مذكرات باب دورة مياه

[مصريه بالكويت]

احم ... شوية كده يا فنديه عشان النفس بس .... مفيش داعى للزحمة ..... مش عايزين اصابات الله يخليكم....

مش عارف حاطين ايديكم على مراخيركم ليه؟؟؟؟ مع إننا لسه مدخلناش فى دورة الميه ....قصدي فى الموضوع..

ما علينا .... ندخل فى الموضوع ....

بداية أحب ان انوه أن المقصود هنا هى أبواب دورات المياه العامة يعنى....المراحيض العمومية

-.اففف الله يقرفك ......

- ماشى ياسيدى ....ماعلينا ....

وليس المقصود أبواب دورات المياه الفايف ستارز اللي فيها اير فريشينر وليكويد سوب وتواليت بيبر واير دراير لزوم

تنشيف الايدين...

انما اقصد ابواب دورات الميه الغلبانة التى يرتادها معظم حرافيش الشعب المصرى اللى انا منهم وخاصة اذا كنت على

سفر ورجليك خدتك لغاية دورة مياه مسجد الفتح برمسيس او دورة مياه بولاق الدكرور التى تقوم سنية العمشة بالإشراف

عليها ويساعدها بيومى طناش .

المهم سعادتك وقفت فى الطابور لغاية مجه دورك ودخلت .....

تعالى بقى نتصفح جريدة باب دورة الميه .... دى مجانية واميز مافيها انها مفيش عليها رقابة وبتحتوى على كتابات تمثل

كل الاتجاهات .... يسارى ماشى ... يمينى ماشى .... صعيدى ماشى ... وبعدين دى شاملة كافة المواضيع من سياسة الى

اقتصاد الى رياضة.....ويشرف على تحريرها واصدارها بشكل يومى جموع الشعب المزنوق ...تعالى نتصفح .....

- الأهلى عمهم وحابس دمهم ...

- للذكرى الهباب وايام العذاب والزحف على التراب – جندى سويلم البهنساوى – مركز تدريب المعادى

- كله يهون الا اللاهون – جندى مجند حمدى ابراهيم – مركز تدريب اللاهون

- ازازة الزيت بقت ب7 جنيه .... ماشى يا ظلمه

- مجانية تعليم ايه يا ولاد الــ ......

- كل ظالم وله نهاية .....

- خد عبرة من السادات .....

- الجمعية فيها لحمة ....ياولاد الكذابة ...

- امريكا بنت .......!

- يا ولاد الــ...... نهبتوا البلد

- نحن نوفر لك الوظائف بمختلف التخصصات وبمرتبات مغرية... فقط....شدالسيفون.....

وهكذا سادتى وسيداتى الأفاضل كما ترون فأبواب دورات المياه ليست مجرد حاجزا يستر من يجلس خلفه ... ولكنها

متنفسا تستطيع من خلاله جموع الشعب المطحونة ان تعبر عن بعض ما يجيش بصدورها دون خوف من ان يكون هناك

مخبر واقف لك ورا الباب.....بكل بساطة هذا الشعب ...وبكل مايتعرض له من ظلم وطحن وسحق الا انه يرفض ان

يصمت ....سيتكلم حتى ولو من وراء باب دورة الميه ..

وتستمر الكتابة...وتستمر القراءة ......

برجاء من السادة الأعضاء ترك القبقاب على باب الدورة لأنه عهدة

[عمر عباس]

انتى بنت ذكيه واسلوبك رائع ..... بس ملاحظة .... الدورات اللى انتى بتقولى عليها دى للذكور مش للاناث ...!

ازاى شوفتى ده ..

طبعا انتى وضعت الفكرة فى اسلوب رائع

اشكرك

[khedr]

اشم في الموضوع رائحه لا استطيه تمييزها

واسمع اصوات غير محدده الاتجاهات

هو مش كان اسمه زمان

بيت الراحه

فيه يستريح الانسان من كل ما بداخله من فضلات

اف......................علي ده موضوع

موضوع الفضلات مش حاجه تانيه

[yasovinas]

استنو استنو قبل ما نشد السيفون على الموضوع

انا عايز اقول حاجه

مره دخلت بيت الادب في محطة بترول هنا في طريق ابو ظبي دبي ودي برضه جريدة حرة مستقلة ولاقيت واحد كاتب بالخط العريض وعلى مستوى النظر وانت قاعد ومستكنس "انظر اعلى" وعامل سهم قلت يا واد اديك قاعد ومستريح ولسه الخط ما انقطعش والحرارة موجوده كمل بصيت لفوق لاقيته كاتب وبالخط العريض برضه "اتبع السهم" ؛؛ والسهم رايح شمال ؛؛؛ توقفت قليلا لحدوث انقطاع في الحرارة وتشويش في وسائل الاتصال وبعد ان اعدت الاتصال واستريحت كملت وبصيت معاه شمال لاقيت السهم واصل لاخر طرف الباب شمال وبعدها عاد للارتفع مرة اخرى الى اعلى طلعت معاه لفوق؛؛؛ ولكن كما يبدو ان رفع الراس لاعلى احيانا يؤدي الى انقطاع الارسال فاضطريت مرة اخرى الى التوقف عن المتابعه ومحاولة الاتصال وكانت هذه المحاوله صعبة شويتين ومحتاجه المزيد من المجهود :wub: الى ان حدث المراد وعاودنا الاتصال؛؛؛؛ فرفعت راسي الى ان وصلت لنهاية الباب وهناك وجدت مكتوب وبخط ثلث جميل وباللون الاصفر المخضر (عارفينه طبعا) وجدت عبارة غريبه وعجيبة بعثت في نفسي شجون وذكريات اليمه ؛؛؛؛

لقد كتب هذا القاسي عديم القلب والرحمه {انظر خلفك} :wub: ولانني لا اجيد النظر الى الخلف واعشق دوما التطلع الى الامام,,,, رفضت ان اطيع التعليمات وتوقفت عن متابعة الموضوع الى ان انتهيت من تلبية نداء الطبيعه وهنا عاودني شيطاني اللئيم :wub: ووسوس في دماغي "ما دمت خلصت ولبيت نداء الطبيعه وانت اهو خارح بالسلامه ليه بقى ما تبصش وراك وتشوف ايه الحكايه" ؛؛؛ ولان نفسيتي ضعيفه والشيطان شاطر ويومها نسيت اقول وانا داخل "اللهم نجنا من الخبث والخبائث" فلقد مشيت ورا الشيطان والتفت خلفي في نظرة خاطفه على استحياء وانا اشد السيفون حتى انهي العمليه التي قمت بها على اكمل وجه :wub: فوجدت على الحائط وفوق السيفون مباشرة وبنفس الخط الثلث الرائع وبنفس اللون الاصفر المخضر (عارفينه) عبارة رائعه تقطر حكمة وخبرة جعلتني اشكر شيطاني هذه المرة لانه دفعني دفعا للنظر الى الخلف كان مكتوباً يا ساده :-

{ممنوع الكتابه على الجدران }

[nancy]

الموضوع فكرتة وفلسفتة حلوة

بس قلب بريحة وحشة اوى

افففففففففففففففففففف :closedeyes:

[مصريه بالكويت]

يا أستاذ عمر ما هو طبيعى انى مذخلش دورات المياه الرجاليه ولكن بالتاكيد كان فيه دورات مياه حريمى

وفيها كل اللى موجود فى الرجالى الريحه هى هى والكتابات هى هى

وأكتر

والكتابه هنا بتختلف بعض الشيئ

يعنى ايام الجامعه كانت الخطوط واضحه وصريحة باقلام الكحل والروووووووووووووووج

تلاقى البنت يا عين أمها متشحتفه وكتبالك يا مودى يا بلاش :closedeyes:

[khedr]

موضوع عمل ريحه للمنتدي

سؤال انتي فكرتي ازاي في الموضوع ده

متي واين جاءت لك الفكره

yasovinas

هو انت كنت بتعمل ايه بالضبط

[مصريه بالكويت]

يا جماعه حقكوا عليا انا غلطانه من الواضح أن الموضوع عمل ريحه جامده فى المنتدى

ليكوا عليا انزل اجيب لكوا البخاخ بتاع جليد اللى بيجى اعلانه فى التلفازيون

الاعلان اللى فيه الواد الامور ده قاعد برضه بيؤدى نداء الطبيعه وقرفان من ريحته

وفجأه لقى بخاخ جليد جنبه فضغط عليه والمكان اتحول لرائحة الزهور

انا هنزل حلا اشتريه واركبه على حائط المنتدى بس احطه فى اى فرع تفتروا

اللى جاب الفكرة دى فى دماغى يا استاذ خضر حكاية الاسكندرانى المشهور اللى كتب على كل جدران الشوارع كنت

بنتكلم فيها مع

زوجى وبالتالى تطرقنا لموضوع الابواب المعذبه فى دورات المياه :closedeyes:

[ابو محمود]

لمصرية انتى كدة بتدورى على اية انتى دخلتى الحمامات وقراءتى اللى مكتوب على البيبان ممكن تروحى مكان تانى مكتوب علية برضة والاماكن دى كتير اوى ومنتشرة مثلا كل ابواب عامة من الاسانسير حتى المراحيض وعلشان الريحة ماتفوحش علينا اعزك اللة انا اشكرك على هاذا الموضوع لان النظر الى هموم الناس غير التفكير فيى همومهم ممكن اشد السيفون مع اطيب الروائح ههههههههههههههههههههه :unsure:

[yasovinas]

الاسكندرانى المشهور اللى كتب على كل جدران الشوارع كنت

بنتكلم فيها مع

زوجى وبالتالى تطرقنا لموضوع الابواب المعذبه فى دورات المياه :unsure:

اولاً تحياتي لزوجك الغالي يا فندم حقيقي موضوع جميل برغم الرائحه الا انها فعلا حقيقة واقعه

ثانياً كان اسمه {جمال الدوَل) يا فندم

[yasovinas]

وردت الينا هذه الرسالة من ابننا الغالي (واحد تاني ) دا غير الواحد الاولاني اللي كان هنا ومشي

صباح الفل يا كبير

الا هو اسمه (جمال الدوَل) والا (جمال الدولي)؟

الموضوع صغير ... بس انا حبيت انكشك

اخوك

واحد تاني

ورداً على تساؤل المستمع واحد تاني اللي هو غير الاولاني الا كان هنا من شوية وغير الواحد دوكهم اللي كان هنا عامنول وغير الواحد دوكها اللي كان هنا برضه من شي كام سنة ارد علية واؤكد له

ان السيد جمال كان اسمه جمال الدول بدون ياء يا واحد يا تاني ياللي انت غير الواحد الاولاني اللى كان هنا من مدة وغير الواحد التاني اللي كان هنا؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

[وليد صفوت]

معلش يا جماعة .. بس الموضوع ده اتنشر قبل كده فى منتدى ( هريدى ) و اتنشر عندنا فى المحاورات منذ فترة , و عشان كده استاذ عصام شوقى اتكلم عن امانة النقل من منتديات اخرى ....

اتفضلوا الوصلة لنفس الموضوع بيد كاتبها فى المحاورات منذ عام تقريباً العضو ( محب فى الله )

مذكرات باب دورة الميه

و زى ما هتلاحظوا الموضوع منشور من Aug 12 2005 ....

ارجو ان يكون ده سوء تفاهم مش اكتر يا اختى مصرية بالكويت ......

تحياتى و تقديرى ....

[nancy]

غريبة دة الكلام بالنص

اكيد مصرية عرفة كدة بس هى افتكرتة بالراجل الاسكندرانى مشا أكتر

احنا فى كلية الفنون الجميلة مفتكرش كتابات

انما افتكر ان كان الحمام كلة ابيض

وكل الى يدخل يرمى الوان الباليتة على الحيطة فكانت كل الاوان على الحيطة البيضا

واحينا تلاقى تماثيل قديمة ولوحات

حمام فنى جدا :angry:

[khedr]

nancy

عزيزتنا الكريمه

بما أنك خريجه فنون جميله

موضوع كده عن الفن الجميل واختيار الالوان في اللوح وما يعبر عنه كل لون

وانواع الرسومات السرياليه وماشابه ذلك ببساطه

علشان لما نشوف لوحه نفهم فيها شويه

[المدهش]

الموضوع طريف جدااااا وسبق إني عملت عنه تحقيق في جريدة صوت الجامعة التي تصدرها كلية الاعلام بجامعة القاهرة كنوع من التدريب العملي لطلبة قسم الصحافة ..وطبعاً الكتابة على أبواب وجدران دورات المياه بالجامعة أكثر سخونة وأحياناً يحدث حوار بين السادة الطلبة المزنوقين في موضوعات مثل عبد الناصر والاخوان والتيار اليساري ..لدرجة إن حوائط دورات المياه تضيق بها..طبعاً غير محاولات البعض للانتقام بكتابة أرقام تليفونات فتيات وقعن في حبهن ثم قطعن علاقاتهن بهم لأي سبب من الأسباب..وغير الرسوم الاباحية..لكن أعتقد أن هذه الظاهرة خفت كثيراً بعد ازدياد مساحة حرية الصراخ في مصر من خلال الجرائد المستقلة وجرائد المعارضة التي تشتم الحكومة والنظام ليل نهار دون أن يتعرض لها أحد ..وأحييك يا مصرية بالكويت على هذه اللقطة الذكية.

[nancy]

ماشى يا خضر

حارتب موضوع عن اللون تاثيرة النفسى وعجلة الالوان و انواع الفن السريالى والتعبيرى والانطباعى

او بمعنى اشمل انواع المدارس الفنية بس فى باب تانى

غير الحمامات

[cute teen]

الكتاب علا باب الحمام دي في كل مكان

ده حتا في المدراسا

انا بلاقي شعر

تهزيئ مدرسين

ارقام تليفون

emails

و نكات

و رسائل حب

و مش بس في حمامات المدرسا

ده كمان على التربيزات الى في المكتبا

[MIMO]

حرية الفكر والرأي والابداع مكفولة للجميع داخل دورات المياه وقريباً بإذن الله سيأتي اليوم الذي تعبر فيه الجماهير المقهورة عن أرائها خارج دورات المياه (في الطرقة اللي قدام الحمام)

ضاق بنا العيش ولم تحسنوا عليه القيام

عزت السلعة الذليلة حتى بات مسح الحذاء خطبا جساما

وغدا القوت في يد الناس كالياقوت حتى نوى الفقير الصيام

[shawshank]

للرفع ...

والموضوع ده كمان .