ذكريات حُلم الطفولـــــــــــة.....البريئة :)

[Folana]

السلام عليكم ورحمة الله......................

ساقنى القدر لمشاهدة اخر حلقات العندليب...واللى ماكنتش متابعة ولا حلقة منها او من غيرها...لكن لانى كنت خارج القاهرة ومش لاقية حاجة اعملها غير البحلقة فى التليفزيون...فقلت اتفرج وليه لأ.....

وبعيدا عن النقد للمسلسل..وجدتنى اعود بذاكرتى لاستعيد ذكريات حقبة من حياتى ولت واندثرت بفعل عوامل الزمن....

حاجة يعنى من عشرات..عشرات السنين....

وفكرت ..ليه ما افتحش موضوع عن ذكريات الطفولة وكل واحد مننا يكتب ذكرياته فى الفترة الجميلة دى من عمره...ده اذا كان ماحدش سبقنى واتكلم فى الموضوع ده ..وفى الحالة دى نبقى نضم المواضيع على بعضها...

المهم ..افتكرت ايام عبد الحليم واغانيه الجميلة ...وافتكرت ايضا انى كنت عايشة قصة حب من طرف واحد مع عبد الحليم :)..شأنى شأن معظم الفتيات فى هذه الفترة ..بس الجديد هنا انى كنت صغيرة جدا..يعنى ست سنين كده وانت طالع ...اصلى بأعانى من الرومانسية المبكرة :)

وافتكرت انى كنت باعمل معاه حوارات ..ولوم وعتاب ....وافتكرت ايضا انى كنت معتقدة اعتقاد راسخ ان كل أغانيه كان بيغنيها علشانى انا وبس....

حتى الاغانى الوطنية ماسلمتش من خيالى ...وياسلام لما كان يغنى

"بالاحضان..بالاحضان ..بالاحضان يافولانة ياحلوة بالاحضان ...."

أنا باضحك دلوقت لما افتكر.....اصلى كنت صغيرة جدا :)...وكنت احب اسمع اغنية سمراء يا حلم الطفولة ....

وحبيبها انا قبلك وربما جئت بعدك وربما كنت مثلك ....ولما كان يقول .."فلم تزل تلقانى وتستبيح خداعى...

طب انا راضية ذمتكم...فيه طفلة عندها ست ولا سبع سنين تعرف يعنى ايه وتستبيح خداعى ؟....

بس تعرفوا كانت ايام جميلة جدا ...بأغانيها بعندلبيها بسلطاتها ببابا غنوجها ..كلها كده جميلة....

وانا باتفرج على الحلقة الاخيرة من مسلسل العندليب..ومات بقى الله يرحمه ..قلت لزوجى ياسلام ده قلب على المواجع...تعرف يا سى الافندى..ده كان لما بيغنى الحلوة ..الحلوة..برموشها السودا الحلوة ..افتكر انه كان بيغنى لى انا ...

راح سى الافندى قال بتلقائية تغيظ .واستنكار يفرس..." يانهـــــــــــــــار أسود"...

وعندى من الذكريات كتير ..كتير ...

يالا بقى لو حد عنده ذكرى جميلة يدخل يقولها لنا .............

[زعلان]

راح سى الافندى قال بتلقائية تغيظ .واستنكار يفرس..." يانهـــــــــــــــار أسود"...

:) :)

بجد ضحكتيني

زوجك صريح زياده عن اللزوم :)

[Folana]

السلام عليكم ورحمة الله..............

صريح ؟... :) انت كمان حتقول صريح :) ..يا ميلة بختك يافلانة.... :)

اهى دى الصراحة الى يعاقب عليها القانون .....

مافيش حد عنده ذكريات ؟؟..طب انا حاكتب لكم تانى لحد ماتفتكروا حاجة..بس بعد الفاصل....

[khedr]

..." يانهـــــــــــــــار أسود"...

نهارك أبيض

[khedr]

ذكريات..............

الراديو الصغير علي الودان مش بيفارقها

واليوم كله قاعدين علي الكوبري قدام بيت القمر

منتظرين والقمر طالع علي السطوح يوكل الفراخ

ويرمي علينا مخلفات الطيور بخفه ودلاله

ونحن نعتبرها باقات الورد والزهور

لعنه الله علي انفلونزا الطيور

بتلموني ليه....؟

لو شفتم أيديه

[نانو]

ايه يا خضر الرومانسيه الممزوجه بالارز البايت و الخضار الحمضان ديه

يعني حرام عليك حتي.... مش كده يا اخي الريحه طلعت علينا :unsure:

فولانه يا حبيبتي انا من يومي وانا بقول انا و طنط فولانه فينا حاجات مشتركه علي طول

انا جات لي نفس حالتك كده و انا في ابتدائي بس انا بقه كنت بحب ايمان البحر درويش

و كان عندي منه صوره بامضاءه ....ما اقولكيش بقه ..كنت طايره بيها فوق السحاب

و يا سلام علي شعره المسبسب ده ووشه الملائكي الجميل....و لا فلمه اليتيم المسكين اللي كان عامله.... و كان بيغني فيه يا حلاوه ام اسماعيل في وسط عيالها كان بيقطعني حتت و اقعد اسهرله مخصوص

و لا لما اسمع اغنيته نفسي ( مدي ايدك ويا ايدي ..امسحي دمعه وليدي )كنت بموت من العياط ليه ..لغايه دلوقتي مش عارفه

و كنت بقول يارب يعيش لغايه لما اكبر علشان اتجوزه مش عارفه ليه كنت بفقر عليه و حاسه انه هيموت

و اهوه كبر وانا كبرت و خفيت و الحمد لله و اهو كله بيروح في الغسيل بص الموضوع بيحتاج شويه صبر :wub:

[Folana]

السلام عليكم ورحمة الله............

امهم ياخضر هه وبعدين..وبعد ما كانت بترمى عليكم ال..الزهور..راحت فين بعد كده؟

ياسلام يانانو يظهر كلنا فى الاغانى عباسية....(وش عبد الوارث عسر)...

ماهو الفرق بين عبد الحليم وبين ايمان البحر..هو فروق فى التوقيت بس..يعنى تعاقب الاجيال....الحمدلله انى ماقلتش عبده الحامولى.....

حاكتب لكم بكره ذكرى جديدة...ابقوا معنا..............

[nancy]

انا بقى كنت وانا صغيرة فى ابتدائى كنت فاكرة نفسى سعاد حسنى فى خلى بالك من زوزو

ال يعنى علشان شعرى اسود وعيونى سود ولونى قمحى فعشت الدور فضلت ادور على حسين فهمى

بس مكنش معانا عيال شوقر :wub:

انما اغانى عبد الحليم دى كانت الموسيقى التصورية لحيتنا كلنا اول مسمعة افتكر البحر وساعات الغروب والتمشية على البحر

والنادى وكل حته مريت عليها فى اسكندرية وانا صغيرة لحد اخر فترة المراهقة

[أبو زياد]

اولا آسف على التأخير فى الرد

أشكر الست فلانة على تواضعها فى كشف سنها الحقيقى (دانتى صريحة أكتر منه )

أنا بقى يا جماعة جيل وسط بين حليم و إيمان و فعلا هما بيجمعهم شىء مشترك

و كمان على الحجار - محمد الحلو - مدحت صالح

آخر جيل الرومانسية

فلانة الذكريات كتير عن حليم و عن الوقت يتاعه أكتر حاجة فاكرها الزحمة على السينمات لما بتعرض فيلم أبى فوق الشجرة فى العيد

لم أفكر أن أدخله لحد ما نزل فيديو و تسابقت لمشاهدته و كان حدث كبير

أكتر كلمات عبد الحليم تأثيرا فيا أغنية أعز الناس و يمكن سمعتها بعد ما غناها ب 10 سنوات لكن عبد الحليم ساهم فى تربية جيل من الشباب و جيل آخر من المراهقين اعتقد إنى منهم و مش عارف دى ميزة و الا عيب

مطلع الأغنية :

على طول الزمان

نقابل ناس و نعرف ناس و نرتاح ويا ناس عن ناس ولا ننسى حبايبنا أعز الناس .... حبايبنا

لأ الذكريات كتير و الأغانى التانية كتير

بس سيبكم لما الواحد كبر عرف إن عصر الأغانى جزء من التخلف و الهوان اللى أصبحنا فيه الآن

عشان ما نعلا و نعلا و نعلا لازم نطاطى نطاطى نطاطى

[Folana]

السلام عليكم ورحمة الله..............

أبو زياد ...ايه ....حيلك...حيلك..انت فاهم ايه؟؟؟.....انت فاكر انى كان عندى 6 سنين لما غنى سمراء ياحلم الطفولة؟....يابنى انا باقول انى بدأت احلامى وانا عندى ست سنين ..عبد الحليم ده كان خلاص فى رحمة ربنا ....

لا حول ولا قوة الا بالله...وعلى العموم ليكن ...يعنى لازم اقولها صراحة ان عندى سبعين..طب ايووووووون انا عندى سبعين سنة....هه اعترض بقى على خلقة ربنا.......... :wub: :unsure:

[yacho]

فولانه موضوع جميل وصاحبته اجمل ..

انا قعدت اعصر ف دماغى عشان افتكر انا كنت بحب مين .. كنت بحب مين

انا متاكده ان فى ممثل كنت باعيط بسببه .. انا عارفه انكم حتتريقوا ..

انا كنت بحب ..

اميتاب باتشان

كنت بازعل قوى لما يموت ف الفيلم والمشكله انه كان بيموت ييجى

ست سبع مرات ف الفيلم الواحد :wub: وانا قلبى يقع ف رجلى .. وكانت

نفسيتى تتعب قوى لما اروح :unsure: .. لغايه ما اتعالجت وبطلت الهندى :blink:

[Folana]

السلام عليكم ورحمة الله....

ياشو الجميلة ..ربنا يكرمك ويبارك لك يارب...انا سعيدة بمشاركتك.....انا كان هدفى اننا نفتكر اى ذكرى جميلة فى طفولتنا ..مش لازم تكون عاطفية..والا كده بقى حنكتب مراجع وموسوعات مش ذكريات ... :)

نانسى...اكيد انت جميلة واحلى من سعاد حسنى كمان ...ذوقك العالى بيدل عليك ..مش بيقولوا تكلم حتى اراك..وانت كل كلامك فى الديكورات والاذواق العالية...يبقى انت كده فعلا......اما حسين فهمى ده فكان قصة لوحده..بس من حسن حظه انى مش باحب الشُقر.....

حاحكى لكم ذكرى تانية جميلة فى حياتى....

وانا فى اعدادى...بقى انا كنت عازفة كمانجة ممتازة من اول اعدادى...لحد ماخلصت جامعة .....وكنت فى فريق الموسيقى بتاع المدرسة...انا واتنين من اعز صديقاتى وقتها...واحدة بتلعب على البيانو وبتغنى ...صوتها كان رائع..والثانية بتلعب على الجيتار..وهى السبب انى اتعلمت جيتار بعد كده فى ثانوى..واشتركت فى معهد للدراسات الحرة علشان اكون معاها واتعلمت جيتار ونوتة ...(ده غير العزف على غُطايين الحلل بتاع دلوقت)....

بافتكر ايام المسابقات اللى كانت بتقام بين المدارس ..وشهادات التقدير والجوائز اللى كنت باحصل عليها...وكانت احدى صديقاتى اللى صوتها جميل دى..بتغنى لنا بعد انتهاء المسابقات...اغانى فيروز....أخر ايام الصيفية..

شادى....دخلك ياطير الوروار....وكنا بنقضى أوقات سعيدة جدا...مش عارفة هم فين دلوقت ..لكن باتمنى انى اقابلهم تانى ونقضى ولو نصف الوقت الى كنا بنقضيه سويا...

وكنا واحنا راجعين من المدارس اللى بتقام فيها الحفلات والمسابقات ..نشترى خس من على العربية..ومن غير غسيل ..نمسح ورقة الخس بمنديل ورق..ونأكلها بالف هنا وشفا واحنا عمالين نضحك ونقول لو اهلنا شافونا حيرمونا فى ديتول او يولعوا فينا....

ونفضل نغنى الدنيا ريشة فى هوا ....واحنا النهاردة سوا وبكرة حنكون فين ....

اطرف حاجة بافتكرها وباضحك عليها ..ايام البروفات ...لما كانت ُمدرسة الموسيقى تجمعنا علشان البروفة ...وتقف مع الكورال تحفظه الاغانى...فأنا كنت اقف معاهم واغنى برضه ...:wub::)...

وطبعا علشان انا كنت مميزة فكانت مش بتزعلنى او تحرجنى..بس كان لها خصلة شعر كده تفضل تشد فيها وهى بتبص لى وتقول .." ياجماعة اللى مش فى الكورال يتفضل من هنا ويروح يمسك الالة بتاعته "...

افضل انا ابص حواليا على الحمارة اللى مش فاهمة دى ومش عايزة تمشى ..واكمل غنا مع المجموعة...المشهد ده كان بيتعاد كتير جدا ياعينى..

تصدقوا مافهمتش انها كانت تقصدنى الا اليومين دول وانا باسترجع شريط الذكريات ...

فاكرين الولد اللى كان فى فيلم الريحانى ..اللى كان بيقول تررلالالالم ...يظهر انى كنت عاملة زيه كده :unsure: :blink:

تصبحوا على خير ..ولنا بكرة ذكرى جديدة ..لو كان فى العمر بقية

[nash]

أة يا فلانه..والله حديث ذو شجون<<<<<< متعوب عليها والله

أحلي ذكرياتي بجد كانت مع شقيقاتي ..وبالذات أيام أعدادي....كان أحلي وقت لما أتخيل نفسي بكتب أشعار. :wub: .وياسلام لما تكون أشعار رومانسيه ومافيش مانع إجتماعيه ...قصدي يعني علشان عيد الأم .

المهم أذكر في مرة سمعت أغنيه لحليم..وكانت اللي مطلعها بيقول(ياخالق الزهرة في حضن الجبل) المهم ..عجبتي جدا وكتبتها..المهم إلا وأروح لإختي ..وهي أصلا حبيبتي..شوفتي يا مرمر الأغنيه اللي أنا قلفتها....ولحنتها كمان....طبعا المسكينه سمعتني..وأستحملت صوتي كمان..لا وعيطت ..متأثرة يعني....ويابنتي لسه في أخر كلمه..وبفتح التليفزيون ..إلا وألقي الأغنيه في وشي عدل....طبعا كنت في نص هدومي...,خصوصا أن قبلها بأسبوعين..أكتشفت أن قصيده الشاعر الهندي المحترم(طاغور ) برضه كنت لهفاها ومفهماها أني ألفتها...,كانت عن فضل الأم...وبرضه جت تكلمني وتقولي..نونو فاكرة القصيده اللي كتبتيها لماما في عيد الأم ؟؟ قلتلها أكيد....قالتلي .........قوليلي كده كانت بتقول أيه....والله رغم أن قلبي كان موغوشني علشان واقفتها ماكنتش طبيعيه..يعني لقيت أيدها ورا ظهرها..ومسنوده علي الحيطه بطريقه غامضه شويه..ولقيتها بعد ماخلصت إلقاء القصيده العصماء..بتطلعلي مجله حواء..اللي بقالها ألف سنه..واللي لهفت منها القصيده..وتجري ورايا وهي ناكشه شعرها<<<<<والله العظيم رغم أننا كبرنا وعقلنا لكن لسه لغاية دلوقتي بتنكش شعرها لما تخوف الولاد الصغيرين...

..............................................................................................................................................

طيب لو سمحتي يا فولانه..ممكن من يوم للتاني أرجع أكتب ..شويه ذكريات...تصدقوا والله حلوة

[khedr]

تصدقوا مافهمتش انها كانت تقصدنى الا اليومين دول وانا باسترجع شريط الذكريات ...

مش قلت لك

نهارك ابيض

نرجع بقي لحليم وذكريات الطفوله البريئه

لو تفتكروا زمان حليم دايما حفلاته كانت مرتبطه بشم النسيم

وطبعا الكل كان بيحضر اللي بيقدر عليه

سوداني ممكن

اللب بكل انواعه ممكن واو فاكهه ما يضرش

ونقعد مع بعض ..مختلف الاعمار ...مختلف الاشكال

مختلف الاتجاهات صباحا لأن كل واحد كان بينشن هو هيروح فين بعد الحفله ...الصبح

وفي مره ....كنا جعانين وعايزين ناكل

ومفيش زي اليومين دول ...خدمات 24 ساعه ولا الدنيا كلها مفتحه

ووجدنا في الثلاجه علبه سلمون والساعه 3 بالليل وطبعا كلناها

ونقذف بالفارغ يا اسيادي من البلكونه من غير بص طبعا ...ثقه مين يمشي في الساعه دي

وتنزل

وتنزل

علي راس عم الحاج اللي ماشي من حظه وحظنا

وهات

يا ...قلاله الادب...ياللي...ومش ياللي

ونزل اكبرنا يهديه ويعتذر له

فقاله ...يابني انا زعلان عليكم ...ليه ياجدو

حد ياكل سلمون الساعه 3 بالليل....

طيب يا جدو ...حققك علينا

وأي دمعه حزن لا

سؤال برئ

هي الطفوله البريئه تبدأ من سن كام وتنتهي امتي....؟؟؟

[أبو زياد]

يعنى أبلة فلانة من جيل أبلة فضيلة مثلا ؟ :P

بس واضح إنك إنتى و نانو و نانسى من جيل واحد :unsure:

لألأ قصدى أصغر من كدة بكتير :wub:

يعنى هو جيل المراهقين اللى شافو عبد الحليم لما اتعرضت أفلامه فى التليفزيون

كنا عندنا 6 أو 8 سنوات تقريبا

أنا فاكر لما شفت فيلم الخطايا - الفيلم لزق فى دماغى بطريقة غريبة - و تقريبا كدة عمل لى شبه عقدة

لأن بابا (أبو أبو زياد ) كان كل ما يضربنى أو حتى يزعق فيا كنت أقول إنه مش أبويا و أروح أسأل ماما :blink:

الفيلم دة كان التلفزيون مصر على عرضه مرات كتيرة جدا و ف اوقات مشاهدة عالية

و أظن إنه حتى اللان مأثر على ناس كتير ( بس مش بنفس الطريقة) :)

أخى خضر الطفولة البريئة من سن 2 حتى 12 سنة

أما الطفولة غير البريئة فهى من 2 حتى نهاية عمر الإنسان :)

[Folana]

السلام عليكم ورحمة الله...............

ياولاد..ياولاد...تعالوا معانا ...علشان نسمع ابلة فضيلة......

برضه مش حاقول... :) ...السن ده أسرار عسكرية ومحلفنى على العيش والملح انى ما اجبش سيرته...وبعدين ما انا قلت عندى سبعين ربيعا ....مش واضح كده؟....

ناش...ضحكتينى جدا ربنا يسعدك....طبعا ياحبيبتى تدخلى وتكتبى كل اللى انت عايزاه..الموضوع بتاعكم كلكم اصلا....

بنين وبنات...مراهقين ومراهقات...اطفال وشيوخ.....

الاحداث كثيرة ومتلاحقة فى الوقت الحاضر...لدرجة ان الواحد مش فاكر الحدث ده حصل امبارح ولا بكرة..علشان كده كل واحد فينا بيحن دايما انه يتذكر ايام جميلة فى حياته ...وانا احب جدا انى اشارككم الاحساس ده.....

ياشو تانى....كان الله فى العون..اميتاب بتشان حتة واحدة ده انت يا عينى تلاقى قلبك كان بيوجعك خمسين وجعة فى الدقيقة...:unsure:

خضر...عايزة اقول حاجة ومحرجة....هو يعنى ايه نهارك ابيض :wub: ...ولا اقولك سيبنى كمان كام سنة اكيد حافهم لوحدى :blink:

أبو زياد كمان وكمان ....فكرتنى بفيلم الخطايا...يا نهار ابيض ده انا كنت باعيط عياط كل ما اتفرج على عبد الحليم وهو مقهور كده ياعين امه...وعلى فكرة كلنا كنا بنفكر كده...اننا لقطاء وجئت لا اعلم من اين

فكرتنى كمان باغنية اعز الناس...ياسلام جميلة فعلا..." سنين وسنين ...تفوت ..مانحس بوجودها ولا وجودنا ..ولحظة حب عشناها ..نعيش العمر تسعدنا..ومين ينسى ومين يقدر فى يوم ينسى...شعاع اول شرارة حب...ولا اول سلام بالايد ولا التنهيد.........."

اااااييييييييييييييييه...دنيا........

[nash]

أهو رجعت تاني....

أحلي الذكريات ..كانت لما أمي تسافر..ربنا يعطيها الصحه يارب..ويطول بعمرها..

هي تسافر من هنا..وأنا علي طول علي المطبخ ..كنت محتفظه كده بأداة تعذيب صغننه(سلك فرامل العجله)وأروح لمرمر..وأقولها دلعيلي صباع رجلي الكبير..أة والله..المسكينه تبصلي بذهول....يعني عبط كده...وتقولي إزاي..أقولها طبطبي عليه وأحترميه..وإلا يومك مش فايت..تقعد تبصلي وطبعا عارفاني مجنونه..ومافيش حد هايدافع عنها..تقعد المسكينه تكلم الصباع..والله ولا كأنه بيبي صغير..وطبعا أنا واقفه لغايه لما تخلص..وأقولها خلاص..عفوت عنك...

...........................................................................................................................................

كان شقيقي الوحيد..ربي يحفظه..بيحاول يعمل علينا راجل البيت..أكيد بعد وفاة والدنا..ياحرام المسكين ماتشوفيهوش..لما أمي تسافر..والله كان بيترعب منا..أتاريه كان بيتحمي في أمي..وإذا شوفناة تلاقيه بيحاول يكون لطيف معانا ..يقوم يعمل الساندويتشات ويرتب البيت..ونظام أامروا وأنا أنفذ..بس أبعدوا عني..

............................................................................................................................................

حتي الأن أكرة أفلام الرعب..كنا لما نتفرج علي فيلم فيديو..قبل أختراع الديفي دي..ونكون في أمان الله..وطبعا الفرجه ماتحلاش إلا بالليل..وألاقي المحترم يصرخ صرخه رهيبه جنب وداني ...كنت باتنفض..اساسا أنا بكون ميته في نص هدومي...أأيييه أيام

............................................................................................................................................

أذكر ايضا شقيقتي الصغري صوتها كان أوحش من صوتي ..كنت لما أغني وأندمج مع الأغنيه ألقي مرمر تقولي أسكتي مش عارفه أذاكر...يوة ..رغم أن غرفتي بعيده عنها....طبعا لا يمكن أسكت..تقوم تخلي شرشر الصغننه تغني هي كمان..وبصوت أعلي..أضطر أسكت أنا علشان هي كمان تسكت..ونظام سيب وأنا أسيب..

............................................................................................................................................

مرة من المرات أقنعتني مرمر أن عبد الوهاب مات..قبل مايموت بجد ..واسألها يابنتي مات إمتي تقولي إمبارح..ياحبيبتي إزاي؟ ده ولا خبر واحد أتذكر في أي وسيله أعلام..تقولي أسكتي بس هوة أنتي عارفه حاجه..وأروح المدرسه وأنشر الخبر..وطبعا كان منظري وحش جدا...

........................................................................................................................................

أيام ثانوي والله كنت شاطرة جدا بس تقريبا كده ماكنتش أقدر أقعد في الفصل أكثر من ثلاث حصص..أو بالكثير أربعه..وأعمل أي حاجه وأنطرد من الفصل ,,وبسرعه جري علي المكتبه..ياسلام أقعد فيها لغايه ماتمر الحصه..وإذا شافني أستاذ..من الأساتذه..والله يبصلي علي أني حاله ميؤس منها ويقولي تاني يا ناش..كانوا مستحمليني علشان تفوقي..يوم نجاحي في الثانويه العامه..والله مديرة المدرسه أتصلت بينا..تقولي مبروك علي ناش خرجت من المدرسه..

...........................................................................................................................................

أأووة... أيام يا ولاد ياولاد تعالوا معانا علشان نسمع أبله فضيله..كانت أحلي أيام..وياويله اللي يتنفس وأبله فضيله بتتكلم..يبقي يومه مش فايت..

..........................................................................................................................................

أحتمال أرجع تاني..الظاهر عايزة أفضفض..شكلي داخه علي دور أكتئاب..كل سنه وأنتم طيبين..الشتا علي الأبواب

[نانو]

يا جماعه حرام عليكم بقه تقليب الذكريات بأغنيه اعز الناس... :unsure:

يالا ما علينا خلينا في شويه ذكريات جديده

معظم ذكرياتي وانا صغيره افتكرها مع اخويا حبيبي لانه اكبر مني يحوالي سنتين و كنا قريبين جدا من بعض

و مره و ماما في الشغل كنا بنلعب مع بعض ماتش ضرب بالمخدات و تطور الموضوع الي ماتش كراتيه فوق السريرو مره واحده .....هوووووب

لقينا لوح من السرير اتكسر اللي هيا الموله يعني....احنا قلنا خلاص احنا انتهينا و ماما لما تيجي من الشغل هناخد علقه محترمه

بس و لقينا ماما بتخبط ووصلت طبعا جرينا اخدنا اللوح المكسور و رحنا مخبينه و بعد شويه ماما دخلت ترتاح ...فتحنا باب الشقه في هدوء و راح اخويا اخد اللوح و رماه في شارع بعيد عن البيت و كان بعيد بجد لان عارف ان ماما بتحط العربيه في اي مكان قريب من البيت و رجع تاني و احنا طبعا مش قايلين انه نزل اصلا

و لسه قايله الموضوع ده لماما من سنتين بس ....ردت هيا وقالت اه علشان كده الواح السرير مهويه و بعيده عن بعضها :blink: :wub:

[أبو زياد]

خلاص يا أمى عرفنا سبعين ربيعا يعنى لو اعتبرنا الصيف ربيع

بتوقيت مصر أم الدنيا يبقى السنة فيها 24 ربيعا يبقى عمرك 135 :blink: هه ؟ لأ طبعا :huh:

تانى لو قلنا 2 ربيع فى سبعين يبقى ؟؟؟ أييييييييوة 35 :)

صح كدددة ؟ ومعانا 3 من الأول خلاص 38 كويييس ؟ :blink:

المهم بقه فيلم الخطايا صحيح كلكوا اتأثرتو بيه زيى ؟

وكمان اغنية الناجح يرفع إيده

فضلنا ننجح و نذاكر و منه لله دخلنى كلية الهندسة عشان الاقى نادية لطفى (س س )

راح طالعلى س س مذكر فى محاورات المصريين - (بس ما تصحيهوش) :wub:

ياااه تصدقوا فعلا يا جماعة فعلا عبد الحليم كان ليه دور كبير فى حياتنا - مش عايز أقول منه لله -

بس ربنا يغفر لكل متوفى على ملة الإسلام

[Folana]

خلاص يا أمى عرفنا سبعين ربيعا يعنى لو اعتبرنا الصيف ربيع

بتوقيت مصر أم الدنيا يبقى السنة فيها 24 ربيعا يبقى عمرك 135 :blink: هه ؟ لأ طبعا :huh:

السلام عليكم ورحمة الله............

انا قلت برضه ابو زياد ده مافيش منه اتنين ...هو كده تمام ...135 سنة ..يعنى انا تبع هيئة الاثار دلوقت...عندك فكرة ان اى مبنى بيمر عيه 100 سنة بيتسجل أثر ويتبع هيئة الاثار......

بمناسبة عبد الحليم..كان احمد فؤاد نجم كاتب عنه ..حادور عليها واكتبها لكم

ذكرى اخرى من ذكرياتى اللى أثرت فى نفسى وأثرت على سلوكى للان اذا مريت بنفس الموقف...

حارجع تانى وانا طفلة خمس او ست سنين برضه...بقى انا والعياذ بالله من قولة انا ..كنت وباقول كنت ..من الاطفال اللى تحب تبص لوشهم..براءة وهدوء وجمال ربانى ..و..,,,احم ..ايوه معاكم اهو...

فكانت خالتى تحب تقعدنى معاها وتاخدنى معاها فى كل مكان تروحه....وفى احدى المرات اخدتنى جنينة الحيوانات ..ايام ماكانت الحيوانات فى عز شبابها وبخيرها...وقعدنا فى جزيرة الشاى وطلبت لى دندورمة اى لا جلاس اى ايس كريم اى جيلاتى ...

وانا بقى فضلت اتفرج على البجع ابو رقبة طويلة ده ...واتلخمت خالص لانه خطف منى البالونة بتاعتى والى كنت منزلها لحد رقبته....وبعد شوية لقيت الجرسون جه ..وشال كل الاكواب من قدامنا بما فيها الايس كريم بتاعى واللى كنت لسه ياعينى مادقتش منه حاجة.....

وماقدرتش اعترض ولا اتكلم ..بس حزنت جدااا....تصوروا حأعيط دلوقت ...(دموع حسرة غزيرة)...

الموضوع ده ساب نقطتين سود فى نفسيتى..الاولى انى بدأت أكره خالتى دى وحسيت انها هى السبب لانها مادفعتش عن كوب الايس كريم بتاعى

والتانية بقى انى الى الان لايمكن اى جرسون يقدر ياخد منى حاجة ...لو جه يمد ايده على الطبق ولا الكوب ولا اى حاجة الاقى ايدى ماتت على ايده ..وادخل عليه واقوله عندك...(على طريقة ستى اطاطا)..سيب كل حاجة وانصرف ..لما اخلص حانادى عليك ........

ايام.... :blink: :)