ماذ دار بين جيمي وبشبوش في الزيارة الأخيرة

[se_ Elsyed]

مشهد خارجي ... ظلام دامس .... أنوار خافتة مُحيطة بالبيت الأسود .. الفجر بيشقشق .... أصوات خبط ورزع على البوابة الخارجية للبيت الأبيض :

لورا : يا ساتر يارب .. ده مين السمج اللي بيخبط علينا الساعة دي ؟ إصحي يا بوشي شوف في إيه

بوش يهب منزعجاً : إيه .. في إيه ؟ أسامه رجع تاني ؟ البرج .. إوعى البُرج .... ناولوني الشبشب ... إستخبي يا ديك ..

لورا : برج إيه يا راجل ما راح واللي كان كان .. ده باب البيت البراني بيخبط قوم شوف مين .

بوش : أقوم إزاي وأنا بالبيجاما ... قومي إنتي يمكن ماحدش غريب ...

لورا : مين .. مين اللي بيخبط ؟

جيمي : أنا جمال يا طنط

لورا : جمال مين ؟

جيمي : جمال إبن مبارك

لورا : إبن سوزان ؟

جيمي : أيوه يا طنط إفتحي أنا أفأفت من البرد .

لورا : خير يا جمال .. ماما جرا لها حاجة ؟

جيمي : لأ .. ماما بخير والحمد لله ولسه ضاربة مكتبتين الإسبوع اللي فات

لورا : إوعى تكون إتخانقت مع خديجة .. حاكم أنا عارفها هاتعمل عليها ماري منيب ؟

جيمي : يا طنط مافيش حاجة ... أرحمي أهلي ودخليني الأول هاموت من البرد .. وبعد كده إن شالله تبعتيني جوانتانمو يحققوا معايا .

لورا : إدخل يا جمال .. أقعد أتلقح في أوضة المسافرين عبال ما أصحيلك عمك بوش .... فطرت ولا أجيب لك لقمة تشق بها ريقك .

جيمي : لأ الحمد لله أنا أكلت شاندوتشين سدُق في القطر وأنا جاي .... صحي لي أونكل قوام الله يخليكي عشان عايزه في موضع مهم .

يُتبع

[yacho]

يالللللللللللللللللللللللللللللللللللللللللللا بقى .. كمل :)

حتى المحاورات بقى فيها فاصل . ;)

[se_ Elsyed]

يدخل بوش أوضة المسافرين مرتدياً بيجامته الكستور وزعبوطاً من نفس نوعية قماش البيجاما .. مع شبشب حمام أزرق اللون ...

بوش : إيه الشوقه الغريبة دي يا جمال يا إبني ؟ ومالك لابس لبس ولاد الليل ليه كده ومتلثم ؟

جيمي : أسف يا أونكل إني جاي من غير ميعاد .. لكن الموضوع خطير خطير خطير .

بوش : يا ساتر يارب !!!!!! إيه إوعى تقولي الشعب المصري صحي وثار عليك وعلى ابوك ؟

جيمي : بعد الشر يا عمو .. دول نايمين بقى لهم 7 آلاف سنة .. ولا أصحاب الكهف .

بوش : طب حد لغوص لكو في موضوع الإنتخابات وفقس العملية ؟

جيمي: ماحدش يستجرى يا عمو وأديك شايف إحنا بنعمل إيه في القضاة .

بوش : يابني تعبت قلب اللي خلفوني وأنا مش فاضليك .. خش في الموضوع

جيمي : في الحكيكة يا أونكل بوش .. بابا صحي من النوم من إسبوعين كده ووشه كان أصفر وجسمه بينتفض وفضل ينده ويقول " هاتوا لي جمال .. انا عايز جمال " .. المهم سيبت خطيبتي وجتله جري لقيته بيقولي :

(مشهد داخلي ... نهار ما طلعلوش شمس ... الكاميرا تقترب من غرفة النوم الرئيسية في قصر العروبة ... وتحديداً يتركز المشهد على السرير الملكي )

مبارك : شد لك كرسي و أقعد يا جمال أنا عايزك في موضوع خطير ... النهاردة إيه ؟

جيمي : 4 مايو يا بابا ..

مبارك : وده معناه إيه ؟

جيمي : معناه إن الموظفين قبضوا مرتباتهم من 3 أيام يا بابي

مبارك : موظفين .. مرتبات ؟ إنت هاتنضف مخك معايا ولا أخلى عيشتك سودا ؟

جيمي : بالراحة عليه .... صحتك يا حاج .. حاضر هانضف

مبارك : يابني النهاردة عيد ميلاد اللي جابك .. وأنا كملت النهاردة 78 سنة .

جيمي : والله ؟ كل سنة وإنت طيب يا حاج ... عن إذنك أوصل لحد " لا بالما " أضرب دستتين جاتوه على طورطايه و78 شمعه وأجي حمامه .

مبارك : تصدق بالله لو قاطعتني وإتكلمت في الهجايص دي تاني أنا هاقطع خلفك .... يا جمال يا إبني أنا حاسس إن يالله حُسن الختام ... وبالمختصر المفيد أنا عايز أقلوظ لك الكُرسي قبل ما أفلسع .

جيمي : بعد الشر عنك ... ده لو حصل ده أنا أموت نفسي وراك يا حاج .

مبارك : تموت نفسك ؟ طب ومصر ؟ والمصريين دول مين يشكمهم يا جمال ؟

جيمي : آه صح ... طب إتكل عالله إنت يا حاج وأنا هابقى أحصلك ..

مبارك : عشان كده انا عايز تتخفى وتتكتم وفي منتهى السرية تروح لعمك بوش وتبوس إيده وتقوله " أبويا بيسلم عليك وبيقولك .. إمتى هايتم المُراد يا جميل .. إحنا طالبين الرضا والسماح "

جيمي : إيه دا دا يا بابا ؟... بس أنا بأحب خديجة وإنت عارف .. وهاكتب عليها بعد موسم القُطن اللي جاي ؟

مبارك : اللهم طولك يا روح ... خديجة إيه وقطن إيه يابني حرام عليك هاتموتني ناقص عمر .. مين جاب سيرة خديجة ولا الجواز دلوقت ؟

جيمي : مش إنت بتقولي روح أطلب إيد بنت عمك بوش ؟

مبارك : أنا قلت كده يا رئيس المستقبل .. يا فلته عصرك وآوانك ؟.. يابني أدم أنا بأقولك روح إستسمح عمك وأطلب منه يساعدك في القعاد على الكُرسي ...

جيمي : يا حبيبي يا بابي ... والله هاتوحشني لما تروح .. وهاتوحشني أفكارك البرلنتية ... وتفتكر يا بابا أونكل بوش هايوافق ؟

مبارك : ربنا يهدية .. إحنا بس نرمي بياضنا ونشوف طلباته إيه ؟

-------

جيمي : عشان كده يا عمو أنا جيت لك النهاردة وطالب الرضا والسماح

بوش : في الحقيقة إنت فاجئتني بطلبك ده .. وبعدين " جينا " لسه صغيرة وما بتفكرش في الجواز دلوقت ..

جيمي : الحمد لله .. يعني مش أنا بس اللي بأفهم بالشقلوب ..

بوش : قصدك إيه ؟

جيمي : لأ ما فيش حاجة .. ده أنا فتكرت موقف كده حصل بيني وبين بابي ... يا عمي أنا مش قصدي الجواز من سليلة الحسب والنسب .. أنا بأقصد إني طالب الرضا والسماح عشان أقعد وأترستق على الكُرسي وأدلدل رجلي ؟

بوش : آه قلت لي ... طب إستناني أما أضرب واحد كابتشينو عشان أفوقلك إنت وابوك ..

يُتبع ...

مش بوش في الحقيقة اللي هايضرب القهوة .. ولكنه المؤلف ... نلتقي بعد القهوة

[nancy]

دة بوش بس ساكن تحت الربع :)

كمل ومتتاخرش لحسن الموضوع حلو اوى ومشوك جدا

[زعلان]

;) استمر استمر

:) بس هو مين الي حيتقلوظ بالضبط

ومين الي حيخبط بنت بوش

[سهيلة]

واللة يا سى السيد انت ما حصلتش

كمللللللللللل

الحكاية سخنت اوى

سى السيد انت روحت تشرب قهوة ف البرازيل ولا اية؟؟؟؟

[ابن بلد]

القهوه لسه مخلصتش

كمل يا عم

يالا

شكلى كده

هعمل معاك شغل مسرح بجد

[واحد تاني]

يا جماعة سي السيد....

محتاج دعواتكم !

لانه حاليا في ال....

Centeral Intelligence Agency

او فى لاظوغلي :)

يجيبك بالسلامة يابني

[se_ Elsyed]

عُدنا

تريليم ليم ليم ( موسيقى تصويرية )

----------------

بوش : قلت لي بقى أبوك بعتك ليه ؟

جيمي : بابي بيسلم عليك وبيقولك قلوظ لي الكُرسي .

بوش : لأ إستأنا عليه أما أندهلك خالتك أم سلحول ..

جيمي : طب وإيه لزمة طنط لورا في الموضوع الرجالي ده ؟

بوش : لورا مين .. يخرب بيت عقلك وطي صوتك أحسن تسمعك من المطبخ ... أم سحلول ده الإسم الحركي لخالتك كوندي .

جيمي : آه .. وماله بس بسرعة يا أونكل أحسن عايز اروح قبل الدُنيا ما تضلم وكمان عشان سايب خديجة في جنينة المريلاند لوحدها .

بوش : يا عبدو .. يا عبدو ...

عبدو : أوامرك يا افندينا .

بوش : إدي ميسد كوول لكوندليزا خليها تيجي بالعجل .

عبدو : بس يا أفندينا الدنيا لسه الفجر وممكن تكون نايمه .. وحتى لو صحيت وجت بسرعة فمش هاتلحق تغسل وشها .. وده في خطر علينا .

بوش : يا سيدي ما بتفرقش كثير .. إندها وخليها تيجي والسلام .

-----

وتأتي كوندي مهرولةً وتدخل أوضة المسافرين على بوش وجيمي ..

كوندليزا وهي تتثاءب : صباح الخير يا مستر بريزيدانت .... مين جيمي إبن سوزان ... إزيك يا ولا وإزي أمك ؟

جيمي : كويس .. وماما بتسلم عليكي يا طنط وبعته لك معايا حتة قماش قطيفة تنفع ميكروجيب .

كوندي : ميرسي خالص يا جيمي ماكنش له لزوم .. وإبقى سلم على ماما .

بوش : جيمي يا ستي جاي وجايب معاه رسالة من والده بيقولي فيها أقلوظ له الكرسي

كوندي : وماله يا مستر بريزيدانت .. بس كله بثمنه

جيمي : وأنا رقبتي سداده يا طنط كوندي .. ومستعد دلوقت أكتب لكو أي حتة في مصر بيع وشرا .. من أول توشكى لحد شرم الشيخ بتاعت بابا .

بوش : إحنا ناس مش بتاعت فلوس يا جيمي وابوك عارف كده كويس .. إشرحي له أكثر يا كوندي .

كوندي : بص يا جيمي .. إحنا لازم نعملك الأول كام إختبار على كام تحليل حاجة كده زي كشف الهيئة عندكو .. ونشوفك تنفع ولا لأ ..

جيمي : أنا متأكد من نفسي يا طنط وصحتي عال العال وأفوت في الحيطه وأعدي البحر ولا أتبلش .

كوندي : عال عال ... نخش على أول سؤال .... س : ما هو موقفك من الدولة القطقوطة الأمورة إسرائيل في حالتك قلوظت الكرسي لك؟

جيمي : ج : بسم الله الرحمن الرحيم .. إسرائيل بالنسبة لي دولة مُسالمة .. وعيال بتوع سلام من أول أونكل بن جوروين مروراً بتيته جولدا وصولاً إلى عمي الحاج شارون ربنا ياخد بيده ويقومه لنا بالسلامه ونهايةً بأونكل إيهود أولمرت اللي هو حبيبي وإبن حبيبي وباب بيعزه معزة الأخ لأخوة .

كوندي : يخرب عقلك إنت بتجيب الكلام ده منين ... صحيح يا ولاد - وقالت ولاد بالإنجليزي يعني بويز - اللي خلف مامتش ..... السؤال التاني : ما هي علاقتك ببشار الأسد ؟

جيمي : ولا أعرفه .. ده راجل بتاع مشاكل زي أبوه .. وبابا قال لي : يا جيمي يابني مالكش دعوة بالأشرار ...

كوندي : ج : ما هو موقفك من مشكلة العراق ؟

جيمي : دي مشاكل عائلية بناتهم وهايصفوه .. سونر أور ليتر .

كوندي : ما هو موقفك من المعارضة المصرية الداخلية وخصوصاً الإخوان المسلمين ؟

جيمي : إحنا دولة مؤسسات - أحداث - ونحن سائرون قُدماً في مسيرة الإصلاح .. واللي ماربهوش أهله تربيه المعتقلات .

كوندي " والله الولا ييجي منه يا مستر بريزيدانت ... السؤال الأخير وده من عشر درجات ... ما هو موقفك من خلفة العيال ؟

جيمي : حضرتك أنا من إيدك دي لإيدك دي .. عايزاني أخد برشام منع الحمل من أول يوم .. ماشي .. أشيل الرحم خالص .. أوكي .... أنا جاهز

كوندي : يابني مش قصدي .. أنا أقصد إيه نظام التوريث بالنسبة لك ؟

جيمي : حضرتك يا طنط أنا أتفقت مع خديجة إننا نشد حيلنا في الكام سنة الأولانيين ونضرب 3 أو 4 عيال أول سنة .. بحيث لما أدقدق شوية في الحُكم يكونوا كبروا وحد يمسك بدالي وسلمني نضيف أسلمك نضيف .

بوش : أنا مبسوط منك يا جيمي ... خلاص تقدر تروح دلوقت وقول لبابا عمو بوش بيقولك " مبروك يابو الريس " إنت راجع إمتى ؟

جيمي : حضرتك أنا حاجز في ديزل الساعة 12 .. يعني يادوب ألحق .... وخلي بالكم إنتوا معزومين على فرحي الشهر الجاي ... وياريت تجيب طنط لورا معاك يا أونكل وقولها نانسي وشعبولا هاييحيوا الليلة .

وهنا تدوي زغاريط الفرح في أرجاء البيت الأبيض.

تمت

[nancy]

الله :huh: يعنى انا معزومة حاحجز الطيارة هوا :wub:

يادوبك استعد فى شهر وحتى اكلم زعبولا (س س الاسم الحركى ينزل معايا)

[صبح]

تمام يا جيمى

تمت القلوظة

اقعد وجرب .......

من موقع مصراوى

http://www.masrawy.com/News/2006/Egypt/Pol...y/22/fdqam.aspx

شرم الشيخ - وصف روبرت زوليك، نائب وزيرة الخارجية الأميركية، جمال مبارك، الأمين العام المساعد للسياسات في الحزب الوطني الديمقراطي ، بأنه شخصية مميزة ويقود تيارا إصلاحيا في الحزب الوطني ، كما أنه شخصية مساعدة في عملية الإصلاح بمصر

وقال زوليك الذي كان يتحدث في لقاء جانبي مع عدد محدود من الصحفيين على هامش منتدى دافوس المنعقد حاليا بمنتجع شرم الشيخ المصري على البحر الأحمر إننا نناقش ملف الإصلاح مع جمال مبارك حسبما ذكرت جريدة الشرق الأوسط

وردا على سؤال حول زيارة جمال مبارك الأخيرة إلى واشنطن وما إذا كانت لهذه الزيارة علاقة بملف توريث الحكم في مصر، قال زوليك واضح أن جمال مبارك حساس للغاية وهو يحاول أن يوضح للجميع مفهوم الإصلاح ونحن نتعرف منه على الجهود التي تبذلها مصر في عملية الإصلاح السياسي نظرا لأنه الأكثر فهما بين أعضاء الحزب

وأضاف اننا نستطيع القول إنه شخصية مميزة مساعدة في عملية الإصلاح على عكس الآخرين التقليديين بالحزب الوطني»، على حد تعبيره.

وأشار زوليك إلى أنه التقى جمال مبارك على هامش المنتدى وناقش معه العديد من المحاور، موضحا أن مبارك الابن شرح له خطوات الحزب الوطني بشأن الإصلاح والتعديلات التشريعية التي تعتزم الحكومة إدخالها على القوانين المصرية في المرحلة المقبلة.

وأضاف المسؤول الأميركي أن جمال مبارك شرح له أسباب تمديد العمل بقانون الطوارئ، مؤكدا أن الحكومة رأت استمرار العمل بالقانون حتى يصدر قانون مكافحة الإرهاب، مؤكدا أن مبارك الابن أقنعه بأسباب تمديد العمل بقانون الطوارئ، ووفقا لما شرحه فان الدليل على ما قاله سيظهر في المستقبل من خلال التصرفات الحقيقية للحكومة.

وحول قضية أيمن نور رئيس حزب الغد المسجون حاليا تنفيذا لحكم قضائي أيدته محكمة النقض الأسبوع الماضي بسجنه 5 سنوات في قضية تزوير توكيلات مؤسسي حزبه، قال زوليك إن سجن أيمن نور كان خطأ من البداية وليس منذ صدور الحكم الأخير عليه وكذلك تعامل السلطات المصرية مع المتظاهرين.

وأردف المسؤول الأميركي قائلا رغم ذلك فإنه يرى أن السنوات الخمس الأخيرة شهدت تغيرات سياسية وإننا إذا نظرنا سنلاحظ درجة التغيير في كافة المجالات السياسية والاقتصادية ليس في مصر وحدها بل في جميع أنحاء العالم العربي

وأضاف أن هذا التحول أدى إلى نمو الحركات الإسلامية في المنطقة، مشيرا إلى أن هذه الحركات لها أشكال مختلفة منها الراديكالية مثل الزرقاوي ومنها المعتدلة، وقال إن هناك خوفا داخل المنطقة من نمو الحركات الإسلامية.

وحول موقف الولايات المتحدة من جماعة الإخوان المسلمين بمصر وهل تصنفها ضمن الحركات الراديكالية أم المعتدلة؟ قال زوليك إن هذا يرتبط بمدى التزامها بالإصلاح السياسي ورفضها للعنف، موضحا أن موضوع الحركات الإسلامية يرتبط بتاريخ التحرك من القومية العربية إلى الاشتراكية فكان من الطبيعي نمو الحركات الإسلامية كنوع من المعارضة.

وأكد زوليك أن عملية الإصلاح والتغيير لا بد أن تنبع من داخل المنطقة، مشيرا إلى أن برنامج الرئيس مبارك الانتخابي كان جيدا وكانت تعديلاته الدستورية مفاجئة للجميع ومع الوقت سنرى كيف تنفذ الحكومة وعود مبارك.

وأكد أن هناك جدلا متزايدا داخل الكونغرس الأميركي حول المساعدات المقدمة لمصر بسبب بطء خطوات الإصلاح السياسي وعلى المصريين تفسير ما يحدث وتوضيح وجهتهم وأهدافهم من عملية الإصلاح.

[Horus]

http://www.imbh.net/cms/news.php?newsid=fmbh51153356354

أمسك !!

إقتباس

تم تعديل 26 يوليو 2006 بواسطة Horus

[se_ Elsyed]

للرفع

عشان في حاجات بتتسرق والواحد مش واخد باله :)

[أبو زياد]

ما عاش اللى يسرقك يا عمو

انت ماوراكش رجالة والا ايه :)

كلنا وراك يا ريث :D

عالعموم الحق بيدور على صاحبه وماتخافش