الساعات الأخيرة ... كصة بوليسية !

[حشيش]

الساعات الأخيرة ... كصة بوليسية !

فى هذه الكصة البوليسية المثيرة يخوض بكم المؤلف فى بحار الساعات الأخيرة التى سبقت إختفاء منتدى (هايد بارك) من الشبكة وما أكتنف ذلك من غموض وإثارة mfb: .... أبطال الكصة هم فى الواقع جميع المسؤولين والأعضاء فى منتدى الهايد بارك الحبيب إلى قلوبنا جميعاً والتى نسأل الله تعالى أن يعيده إلينا أجمل وأقوى مما كان عليه .... البطولة ليست قاصرة على إدارة الهايد بارك فقط كما تقدم ولكن أيضاً جميع الأعضاء بلا إستثناء .... وعلى من يرغب فى عدم إدراج إسمه فى الكصة أن يبلغنى وسوف أفعل ذلك إن شاء الله ... ودلوقتى بقى نبتدى وربنا يستر طريقنا :P

فى غرفة التحكم والسيطرة بالهايد بارك:

يجلس طاقم الإدارة النبطشى فى الغرفة الزجاجية المستديرة أمام شاشات الكمبيوتر والرادار يرصدوا كل ما يحدث داخل وخارج جميع أبواب المنتدى .... الغرفة مصممة لتدور حول نفسها بسرعة ثابتة لتمكن أعضاء طاقم الضيافة ومجلس الحكماء من مراقبة كل شئ من مختلف الزوايا mfb: .

طفشان مخاطباً إيزيس: أنا رايح أعمل زى الناس ... خدى بالك من المطرح على ما أرجع :wub:

إيزيس: ياساتر كلامك زى الدبش ... إفففففف ..... روح ... إلهى ما توعى ترجع

محمد أبو زيد: إعذريه يابنتى ... الجدع قاعد عالكرسى متحركشى من إمبارح لدرجة إنى إفتكرته مشلول -_- .... طفشان ده شعلة نشاط بصراحة ..... مش عارف لما يموت حنعمل إيه ... خليكى إنتى فى المونيتور بتاعك ياإسيس وأنا حاخد مكانه لحد ما يرجع من دورة الميه

كليو: ياساتر الريحه فظيعة .... أنا حيغمى عليا .... أنا حكتب لمودست يركب لنا شفاط :)

كفاية: الوله ناصر ماسك فى خناق حشيش وغارز ضوافره فى وشه

ياسو: سيبهم ..... ربنا ياخدهم هما الإتنين ونرتاح منهم

كفاية: ناصر شايفه واقع مسخسخ ... باين حشيش ضربه شلوت تحت الحزام

زعلان: أنا حتصل على باب شئون طبية يبعتوا نقالة تشيله

ياسو: المفروض الإتنين ياخدوا إنذار :lol:

محمد أبو زيد: ناصر سوابق وكمان هوه اللى إبتدا ... وحسب المادة 255 من إتفاق الزنتلمان ناصر لازم يتفصل من البارك بصفة نهائية B)

إيزيس: فى نور جامد فى باب كشكشها مش عارفه إيه ده ؟!

كليو: نور ولا نار ؟!

إيزيس: مش باين ... بس يمكن حد مولع حاجه هناك !!!

طفشان: ياااااه ... أنا مش قادر أفتح عيني ..... النور جامد قوى وبيقرب مننا بسرعة :excl:

كليو: إلحق يا ياسو !!!!!!! ...... قطر الصعيد داخل علينا !!!!!! :o

إلى اللقاء

[se_ Elsyed]

شيشو يا فززززيع

والله العظيم كنت عارف إنك هاتعملها

لإني عارفك ومتأكد إنك ما تفوتش حاجة زي دي .

[زعلان]

:lol: :wub: استمر يا حشيش على بركة الله :)

[Cleo]

أنا كنت متأكدة إن فيه أجهزة تصنت فى البورد :lol:

عقلى الباطن: بس لو أعرف مين اللى شد سكينة الكهربا :wub:

[زعلان]

أنا كنت متأكدة إن فيه أجهزة تصنت فى البورد :lol:

:)

يعني كل خناقشتنا طلعت بره :wub:

[Farida]

حشيش يا عبقرى اكشف كله بقه و جيب لنا المستخبى .....و زى ما قلت لك ها :lol: :wub:

[se_ Elsyed]

من غير زعل ومع إحترامي لجميع الأعضاء

أنا هاقفل أم الموضوع ده

لو حشيش فضل ينقطنا النُقطة السودا دي

يعني حلقة كاملة من المسرسر عشان المُشاهد يعرف إن طفشان راح يعمل بيبي وكليو شافت وليعه بره الباب ؟

ده حرام على أعصابنا حتى يا أخي

الناس دافعه فلوس يا حشيش ونفسها تتكيف

فيا تكيفنا بما يرضى الله

يا تحل عننا يا أخي وتسيبنا نربي عيالنا

إنت عامل زي اللي بيعلمنا الشم وينفحنا تذاكر مرة وإتنين وتلاتة وبعد ما ندمن يتخلى عننا وما نشوفش منه سطر واحد نشمه

ولا رأي المُشاهدين إيه ؟

[yasovinas]

انا موافق على طلب ابو السيد بالنسبة لسرعة امداد الباش تومرجي حشيش ابو سرنجه للمدمنين :lol: قصدي للاعضاء بحلقات المسلسل سريع سريع

بس حكاية قفل الموضوع دي بلاش الله يكرمك يا ابو عمر احسن اخوك بيتشائم من الكلمه دي وبقت بتجيلي حساسية لما بسمعها

الله ما يوريك هرش على رعشه على بربشه وتلاقيني اقوم انط لوحدي واصرخ واقول ي{ا حبيبي يا موديست عملوا فيك ايه يا خويا } :wub:

[se_ Elsyed]

يا ياسو ياخويا ما هي حاجة تفقع

شوف كام رد من المدمنين قصدي المشاهدين .. وكل ده يادوب على جُملتين :

طفشان : أنا رايح أعمل بيبي .

أيزيس : بسرعة وما تعوقش

بالله عليك يرضيك تفتح التليفزيون ... وإنت معشم نفسك تتفرج على مسرسربوليسي مُثير وفيه ناس عماله تجري ورا بعضها بالرشاشات والموتورليزات .. ويجيلك ساعتين تلاتة إعلانات إشي شامبو بالبيض على فياجرا بالبلوبيف وبعدين تيجي تيترات المسرسر يجي نُص ساعة ويقولك " الحلقة الأولى " تقوم سامع الجُملتين دول بس ويكتب لك " إلى اللقاء في الحلكة الكادمة " ؟

أهو إنت راجل أجنبي ويونانيديس ماسكوليدس وبتفهم في الأصوليديس ... بذمتك يبيحصل عندكو كده في تليفزيون إسبرطة القديمة ؟

---

وبعدين بين وبينك يا خواجه ياسو القصة بريحتها من الأول مش مطمئنة ... فلقد بدأت بخصوصيات الخصوصيات لأعضاء البورد وناس رايحه التواليت .. وناس مخنوقة من الريحه لحد ما قلبو بطننا من الإيحاءات دي .. يقوم بعد ده كله .. أجي أدخل على باب الإبتسامات والفرفشة اقوم أقرأ العنوان التالي " الساعات الأخيرة ... قصة بول "

آه والله ولو مش مصدقني إقرأ العنوان كده أول ما تفتح المحل عندك ...

[Cleo]

{ا حبيبي يا موديست عملوا فيك ايه يا خويا } :unsure:

معلش يا ياسو.. تلاقيه راح يشترى الشفاط و زمانه راجع <_<

[حشيش]

الأخوة والأخوات الأعزاء :wub:

شكراً على تفهمكم لسرية الكصة وما يكتنفها من غموض .... بالنسبة للنقطة التى أثارها أبو السييد من البطء فى سرد الأحداث فأنا ألتمس له العذر لأنه لا يعرف الظروف التى أكتب فيها ولا أكون مبالغاً إذا قلت له أننى كتبت الحلقة الأولى على ضوء شمعة وأنا مختبأ تحت السرير هرباً من مباحث أمن الدولة التى تبحث عنى فى كل مكان وتريد أن يظل موضوع إختفاء الهايد بارك فى طى الكتمان :ph34r: .... ما علينا .... نرجع للكصة

يجتمع طاقم الضيافة ومجلس الحكماء حول كليو ليشاهدوا الجسم المضئ الذى يقترب من غرفة التحكم والسيطرة بسرعة هائلة والذى حسبته كليو للوهلة الأولى أنه قطر الصعيد

محمد أبو زيد: أعتقد ده مذنب (هالى) .... هوه بيعدى جنب البارك مرة كل 76 سنة لكن ما بيخبطش فيه أبداً .... يعنى مفيش داعى للقلق :o

طفشان: ياأستاذ محمد إرحمنا الله يرضى عليك

كفاية: ياجماعة لازم نعمل حاجة !!! .... الجسم الغريب ده بيقرب مننا بسرعة :o

ياسو: أنا حاسس إن ده عمل تخريبى إجرامى .... شكل الجسم ده والله أعلم صاروخ حارق خارق !

كليو: لازم نرسل إشارة إستغاثة لكل المنتديات الصديقة بسرعة :o

محمد أبو زيد: طب بس الأول نبلغ أصحاب المطعم .... قصدى محبط ومودست .... إتفاق الزنتلمان بينص على كده :blink:

زعلان: زنتلمان إيه دلوقتى يابا الحاج .... إحنا نلبس أطواق النجاة الموجودة تحت الكراسى اللى إحنا قاعدين عليها دى .... ودلوقتى حالاً :unsure:

إيزيس مخاطبةً زعلان: يعنى إيه الكلام اللى انته بتقوله ده ؟!! ..... أطواق نجاة !!! ... يعنى خلاص حنموت !!! .... إلحقينى ياماما .... أنا مش عايزة أموت .... عايزة أعييييييييش .... عايزة أعييييييييش .... أنا حلوة وصغيرة :sad:

كليو: يا سممممم .... يعنى إنتى بس اللى حلوة وصغيرة !!! ;)

يبدأ كفاية فى إرسال إشارات إستغاثة إلى المنتديات الصديقة:

من هايد بارك إلى محاورات المصريين ..... هل تسمعنى ..... حوول

من هايد بارك إلى شئون مصرية ..... هل تسمعنى ..... حوول

من هايد بارك إلى منتدى الحرية ..... هل تسمعنى ..... حوول

من هايد بارك إلى منتديات جميل جمال ..... هل تسمعنى ..... حوول

يستيقظ عادل أبو زيد على صوت جهاز اللاسلكى الخاص بالطوارئ

عادل أبو زيد: آلووووووو

كفاية بلهفة: مش دى محاورات المصريين ؟!

عادل أبو زيد: لا يابنى النمرة غلط .... هنا (عمر أفندى) :blink:

إلى اللقاء

[Cleo]

.... عايزة أعييييييييش .... أنا حلوة وصغيرة :sad:

كليو: يا سممممم .... يعنى إنتى بس اللى حلوة وصغيرة !!! ;)

إلى اللقاء

عقلى الباطن: إن حشيشا ليلعب لعبة فرق تسد حتى يمزق شملنا ويفرق جمعنا فيستتب له الأمر من بعدنا... لأجهضن محاولاته ولأفسدن تدبيراته ولأمكرن به كما مكر بنا (وش عدلى كاسب فى فجر الإسلام) :P

يا حبيبتى يا إيزو... :o

ماتخافيش ماتخافيش..

اقفى ورا ياسو... وأول ما تلاقى البتاع ده قرب علينا، زقى ياسو ناحيته ونطى على طول مالشباك... أه هم رجالة يستحملوا :P

[se_ Elsyed]

يستيقظ عادل أبو زيد على صوت جهاز اللاسلكى الخاص بالطوارئ

عادل أبو زيد: آلووووووو

كفاية بلهفة: مش دى محاورات المصريين ؟!

عادل أبو زيد: لا يابنى النمرة غلط .... هنا (عمر أفندى) :P

إلى اللقاء

شديدة يا حشيش

يسمع من بؤك ربنا يابني

هو عادل أبو زيد لو عنده فرع حتى من فروع عمر بك أفندي كان زمانه بص في وشنا ؟

ده أحنا بنتكلم في سبوبة كبيرة قوي ييجي 500 مليون بعد ما فطسوا البيعة ...

كمل يابني الله يرضى عليك

ويبعد عنك ولاد الـــ .... ولا بلاش هما عارفين نفسهم ...

[ATHENA]

إيزيس مخاطبةً زعلان: يعنى إيه الكلام اللى انته بتقوله ده ؟!! ..... أطواق نجاة !!! ... يعنى خلاص حنموت !!! .... إلحقينى ياماما .... أنا مش عايزة أموت .... عايزة أعييييييييش .... عايزة أعييييييييش .... أنا حلوة وصغيرة :wub:

كليو: يا سممممم .... يعنى إنتى بس اللى حلوة وصغيرة !!! :D

هييييييييييه(شهقه)

الفتنة نائمة.... :lol:

كوكو يا حبيبتي ابقي تعالي جنبي و انا بزق ياسو عشان الزقة تكون جامدة و نضمن وكده :blink:

[حشيش]

قبل أن يكمل كفاية محادثته مع عادل أبو زيد سمع الأخير عبر جهاز اللاسلكى صوت إنفجار مدوى وصرخات مفزعة :o .... يفيق عادل أبو زيد من النعاس وينادى على الطرف الآخر:

عادل أبو زيد: آلووووو ..... أيوه يابنى دى محاورات المصريين ..... أسمعك بوضوح .... ما سبب الإنفجار الهائل الذى سمعته الأن ؟! ... ومن أنت ؟! ... ومن أين تتحدث ؟! .... كان هذا إستهلالاً لا بد منه .... حووول

ينتظر عادل أبو زيد على اللاسلكى ولكن دون رد من الطرف الآخر .... يكرر عادل ندائه ولكن دون جدوى .....

فى هذه الأثناء يدق جرس الموبايل الخاص بعادل أبو زيد

بروف: مساء الخير ياأستاذ عادل ... معاك بروف من شئون مصرية .... إحنا تلقينا نداء إستغاثة من الهايد بارك لكن سمعت صوت إنفجار جامد وأنا لسه يادوب بستقبل المكالمة وبعد كده الخط فصل ... ياترى وصلتك أى معلومات ؟!

عادل أبو زيد: نفس اللى حصل معاك بالظبط يابروف .... ده أنا حتى ما كنتش أعرف إنه نداء إستغاثة من الهايد بارك

بروف: طب وبعدين حنتصرف إزاى ! mfb:

عادل أبو زيد: دى مصيبة .... كارثة .... لازم نقوم بتفعيل النزاهة بسرعة .... قصدى لازم نعمل إجتماع لجميع المشرفين فى المحاورات وشئون لتشكيل لجنة تقصى حقائق فوراً .... ياحبيبى يامحمد :D

بروف: محمد مين !؟ ... ونزاهة إيه !؟

عادل أبو زيد: محمد أبو زيد إبن عمى .... ماهو معاهم فى الهايد بارك .... ياترى عايش ولا ميت يامحمد :huh:

بروف: هوه محمد أبو زيد ساب المحاورات وراح البارك ولا إيه ؟! .... ده كان بيكتب معانا فى شئون كمان !!!

عادل أبو زيد: ماهو الله يرحمه كان غاوى كتابة ... ده لو ملقاش منتدى يكتب فيه حالته النفسية بتتأثر جامد وممكن يكتب على وش أو هدوم أى حد يقابله فى الشغل أو فى الشارع ... ياحبيبى يامحمد mfb:

بروف: هدى نفسك ياأستاذ عادل إن شاء الله حنلاقيهم ونطمن عليهم كلهم .... حعدى عليك فى المحاورات أنا وفرقة حسب الله قصدى وفريق الإشراف بتاعى فى شئون علشان نعمل إجتماع موسع معاك ومع فريق الإشراف بتاعك كمان ساعة :o

عادل أبو زيد: إيه حكاية بتاعى وبتاعك دى !؟ .... فريق الإشراف ده بتاعنا كلنا !!!

بروف: عندك حق ياأستاذ عادل ... فعلاً المحاورات وشئون نسيج واحد ... وإن شاء الله حنلاقى أعضاء الهايد بارك وطقم السنان بتاعهم قصدى طاقم الضيافة بتاعهم

عادل أبو زيد: فى إنتظاركم ... أنا حعمل نوبة صحيان واجمع المشرفين حالاً

بروف: سأظل أبكيك حتى ألقاك ... مع السلامة

فى هذه الأثناء كان الإنفجار العنيف الذى حدث فى الهايد بارك على بعد أمتار قليلة من غرفة التحكم والسيطرة قد تسبب فى أضرار بشرية ومادية فادحة .... ساد الهرج والمرج كافة أبواب المنتدى وسط سحابة كثيفة من الدخان الأسود وألسنة اللهب .... تعاون الأعضاء الناجين فى نقل المصابين إلى باب شئون طبية الذى لم يصبه أذى وشكلوا ورشة عمل لفرز الأعضاء .... كانت خطتهم تقتضى ترك القتلى فى أماكنهم حتى يتم إخلاء المصابين والجرحى أولاً مع إعطاء الأولوية للحالات الحرجة والخطيرة :o

ناصر وقد تفحم وجهه من أعمدة الدخان الكثيفة مخاطباً أمير الجماعة السلفية سى فود: أنا إيدى وجعتنى من كتر الشيل والحط يامعنمى ... وبعدين إحنا عمالين ننقل مصابين على باب شئون طبية ومفيش لا دكاترة ولا ممرضات هناك !!! ... وغير كده كمان فى ناس من اللى إحنا شايلنهم دول مش مسلمين وهذا لا يجوز ياأمير :closedeyes:

سى فود: فى الشدائد يجب أن يتوحد المسلمون وأهل الكتاب ياغلام

ناصر: بس الجدع اللى إحنا شايلينه ده مش مصنف ... يعنى مش عارفين ملة أمه إيه .... أنا بقول ندلقه mfb:

سى فود بغضب: هل شققت عن قلبه ياأخرق :)

ناصر: عرفت منين إنى من الخرقاوية مركز كوم حمادة .... الله أكبر ..... مددددددددددددددد ........ حييييييييييييييييييييي

إلى اللقاء

[yasovinas]

حشيش حلوة وملعوبه الله يفتح عليك

بس كويس انها اتكتبت في الاجاوة والا كانت هتبقى فضيحه في المكتب ،، قول يا ابني قول دا انت اخرتك ،،،،،،،،،،،،،،،،هباب

[حشيش]

صورة للإنفجار العنيف الذى ضرب هايد بارك (وكالة إنترتاس) :

[صبح]

أستاذ حشيش

أرجو من فضلك أن تكمل الكصة ان كنت حتى الآن حى ترزق ..... :closedeyes:

[se_ Elsyed]

بعد إذن الكاتب الكبير - في السن - حشيش

وبعد إذن اخويا الصغن موديست

أنا ليه مزاج أكمل الكصة دي ولقد قمت بالفعل بوضع الرتوش والخطوط العريضة والإفتكاسات على بعض الأفكار وضربتهم كلهم في الخلاط .. ويارب تعجبكم

عايز موافقة مكتوبة الأول عشان أبدأ

[حشيش]

بعد إذن الكاتب الكبير - في السن - حشيش

وبعد إذن اخويا الصغن موديست

أنا ليه مزاج أكمل الكصة دي

عايز موافقة مكتوبة الأول عشان أبدأ

إنطلق يا أغبر <_< ...... قصدى سر على بركة الله <_<