مغتربي الإمارات

[alshater]

بسم الله الرحمن الرحيم

إخواني المغتربين ....بعد ان قرأت ما كتب في هذا الموقع قررت فتح موضوع لمغتربي الإمارات و الهدف منه حاجتين إتنين:

1- إنو نحاول نتلم مع بعض في بلد زي الإمارات يسكنها غالبية غير عربية.

2-تقديم الصورة الواقعية للإمارات و أسلوب المعيشة فيها بدون خيالات و لا تضخيم.....

و طبعا أنا شخصيا عامل الصفحة دي عشان البند التاني لأنو ياااااااما شفنا ناس كانت جاية و جايبه معاها الفاس و الغلق عشان تغرف

المهم :

أنا محاسب / محمد أحمد الشاطر

و تليفوني 00971505046443

و تحت الأمر في أي إستفسار عن الوضع و على كل حال أنا إن شاء الله متابع كل يوم و حزود الصفحة بكامل المعلومات أول بأول و الله ولى التوفيق

[alshater]

أنا بس حبيت أوضح إنو المعلومات اللي موجودة عن دبي و الإمارات في الموقع قدمت لأنو البلد دي بتتغير يوم عن يوم لمواكبة التطور بعض التغيير حلو بل يكاد يكون رائع و بعضو لأ و إن شاء الله نوضح لبعض هنا المميزات و العيوب....

دبي بلد جميلة و لكن لمن يملك المال

إذا كان عندك فلوس عاوز تستثمرها فأنا أنصحك بدبي

و لو معاك فلوس مش عارف تصرفها فين....صدقني مش حتلاقي غير دبي

و نكمل بعدين...

[eltayer]

أهلا بيك محاسب محمد الشاطر

انت بموضوعك ده رجعتني للكتابه في المحاورات بعد ما كنت انقطعت عنها

لفتره طويله

المهم انا كمان من حملة شعار محاسب بس مبشتغلش محاسب

للتواصل ولم الشمل المصريين او العرب اللي الواحد مشفهمش هنا خالص الواحد هنا حياته كلها مع الهنود بس

ارجوا التواصل ولم شمل المصريين في الامارات

تم تعديل 21 مارس 2007 بواسطة eltayer

[gomaa]

شكرا جزيلا اخ الشاتر جعلة الله فى ميزان حسناتك

[lonly in cold night]

شكرا جزيلا اخ الشاتر جعلة الله فى ميزان حسناتك

[eltayer]

بعد طول انتظار عاد لكم الطاير من جديد

للم شمل المغتربين بالامارات

عوده قريبه

[alshater]

صباح النور يا جماعة ...معلش يمكن إتأخرت إني أدخل أشوف الناس بتاعتنا لكن إنتو فاهمين بقى إن آخر السنة دي فيها الشغل كللو و أنا إتشرفت بيك يا إبراهيم و حكلمك في أقرب فرصة...و أنا إسمي الشـــــــأطر مش الشاتر -_-

[eltayer]

انتوا فين ياجماعة

تم تعديل 21 مارس 2007 بواسطة eltayer

[alshater]

انا عاوز يا جماعة أوضح حاجة للناس اللي مفكرة دببي الجنة الموعودة....

دبي هي مدينة مصنفة من الأغلى عالميا..و أغلى حاجات فيها : السكن و التعليم و العلاج (كشف أو دواء) يعني عشان تيجي دبي لازم تعمل زي الناس و تجيب معاك تموين دوا يكفيك لغاية النزلة الجاية... :wub: و إعمل حسابك إنك تاخد الدورات اللي إنتي محتاجها في مصر عشان ما تاخدش خوازيق في الكورسات هنا ...مع العلم إنو عندنا الدورات أرخص و أجمد....و لازم تتعلم إنجليزي كويس عشان اللغة هنا يا إنجليزي يا أوردر(هندي يعني) و دا لأن الهنود هنا محتلين كل الأشغال و دا بيأثر تأثير مباشر على الرواتب لأنو الهندي مش فارق معاه إنو يعيش في أودة 6x4 مع 20 واحد عشان يدفع 300 درهم في الشهر و كمان لأن فرق العملة عندهم عالي يعني أقل مبلغ يحولوا بلادو ممكن يعمل معاه شغل في الهند ..و دا مش نافع معانا كمصريين و السبب التاني في تدني الرواتب هيا الناس اللي جايه زيارة عشان اللي جاي زيارة بيبقى عاوز يشتغل أي حاجة و بأي مرتب بس المهم ما يرجعش مصر (إيد ورا و إيد قدام) يعني لما تيجي تروح شغل صاحب الشغل بينفخك في الراتب و لو مش عاجبك مع الف سلامة ..في الف واحد غيرك -_- يعني يا سيد يا محترم لو نازل زيارة تعمل حسابك لو قاعد في دبي على 800 درهم سكن شهري على الأقل في أودة مع تلاتة غيرك...(على الأقل برضو) و إعمل حسابك إنك لو نزلت الشارقة(تبعد حوالي 17 كيلو عن دبي) المواصلة ب 5 درهم رايح و زيهم جاي و حوالي 3 ساعات في الطريق و دي الناس بتسميها رحلة العذاب اليومي للذهاب للعمل...و أنا أتوقع إن المبلغ دا حيزيد قريب و دا لأنو حكومة دبي حتخللي اللي يدخل دبي بسيارة يدفع 4 درهم حاجة كدا زي الكارته :blink: بس على نضيف..و دا حيطبق من اول شهر 7 سنة 2007 و دا بقى من الصور الحضارية في البلد دي عشان الكارته دي بتدفع بطريقة لذيذة..كل عربية حيكون فيها بطاقة الكترونية سابقة التحصيل...يعني بتشحنها زي الموبايل كدا -_- و لما تعدي على البوابه الألكترونيه دي بيتخصم المبلغ أوتوماتيكيا و لو البوابة هرشت إنك مش حاطط البطاقة في العربية بتصورك كاميرا و بتدفع غرامة (المبلغ اللي بيناقشوه 10,000 درهم) ...دي مش قصص خيال و البوابات ركبت فعلا و الكارتة إتحدد مبلغها فعلا و أنا قريت القرار بنفسي لكن الحيثيات قيد الدراسة.....

و نكمل بعدين...

[smart_7]

السلام عليكم ورجمة الله وبركاته

بصراحه انا بشجعكم و انا نفسي يكون في اتصال ين المصريين الي قاعدين في الامارات

بما اني عايش في الامارات

او ممكن على الاقل يكون تجمع على في المنتدى

و كل واحد يساعد التاني

و اتمنى ان الموضوع ده يلقى قبول

وشكرا

محمد هزاع

hazzaa85@hotmail.com

[desert_eagle70]

سلام عليكم .. انا سعيد جداً بوجودى معاكم هنا وبشكر الأخ الشاطر على الخصوص انه فتح الموضوع دة وانا معاكم .

[Beauty lolo]

:lol: اذيكم ياجماعة انا جديدة هنا وجديدة في الامارات برضه بقالي بالظبط 5 شهور الا خمس ايام بس المدة دي كانت كفاية اوي اني اتأكد من كلام الشاطر فعلا كل كلامه صح مية في المية وانا باجربه عملي كل يوم انا شغلي في دبي شارع الشيخ زايد وبيتي في الشارقة الصناعية يعني فعلا رحلة عذاب مرتين يوميا لحد ما عيني بتطلع ده غير بقي المصاريف ، هنا كل حاجة نااااااااااااااااااااااااار والعة مع ان دبي جميلة جدا بس اي مكان لازم تروحه يبقي لازم تكون عامل حسابك يادوب علي 1000 درهم عشان بس تتبسط ومش هاتكون زي بقية الناس برضه. انا وانا في مصر قبل ما اجي هنا الامارات عمري ابدا ما كنت اتخيل اني انا وجوزي احنا الاتنين بس ممكن نصرف في الشهر 5 الاف درهم من غير ما نوفر حاجة اللي كان يقولي كده ساعتها كنت قلت مجنووووووووون ، الناس بتحسبها ازاي في مصر؟ قول مثلا مثلا يعني لو حسبنا راتبي انا وجوزي قول 5الاف شهريا يبقي كام مصري قول حوالي 8 الاف جنيه ياخبر ابيض يبقي معانا 8 الاف جنيه في الشهر ده احنا كده خلاص عدينا وبقينا من اصحاب الملايين يادوب قول في الشهر هانصرف يلا ألف جنيه نشبرق نفسنا فسح وأكل ولبس ودلع وخروجات وكل ده ونوفر 7 الاف جنيه كل شهر هما 5 شهور يادوب ونرجع بلدنا . خلينا واقعيين الناس في مصر لازم بتفكر كده ، انت وانت لسة في مصر اكيد كنت بتفكر كده بس والله والله ممكن الواحد في خروجة واحدة وهو ماسك ايده علي الاخر يصرف الفين درهم يعني حوالي الاف جنيه او حاجة زي كده بس برضة مهما قلت اي حد في مصر هايقرا كلامي مش هايصدقني وهايقول عليا مجنونة انا خايفة والله عمرنا يضيع في البلد دي علي الفاضي .

ده غير بقي انك بتتعامل مع ناس اجارك الله اشي هنود علي فلابنة علي كل لون يابتستة ومطلوب انك تتعامل معاهم كل يوم ويكونوا معاك في الشغل ومنصبهم اعلي منك وانت مجبر تحترمهم مع انك لو انت في بلدك عمرك ما هاتبصلهم غير انهم خدامين عندك او زبالين في الشوارع . ده مش غرور بس الواحد بتصعب عليه نفسة واولاد بلده لما يشوف واحد هندي مثلا واقف يزعق ويشتم في واحد مصري بيشتغل عنده بتبقي حاجة تغيظ

كمان حاجة في البلد دي لاحظتها هنا في كمية انحلال في البلد فظيييييييييييييييييعة يعني هنا ممكن الواحد يضيع وبسهولة ربنا يكفينا شر كل حاجة وحشةويرجعنا بلدنا بالسلامة ده مافيش احلي من مصر مهما كان والله

انا عارفة اني سودت الصورة اوي بس عموما دي شوية من عيوب دبي المرة الجاية هاتكلم عن مميزاتها وممكن برضه الشاطر يساعدني او الطاير ونشوف بعد كده مميزاتها اكتر ولا عيوبها اشوفكم علي خير ان شاء الله

[عادل أبوزيد]

أشد على أيديكم جهد عالى على مستوى حرفى و يتسم بالموضوعية ، زار محاورات المصريين أمس 409 زائر من الإمارات أظن أغلبهم أكيد مصريين ، ليت كل المصريين فى الإمارات يشاركون فى محاورات المصريين أو على الأقل يتصفحوا هذا الموضوع.

و أدعوكم لتعدد الموضوعات حتى لا نصل إلى موضوع به آلاف المداخلات و مئات الموضوعات الفرعية و يصبح من الصعب تصفحه أو الإفادة منه بالقدر الكافى .

أضفت عبارة من الإمارات باللون الأحمر و التى كنت قد نسيتها عند كتابة مداخلتى أمس

تم تعديل 29 مارس 2007 بواسطة عادل أبوزيد

[forex]

المشكلة الكل ماكل مقلب في دبي و الامارات

انا كنت في السعودية كا راتبي 5 الاف كنت بوفر 4 الاف كل شهر

بيتي اربع غرف كان ب 12 الف باحلى منطقة

الان انا في الامارات راتبي 10 الاف انبسطت اوي لما اجاني العرض ده و الناس نصحتني مترحش ما سمعتش الكلام

قلت 10 الاف اضيعهم ابقى مجنون

انا الان ساكن في الشارقة شغلي في دبي

بيتي غرفة و صالة ب 35 الف

ساعتين لما اوصل الشغل كل يوم

مصروفي الشهري مع ايجار البيت تقريبا 8 الاف

اذا صار معي حالات طارئة بتداين فلوس

الله يرحم ايام السعودية

[Tafshan]

ايه يا جماعه قلبتوها دراما قوى كده ليه ...

انا دفعة 2002 ... خمس سينين في عين العدو :lol:

من سكان الشارقة و باشتغل في ش الشيخ زايد ...

من غير زعل ... المصريين حالياً بينافسوا الهنود من حيث تدنى الرواتب .. من خمس سينين لمل جيت ما كانش في بواب و لا عامل امن مصري .. ده الوقت تقريباً اغلب البوابين و عمال الامن و سواقيت التاكسي مصريين برواتب تكاد تكون مجانيه بالمقارنه بمستوى المعيشه .. شقق المشاركه يستأجر فيها سرير ب 1000 درهم في الشهر بالمشاركه مع ثلاثه في غرفه في شقه ثلاث غرف .. الوضع بشكل عام بقى سيئ جداً ...

عموماً .. خلينا عمليين ..

نبدأ بالطرق البديله :

شارع الامارات ؟؟

دبي العابر ؟؟

دي شوارع اسهل مرورياً من شارع الاتحاد ال"واقف" 24 ساعه .. و خاصةً في وقت الذروه ..

ح ادور على خريطه و ارجع لكم :lol:

[القرموطى]

السلام عليكم ورحمة الله وبركاته ...اخاونى الافاضل اوالااحىى مجهود زى ده وافتكر كان الاخ ياسو عمل كده وبعد ما الناس كلها اتشجعت هرب وسبنا ومحدش عارف راح فين لحد الحين .... المهم ياريت نعرف نتجمع لان بجد المصريين مشهورين جد انهم ... اكثر فئه متفككه فى الغربه ...فهل احنا كده ...

وبالنسبه لمستوى المعيشه اسمحولى انى ادلوى بدلوى ...اسف بالجردل الى معايا ...

طبعا الناس كلها بتنظر للى عايش فى الامارات على انه معاه حجتين

1- جردل كبير بيرميه فى بير الفلوس الى هنا وطبعا كل يوم الصبح بنرمى الجردل ده مرتين يطلع مليان فلوس كتير جدا نصرف منها حولى 2 درهم اكل وشرب والازى منه

2- دفتر كبير فيه حوالى 1000 ورقه والدفتر ده فيه عقود عمل ومحدش عارف ان الواحد عمل قرد عشان عرف يجى هنا

وطبعا الناس تسمع كله 5 الف و4 الف راتب والكلام ده تلائى ان بقه وصل لحد لسان الجزمه من اتساع الفتحه وميعرفش ان هنا ده حد الفقر الى كتير جدا من المصريين نزلوا تحته

المهم ...ياريت نعرف نتجمع ونتعرف على بعض ونحاول اننا نكون جاليه كويسه مترابطه زى اخواننا السودانيين مثلا ولا حتى زى اخوانا الباتان مثلا ,,,, يا جماعه دا احنا الجاليه الوحيده الى منعرفش بعضوالكل بيقول اننا رافعين شعار .....عيش ندل تموت مستور

[رمضان]

السلام عليكم ورحمة الله

اولا احب اعرفكم بنفسي لاني من فترة ما شاركت في المحاورات انا اسمي رمضان من مغتربي الكويت من مجموعة المحاورات فرع الكويت

انا بدعوكم للرجوع لموضوع أجندة المحاورات فرع الكويت والاستفادة من تجربتنا في الكويت لانها بصراحة من وجهة نظرنا تجربة فريدة جدا والاخ الطاير عارف تفاصيلها.

احنا بكل بساطة قدرنا ومن خلال محاورات المصريين اننا نتجمع ونتقابل بشكل اسبوعي تقريبا وقدرنا اننا نتشارك في اشياء جميلة جدا ونفيد بعض وان شاء الله فيه مشاريع قادمة باذن الله والتفاصيل هتلاقوها في الموضوع اللي قلت لكم عليه

[القرموطى]

واضح ياجماعه ان وجودنا فىالامارات بلد البترول غيرت نفوسنا دا احنا حتى مش عوزين نشوف بعض ولا حتى نعرفف بعض .....ليه بس كده ... دا احنا كلنا هنا جيران فى بلد واحد ه وبنغرف من بير فلوس واحد يبقى ليه مش عوزين نعرف بعض يا جماعه

[weh263]

اللهم ارحم الشيخ زايد لما كنا احنا المصريين فوق الجميع فب مصر وكانوا بيقولو انتم الي علمتونا ازاي نعيش

اما الان فحدث ولا حرج

[tahereyad]

[[color="#0000FF"]size="4"]الاخوه الأعزاء رفقاء الكفاح بدبي,

أحب أولا أرحب بيكم في دبي (برغم أني ممكن أكون آخر واحد وصلت هنا) من 11 شهر بالضبط, لكن الحقيقه أنا كنت بقرأ حواراتكم من زمان (يعني أوّل ما جالي عقد العمل هنا لما كنت في مصر),, المهم اني وقتها فعلا فرحت جدا و حسيت أن فعلا لما أوصل دبي هلاقي أصدقاء بسهوله,, لكن من حظي أن المنتدي كان متوقف, المهم الحمد لله, أرجو أننا نتواصل عن طريق المنتدي وبعدها ممكن يكون في لقاءات وان شاء الله نستفيد من خبرة الاخوه فالكويت, أنا أسمي طاهر وبشتغل مهندس في دبي, في جبل علي, و ساكن بعيد عن الزحام و عن الأنام....