شَربِة الحاج محمود

[se_ Elsyed]

نبدأ من الأول ونرجع ورا كده شويه .. شوية كتير يعني

مصر زمان ما كانتش تعرف الموالد ولا سيدي الولي ولا الكلام ده

ولكن مع الغزو الفاطمي لمصر قبل العصر المملوكي حاولوا ينشروا الفكر الشيعي في مصر وكان من ضمن هذا الفكر الشيعي هو تقديس أولياء الله المعلومين والمجهولين وحتى المشكوك في تاريخهم وإبتدا برضوا يبقى في نظام الموالد السنوية لهؤلاء الأوليه

هنا بقى مربط الفرس

والحمد لله لم يستطع الفكر الشيعي أن يتغلغل في ثقافة الشعب المصري السُني المُحب لآل البيت بدون مغالاة ..

لكن نجحوا في غرس أفكار موالد الأولياء وأستمرت تلك التقاليد حتى وقتنا هذا لما فيها من تهليب وملايين تدخل جيوب أصحاب المصالح والقائمين على تلك الموالد وأنا أعرف بعضهم شخصياً أصبحوا من ذوي رأس المال المتحكم من وراءها مستغلين شعار الدين والأولياء وما إلى ذلك ..

فأصبحت تُنذر لهؤلاء الأولياء النذور وتذبح لهم الذبائح وتقام لهم إحتفالات سنوية يحضرها الملايين مثل مولد سيدنا الحُسين والسيد البدوي .. إلخ

في هذه الموالد بقى تُرتكب جميع المعاصي التي تتخيلها

من أول الشرك بالله ..

مروراً بالسرقات

إلى أن تصل إلى الدجل والشعوذة والنصب

المهم

يحضرني هنا مشهد طريف لبعض هؤلاء الدجالين

وهو شخص يضع أمامه ترابيزة صغيرة وعليها بعض الزجاجات ويافطة صغيرة كتب عليها " شربة الحاج محمود اللي بتطرد الدود وتورد الخدود "

ويقعد الحاج محمود ده يقولك على كمية الامراض اللي بتعالجها الشربة دي

بالمناسبة شربة يعني محلول معين المفروض إنه بستخرج من ثمار بعض النباتات الزيتية مثل الخروع وده معترف به ويباع في الصيدليات ويساعد في علاج حالات الإمساك أو يؤخذ بطريقة معينه لطرد الديدان من البطن وما إلى ذلك

لكن الحاج محمود عايز ياكل عيش .. فكان يقعد يعد ييجي 100 مرض بيعالجهم بالشربة بتاعته دي واللي بدل ما يقول عليها شربة زيت خروع كان بيسميها " شربة الحاج محمود " على أساس إنها من إختراعاته ومن بنات أفكاره وحاجه جديدة ومبتكرة

وطبعاً السُذج وأصحاب الثقافة المحدودة كانوا بيصدقوه وبيشتروا الشربة لعلهم يجدوا فيها العلاج الشافي

تدور الأيام وندخل القرن الواحد والعشرين وتعود إلينا شربة الحاج محمود لكن بصورة " نيو لوك " وعلني وعلى الفضائيات كمان

فالإن أيها السادة نشاهد على القنوات الفضائية الخاصة ومنها الشهير إعلانات لأعشاب عجيبة وغريبة ومجهولة المصدر تعالج ماذا:

1- العُقم عند الجنسين .. ويادوب تسف لك كل يوم معلقة من الأعشاب دي لمدة 21 يوم وبعدها ربنا يسهل لها بالعيال ومش هاتقدر تلاحق خِلفه وزغرطي يا أم محمد بكره تخلفي والعيال تجري وتبرطع من حواليكي ...

2- السكر .. اللي الطب الحديث لم يتوصل لأي علاج يزيل أعراضه تماماً حتى الان .. ومع ذلك بعون الله شربة الحاج محمود تخلصك من السكر نهائي ولا تقولي زراعة بنكرياس ولا أنسولين ولا سوخام الطين

3- ضغط الدم .. الكبد الوبائي وخصوصاً الفيرس سي .. والطحال والفشه والكلاوي ولحمة الراس

كله كله

وبعون الله عندنا علاج لكل حاجه بس إنت إتصل على موبيل رقم كذا وتدفع 200 وكذا جنيه وكل مشاكلك تتحل

يبقى نوفر بقى مليارات الجنيهات التي تثنفق على ميزانية الصحة ومليارات الجنيهات على الأبحاث الطبية وكليات الطب ونسرح كل خريج معاه ثانوية عامه بشنطة مليانة " شربة الحاج محمود " بلا طب بلا قرف

وقرب قرب خدلك بؤ شربة

[محمود الشاعر]

اي يا عم الدعاية المضادة ووقف الحال ده انا ما صدقت هلم لي قرشين ماشي يا س س

لأ فعلا الاخطر ان وزارة الصحة يحدث هذا تحت بصرها ولم تنكر او تايد ما يدعون والمصيبة ان الاعراض الجانبية لهذه المستحضرات اكثر بكثير من منافعها

وعجبي

[MZohairy]

اعلان مقزز

[Sherief AbdelWahab]

تناول العبد لله في فترة سابقة موضوعاً اسمه ماكروبيوتيك بالجهل ، يحاول فيه بعض خبراء التغذية انتحال صفة الطبيب وعمل "برامج علاجية" تحت رعاية البهوات في الفضائيات.. دون أن يتطوع أحد لكشفهم علمياً على صفحات الجرائد!

الإعلان اللي بتقول عليه يا عمنا س س هو إعلان إكسسسسسسسييييير الحياة على قناة الناس.. صح ولا أنا غلطان؟

خلص الكلام

[أسد]

وهذه صورة لإعلانات منشورة بجريدة الجمهورية ..

ولا رقيب ..

ولا أحد يسأل أو يستنكر ..

والفوضى تملأ الآفاق ...

وأضف إلى ذلك عسل السدر ..

وعسل البردقوش ..

والهبل المنشور في إعلانات على القنوات التليفزيونية ..

[se_ Elsyed]

مش بس قناة الناس يا شريف

فلقد شاهدت مثل تلك الاعلانات عن ادوية مختلفة في العديد من القنوات

وللأسف البعض يقول : ايه يعني يا عم دي شوية اعشاب ليس لها اي ضرر !!!!

وليكن هل ده مش نصب ودجل وقلة ادب ... حتى لو كان اللي في العلببة ده عيش توست وكله فوايد ؟

الغريب والعجيب والفريد والوحيد أن على نفس القنوات هناك اعلانات لمحلات مأكولات عالمية مشهورة ومكتوب بالنبط العريض ان الاعلان تم بناء على موافقة وزارة الصحة !!!!!!!!!!!!!!!

يا سلام يا سلام

بقى الشاندوشتات لازم لها تصريح من الوزارة

والسم الهاري بيتم الاعلان عنه تحت سمع وبصر الوزارة والدولة كمان

وانا شخصياً ارفض رفضاً قاطعاً ان يتم اقحام الايات القرأنية في مثل تلك الاعلانات الدنيئة سواء عن العسل او غيره

فعندما قال سبحانه وتعالى " فيه شفاء للناس "

فليس معنى ذلك ان نركن الى الكسل ولا نأخذ بالاسباب ولا نعترف بالطب والدواء وما الى ذلك

فديننا دين علم وعمل واخذ بالاسباب

[عادل أبوزيد]

بالذات هذا الإعلان "3x1" بالذات رأيته فى الصفحة الأخيرة يوم الجمعة الماضية فى الصفحة الأخيرة من جريدة الأخبار ، و كنت قبلها بعدة أيام قرأت أكثر من مقال إستنكارا لمثل هذه الإعلانات و أن وزارة الصحة إستنكرت و منعت و و و .

ثم وجدت ذلك الإعلان و إنتويت أن أضعه فى مداخلة هنا .

فعلا يبدو أننا نتوجه تدريجيا ناحية ثقافة شربة عم محمود .

[أبو محمد]

هؤلاء الدجالون تلاميذ الحاج محمود (كبيرهم المجهول الذى علمهم السحر) .. هم المتاجرون بمشاكل الناس وآلامهم .. إنها أخس أنواع التجارة .. فزبونها متلهف .. والبائع كسبان كسبان ..

والباعة هنا يتراوحون بين دجالى الموالد .. وتجار المخدرات .. وأكثرهم خسة هم الساسة الذين يتاجرون بمشاكل الناس مستغلين تلهفهم على العلاج ودواؤهم الذى يبيعونه مثل شربة الحاج محمود .. وابو فاس .. فهو يصلح لعلاج الإمساك بنفس الفعالية التى يعالج بها الإسهال !!!!!!!!

[Alshiekh]

ياترى البرنامج الانتخابى اللى عدى ربعه ، ايه اللى اتحقق منه لحد دلوقتى؟

يظهر ان الكل بيدجل علينا وينصب علينا لكن كل واحد له طريقته.

لكن الحاج محمود كان مقدور عليه وكانت العملية كلها ثلاثة تعريفة او قرشين صاغ ، لكن الحاج محمد بقى مين قده!!

[أبو زياد]

كنت أنوى أيضا - يعنى فى الخطة -

نشر موضوع عن الطب البديل و الذى للأسف بعض المتطاولين يحاولون أن ينسبوه إلى الطب النبوى .. كنوع من التجارة و المكسب الزائف

ولكننى كنت سأتساءل عن سبب فقدان الثقة فى الطب الأصلى .

فى زمن الحاج محمود كان الجهل منتشرا و الآن العلم انتشر و انتشر معه حالة من فقدان الثقة بالطب الأصلى ...

المشكلة لم تعد فى إعلان و لكن أيضا هذه البرامج التى تأتى بموسيقى هادئة تخترق الأسماع لتعالج الناس بالنباتات و الأعشاب كأن الطب لم يعد موجودا او موضة قديمة ..

خلاصة رأيى أنه لابد من نشر الثقافة الطبية بين الناس و هذا واجب كل من الطباء و الإعلاميين ..

الله ينور يا س س على استهلالك و ضرب المثل بعنوان الموضوع ..

[se_ Elsyed]

من أبشع أنواع النصب هو إستغلال الضعف النفسي لدى المنصوب عليه

فالشاب العاطل الذي يبحث عن عمل ونرى إعلانات تتحدث عن وظائف وفُرص هائلة للباحثين عن العمل .. لكن معليش لو سمحت إدفع 50 ج ثمن للأبليكيشن وبإذن الله هانرد عليك ويلم الزبون ملايين ويكُت وماحدش يعرف أراضيه فين ..

او الإنسان المريض اللي بدل ما يلاقي يد طيبة تحنو عليه .. تقوم اليد دي رزعاه على قفاه وتستغل ضعفه النفسي وتبيع له الوهم .. فكم من عقيم يطوق شوقاً إلى أن يكون لديه ذريه .. وكم من إنسان أُبتلى بمرض عُضال مثل السكر او الفشل الكلوي او الكبد الوبائي ...

نقوم بعد ده كله نقعد نكلمهم عن برطمان عسل بيعمل المعجزات وشوية قرفه على عرقسوس على كمون مطحون على أي زبالة ونقوله دي أعشاب فيها الشفاء الساحق الماحق

وكل ده تحت سمع وبصر أجهزة الدولة التي حولت البلد إلى غابه يأكل الكبير فيها الصغير وأهو خلي الناس تتلهي وتخبط في بعض ولا حد يسأل على دستور ولا توريث ولا تهبيش

[inas]

للاسف يا س س المتضرر الوحيد من دا كلو هو المشاهد المريض الي بيلاقي بارقة امل في الي بيسمعوا ويشوفو

مش بس تضرر مادي لا والضرر الاكبر نفسي وهو فقدانه لامل في العلاج والي موضحين انو مضمون مئه بالمئه في النتائج وهو المريض سواء عقيم ولا عندو سكر ولا تخين يجيب اللاسقه السحريه هيبقى ولا غزال في ريعن الشباب

ولا تجيب الحلق الي بيعمل ايه ولا الحزام بتاع ايه ولا الكريم الي اول متهدن يشفطلك الدهون ولا تخلف ماشاء الله انا شفت الاعلان واذانا لعبهم على الوتر الحساس واستهتارعم بالام الناس

جيبين واحد متشحتف على حتت عيل وفي كتير كده فهيضرو ايه لو كعلوا 200 جنيه كمان حاولات كتير مضنيه مع العلاج الفاشل وهو يوضع سرو في اضعف خلقو ويجري ويجيب دا حتى الضرب في الميت حرام

قولي اناس بس تعمل ايه وهيا بدور على اي حاجه او اي امل وطالما الاعلان نازل في التلفزيون يبقى دا علاج مضمون وجيبين الدكتور زكي جمعه ( اي اسم) تلاقيه بياع طماطم بيقول انا عملت تحاليلي يامه ومتاكد من النتائج :closedeyes:

[أسد]

وأخيراً فيه حد إتحرك ..

لكن بعد إيه ....

صاحب شركة يزعم علاج أمراض الكبد بعسل سدر الجبلي الفاسد

إعلاناته في الفضائيات ساهمت في زيادة مبيعاته إلي الملايين

ألقت مباحث التموين القبض علي صاحب شركة بالجيزة يزعم توصله لعلاج الامراض المستعصية باستخدام العسل الجبلي والاعلان عن تلك المنتجات بالقنوات الفضائية. تم التحفظ علي كميات كبيرة من العسل والاعشاب الطبية. وأخطرت النيابة التي باشرت التحقيق. وكانت احدي القنوات الفضائية دأبت علي الدعاية لاحدي الشركات عن توصلها لعلاج أمراض الكبد والسكر والبروستاتا وعدم الانجاب باستخدام عسل السدر والاعشاب الطبية.

وأكدت التحريات باشراف اللواء دكتور محمد أبو شادي مدير الادارة العامة لشرطة التموين قيام صاحب شركة غير مرخصة بشارع ربيع الجيزي ببيع تلك المنتجات من خلال توصيلها للمتصلين به تليفونياً من خلال مندوبي مبيعات، كما تبين لوكيل الادارة قيام المتهم باتخاذ عقارين بالمنيب أماكن للتصنيع والتجهيز. تم استئذان النيابة لضبط المتهم وما بحوزته من منتجات وتفتيش أماكن التصنيع وتم اعداد مأموريات باشراف مساعد المدير للمنطقة المركزية بالاشتراك مع الادارة المركزية للشئون الصيدلية بوزارة الصحة والسكان. وبمداهمة مقر الشركة بشارع ربيع الجيزي ألقي القبض علي المسئولين لقيامهما بتعبئة وبيع مستحضرات طبية مجهولة المصدر وغير مسجلة بوزارة الصحة مدون عليها علي خلاف الحقيقة انها تعالج العديد من الامراض مثل أمراض الكبد والبروستاتا والسكر وعدم الانجاب. وعثر علي 8610 أقراص وعبوات مستحضرات طبية مدون عليها انها تعالج العديد من الامراض وغير مسجلة بوزارة الصحة كما تم التحفظ علي 240 كيلو عسل أبيض، 375 كيلو أعشاب طبية واستيكرات و»C.D« بها اعلانات عن الشركة وحررت لجنة مفتشي الادارة المركزية للشئون الصيدلية بوزارة الصحة تقريراً يفيد ان المضبوطات مجهولة المصدر. كما عثر علي فواتير تفيد ان الشركة سددت مبالغ مالية تقدر بـ48 ألف جنيه لاحدي القنوات الفضائية كما عثر علي فواتير تفيد ان الشركة باعت منتجات بـ»51« ألف جنيه وتمت احالة المتهمين الي النيابة ووجهت تهم بيع مستحضرات طبية مجهولة المصدر وغير مسجلة بوزارة الصحة ومزاولة مهنة الطب والصيدلة بدون ترخيص والغش والتدليس وتعريض حياة المواطنين للخطر.

مصدر الخبر في جريدة الوفد اليوم بتاريخ 25 فبراير 2007

http://www.alwafd.org/v2/News/NewsDetail.p...p;type=accident

[MZohairy]

والله يا أسد مش بيعالج امراض الكبد بس!!!!!!!!

ده بيقولك في الاعلان يعالج اكتر من 25 مرض

ومنها على ما اذكر......

الكبد و السكر و المراره و العقم و الكلى و الطحال و ..............

و المصيبه يستشهد بحديث نبوي لإحكام الموضوع و يخدع السذج من المتفرجين

حاجه تقرف

و ناس تقرف

[Tafshan]

اعتقد ان السبب هو عدم وجود آليه سليمه للتأمين الصحى في مصر .. التأمين الذي يقوم بالتسديد الكامل لجميع متطلبات العلاج من الابره الى زراعة الاعضاء .. هذا ما نفتقده عموماً .. كي يحدث هو سلسله طويله من الاصلاح في المستشفيات و شركات التأمين و نظام التوظيف و خلافه .. و الى ان يحدث ذلك .. ستظل شربة الحج محمود هى العلاج الاسهل و الارخص و المتوفر ...

[nancy]

ضحكتنى يا طفشان

عاوز مصر تدفع للمرضى لحد زرع الاعضاء

دى الاعضاء بتتسرق والناس بتتبهدل وهى دافعة فلوس امال لما تدفع لهم علاجهم حتبعهم بالكيلو

عموما العسل فعلا مفيد

بس مش بالطريقه الى فى الاعلان ده

والمفروض ان ابسط ادراك للعقل يوصلنا ان مستحيل يكون العلاج بالسذاجه دى

انما زى ما قال كل الى سبقونى فى الموضوع دة بيلعب على الاحتياج والضعف البشرى

[Tafshan]

ضحكتنى يا طفشان

عاوز مصر تدفع للمرضى لحد زرع الاعضاء

دى الاعضاء بتتسرق والناس بتتبهدل وهى دافعة فلوس امال لما تدفع لهم علاجهم حتبعهم بالكيلو

عموما العسل فعلا مفيد

بس مش بالطريقه الى فى الاعلان ده

والمفروض ان ابسط ادراك للعقل يوصلنا ان مستحيل يكون العلاج بالسذاجه دى

انما زى ما قال كل الى سبقونى فى الموضوع دة بيلعب على الاحتياج والضعف البشرى

و ليه مصر :lol:

اغلب شركات التأمين الصحى غالباً بتبقى شركات خاصه .. الموضوع مربح مش زي ما انت فاهمه .. لكن مشكلته انك تقنعى الموظف انه يدفع التأمين الصحى و يبقى فيه قانون يلزم الشركه و يطمن الموظف و ان يبقى في مستشفى اساساًتعالج الناس ..

على العموم .. لما فكرت فيها لقيت الموضوع يتاهل الضحك :)

[kokowawa1979]

سي السيد كتب :

من أبشع أنواع النصب هو إستغلال الضعف النفسي لدى المنصوب عليه

الجنسي أبشع ياسي السيد

وهناك صحيفة شهيرة بالفضائح تضع صفحتين كاملتين عن مش عارف إيه لإيه - لدرجة أنني أحسست أن الشعب المصري ضاعت فحولته !!! من كثرة هذه الإعلانات !!!!

[se_ Elsyed]

مانا مش لازم أفسر بالتفاصيل يا كوكو .. أصل معانا أولاد صُغيرين مش عايزين نفتح عنيهم على المواضيع دي

مع الإعتذار للنسر المصري ولوليد ولكل أبنائنا الصغننين اللي يادوب بيتفرجوا على سبيس تون ويشربوا اللبن ويناموا من المغرب

[kokowawa1979]

وبعد الشربة والكريمات إياها - جئتكم بخبر مدهش خاصة لإخوانا الذين يملكون رؤوس ملساء كالحرير

كريم جديد اسمه المدهش تقريبا - بيقولوا إنه بعد استخدامه ب 3-8 أسابيع تصبح الرأس الملساء محتاجة ماكينه لقص النجيل بدلا من ماكينة الحلاقة العادية لغزارة الشعر الذي سينبت - وكل ده ب99 جنيه بس - ومعاها ماكينة قص النجيل فري :P