على القهوه

[الاسكندرنى]

السلام عليكم

الفكرة ديه يا جماعه مشتركه بينى و بين حلاوة العنتبلى

الفكره عباره عن عمل الموضوع ده (على القهوة) و نتكلم فيه برحتنا نستفيد من خبرات بعض

كلنا طبعا رحنا قعدنا على قهوى و قعدنا مع اصحاب اشكال و الوان ( بما فينا بنات يعنى كان فى نادى او سهرة مع العيله :sad: ) و على القهوة يارداله كان فى كلام و فى حوارات بتحصل و فى مننا ناس ماكنتش بتروح بتها قبل الفجر بسبب قاعدين مع صحابهم على القهوة

الكلام كان عباره عن نصائح اراء خدمات معرفه كلام كان باللغه العاميه و اللغه الجديده بحكم وجودنا هناك على القهوه

انا من ناحيتى القهوة كان مكان جميل ليه ذكرايتى فيه كنت بتكلم مع مثقف و مع الجاهل مع الباشا و مع الزبال اضحك و اهزر مع صحابى من قلبى

على القهوة عرفت ناس و عرفت بتفكر ازى و عرفت طريقتهم فى الحياة عرفت خصوصيات ناس عرفت مشاكل ناس اكتسبت خبرة الشارع من على القهوة صح ولا كلامى غلط

بمعنى كلام اخى حلاوة العنتبلى

نعمل دردشة في موضوع قبول الآخر من خلال شوية حكاوي (قهاوي) على علاقات مع ذلك الآخر سواءً زوجة أو زملاء عمل ... أو جيران ... نسايب ... حماك

وغيره ..

أكيد المادة هاتكون ثرية .. صح

عموما انا قرارت انا و العنتبلى نبداء على القهوة و يارب نوقع فى قهوة متسيطه كده زى فهوة الفشاوى و نلاقى ناس و زحمه و الطلبات تكتر و نشغل اغنية زحمه يا دنيا زحمه زحمه ولا عد شى رحمه :lol: و شريط انا بكرة اسرائيل :P

من الاخر كده انا و العنتبلى متغربين (وكذلك كل المغتربين ) و وحشتنا مصر اوى و عاوزين نشعر ان احنا رجعنا مصر يعنى الاقى ناس بتاخف علينا

ناس تعرف تخلينا نشعر با اهل مصر الجدعان

و بسم الله الرحمن الرحيم

قررت ابداء

تم تعديل 29 مارس 2006 بواسطة الاسكندرنى

[dr khaled]

عزيزي الاسكندراني

اعزرني انا بفهم بشويش و ببطء

قصدك نعمل باب في المنتدي تحت اسم علي القهوه بحيث يكون المواضيع عامه (سياسه علي دين علي تهريج )

ولا نتفق كلنا علي قهوه معينه في القاهره نبقي نتقابل فيها و نحكي براحتنا

مع الشكر

[الاسكندرنى]

بمعنى كلام اخى حلاوة العنتبلى

نعمل دردشة في موضوع من خلال شوية حكاوي (قهاوي) على علاقات مع الآخر سواءً زوجة أو زملاء عمل ... أو جيران ... نسايب ... حماك

وغيره ..

أكيد المادة هاتكون ثرية .. صح

مش باب يا دكتور ولا حاجه ده موضوع بسيط نتكلم فيه برحتنا و الموضوع عاوزينه يشبه قاعدتنا على القهوة او قهوة المحاورات التى كانت موجوده بالفعل يعنى ممكن تقول اعادة احياء بس بمنظور تانى و اسف لعدم و وضوح الفكرة فى اول المدخله

و سوف اعدلها

تم تعديل 28 مارس 2006 بواسطة الاسكندرنى

[الاسكندرنى]

يوم مارجعت مصر رحت على القهوة بتاعتى علشان اشوف حد من اللى كنت اعرفه زمان و بالفعل شفت واحد قاعد عليها شكله اعرفه فدخلت عليه يطلع مين

والله انا مش مصدق حلاوه العنتبلى اللى كان فى الامارات اللى سافر قبل ما اسافر شفته قدامى على القهوه قاعد فى نفس الركن بتاع الشله بتاعتنا

سلامت عليه احضان و بوس و قعدنا فى مكانا و قاعدت اقوله فاكر و فاكر وفاكر لما و لما ولما وهو يقولى اه ايوه صح كانت ايام

و قعدنا نتكلم على غربتنا و البلاد اللى احنا فيها شكلها ايه وعن حياتنا الشخصيه هناك ( عادى احنا اصحاب قدام و محترمين ) والاقى

العنتبلى يقولى اسكت يا اسكندرنى مش كنت حتجوز اجنبيه بس فى ناس خوفونى من الحوار ده

الاسكندرنى لا ياراجل ده انا متجوز اجنبيه و عايش مية فل وعشر مين اللى خوفوك دول

العنتبلى . ياراجل يعنى انت عايش حياتك كويس على اختلاف الطباع و التربيه بينك و بين مراتك اصل ده اللى مخوفنى الفرق فى الطباع و التربيه

الاسكندرنى , بوص يا عنتبلى اجانب مصرين سعودين اى جنسيه اى كانت الزوجه عباره عن ست

العنتبلى . لا ياراجل ما عارف انهم ستات انا بقولك التربيه و الطباع و العادات و الديانه كل ده بيتغير ياراجل من ست ل ست تانيه

الاسكندرنى طيب ياعمى انا معاك بس القاعدة واحده هى ست صح ولا مش صح

العنتبلى صح بس برده انا مش فاهم انت تقصد ايه

الاسكندرنى بص يا صحابى الست ست فى اى مكان بس الاجنبيه ياسيدى عاوزك تفهما كل حاجه انت عاوزها تعملها ليه و علشان ايه ويااخى سبحان الله ما الستات العربيه دلوقتى بيطالبوك بكده يا عنتبلى انسى حوار سى السيد و احمد عبد الجواد خلاص

العنتبلى يا اخى هو حد قالك ان انا راجعى لا طبعا انا فاهم بس قولى انت عملت ايها علشان تخليها تطوعك كده و تعيش معك حياة هادئه من غير ماتقولك انا فرنسويه و عيشتى كده و الحريه و الحركات ديه

الاسكندرنى اقولك ياسيدى انا عملت ايه او بمعنى اصح انا ماشي باى سياسه مع مراتى الاجنبيه وازى وصلت معها لحياتنا بالشكل ده

العنتبلى ابداء يا سيدى كلى اذان صاغيه ولا اقولك قول يا عم الفلسوف ما انت سوسه من يومك يا اسكندر

الاسكندرنى انا سوسه ماشى ياعم بس بجد يلزم الحوار ده تكون على خبره جيده بالستات

بوص يا سيدى فى يوم بعد ما اشتريت هديه يوم صفاء كده والشمس كانت طالعه :lol: قولت لمراتى

حبيبتى فيه مثلث سحري عجيب يضمن لكى حياة وهميه ورديه معيه

بس فى شرط علشان تعرفى المثلث الشرط أن تكوني عاوزه الرومانسية الزوجية الحقيقية مش الطفولية الخيالية

ايه موافقنى وعاوزه الرومانسية الحقيقية اللى هى المودة والرحمةوالحياة الطيبة التي تدوم على مر السنين ومش الكلام الفارغ اللى بنشوفه في الأفلام وروايات المراهقين

ايه رائيك عاوز تعرفى المثلث ده

ردت عليه و قالت انت فى ايه عاوز تقول ايه بتلف و تدور على ايه

قولتلها ردى بس عليه عاوزه ايه رومانسيه حقيقيه ولا كلام افلام

قالت رومانسيه حقيقه طبعا

قولتلها تعالي بقه اشرحلك أجمل مثلث

الضلع الأول: العطاء

بوصى ياحبيبتى العطاء قاعدة مثلث السعادة الزوجية.. إذا رسمتيه بإتقان وقوة فالى بعده اسهل بكتيرلازم تفهمى ان العطاء باختصار = زوجة فزوجة بدون عطاء لا تعني شيئا

سألتي نفسك يوم .. ليه الرجاله بتجوز

بعض الرجال في أنحاء الأرض كان مش بيهمهم اوى الطريق الشرعي لإشباع الغريزة.. ولكنهم بحثوا عن الزوجة لمعنى أكبر من كده وهو البحث عن حنان الأم ورعايتها يشعر الرجل انه تائه .. مخنوق.. ربما خاااائف في أعماقه.. حتى يعثر عليها فلو سمحتى يا حبيبتى خالينى احس دائما انى لاقيتك

يظهر معنى العطاء في الاهتمام.. وفى الاول الاهتمام بالحاجات المادية .. فالإنسان بحاجة إلى إشباع مطالب الجسد علشان يفوق لمطالب الروح

زوجتى الزوجة العاقلة هى من تعطى لزوجها مطالبه الرئيسية فتعطيه الراحة والهدوء والنظافة والترتيبت والفائدة والمذاق.. والعفة لشهوته

بوصى ازى الأم الحنون بتاكل طفلها البكر "أول فرحتها" بحرص وسعادةو ازى تلبسه وتطيبه

انتى ممكن توفر لى الجو المناسب بصورة ميكانيكية .. لا روح فيها ولا حنان والا تعرفى توفر لى الجو ده بمودة –غير مصطنعه -

ترد مراتى و تقول طبعا حعرف

فى حاجه كمان فى الاهتمام وهى الاهتمام بمعنوياتى إذا تكلمت تفاعلي معى حديثى بالشكل الذي يناسبى

فمن الرجال من يحب المرأة المتكلمة وبعضهم يفضل التعاطف بقليل من الكلام والبعض يحب من تسأله :" ماذا يضايقك

ومن أسمى جوانب العطاء

التسامح

عطاء الغفران.. ومنح العفو

فالأم تسامح ابنها

ممكن تحزن أو تتضايق بس عمرها ما تعرف تشطبه من قلبها

عنده دائما فرصة للرجوع.. مهما فعل في قلبها مكان له .. مهما نرفزها

فانظري كيف تملك المرأة سعادتها بالتسامح ..

ممكن تزعلى منى او تغضبى لأتفه الأمور وأقل المشكلات و تقولى انت مش رومانسي انت مش فهمني انت مش بتحبني بس سامحينى علشان انتى لو ماعملتيش كده يبقى انتى بترمى الرومانسية في البحر.. وهدمتي صرح الحب الذي بحث عنه فيكي واتجوزتك علشانه اذا لم تسامحى يا حبيبتى بتكونى كده بالمرصاد لى

بتدورى على عيوبى .. بتحاولى كشف وأخطائى

الاسكندرنى فاهمنى يا عنتبلى ولا ايه انت نامت منى

العنتبلى لا ياعم انا صاحى معك اهو :sad:

الاسكندرنى اكملك يعنى ولا ايه نظامك mfb:

العنتبلى يعنى بعد اللى انت قولته ده و عاوز تسكت كمل ياراجل ده القاعده للصبح :blush:

الاسكندرنى طيب حيث كده اكملك الحوار الى دار بينى و بين مراتى و اقولك انا قولتلها ايه

الاسكندرنى حبيبتى الضلع التانى بقه بتاع المثلث وهو ضلع

المشاركة

فى اوقات كتبر بنسال نفسينا واللى حولينا ازى نتناقش مع أزواجنا؟؟ ليه بينقطع الكلام بيننا؟؟

تعرفى يا حبيبتى ايه اجابته السوال ده ليه بعد مرور السنوات الأولى وإنجاب عيل وعيلين وثلاث.. تغيرت الحياة....مافيش بيننا أحاديث.. مافيش بيننا أوقات مشتركة

لا يا امير معرفش

اقولك لا ببساطه مافيش مشاركه بينا فى ركود حصل فى حياتنا

المشاركة باختصار : خالينى احس بيكى جنبى مش بعيدة عن عالمى الخاص.. حتى لو مش تشاركينى مشاركة فعلية .. بسؤالك ورأيك.

كده نصل لحل الجمود والتباعد بينا والصمت الرهيب اللى مش حيبان غير عند الخلاف!!

امير انت قاصدك ايه

اقولك ياحبيبتى اهتمي بما اهتم اهتمي بعملى

لو لكى خبرة فيه أو ثقافة قوليها مع إشعارى دائما أنى "أستااااااااااذك"

ولو ماتعرفيش حاجه عن عملى أو عن اهتماماتى وهواياتى .. خالنى اتكلم .. وأظهري التعجب والرغبة في المعرفة ازى كده ... ايه اللى حصل بخصوص كذا وكذا؟؟

حتلاقينى عاوز اتكلم ده إذا كان حوارك بأسلوب جميل و مش تحقيق ولو سمعتينى كويس حتلاقينى بندمج و بقول اللى فى قلبى بمنتهى الصراحه

فكوني صبورة.. منفعلة معى فكرى واسألي نفسك:

ايه اللى بيشغل جوزى؟؟؟؟

عمله ...... هواياته...... مشكلة معينة..... أخبار الأمة .....

وعلى حسب أسلوبى اللى اكتشفتيه شاركينى أفكارى طموحاتى أحلامى آلامى

· واطلبي منى المشاركة .." محتاجة لرأيك .. لمشورتك .. لعقلك الكبير".. يعنى كده اصل انا بحب الحوار ده انى احس الدنيا حتخرب من غيرى وعلى فكره الرجاله كلهم كده

ونيجى بقه يا حبيبتى على الضلع الاخير وهو

المرح

مافيش أجمل من زوجة .. مرحة بسومة.. بشوشة..

المرح عزيزتي لا يعني "الهبل" فقط!!

يعني..

"عدم التدقيق والوقوف على كل صغيرة وكبيرة .. فده تعريف "النكد

وإذا دخل النكد من الباب هربت الرومانسية من الشباك ! !

يعني..

أن تكوني معى كطفلةواكون معكى كالطفل..

فانا بحسب حساب كل كلمه بتتقال حوليه و بقولها للناس بمعنى خالينى ارتاح معكى من غير حسابات

يعني

الهبل في بعض الأحيان.. الهبل اللذيذ ..

المرح والمزاح ماينفعش يزيد عن حدوده علشان ماقولش عليكى مجنونه

ويكده يا حبيبتى اكون خلاصت اضلاع المثلث و على فاكره انا فعلا ابتديت احس ان انتى مجنونه :)

انا يا امير مجنونه ده انت اللى مجنون حتى بص انت كنت بتكلم نفسك كل ده وانا ماسمعتش حاجه خالص B) اصلى كنت نايمه ;)

الاسكندرنى ايه ياعنتبلى رايئك فى الكلام اللى قولته ده

العنتبلى والله يابنى انت شيطان

الاسكندرنى شيطان ليه بس ياعم

العنتبلى طبعا يابنى شيطان لما تحسس مراتك ان انت غلبان للدرجه ديه و محتاج لها فى كل حاجه وان الدينا مش حتمشى غير بيها و تخليها تقتنع ان هى بقت مفاتيح حياتك و تخليها تنسى الحريه بتعتها فى سبيل ان هى تتمسك بيك اكيد يابنى تبقى شيطان

الاسكندرنى اففف لا ياعنتبلى اوعه الف مره تحس بيك محتاج لها و ان انت من غيرها ولا حاجه ده اكبر غلط مع الاجانب لانهم اساسا بيموتوا فى حاجه اسمها الاعتماد على النفس يعنى لو حسيت ان هى البوب يبقى حتديلك بومب :P

ياعنتبلى اقولك من الاخر حاسسها انك طفل بس الطفل ليه طالبات

حاسسها انها بقت امك بس الام بتغلط برده

قولها بحبك علطول و امتنع لما تكون زعلان بتاثر اوى فيهم ديه

تقريبا ياعنتبلى يا اخويه الستات كلهم كده وهو ده اللى خلانى اقولك فى الاول مش مهم الجنسيه او المكان المهم انها ست بتفهم

تم تعديل 29 مارس 2006 بواسطة الاسكندرنى

[لخبطه]

اسكندراني : مين اللى جاي داخل علينا من بعيد دا

العنتبلي : مش عارف بس شكله فعلا جاي لنا

اسكندراني : بس دا سيما قوي لابس تي شيرت ازرق مع بنطلوب كلاسك بني وكانه لابس كوتش

العنتبلي : تي شيرت ازرق وبنلطون مش لايق عليه اممممممممممم دا يبقا أكيد لخبطه

اسكندراني : ههههههههههههه تصدق هو فعلا

لخبطة : سلاموا عليكم

العنتبلي : وعليكم السلام

لخبطة : ازيك ياسكندراني

اسكندراني : مساءك يانجم شد لك كرسي واقعد

لخبطة :لا مش طالبه قعااد هو انتوا قاعدين ؟

العنتبلي : أه

لخبطة : طيب اقعدوا بالعافيه

اسكندراني :ههههههههه لالالالالالالا خفه يابوب

لخبطة : ههههههههههههههه

العنتبلي : واد يافوريره شوف عمك لخبطه يشرب ايه ياد

لخبطه : لا مش عايز حاجه ياعم الكريم

العنتبلي : مالك يابنى داخل علينا زي دخله أمشير كدا

لخبطة : مافيش والله انا بس بهرء معاكم

اسكندراني : ماشى ياعم الظريف

لخبطه : بقولكم ايه مافيش حد فيكم عنده فكره لمصلحة الواحد يعملها في مصر ويقعد بقا بدل المرمطة اللى احنا فيها دي الواحد أعصابه بتتحرق ياجدعان في اليوم مليون مره بسبب التعامل والناس والغربه وكل حاجه أنا حاسس اني عمري الافتراضي بينقص يوم بعد يوم وهيجي لى يوم يجي لي مرض من الغربة دي وانا لسه صغير

اسكندراني : طيب وليه الحوار المؤرف دا يانجم ما تيجي اوربا وخلاص وتتجوز هنا ونبقا عدايل ههههههههههههههههه

لخبطه : بالنسبه لأروبا مش عارف يمكن تقولوا على فقري بس مش حابب اكون فيها وانكسف أقول الاسباب اخاف تضحكوا علي

اسكنداني : ليه

لخبطه : ماعلينا

العنتبلي : شوف ياعم لخبطه هقولك على كلمه حكمه ولكنها في النهايه فانتستيكا هههههههههههههه لا بجد بالنسبه للغربه مافيش حلاوه من غير نار يعني ما تتوقعش انك تبقا عايش في الخليج مثلا ربنا كرمك بدخل كويس ويبقا مزاجك حلو لازم يطلع لك عظم في النص يعني دا طبيعي ولو دورت هتلاقي كل واحد في مكانه مش مرتاح وبخصوص مصر بقا ياسيدي فمصر في الوقت الراهن لا تصلح للاستقرار وخصوصا للفئات الحزينه من امثالي وامثالك اللى كبيرهم اوي سوبر ماركت ولا ميكروباس بيفشلوا في الغالب لذلك خليك راضي بنصيبك وافتكر دايما انك بردو احسن من غيرك كتير ناس متخرجه وفي نفسها في لقمة عيش ومش لاقيه شغل

لخطبه : بردو ياعنتبلي قولتى لى الكلمتين بتوع كل مره

العنتبلي : مش دا الواقع يابني

اسكندراني : يا جماعه انا واقع في عرضكم هههههههههههههههه سكوا لنا على الحوار دا ونبدأ العشرتين الشداد انا بتمرن من امبارح وجايب طاوله وقاعد اتدرب في البيت ضرب نار للصباح الباكر ياعم حلاوه

حلاوه : كل يوم تقول الكلمتين دول ونحس انك واخد حبتين شجاعه وتطلع كشك في الاخر

اسكندراني : هنشوف يابوب

[se_ Elsyed]

يا رداله .. يا رداله

على القهوة غير الموضوع ده

قهوة المحاورات اللي على الريحه

ولاإيه النظام ؟

[الاسكندرنى]

يا عمى ده انا اخر واحد كاتب فى قهوة المحاورات بس للاسف تقريبا دمها تقيلى دلوقتى على قلب كتير من الاعضاء

فا قولنا اعادة احياء المشروع ده ب على القهوة

ولو سمحت موضوعى مش بحب فيها اعلانات عن مواضيع قاديمه ماشى يا عم السكرة :blush:

اشترك معيه احسن و بلاش تقلب عليه

اه تشرب شاى ولا حاجه ساقعه :lol: يعنى قاعد معنا ولا ماشى علطول

فى عشرة طووله حتتلعب تدخل معنا بوله :ph34r:

[dr khaled]

يدخل د.خالد الي القهوه باحثا بعينيه عن ركن محاورات المصريين

حتي يلمح الاسكندراني و لخبطه والعنتبلي

يقوم ساحب كرسي وجالس علي طول

د.خالد : السلام عليكم ؛ وبدون انتظار الرد يقول ايه الاخبار عاملين ايه

لخبطه : تمام بس اشمعني متاخر النهارده

العنتبلي : حد مات تاني عندك في المستشفي

د.خالد: عادي منتا عارف ان كل يوم بيموت واحد ولا اتنين

بس النهارده كان فيه واحد عنده نزيف و متبهدل فاضطريت اقعد معاه لحد مايبقي كويس

الاسكندراني ( دون ان يرفع عينيه من الطاوله ) : بس هما لسه معرفوش علاج للالتهاب الكبدي اللي هاري الناس ده

د.خالد : ياريت هو مافيش غير الانترفيرون ده بس غالي جدا و ماينفعش لكل الحالات

لخبطه : ربنا يستر علي الغلابه

د.خالد : ينظر باحثا عن الولد وييطلب كوب من الشاي و يشعل سيجاره