أنا زعلانة مننا

[Amira Khaleel]

أنا زعلانة منى  .. أيوة مش غلطة انا زعلانة منى  و كمان كلنا لازم نكون زعلانين مننا !!!  الجرايد مليانة كتابة   و حاجات جد بصحيح   طب اذا كنا احنا يا مثقفين و بندعى  يعنى بنزعم ان احنا مهتمين بحال البلد و شايلين همها   اذا كنا احنا محدش كلف خاطرة انه يكتب كلمتين هنا  يمكن لمدة اسبوعين   ... نفضها سيرة و بلاش ضحك على خلق الله !!  طبعا انا مقصرة و الغلط راكبنى من ساسى لراسى   !! اللى بيحصل انى ادخل  هنا و اقول انا حاكتب عن كذا و كذا   ...  و شوية و تلاقينى مدحلبة عمالة اقرا الحاجات القديمة قول ساعة قول ساعتين   و اخرج من غير ما اكتب  

يا ترى انتوا بتعملوا كده    ؟؟  طيب ايه الحل

مش باقولكم  انتوا حتجننونى    من ساعة ما دخلت هنا و انا عمالة اشترى كزارونات    اعمل ايه ادمن    صراحة انتوا حلوين قوى  بس لو تكتبوا  ...   برضة لسه زعلانة مننا     و حالبس الكزرونة المرة دى مننا

[Mohd Hafez]

[b:post_uid0]حلوة قوي حكاية الكزرورة دي .. يا  أخت أميرة ..وبعدين زعلانة ليه من نفسك ومن الناس .. الموضوع ببساطة أن كل عضو بيساهم علي قدر ما في ضميره من  معني لكلمة مصر .. كدولة ومجتمع وسياسة واقتصاد .. علي أي حال .. وجود منتدى زي هذا المنتدى .. لعلامة خير .. بكره  .. يزداد عدد الأعضاء .. ويأتي من هم يحملون لمصر في ضميرهم .. قدرا من المشاعر أكبر مما لدينا .. ويملؤن هذا المنتدى مواضيع ومساهمات .. علي أي حال .. جميل منك مشاعرك الطيفة تجاه مصرنا .. وربنا يسهل وتزداد المشاركات .. [/b:post_uid0]

[عادل أبوزيد]

الست اميرة  ... صراحة معاك حق  و الغلط راكبنا كلنا  و احييك  على تعبير انا زعلانة مننا  فعلا تعبير جديد و رشيق !!

انا منذ اسبوعين او ثلاثة لم اساهم  و الحقيقة اننى زرت الموقع عدة مرات  و سرقنى الوقت مثلك تماما  و اخيرا كلفت السكرتيرة عندى تحاول تطبع المحاورات دى  و فعلا طبعت جزء كبير  و الحقيقة انها متعة  فى القراءة للجميع و زوجتى و اولادى يقرأونها  تقريبا باستمرار

فعلا لو صدرت فى صورة كتاب  توفر كتير

لست ادرى هل اقتراح الغاء المحاورات القديمة قد يدفعنا لبعض النشاط ؟؟

[عادل أبوزيد]

فعلا التاريخ يعيد نفسه

وجدت نفسى فى حالة كسل شديد و لكنى اقضى اكثر من ساعة كل يوم مجرد قراءة و تجوال فى المحاورات.

و أمس تذكرت الفاضلة أميرة و تذكرت بالذات هذا الموضوع و بحثت عنه ووجدته ... و الغريب ان الحال كما كان من سنة و نصف موجة رمضان و موجة كسل و استغراق فى القراءة !!!!

أين أنت يا أميرة .. افتقدناك

[Mohammad Abouzied]

و حالبس الكزرونة المرة دى مننا

يعني ايه كزرونة

[ragab2]

معقول

الست أميرة فاكهة المنتدى تغيب عنا الفترة دى كلها

مهما كانت المسميات التى تدخل تحتها الكزرونة ولكنى أشعر عند قراءتها بالتفاؤل وبالروح المصرية الأصيلة فى أميرة الأميرات

وأكرر أنى أقرأ كتاباتك وردودك من الآخر للأول حتى أشعر بالاطمئنان على أختنا الغالية أميرة عند مشاهدة حروف الكزرونة التى أحببناها وربطت بالاسلوب المرح الجميل الذى عودتنا عليه أختنا الغالية أميرة

حمد الله على السلامة

وكل سنة وانتى طيبة

يا أميرة الأمراء

[Sherief AbdelWahab]

عودة الكزرونة و صاحبة الكزرونة هو آخر خبر سعيد في سنة تعيسة...

مرحبا بالأخت العزيزة أميرة خليل...و نتمنى ألا يطول الغياب :D

خلص الكلام

[الطفشان]

و حالبس الكزرونة المرة دى مننا

يعني ايه كزرونة

لا ادري ان كان تقصدوا اصطلاح خاص لا اعلمه

لكن راجعت معجم لسان العرب لابن منظور، و مختار الصحاح للجوهري، فوجدت الكزرونة، بالزين و النون

و في شرح القاموس للزبيدي الكسرونة، بالسين و النون

و في المعجم الوسيط لسيدي الطفشان، الكسرولة بالسين و اللام

و في رواية اخرى الكزرولة، بالزين و اللام

و قال سيبويه ان هذا ضعيف

و هي الطاسة الغويطة

فكما ترون اختلف علماء اللغة فيها

:D :cry: :D

[أسامة الكباريتي]

بسم الله الرحمن الرحيم

شكرا للأخت أميرة اللي قدرت تسحب رجل الأستاذ عادل حتى يمسك بالكيبورد بدل الماوس .. حنعملك كيبورد على شكل كزرونة علشان تكون متعددة الإستخدامات ..

بس شو الفايدة اللبن انسكب من الكزرونة (الكسرولة الطفشانية) ..

زماااان كان بياع اللبن له وضع خاص .. اليوم بيشربوا اللبن من العلبة الكرتون!!

المهم إن الحياة تعود إلى مجراها ولا نبكي على اللبن المسكوب .. فالكزرونة .. أقصد المنتدى لسه فيه خير ..

وما نحتاج إليه العودة إلى الحال الجاد .. وبعيدا عن (النفاق) الاجتماعي والدبلوماسي .. لازمنا غسيل للكزرونة ..

لازم ترجع لأصلها ونظافتها .. وهذا بأيدينا ...

وفيكم الخير

[عادل أبوزيد]

مرة أخرى أستعيد هذا الموضوع وأستعيد التعبير الرشيق "أنا زعلانة مننا" ... !!

و لعل فى موضوع الفاضلة أميرة و التعليقات ما يمكن أن يكون رسالة للعديد من أعضاء محاورات المصريين ...

كلنا مسئولون عن أى تدنى قد يكون أصاب أداء محاورات المصريين كما أننا كلنا لنا الحق أن نفخر بأداء محاورات المصريين فى السنوات الست الماضية !!!

هل لى أن أكرر الدعوة للكتابة حتى لو بدت موضوعاتها أحيانا تكرارا لموضوعات قديمة ؟

[واحد تاني]

أنا كمان زعلان مننا ... وعلينا !

[Folana]

السلام عليكم ورحمة الله ....

والله ياستاذ عادل كلنا زعلانين فعلا...من نفسنا ومن غيرنا ..وعلى المنتدى ...اللى كاد اسمه يصبح مبارزات المصريين او مشاحنات المصريين ....

من يوم مااستطعت انى افتح الموقع ..وانا شايفة ان معظم المواضيع تكاد تنقلب الى ساحة قتال ...ومبارزة كلامية ..كل طرف يستعرض ماعنده من ذخيرة لغوية كى يفحم الطرف الاخر ...ويستعرض اسلوبه الفذ فى المناورات والمحاورات علشان يقول انا اشطر وعرفت ازاى اسكت اللى قدامى ...

وبالرغم من انى مش عضوة قديمة قوى يعنى بقالى تقريبا سنة وشهر ..الا انى فعلا لمست ان فيه اختلاف فى كل حاجة ...فى المواضيع المطروحة ..فى اسلوب المناقشة ..فى طريقة تقبل الاخر ...فى التمسك بمبدأ خالف تعرف .....مش عارفة ليه كده بجد؟؟؟

يمكن الناس مش بتشارك وبتكتفى بالقراءة بس خوفا على نفسها احسن حد يحدفها بطوبة فى دماغها ويقولها ايه ده ياماما انت جاية تهزرى معانا ولا ايه ...احنا اصحاب فى بعض ايه اللى حشرك بينا ...بغض النظر بقى عن سن العضو او وضعه او حساسيته او نيته فى الكلام ..المهم انه يلزم حدوده ....

أو لان الخطوط العريضة لاى موضوع دلوقت اصبحت بتاخد منعطف شخصى ويتنسى الموضوع الاصلى ....

مش عارفة ايه اللى اتغير ..وليه الاول كان بيبقى النقاش جميل والناس بتتكلم مع بعضها باسلوب راقى ويختلفوا ويتناقشوا لكن بكل حب واحترام ....

ياريت الاعضاء يراجعوا نفسهم وياخدوا هدنة من المشاحنات وتصيد الاخطاء للاخرين ...ويبدأوا تانى بحب وتفاهم علشان نرجع نحس فعلا ان المكان ده هو بيتنا التانى ......

الزعل لوحده مش كفاية ...لازم كل واحد يبدأ بنفسه ..ويسامح ويرضى ويقرب المسافات وقبل كل ده لازم يشعر بانتمائه فعلا للمكان وحبه واحترامه للاخرين ورغبته القوية فى ان يظل منتدى محاورات المصريين كما عهدناه دائما .....

ولك منى كل المودة والاحترام ......

[إبن مصر]

أستاذ عادل

أعتقد ان للغه الحوار سبب كبير فى ما نحن فيه فمن الناس من يريد ان تكون له الحريه ان يتكلم كما يريد ساخرا كما يشاء مبررا لنفسه أى اسلوب يتبعه فى الكلام واذا حدثه زميل بنفس اللغه او سمح لنفسه ان يستعمل نفس طريقته تقوم الدنيا ولا تقعد ويصبح هذا الشخص الذى تجرأ وسأل عن السبب فى اسلوب غريب من السخريه والتهكم فى الردود واللغه الفضفاضه الرماديه يصبح متجنيا ولا يراعى مشاعر الاخرين.

المشكله اننا لا نقبل على انفسنا ما نقبله على الناس .. نريد الحريه الكامله فى ان نفعل ما نريد ونقول ما نريد وسلب هذه الحريه من الاخر اذا تجرأ واستعملها .

كان فى الماضى حسن النيه بيننا هو المحرك الاساسى لاى تفاعل بيننا ولا أنكر انى شخصيا قد نزعت من صدرى هذا الاحساس وانتقلت بدون أن اشعر من فرط هجوم غير مبرر وتصيد لملفوظ الكلام الى نفس المعسكر الذى لطالما حاربته خلال سنين عديده..

استاذى العزيز..

فى اقل من 3 ايام وباتباع نفس الاسلوي المتحفز والمدافع عن نفسه فقط اكتسبت العديد من الاحزان ومخزونات الغضب من أخوه وزملاء أعزاء..

أردت أن اتبع نفس الاسلوب وأعترف انى لا أستطيع له صبرا..ولا أستطيع الا أن اكون أبن مصر كما كنت من 6 سنوات ..

الاخت الفاضله فولانه..

اسمحى لى أن أشير الى شىء ..

كان من الممكن ان تكون مداخلتى فى باب الابتسامات فى موضوع حشيش كالتالى :

" الله الله الله ... ليه كده والله ما قصدى حاجه انا كنت بهزر مع الراجل ....( وجه ضاحك )

يعنى هو حرام امسى على رفيق السلاح وبعدين الاشكفه دى كانت قفشه ضحك ... صدقونى انا غلبااااااان "

ماذا تعتقدى كان سيكون ردك؟؟؟؟؟؟

انا اخبرك...بكل الود سيكون نقاشنا مليئا بالضحك والموده وأكون فى نفس الوقت أوصلت رسالتى لحشيش ولم أكسب بغضاء أو عداوات أو حتى أشعرتك بالضجر وانت تردين على ..

ولكن!!!!

اتبعت نفس الاسلوب الذى يتبعه الجميع معى ومع زملائى.... كتبت المداخله بلا مشاعر .. استفسر عمن مس كرامتى الحساسه.....واضعا حدود حمراء وصفراء وبنبى كى لا يتعدى أحد على ... أشعرتك بالحزن والحرج بل وربما اكون فقدت زماله بيننا قبل أن تولد...

وكله لانى اتبعت نفس الاسلوب الغالب الان..

أبن مصر الحقيقى .. وهو أنا أى أحمد محمود كان سيرد الرد الضاحك السابق..

وبنفس الطريقه كان الرد مع انسانه انا معجب بحق بكتاباتها وهى الاخت الافضله عطر..تحول استفسارى الى مباره شاركت انا فيها وربما دون قصد انا الذى بدأتها فى اثبات خطأ وتجنى الاخر على فى الحديث ولولا انها انسانه هادئه وذات عقل واحترام لكان سجالنا مستمر الى الان...ولكنها الاقوى والافضل فقطعت الطريق بمنتهى الاحترام والدبلوماسيه امام هذا الموقف.

لا أعرف كيف ستنتهى هذه الفتره وما هو مالها ولكنى اثق انها ستمر مثلها مثل كل المواقف التى مرت بنا من قبل .. ولكنى لن اشارك فى كسب المزيد من الناقمين....

أعلن ان اتخاذى من الاسلوب الدفاعى خاطىء..

أعلن أنى لا أقر أن أهاجم من هاجمنى وان أسىء الظن بكلامه...

اعلن اننى لا أريد أن أرى الجو مشحون وملىء بالحساسيات ....

من ساءه منى شىء فى الايام الماضيه ليلتمس الى العذر انى خلعت من نفسى وقار وحكمه الاباء وارتديت سيف ودرع الكبرياء واعتذر له عن كل شىء حتى وان كنت على حق .... لا يهمنى أن أكون على حق وأخسر الناس.

وختاما....

سأبدأ بنفسى ولن أنتظر الاخرين فى تقبل الكلام وحسن النيه المطلق

وشكرا

العضو

ابن مصر

أحمد محمود

[Folana]

الاخت الفاضله فولانه..

..

... أشعرتك بالحزن والحرج

السلام عليكم ورحمة الله ...

استاذ احمد ...انت قلت فولانة اهو ..يعنى من حقى أرد:)...

الحقيقة انت مش اشعرتنى بالحزن والحرج ...انت ابكتنى ...ده حقيقى ...وكان ممكن ابعت الرد فى رسالة خاصة ..لكن حبيت انى فعلا اقول انك ابكتنى هنا على الملأ....لسبب بسيط جدا هو انى حبيت اوصل لجميع الاعضاء ..قد ايه ممكن كلمة تتقال تسبب حزن للطرف الاخر ....ولان لو كل انسان تخيل ان الكلام ده بيتوجه له حيفكر قبل مايقوله ....

لكنى بكيت مرة اخرى الان وانا اقرأ مدخلاتك ...وشعرت انك قد كده انسان حساس ومحترم ....انا باعتذر لو كنت استفزيتك فى ردى على حشيش ...لكن الموضوع كان ابسط كتير جدا من الرد اللى تلقيته منك ...

انا عارفة كده ومطمئنة انك خلاص فهمت قصدى صح ..انا فعلا كنت باتكلم بضحك وسلامة نية ...ولو راجعت مداخلاتى كلها - ومعظمها فى المطبخ - حتلاقى ده اسلوبى ...يمكن صح او غلط ...يمكن ناس تقبله وناس لأ...بس فى النهاية انا باتكلم بعشم وسلامة نية وعمرى مااقصد اجرح حد حتى لو اذانى ......

مش عايزة اتكلم كتير فى الموضوع ....لكن انا خلاص لامحرجة ولا حزينة ولا بابكى ...انا سعيدة جدا بمعرفتك ....وعلى فكرة انا كنت معجبة بمواقفك فى بعض المواضيع المطروحة واللى كانت محتاجة تدخل حازم....

باعتذر لك مرة اخرى عن سوء استخدامى للكلمات .. ..بس يمكن علشان مش اتعاملنا مع بعض قبل كده فحدث سوء فهم من الطرفين ....

[محمود الشاعر]

كثير ما يحاول العضو ان يبدو ظريفا او خفيف الظل او يحاول الدعابة مع زميل اخر مثلما حدث معي فى اوائل مشاركاتي واذا بالدعابة تتحول الى س و ج ومشاحنات قد تصل الى السباب ( هذا لم يحدث بشكل مباشر ) الغريب انك حين تسترجع جميع المشاركات السابقة تجد انه مجرد سوء تفاهم بسيط

فى احد الموضوعات شاركت بمشاركة اغضبت زميل لنا فما كان منه الا ان سئلني بشكل واضح وصريح ( بشكل هجومي يكاد يكون مستفز ) تقصد ايه حضرتك من كلامك ده كان من الممكن ان لا اعيره انتباها او ارد عليه بشكل اكثر استفزازا بقصد او بدون قصد لكن ما حدث هو انه وضحت وجهة نظري بهدوء وشكرته على تنبيهي لما قد يحدث ان خانني التعبير المهم اننا اصبحنا اصدقاء جدا

هذا ما ارجوه ان يتسع صدرنا لزملائنا ان نحاول ان نفهم بصدق قبل اتخاذ قرار بالغضب او رد الفعل ان نعطي لأنفسنا مساحة للتسامح واحترام الاخر وان نلتمس الاعزار مهما كانت واهيه لتجنب القطيعة او الشجار

ما حدث فى المحاورات ويحدث شيئ يدعوا للاسف والحزن

رفقا بنا وبكم ( لنا نحن جميعا )

للاسف الشديد الادارة تاخذ كل كلمة بحساسية زائدة ومفرطة فى بعض الاوقات تؤدي ان يشعر العضو بشيئ من الالم ( حيث يشعر انه فى بيته وانه بين اهله ولا يجب معاملته بشكل اقل مودة )

وفى المقابل نجد الاعضاء قد اشهرت اسلحتها فى وجه الادارة متربصة اقل هفوة او كلمة ممكن ان تؤول بشكل جيد فتؤول بشكل سيئ او تفهم غلط

كثر الحديث عن الحرية وعن استبداد الادارة وتعنتها من الاعضاء

كثر الحديث عن لوي زراع الادارة والضغط عليها من الادارة

نحن فى مركب واحد اذا انكسر مجداف تاخر موعد الوصول فما بالنا اذا انكسرت الاشرعة

احبتي واهلي واصدقائي يعلم الله اني احبكم ولا ابغي من هذه المحبة سوى محبتكم لي

قال الرسول الكريم صلى الله عليه وسلم فيما معناه

ان كنتم ثلاثة فأمروا واحد

اي يكون لنا قائد ومرجع يرجع اليه

فرقا بالادارة لأنها بالفعل تبذل الجهد الكثير لضمان استمرار المحاورات

ورفقا بالاعضاء لأن المحاورات لن تكون هى نفسها ان رحل عنها احبتها واهلها

لا ادري ان كان ما قلته مناسبا لهذا الموضوع ام لا لكني وجدت نفسي اكتبه كما هو فعذرا

[ياسر ابو احمد]

أنا زعلانة منى .. أيوة مش غلطة انا زعلانة منى و كمان كلنا لازم نكون زعلانين مننا !!! الجرايد مليانة كتابة و حاجات جد بصحيح

إسمحولي اولاً ان اسجل انني عضو جديد بالمنتدى منذ ما يقارب الاسبوعين .. التي ذكرتهم الاخت اميره في طرحها وهي فترة غيابها عن المنتدى كما فهمت ..

واسمحوا لي أيضاً ان اسجل انني اليوم وامس فقط شاهدت اسماء جديده تكتب وترد على باقي الاعضاء .. وانا متأكد ان هذه الاسماء ليست جديده ولكنها كانت في فترة اجازه او ماشابه ذلك .. ولا اخفي عليكم فقد كنت سعيدا جدا بوصول الجيل الماضي الحاضر .. والذي بدوره سوف يثري الحركه الفكريه وينعش لغة الحوار التي تندرج نحو اسلوب الشد والجذب ... وأخذت وقت طويل في البحث عن المساهمات التي شاركوا بها قبلاً .. لكي استفيد ..

والسؤال الذي اود ان اطرحه على نفسي اولاً ثم عليكم هو ..... ليه ..؟؟!!

ليه المصريين .. واخص بالمصريين .. وصولوا للحاله دي ... عصبيه .. خنقه .. نرفزه .. صوت عالي .. شجار .. عدم مبالاه .. الخ الخ

ووجدت (من وجهة نظري) ان السبب يكمن في الاحداث السريعه جدا التي تلاحقنا والتي فاقت حجم الاستيعاب للعقول ..

فبلأمس القريب او البعيد كانت الاخلاق غير .. وكان السلوك العام والبيئه المحيطه انقى واصفى مما نحن عليه الان ... ولا اقصد هنا بأن الناس غير الناس

.. لأ الناس هم نفس الناس .. ولكن سلوك البشر كانت اهدى .. وكانت اطهر .. وكانت تدرك ما تفعله وتعمله .. وكان هناك شئ رئيسي يربط بين هؤلاء البشر .. الا وهو .. الضمير .. الرضا .. الأمل .. وكلها لها علاقه بالنفس البشريه .. ومن ثم فإن ترويض النفس المطمئنه وتقويمها شئ (اعتبره) من الجهاد من شدة المعاناة التي يلاقيها الفرد (الوحيد .. المفرد) في التمسك بها وعدم خنقها وقتلها كي ينسى ضميره الذي يلاحقه اينما فعل .. ولذلك فإن وجود ذات الفرد في جماعه .. يسهل عليه ترويض نفسه وتقويمها ..حبذا ان كان القدوه لهذه الجماعه هو خير قدوه.. والسلوك العام للجماعه .. هو اصلاً سلوك سوي .. قويم .. واذا شذ اي فرد بالجماعه عن سلوك الاخرين .. فسوف يكون ذلك واضحاً وجلياً للأخرين .. فإذا قام هذا الشاذ بتقديم رشوه او قام بالنصب او بالفهلوه او السرقه أو .. او او .. فإن الجماعه لن ترحمه .. لسلوكه الغريب عن سلوك الكل ...

طيب واخرة الرغي ده ايه .. عاوز تقول ايه يعني .. خلص يا عم ياسر وجعت دماغنا !!! :)

قصدي أقول يا ساده .. يا سيدات .. لقد انفك الرباط .. وأصبحنا نحن الشواذ وهم الجماعه .. ولك ان تتأمل ...

ولذلك فلا عتب ولا عتاب .. ولكن .. جهاد .. جهاد لتصحيح المسار بعد غفله وانحدار .. وإلا فالإحتضار ..

[السويفي]

السلام عليكم:

انا اشتركت في المنتدي من سنه ولما فتحته كاني لقيت كنز كنت فرحان بجد بأسلوب المنتدي والحوار والتنوع في المواضيع .

مشاركاتي قليله وسببها اني بكون مبهور من الكلام الي بيتكتب فبياخد مني الوقت كله ومش بلحق اكتب حاجه

وفي الفتره السابقه احسيت ببروده في كل مره ادخل فيها وان فيه كهربا في الجو...وكتير من الاسماء الي كنت باحترم اراءها اختفت ومع ان المواضيع الموضوعه جديره بالاهتمام بس المشاركات فيها قليله |.

وفيه حل بسيط ياريت تتقبلوه مني:

1_ نقفل المحاورات خالص مالص وكأنها لم تكن

2_نعمل اعلان في الوسيط او في ميلودي وافضل يافطه في وسك البلد او كوبري اكتوبر...عن افتتاح موقع بأسم (محاورات المصاروه)

3_ونعمل اشتراك بسيط بقيمه عشرتاشر دينار زقزقي لكل عضو جديد

4_ولما ندخل نعمل نفسينا مش عارفين بعض ونتعرف من جديد

5_وطبعا علشان محاورات المصاروه ديمقراطيه هنعمل انتخابات للاداره والي هتفوز بيها نفس الاداره الحاليه

6_الاشتراكات الي هنجمعها نعمل بيها رحله لأي شاطئ علشان نتفرج على الوظاويظ (على رأي اسمو ايه الي المفروض اني مش عارف اسمه علشان احنا في حته تانيه :)

7_وبكده هنبدأ بدايه جديده خالص مالص

[عطر]

وبنفس الطريقه كان الرد مع انسانه انا معجب بحق بكتاباتها وهى الاخت الافضله عطر..تحول استفسارى الى مباره شاركت انا فيها وربما دون قصد انا الذى بدأتها فى اثبات خطأ وتجنى الاخر على فى الحديث ولولا انها انسانه هادئه وذات عقل واحترام لكان سجالنا مستمر الى الان...ولكنها الاقوى والافضل فقطعت الطريق بمنتهى الاحترام والدبلوماسيه امام هذا الموقف.

العزيز أحمد

اسمح لي اخلي البساط أحمدي وسيبنا من العضوة والمشرف والكلام الرسمي بزيادة ده

أولا يا عزيزي أحب ان اؤكد لك اني ا لا أحمل لك أي ضغينة ولك على طول الخط الود والإحترام

لسبب بسيط جدا وهو ان ما حدث مجرد سوء فهم وحساسية منا احنا الإتنين لكنه موقف اخذ وقته وانتهى

ولسبب أخر هو اني بمجرد ما اغلق الكمبيوتر انسى كل ما حدث وحين افتحه مرة اخرى افتح معه صفحة جديد في كل شيء

أرجو أن تقبل من أخت وليس مجرد عضوة كلمة بسيطة وهي ان تخلع من عليك ثوب الإشراف وتعامل معنا كعضو مثلنا ولكن عضو بشوية صلاحيات اكثر مننا حبتين تعطيه الحق ان يصحح المسارات حين تحيد عن اتجاهها بعض المرات وأؤكد لك ان الطريقة دي حتكون مريحة لك جدا

ونصيحة غض البصر احيانا عن بعض الأمور والكلمات ليتعلم الجميع لغة الحوار وحدهم دون توجيه وصدقني انا متأكدة ان الكل هنا كبير وعاقل بما فيه الكفاية ان يلوموا أنفسهم ويعاتبوا ارواحهم ويرجعوا للصواب في النهاية

في النهاية اشكرك بقوة على رأيك في وشهادة اعتز بها جدا ووسام على صدري أعتز به جدا

لك الود وفائق الإحترام

[Folana]

السلام عليكم ورحمة الله .......

نحمد الله ونشكره ونستعين به ....انا سعيدة جدا الحمدلله ان النفوس بدأت تهدأ شوية ...وسعيدة اكتر ان معظم الاعضاء شاعرين بعدم رضا عن الجو الموجود حاليا ......

الميزة اللى بتقابلنا هنا فى المحاورات ..اننا ممكن نصلح مالا نرضى عنه ....مش نقف مكتوفى الايدى ونتفرج ونقول عليه العوض ..ده كان وكان وكان ....

نكون متفائلين ونتعاون اكتر من الاول ولنجعل سعة الصدر وحسن النية هم من مبادىء المنتدى ....وللامانة ..انا باقول ان الادارة برضه اعضاء زينا ويهمهم ان المنتدى يكون فى ابدع صوره دائما ....

يا لا نبدأ من جديد كلنا بنفسية جديدة وعفا الله عما سلف ..ونحاول نصلح ..مش لازم نستسلم لحالة الاحباط ونرفع شعار مافيش فايدة حتى هنا كمان ...

وان شاء الله كل الاخوة الاعزاء اللى انسحبوا وفى مقدمتهم الاستاذ الافاكاتو ..حيرجعوا ونرجع عيلة من جديد .....

وبعدين تعالوا نتكلم بصراحة ...انا النهاردة الصبح كنت دخلت موضوع الاستاذ حشيش لان كان لى تعليق بسيط على تناوله للالفاظ الصريحة اللى ممكن تسبب خجل لبعضنا ...ولكن لقيت رد الاستاذ احمد محمود اللى خلانى انسى الموضوع الاصلى واكتب رد عليه ...مش احنا بكده توهنا اصل الحكاية ؟...وكانت النتيجة انى وجدت باقى حكاية الاستاذ حشيش اكثر جراءة من الاول ...تعالوا ننظر لدور الادارة متمثلة فى جميع الاشخاص المعنية ...لو مافيش ادارة حازمة ..مش كان ممكن كل مواضيع المنتدى تتحول لمواضيع شخصية تعبر عن اهواء اصحابها ...

يعنى قصدى اننا لازم نتقبل الكوب بنصفيه المليان والفاضى .....

وكما قالت الاخت عطر ....صفحة جديدة .......وعايزين نبنى مش نهد ...

"والكاظمين الغيظ والعافين عن الناس"...

[ياسر ابو احمد]

رداً على الاخت فلانه .. كلام جميل جداً ... لكن ياريت حضرتك تفسري .. ايه وجة نظرك في ردي على الاستاذ حشيش في موضوع ولاد الغساله ...

===================================

إقتباس(ياسر ابو احمد @ Aug 15 2006, 10:15 PM) *

الاخ .. حشيش ..

انت فظيع .. انت فعلاً فظيع ...

وكلمة فظيع دي كلمه وطنيه تشجيعيه معناها جميل جداً .... .............

تحياتي.......

(ده كان ردي) ..

(وده كان ردك) ...

اهو ده اللى باتكلم عنه ...حتبدأ الافيهات والتعليقات تملى الموضوع وحننسى هدف القصة الحقيقى .......بالله عليك يااستاذ حشيش تتفهم الموضوع ......

==========================

لوسمحتي تفهميني ايه الغلط الكبير اللي انا قلته .. علشان تلتمسي لي العذر من الاستاذ حشيش ..

انا اضطريت اكتب هنا لان الاستاذ احمد محمود .. قفل موضوع ولاد الغساله ...

وانا مش زعلان ومش متضايق .. انا عايز افهم .. بس .. مع احترامي وتقديري لكل الاعضاء