الخريطة الظاهرة لمدينة القاهرة

[Cleo]

انتظروا فى هذا الموضوع معلومات عن أجمل الأماكن السياحية فى القاهرة... مصر... أم الدنيا :blush:

أبتدى منين؟؟؟ ولا منين ولا منين ولا منين :wub: ؟

طيب... نبتدى إن القاهرة هى مدينة كافة الثقافات وكافة المستويات المادية والاجتماعية...

تلاقى حى بولاق الشعبى كان بيربطه بحى الزمالك الأرستقراطى حتى عهد قريب جدا كوبرى أبو العلا الله يرحمه...

تلاقى البواخر النيلية بتمر على الجزر النيلية بعششها الفقيرة...

تلاقى البواخر الخمس نجوم عايمة فى النيل بجوار زوارق شعبية....

تنطبق على القاهرة عبارة "أأمر يا باشا كله موجود"...

- يتبع -

[se_ Elsyed]

شكراً للعزيزة كيداهم الشهيرة بـ " كليو "

بصي يا كليو عايزك تقسمي وتعزفي من أول السلم .. وواحده واحده

يعني ممكن نرد على الإخوة الأشقاء في الدولة المجاورة " الإسكندرية " بشكل إحترافي بعيداً عن التشنُج والعصبية القبلية

بمعنى

قسمي لي القاهرة حتت حتت ( مع التوضيح برسوم بيانية وبريزينتيشانات بالباور بوينت والثري دي لتلك الأماكن )

يعني القاهرة القديمة ( الفسطاط ، السيدة زينب ، الحُسين ، القلعة ، المغربلين ، النحاسين ، الحلمية ولياليها ، تحت الربع فوق الربع ، ... إلخ )

القاهرة الجديدة يعني المولات يعني التسوق يعني الشراء والبيع على حق ربنا يعني السينيمات ...

أماكن الترفيه وعِدي بقى الملاهي وإبدئي بمكاني المفضل دريم بارك وإحودي على ماجيك لاند وبعدين خدي الدايري وأخرجي من عند سوق العبور هاتلاقي جيرو لاند على كل اللاندات اللي ممكن تدوسي عليها ... بعد ما تخلصي ده كله تقومي نطه على الجناين بقى الميرلاند ، الحديقة الدولية وحديقة الأزهر ( المقر السري الدائم لإجتماعات المحاوراتييون ) إلخ

طبعاً بعد الإبحار في أغوار تلك المناطق هانجوع ولازم ناكل لقمه تسند قلبنا ... عيشي بقى مع المطاعم بالتفصيل وقوائم الإسعار حسب التسعيرة الجبرية من مقام الحكومة المصرية ... من أول دليل الرمرمة للمؤرخ العلامه والفاهم الفهامة والراحل الرحالة طفشان بن هربان إلى الأماكن الكلاس الحراقه

وماتنسيش برضوا المكان اللي هانريح فيه جتتنا أخر النهار بعد اللف والدوران .. يعني شوية فنادق كده على ذوقك من أول الكلوب الحُسيني لحد الفور سيزون اللي روحته السنة اللي فاتت وإتعقدت في حياتي من فخامته وموقعه الرائع ...

أنا معاكي يا كليو ما تخافيش وأي قاهري مش هايشارك في الموضوع ده هايُحرم من الدخول إلى المحاورات لمدة 3 أسابيع حتى لو كان أ / عادل أبو زيد نفسه بصفته عمدة مدينة نصر وشارع مكرم عبيد ...

ومرحباً في هذا الموضوع برجال مدينة 6 أكتوبر البواسل .. أبطال العبور وحرب الكرامة .. وعلى رأسهم السيد اللواء متقاعد أحمد محمود ( بن مصر ) والشاويش الركن عصام شوقي ( إسو سابقاً )

وأهلاً وسهلاً بشركاء الوطن .. ابناء الجيزة .. ذوي النفوس العزيزة .. والروح اللذيذة

وعاش تحالف القاهريين على الإكتوبريين مع الجيزاويين ...

عايزين نوري الإسكندرانية إحنا مين يا رجاله

( إحنا هدفنا الإصلاح وتهدئة النفوس الملتهبة )

[واحد تاني]

الموضوع ده (DOMESTIC) ؟

والا لو حد اسكندراني (لمض) شاف حته على الخريطة بتاعتكم منسية ممكن يعمل الواجب ويرجع يتعشى فى اسكندرية؟

[se_ Elsyed]

الموضوع ده (DOMESTIC) ؟

والا لو حد اسكندراني (لمض) شاف حته على الخريطة بتاعتكم منسية ممكن يعمل الواجب ويرجع يتعشى فى اسكندرية؟

رابطة مُحبي قاهرت المعز لدين الفاطمي تُرحب بجميع الزوار من كل شكل ولون

مش مهم جنسيتك

مش مهم لونك

مش مهم أي حاجة

المهم لو حبيتنا نحبك

ولو طرطشتنا بالميه .. نطرطشك بالكريم شانتيه

وعلى رأي المثل

من حبنا حبيناه وسار متعنا متاعه .. ومن كرهنا كرهناه ومش فاكر الباقي

[واحد تاني]

تحيا مصر ... تحيا مصر :rolleyes:

(شكلي هصيف عندهم هنا mfb: ... موضوع اسكندرية قلب على حواوشي خالص :wub: )

[Cleo]

بالفصل الأول

بنات وسط البلد

تصحى الصبح عشان تاخد لفة فى وسط البلد...

تروح دوغرى على فلفلة فى شارع قصر النيل.. تاخد سندوتشين فول طعمية عالواقف وتحبس بكباية شاى..تلف شوية فى شارع قصر النيل وتتفرج على العمارات القديمة ذات الطابع الفنى القديم منها الأوروبى والإسلامى... الشارع على الجانبين كله تقريبا محلات ملابس حريمى... .....وفيه فى نصه بالظبط مجموعة محلات أقمشة للتفصيل أحسنهم على الإطلاق محل "بوردا" ولو انه غالى حبتين بس أقمشته هايلة وشيك جدا...

قبل ما توصل ميدان مصطفى كامل على ايدك الشمال هتلاقى محل أحمد عطية ممكن تدخل تضرب طبق بسبوسة بالقشطة ويمكن تشوف الفنان رأفت فهيم هناك لأنه زبون المحل ده..

لو ما حبيتش تاكل بسبوسة فى أحمد عطية يبقى عليك وعلى العبد فى شارع طلعت حرب (سليمان باشا سابقا)... أحلى بلح الشام وكحك ممكن تدوقهم....بعدها تعدى على محل عصير سليمان باشا تبلع اللى أكلته ده كله بكباية عصير قصب.

وطبعا ماتنساش وانت واقف فى ميدان سليمان باشا تعدى على مكتبة مدبولى أشهر معالم الميدان ويمكن أشر حتى من تمثال طلعت حرب نفسه...

لو دخل عليك وقت الغدا وحبيت تتغدا غدوة نظيفة مش مكلفة يبقى عليك وعلى ميدان التحرير جنب مجمع التحرير هتلاقى سلسلة المطاعم الأمريكية كنتاكى وهارديز وماكدونالدز.. ولو انت مقاطع زى حالاتى، يبقى عليك وعلى شارع شريف، فيه هناك محل اسمه "فيليه" بيعمل وجبات مش بطاله والمحل نفسه نظيف جدا من الداخل. المحل ده وانت قاعد فيه تقدر تشوف يافطة عيادة الدكتور "عادل صادق" الله يرحمه :blink:

يتبع...

[ATHENA]

تسجيل متابعة لأجدع قاهرية و اجمل وصف لشوارع القاهرة..حاجه كده تخليك تحس انك ماشي في الشوارع دي و حاسس بيها و كمان شامم ريحة الاكل من المطاعم :blink:

كملي يا كوكو

[hopsan]

و بعدين؟؟؟؟؟ ...يعنى بقالكو تلات اربع ايام و انتم لسه فى 6 مداخلات ....و كنت بقول العالم دى لما حتفتح فى موضوع القاهره حلاقى السيول تنهمر و آلات التكرز مش ملاحقه و الدنيا كلها بتكتب ..و اتاريكم نايمين فى العسل و لا حد بيكتب و عمنا سى السيد معتمد على كليو و كليو مش عارفه تكتب بناتى و لا تدخل منين ...و الباقى واقف يتفرج و بس باعتين يشكرو فبعض و خلاص على كده.. مفيش تنظيم ..مششكرين يا عم

آدى يا عم سى السيد اللى انت كنت بتقول عليهم ...استنى افتكرلك الجمله اللى كنت بتتشدق بيها..ايوه ..ايهه

( عايزين نوري الإسكندرانية إحنا مين يا رجاله ) ..شفت جبتهالك من جوه خالص ...احنا شفنا و عرفنا و فهمنا كمان...... سبنا احنا نقولك على مصر و اللى فيها و على جنب شويه علشان النفس

تعالى اتفرج على الموضوع بتاع اسكندريه و اللى انت فتحته شوف وصل لكام مشاركه ..اللهم لا حسد و خمسه فى عين اللى ميصلى على النبى و العدد فى اللمون على قوله جيرانا بتوع كفر الدوار

المهم لو عايزنى املالك الصفحه بس ابعتلى الواد حسونه حيلاقينى قاعد جنب القهوه فاتح النصبه بتاعتى

[سيزيف]

عزيزى س0س

محسوبك برضه ف القاهره له صولات و جولات

ماهو انا اصلا خريج حقوق القاهره

يعنى عشت فيها اربع سنين بالتمام و الكمال

القاهره المدينه النى لا تنام

كل مايخطر - او لا يخطر على بالك - من فسح و سهرات

المطاعم ماتعدش

الفنادق لا يمكن احصائها

الخدمه توينتى فور سيفين

و مصر القديمه لها سحر خاص ليس كل الناس بقادرين على تذوقه

يا سلام على الحسين ف ليله خميس ف شهر رمضان

هو طبعا زحمه مووووووووووت

ولكن كوكتيل غريب من الناس

ولاد الذوات و ولاد البلد

المثقفين و اشخاص مابيعرفوش يفكوا الخط

المقاهى عليها مجموعات من الطلبه يتنافسون فى مساجلات غنائيه ضاحكه

و طبعا لو رحت الحسين مايفوتكش الحمام المحشى بتاع فرحات

و لو حضرتك من هواه الكوارع و الفشه و الكرشه و خلافه عليك و ع العهد الجديد

هواه الساندوتشات برضه لهم مكان ف مصر القديمه بس مش ف الحسين

انما ف الحسينيه عند بوابه الفتوح حيث زيزو النتن - على فكره هوه اسمه كده - و بابا عبده

عشاق الكباب و الكفته و المشويات

قائمه طويله جدا من المحلات ربما يكون ابرزها ابو شقره بالقصر العينى و الميرغنى و المهندسين و ابورامى بالمدبح - المكان مش شيك قوى بس الاكل يجنن - و شاكر بمصر الجديده

شارع جامعه الدول بالمهندسين

الشارع المزدحم دائما

وخاصه باخواننا العرب ف الصيف

و اذا ذهبت الى جامعه مايفوتكش تضرب عصير من فرغلى

حديقه الحيوان بالجيزه لا تزال فسحه العديد من الناس الاغنياء و الفقراء

اما جنينه الاورمان و جنينه الميريلاند فلا تزالان قبله العشاق و الحبيبه

تمتما مثل كورنيش النيل - خاصه شارع البحر الاعظم بالجيزه - الذى يمكنك ان تشاهد عشرات الكوبلز فى حاله متصله من الرومانسيه لا يعكر صفوها سوى الباعه المتجولين اللى لازك هيبيعولك اى حاجه بالاكراه والا مش هتعرف تحب ف يومك

اما على صفحه النيل عشرات مت البواخر العائمه التى يقصدها عشاق السهر و الفرفشه - بشرط انك تقدر على تكاليفها - والموضه حاليا مطاعم الاكل الصينى مثل مطعم اسيا على الباخره البلونايل على كورنيش الزمالك وهى قبله الفنانين و المشاهير

مصر الجديده

وما ادراك ما مصر الجديده

لا تزال المنطقه الراقيه تحتفظ ببعض طابعها الجميل

فعندما تشاهد العمارات المبنيه على الطراز الرومانى او اليونانى فى ميدان سفير و الكوربه

لابد ان تتذكر البارون امبان الاب الروحى لضاحيه مصر الجديده

و من مصر الجديده الى مدينه مصر

معقل المولات

جنينه و السراج و اخيرا و ليس اخرا سيتى ستارز

باختصار

الفسحه فى مصر ليس لها حدود

-----------

بس بينى و بينك يا سى السيد

على الرغم من الفارق الضخم بين القاهره و الاسكندريه فى المساحه و الامكانيات

يظل للاسكندريه سحرها الخاص بها

الذى لا يعرف سره الا من عاش فيها

[se_ Elsyed]

لو ما حبيتش تاكل بسبوسة فى أحمد عطية يبقى عليك وعلى العبد فى شارع طلعت حرب (سليمان باشا سابقا)... أحلى بلح الشام وكحك ممكن تدوقهم....

لأ كده أزعل منك يا كوكا طالما أغفلتي أو تناسيتي الأيس كريم الخزعبلي اللي عند العبد ... ده أساسي

لو عملت ريفيرس بقى بضهرك لحد شارع 26 يوليو وبصيت على الناصية التانية هالتاقي في ضهرها مُجمع مطاعم وقهاوي وحتة كده لها طابع مُميز للمشاة فقط .... وكُل براحتك .. ليك في الفتة ولحمة الراس والحاجت دي .. هاتلاقي ... عايز فراخ مشوية وكبدة بانيه برضوا هاتلاقي .. ولو كنت مُدمن حواوشي زي حالاتي يبقى عليك وعلى " شلبي " اللي متخصص في الحواوشي فقط وتاكل رغيفبـ 3 جنيه مع واحد " سبورت " أموت وأعرف هو مقاطع المنتجات التانية دي ليه ؟ وجنبه برضوا محل كشري لو عايز تنام خفيف ... ولو مالكش في ده كله يبقى هاتلاقي هناك فول وفلافل " أخر ساعه " برضوا هاتضرب ساندوتشات على الواقف من الزحمه الجامدة اللي هناك ...

شبعت وخلصت أكل إرجع بنفس الريفيرس لنفس المنطشقة اللي كنت فيها ... ولو كنت ساعتها معاك يمامه وعايز تتمنظر وتعمل فيها عبد الحميد حافظ يبقى هاتلاقي في أول سليمان باشا على اليمين كافيتريا " الأمريكيين " إدخل إضرب واحد شاي كومبليه مع حتة جاتوه مقدده ومتاكله قبل كده ... على فكرة ما بقاش مستواه كده كده من فترة وفقد مصداقيته ومستواه .

-------

العزيز الرُكن المضيء ... لو قرأت شروط العضوية في هذا الموضوع هاتلاقي من أهمها " ممنوع الكروته "

يعني عايز تلففني القاهرة قديمة وجديدة ومولات في صفحة .. ما ينفعش

إتبحبح في الكلام وخد راحتك وما تشميتش فينا العدا ( اللي إنت عارفهم )

[واحد تاني]

:rolleyes: <_< :ph34r:

[Tafshan]

بالفصل الأول

بنات وسط البلد

تصحى الصبح عشان تاخد لفة فى وسط البلد...

تروح دوغرى على فلفلة فى شارع قصر النيل.. تاخد سندوتشين فول طعمية عالواقف وتحبس بكباية شاى..تلف شوية فى شارع قصر النيل وتتفرج على العمارات القديمة ذات الطابع الفنى القديم منها الأوروبى والإسلامى... الشارع على الجانبين كله تقريبا محلات ملابس حريمى... .....وفيه فى نصه بالظبط مجموعة محلات أقمشة للتفصيل أحسنهم على الإطلاق محل "بوردا" ولو انه غالى حبتين بس أقمشته هايلة وشيك جدا...

قبل ما توصل ميدان مصطفى كامل على ايدك الشمال هتلاقى محل أحمد عطية ممكن تدخل تضرب طبق بسبوسة بالقشطة ويمكن تشوف الفنان رأفت فهيم هناك لأنه زبون المحل ده..

لو ما حبيتش تاكل بسبوسة فى أحمد عطية يبقى عليك وعلى العبد فى شارع طلعت حرب (سليمان باشا سابقا)... أحلى بلح الشام وكحك ممكن تدوقهم....بعدها تعدى على محل عصير سليمان باشا تبلع اللى أكلته ده كله بكباية عصير قصب.

وطبعا ماتنساش وانت واقف فى ميدان سليمان باشا تعدى على مكتبة مدبولى أشهر معالم الميدان ويمكن أشر حتى من تمثال طلعت حرب نفسه...

لو دخل عليك وقت الغدا وحبيت تتغدا غدوة نظيفة مش مكلفة يبقى عليك وعلى ميدان التحرير جنب مجمع التحرير هتلاقى سلسلة المطاعم الأمريكية كنتاكى وهارديز وماكدونالدز.. ولو انت مقاطع زى حالاتى، يبقى عليك وعلى شارع شريف، فيه هناك محل اسمه "فيليه" بيعمل وجبات مش بطاله والمحل نفسه نظيف جدا من الداخل. المحل ده وانت قاعد فيه تقدر تشوف يافطة عيادة الدكتور "عادل صادق" الله يرحمه :rolleyes:

يتبع...

في انتظار المزيد

تم تعديل 30 مايو 2006 بواسطة Tafshan

[Cleo]

تسجيل متابعة لأجدع قاهرية و اجمل وصف لشوارع القاهرة..حاجه كده تخليك تحس انك ماشي في الشوارع دي و حاسس بيها و كمان شامم ريحة الاكل من المطاعم :rolleyes:

كملي يا كوكو

ربنا يكرمك ويرفع معنوياتك يا أثينا يا بنتى.. كدة تخلينى أفكر أعمل كتاب "الخطط الكليوهية" زى الخطط المقريزية كدة :sad:

و بعدين؟؟؟؟؟ ...يعنى بقالكو تلات اربع ايام و انتم لسه فى 6 مداخلات ....و كنت بقول العالم دى لما حتفتح فى موضوع القاهره حلاقى السيول تنهمر و آلات التكرز مش ملاحقه و الدنيا كلها بتكتب ..و اتاريكم نايمين فى العسل و لا حد بيكتب و عمنا سى السيد معتمد على كليو و كليو مش عارفه تكتب بناتى و لا تدخل منين ...و الباقى واقف يتفرج و بس باعتين يشكرو فبعض و خلاص على كده.. مفيش تنظيم ..مششكرين يا عم

آدى يا عم سى السيد اللى انت كنت بتقول عليهم ...استنى افتكرلك الجمله اللى كنت بتتشدق بيها..ايوه ..ايهه

( عايزين نوري الإسكندرانية إحنا مين يا رجاله ) ..شفت جبتهالك من جوه خالص ...احنا شفنا و عرفنا و فهمنا كمان...... سبنا احنا نقولك على مصر و اللى فيها و على جنب شويه علشان النفس

تعالى اتفرج على الموضوع بتاع اسكندريه و اللى انت فتحته شوف وصل لكام مشاركه ..اللهم لا حسد و خمسه فى عين اللى ميصلى على النبى و العدد فى اللمون على قوله جيرانا بتوع كفر الدوار

المهم لو عايزنى املالك الصفحه بس ابعتلى الواد حسونه حيلاقينى قاعد جنب القهوه فاتح النصبه بتاعتى

يا هوبسان يا إبنى إحنا هنا بنتكلم عن القاهرة.. القااااااااااااااهرة... يعنى حاجة كدة تمتد من 6 أكتوبر غربا لحد حدود السويس شرقا... مش حاجة كدة تتلف فى ربع رغيف وتشرب وراها كباية مية زى اسكندرية B)

القاهره المدينه النى لا تنام

كل مايخطر - او لا يخطر على بالك - من فسح و سهرات

المطاعم ماتعدش

الفنادق لا يمكن احصائها

الخدمه توينتى فور سيفين

شاينر انت كدة لخصت القاهرة كلها فى كلمتين ... فعلا أصبح أى وصف بعد كدة تحصيل حاصل مالوش لزمة mfb:

بس بينى و بينك يا سى السيد

على الرغم من الفارق الضخم بين القاهره و الاسكندريه فى المساحه و الامكانيات

يظل للاسكندريه سحرها الخاص بها

الذى لا يعرف سره الا من عاش فيها

الفرق بين الاسكندرية والقاهرة هو الفرق بين محل العمل ومحل الراحة و الاسترخاء.. القاهرة الأعصاب فيها مشدودة والكل بيجرى لأن القاهرة مزدحمة بأهلها وضيوفها وأيضا لأن أغلب فرص العمل فى مصر مركزة فيها.. ففيها وافدين كتير من المحافظات المختلفة بييجوا عشان الوظيفة ويرجعوا محافظاتهم فى نهاية الأسبوع.. عشان كدة أهل القاهرة لما بيحبوا يستجموا بيخرجوا منها، وأهل المحافظات لما بيحبوا يدوروا على لقمة العيش بييجوا القاهرة :P

<_< :ph34r: :blink:

ياعم واحد ماتزعلش... احنا مصريين.. يعنى استحالة نتكلم عن الفسحة والخروج من غير ما نتكلم عن محلات الأكل والحواوشى :D

[Cleo]

تابع الفصل الأول

بنات وسط البلد

لو انت جاى وسط البلد من الشرق (مصر الجديدة ومدينة نصر) أفضل وأسرع طريق هو عن طريق نفق الأزهر اللى ياخدك من أول الدراسة من عند مشيخة الأزهر تفضل ماشى فى الأنبوبة المتعرجة ذات الضوء الاصطناعى المنخفض.. لحد ما يبتدى نستوى الأرض فى الارتفاح وتلاقى نور مبهر بيزغلل عينيك وفجأة تلاقى نفسك فى ميدان الأوبرا...

ميدان واسع جدا وأول حاجة هيقع عليها نظظرك المبنى القديم المتهالك لفندق الانتركونتننتال التاريخى (القديم مش سميراميس اللى على الكورنيش). لو بصيت على يمينك هتلاقى تمثال عظيم فى وسط حديقة مستديرة لإبراهيم باشا وهو راكب حصانه وبيشاور بصباعه (عشان كدة الناس سمت التمثال ده إبراهيم باشا أبو أصبع).. لو بصيت كويس على مكان ما بيشاور ابراهيم باشا هتلاقيه بيشاور على شارع عدلى.. طبعا مش هتقدر تكسر كلام الباشا mfb: وهتدخل فى شارع عدلى (او انت لسة فى مطلع النفق يبقى كل اللى عليك انك تمشى طوالى تلاقيك فى شارع عدلى)

شارع عدلى من أنظف شوارع وسط القاهرة وأكثرها نظاما (طبعا الركنة هناك لعنة فأحسنلك بعد ما تطلع من النفق تلف الصينية وتدخل تسيب عربيتك فى جراج الأوبرا وتقضيها كعابى بعد كدة :rolleyes: ).

تمشى شوية هتلاقى على ايدك اليمين ممر الكونتننتال لو دخلته هتلاقى محلات الاكسسوارات الحريمى واكسسوارات الخياطة ومحلات ملابس حريمى و أحذية وحلوانى وفى منتصف الممر ده (هو عبارة عن ساحة مش ممر طويل) هتلاقى تمثال ذهبى لرأس جمال عبد الناصر (غالبا هتلاقى الناس رامية عليه قمامة ومخلفات ورق وكأنهم فى رمى الجمرات <_< )

أخر الممر ده يوصلك على شارع 26 يوليو (شارع فؤاد سابقا) ولو كملت شمال توصل لحد دار القضاء العالى وتقرا الفاتحة للقضاة المصريين :sad: بص.. شارع 26 يوليو على قد ما كله محلات ملابس سعرها اقتصادى جدا جدا، على قد ماهو خنيق... تعالى نرجع شارع عدلى تانى...

رجعت شارع عدلى امشى يمين هتلاقى مبنى قديم عليه نخلتين ونجمة داوود :ph34r: ده واحد من أشهر المعابد اليهودية فى القاهرة وبيجوله الحجاج اليهود من اسرائيل وممكن تشوفم بملابسهم السوداء وذقونهم وضفايرهم .

بعد المشوار السخن ده تعالى ندخل "لا تشيزا" واحد من فروع سلسلة المطاعم السويسرية (شانتييه ولو شاتو ولو شاليه..إلخ) ده كافيه ومطعم سويسرى بيقدم مشروبات وأكلات من المطبخ السويسرى و الفرنساوى والإيطالى بس جميل جدا (لو دخل عليك وقت الغدا جرب واحد فيتوتشينى وادعيلى B) )

لو مستغلى لا تشيزا شوية كمل كمان على نفس الرصيف لحد أخر الشارع عند تقاطع عدلى مع طلعت حرب (سليمان باشا سابقا) أييييوة.. أول ما تلاقى سينما ميامى قدامك بس أوعى تدخل سينما ميامى :P هتلاقى أكسلسيور ممكن تدخل تاخد شاى وجاتوه أو سندوتش لسان :blink:

يتبع...

[hopsan]

ايه يا عم shinercorner الحلاوه دى ..تقولش نقولا زياده ( شيخ المؤرخين العرب ) و لا حسن حبشى الله يرحمه ( توفى الإسبوع الماضى و كان علامه ) و لا احمد بن على المقريزى و المعروف بإسم تقى الدين المقريزى.رجع تانى يؤرخ لنا و منور الركن بتاعه

انت لفيت مصر شرقا و غربا و اعطيت معلومه فى برشامه تنفع لأجدعها امتحان و الحاجه كليو لما لقيت حظرتكم فاتح على الرابع قالت مبدهاش بقى اقوم و اشتغل ده يبقى حتى عيب ..يجينا واحد من القريه الساحليه واللى تبعد عننا 220 كيلو و يعمل فيها معلم و مين اللى حيفهم اكتر من اهل مكه اللى هما ادرى يشعابها ....طيب ما كان من الأول!!! ...كان لازم يعنى اقول كلمتين فى العضم

و بعدين اناملك الجميله خلت سى السيد يقول البوقين دول بعد ما لقاك شاطح و حتاكل البلد فكلمتين... إتبحبح في الكلام وخد راحتك وما تشميتش فينا العدا ( اللي إنت عارفهم )....انت عارفهم ؟؟؟ متهيألى انا كمان عارفهم ...دول ناس سو و عم طفشان قاعد يسخن فى كليو وسى السيد و واحد تانى زعلان مش عارف ليه لا هو قال كلمه ولا ساب الناس فحالها ...هو فيه ايه ؟؟؟؟؟؟ اتنين بس فى مصر المحروسه بطولها و عرضها هما اللى بيتكلمو عن الزخنيق بتاعه مصرو بعدين كل كلامهم منحصر فى الأكل ووسط البلد و الحتت النضيفه الواضحه للعيان ...فين الكلام عن القلعه و السيده و سور العيون و اللى وراه و شبرا و امبابه و العتبه و العمرانيه و تحت وفوق الربع و الحتت اللى مازال عبق التارخ بيفوح منه ...مازهقنا مناظر الشيك و الهاى لايف و عرفنا و بصمنا انكم من سكان المهندسين و الزمالك زمان و مصر الجديده ( الحتت الشيك فيها ) فين المتاحف و المزارات و المعارض و كل الكلام عندكم اكل فى اكل ...يعنى لما اجوع اكل و لما اشبع برضه اكل ده العنوان بيقول الخريطه الظاهره لمدينه القاهره مش احنا المصروتيه لفتح النفس و الشهيه

و الى تعقيب آخر .....و من الآخر اعتبرونى لابس البنش و نازل ادلى على مصر المحروسه من الحساد و الحاقدين و اللى بالى بالك

[Cleo]

فين الكلام عن القلعه و السيده و سور العيون و اللى وراه و شبرا و امبابه و العتبه و العمرانيه و تحت وفوق الربع و الحتت اللى مازال عبق التارخ بيفوح منه ...مازهقنا مناظر الشيك و الهاى لايف و عرفنا و بصمنا انكم من سكان المهندسين و الزمالك زمان و مصر الجديده ( الحتت الشيك فيها ) فين المتاحف و المزارات و المعارض و كل الكلام عندكم اكل فى اكل ...يعنى لما اجوع اكل و لما اشبع برضه اكل ده العنوان بيقول الخريطه الظاهره لمدينه القاهره مش احنا المصروتيه لفتح النفس و الشهيه

يابنى واحدة واحدة.... بنقولك دى مصر المحروسة... أم الدنيا... مش ربع رغيف واقلب <_<

الصصصصصصصببببببببببرررررررررررر :rolleyes:

[nancy]

كليو انت شرحت وسط البلد كويس جدا وكل الى كتبتية انا باعشقة

وديما بنزل قرب فلفلة فى اوتيل كايروا خان

انما فيه حتة بحبها وحابة احكيها بعد اذنك يعنى انا اسكندرنية بس الحسين عشقى

بعد ما تطلعى الكبرى وتوصلى للحسن تنزلى من النفق وتروح على الفشاوى

تقعدى جنب حد بيشرب شيشا وتشمى هواء شيشا التفاحة وصوتها المنتظم الرتيب

والقهوجية بتجرى حواليك تسالك وفى ايد صنية والتانية كرسى بيودية لزبون

انا شخصيا بحب السحلب والحلبة الحصا والشاى الاخضر بالنعناع

والبياعين تعدى عليك الى معاه محافظ والى معاه مناديل وزمان كان فية ست مكحلة عنيها جامد وعجوزة اوى قاعدة على الكنبة الخشب الى جنب ممر صغير على اخر الفشاوى تديها فلوس تدعيلك وتديك بمبونى

وبعد ما تلخص تمشى يمين فى الشوارع الضيقة تتفرج على الذهب والاحجار التى تصاغ بمهرة عالية جدا

وبعدين خلى الشارع هو الى يمشيك وانت ماشى على طول يحود يمين ادخل يحود شمال مش مشكلة حتشوف الى بيعملوا الاطباق النحاس بالزميل وحتعدى على قهوة نجيب محفوظ وجنبها بتوع الحلى تقليد للفرعونى وللكردان الفلاحى وحتلاقى الى بيبيعوا مخلفات القصور من ابواب وتماثيل وصناديق

وتمشى لحد ما يقابلك الشارع الى فية محلات الذهب العادية او سوق الذهب

من نقطة خروجك حتلاقى امامك محلين للفضة القديمة الى بتيجى من الوحات فى اشولة

انا بادخل المحل واقلب لحد ما الاقى شوية حاجات تعمل لها نص كيلو ولا حاجة واجبها مع ان بيبقى نفسى اخد المحل كلة لو انت زبون ليك فى الفضة اوى يطلعك فوق وتدعبس برحتك

تدخل يمين وانت فى شارع الدهب الرئيسى توصل للدرب الاصفر وتدخل بيت السحيمى

كانك فى دنيا تانيا

مفيش صوت الشارع حابقى اوصف لكم البيت بتوضيح اكبر

كفاية دة النهاردة

[Hammer]

الفصل الأول

بنات وسط البلد

إسمح لي يا أستاذة إني ( أجردل بجردلي ) في الموضوع حيث إني سعادتك من شباب المنطقة الورد اللي تربوا و ترعرعوا فيها .

الحقيقة وسط البلد بالنسبة لي من الأماكن ذات النكهه الخاصة بمبانيها و جوها الخاص و اللي مجرد التمشية فيها له سحر خاص لا يقاوم ... و طالما إحنا في وسط البلد في حصة غدا ... فإسمحي لي أضيف " أبو طارق " الأشهر علي الإطلاق في الكشري و اللي بيعتبر بجد تجربة مستقلة بذاتها في مجال الأكل الشيعبي ... و يا سلام لو تضرب لك سلطانية من أم خمسة جنيه بس في الدول التحتاني ... طعم تاني للكشري لم يختبر من قبل .

أما بقي لو رحت شانتييه حسب أوامر كليو ... فطبعاً بعد ما تطلع منه مش ح يتبقي في جيبك غير إتنين جنيه و ربع و بالتالي لازم تخطط كويس للحركة القادمة تفادياً لغسل الصحون ... و وقتها ما فيش أحلي و لا أحمل من القعاد علي النيل في أكثر أماكنه تميزاً أمام النيل هيلتون - في وسط البلد برضه - و تضرب لك واحد حمص الشام او كوز درة مشوي أصلي .... و يا سلام لو ليك في المغامرات تاخد لك فلوكة أو مركب شراعي ساعة العصاري لتري من ناحية النيل قاهرة أخري غير التي تعرفها .

في وسط البلد برضه هناك بعض الزيارات الإعتبارية العبقية ... و منها قهوة ريش الشهيرة ملتقي كثير من أهل الأدب و هي في شارع سليمان باشا ( سابقاً طبعاً علشان كليو ما تزعلش ) بس بلاش تروحوها بالليل قوي أحسن بتقلب أنس و دانس خالص .

لو جعتوا تاني :rolleyes: ... عندك منطقة باب اللوق و دي فيها خيارات كثيرة و منها الحاتي ( إسمه كده ) و هو الأصل طبعاً بس ( نوت إني مور ) و لكنه مازال محتمل بالإضافة إلي مجموعة من مطاعم الكبدة و المخ و جميع الأكلات الأخري .

و من المعالم المهمة التي تستحق الزيارة بالفعل هي المتحف المصري في ميدان التحرير ... فقد لا تتحمس للفكرة في الأول متخيلاً إنك مشبع بالمعلومات الفرعونية ... و لكن بالتأكيد بعد الزيارة ح تغير رأيك تماماً بعد حالة الإبهار ( التي ستعتريك <_< ) .

كفاية كدة دلوقتي ... و مكمل معاك يا أستاذة

[hopsan]

شوفتو الإسكندرنيه بيوصفو الزاى ....هو ده الكلام

مترتب و منظم و على السطر صحيح ...بس يا nancy نسيتى حته صغنونه من عند بتوع الفضه ..قبل ما تروحيلهم لازم تعدى على بتوع الأنتيكات و الشيشه و اشكالها و انواعها و اصنافها و اللى مشغول بالنحاس و اللى مطعمه بالفضه و برضه بالدهب و دى بيجيها السواح من كل حته ...و انا اشتريت بتحويشه العمر حته صغيوره مطعمه بالفضه بس عاملها الراجل تحفه و حاتطها فى الصالون ..اصلى عامله عربى على قد حاله....كملى كمان و اطربينى ..على قوله اخونا استيفان روستى ...مش تقوليلى اكل و مابصر ايه؟؟؟

[م الغزالى]

شكرا ياكيليو على الموضوع الظريف ده

زمان قبل 15 سنة كده كانت أحلى فسحة لى فى القاهرة أبدأها من باب النصر مرورا بشارع المعز ياسلام على الخانات والوكالات و الأسبلة كنت مغرم جدا بالأخيرة وحتى نهاية القاهرة القديمة عند بوابة المتولى ومرورا بالمغربلين وشارع القلعة والسير مابين أثتين من أحلى جوامع القاهرة السلطان حسن والرفاعى وتنتهى الرحلة فى القلعة أحلى مكان كنت أحس به بالراحة النفسية ... باترى الأماكن دى أخبارها إبه ؟

ياريت المزيد