سبب وجودي في المحاورات

[Scorpion]

بدون أدني شك كل واحد فينا قبل ما يسجل عضوية هنا .. كان بيخش المحاورات كزائر .. فترة طويلة أو قصيرة ... ( في حالتي مثلآ كانت أكتر من سنة ).. لحد ما اللمبة نورت جواه .. شاف مقالة .. مداخلة .. موضوع .. قام قال في عقل باله ... ما بدهاش .. انا لازم اقول رأيي في الموضوع ده ..

في الموضوع ده اتمني ان الزملاء .. (و بالذات الأعضاء اللي عمرهم ما كتبوا) .. يكتبوا عن سبب وجودهم هنا ...

مثلآ .. انا عرفت المحاورات عن طريق اخويا .. قاللي بص بصة عالمنتدي ده .. فيه حاجة مختلفة .. أول ما دخلت اكتشفت عالم تاني خالص ... و ناس الواحد يفخر بجد أنهم مصريين ... و فضلت متابعهم من بعيد مكسوف او ما عنديش ثقة في نفسي اني اقدر أجاري فطاحل زيهم ... و في نفس الوقت كان فيه اعضاء حاسس انهم ولاد حتتي .. من شلتي .. بطريقة كلامهم ...زي شعنونة .. حشيش ... وايت هارت... سي السيد .. و ابن مصر افتكر انه كان فيه موضوع كوميدي انواع النساء .. حرب بين رجال المنتدي و "فكيهاته" .. زي ما كانوا مسميين نفسهم .. الموضوع ده كان بيخليني ارغرغ من الدموع من كتر الضحك .. و كنت عايز اوي اشارك فيه ... بس بصفة ايه .. ما عرفتش .. و فضلت اقاوم الكتابة لحد ما جه الموضوع اللي قلت .. ما بدهاش .. كان موضوع لو الزمن رجع....حتعمل ايه؟ .. اداني الدفعة او التشجيعة اني اشارك .. كتبته و كنت قلقان شوية من رد الفعل لدخول جسم غريب في كيان جديد ..

عدت ... و ابتدت معاها مرحلة أكتشفت فيها جانب ما كنتش اعرفه موجود جوايا ....

أنتم بقي ... ايه سبب وجودكم هنا ؟

عقلي الباطن :

يا رب اللي في بالي يكتبوا بقي ....

[عبده بيه]

انا اتشرفت بالمنتدي وحبيت الناس اللي فيه وبحترمهم وبموت فيهم

وانا اول مرة اشترك في منتدي عربي

ولاحظت اكه مختلف بالمرة عن الاخرين

تحياتي

[memo2007]

انا كنت بدور على حاجه فى جوجل "مش فاكرة ايه "

وشوفت اسم المنتدى محاورات المصريين

بصراحه عقلى الباطن قال " أيه ده هو فى حاجه اسمها كده تعالى نشوف بيتكلمو فى ايه يااااارب يكون كويس "

ودخلت اكتر حاجه لفتت نظرى حب الاعضاء لبعض ده طبعا غير المواضيع

وحبيت المنتدى جدا زى ماحبيت اعضاءه واتمنيت انى اكون منهم وزيهم

قعدت فتره اقرأ بس وبعد كده أهه بحاول أبقى زيكم وإن شاء الله هايجى اليوم ده

[أبو حميد]

أه بقى هوه ده الموضوع اللي سكوب حاطط عنوانه عندي علشان يشقط مني الزباين الجداد ماشي يا سكوب

موضوع جميل جدا جدا يا سكوب مش ممكن والميزة أنه هيعرفنا على الصدف اللي جمعتنا مع بعض في المنتدى الجميل ده من غير ميعاد ومن غير غرض إلا شوق المغتربين لمصر وحب الموجودين فيها لبلدهم.

وإنا عرفت المنتدى اول ما سافرت بره مصر وكنت عاوز اعرف كل حاجة بتدور في مصر وكل ما أسمع عن كفاية أو مظاهرات الجامعة أو أي خبر يخص مصر كنت بعمل بحث ودايما الاقي محاورات المصريين قلت ادخل أتفرج وكأني فتحت باب مغارة على بابا "مغتربين سياسة فن أدب وموضوعات خفيفة وموضوعات جادة أحمدك يا رب".

قعدت الم في الجواهر والكنوز من غير أشتراك وفي عز الأحداث السياسية في مصر 2005 لقيت مواضيع باب السياسة الداخلية و أنتخابات الرئاسة ما تتفوتش لازم الواحد يتدخل قمت دخلت وكنت اكتب مداخلة وأقعد أستنى حد يعبرني محدش خد باله أصلا والناس بيقروا اللي قبلي واللي بعدي ويردوا عليهم وأنا ولا الهواء ولا الدموع. ده كان أحساس خاطئ ناتج عن الحساسية الشديدة لواحد اول مرة يتواصل مع ناس مجهولين بالنسبة له.

وبعد فترة الإحساسات الأولانية بتروح والواحد بيكتب بدون حساسية ويكتب اللي نفسه فيه حد رد كان بها محدش رد خلاص مفيش مشاكل. وعلشان كده عملت موضوع علشان الناس اللي بتخاف تشارك أسمه ترحيب بدون حدود, للمحاورين المصريين الصامتين

شكرا يا سكوب على موضوعك الهايل فكرتنا بذكريات جميلة

لما الحق أسحبلي زبونين تلاتة من اللي هيدخلوا عنده الأول

تم تعديل 18 فبراير 2007 بواسطة أبو حميد

[Scorpion]

فيفتي فيفتي يا ابو حميد ... و حقك حيوصللك باليورو كمان .. بس بلاش التشبيح و النبي

:lol:

بس انا نفسي اعرف ايه هي المداخلة او الموضوع اللي عمل الشرارة و خلي الواحد يسجل.. علي الأقل الواحد يعرف نوعية المواضيع اللي بيفضلها قاريء المحاورات ...

[عبده بيه]

العزيز سيكربيون مساء الخير

المحاورات لمست جزء بداخلي انا كنت بعوضه في نشرات الاخبار والتليفزيونات الثقافية وعرفت بالمصادفة عن طريق بحث جوجل المهم عجبيتني وفي اليوم التالي قرات الموضوعات المعروضة ولاول مرة اكون عضو في منتدي انا عندي النت من عام 97 وعمري ما فكرت ادخل منتدي كعضو

اهم شيء لاحظته مدي الود والاحترام بين الاعضاء ودي اهم حاجة عندي

الموضوعات التي تجذبني السياسية والاعلام المصري وغيره والاخص الغربي الفنون والشعر الموضوعات الاجتماعية والاسرة وتربية الاطفال

بما اني ببحث عن مشروع في مصر فهذا الشغل الشاغل عندي الان يعني مشروعات مهم جدا الموضوعات الدينية وهنا بتعجبني اوي مدرسة حصة التربية الدينية الاستاذة نورا االه يحفظها الموضوعات الخفيفة والفكاهية كما في بالبلدي وجوه مصرية قناة المحاورات الفضائية في الاخر المنتدي كله بحبه هوه وناسه

تقبل تحياتي

[رمضان]

مساء الخير

بصراحة سبب معرفتي بالمنتدى هو صديق كويتي احترمه جدا وهو بالمناسبة متابع جدا لما يحدث في مصر لان من وجهة نظره ان ما يحدث في مصر ينعكس على كل الدول العربية سواء بالسلب او بالايجاب وعلى فكرة هو حضر لقاء من ضمن لقاءتنا بالكويت هنا وابو حميد وداركر اتعرفوا عليه .

كنا نتحدث في يوم انا وصديقي هذا عن موضوع الجمارك في مصر وبعض المواضيع الاخرى فقال لي انا اعرف منتدى كله مصريين وبيناقشوا كل المواضيع اللي تخص المغتربين واللي بيحصل في مصر ادخل وجرب وبالفعل دخلت وسجلت من أول يوم وشاركت من أول يوم لان بصراحة المنتدى شدني جدا حسيت فيه بشيء جميل كنت مفتقده الا وهو الروح ، روح المصريين .

انا كنت بعاني من قلة اصدقائي المصريين بالكويت وبصراحة بعد المنتدى الجميل ده اتعرفت على مجموعة رائعة جدا من المصريين المجودين بالكويت .

وبالمناسبة دي انا بتوجه بالشكر للقائمين على المنتدى لانهم بصراحة بيبذلوا مجهود كبير جدا للمحافظة على رقي النقاش .

رمضــــــــــــــــــان

[Dr.Know]

انا بقي سبب وجودي عادي شوية غريب شويتين مش مشكلة

هي البدايه كانت من فتره كبيره مع بدايه الغربه والملل وانا ببحث علي الانترنت وجت الموقع مش فاكر كنت ببأبحث عن ايه بالظبط المهم

لقيت ولاول مره في منتدي وانا لا احب المنتديات علي الاطلاق نوع من الحب بين الاعضاء وتفاهم واهم شئ هو الرد علي الموضوع لان في معظم المنتديات وممكن اقول الكل

ان عندما احد يضع موضوع الاخويين يقومون بالرد عليه بكلمه مشكووووووررررررررر

وهو بدوره يقوم بالرد بكلمه مشكور علي المرور

وهذا سبب كرهي للمنتديات ولكن هذا المنتدي وجت فيه ما لم اجده في المنتديات الاخري وهو النقاش حلو نقطه واحده او موضوع معين

ولكن للاسف واجهت بعض المشاكل داخل هذا المنتدي وتركته لفتره كبيره ورجعت له تاني لانني لم اكن استغني عن متابعت لانني تقريبا ادمنته

[أبو حميد]

فيفتي فيفتي يا ابو حميد ... و حقك حيوصللك باليورو كمان .. بس بلاش التشبيح و النبي

:lol:

بس انا نفسي اعرف ايه هي المداخلة او الموضوع اللي عمل الشرارة و خلي الواحد يسجل.. علي الأقل الواحد يعرف نوعية المواضيع اللي بيفضلها قاريء المحاورات ...

يا فندم طالما حقي حيوصلني يبقى خلاص مفيش تشبيح. أنت عارف اليورو شادد اليومين دول وعاوزين نعملنا يوروهين حلوين في السريع.

لو عاوز تعرف الموضوع هو موضوع "أرفض أيمن نور" وكان موضوع حامي جدا واتنرفزت من منطق اللي تعرفه أحسن من اللي متعرفوش روحت داخل علشان أقول اللي تختاره أحسن من اللي متختاروش وكفاية أنه عارف أنه وصل بأصوات الشعب مش بالأقدمية.

علشان كده هايحترم الشعب اللي خلاه رئيس.

[noureldonia]

انا بقة عرفت المنتدي عن طريق أخويا كنت مرة بشتكي من صعوبة تكوين صدقات هنا في الكويت واني مش بعترف بمواقع الشات لتكوين الصدقات لانها في الغالب بيكون كل اللي فيها بيمثلوا وبيكذبواانا كان بيهمني اتعرف على ناس متعلمة ومثقفة على درجة عالية من الأخلاق ومكنتش عارفه القيهم فين :) ، فاقترح على اخي انوا اشوف المنتدي دة كان بيقرا ليكوا كل ما يتثني ليه الفرصة ، ولانوا عارفة انوا عندي ميول ادبية فقلي اعتقد انوا هيعجبك ، دخلت الموقع حسيت انوا مختلف عن مواقع مصرية تانية ، الأعضاء في بنهم الفه ومحبة واضحة اسلوب راقي في الحوار بيعكس ثقافة وبيئة كل شخص روح الأخوة والصداقة الموجودة بنكوا بجد ودة الحاجة اللي كنت محتاجها ، انا بقالي سنة تقريباً في المنتدي برغم اني ليا بعد المشاركات بس كنت زي ابو حميد محديش بياخد بالوا اوي من مداخلتي او مشاركتي بس مؤخراً بدات الحمد لله اتعرف على البعض اكتر وانشالله لقائنا مع بعض يزيد علاقة الصداقة والاخوة الموجودة بنا .

[أبو حميد]

انا بقالي سنة تقريباً في المنتدي برغم اني ليا بعد المشاركات بس كنت زي ابو حميد محديش بياخد بالوا اوي من مداخلتي او مشاركتي بس مؤخراً بدات الحمد لله اتعرف على البعض اكتر وانشالله لقائنا مع بعض يزيد علاقة الصداقة والاخوة الموجودة بنا .

أكيد اللقاء بيفرق كتير ومقابلة الناس وجها لوجه بتديكي أحساس تاني خالص.

أنا بعد ما قابلت مجموعة الكويت الجميلة وقعدت معاهم حصلي تغيير رهيب وبقيت بشارك أكتر في المواضيع وبفتح مواضيع جديدة ومشاركاتي خلال الفترة القصيرة اللي فاتت أضعاف مشاركاتي لأكتر من سنة ونص قبل المقابلة.

[yacho]

اولا ميرسى لسكوربيون على الموضوع الشيق .. ماعرفش انا حسه انك ماكنتش تقصد

من الموضوع ده اننا نكتب ازاى اتعرفنا عالمنتدى انت عايز تعرف ليه بعض الاعضاء بيسجلوا

ومش بيتفاعلوا بشكل ايجابى او زوار بيفضلوا زوار كتير ومده طويله .. بس انا حاخللينى

مع الناحيه اللى حصل فيها التباس ده اذا كان اعتقادى سليم .

بصراحه انت اتحت ليا فرصه انى اشكر عضوه بحبها جدا وبحب كتاباتها قوى

للاسف لم نتحاور انا وهى بشكل مباشر ولكن اكن لها كل الود والاحترام لانها سبب وجودى

هنا رغم ان كل واحده فينا فى بلد وعمرنا ما اتقابلنا ولا اتكلمنا .

الحكايه تبدا بالبسبوسه حضرتك .. :) بادور على الجوجل على وصفه للبسبوسه

لقيت نفسى ف قسم المطبخ عندكم انا كنت تايهه حق الله وعماله اخبط ف الحلل لغايه

ما لقيت نفسى فى وصفه اكل اسمها بينشو بتقدمها عضوتنا الجميله .. وكان النسر المصرى

يومها بيسالها على حاجه هى كتبتها وهو مافهمش معناها كانت الموستاسا واللى طلعت مسترده

بعد كده وكنت سعيده قوى انى عرفت اسم المسترده بالاسبانى .. ميرسى مدام سلوى على الصدفه

الجميله اللى جمعتنى بيكى وباعضاء المنتدى.

المهم انى خرجت تايهه اصل بصراحه ماخبيش عليكم انا ماكنتش اعرف ان فى حاجه اصلا اسمها منتديات

كانت اول مره ادخل منتدى .. المهم دخلت الموضوع اللى جذب انتباهى عنوانه كان خاص بجمال مبارك دخلت

.. صدمت :o :blink: من الشجاعه والجراه اللى فيها الاعضاء .. ايه ده وايه خفه الدم دى

فى مناقشه مواضيع غايه ف الحساسيه. . وكانت كتابات سى السيد .. حلاوه العنتبلى اللى هو الرافعى حاليا ..

حشيش .. ياسوفيناس اكتر ناس شدوا انتباهى وخللونى احب المنتدى ده.. مع احترامى وحبى لكل الاعضاء

انا باحبهم كلهم .

تحياتى لك اخى العزيز سكوربيون

[Scorpion]

اشكر جميع من تفاعل مع هذا الموضوع و اضاف رد بالتأكيد سوف يفيدنا جميعآ في تقييم آداؤنا و دورنا في هذا المجتمع الصغير ...

أسمحولي أن أتوقف عند جملتين ...

الأولي للعزيزة memo2007 :

وحبيت المنتدى جدا زى ماحبيت اعضاءه واتمنيت انى اكون منهم وزيهم

حضرتك طبعآ من أول مداخة أضفتيها بقيتي مننا .. لكن مش المفروض انك تبقي زينا .. مش من المفروض اننا نكون معمولين كلنا علي قالب واحد ... كل واحد فينا له شخصيته المستقلة .. فيه اللي بيميزه عن التانيين .... و بتنوع الألوان اللي احنا بنمثلها طلعت اللوحة الرائعة اللي اسمها المحاورات في النهاية .. لو الألوان عزيزتي memo بقت زي بعض .. اللوحة حتبقي مجرد خربشة ... و بما أن واضح جدآ ان حضرتك تملكي شخصية متميزة ... فمن الأكيد ان أفكارك الجديدة حتلاقي اللي يتفاعل معاها أكتر من افكار تانية متعادة ...

الجملة التانية للعزيزة yacho

ماعرفش انا حسه انك ماكنتش تقصد من الموضوع ده اننا نكتب ازاى اتعرفنا عالمنتدى انت عايز تعرف ليه بعض الاعضاء بيسجلوا ومش بيتفاعلوا بشكل ايجابى او زوار بيفضلوا زوار كتير ومده طويله

إحساسك سليم مية المية ... لأن فيه عدد كبير قوي من الأعضاء المسجلين نصيبهم من الكتابة ما يزيدش عن مداخلة او اتنين أن ماكانش صفر ... فالموضوع ده كان متوجه ليهم بالمقام الأول عساهم ان يقوموا بالخطوة الأولي .. يستخدموا الكيبوورد ... و ان كان طبعآ اي مداخلة من اي عضو هنا مرحب بها جدآ لأنها في النهاية حتكون في صالح المحاورات ... يعني عصفورين بحجر واحد ...

فين الباقي ؟؟؟؟

[memo2007]

انا سعيده جدا انى كتبت كلمه " زيكم "..........

لانها شدت انتباه حضرتك

بس انا اقصد بيها انى اوصل لخبرتكم ......لان معظم لأ كل الاعضاء شخصيات كبيره عندها خبره

فأنا سعيده جدا لانى يوم بيوم خبرتى بتزيد وده طبعا بفضلكم

مش اقصد ان الشخصيات تبقى متشابهه لان كل عضو هنا له شخصيته المستقله واسلوبه الخاص

[inas]

موضوع جميل

انا زمان سجلت مره لما كنت في الكويت ومش فاكره حتى الاسم الي سجلت بيه وكان السبب اكيد الاحساس بالغربه بس للاسف مقدرتش اتواصل معاكم وقتها لاسباب الشغل القهريه

ومن كام شهر لقيت نوره بتقولي متسجلي معانا انا وداركر في محاورات المصريين قلتلها يااااااااااااااااه انت لسه بتشاركي فيه

وقلتلها انا مبحبش المنتديات والكلام ده بس دي كانت اخر كلمه فكراها

بعد كده سجلت وحصلي بعيد عنكم عمليه غسيل مخ بقيت اول مافتح عيني اشغل الكمبيوتر واكل دا اذا ماكلتش وانا اعده على الكمبيوتر واخلص الي ورايا واجري على المحاورات حاجه فظيعه بعيد عنكم ادمان من الدرجه الدشليون بس بصراحه انا حبيت المكان ده وحسه ان كلكم اخواتي من الاحترام والاخلاق العاليه للاعضا والحب الذي يسود المكان ومميزه بطابع خاص الحمد لله اهو الواحد بيلاقي ناس محترمه يتكلم معاهم في مواضيع محترمه ومفيده واكيد المحاورات لها اثر كبير في حياتي استفد كتير وعرفت معلومات واتعرفت على ناس اعتز بيهم واكن لهم عظيم الاحترام والحب والود

شكرا يسكوربيون على انك ادتني الفرصه اعبر واحكي اد ايه انا بحب المكان ده

:) :blink: :o :blink: :D :D :wub: :wub:

[Diab]

أنا طبعا العضو رقم 4065 يعني رقم الحظ :blink: :o :blink: وملهوش دعوة بالرقم 13

Dr.Know مشاركة بتاريخ اليوم, 08:44 AM

انا بقي سبب وجودي عادي شوية غريب شويتين مش مشكلة

هي البدايه كانت من فتره كبيره مع بدايه الغربه والملل وانا ببحث علي الانترنت وجت الموقع مش فاكر كنت ببأبحث عن ايه بالظبط المهم

لقيت ولاول مره في منتدي وانا لا احب المنتديات علي الاطلاق نوع من الحب بين الاعضاء وتفاهم واهم شئ هو الرد علي الموضوع لان في معظم المنتديات وممكن اقول الكل

ان عندما احد يضع موضوع الاخويين يقومون بالرد عليه بكلمه مشكووووووررررررررر

مشكرررررررررررين :)

تم تعديل 19 فبراير 2007 بواسطة Diab

[nora]

http://www.egyptiantalks.org/invb/index.ph...ic=1525&hl=

هو ده الموضوع الي عرفني بالمنتدى اسمو بنطلون للايجار

ده وصلني على الاميل ويمها مت من الضحك ومبقتش قدرة ورحت اعدت ادور على المنتدى في النت لحد لما لقيتو في الاول كان كل اهتمامي متابعت الموضوع ده بس بعد كده دخلت ولقيت ان الموضوع كبير اوي بدات اتفرج لحد لما نرفزني خبر في الجرنال وشدني ورحت كتبت كان الموضوع عن ترحيل المصريين المخالفين من الكويت بس واعدت مده طويله سعات اكتب وسعات كتير مكتبش لظروف الشغل بعد كده عدم توفر النت عندي في البيت لحد لما وفرت عندي الانترنت بقيت مدمنه لدرجه ان سعات بحس ان جالي لوسه وجوزي يقولي المحاورات بتاعتك كلت دماغك :lol: بس انا منظمه نفسي مش بدخل غير وهو نايم او مشغول بره كده يعني ...........

شكرا بجد انكم خلتوني افتكر الكلام الجميل ده

[Ahmad Farahat]

كنت أبحث في غياهب الإنترنت عن سيمفونية شهرزاد لريمسكي كورساكوف فوجدت الجنرال موديست يضعها هنا بكاملها............

فأردت أن أكافئكم بي..............

تصفيق

هييييييييييييييييييييييييييييييييييييييييييييييييييييييييييه

[وائل كيوان]

السلام علسكم اخوانى الاعزاء

احب اقولكوا انا اشتركت عندكوا ازاى انا عضو جديد بقالى اسبوعين بس بينكم والحمد لله من اول يوم لقيت بينكم جو الالفة الجميل اللى شدنى بعد كدا واستمريت وكان سبب تعرفى على على المحاورات شئ جميل جدا

موضوع يلم شمل المصريين ديما بحب اننا نكون ايد واحده لانى من الاخر بتاع حقوق انسان يا جماعه بحب مساعدة الغير جدا وبعد ما فكرت ازاى أكون فكرتى اللى تجمع الناس واتناقشت فيها مع اخوانى فى اول لقاء ما بنا دخلت على جوجل لاعرف اى موقع يخلينى الاقى حد مشابه ليا فى افكارى يمكن استفيد منه بفكرة او بمعلومة تفيدنى فى تكوين فكرتى اللى هى اتنفذت بالفعل الان ولقيت ظهر قدامى فى البحث محاورات مصرية لفت انتباهى جدا الاسم مع ان فيه مواقع كتير ممكن تأدى للغرض اللى دخلت علشانه بس حبيت ادخل اى حاجه فيها ريحة مصر لانى وطنى جدا دخلت واول واحد لقيته قدامى كان الدكتور نو اللى قبل ما اشترك بعتله رساله خاصة اطلب منه المساعده فى امرى قام رادد عليا مشكورا ان هو مش فى الكويت وقام باعتى تانى يوم الرابط اللى فيه موضوع لقاء محاورى فرع الكويت يوم الاربعاء مترددتش لحظة انى اسجل ساعتها علشان اشارك المجموعه دى فى شئ يجمعنا ببعض ولما دخلت لقيت مجموعه بجد جميلة ربنا يخلينا ديما على ود واتناقشت معاهم واستفد منهم وبما انى جرئ وده طبعا لطبيعة شغلى ووقوفى امام القضاة بالمحاكم وبعد اصيح لقتنى بشارك فى كل الموضوعات وبرد على المناقشات بجرأه ولانى بحب المساعده حبيت اشارك بموضوع جديد وهو القانون فى الكويت اللى مش كتير بيعرفوه والحمد لله لقيت قبول من المجموعه الموجودة ومنتظرتش مرة حد يرد عليا بتعليق او ميردش بصراحه مش فرقت معايا قد ما فرقت انى اقدم شئ الناس تستفيد منه وبجد محستش فى لحظة انى غريب فى وسطكم وبشكركم من قلبى لقبولى بينكم بكل حب وترحاب .

ودلوقتى مقولش ليكوا انا فاتح محاورات المصريين 24 ساعة متواصلة سواء فى العمل او فى البيت وادمنتها خلاص لجدية الامور والموضوعات وكل لحظة فيه جديد من الاصدقاء .

بحبكم بجد

خالص تحياتى للجميع

تم تعديل 27 فبراير 2007 بواسطة وائل كيوان

[هدي درويش]

مساء الخير لكل الموجودين

انا هدي درويش مشتركه جديده معاكم و احب اشكر سكوربيون

لانه ساعدني اعرف ازاي اشارك 0 انا عرفت الموقع بالصدفه لما

كنت بادور في جوجل علي معاني كلمات كارمينا بورانا 0 كان فيه

كلام كتير و لقيت موضوعات كتير قيمه و بعيده عن التفاهات اللي

الواحد بيشوفها و يسمعها كل يوم 00و اللي زهقنا منها فعلا0

يسعدني اكون معاكم و علي فكره انا من اسكندريه و باشتغل

في مجال الاستيراد00 نشوفكم علي خير0