أغانى للأطفال الحلوين..من فرقة فنون المحاوراتيين

[Simba]

بما أنكم أساتذة مواضيع التواصل الفني وعندكم كام مغارة كده بتجيبوا منها الكنوز

اثارني قوي موضوع اسمه أنا من البلد دي والكلام عن سينما الأطفال وماما عفاف والبرامج اللي كانت تبيجي في الايام دي ... ياتري حد فيكم يقدر يتحفنا بالحاجات دي هنا

طبعا برضه ما يمنعش اني اعتب عليكم توقف موضوع الكنوز الفنية النادرة بالشكل ده

[Simba]

بجد ... بجد كسرتم خاطري واحرجتوني

كان ابسط شئ هو الرد علي انه ليس بالامكان ... وليس التجاهل هكذا

مش عارف كل ما احس اني بقيت قريب من الناس هنا ... بحس تاني انا ببعد عنهم او هما بيبعدوا عني بتجاهلهم

انا علي يقين تماما ان اي شئ كتبته لا يرتقي لفكر الناس المثقفة هنا لكن علي قد ما بقدر بحاول

وارجع اعاتبكم تاني

زهيري وموديست وواحد تاني لان كلكم تجاهلتوني حتي برد بسيط

ببساطة كسفتوني قوي قدام نفسي

[Siwa]

اخي العزيز سمبا:

انا عارفة إنك متضايق بس من عشمك.اكيد استاذ زهيري و استاذ Modest و استاذ واحد تاني لسه مقروش مشاركتك. او انشغلوا زينا كلنا لما بننشغل . والمفروض إن احنا نلتمس لهم العذر.

[واحد تاني]

وارجع اعاتبكم تاني

زهيري وموديست وواحد تاني لان كلكم تجاهلتوني حتي برد بسيط

ببساطة كسفتوني قوي قدام نفسي

مفيش تجاهل بين الاخوات يا سمبا متقولش كده ...انت بس يمكن استعجلت شوية ...

وكل واحد انت قلت اسمه هنا - لو كان شاف موضوعك - اكيد مرضاش يجي يرد وايده فاضية ...

واحنا هنا في الاخر كلنا اخوة في الله ... واكيد اي حد بيقدر يقدم شئ ولو بسيط يسعد بيه غيره عمره ما بيتأخر ...

تقبل تحياتي ... ودعواتك معايا ان باب المغارة يتفتح يا سيدي ... :rolleyes:

وشكرا لسيوا على التوضيح ... وايدك معانا برضه ... انت عندك درر انت كمان ... :angry2:

[Modest]

يا خبر يا سمبا ..... معقولة نكسر بخاطرك؟!! :angry:

الفكرة إن أنا كنت صغير في الأيام اللي انت بتتكلم عنها دي و يمكن ماكنتش لسه إتولدت .. يعني الطبيعي إنك تسأل مسيو زوهيري و واحد بيه تاني على إعتبار إنهم أكبر مني في السن بكتير

أشكر أختنا العزيزة سيوة على توضيح الأمر و "أونكل" واحد تاني على الرد و رفع الموضوع لأراه :ph34r:

و علشان غلاوتك عندنا يا سمبا مش هاخليك تمشي و إيدك فاضية .. جايب لك معايا حدوتة لأبلة فضيلة :)

إضغط هنـــــــــــــــــــــــــــــــــــا لتحميل المقدمة الشهيرة لحواديت أبلة فضيلة

فاكرها؟ اللي الأولاد بيغنوا فيها:

ياولاد ياولاد ..توت توت

تعالوا تعالوا

علشان نسمع أبلة فضيلة

راح تحكيلنا حكاية جميلة

و تسلّينا و تهنّينا

و تذيع لينا كمان أسامينا

أبلة....أبلة فضييلة

و إضغط هنـــــــــــــــــــــــــــــــــــا لتحميل الحدوتة الشهيرة "الأرنب و التعلب" :)

حلو كده يا سمبا؟ يعني صافي يا لبن؟ :sad:

[النسر المصري]

معلش ياسمبا هم كده موديست وواحد تاني وزوهيري :wub:

دايما بيطنشوا البشر :wub:

مش عارف ليه بصراحة ...يعني انا لو منك آخد حقي منهم واعمل مشاكل للصبح!!

بس معلش هم طيبين بردو واحنا بنحبهم وبنسامحهم على طول على حركاتهم المتهورة!!

وانت كمان لازم تسامحهم -_-

بس لازم بردو تاخد حقك!!! B)

[MZohairy]

بصرف النظر يا سمبا عن المداخله السابقه :wub:

فإحنا كلنا خدامينك :wub:

قوللي بس على المطلوب و سقف سقفتين بأربع صوابع تلاقيه قدامك

[Simba]

أنا اسف في استعجالي في معاتبتكم

انتم فعلا ناس افاضل ومميزين ما شفتش زيها في باقي المنتديات

وكل يوم انا بتعلم جديد منكم كلكم

المنتدي ده بجد حكاية بصراحة مش هقدر اوصفه

بجد بشكرك من قلبي واحد تاني لاهتمامك

اما انت موديست اكيد هدعيلك وانا بسمع ابلة فضيلة

زهيري انا بحبك من ساعة موضوع الكنوز وبحب كل الناس اللي شاركت فيه لان لكم ذوق وطبع خاص جدا

النسر المصري واضح ان ليك اسلوب مميز في تهدئة النفوس ههههههه

تم تعديل 19 ديسمبر 2006 بواسطة سمبا

[واحد تاني]

اتفضل يا عم سمبا ... آدي سونة وبالونتها وباباها كمان :angry2:

سونة والبالونة

سونة أمورتي ياحلوة, جرى إيه ليه زعلانة؟

أعمل إيه قوللي يا بابا إتفرقعت البلونة!

ويجرى إيه لما تفرقع؟

الدنيا بية حتولح!

سونة يا حبيبتي؟

أعمل إيه دلوئتي؟

:

:

:

(يدخل بائع البلونات مناديا: اييييل-بلونة بساغ, ايييل-بلونة بساااااغ!)

طب تسمح بأه أشتري بلونة من حصالتي؟

لأ مسمحشي, حشتريها لِك أنا دلوئتي!

بقول لو تسمح؟

لأ مسمحشي!

لا والله محدش حيجيبها إلا انا

لا والله محدش حيجيبها إلا انا

:

:

:

بابا!, مخلاص, أنا إللي حلفت الأول!

آه يا شقية!

لسماع الاوبريت

[Simba]

حلوة قوي يا واحد تاني

تسلم ايديك بجد .... بقي يا راجل عندك التحف دي ومش بتنزلها

انا بحب حاجات الاطفال القديمة قوي ياريت لو عندك حاجات زي دي تاني

[Siwa]

اتفضل يا سمبا يا ابني هم النم لعفاف راضي وابريق الشاي لسيد الملاح الله يرحمه. طبعا مش زي مشاركات استاذ الكل Modest و واحد بية تاني الكبير ولدنا، لكن ادينا بنحاول. :blink:

http://www.BLOCKED77/file/7703601/9275d2db/ham_Alnom.html

http://www.BLOCKED77/file/7703591/41f1d7...iyaj-elshy.html

تم تعديل 21 ديسمبر 2006 بواسطة Siwa

[واحد تاني]

طالما فيها "هم النم" يبقى خد عندك كمان الكسارولة الالمونيا :blink:

اصحي يا دنيا

اصحي يا دنيا

وقومي يا دنيا

واسمعي ديك الصبح صديقك

خدي من الكاسارولة الألمونيا

لبن الصبح و غيري ريقك

اصحي يا دنيا

قومي يا دنيا

و البسي و اتزوقي تزاويقك

و امشي و رشي علينا كولونيا

و خدينا معاكي في طريقك

لتحميل الاغنية

[Modest]

حلوة جداً سونة وبالونتها وباباها يا أبيه واحد تاني :blink:

كمان طنط سيوة جايبة اغاني هايلة :D

و مادام بنتكلم عن أغاني الأطفال يبقى لابد نفتكر اغنيتين من أهم أغاني الأطفال زمان و دلوقتي كمان لمحمد فوزي.

ماما زمانها جاية

ماما زمانها جاية، جاية بعد شوية

جايبة لعب وحاجات

جايبة معاها شنطة، فيها وزة وبطة

بتقول واك واك واك

.

عارف الواد اللي اسمه عادل جاه الدكتور وعمل له إيه

لقى رجليه كانوا زي الفتلة بص شوية جوه عنيه

راح مديله حقنة كبيرة

عارف إداله الحقنة ليه؟؟

ما بيشربش اللبن الصبح وكل صحابه ضحكوا عليه

واهو من يومها شرب وبيكبر وتربى له عضل في اديه

.

ماما زمانها جاية، جايه بعد شوية

جايبة لعب وحاجات

جايبة معاها شنطة، فيها وزة وبطة

بتقول واك واك واك

.

وأحمد برضه إيده مربوطة ومامته عارف ليه مخاصماه

كان بيحب تملي يلعب في الكبريت ويشيله معاه

وفيوم جاب كم عود ولعهم

وأخته بوسي كانت شايفاه

راحت النار ملهلبة إيدة ولسة اديه التنين واجعاه

واهه من يومها لا بيتعفرط ولا بيشيل كبريت وياه

.

ماما زمانها جاية، جايه بعد شوية

جايبة لعب وحاجات

جايبة معاها شنطة، فيها وزة وبطة

بتقول واك واك واك

.

وسعاد أبلة زعلت منها خالص خالص من شهرين

ما بتحفظش الدرس وتكذب وكمان ضاع منها كتابين

وبتتشاقى جوه الفصل

وكان ترتيبها العشرين

لما ذاكرت وبقت حلوه أبلة خدتها مع الشاطرين

جات شهادتها آخر مرة وكانت الأولى من تلاتين

.

ماما زمانها جاية، جاية بعد شوية

جايبة لعب وحاجات

جايبة معاها شنطة، فيها وزة وبطة

بتقول واك واك واك

ماما زمانها جاية .. جاية بعد شوية .. جايبة لعب و حاجات

---------------------------------------------------------------------------------------------

ذهب الليل طلع الفجر

ذهب الليل طلع الفجر والعصفور سو سو سو سو

شاف القطة قاللها بسبس قالتله نو نو نو نو

.

ماما قالته سيب القطة وخليها فحالها

ساب مدرسته ورما كراسته وراح جر شكالها

راحت القطة مخربشة إيده لما مسك ديلها

وآدي جزات اللي ما يسمعشي كلمة ماما تقولها

.

ذهب الليل طلع الفجر والعصفور سو سو سو سو

شاف القطة قاللها بسبس قالتله نو نو نو نو

.

أبله قالتلي فيفي الحلوة زعلت من سوسو سوسو

راح مصالحها وباسها وهيه حلفت ما تبوسه تبوسه

جابت الحبر وعاصت إيدها وجات بشويش جنبه

مسحت إيدها فوشه وعملت قال إيه بتلاعبه

سوسو ضربها ومسك الحبر اللي في إيدها وقلبه

على فستانها وشافهم بابا وضربها وضربه

.

ذهب الليل طلع الفجر العصفور سو سو سو سو

شاف القطة قاللها بسبس قالتله نو نو نو نو

.

ندر عليه لأجيلكو وأولع شمعة من شمعة من شمعة

لحد الشبر ونص ما يكبر ويروح الجامعة الجامعة

ميمي دكتور وسعاد دكتورة واحنا ندعيلكم

وصلاح يبقى محامي وتوتو قاضي يصالحكم

وعصام بكره حيبقى ضابط ويدافع عنكم

يفدي وادي النيل بحياته وحياته منكم

.

ذهب الليل طلع الفجر والعصفور سو سو سو سو

شاف القطة قاللها بسبس قالتله نو نو نو نو

ذهب الليل و طلع الفجر و العصفور صَوصَو .. شاف القطة قال لها بِسبِس قالت له نَونَو

تم تعديل 21 ديسمبر 2006 بواسطة Modest

[nash]

طيب ممكن يعني أغنيه

قطتي صغيرة أسمها نميرة؟

[Simba]

كل الاغاني دي بسجلها علي سي دي لانها فعلا جميلة جدا

وبترجعني سنين لورا انا مش عجوز قوي

بس عندي عيال :blink:

بس لو حد يعرف طريقة التسجيل من الكمبيوتر علي شرائط كاسيت ياريت يقولي ازاي

[Modest]

طيب ممكن يعني أغنيه

قطتي صغيرة أسمها نميرة؟

إتفضلي كلماتها على ما نلاقي الأغنية

قطتي صغيرة ... اسمها نميرة

شعرها جميل ... ذيلها طويل

لعبها يسلي ... و هي لي كظلي

عندها المهارة ... كي تصيد فارة

:blink:

[واحد تاني]

إتفضلي كلماتها على ما نلاقي الأغنية

ده تسجيل فيديو للاغنية سنة 1971 من فرقة "ناس الغيوان" المغربية

هو تسجيل صعب بس انا متأكد ان موديست هيجيب نسخة افضل من كده :blink:

:D

عقلي الباطن:

انا عارف ياخويا ايه الاغنية اللى ناش جايباها من كتاب القراءة الرشيدة دي :unsure:

قلبي حاسس ان المرة الجاية حد هيقول عاوز اغنية لي اخ مجند ... اسمه محمد

[Modest]

بس لو حد يعرف طريقة التسجيل من الكمبيوتر علي شرائط كاسيت ياريت يقولي ازاي

تحت أمرك يا سيمبا .. الطريقة بسيطة و هاشرحها لك بالتفصيل هنا في نفس الموضوع إن شاء الله :unsure:

و لكن ... امنحني بعض الوقت (مع الاعتذار لنانو :blink: )

[inas]

طيب والنبي بجد عيزا اغنية عبد المنعم مدبولي بتاعت كان في دب وكان في دبه

دورت عليها كتير اوي ومش عارفه اوصلها :unsure:

في حد عارفها هنا :blink:

تم تعديل 21 ديسمبر 2006 بواسطة inas

[Modest]

هو تسجيل صعب بس انا متأكد ان موديست هيجيب نسخة افضل من كده :blink:

بتدبسني يا واحد بيه تاني؟ :unsure:

أحسن تسجيلات هيا بتاعت واحد تاني يا ناش ... متعود آخد منه أحلى اسطوانات من ايام ما كنا سوا في الخديوي اسماعيل الابتدائية :D