جدة والا الرياض

[أبو زياد]

إخوتى و أحبائى

هاأنذا قد عدت إلى حضرتكم الجميلة وظل وجودكم الدافىء

ولم يمنعنى غلا انشغالى كما تعلمون

ومن اسفى انى اعود بموضوع شخصى لا يسعنى إلا أن اطلب منكم النصح و المشورة

فهكذا نحن أهل المنتدى - نذهب لنرتد و نعود

هو عرض عمل ليس ملزم بمدة

أى انه قابل للتجديد بدون وعد بذلك

هو قى جدة ..سامع يا موديست - يعنى حاطبق على قلبك.. :blush2:

ومغرى جدا - ولكن العيب فيه كما قلت لسعادتكم أنه لا يوجد وعد بالتجديد و الإستمرار

وعلى فكرة يوجد عروض اخرى دائمة وجيدة فى الرياض و لكنها أقل فى المميزات

الأمر الثانى رغم خلفيتى المتواضعة

إلا أنى أعتقد ان جدة أفضل من الرياض و أقرب لنا فى العيش كمصريين

هذين الأمرين تحت أيديكم الفاضلة

للبحث و المشورة

ولكم تحياتى

[se_ Elsyed]

عروستي ؟

الموضوع ما فيهوش أي معلومات يابو زياد

بس عامة ..

جده حلوه لقربها من مكه .. يعني فركة كعبه العُمرة والحج

وكمان عشان موديست هناك .. يعني تحب تتغدى تميل عليه ... تعوز تتعشى يبعت لك ديليفري .. وكده يعني

ووحشة في رطوبتها الغلسة اللي تحسسك إنك عايش فس حمام كله سراميك .. وفاتح الميه السخنة على الأخر .. وما فيش منفذ .. وإنت عمال تشُر عرق ومش شايف قدامك من الرطوبة ...

[hooba]

انا يا باشا طبعاً رأيي جده ...و لعده أسباب :

1- من مكه 70 كم و من المدينه حوالي 400 كم .....و دي ميزه لا تقدر بمال .

2- قربها من مصر و طبعا زي ما تفضلت أقرب في العيش من المصريين .

3- بلد ساحلي (بحر) و دي طبعا ميزه كويسه جدا للترفيه .

4- إمكانيه نزولك مصر بالعربية و بسهوله طبعا .

5-سهل جدا و كتيير جدا هاتلاقي اصحابك و الاقارب و ده طبعا في مواسم الحج و العمرة (( أنا بعتبر دي ميزة و ناس بتعتبرها عيب :blush2: )) .

و اتمني لك كل التوفيق .....و تحت امرك في أي تفاصيل هنا من جده .....

[semsema]

اكيد وبدون شك جده احلى من الرياض بمليون مره

وكمان وانت في جده ماتحسش بالغربه .. يعني كانك في مصر بالضبط..

والاحلى من كده ان أ/ موديست ساكن فيها.. (الكام يوم اللي راح فيهم الرياض كانت جده مضلمه بشكل غير طبيعي..)

طبعا القرار الاول والاخير يعود اليك..

[MZohairy]

شوف يا عم

في الآخر الحته اللي فيها مصلحتك هي اللي تروحها

جده رطوبه شنيعه و الرياض حر خانق بس بدون رطوبه

جده شوارعها صغيره و زحمه و فقيره و بيئه مقارنة بالرياض

لكن الرياض فخمه وواسعه و شوارعها و محلاتها بس بدون روح

مفيش شيشه في الرياض بينما جده كلها تشييش

الحياه مفتوحه نسبيا في جده عن الرياض

فكرة قربها من مكه دي ميزه كبيره و بلوى ماديه كبيره لأنك بتبقى المستقبل الرسمي و المضيف لكل مصري تعرفه جاي يعمل عمره :blush2:

في النهايه شوف مصلحتك :lol:

[مصري بالوراثة]

السلام عليكم ورحمة الله

كله بيقول جده جده ؟؟

رأيي أن ميزة جده الوحيدة هي قربها من مكة . وطبعاً دي ميزة لاتقدر ولاتقارن .

لكن الرياض وياعيني على الرياض .. جوها صحيح حر بس جاف ، مش رطوبة تخنق زي ماقال سي السيد ، وكمان فيها صيف وشتا مش زي جده فيها فصلين : صيف حار وصيف حار جداً !

ثم الشوارع منظمة في الرياض عن جده بكتير .

ومن ناحية المولات وأماكن الترفيه كثيرة جداً .

وصدقوني .. والله كتير لما بانزل أجازة باحس إن الرياض وحشاني .

تنورنا ياأبو زياد لو جيت الرياض

[Handasah]

انا لية مداخلة بسيطة ان كل اللى قال تعليق بص للموضوع من ناحية المدينة وجمالها ومكانها وحر ولا رطوبة وهكذا

لكن مفيش حد بص للموضوع من الناحية المادية ومدى الفرق بين المدينتين وكمان النظرة على المستوى البعيد يعنى الاستمرارية فى العمل ( وهذه النقطة مش مضمونة ) .

انا رأى الشخصى انك لازم تدرس الموضوع كويس من ناحية لو قبلت للذهاب لجدة ولم يتم التجديد هل يوجد امكانية للرجوع تانى او الانتقال الى مكان اخر وهذة النقطة من وجهة نظرى مهمة جدا ولن يحددها احد غيرك .

لكن كما قال لك الاخوة فأن جدة ( غير ) . :blush2: :lol:

[فولان بن علان]

مرحبابك يا أبو زياد والله وحشتني

اتكل على الله وروح الدمام :blush2:

بما إنك كنت عايش في الرياض ..التغيير كويس

لكن طبعا لو عندك إحساس بالقلق من الاستمرار يبقى عليك وعلى الرياض

القلق وحش يا أبو زياد اسألني أنا

وبعدين أنت معاك أسرتك

الاستقرار الاستقرار

[زعلان]

مفيش احسن من طنطا ........ شالله يا سيد يا بدوي

[Modest]

هو قى جدة ..سامع يا موديست - يعنى حاطبق على قلبك..

و الله تآنِس و تشرّف و تنور يا أبو زياد و أخوك موديست هنا تحت أمرك .. دي جدة هاتنّور :yes:

يكفي إنك قريب من مكة و أقرب إلى المدينة من جدة عنها من الرياض .. ده غير إنك على البحر مباشرةً و دي ميزة لا يمكن إغفالها.

أضف إلى ذلك 5 رحلات يومياً بالإضافة إلى الرحلات الإضافية من مصر للطيران إلى القاهرة غير رحلات الخطوط السعودية و رحلات أخرى إلى الاسكندرية و الأقصر و شرم الشيخ .. أينعم لو جدع تلاقي حجز :D .. لكن برضه أحسن من رحلتين في الأسبوع من الرياض إلى القاهرة :beee:

عايز تنزل بالعربية برضه مفيش مشكلة و عندك أكثر من طريقة.. يا إما تشحن العربية من الميناء و تسافر معاها على عبّارة من بتوع ممدوح اسماعيل و ربنا يستر .. أو تسوق 800 كيلو متر لغاية ضبا و تركب برضه عبارة من بتوع ممدوح اسماعيل و ربنا يستر.

لما نرد بقى على القلة المندسة اللي بتعيب في جدة و سنين جدة i*:

إيه يا جدعان .. رطوبة إيه و نار إيه و حر إيه؟؟ هو أبو زياد مقدّم على وظيفة في فرن؟

ماحنا عايشين و مبسوطين و كل الأماكن مكيفة.. فيها إيه لما تصحى الصبح و بدل ما تستنشق نسمة عليلة و انت خارج من باب بيتك ، حتى لو الساعة 5 الصبح، تلاقي هووب نار في وشك و مش قادر تفتح عينك .. مفيهاش حاجة خالص.

فيها إيه لما تخرج من مكان مكيف تلاقي نفسك فجأة مش شايف حاجة علشان الضباب الكثيف غطّى عدسات نضارتك و عايز حد يسحبك لغاية العربية .. مفيهاش حاجة خالص برضه

فيها إيه لما تتلطع في الزحمة في طريق المدينة مع إن مفيهوش إشارات!!.. برضه مفيهاش حاجة

لكن إذا اتكلمنا عن الرياض و من واقع زيارتي لها تلات أربع مرّات أقول إنها في الشتاء رائعة لكن في الصيف شعرت إن الشمس على بعد متر و نص من دماغي و حسيت إن وشّي هايتشقق من الجفاف الذي لا أنكر أنه ميزة عن الرطوبة العالية في جدة خلال أغسطس و سبتمبر لكن ربيع جدة ممتد بلا رطوبة من نوفمبر إلى أبريل تقريباً.

طيب أقول لكم على مفاجأة .. الجو كان برد في جدة 3 أيام السنة دي :D

كلمة في سرّك بقى يا ابو زياد: لو ليك في الأوكار الموجودة في الرياض و اللي شرّبني فيها سين سين حاجة أصفرة :blush2: ، قول لي من دلوقتي علشان ألحق أعمل مسح ميداني و أشوف وكرين تلاتة نزورهم سوا لما تيجي إن شاء الله :closedeyes:

يبقى ذِكر أن ما اجتمع عليه وجهاء القوم أن جدّة بها روح قريبة من مصر على عكس الرياض و لكن ما لاحظته أنا شخصياً مرّات عديدة هو أن من بدأ غربته في الرياض ثم انتقل إلى جدة يقول و لا يوم من أيامك يا رياض .. و العكس صحيح... من الواضح إننا ناس عِشَريين :wub:

الأهم أن الأمر أولاً و أخيراً يعتمد على العمل و مناسبته لك يا ابو زياد .. ربنا يوفقك لما فيه الخير و لا تنسى الاستخارة.

والاحلى من كده ان أ/ موديست ساكن فيها.. (الكام يوم اللي راح فيهم الرياض كانت جده مضلمه بشكل غير طبيعي..)

كتير قالوا لي كده يا سمسمه و علشان كده رجعت آخر مرة في نفس اليوم علشان أهل جدة مايناموش في الضلمة .. بس أنا مش باحب أقول الكلام ده من باب التواضع يعني و كده smk:

[se_ Elsyed]

مفيش شيشه في الرياض بينما جده كلها تشييش

:ده بقى أخسرك يا زهيري !!!! :closedeyes:

أومال الثمامة ... والفحص الدوري .. وأبو هيثم ... وحراج المعيرز .. ومخرج 9 .. وكل دول بيعملوا إيه ؟

قصدك إن ما فيشش تشييش داخل مدينة الرياض ... لكن في الإستراحات المنتشرة على أطراف الرياض دخان الشيشة يكاد يكون سحابة صيف بتظلل على سكانها :blush2:

وبعدين غحنا عايزين نربي زباين ونسحب رجلهم .. تقوم تقول للراجل الكلام ده ؟

[MZohairy]

مفيش شيشه في الرياض بينما جده كلها تشييش

:ده بقى أخسرك يا زهيري !!!! :closedeyes:

أومال الثمامة ... والفحص الدوري .. وأبو هيثم ... وحراج المعيرز .. ومخرج 9 .. وكل دول بيعملوا إيه ؟

قصدك إن ما فيشش تشييش داخل مدينة الرياض ... لكن في الإستراحات المنتشرة على أطراف الرياض دخان الشيشة يكاد يكون سحابة صيف بتظلل على سكانها :blush2:

اتقي الله يا سيسو

بقى عشان تضرب نفسين شيشه تروح لغاية الثمامه؟؟؟؟!!!!! و تقولي في الرياض؟؟

في جده كل 15 متر تلاقي مكان تشيش فيه

فينك يا أروما كافيه

فينك يا ناندوز

فينك يا كل المحلات اللي على البحر :beee:

[أبو زياد]

:ده بقى أخسرك يا زهيري !!!! :blush2:

أومال الثمامة ... والفحص الدوري .. وأبو هيثم ... وحراج المعيرز .. ومخرج 9 .. وكل دول بيعملوا إيه ؟

ماشى كل دول يا سيسو

:closedeyes: ماعدا مخرج 9 ..بجد والا غلطة مطبعية ؟ تقصد الفحص الدورى؟

[المكافح]

اسمحولى انضم معاكوا ياجماعة الخير انا شايف ان جدة افضل بكتيير كفاية عليك البيك اللى هايظبتلك معدتك كل يوم واسألونا احنا يا أهل الرياض عن كدة

[أبو زياد]

إخوتى الأحباء

شكرا لكم فردا فردا

وأنتم كما عهدتكم دائما- عند أحسن الظن بكم

شكرا لكم على المشورة و أرجو الدعاء

أخى الفاضل دكتور فولان - إنت وحشتنى أكتر- ويارب نلتقى يوما على خير بإذن الله

وعلى فكرة أنا سلمت عليك لما كنت غايب و رجعت .. أهلا بك و إلى لقاء قريب

شكرا جزيلا للإخوة مرة ثانية

وقد أفدتونى فعلا من جهة اختيار المدينة والمميزات و العيوب

بقى الإختيار الأكبر من الله سبحانه و تعالى

بأن يختار- لنا جميعا - ما تصلح به دنيانا و أخرانا

شكرا لكم جميعا

[mama nona]

محتاجة رأى الجميع

فعلا جدة ولا الرياض

انا محتارة جدا ومش عارفة اخد قرار

بالنسبة لجدة

كونها اقرب للحرم دى حاجة ثابتة طبعا منقدرش نتكلم فيها

الراتب ضعف الراتب هنا

وطبعا البدلات اعلى بكتير

والمميزات كلها vip

بالنسبة للرياض فيها تقريبا 99.9% من اهلى

اللى لما زوجى بيسافر بره البلد مش بشيل هم لوجودنا فالبيا لوحدنا

فالاعياد والمناسبات تلاقى ناس داخلة وناس خارجة بيسلمو عليك وبيزوروك ويودوك

فيها كل اصحابى

اتعودت عليها

مش عارفة هل هعرف اغير واروح مكان تانى

محتاجة من الاخوة المشورة والنصح

[se_ Elsyed]

بالنسبة لجدة

كونها اقرب للحرم دى حاجة ثابتة طبعا منقدرش نتكلم فيها

الراتب ضعف الراتب هنا

وطبعا البدلات اعلى بكتير

والمميزات كلها vip

لو فيها مميزات زي دي يبقى توكلي على الله ..

بس استني يا طنط ماما نونا ... هوالنقل ده اوبش يعني ؟ يعني ممكن ترفضوا او توافقوا ؟

انا رأيي إن المميزات المادية ممكت تقصر فترة الواحد هنا .... ويا ستي القرايب والمعارف يتعوضوا ويبقى لكم معارف واصدقاء هناك

[mama nona]

اهلا سى السيد

شكرا على الرد

وربنا يكرم ونعرف ناخد قرار

النقل ده عقد جديد

وبعدين حسيت انه الدنيا اتلخبطت خالص

العقد ده لزوجى وكنا خلاص قدمت لبنتى فالمدرسة

وكنت بتعاقد على شغل لى خلاص بشكل نهائى

بس العقد الجديد دهضرب كرسى فالكلوب

اصل صعب اوى انى اغير كل حاجة مرة واحد

هو اه العقد بكل المقاييس ضعف الراتب لزوجى وظى ما حضرتك تفضلت انه هيقصر المدة هنا فالغربة

بس انا لما بحسبها هنرجع نهائى

وبعدين هيخلص اجراءات العقد الجديد

وبعدين هيرجع لوحده

وفييين وفييين بقى لما يطلع اقامة جديدة وبعدين استقدام

هتكون الدراسة بدأت وخلاص عدى منها كام شهر

برده يعنى البنت مش داخلة الثانوية العامة ده يدوب kg2

بس حاسة ان الدنيا هتتلخبط

وبعدين هانزل مصر اقعد لى كام شهر هناك

واكيد هرجع استلم شغلى

واكيد الدنيا هتكون بهدلة من كله

انا قعدة اقنعه انه يفكر فالبهدلة قبل المميزات ال ف العقد

واحنا هنا الحمد لله مستقريين ومبسوطين

وكمان نهاية عقده المفروض فى شهر ديسمبر

فمش عارفين هيقدم يعنى استقالة

ولا لا ارغب فتجديد العقد

ولا الوضع هيكون ايه

معلهش دوشتك معايا

بس الامر صعب اوى

ومحتاجة المشاركة فالرأى

[se_ Elsyed]

لأ حاسبي يا طنط

انتي كده غيرتي كلامك

انا باحسب هاتتنقلوا من الرياض لجده

اتاريكم هتنزلوا نهائي وبعدين ترجعوا

فلازم تحسبوهها كويس

ارباح وخساير

خساير شقتكم اللي هاتسبوها بحالها ومالها ... والعربية .. وفلوس المدرسة اللي ممكن تروح عليكم

وفسخ العقد .. واحتمال الناس تغلس عليه وبالتالي تضيع مستحقاته .....

لأ لازم يفكر تاني

وخلي بالك

اوعي يكون الراتب كويس بس المهنة في التأشيرة نجار مسلح ولا بتاع وتحتاسوا في الاستقدام ..

عارفه لو العقد في الرياض

كنت قلت لك لو الامور كانت ماشيه كويسه واخدتوا نهائي بسهولة وكده .. فممكن زوجك ينقل العربية باسم اي حد من اصحابه وتسيبوا الشقة زي ما هي بأسمكم .. عادي يعني

[Alrefaey]

توكلو على الله واستخيرو وقراركم يبقى مبنى على اساس المدة الزمنية اللى متبقية لكم فى الغربه لو مفتوحة يبقا طيران على جده لكن لو محدودة سنتين مثلا يبقى الافضل الاستقرار مكانكم

عارفة ماما نونا انا بعانى تلك الايام من هذا الموضوع بس فى حالتى معكوسة انا شغلى هنا مستقر ومنصب ادارى محترم

والزوجه بتعمل فى مدينة الملك فهد وجاى لها عرض هناك فى IMC راتب اعلى لها ومميزات افضل وهتكون بجوار اهلها ومعارفنا

لكن عشان اقبل عرض زى ده لزوجتى يبقى لازم انقل شغلى الى جده ورحلة البحث عن وظيفة جديدة وده اكيد غاية فى الصعوبة

الموضوع صعب ومحتاج لدراسة واجتهاد وبالتوفيق