور من غير تصريح يرجع مخبوط زنبوق مزبوط و يلاقى البيت في تابوت محطوط ثورجى بُرمجى ... لا كان عفيجى و لا كان بلطجى بينقل في كلام زي البسطجى لكن دكهمه عايزينه بصمجى يبصم بالعشره على خير البيه و على حمده و شكره يعمل ابونيه و يبوس في الحال ايديه و رجليه يأمه ينوبه على طول شلوت ثورجى هلفوت في الخيط معقود __________________________________________________________________________ شيخ البلد ... شيخ البلد خلف ولد من فرحته .. علق كهارب ملهاش عدد و بقوته .. امر الذبائح للرُكب في الحال قِبل .. سبعين مليون من الابل واخذه تطاطى و تنضرب نخت لكل من رِكب زمن المشايخ ابتدى و العيشة آخر بغدده و الشيخ بيورث ملك ابوه من غير احم و لا دستور و الشعب يورث الخبور عشان قِبل .. سبعين مليون من الابل واخذه تطاطى و تنضرب نخت لكل من رِكب شيخنا اصله منه فيه و الحكم برضو منه فيه و اللى نسيبه بنصحى فيه عشان بنرضى باللى فيه و الشكوى بس للى خلق و برضو قِبل .. سبعين مليون من الابل واخذه تطاطى و تنضرب نخت لكل من رِكب ______________________________________________________________________ خفت اشوفك ... خفت اشوفك .. تغلبيني تكسري سدي .. تجيبينى تطمعيني .. تعشميني .. و فى النهاية .. تكسريني .. خفت اطاوع جموح فضولى .. خفت اقرب لطيف جنونى خوفي خوِّف نبضى في عروقى و انكتم قلبي و حنيني .. رغم عيني كان مناها تنول رؤاكِ رغم ايدي نفسها تلمس ايديكِ رغم انى حتى ما اعرف لون عينيكِ بس رغم ده كله برضو ... بتوحشينى الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
eastsoul بتاريخ: 1 مايو 2006 تقديم بلاغ مشاركة بتاريخ: 1 مايو 2006 طفشانياتك رائعة *-*-*-*-*-*-*-*-*-*-*-*-*-*-*-*-*-*-*-* الحمد لله الذي تواضع لعظمته كلُّ شيء، الحمد لله الذي استسلم لقدرته كلُّ شيء، الحمد لله الذي ذلَّ لعزَّته كلُّ شيء، الحمد لله الذي خضع لملكه كلُّ شيء *-*-*-*-*-*-*-*-*-*-*-*-*-*-*-*-*-*-*-* رابط هذا التعليق شارك المزيد من خيارات المشاركة
yacho بتاريخ: 1 مايو 2006 تقديم بلاغ مشاركة بتاريخ: 1 مايو 2006 عظمه على عظمه على عظمه يا طفشان :blink: يا ريت ما تبقاش تطفش وتغيب تانى :unsure: رابط هذا التعليق شارك المزيد من خيارات المشاركة
مصرية يعني مصرية بتاريخ: 1 مايو 2006 تقديم بلاغ مشاركة بتاريخ: 1 مايو 2006 رااااااااااااااااااااااااااااااااااااائـــــــــــــــــــــــــــــــــــــــــ ــــــــــــــــــــــــــــــــــــــــــــــــــــع يا أبو الطفشين و إليكم قصة قصة عم ركابي عم ركابي كبير السن شديد التواضع وش بشوش حسن الظن ومن الصبر راضع ديماً في الخير تلقاه يحصد عمران بالحب عمره ما يحسد يصحى قبل الفجر بساعة يقوم يتوضى ... وجلحة أتنين يكون في المسجد عم ركابي بدقنة خفيفه ... بشيبة بتبرق والعمه الملفوفه بحكمة زي الشمس لما بتشرق والسبحة السودة بتفرك في ايديه الناعمه بحكم السن عم ركابي كبير السن معاه بنتين .. واحدة كبيرة فاتها القطر من سنتين والتانية بهيجة أصغر منها بست سنين مرته الحاجة بهانه بنت الشيخ مدبولي المقرئ الله يرحم الاتنين . كانوا السند الواقي الدافي كانوا الونسة لعم ركابي كانوا الضحكة لما يأن عم ركابي كبير السن ****** عم ركابي لما بيحزن يصبح خاسس لكن قلب المؤمن واصل تلقاه حاسس يقوم يترحم على الحاجة بهانه يقرالها فواتح دخلت فجأة البت بهيه وعم ركابي يعزها هي إكمني كبيرة وعاقلة وتخدم دونم عن البت بهيجة اللي تملي تناكف فيا وديما تكسل تقضي الحاجة قالتله ياباي ليه مطلعتش صانط عم ركابي مردش قربت منه شويه عليه لقيت دمعه جوا عنيه دمعه شايلها بقالها سنين نزلت دلوقت .. فهمت بته الدمعه دي ليه قالتله فكرك يعني أتجوز ليه أنت كرهت قعادي معاك قولي ياباي نقصك إيه نزلت دمعة إتنين وتلاته لحد ما شدت إيده ووطت وحضنت فيه وفضلت تبكي عم ركابي عز عليه نفض جسمه من التفكير يمسح دمعه تنزل دمعه ويقول خير ..... خير انشاء الله خير انشاء الله الايام أكيد حتحن عم ركابي كبير السن عارفه يابت الحاجة بهانه جاتني إمبارح راحت أوضتك وشافت وشك قامت ضحكت بصت ليا وقالت بتك كبرت حتبقى عروسة . ردت قالت خير انشاء الله والشيخ مدبولي شفته معاها جدي ياباي ... أيوه يا بت وقرب منك ومسك يدك ومسك يدي .. أيوه يابت وقالي بتك دي الخير والبركة . فرحت قالت خير إنشاء الله ..خير إنشاء الله رحمه ونور على أمي وجدي نقرا الفاتحة و نقوم نتوضا امال فين البت بهيجة تصلي معانا ولادي خفيت . كانت نايمه قبل ما أجيلك يمكن صحيت ... اندهالك ... روحي ناديلها عم ركابي بعد ماطمن بته بهيه ردت روحه في جوفه وصفيت قام منبوط من فرشه الدافي ولما بيصبح رايق صافي يبقى أشد من الشبان واللي يكسر عضم الواحد .. التفكير السو والأحزان عم ركابي يكره موت سيرة الحزن ولما بيحزن يصبح خاسس لكن قلب المؤمن واصل تلقاه حاسس يقوم يترحم على الأموات والوسواس حيروح ويكن عم ركابي كبير السن كانت الحاجة بهانة وشها صابح زي النسمة ... يلقط منها وش البت بهيجة الخالق الناطق نفس السحنه تدويرة الوش ... الطول والعين العسلي أما البت بهيه دي ربعه تشبه جدها الشيخ مدبولي وتاخد مني جانب يمكن من التفكير يعني بتعرف تقرا عيني الدنيا العفشة لما تسيبك وسط طريق وأنت التايه منتاش عارف تمشي لفين احمد ربي إن في عمري لسه بقية واقدر استر البنتين رابط هذا التعليق شارك المزيد من خيارات المشاركة
yasovinas بتاريخ: 1 مايو 2006 تقديم بلاغ مشاركة بتاريخ: 1 مايو 2006 انت تاني طيب يا سيدي قول واوجع في قلوبنا قول وسحب في دموعنا قول وخرط بصل على الجرح وشوية ملح اصل انا عارف وكمان شايف الهم معاك قول تاني يا سي طفشان رابط هذا التعليق شارك المزيد من خيارات المشاركة
ATHENA بتاريخ: 1 مايو 2006 تقديم بلاغ مشاركة بتاريخ: 1 مايو 2006 تمر ايامى و سنيني تذيد من حيرتى و حنيني يفر الدمع من عينى و ان جابوا سيرتها باتكهرب .. اقول ملعون ابو الغربه و الجاه و فلوسهم ع الصرمه انا راجع بكره للغالية ان جعت اعض في ترابها .. اتاريها قافلة ابوابها .. و ارجع تانى للغربه و سنين العمر تتسرب .. و الف و ادور في موالى .. مانا اصلى مصري ... و متغرب ! رابط هذا التعليق شارك المزيد من خيارات المشاركة
nancy بتاريخ: 1 مايو 2006 تقديم بلاغ مشاركة بتاريخ: 1 مايو 2006 كلامك رائع يا طفشان انت المفروض يكون اسمك فنان مش طفشان بعد اذنك انا حفظت كل اشعارك عندى فى ملف لانها اروع من ان تترك بدون ان تقراء اكثر من مرة واحدة وياريت تكتب اكتر لان كتابتك ممتعة جدا رابط هذا التعليق شارك المزيد من خيارات المشاركة
Tafshan بتاريخ: 2 مايو 2006 كاتب الموضوع تقديم بلاغ مشاركة بتاريخ: 2 مايو 2006 طفطف متشكر يا فندم على زوربيحة الورد الجميلة دى :huh: طفشان كلماتك رائعة وقلمك مبدع وسلسل يدخل بهدوء ليعيش بنا صورة تراها ونعيشها معك كلماتك عن الغربة أعجبتى وليس هى فقط بل كل ما كتبت فى انتظار جديدك ايها المبدع ! ده بعض ما عندكم يا فندم طفشانياتك رائعة بوجودك يا فندم (وش واحد بكاش) عظمه على عظمه على عظمه يا طفشان :huh: يا ريت ما تبقاش تطفش وتغيب تانى mfb: علم و ينفذ يا فندم .. مع انى مقدم على طلب اجازة و الله -_- رااااااااااااااااااااااااااااااااااااائـــــــــــــــــــــــــــــــــــــــــــــــــــــــــــــــــــــــــــــــــــــــــــــع يا أبو الطفشين الله يخليكِ يا فندم ... القصة رائعة ... دى بتاعتك ؟؟؟ انت تاني طيب يا سيدي قول واوجع في قلوبنا قول وسحب في دموعنا قول وخرط بصل على الجرح وشوية ملح اصل انا عارف وكمان شايف الهم معاك قول تاني يا سي طفشان ازيك يا عم ياسو .. انت ايه اللى مزعلك ؟؟ ما انا مؤدب اهه :unsure: ! ايه الحوار الصامت ده ;) وحشانا يا ايزو ... ايه يا بنتى فينك و فين برتقانك -_- كلامك رائع يا طفشان انت المفروض يكون اسمك فنان مش طفشان بعد اذنك انا حفظت كل اشعارك عندى فى ملف لانها اروع من ان تترك بدون ان تقراء اكثر من مرة واحدة وياريت تكتب اكتر لان كتابتك ممتعة جدا انا كده ح اطلع فيها قوى :blink: الله يخليكم يا جماعة متشكر قوى لتشجيعكم (وش واحد مستكنيس قوى ) الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
eastsoul بتاريخ: 2 مايو 2006 تقديم بلاغ مشاركة بتاريخ: 2 مايو 2006 طفشانياتك رائعة بوجودك يا فندم (وش واحد بكاش) لا ما تظلمش الوش ... ده وش مكسوف يا استاذ طفطف باشا :unsure: *-*-*-*-*-*-*-*-*-*-*-*-*-*-*-*-*-*-*-* الحمد لله الذي تواضع لعظمته كلُّ شيء، الحمد لله الذي استسلم لقدرته كلُّ شيء، الحمد لله الذي ذلَّ لعزَّته كلُّ شيء، الحمد لله الذي خضع لملكه كلُّ شيء *-*-*-*-*-*-*-*-*-*-*-*-*-*-*-*-*-*-*-* رابط هذا التعليق شارك المزيد من خيارات المشاركة
Tafshan بتاريخ: 2 مايو 2006 كاتب الموضوع تقديم بلاغ مشاركة بتاريخ: 2 مايو 2006 طفشانياتك رائعة بوجودك يا فندم (وش واحد بكاش) لا ما تظلمش الوش ... ده وش مكسوف يا استاذ طفطف باشا :angry: :wub: مش فاهم B) انا اقصد انى احط ايموشن واحد بكاش و بقصد بيه نفسي ... الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
eastsoul بتاريخ: 2 مايو 2006 تقديم بلاغ مشاركة بتاريخ: 2 مايو 2006 طفشانياتك رائعة بوجودك يا فندم (وش واحد بكاش) لا ما تظلمش الوش ... ده وش مكسوف يا استاذ طفطف باشا :angry: :wub: مش فاهم B) انا اقصد انى احط ايموشن واحد بكاش و بقصد بيه نفسي ... :P معلش بيقى انا اللي فهمت غلط ...اصل فهمي على ادي ... افتكرت مش عجبك الوش ابو وردة اللي حطيطه :P ايه رأيك في الوش ده (كبكاش يعني ؟!!!) *-*-*-*-*-*-*-*-*-*-*-*-*-*-*-*-*-*-*-* الحمد لله الذي تواضع لعظمته كلُّ شيء، الحمد لله الذي استسلم لقدرته كلُّ شيء، الحمد لله الذي ذلَّ لعزَّته كلُّ شيء، الحمد لله الذي خضع لملكه كلُّ شيء *-*-*-*-*-*-*-*-*-*-*-*-*-*-*-*-*-*-*-* رابط هذا التعليق شارك المزيد من خيارات المشاركة
Tafshan بتاريخ: 20 يونيو 2006 كاتب الموضوع تقديم بلاغ مشاركة بتاريخ: 20 يونيو 2006 كتكوت فتفوت حياته بيضه بقشرها حلمه انه يخرج منها مع انها .. بيته و قوته و دنيته .. و الكتاكيت انواع ... منها يكبر و يبقى فوق الجبال بيدور و منها يستنى يتذبح لما يجي له الدور و منها يعيش .. حتى بجناح مكسور و الكل داير بيلف في سكته و سكته ... بيته و قوته و دنيته ... كتكوت عكروت ... ينبش في القش يأخذ شلوت ! و غراب البين على باب البيت ناهب القوت .. عايش مبسوط مستنى وقفة كتكوت مزبوط مش فارقة معاه .. و اهى علقة تفوت.. لكن مضغوط ... قضاها سكوت راضى بالقش ليوم ما يموت و عشته ... بيته و قوته و دنيته ... _____________________________________________________________________________________ ما بين صمتك وبين خوفى .. ظلمنا الحب رويت في ارضك العليق .. و سِبت الورد و قسِمنا مدن و حدود ... تفوق الحد و صار بيننا طريق مسدود .. و بيت اتهد ما بين صمتك وبين خوفى .. قوالب ثلج بنرسم ضحكه كذابة .. تدارى البرد و نحكى في الهوى اساطير حنين اشتد و ندفن في الليلى انين و ايد ع الخد ما بين صمتك وبين خوفى .. سؤال مجاش عليه الرد .. اسيبك و امشى في طريقي يأخذنى المد ... و لا اجيلك تحاوطينى نهد السد .. تردى بصمتك المعهود تعلى سدود ما بين صمتك ... وبين خوفى ! و يحجز بابك المردود امال و وعود .. تكسر حلمنا منشود ما بين صمتك ... وبين خوفى ! و نتعود على غربه و نستحمل عشان اطفال و نتحامل على قلوبنا الام ... اهوال و ندفن زهرة الايام .. ما بين صمتك ... وبين خوفى ! الماتش متباع http://tafshan-gedan.blogspot.com رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان