أيها النظام الفاسد ... فلتذهب إلى الجحيم غير مأسوفاً عليك

[se_ Elsyed]

لم يعد فساد النظام في مصر أمر يمكن أن السكوت عنه

أو نقراً الأخبار عن مآسيه وبلاويه وجرائمه التي يرتكبها من غير أن تتحرك مشاعرنا إن شالله حتى بأضعف الإيمان وهو التعاطف بالقلب والدعاء عليهم جميعاً

وأخر جرائم هذا النظام والتي تتكر كل عام في توقيتين محددين لا يختلفان أبداً هما :

1- جرائم تُتركب بحق المعتمرين المصريين في مواسم العُمرة المختلفة

2- جرائم ترتكب بحق الحجاج المصريين في موسم الحج

فتحت سمع وبصر الحكومة المصرية المتسترة على الفساد والذي تستفيد منه بشكل مباشر يتم بهدلة وقتل المعتمرين المصريين كل عام بشكل منظم

ومن منهم لم يمت فيتم النصب عليه من مكاتب سياحة وهمية تُنشأ تحت سمع وبصر الحكومة وتقوم بنهب ملايين الجنيهات من البسطاء والغلابه والحالمين بزيارة بيت الله الحرام لأداء إما فريضة الحج أو العمرة ( لسه واحده معانا في المنتدى وهي أخت عزيزة وغالية .. لسه منصوب عليها في مصر لإنها غلطت غلطة عمرها ولم تأت مباشرة من أوروبا حيث تعيش وفضلت أن تمر الأول على مصر أم الدنيا )

وهؤلاء المفسدون في الأرض يفعلون ذلك بدون أدنى تأنيب للضمير وبدون التفكير عن كيفية حصول هؤلاء البسطاء على النقود القليلة التي يؤدون بها الفريضة وخصوصاً العُمرة

وأعتقد إن اللي موجودين هنا في السعودية عارفين أنا باتكلم عن إيه

بأتكلم عن ناس بسطاء ومعظمهم ريفيين مدبرين بضع مئات من الجنيهات بالضالين وممكن تكون تحويشة عمره لكي يروا بيت الله الحرام

وإذا بهم يُفاجئوا بدولة حرامية ومسئوليها لا يتقون الله ويقوموا برميهم في التهلكة ..

وهؤلاء الغلابة ينقسمون قسمين

قسم يتم النصب عليهم في مصر وتنهب قروشة ولا يستطيع الحصول على تأشيرة ويفر الهارب بجريمته وبملايينه وإبقي حصليني يا حكومة

أو يتم تسفيرة ليُفاجأ بإنه لا ترتيبات ولا فنادق ولا وسيلة للرجوع

وأخيراً هناك خبر تتداولة الصحف ووسائل الإعلام عن مأساة 30 ألف مصري وأكرر 30 ألف مصري مرميين من بعد رمضان في الأدرن في العراء ويلتحفون السماء وينتظرون وسيلة أنتقال تنلقهم من الأدرن إلى مصر .... يعني الواحد لما بيبقى في أحد المطارات ورحلته تتأخر ساعة ولا إتنين بيبقى هايموت من الغيظ ومن ملل الإنتظار ... في حين دول بقى لهم أكثر من إسبوعين مرميين رمية سودا في العراء

وبما أن الأردن هي طرف في الموضوع فقد يظن البعض أنها مشاركة في الجريمة

ولكن

الأردن بعيده كل البعد عن هذا لإن من شروط رحلة العمرة أن يوفر مكتب السياحة وسائل الإنتقال والسكن منذ خروجه من مصر وحتى عودته ولابد أن يكون هناك مُنظمين للرحلات مرافقين لتلك الأفواج

وكانت النتيجة يا سادة إن 28 مُعتمر من كبار السن قد ماتوا حتى الآن نتيجة إلقاءهم في العراء وبدون أدنى مستويات للمعيشة الأدمية لإن اللي ذهب الأردن عارف التجهيزات الرديئة الموجودة في ميناء العقبة وكذلك معاملة كثير من الأردنيين السيئة بالإضافة إلى هذا العدد الضخم الذي يصعُب إستيعابه لعدة أيام في أي ميناء

وبالأمس والأمس فقط جاء خبر في التليفزيون المصري على إستحياء يقول بإن الحكومة المصرية ستتحرك بشكل عاجل لنقل هؤلاء المعتمرين

وحسبنا الله ونعم الوكيل على مبارك وحكومته وأيامهم السودا

العُمرة والحج بيجيها ناس بالملايين من كل فج عميق ... إشمعنى المصريين اللي بيحصل معاهم كده ؟

[محمود الشاعر]

علشان مصريين

[نانو]

و الله الواحد بقت نفسه بتغم عليه من سيره النظام و اللي فيه

انا بيتهيئلي ما فيش دوله في العالم كله فقيره او غنيه بتظلم شعبها الظلم ده

حسبنا الله و نعم الوكيل

[achnaton]

[size=5]العزيز ابوعمر ..

احبائى .. اللنك التالى جانى بالبريد الالكترونى ..حكاية بهية .. افتحه واقراه ..والخلاص من عند الله ..وحسبى الله ونعم الوكيل ..

http://baheyya.blogspot.com[/size]/

تم تعديل 2 نوفمبر 2006 بواسطة achnaton

[nash]

الخبر ده قريته في شريط العربيه من يومين..وربي فكرت فيه حاجه غلط..يعني مش ممكن يكون حقيقي

الأن تأكدت فعلا أنه صحيح...والله أفترا وظلم علي الغلابه..حسبي الله ونعم الوكيل

عارفين يعني أيه الحدود الأردنيه..؟؟؟ وربي سمعت عنهم كل مايندي له الجبين..من معامله قريبه من معاملة القتله...ولا يهونون أخوانا في المعبر السوري..وطبعا مع أساتذتهم الموجودين في المعبر المصري..الحمدلله ربي ماعرضنيش لهكذا موقف....وربي يديم نعمه الطيران....بس هي مرة واحده وكانت تجربه سوداء بمعني الكلمه...

طول ماالكابتن جيمي عنده طيارته..والكوتش والده يرفل في النعيم...وماما سوزي بتحل مشاكل الطفوله والقراءة للجميع...طول مايهون قرف الشعب..المهم الريس وولاده وحرمه المصون يكونوا راضيين عنا

حسبي الله ونعم الوكيل

[pediatrician]

إشمعنى المصريين اللي بيحصل معاهم كده ؟

لأنهم لا يدافعون عن أنفسهم :lol:

للأسف الشديد أسمع كثير من الناس ينتقدون النظام و ينعون عليه أفعاله

و لكن دورهم يقف عند الانتقاد فقط

لماذا يتخلى مبارك عن امتيازاته و من حوله؟!

بجد لو عملوا كدا يبقوا أغبياء!!!!

إيه اللى يخليم يتنازلوا عن حقوقهم كدا بدون ضغط؟!

محدش بيدافع عن حد

لو الناس اللى بتشتكى دى منزلتش الشارع و دافعت عن حقوقها محدش هيجيبلها حقوقها

هى الدنيا كدا

[sayed_ossman]

صحف روسيا لمبارك: لا تصدر لنا الديكتاتورية

[Salwa]

كنت اتكلمت عن نفس الموضوع لكن فى باب آخر ...

http://www.egyptiantalks.org/invb/index.php?showtopic=24204

والحقيقة فقدنا حتى الامل ان اى مسئول فى يوم من الايام (( يسمع اى صوت غير صوت نفسه.))...

لنا الله...

[achnaton]

كنت اتكلمت عن نفس الموضوع لكن فى باب آخر ...

http://www.egyptiantalks.org/invb/index.php?showtopic=24204

والحقيقة فقدنا حتى الامل ان اى مسئول فى يوم من الايام (( يسمع اى صوت غير صوت نفسه.))...

لنا الله...

الأخت الفاضلة الاستاذه سلوى ..

الحاج ابو عمر الشهير ب س س

صحيح أنا مقاطع الموضوعات السياسية .. ومكافحة الفساد .. لكن فيه مآسى بتجعل الواحد غصب عنه دمه يفور .. ولما بأدخل على المواقع التى تحمل اسم مصر من باب الحنين .. بأشوف العجب .. لو تعرفوا فيه كام باخرة .. على ارصفة شرم الشيخ والغردقة ووغيرهما من الموانى السياحية فى جمهوريتنا البهية لتعجبتم معى .. فيه إعلانات دائمة من الشركات السياحيةهنا عن رحلة بحرية على باخرة سوبر بتلف موانى البحر الاحمر المصرية 15 يوم الرحلة ب 470 يورو بما فيها 5 ايام فى الغردقة فندق خمس نجوم إقامة شاملة بما فيها المشروبات - غير الكحولية -

ولا ادرى سببا واحدا دفع المسئولين الى بيع اكثر من 60 باخرة ورثناها عن ابائنا .. وبعدين نفتح الباب امام الافاقين لتشغيل هبارات ايوه هههههبارات كهنه .. هل قرأتم موقع" هنية " الذى رصدت لكم فى البداية الرابط بتاعه ؟؟؟

والحقيقة المرة أن الواحد بعد أن أدان فى حوادث النقل السابقة والمتكررة برا وبحرا .. وزير المواصلات كشف لنا حادث الهبارة الاخير .. أن القاتل الفعلى لهذا الوطن مش الوزير ولا حتى العمده الالكترونى رئيس الوزراء .. ولا يمكن تحديد .. مين هو القاتل .. دا مش بيقتل افراد من الشعب .. ده قتل وبيقتل البلد كلها .. واقصد بالقتل هنا جميع انواعه .. والعنهم وأقذرهم هذا القاتل الذى قتل الضمير .. وعن الضمير القتيل تكلمت زمان عنه ..

وكنبت أنعيه وقلت :

مات الضمير..!

والحقيقة دا ماماتشى ..دا تم اغتياله

وراح لرب العباد يشكى ليه حالـــه

لقى غلابا كتير من مصر

على باب الكريم بيبكوا قدامـــه

---------------------

مات الضمير ..! ولما شاف الغلابا بتبكى

بكى تمام زيهم .. وقعد كمــان يحكى

على اللى شافه فى ارض مصر المحروسة

من نفاق وسرقة ونهب وعنطزة تركى

أيام ما نعيت الضمير .. كان جدى الشيخ حسن " رحمه الله علية " دائم السؤال عنى .. ويومها حكى لى حكاية واحد حكيم زمان .. ضاقت به الحياه واللى شافه ..واللى عاناه .. فخرج الى الشوارع والحارات .. يصرخ وينادى .. قتلوا البلد يا ولاد .. وانا مسكت القاتل الشرير .. وظل يكرر طول النهار والليل ..قتلوا البلد يا ولاد .. وانا مسكت القاتل الشرير .. سمع بندائه الامير .. فارسل رئيس العسس يسأله فين المجرم القاتل .. فقال له الحكيم عندى فى الدار .. رابطه جوه صندوق .. لغاية ما يعطش زى كل الناس ..وبجوع ويموت زى اللى ماتوا .. فلما سمع الامير هذا القول جمع كل اعوانه ..واصحابه واخوانه وحرسه .. وقال لازم أشوف القاتل ده شكله إيه ؟؟ واسلمه للحرس يسحلوه .. وسار فى طابور من المسئولين قاصدين دار الحكيم ..ولما وصلوا .. قال الحكيم.. الدار ضيقة .. وواحد واحد يدخل يشوفه ويقفل عليه الصندوق تانى ويخرج ..ويدخل اللى بعده .. وابتدأ الامير .. دخل ..وخرج ..وقد أصفر لون وجهه ..مطأطأ رأسه .. مكتوم نفسه .. ولم ينطق بكلمه .. وتعجب باقى الطابور ..وافراد الشعب المحسور .. وكل ما يدخل واحد من طابور المسئولين .. يخرج ألعن شكلا من الامير .. واصبح الطابور وكأنه فعلا طابور عزاء ..

فيه حد عرف القاتل المجرم كان بيقول لهم ايه ؟؟؟ .. اوعمل لهم إيه ؟؟ عشان الكل ينكتم ويحزن ؟؟ ويا ترى من القاتل ؟؟؟

نقول القاتل مين ...!!

الشيخ الزاهد ده فعلا كان حكيم .. ربط مرآه فى قاعدة الصندوق ..واللى يفتحه يلاقى صورته قدامه .. بداية بالامير وانتهاءا بالغفير .. وعليك العوض يا رب ..

بس خلاص

تم تعديل 6 نوفمبر 2006 بواسطة achnaton