توصيف ابناء المحافظات باوصاف وهمية وكاذبة

[Guest النسر المصري]

السلام عليكم يا جماعة

الحقيقة انا فتحت الموضوع ده من زمااااااان اوي يجي من سنة و كدة

قلت اما افتحه تاني ومالو..اصله موضوع لازمله حل

طبعا كلكم اكيد مريتوا بواحد وكنت مختلف معاه في رأي ما..... وسأل سؤال سخيف

انت منين؟ انت تقوله انا من مصر

يقولك لا انا عايز اعرف انت منين من مصر

انت تقوله انا من العريش مثلا... يقوم آآآ لامؤاخذة اصل احنا نعرف عنكم انكم خونة وعملاء لاسرائيل

وفي اللي يبصلك من فوق وتحت ويتجاهلك

واذا قلتله انا من دمايط.. يقول : مممم تحب تتعشى برغيف ولا تنام خفيف(في اشارة الى البخل

او لو قلت ان منوفي تبقى ليلتك نيلة

وهكذا لو كنت صعيدي تبقى مش عارف اية غبي

ولو بورسعيدي يتريق عليك بابو العربي وحسن المراكبي وسذاجتهم

ولو اسكندراني تبقى لسانك زفر وايوووه واي بتنجان ......

بل لو اصريت لواحد اني من مصر من القاهرة

راسه والف شوز لازم يعرف انا منين من مصر

اذا قلتله من مدينة نصر يقولي ياااي انتم بتوع البونبون

واذا شبراوي هبقى صايع

واذا من عين شمس يبقى مش عارف اية وذا واذا واذا...

وبعدين ... وأخرتها ... اية المفروض يحصل بعد كدة

نقسم مصر الى 27 دويلة ونفك راسنا

ولانلغي حاجة اسمها محافظات

ولا نبدل برمجة دماغ الشعب

انا اذكر وانا طالب في الفنون الجميلة وكنت وقتها أمين اللجنة الثقافية

وكانت في ندوة للأمناء والاساتذة والدكاترة مع الطلبة لحوار مفتوح بمناسبة مرور 90 عاما على انشاء الكلية

وطرحت القضية دي

واكتشفت مدى تعمق المصري في الاشاعات وسهولة تصديقها

وكاد في اول الامر ان يتحول النقاش الى حرب أهلية

ولكني تعمدت طرح كل سلبية عن اي وافد او قاهري يقال عنه انه كذاو كذا عشان اعرف اصل الحكاية اية

وبعديها بدأت أسرد رأي ديننا الاسلامي الحنيف في هذا الأمر السخيف والذي يصنف تحت اسم الساخرين

ولاتلمزوا أنفسكم ولاتنابزوا بالألقاب بئس الإسم الفسوق بعد الإيمان ومن لم يتب فأولئك هم الظالمون"

وفي الحديث : (يامن آمن بلسانه ولم يفض الإيمان إلي قلبه لاتغتابوا المسلمين ولاتتبعوا عوراتهم،فإنه من يتبع عورة أخيه يتبع الله عورته ومن يتبع الله عورته يفضحه ولو في جوف بيته) أخرجه الحافظ

ويكتمل بنا الحديث والكل كان في صمت رهيب وكأنهم لأول مرة يسمعون بتلك الآيات والأحاديث

وننتقل إلى النتائج السلبية الرهيبة التي قد تحدث والتي حدثت بالفعل .. مثل التفكك الجتماعي والأسري وضمور الشعور بالوحدة الوطنية ثم مايترتب عليه من انقسامات حادة في الرأي تصل إلى حال التقسيم كما حدث في الدول العربية وقد يستمر التقسيم إلى داخل مصر أيضاً

وكل ذلك بسبب تفاهات مغرضة لاتستند الى اي نوع من الواقع

والآن... وبعد ماسمعتوا اللي حصل

اقدر اعرف رأيكم ايه في الموضوع دة؟

ومين واجه موقف زي ده يحكيه لينا؟

والاهم ازاي نقدر نواجه هذا الأمر؟ وازاي نقدر نحل المشكلة دي؟

حد عنده حل ؟

حد عنده بنادول كمان عشان انا دماغي صدعت؟

آآآ ه يانافوخي

[Guest النسر المصري]

ممم لا والله

فعلا انا كتبت موضوع مش مهم باين عليه

بدليل ولا حد رد

اية مش عايزين تناشوا في قضية. مهمة زي دي ولا اية.... لا ازاي ...

الووو يابشر

بعد اذن الإدارة انا عدلت المداخلة لبعدين الناس تزعل مني ..

تم تعديل 4 أبريل 2006 بواسطة النسر المصري

[NoorJehan]

آه لو صبرالقاتل على المقتول كما يقال...

الموضوع جذبنى شخصيا ومنتظره أجد بعض الوقت للتعليق عليه...

فمن منا لم يضر بهذه المصنفات او أساء لآخرون

بدون عمد خلالهم..

أعتقد إن حضرتك أذيت مشاعر الأعضاء بإتهامهم بما ظننته من إهتمام بالهيافه وخلافه...

وماذا عن حريتنا فى التعليق على المواضيع التى تشدنا لسبب او آخر؟

أعصابك ليه يا أخ نسر مش متظبطه اليومين دول؟؟؟ <_<

[NoorJehan]

فى السريع...موضوع المنوفيه ده صعب أوى ولازمله وقفه رجاله

يا عينى ده أكنه لعنه صعب محيها من ذاكره الزمن...شئ غير عادل

وغير منطقى وأكيد لو عملنا بحث علمى فسوف نجد عكس المفترض خاطئا

أنه سبب من أسباب تأخر الزواج أكيد...فتخيل عزوف الشباب عن الزواج خوفا وتفاديا للسؤال المعتاد "إنت أصلك منين يا إبنى" <_<

[ATHENA]

انا مريت بالموقف ده قبل ما أروح مصر و مكنتش اعرف عنها حاجه و لا عن محافظاتها..

و لأن بابا من الشرقية بقى لما حد يسمع كده يقولي انتم اللي عزمتم القطر <_<

أنا كنت فترة كبيرة مش عارفه ازاي ممكن الواحد يعزم القطر....لما نزلت مصر بقيت اسمع عن طيبة الشراقوة و سذاجتهم اللي بتوصل لحد الغبا بس كنت بطنش لانه تفاهه اوي ان حد يحكم على حد بالشكل الساذج ده..

[Guest النسر المصري]

سامحيني يانور جيهان والله ماقصد في حد حاجة

بس والله موضوع مهم وغايظني وشاغل بالي وبال الكثير من المصريين

ليه بنؤمن بالاشاعات دي

عندي اجدع واذكى صحاب من الشرقية......وعندي شخص كريم صدوق من دمياط...وكنت اعرف اجمل وارق واحب مخلوقة الى قلبي كنت اتمنى الزواج منها وإلى اليوم استشهد بها وهي من المنوفية ومن منوف كمان

وانا عايت كتيييير من الكلام ده

بس حد يسمع اني عرايشي...على طول يتحول لراجل لونه اخضر في ازرق كدة . :wub: ...وبعدين يقلب على فوشيا <_< ...وتلاقي صوته ينخنخ ويقول :sad: ( انتو اللي بعتو السلاح لليهود مش كدة)

طب اية رايك عمي كان دليل الفرقة ??? لعبور القناة سباحة وهو اول واحد نزل الميه

وبابا كان امين سر المراسلات السرية ايام حرب اليمن ...وخوالي كلهم ظباط....وان الكلام ده كلام فارغ...

حرام عليكو بقى ....انا مصريين ...ومصر للمصريين...مش للصعايدة وحدهم ولا للقاهرية ولا للاسكندرانية...مصر هي مصر وبس

[nancy]

انت منفعل اوى يا نسر بس حاول تاخد الموضوع ببساطة اكتر كمان ناس تسال انت من فين فيرد من كذا فيكون الرد اجدع ناس عادى

انا عرفة انهم بيقولو ا على الاسكندرنية انهم لسانهم طويل وكل حاجة يقولوا ايوةةةةة مع انى عمرى ما قلت ايوة دى خالص

ولا بجمع الكلام زى نروحوا ونيجوا ونعملوا

ولما حد بيقولى هما الاسكندرنية بيتكلموا كدة بيكون ردى لا دى منطقة بحرى بس وحتى مش كل بحرى

ولما حد بقولى دة عندكم حد بيقول (يلا) ياعنى ياولد لما ينادوا حد بصرحة بيكون ردى بايخ انك اكيد بتعرف ناس بيئة فعلموك الكلام دة انما الاسكندرنية مش كدة

والدليل انى اسلوبى مش كدة

فلما يكون الى قدامك قاصد الايهانة او التسخيف فهو قاصد ايما كان المكان الى انت جاى منة

فلازم يكون ردك على اد الى بيتكلم الى بيسال عادى رد عادى والى بيصدادلك الغلط سكة

وريح دماغك .. بدل ما تفضل تبلع فى بندول

[فــيــروز]

أعتقد أنّنا نبالغ كثيرا فى تقدير أهمية ردود أفعال الناس و آراءهم فينا !!

و مكسب لك ان تتخلّص مبكّرا ممّن يحكمون على من أمامهم بناء على انتمائهم لمحافظه او منطقه ما !!

أنا الحقيقه لم أكن أعرف أن هناك اى صفات سيئه تلصق بالعرايشه !! و شكرا لك على تعريفنا :blush:

أنا شخصيا من الصعيد .. و حين يسألنى أحد من اين انت اقول انى من الصعيد رغم انى لم ازر سوهاج سوى مرتين اتنين بالعدد

ولا أرى فى الانتماء للصعيد اى شئ يمكن ان اخجل منه او يجعلنى افكر مرتين حتى قبل ان اصرّح بانتمائى للصعيد .. ليس لاعتقادى انهم ملائكه لا تخطئ او ليس لهم صفات سلبيه .. بالعكس أرى ان الصعيدى مثله مثل غيره له مزايا و له عيوب .. و انتمائى العائلى شئ لا يمكن التدخّل فيه بالحذف او الاضافه .. و هكذا ينبغى ان يرى كل انسان انتماءه الاسرى و يركز على ما يمكن تحسينه فيه هو شخصيا

من فتره فى برنامج "من اول السطر" ابراهيم عيسى قال رأى فيما يخص السمعه السيئه لبعض المحافظات .. وكيف انها يمكن ان تكون غيره من ابناء محافظات اخرى لا تتسم بنفس الصفات الايجابيه .. فالمنوفى مجتهد فى التعلّم .. و الدمياطى نشيط و يعمل فى اى شغلانه ولا ينتظر تعيين .. و الصعيدى له نخوه و حميّه قد يفتقدها البعض .. ولهذه الصفات الايجابيه كان نصيب ابناء تلك المحافظات ان يحاربوا بالسخريه منهم و اطلاق الصفات الظالمه عليهم .. و الله اعلم

تم تعديل 4 أبريل 2006 بواسطة فــيــروز

[بنت شعنونة]

دا ما يمنعش انه فيه بعض صفات بتبقى مشتركة بشكل كبير في بعض ابناء المحافظات

زي الجدعنة في الاسكندراني

و العصبية في القاهري

و مط اللغة في الفلاحين

حاجات كدا تلاقي نفسك تعرف الواحد اللي قدامك من اي محافظة من غير ما يقولك هوا

من تعاملة او كلامة بس :wub:

كنت كتبت مرة موضوع عن حاجا زي كدا بس من وجهة نظري الشخصية بحكم اني لفيت محافظات كتيييييييييييييير :blush: :lol:

اهو

http://www.egyptiantalks.org/invb/index.ph...topic=12658&hl=

[Guest النسر المصري]

الله يسامحك يافيروز

بقى بدل متنبذي الكلام اللي بيطلع على ابناء المحفظات ..تقومي تقومي ماتصدقي تعرفي حاجة عن العرايشية تمسكي فيها....امال انا اسمي النسر المصري ازاي :blush:

بصي بقى يافيروز....يعني يرضيكي حد يتهم الصعايدة بالغباء......

أنا اذكر مرة ركب معانا في الميكروباص واحد صعيدي....والراجل افتكر ان الميكروباص دة زي الوتوبيس على اساس ان الأجرة عشر قروش (أهله قالوله كدة هناك في البلد قبل مايجي مصر)

وهات خناقة (آآني جولتلك انهم جالولي الأوجرة بعشرة صاغ....وأني موش هدفع غيرهم)

ياعم الحج بقولك دة ميكروباص ...الاجرة بجنية

وآني جولتلك موش هتضحك علي أبداً

المهم اللي غاظني اسلوب الناس وهم بضحكوا وبيتريقوا ...وطبعا انا اتضايقت جدا...ونهايته انا واتنين تانين بخينا في السواق...(اللي معروف عنهم ببلطجيتهم وقلة أدبهم)

وجمعنا له من جيبنا ....ولكن نزلت وعلامات استفهام طايرة فوق راسي...هو هنفضل مقسيمنها كدة لحد امتى

الموقف قد يكون طريف...لكن اني آخذه ذريعه عشان اعممه على كل الصعايدة...يبقى ده اسمه حرام والله...وانا اذكر في حكم في الاسلام يحرم التعميم

ها قولتو ايه!! انا عاوز حل!!

[فــيــروز]

يا عزيزى النسر !!

مانا قلت لسيادتك .. مش كل الناس تهتم لآرائهم او تعطيها اى وزن !!

ستجد هذا الموقف متكررا حتى فيما لا يتعلّق بالمحافظه التى تنتمى اليها !! يمكن لو رجل اصلع يجد البعض يتهم الصلع بصفه سيئه .. لو رجل قصير القامه يجد من يتهم القصار بالخبث .. لو رجل عينه ضيقه يمكن ان يجد كذلك آراء سلبيه فيه و هكذا !! و مش كل رأى سنتوقّف عنده يا عزيزى ..

ورغم كل ما يقال عن الصعايده من غباء و تقفيل و نشوفية مخ .. أنا من الصعيد و أعتز جدا بهذا رضى من رضى و غضب من غضب .. الحل أن تعتز بنفسك و بانتمائك ولا تهتم كثيرا بالآراء المعمّمه فيه ..

[nancy]

نسر من الاخر انت مشكلتك مش مع الناس انت مشكلتك مع نفسك

وحدش واخد بالة من حتة العريش دى ادك يبقى المشكلة من جواك وانت لو رجعت نفسك حتلاقى انك لما بتقول لحد انا عريشى انت مستنى انة يقولك الكلام الى مش بتحبة

فمتزعلش منى انت بتتعامل مع الموضوع زى الى على راسة بطحة

انت واضح من مداخلاتك ان شخصيتك وثقافتك كويسة جدا منتش محتاج حد يقول راية فيك لازم تفكر كدة

[yacho]

اد ايه انا معاك يا نسر ان الموضوع ده غلس وبيضايق ناس كتير مش انت بس .

انا شايفه ان الناس البسيطه التفكير هم اكتر ناس لسه متاثرين بتوصيف ابناء

المحافظات المختلفه بحاجات مش ولا بد.

الفئه التانيه الناس الغلسه اللى بتهوى تلاستفزاز ونرفزه الاخرين .

وفى ناس اعوذ بالله تحب تججججججججججججججججججادل وتماطل فاى

حاجه وبلا اى هدف فيقوم ينكشك بموضوع غلس زى ده عشان انت تفضل

يا عينى تدددددددددددددددددافع وهو يجججججججججججججججادل

وتضربلك يا ولداه بدل حبايتين بندول قول شريطين وهو بقى....يا سلام

يبقى متكييييييييييييييييييييييييييييييييييييييييييييييييييييييييييييييييييييييييييييي

يييييييف

قوى وانت مولع وشايط.

انا من اسكندريه واكيد حصللى اللى انت بتقوله ده لما جيت فرنسا مع الستات

الفاضيه اللى ماوراهمش حاجه غير الكلام فحاجات هايفه والحمدالله قطعت معاهم من

اولها

اول موقف لما شاافوا فشنطتى علبه سجاير ...... :wub:

على طول بقى

ااااااااااااااااااااااااااااه.... مانتى اسكندرانيه ... مانتو الستات الاسكندرانيه مابيهمكمش حد

وخد عندك انا سبتهم يهبهبوا لغايه ماجوزى خبط علينا ودخل علينا وسالنى على علبه

السجاير فانا استعبطت وقلتله علبه سجاير ايه ده عشان اخلليه يفسر فقاللى علبه سجايرى

اللى ادتهالك فالعربيه وقلتلك حطيها فشنطتك قلتله اه واديتهاله مش عايزه اقولك بقى

الكسفه اللى كانت على وشهم لانهم عرفوا ان علبه السجاير مش بتاعتى وانا وحياتك

ماقلت ولا كلمه بعدها .

[yacho]

معلش انا سجلت المداخله وانا لسه مكملتش اهم حاجه فالموضوع

الحاله دى مش موجوده عندنا بس هنا كمان لاحظت ان في نكت فى فرنسا بتطلع

على الباجيكيين ... زى مره واحد بلجيكى ....................واتريق بقى زي ما

تحب

لما جوزى سافر الاردن مره من زمان ناس كتير تقوله يا مصرى يا خاين

عشان معاهده السلام يعنى مع انه ماكانش من مؤيدى المعاهده خالص

الاهم من ده كله ..... منه لله الاعلام المتخلف والتلفزيون ومسلسلاته

وتضامنا مع شعب الاسكندريه حبيبى ...... منك لله يا فردوس عبد الحميد

انتي ومحمد فاضل وكل من اشترك فى تشويه صوره بنات اسكندريه

وطلعوهم غجر وصوتهم عالى والله حرام ده حتى اخواننا العرب فالغربه

اول ما يعرفوا انا منين على طول يقوللى

ايييييييييييييييييييييييييييييييييييييييييييييييييييييييييييييييييييييوه ويضحكوا قوى

الحل

الوصفه السحريه لمعالجه الافكار البدائيه

عندك ثقه فنفسك

ذكى

مرن ومثقف وذي عقل متفتح

ماتتعاملش ان الكلام ده موجه لشخصك ابدا بل العكس ده عيب

فاللى بيتكلم معاك لانه مش بيفكر فالكلام اللى بيقوله بيردده زى

الامثال الشعبيه والمروثات التقليديه الباليه

سسسسسسسسسسسسسسسسلام

[yasovinas]

طيب بس ايه رايكم ان مثلا الكلام اللي بيتقال على اهل المنوفيه مرتبط في الغالب بالمنايفه اللي في الجيش واللي اغلبهم بيكون متطوع وبيطلع كل عقد الحياه على المجند اللي بيكون فترة ويطلع بغض النظر عن سبب اللي بيتعمل في الجيش من صف الضابط المتطوع اللي بيكون منوفي في الغالب بنسبة 90 % يعني الكلام لما بيتقال بيكون منطبق على هذه النوعية

ايضا الدمايطة بيكون لها سبب ان الدمياطي في طبعه نشيط ومن النوع اللمجتهد في الشغل وابناء دمياط يعملون ويكسبون رزقهم منذ الطفوله وبالتالي بيكون عارف قيمة القرش اللي تعب فيه وعرق على ما جابه لذلك بيثكون حريص عليه وهو ما يفسر في الامثال بالبخل

الصعيدي القادم من اقاصي الصعيد يكون عايش على الفطرة وعلى الطيبة وليس فيه اي انواع من الخبث واللؤم الذي نكتسبة في المدينه ومن هنا تاتي الامثال على هذا الصعيدي الطيب القادم من بلاده

وطبعا اي مثال او اي نكت يجب بل من الطبيعي ان تكون فيها نسبة من المبالغه والطرافه

عموما اي كلام عن اي محافظه قد يكون عالق في ذهن اي شخص تتقابل معه ولكن مع تعاملك معه اما ان تعدل هذه الصورة او تؤكدها

فكما يقال عنا اجدع ناس هناك من يؤكد ان الاسكندرانيه اجدع ناس وايضا من يؤكد انها كلمه كاذبه جدا لان ليس كل الناس متشابهه

تحياتي

[النسر المصري]

استكمالا بس لموضوع مدهش بتاع المنايفة والشرقاويه وخلافهم

حد عايز يدلو برأيه تاني!!!!! :angry2: :angry2:

[hopsan]

ايه يا عم المدهش

ما النسر المصرى اللى كان غير مسجل و اصبح مسجل كان كاتب فى الموضوع ده من زمان

و انا قلت اللى عندى و مش عارف اقول ايه تانى

شوف يا نسر لما تلاقى موضوع كنت كاتبه و حد تانى لطشه بدون قصد تقدر تكتب فى ردك ( مك ) و بس و الباقى مفهوم انه الموضوع تمت الكتابه فيه قبل كده و مكرر