إيه اللي رماك عالمُر ؟

[se_ Elsyed]

سؤال بنسأله لنفسنا كتير في الغُربة ... صح ؟

خصوصاً اللي بيتعب في الغربة وبيبقى حظه مش كويس

لكن هناك فرق كبير بين قبول المُر وبين الإنتحار

يعني الشباب الطموح اللي بيرمي نفسه في التهلكة بتاعت التهريب لأوروبا عن طريق مراكب الموت والواحد فيهم بيدفع للمهرب على الأقل 5000 دولار عشان يغطس في البحر وما يقبش تاني ... ده إنتحار وليس مبرراً مُطلقاً للهروب من صعوبة الحالة المعيشية ...

الإسبوع الماضي كنت بأكلم أخويا في مصر كالمعتاد ولقيته بيقولي إن فلان - أحد أقاربنا - هايسافر الرياض هذا الإسبوع بتأشيرة عمل ...

قلت الحمد لله أحسن كان مستلمني كل ما أنزل مصر والله كنت بأحاول أدبر له أي تأشيرة هنا لكن الأمور كانت بتزداد صعوبة خصوصاً مع توجه التوطين للوظائف في دول الخليج عامةً ..

المهم قلت له جاي فين وعلى تأشيرة إيه ؟

وإذ بي لا أستطيع أن أنطق او ارد مما سمعته ...فلقد قال لي أخي .. إنه أشترى تأشيرة ليعمل في أحد الوزارات هنا .. فقلت كويس .. إيه بقى ؟ فقال لي ... هايتشغل " جنايني "

أنا عملت ما سمعتش وقلت له قول تاني كده

فقالي والله .. جنايني

قريبنا ده معاه معهد فني صناعي قسم زخرفة وديكور وحاجات من دي .. وعنده تقريباً 30 سنة ... متزوج وعنده طفل ... ووالده يرحمه الله ساعده في مصاريف زواجه ... ومن بعد تخرجه الدنيا لطشت معاه وأشتغل في اعمال كتير ... لكن لإنه مرفه وانيق اكتر من اللازم - بيفكرني بأحمد مظهر في فيلم الأيدي الناعمة - ما كانش بيستمر في شغل خصوصاً إن كل الأعمال اللي أشتغلها كانت مُرهقة وليس فيها اي إبداع وطبعاً بعيد عن مجاله وياريتها كانت اعمال فنية أهو نقول يتعلم حاجه ...

أما مسألة الجنايني دي .. فانا متأكد إنه ما يعرفش الفرق بين الجرجير وعصير الجوافة

المهم أنتظرته وروحت إستقبلته اول ما وصل الرياض .. وبأدردش معاه كده وإذ بي أسمع ما لذ وطاب من الأشياء التي أكره ان أسمعها :

1- أشترى التأشيرة من احد مكاتب التسفير بمبلغ 10 ألاف جنيه مقفلة ( مع العلم الحكومة هنا ما بتدفعش حاجه في التأشيرة اللي رسومها 2000 ريال أساساً .. لكن المندوب او المسئول اللي بينزل من الوزارة ويروح يختبر الناس في مكتب الإستقدام بينصص مع المكتب وبيعملوا ملايين من الموضوع ده )

2- المرتب - بصراحة مكسوف أقول - 800 ريال شهرياً أول عن أخر .. والأجازة كل سنتين ( مع إن القانون الجديد بيقول حد ادنى 21 يوم واللي قبله كان 15 يوم سنوياً ) .. مع تذكرة ذهاب فقط .. روحه بلا رجعه .. والرجعه بتبقى على حساب الموظف

يعني بحسبة بسيطة هايقعد يفحت ييجي سنيتن لحد ما يجيب ثمن التأشيرة فقط ...

أنا كل ده باسمع وأنا مذهول

لأ ويقولي .. ده أنا موقع التأشيرة دي كمان .. ده ناس صعايدة جايين معايا دافعين قدامي 13500 ج بنفس المرتب والوظيفة

المهم

قلت له وإنت بتفهم في زراعة الجناين والحاجات دي ؟ فقالي لأ طبعاً بس صاحب المكتب قال لي إنت هاتروح مش هاتعمل حاجه والموضوع سهل خالص زي شكت الدبوس ... فقلت له آه إبقى قابلني ده إنت هاتشوف أيام ما يعلم بها إلا ربنا ...

اللي عايز أضيفه على النقطة دي بالذات .. إننا والله العظيم كشركة كبيرة مذلولين ذُل الأرملة اللي بتجري على معاش جوزها عشان نلاقي عمال نظافة أو قهوة وشاي .. وكل بنجلاديشي أو هندي ييجي ويعرف إن المرتب ما بين 1000 إلى 1200 ريال يبص لنا من فوق لتحت وياخد بعضه ويمشي ...

لإن في عجز في العمالة دي نتيجة قيام شرطة الجوازات السعودية العام الماضي بحمله لمت منهم ألاف مؤلفه لإنهم بيشتغلوا في كثير من الأحيان في اعمال غير مشروعة ومنتشرين في الشوارع زي الجراد واقل حاجه بيعملوها بيغسلوا عربيات بعد نهاية عملهم فأقل واحد ممكن يقلب له في العملية دي مش أقل من 1500 ريال إضافي غير شغله الأصلي

فليه يتعب نفسه ويشتغل في شغلانه تكتفه وما يعرفش يعمل من وراها سبوبه ..

يبقى إزاي شبابنا يقبل بحاجه زي دي ؟

ما علينا

راح الزبون يستلم شغله أول يوم .. واتصلت به على المغرب كده لقيته بيعيط - بجد - وبيقولي إلحقني وكلم لي حد من معارفك ينقذني من اللي انا فيه .... ليه يابني حصل إيه ؟

- قالي أخدونا على سكن الوزارة وده يبُعد عن الرياض ييجي 50 ك ... وعبارة عن معسكر كده وكله غرف .. زي نظام الجيش كده .. وكل 4 في غرفه وكل واحد له سرير ودولاب فقط .. يعني لا تليفزيون ولا يحزنون ولا الدموع ...

وطبعاً صحراء جرداء لا سوبر ماركتات فيها ولا ماء ولا مواصلات ولا بشر غير اللي موجودين معاه ... ده أولها

تانيها .. المرتب بالصلاتو عالحبيب خس وبقى 600 ريال من أول ساعة عمل ... يا نهار إسود كمان ... ليه يا حبيبي ؟

قالي إنهم خصموا 200 ريال للطعام على اساس إن في هنود شغالين طباخين في معسكر التدريب ده وهايوفروا لهم فطار وغدا وعشا ... فقلت له كويس .. مانت كنت هاتصرف ضعف المبلغ ده لو طبخت بنفسك أو عشت على المطاعم ... فقالي أنا جربت الأكل أول يوم وبعيد عنك اكل لا يسر عدو ولا حبيب ( طبعاً أنا عارف الهنود وطبيخهم اللي بنشمه من على بُعد 10 ك ) ... من الأخر أنا جبت جاز يا سين سين من أول يوم ..

وحكى لي عن مواعيد العمل وطبيعة العمل اللي كانت زي ما توقعت ... تحت لهيب الشمس الحارقة التي تشبه جُهنم في الصيف ...

فقعدت أفكر وأقول .. منك لله يا مبارك ... إن هي إلا أيام قليلة وستقابل رب كريم .. وإذا كان سيدنا عُمر سيُسأل عن عدم تمهيده للأرض التي تعثرت فيها بغله أثناء سيرها في العراق وهو في المدينة المنورة ...

فما بالك فيمن تسبب في تشريد ملايين من أبناء مصر بسبب سياساته الفاشلة ووعوده الكاذبة وخططه الخمسية اللي جابتنا ورا وزادت الديون علينا بالرغم من بيعه البلد بثمن بخس ..

وأين دور وزارة العمل اللي فالحه بس في لهف الفلوس مننا في الرايحه والجايه وموظفينها قاعدين تحت المراوح في مكاتبهم .... هل يقومون بحماية أي عامل مصري ويقوموا بمراجعة عقود الإذعان هذه ويضعون حد أدني للرواتب للحفاظ على كرامتنا كمصريين ؟

طبعاً أنا أسف جداً لإني بأكلم نفسي في السؤال الأخير ده وأكاد أهذي وأتحدث عن أوهام مثل الكرامة وحماية المصريين

واظن الصبح أنا كتبت عن سيدة بـ 100 راجل وهي رئيسة الفلبين اللي تعتبر أكبر دولة في العالم بتبتعث ممرضات وخادمات لدول العالم .. ومع ذلك واقفه زي الوتد وحطيت صوابعها في عين التخين وقالت إن راتب الفلبيني مهما كان مش هايقل عن 300 دولار شهرياً واللي عاجبه عاجيه واللي مش عاجبه يشرب من البحر

أما إحنا فهيصه وكله بياكل في كله .. حتى هؤلاء المجرمون أصحاب مكاتب التسفير هم أول من ينهشوا فى لحم المصريين ويبيعوهم للمتعاقدين من دول الخليج

وطبعاً رجال الاعمال وأصحاب الشركات الخليجيين ما كانوش يعرفوا حاجه إسمها بي تأشيرة وإحنا اللي عرفناهم عشان كلصاحب مكت معدوم الضمير يعمل سبوبه ..

وبكده نبقى بنخترع حاجه مبتكرة بين دول العالم .. فاللي اعرفه من وانا صغير إن اللي رايح شغل ده بيقبض مش يدفع ..

لكن احنا العكس ... إدفع دم قلبك الأول .. وإبفى قابلني لو لميت اللي انت دفعته

وحسبنا الله ونعم الوكيل .. وثقتنا في عدالة الخالق الكريم بتجعلنا نطمئن إن إنتقامه قريب .. وبإذن الله هانعيش لما نشوف أصحاب تلك الكراسي يلقون مصير صدام وكل الطغاة على مر التاريخ

[shawshank]

... فقال لي ... هايتشغل " جنايني "

... قريبنا ده معاه معهد فني صناعي قسم زخرفة وديكور وحاجات من دي .. وعنده تقريباً 30 سنة ... متزوج وعنده طفل ...

أنا كنت لسه بقول لواحد صاحبي تعالى نعمل تجربة ظريفة ...

هنعمل اعلان في الجرايد إن الكويت طالبة للعمل مدرسين ابتدائي بس يشترط حصولهم على الدكتوراه ... قلت له هتشوف كام واحد هيقدم .

وننشر النتيجة بعد كده في الجرايد برضه .

كما قلت يا سي السيد ، انتقام المولى عز وجل قريب .

[darlengs]

انا طول عمري اسمع ان اللي بيروح بلد خليجيه يا سعده يا هناه 00وعمري مفكرت ان فيه ناس فعلا بتتذل و تتبهدل كل يوم فالدنيا بالشكل دا 00

الا من يوم مجيت الكويت و شفت شبابنا اللي زي الفل 00 ادب و اخلاق 00 و شهادات عليا والله العظيم او متوسطه بيشتغلو علي العاب الاطفال اللي في المولات 00 او في محلات بدوام كامل 00 او مطاعم 00و في الاخر يادوب بيجيبو تمن السكن و اكلهم و شربهم 00او حتي بيستلفو من بعض و يعيش الواحد من دول في غربته مديون 00 و لو الراتب تاخر ملوش يفتح بقه اهو يصبر و خلاص 00

بييجو و كلهم امل انهم هيحققو احلامهم و ميعرفوهوش ان الرواتب حاليا للوافدين الجدد قليله والايجارات غاليه اوي دا غير اللي فعلا بنسمعه كل يوم عن توطين العماله 00و يا سلام لو عنده طفل او اتنين فسن المدارس تبقا كملت00 يا يشحت بيهم علشان يجيب مصاريف المدرسه - دا لو عرف يجبهم اصلا لان مصاريق الاقامات و الاجراءات مصيبه لوحدها - يا يسيبهم يكبرو فحضن امهم و يكون هو بس صوره معلقينها علي الحيطه و حواله توصلهم كل شهر000 مين يقول كدا !!!!!! بس فعلا الشباب معذور 00000 بيفكر انه هيجي علي فرصه عمل مؤقته لغايه ميلاقي احسن منها 00 و لما يجي يتصدم بالواقع و ميعرفش يحسن او يغير عمله الا بعد انتهاء عقده يعني بيفاجأ بالقوانين الخاصه بالعمل هنا اللي بتقوله يا كدا يا ترجع بلدك 000

بلدك اللي بتعيش فيها غريب و حياتك امر من مراره الغربه و ذلها 00 انا بقول يوميا حسبي الله فيك يا مبارك بتنام ازاي يا راجل والله بدعي من قلبي بعد ماشفت الغربه شكلها ايه 00

[Abdulaziz Omar]

حسبنا الله ونعم الوكيل

كنت موجودا لبعض الوقت في بلد خليجي.........ووجدت شباب مصري......في العيشرينات......يعني اجمل سن......سن القوة والفتوة والعطاء.......

كانوا يجلسون في الشوارع انتظارا لان ياتي من يريد شيالا.......نعم.....شيال....فيذهبوا معه ليحملوا متاعه من المسكن او المتجر لقاء دراهم معدودات.....لاتسمن ولا تغني من جوع

تبادلت الحديث مع بعصهم.....فوجدتهم جميعا من خريجي الجامعات....!!!!

يعيشون تحت مستوي الفقر في بلد يتمتع اهله بغاية الثراء..!!

بعضهم دفع الكثير لمن يسمي بتجار الاقامات كي يستطيع ان ياتي الي هذا البلد......وبعضهم استدان حتي يدفع ثمن الاقامة....املا في ان يحل كل مشاكله عند حضوره لهذا البلد......

فلما انهارت اماله.....اصبح يخشي العودة الي مصر ومواجهة الاهل والاصدقاء.....والديون

هذا المشهد اهديه لبعض الاصدقاء الذين يبشرون بتحسن الاحوال في مصر علي يد السيد نظيف !!!!

[Ghost]

الكلام واقف بجد في زوري

مش عارف اتمتم غير حسبنا الله و نعم الوكيل

[badroora]

انا باحترم الهنود جدا بغض النظر عن اكلهم ورحتهم او طريقة حياتهم

الهنود فعلا شعب حمال اسية بيشتغل فى اى حاجة والخليج بيفضلوهم لرخص اجورهم وطاعتهم العمياء

الواحد بيبقي فى عز الضهر ماشي بعربيته ومشغل التكيف ومش عجبة الجو وهما تلاقيهم بيرصوفوا الطرق ولا بيفحروا فى الارض ولا شغالين فى الشوارع فى عز الشمس والله قلبي بيتقطع عليهم

فى ناس شغالين معانا (عامل نظافة ,ولا مراسل )زى ما بيسموهم هنا فى الخليخ بيشتغلوا 16 ساعة فى اليوم ومرتب 80 دينار يعنى حوالى 800 ريال و9 عايشين فى حجرة صغيرة ومساحتها ضغيرة والسراير ام دوار دى .

واجازة كل 3 سنين وعلى حسابهم وغير الاجازة الاسبوعية نص يوم يعنى اليو اللى بيشتغل فيه من 7 ص الى 10 مساءا يوم اجازته بيكون شغال من 7 الى 3 واجازة من 3 الى عشرة

والله واحد منهم بيقولى بقالوا 4 سنين فى البحرين وعمروا ما راح ولا شاف المنامة شكلها ايه من الشغل للبيت ومن البيت للشغل

وانا لما جيت لاقيت الشغل 12 ساعة باليوم 13 يوم فى الشهر ومكنش عجبني بس لما شوفت حالهم حمد ربنا

وقريبك دا مش اول واحد يعانى من كدا الشباب اللى عندنا محبطين جدا انا اعرف مهندسين وخريجين جامعات وذكروا وطلع عنيهم وطالعين على فيزا عامل ولا بائع مفروشات ولا بيشتغل فى كنتاكى

انا اخويا مهندس زراعى خريج جديد بيقولى عاوز اسافر ان شاءالله اشتغل فى الامن بصراحة حاجة تحزن وتزعل والخليج طبعا الاشغال اللى مش بيشغلواها لولاد البلد او بمعنى اصح اللى محتاجة بهدلة يدوها للاجنبي اما بن البلد هنا ثانوية عامة ولا اعدادية تلاقية شغال وموظف محترم وليه مرتب

واللى تلاقية لسة طالب وموظف حكومى

مش بلدنا اللى مساوية المتعلم زى اللى مش متعلم

والله اخويا صعبان على ومش هاين على ابهدلة فى اى شغلانه والسلام

ربنا يكون فى عونه وعون الشباب جميعا

نجفة

[amrhoras]

مقدرش اقول الا حسبي الله ونعم الوكيل فى مبارك وكل من تبعه لانى بكل بساطة بشتغل محاسب ههههه كنت في بلدى بشتغل 12 ساعة وساعات بتوصل اكتر من 16 ساعة متواصلة في شركة كبيرة اسما تخيل كنت باخد كام يا سين سين كنت ياطويل العمر باخد 250 + 20 جنية عموله بيع اللى كنت بعمل اجماليتها بالملايين غير موازين الفبركة بتاعة الضرايب و ميزاينة العمومية وكل على وعود انى حزيد زيادة مفرطة وكمان حتكون طفرة في المرتبات وجت الزيادة 100 جنية يعنى بدال 250 يقست باخد 350 حاجة جميلة جدا وكنت بدور ولقيت انها مقفلة جدا فى وشي عاوزين شهادات كذا عاوزين كمبيوتر وانجليزى اه على فكره انا معايا دورات كتير انجليزى من الجامعة الامريكية وكمبيوتر ومحاسبة صرفت على كل دة الاف مؤلفة على وعد انى الاقى شغلانه بمرتب حلو خصوصا انى ارتبطت بفتاه ربنا يخليهالى يارب وجه فكره السفر بعد ماوجدت الاسعار بتاعة الشقق نار ياخويا نار غير المعيشة غير الايجارات غير الكهربا غير الميه غير المصاريف الشخصية كل دة اقدر اوفره من ال 350 جنية حد يقولى ليه اصحاب الاعمال استغلو الفرصة دى وعندى صحيح اللى يضحكك جوه بلدك وحتلاقي حاجة جميلة عندى صديقى دفع دم قلبه عشان يشتغل في وزارة الري اتعين عقبالكم كدة قصدي بعد الشر بعقد مؤقت تعرفو على درجة ايه جانيني ب 150 جنية ف الشهر بعد خصم الدمغات والتأمينات بيصفو على 130 ف الشهر يعنى لا حكومة ولا خاص المهم دورت على الشغل هنا هنا ياخويا كله مش عاجبة انى خريج 2003 طب شوفوا الخبره ابدا الدماغ مع احترامى للاخوة الصعيدة صعييييييدى من الدرجة الاولى عموما سيبلنا تلفونك اوك حاضر سلام عليكم ان حد يعبرنى مفيش المهم لقيت شغلانة ف السعودية على 1200 ومحاسب و الشغل 12 ساعة ما انا متعود بقى وكل يو مفيش اجازات هههههه جميلة اضطريت انى اوافق نظرا لانغلاق الابواب امام عيني داخل بلدى ولا استطيع ان اقول حسبي الله ونعم الوكيل ف كل الناس المستغلة فى كل مكان لانى تعب لفيت مصر كلها كعب داير من اول الغردقة الى الاسكندرية بحثا عن عمل براتب كويس كله كان يا اما واسطة ياما راتب يكفينى مصاريف بس اشتغلت كل حاجة لدرجة كنت بشتغل فى سيبر نت بالليل من الضيق وبرده مفيش فايدة مندوب مبيعات مفيش فايدة كاشير فى فنادق مفيش فايدة محاسب ف العاشر من رمضان مفيش فايدة اعمل ايه كل الابواب مغلقه فى وجهى داخل بلدى والان خارجها لانى تعبت نفسيا لانى اولا عايش لوحدى في منفي وسط الصحرا بعمل اكلى بنقسي وبدفع برده قيمة الفيزا كمان ومصاريفى وبشتغل محاسب ومدير وسكرتير ومدرس احيانا وسائق احيانا مع انى بعارض كتير حاكم زي مابيقولو معدتش فارقة سنه من سونيا وكله محصل بعضه انا عامة بقالى هنا ف السعودية 6 شهور و 19 ساعة و 42 دقيقة ولو عاوزين باللحظة احسبها انا طهقت وسبونى اتكلم لانى كرهت الدنيا جدا ملطخة معايا من زمان من اول ما دخلت كلية تجاره على امل اكون ذو شأن كويس ف مجتمع لا يعلم اى قيمة لآى شهادة مجتمع اهل الفن والكورة وولاد الاكابر واخدين حقهم تالت ومتلت اما التلت الاخير على الحرامية

اى زمن هذا؟ اى واقع هذا؟ اين كرامة الامم؟ اين كل شيء

[Mr.khalid]

الأخوة الأعزاء

السيد سين سين

طب حضرتك تقول ايه على الشباب اللى بييجى الكويت نظراً لنزول المدرسين فى فترة الصيف وما يرونه من رفاهيه عليهم مما يخيل للشاب الحديث التخرج ان الكويت بها مناجم من المال توزع فى الشوارع ويتخيل ان جميع المقيمين بالكويت بيروحوا اخر كل شهر ياخدوا شيك وكلهم زى بعض فترى الشاب يقوم بإستلاف المبالغ الطائلة ويبيع كل ما لديه من أجل الحصول على تأشيرة لدخول جنه الله فى أرضه ألا وهى الكويت العزيزة والتى وصلت سعر التأشيرة لها مبلغ 1300 دينار كويتى يعنى بحسبة بسيطة بيدفع ثمن الفيزا 1300 دينار يعنى حوالى 26000 ج وتكاليف أوراق وكشف فى مصر بالإضافة الى تذكرة طيران يعنى ممكن نقول 4000 يعنى المجموع 30000 ج وتلاقى الشاب جاى على فيض الكريم مع العلم أن الغالبية منهم من حملة أعلى الشهادات العليا ودورات كمبيوتر ولغة وما الى ذلك وجاى الكويت ومتخيل انه فى خلال سنه او اتنين بالكتير هينزل مصر اجازة بالسيارة ويخطب ويتزوج ويشترى شقة او بيت كامل له .

المصيبة الكبرى انه دفع حتى الآن 30000 ج وجاى لسه يدور على شغل والله العظيم انا اعلم ناس كتير هنا بالكويت خريجين جامعه وبقالهم اكثر من 7 شهور ولم يجدوا اى شغل ويضطروا الى العمل بنظام اليومية مع نجار او سباك او حداد ( يعملوا بوظيفة عااااااااااااااااااااااامل) براتب يومى 5 دينار ويشتغلوا يوم ويقعدوا 10 وبعدين حتى لو وجدوا وظيفة ثابتة فى شركة فان معدل الرواتب يتراوح من 120-150 دينار شهرياً مع العلم انه علشان يسكن فقط بيدفع فى السكن ما لا يقل عن 25-35 دينار شهرياً فى حالة السكن مع جماعة فى شقة وكمان أكل فى الشهر متوسط 20 دينار ومواصلات ممكن 10 دينار وسجائر 10 دينار واتصالات 15 دينار يعنى ببساطة مجرد سكن+اكل+مواصلات +اتصالات تقريباً ممكن مش اقل من 90 دينار

باقى مع المسكين 60 دينار على افتراض انه يعمل براتب 150 دينار مع العلم انه ليس بالسهل ان يجد هذا العمل مجرد وصوله الكويت

المهم معاه الآن 60 دينار ولسه لم يشترى اى شئ لنفسه خليه مش هيشترى ويفضل فى الدوامة دى لمدة سنتين يجد امامه المصيبة الكبرى ألا وهى تجديد الإقامة والتى تتكلف للسنتين مبلغ 550 دينار كويتى بياخدهم البيه الملاك (الكويتى) من السيد الشيطان (الوافد) وبعدين لو قلتله طب اجدد سنه واحدة يقولك اعطينى مش اقل من 400 دينار ولذلك انت مضطر لتجدد سنتين

يعنى صرفت مبلغ 600 دينار كويتى فى تجديد الإقامة .

بالله عليكم حد يقولى حتى لو بيفضل مع الغلبان ده 60 دينار كل شهر وعلى فكرة دة شبه مستحيل يفضل معاه هذا المبلغ فى وجود هذا الراتب بس هل انه هيفضل لمدة سنتين لا يرسل اى شئ مصر لأهله او انه يشترى اى شئ لنفسه ولا هيفضل زى اللى شغال فى السخرة!!!!!!!!!!!!!!!!!!!

المهم بعد كام سنه هيقدر هذا الغلبان ان يسدد فقط ثمن تأشيرة دخوله الكويت

وبعدين كلامى السابق كله على نماذج كما قلت مؤهلات جامعية وغير متزوجين طب بعد كام سنه يقدر يتزوج !!!!!!!!!!!!!!!!

الخلاصه دة الواقع هنا بالكويت والمشكلة انك كلما سألك شخص فى مصر عن حال البلد وتحكيله هذا الكلام لا يصدقك ويقول لك لما البلد وحشة كدة إيه اللى مخليك لسه قاعد فيها ؟؟؟؟؟؟؟؟؟؟؟؟؟؟ :angry:

ويصمم عل شراء الفيزا ولا يعرف الحقيقة إلا بعد أن يأتى هنا

وأعرف نماذج والله العظيم دفعت التكاليف السابقة يعنى حوالى 30000 ج وبعد ما وصل الكويت لم ينتظر إلا حوالى 15 يوم عمل الإقامة وبعدين ترك الكويت للأبد

يبقى المفروض نعذر الشباب اللى بيدفع لمراكب ليبيا على الأقل انه عنده أمل فى حياه كريمة وان لم تكن من الناحية المادية فعلى الأقل من الناحية المعنوية لأن إخوانا الخليجيين وخصوصا هنا فاكرين انهم ملائكة فى الأرض ومعصومين من الخطأ وان باقى الوافدين هم خلقوا ليكونوا خدم لهم!!!!!!! :blink: ( طبعاً ما عدا الجنسيات الأوربية والأمريكان والبريطان )

[Eemaan]

الفاضل Mr.khalid كتب

يعنى المجموع 30000 ج وتلاقى الشاب جاى على فيض الكريم مع العلم أن الغالبية منهم من حملة أعلى الشهادات العليا ودورات كمبيوتر ولغة وما الى ذلك وجاى الكويت ومتخيل انه فى خلال سنه او اتنين بالكتير هينزل مصر اجازة بالسيارة ويخطب ويتزوج ويشترى شقة او بيت كامل له .

وال30000 جنيه دول ميعملوش أى مشروع فى مصر(حتى لو مقله لب)

وبكده يقدر يتجوز ويعمل بيت فى خلال السنتين وكمان يكون معاه رأس ماله اللى بدأ بيه!!!

:angry:

تحياتى

[badroora]

الأخوة الأعزاء

السيد سين سين

طب حضرتك تقول ايه على الشباب اللى بييجى الكويت نظراً لنزول المدرسين فى فترة الصيف وما يرونه من رفاهيه عليهم مما يخيل للشاب الحديث التخرج ان الكويت بها مناجم من المال توزع فى الشوارع ويتخيل ان جميع المقيمين بالكويت بيروحوا اخر كل شهر ياخدوا شيك وكلهم زى بعض فترى الشاب يقوم بإستلاف المبالغ الطائلة ويبيع كل ما لديه من أجل الحصول على تأشيرة لدخول جنه الله فى أرضه ألا وهى الكويت العزيزة والتى وصلت سعر التأشيرة لها مبلغ 1300 دينار كويتى يعنى بحسبة بسيطة بيدفع ثمن الفيزا 1300 دينار يعنى حوالى 26000 ج وتكاليف أوراق وكشف فى مصر بالإضافة الى تذكرة طيران يعنى ممكن نقول 4000 يعنى المجموع 30000 ج وتلاقى الشاب جاى على فيض الكريم مع العلم أن الغالبية منهم من حملة أعلى الشهادات العليا ودورات كمبيوتر ولغة وما الى ذلك وجاى الكويت ومتخيل انه فى خلال سنه او اتنين بالكتير هينزل مصر اجازة بالسيارة ويخطب ويتزوج ويشترى شقة او بيت كامل له .

المصيبة الكبرى انه دفع حتى الآن 30000 ج وجاى لسه يدور على شغل والله العظيم انا اعلم ناس كتير هنا بالكويت خريجين جامعه وبقالهم اكثر من 7 شهور ولم يجدوا اى شغل ويضطروا الى العمل بنظام اليومية مع نجار او سباك او حداد ( يعملوا بوظيفة عااااااااااااااااااااااامل) براتب يومى 5 دينار ويشتغلوا يوم ويقعدوا 10 وبعدين حتى لو وجدوا وظيفة ثابتة فى شركة فان معدل الرواتب يتراوح من 120-150 دينار شهرياً مع العلم انه علشان يسكن فقط بيدفع فى السكن ما لا يقل عن 25-35 دينار شهرياً فى حالة السكن مع جماعة فى شقة وكمان أكل فى الشهر متوسط 20 دينار ومواصلات ممكن 10 دينار وسجائر 10 دينار واتصالات 15 دينار يعنى ببساطة مجرد سكن+اكل+مواصلات +اتصالات تقريباً ممكن مش اقل من 90 دينار

باقى مع المسكين 60 دينار على افتراض انه يعمل براتب 150 دينار مع العلم انه ليس بالسهل ان يجد هذا العمل مجرد وصوله الكويت

المهم معاه الآن 60 دينار ولسه لم يشترى اى شئ لنفسه خليه مش هيشترى ويفضل فى الدوامة دى لمدة سنتين يجد امامه المصيبة الكبرى ألا وهى تجديد الإقامة والتى تتكلف للسنتين مبلغ 550 دينار كويتى بياخدهم البيه الملاك (الكويتى) من السيد الشيطان (الوافد) وبعدين لو قلتله طب اجدد سنه واحدة يقولك اعطينى مش اقل من 400 دينار ولذلك انت مضطر لتجدد سنتين

يعنى صرفت مبلغ 600 دينار كويتى فى تجديد الإقامة .

بالله عليكم حد يقولى حتى لو بيفضل مع الغلبان ده 60 دينار كل شهر وعلى فكرة دة شبه مستحيل يفضل معاه هذا المبلغ فى وجود هذا الراتب بس هل انه هيفضل لمدة سنتين لا يرسل اى شئ مصر لأهله او انه يشترى اى شئ لنفسه ولا هيفضل زى اللى شغال فى السخرة!!!!!!!!!!!!!!!!!!!

المهم بعد كام سنه هيقدر هذا الغلبان ان يسدد فقط ثمن تأشيرة دخوله الكويت

وبعدين كلامى السابق كله على نماذج كما قلت مؤهلات جامعية وغير متزوجين طب بعد كام سنه يقدر يتزوج !!!!!!!!!!!!!!!!

الخلاصه دة الواقع هنا بالكويت والمشكلة انك كلما سألك شخص فى مصر عن حال البلد وتحكيله هذا الكلام لا يصدقك ويقول لك لما البلد وحشة كدة إيه اللى مخليك لسه قاعد فيها ؟؟؟؟؟؟؟؟؟؟؟؟؟؟ :angry:

ويصمم عل شراء الفيزا ولا يعرف الحقيقة إلا بعد أن يأتى هنا

وأعرف نماذج والله العظيم دفعت التكاليف السابقة يعنى حوالى 30000 ج وبعد ما وصل الكويت لم ينتظر إلا حوالى 15 يوم عمل الإقامة وبعدين ترك الكويت للأبد

يبقى المفروض نعذر الشباب اللى بيدفع لمراكب ليبيا على الأقل انه عنده أمل فى حياه كريمة وان لم تكن من الناحية المادية فعلى الأقل من الناحية المعنوية لأن إخوانا الخليجيين وخصوصا هنا فاكرين انهم ملائكة فى الأرض ومعصومين من الخطأ وان باقى الوافدين هم خلقوا ليكونوا خدم لهم!!!!!!! :blink: ( طبعاً ما عدا الجنسيات الأوربية والأمريكان والبريطان )

للاسف يا استاذ خالد لما تقعد تقول اكلام دا لحد قريبك انه من الافضل انه يطلع على عقد عشان يضمن السكن وتبقي مطمئن ان كفالتك على شركة ولا على كافيل يقولك لا انتى بس شوفلنا فيزا وملكيش دعوة بالباقي

ويجوا هنا ويبقي حالهم يقطع القلب والله الله يكون فى عون الشبابا بجد

موضوع الجنسيات والملائكة مش شرط الاوروبين والامريكان لا طبعا اكيد فى مصريين بردة اخدين وضعهم وليهم احترامهم بس على حسب انت طالع على ايه وبتشتغل فى مجالك ولا لا ء

وعموما كلها ارزاق مقسمها الخلاق ...

[Ghost]

والمشكلة انك كلما سألك شخص فى مصر عن حال البلد وتحكيله هذا الكلام لا يصدقك ويقول لك لما البلد وحشة كدة إيه اللى مخليك لسه قاعد فيها ؟؟؟؟؟؟؟؟؟؟؟؟؟؟

فعلا هي ديه حجة كل واحد عاوز يسافر باي تمن

لما تقعد تقول اكلام دا لحد قريبك انه من الافضل انه يطلع على عقد عشان يضمن السكن وتبقي مطمئن ان كفالتك على شركة ولا على كافيل يقولك لا انتى بس شوفلنا فيزا وملكيش دعوة بالباقي

تمام يا نجنج ,

والله العظيم , انا ما كنت اتخيل و لو للحظة ان الحال بهذا الشكل الذي يتكلم عنه الاخوة المشاركين الافاضل , شكرا لكم جميعا

[Mr.khalid]

الفاضل Mr.khalid كتب

يعنى المجموع 30000 ج وتلاقى الشاب جاى على فيض الكريم مع العلم أن الغالبية منهم من حملة أعلى الشهادات العليا ودورات كمبيوتر ولغة وما الى ذلك وجاى الكويت ومتخيل انه فى خلال سنه او اتنين بالكتير هينزل مصر اجازة بالسيارة ويخطب ويتزوج ويشترى شقة او بيت كامل له .

وال30000 جنيه دول ميعملوش أى مشروع فى مصر(حتى لو مقله لب)

وبكده يقدر يتجوز ويعمل بيت فى خلال السنتين وكمان يكون معاه رأس ماله اللى بدأ بيه!!!

mfb:

تحياتى

الأخت إيمان

أولاً إيه هو المشروع اللى ممكن يتعمل ب 30000 ويمكن من خلاله ان يتجوز الشاب ويعمل بيت فى خلال سنتين إلا إذا كان هذا المشروع فى الباطنية !!!!!!!!!! wst::

ثانياً

لو راجعتى مداخلتى وعرفتى ما هو مصدر ال 30000 للشاب لوجدتى ان أغلب هذا المبلغ بيكون دين لحد لما يسافر ويشتغل وبعدين يسدد المبلغ

فبصراحة من وجهة نظرى لو ذهبت لشخص وقلتله سلفنى 10000 ج علشان انا مسافر الكويت فسوف يعطينى هذا المبلغ لعده أسباب مثلاً ممكن يقول هذا الشخص مسافر الكويت يعنى بلد الدينار ابو عشرين جنيه وبلد الفلوس يعنى ضامن ان فلوسه هترجع بسرعة

وأيضاً ممكن يكون له حسابات اخرى يعنى مثلاً يقول هذا الشخص رايح الكويت يعنى ممكن احتاجه فى يوم من الأيام علشان فيزا أو يشغلى أحد أقربائى وهكذا

ولكن لو ذهبت لنفس الشخص وقلتله سلفنى 10000 ج اعمل مشروع فلن يعطينى أيضاً لعده أسباب منها انه سوف يقول انه عاوز الفلوس علشان يعمل مشروع يعنى لسه هستنى لما يعمل المشروع وبعدين يعطينى فلوسى تاتا تاتا على التقسيط المريح وممكن المشروع يخسر وانتظر فلوسى يعنى فيها مجازفة

وأيضاً ممكن نفس الشخص يجلس معى ويسألنى مشروع إيه وإيه أرباحه وبعد إستجواب ساعتين عن كافة التفاصيل يقول والله أنا ليس معى أى فلوس والظروف والجوابات والحجج اللى الكل عارفها وبعدين تفاجأ ان هذا الشخص عمل المشروع اللى كنت تحلم انت به !!!! :blink: صح ولا ايه مش ده الواقع اللى بيحصل

أنا مره قلت نفس كلامك لشخص هنا بالكويت وقلتله ليه دفعت 30000 ج وجيت الكويت طب ليه معملتش مشروع فى مصر قالى والله انا لو كان معاى المبلغ فى مصر مكنتش جيت الكويت ولو كنت فكرت فى السفر ومعى ال 30000 ج فى جيبى انا كنت سافرت أوربا ومجيتشى الخليج

والأهم من كل ذلك يا أخت إيمان هل تتصورى ان المناخ والأوضاع فى مصر بتسمح بالمشاريع الصغيرة للشباب هذه الأيام وخصوصاً لشاب خريج جامعة ونفسه يتجوز قبل ان يصل الثلاثين؟؟؟؟؟؟؟؟؟؟؟؟؟

وعلى فكرة يا أخت نجفه كلامك ده انا قلته للشخص اللى ذكرته فى المداخلة وقلت انه دفع ال 30000 ووصل الكويت استمر بها 15 يوم عمل الإقامة وتركها

وعرفته حال البلد وقال لى لما هى وحشه كده انت ليه مستنى فيها ؟

قلتله لا تقيس ظروفك بظروفى وبعدين يا باشا انا بنقلك الواقع لان هذا حقك على كصديق ولكن الرزق بيد الله مش بيد أحد بس علشان لما تشوف الواقع لا تلومن إلا نفسك

المهم صمم انه لازم ييجى البلد اللى صديقه قاعد فيها وبيقوله وحشه علشان يتأكد أن صديقه مش بيكذب عليه وفعلاً جاء الكويت العزيزة لمدة 15 يوم ب 30000 ج قلتله يابنى انت كنت رحت أمريكا الـ 15 يوم دول بـ ال 30000 أحسن بدلاً من إنك جاى بس تعمل إقامة وتسافر انت كنت مفكر نفسك جاى تعمل الجرين كارد

المهم مفيش حد بيصدق إلا لما يشوف بعينه

والمشكلة ان والله العظيم نفس الشخص لما نزل مصر والناس سألوه عن الأحوال هنا قالهم الواقع اللى شافه ومع ذلك برده الكل بيسأل على فيزا وبيستلف علشان يدفع ثمنها :angry:

ورحم الله عبدالناصر يوم تقدمت الحكومة الألمانية بطلب للحكومة المصرية بإمدادها ببعض العمالة للعمل فى سوق العمل الألمانى ورفض عبدالناصر.

اليوم لو السفارات الأوربية فى مصر فتحت أبواب التأشيرات أمام المصريين ممكن ال 75 مليون مصرى يسافر منهم مش أقل من 70 مليون مع إعتبار ان ال 5 مليون من أبناء الطبقة العليا wst::

[ابن الصعيد]

عارفين كل دة ليه لان عندا الفهلوه كل واحد يقولك طلعني بس وانا اشتغل اي شئ

دنا اكسر الحديد ولما يجي الخليج ويشوف ان الوضع مختلف وان المنافسه قويه وان الهنود معاهم شهادات مهنيه وتدريب محترم ينصدم

لازم ننسي الفهلوه ونتقن عمل واحد ونتدرب عليه وناخد له شهادات

[Ghost]

لازم ننسي الفهلوه ونتقن عمل واحد ونتدرب عليه وناخد له شهادات

الله يكرمك و يرفع من شانك

هو ده الكلام , لما نقف نعد اخطانا يكون ده بداية الطريق

[badroora]

عارفين كل دة ليه لان عندا الفهلوه كل واحد يقولك طلعني بس وانا اشتغل اي شئ

دنا اكسر الحديد ولما يجي الخليج ويشوف ان الوضع مختلف وان المنافسه قويه وان الهنود معاهم شهادات مهنيه وتدريب محترم ينصدم

لازم ننسي الفهلوه ونتقن عمل واحد ونتدرب عليه وناخد له شهادات

فعلا انا اؤيدك بشدة فى النقطة دى

ميزة الهنود انهم مش بيتمنظروا ومتعلمين كويس ومعاهم لغة بس ساكتيتن

وتلاقي العامل بيتقن عملة على اكمل وجهه والمدير مدير بحق

بس فيهم ناس عاوزة الحرق طبعا بس ميزنهم افعالهم اكتر من اقوالهم

والخليجين بيفضلوهم عشان بيعملوا فى صمت ومطيعين

احنا كمان لو حسنا من نفسنا كشهادة ولغة ونعمل اكتر ما نتكلم هنبقي ممتازين

[العمرلحظة]

مع إحترامى الشديد لكل كلمة وردت فى حديثك فأنا عندى رد أحب أسجله

أنا أعتبر أن فيه ثلاثة مشتركين فى الموضوع ده وهم السبب الرئيسى وراءه

الأول هم نحن الذين نرغب فى السفر بحثا عن حياة أفضل لكن طبعا لا أقصد هؤلاء الذين لديهم ما يؤهلهم للسفر بل أقصد من يسعون وراء السفر بشكل جنونى وليس لديهم ما يؤهلهم لذلك وطبعا أقصد الذين لديهم تخصصات تجعل العمل يطلبهم ويحافظ عليهم

فأنا مثلا أعمل هنا فى دول الخليج بناءا على عرض وطلب بمعنى أننى مرتبط بعقد يحمينى منهم ويحميهم منى وطبعا ده ناتج عن إحتياجهم للتخصص ده

أما من يسعى فقط للسفر وعمل أى شئ (الفهلوه يعنى ) فهذا الشخص هو المسئول عن ما يجرى له بعد ذلك

حيث يترك الفرصة من البداي للنصابين أن ينهشوة بل ويأخذوا ما تبقى منه للقطط وغيرها

بداية من شركات السفريات التى لا ترحم وتأخذ ما تأخذ وبصدر رحب من الشخص ده ثم توهمه بعمل جيد وتأتى الصدمة بعدها

يجب علينا توخى الحذر التام وأخذ جميع الإعتبارات قبل التفكير فى السفر

الثانى هى شركات السفر للعمالة الخارجية فهم لا يرحمون ولا يستثنون أحد من الضحك عليه

الثالث وهو الجزء الأكبر يقع على عاتق الدولة التى يجب أن تحمى هذه العمالة من الداخل قبل الخارج وهى بالسيطرة على هذه الشركات ومراقبة العقود وخلافه

أما من الخارج فهى المحافظة على المصريين الذين يعملون بأى دولة أخرى

تعقيبا على ما أوردت حول رئيسة الفلبين أحب أن أضيف دولة أخرى طبعا بعد إذنك وهى أقوى من الفلبين

ماليزيا هى أكبر من الفلبين فى حفظ حقوق عمالتهم بالخارج حيث أن الحقوق عندهم بدايتها من الداخل بتحديد المرتبات التى يأخذونها

لقد وضعوا شروط كافية لمن أراد السفر وأيضا للشركات وحددوا المرتبات لكل عمالة على حده واللى عايز هى دى شروطهم ويا كده يا بلاش

[عطاء بلا حدود]

:sad: :sad: :sad: :sad: :sad: :sad: :sad: :sad:

الحمد لله حمداً كثيرا ... الحمد لله على نعمة الاسلام وكفى بنعمة الاسلام نعمة

اللهم ادخلنا الجنة

اللهم ادخلنا الجنة

اللهم ادخلنا الجنة

[darlengs]

لا طبعا 000000 مش كل اللي تعبانين هنا و بيدعو علي ابو جمال جايين فهلوه او بدون امكانيات 00 تقول اي فمهندس خبرته اكتر من 15 سنه و اشتغل مع شركات اجنبيه علي اعلي مستوي بمشاريع حيويه جدا في مصر 00ولما ضاقت بيه بلده واضطر يتعامل مع شركات القطاع العام 000و شاف اللي فيها من نهب و سرقه تفاصيلها تشيب00 فضل انه يسافر يمكن يكون الوضع احسن00

و جا هنا علي شركه المفروض انها محترمه و مديرها مصري للأسف 00براتب كبير بالنسبه للجنيه المصري و ضعيف جدا بالنسبه لمتطلبات المعيشه هنا لانه اتفاجئ باسعار الايجارات و لوازم المعيشه 00وبان الراتب لا يكفي سكن و استقدام اسرته 00الزوجه واولادفي سن مدارس 00 و لانه لا يطيق ان يكون في جانب و كل ما يملك ( و هي اسرته) في الجانب الاخر جازف و استقدمهم 0000 علي اساس تحسين وضعه الوظيفي بشركه تانيه 00او حتي زياده راتبه 00 لكن المدير المصري فعلا كان يمارس دور فرعون علي المصريين و بس و مع الغير كان يعطي كل ذي حق حقه 00 و اكتشف صاحبنا ان التحسين صعب جدا 00في ظل الاتجاه لتوطين العماله و منافسه الجنسيات التانيه 00و لاص مابين ايجار و مدارس و اكل و معيشه 00و كل اللي انتو عارفينه 00 المهم الوضع بدا يتحسن بعون الله00

الواحد فعلا لازم لما يقدم علي خطوه السفر يعمل دراسه جدوي 00 كأنه اي مشروع تجاري 00 يشوف هياخد كام و هيصرف كام 00 لان ممكن الامر ميكونش فرصه 00 حتي لو كان الشخص حاصل علي اعلي الشهادات و عنده خبره ممتازه 00لانهم هنا لا يعتدو الا بخبرتك داخل الكويت 00

يا شبابنا احسبوها تاني ( مش بالجنيه المصري لكن بعمله البلد اللي هتسافرولها والمصاريف اللي هتصرفوها )00 و اختارو ما بين نار الغربه فبلدك والبهدله وسط عيلتك و اهلك00 او نار الغربه البهدله و انت لوحدك؟؟؟

[Salwa]

مساء الخير ..

موضوع ذو شجون بالنسبة لكل الشباب اللى يرغب فى السفر ..

...ايه اللى رماك على المر ؟؟ ...طبعا اللى امر منه .

من كام يوم كنا نتناقش بطريقة عقلانية وبالورقة والقلم .....ازاى ممكن مدرس او اخصائى اجتماعى او مهندس او موظف او اى حاجة غير ..((((..رجل اعمال ....او صاحب اى حرفة ( صنعة فى ايده...كهربائى مثلا او نجار او نقاش ..او مكوجى ) ....))))

يعنى لو واحد بيقبض 400 جنيه ومش حانقول 300 كما يحدث او اقل ...( بخلاف شوية زيادة فى حالة مراقبة امتحانات آخر العام زى الثانوية العامة ده بالنسبة للمدرسين ...او فى حالة مأمورية خارج المدينة زى وضع المهندسين ..او منحة شهر فى حالة الموظف ) ..

طيب....

لو البنى آدم ده ...(( اتجوز وممكن نقول عايش فى بيت اهله بلاش نقول حتى انه بيدفع ايجار ....لانه لو بيدفع ايجار حديث يبقى لازم يدفع من 300 الى 600 يعنى مرتبه ومرتب زوجته ويصوموا طول الشهر !!))

لو قلنا بيشترى خبز ...باتنين جنيه فى اليوم ....(( هو اكتر طبعا ))..آدى ستين جنيه خبز فقط .....

بيدفع نور ومياه وتليفون نقول 200 جنيه ....( بلاش تليفون وخليها 100 ) ...

بيستخدم المواصلات بتلاتة جنيه على الاقل فى اليوم ( ميكروباص يعنى ) ...آدى تسعين جنيه ...

وطبعاااااااااا.............مفيش غموس !!!!!!!!!!! ولا حتى فول ولا فلافل ....بس ممكن يعمل جمعية ب100 جنيه فى الشهر علشان يقدر كل تلات شهور يشترى تلاتة كيلو لحمة وفرختين وكيلو سمك ....

ومطلوب منه .....(( ممنوع عنه المرض )) ...مفيش ميزانية للادوية ....ولا للاطباء ...

طبعاااااااااا.........مفيش فائض لاى لبس !!!؟؟؟.....الناس بتصلى وتطلب من ربنا ان الجو يفضل حلو علشان مفيش فلوس لشراء بلوفرات ...!!!

مفيش مصاريف لكتب ولا مدارس لطفل قادم ....اصبح الشاب بيعتبر الطفل القادم ترفيه مش من حقه او بيعتبره ظلم للطفل ان يوجد فى هذا الجو المشبع بالحاجة ...والظلم ...

ايه كمان ؟؟

امبارح كان فيه حديث فى الفضائية مع مسئول المياه ...فى منظقة ما فى القاهرة ( مش فاكرة ) ...الناس اتكلمت وقالوا ان مياه الشرب هى نفسها مياه المجارى ...رائحتها قاتلة ...واحد قال ان اخوه او اخته اتوفت بسبب تلوث المياه ....وقدموا شكاوى من سنتين ولا حياة لمن تنادى ..

وطلع المسئول يقول ده غير حقيقى ....اى شكوى بيتم البت فيها ....واحنا عندنا معامل تحلل كل شئ ..

يعنى حتى مش بيتكسف على دمه (( ده لو عنده دم...ده حتى معندهوش دم ابيض زى دم الصراصير ...ناس تخاف متختشيش بجد ...مفروض يقوموا عليهم ويدغدغوا لهم مرفق المياه ده بحاله على دماغهم هم وكراسيهم ))..

طيب الناس تعمل ايه ؟؟

وصل الانحدار والاستهتار بينا كشعب وكحكومة وككل شئ .................انهم علنى بيطلبوا كام الف من نساء مصر يشتغلوا عندهم ( خدامين ) ....الحق على مين ؟؟

على اللى اتجرأ وطلب ان الحريم....حريم مصر يخدموا حريمهم ..من كل النواحى ؟؟.. (( اللى المفروض يقرن فى بيوتهن ....زى ماهم بيعملوا مع نساءهم ؟؟ ))

والا على اللى وصلنا لعمق الهاوية ؟ ...(( اصل دى مش حافة الهاوية ....حافة الهاوية كانت من عشرين سنة )).

وعلشان خاطرى ...

بلاش تقولوا ايه اللى رماك على المر ؟؟ ..بس فكروا فى كل الشباب اللى انتحروا ....فكروا فى كام واحد رمى نفسه من على الكوبرى وهو لسا واخد الدكتوراه ....فكروا ..

وروحوا اكتبوا على قبور مفتوحة فى انتظار انتحار شباب آخر جديد ......( ارحموا من فى الارض يرحمكم من فى السماء ) ...

لابد حاييجى اليوم اللى كل شئ يتغير ....اكيد ..( امتى معرفش ؟)

لكن ربنا مش حايرحم العصابة اللى قضت بكل الصبر وعلى مدار السنين على الاغلبية من شعب مصر ...

وهم متأكدين ان محدش حايثور .....(( الجعان بس بيفكر حاياكل ازاى ؟؟ ..))

انت عليهم يارب ....

انت عليهم يارب ...

انت عليهم يارب ...

والله مانا عارفة كتبت ايه وكل اللى اعرفه ان دمى محروق من كل اللى بيحصل ....

[أسد]

هذا الوضع .. وتلك الصورة المرهقة للنفس نراها بشكل مستمر .. وسنظل نراها ..

الأسباب متعددة .. والوقائع مختلفة ..

الموضع برمته مؤلم ... فنحن في مصر (أي المصريين) لسنا على قائمة أولويات من يسيطرون على زمام الأمور هناك ..

فنحن لسنا مستفيدون منهم ولا هم مستفيدون منا .

وقد ترك هؤلاء (من يحكموننا) .. تركوا الناس يحلون مشاكلهم كل على طريقته .. وبأي طريقة .. وبأي أسلوب .. وبعشوائية ..

فلا يختلف كثير البناء العشوائي .. وإنشاء أحياء تسمى فيما بعد بالعشوائيات .. لا يختلف عن السفر العشوائي .. وبناء قاعدة عمالية في الخارج غير مؤهلة .. بل وعشوائية ... وغير ذات نفع .. لا على أنفسهم .. ولا على وطنهم .. وأسرهم وعائلاتهم .. ولا حتى على الجهة التي يعملون بها بشكل أو بآخر ...

هؤلاء الأشخاص قهرهم الفقر وضغط الحاجة للقبول بأي وضع ... وكما في موضوعات أخرى قرأنا عمن يريد أن يدفع مبلغ ليحصل على فيزا بمهنة سائق خاص .. فقط ليدخل السعودية .. ونقرأ كل يوم عمن يدفعون لبعض السماسرة والعصابات مبالغ طائلة ليلقوا بأنفسهم في البحر سفراً إلى أوروبا ..

ولكن البعض منهم أبطالاً ... يقاتلون .. ويتحملون كل الضغوط من أجل تحقيق هدف أو حلم .. ولو حتى بسيط ...

يجب علينا أ، نحاول بكل مانستطيع تقديم أي دعم لمثل هؤلاء .. وبأي صورة ..