افيدونا عن تكاليف المعيشة بالسعودية

[M YEHIA]

ارجو النصيحة

انا اعمل في دبي بس المشكلة ان الاسعار في دبي غالية جدا ومش عارف اجيب مراتي وابني

عندي فرصة للعمل في السعودية

واحدة في الخبر والاخري في ينبع

الاتنين تقريبا زي بعض في الامتيازات

عايز اعرف السكن يكلف اد ايه تقريبا وباقي الاسعار عاملة ازاي

يعني الواحد ممكن يقبل براتب اد ايه يعيش بيه عيشة كريمة هو عائلته

انا مجال عملي الرسم الهندسي

وابني لسه مدخلش المدرسة

واسعار السيارات اد ايه

نرجو التواصل

جزاكم الله خير

[MZohairy]

في الخبر السكن المعقول يتراوح للأسره من 20000 الى 50000 للشقق

و من 40000 الى ما شاء الله للكمبوندات

طبعا الخبر كمدينه ارقى و افضل من ينبع كثيرا

العربيات المستعمله معرفش اسعاها بس ممكن من 15000 ريال تجيب حاجه تمشي الحال على ما اعتقد

حكاية العيشه الكريمه دي بقى تختلف كثييييييرا من واحد للتاني

ربنا يكتبلك اللي فيه الخير

[se_ Elsyed]

قديماً قال الشاعر

لو عايز تعيش عيشه حلوه .. يبقى عليك وعلى دُبي

ولو عايز تحوش يبقى عليك وعالسعودية

مدينة الخُبر أحسن بكتير من ينبع المحدودة جداً

الشقق فعلاً زي ما قالك زهيري

والعربيات ممكن بـ 15000 تجيب لك عربية كويسة او تخرج لك سيارة جديدة بالتقسيط المريح

الحياة في السعودية بشكل عام من حيث المصاريف معقولة جداً ولا تقارن بصراحة بدبي أو الإمارات بشكل عام .. وأنا في إعتقادي إن في ناس كتير في الإمارات اللي بتاخده باليمين بتصرفة بالشمال وعايشه هناك لله وللوطن ..

لكن أهم حاجه في إتفاقك هنا لا تقبل براتب منخفض .. ولا تقبل بأقل من 3 شهور من الراتب الأساسي سنوياً كبدل سكن ... وتذاكرك وتذاكر المدام والأولاد عليهم .. والعلاج الطبي عليهم في شركة تأمين طبي محترمه لإن مصاريف العلاج هنا نـــــــــــــــــــــــــــار .. ويا سلام لو إنت فيروود تخليهم يشيلوا مصاريف المدارس لما أولادك يلتحقوا بها .... يبقى كده هاتعمل الأرنب بدري بدري يا معلم

[M YEHIA]

يعني ممكن 8 الاف درهم يكون راتب كويس

يعني ايه للكمبوندات

[se_ Elsyed]

يعني ممكن 8 الاف درهم يكون راتب كويس

يعني ايه للكمبوندات

قصدك 8 الاف ريال

لو ده راتب أساسي يبقى كويس .. يعني لسه في بدل سكن وبدل مواصلات تقريباً بيبقى في حدود 500 ريال شهرياً

أما لو كان راتب إجمالي ... مش هايبقى كويس قوي خصوصاً لما اولادك يدخلوا المدارس .

الكمبوند هو مجموعة فلل أو شقق سكنية بتبقى لها خصوصية ومحاطه بسياج أو أسوار وفيها امن وخدمات وممكن حمامات سباحة وملاعب للاطفال ... يعني حاجه كده زي الرحاب في مصر او حي الأشجار وبالتأكيد بتبقى أغلى من الشقق أو الفلل السكنية العادية ...

وغالباً بيفضلها من هم كثيرو الأسفار وبيضطروا يسيبوا أولادهم أثناء رحلات العمل المتكررة لإنها بتبقى أمان .. يعني ممكن تسيب أولادك كام يوم لو مسافر وإنت مطمئن عليهم .

[مومو الامور]

صديقى الغالى

انصحك انك متسيبش دبى

واسمع كلام اخويا وحبيبى سى السيد

لانه لو جيت السعوديه هتندم والندم هيدوقك فى البعد نارى

الندم هوا اللى هيخلصلى تارى

ابعد يا صديقى وخليك فى دبى والجميرة بيتش والوايلد وادى

وخد عيالك وفسحهم هناك

يدعولك

بدل ماتجيبهم وتخنقهم ويدعوا عليك

اسمع كلامى الكفيل فى السعوديه خطر

ومالهمش كبير ترجعله ولو حطيت صباعك( جوازك ) تحت ضرسه (بخزنته)

لا هتجيب عيالك ولا هتروح تشوفهم

احترس وخليك مكانك

اخوك مومو الامور

[wahed masry]

أنا زيك بس كنت عايش في أبوظبي 10 سنين وانتقلت للسعوديه في الخبر ومرتبي 9600 ريال بدون السكن ممكن آخد بدل سكن في حدود 24000 ريال سنويا فكرت أجيب الولاد بس غيرت رأيي ... التعامل هنا صعب أوي وممكن أتخنق في أي لحظه وأرجع بلدي ... العيشه هنا ممله .... ممله أوي ... أما من ناحيه التوفير فهو صحيح بتوفر كتير ... حتصرف فين وفي إيه بس إكتئاب وملل شديد ... ياراجل الواحد مش عارف لو جت العيال حيخرجهم فين .. البنده والا المخازن الكبري والا كارفور والا الكورنيش في الصيف ... مش عارف ممكن رأيي مايعجبش ناس بس الخلاف في الرأي لايفسد للود قضيه .

[muslim4ever]

الاخ الكريم يحي

بداية القول احب ان اقول لك لا تسمع كلام الاخ الامور فهو كلام غير صحيح فانا مصرى اقيم فى السعودية من اربع سنوات والحق يقال ان معظم ما يقال عن العذابات التى يلاقيها المغترب هنا يكاد يكون وهم وانا انصحك اذا كنت فعلاً تخاف على دينك واسرتك واولادك ففر من دبى وهنا فى السعودية الاسعار معقولة والسكن كما قال الاخوه حتى يكون ملائم لحياة كريمة لن يقل عن 20000 ونصيحة منى حاول يكون مرتبك الاساسى لا يقل عن 5000 دولار (الدولار 3.75 ريال) بخلاف 3 شهور سكن من الاساسى وسيارة او بدل انتقال من 10 الى 20% من الاساسى وطبعاً هنا التامين اجبارى على كل الناس وصدقنى حتلاقى فرق كبير بين السعودية والامارات فرق فى الاخلاق والتدين ولكن لمن يبحث عن الابتذال والتسيب فلن تنفعة السعودية واسال الله تبارك وتعالى ان يوفقك وييسر لك افضل الامور وياريت تستخير وتتوكل على الله

[أسد]

باختصار شديد ...

يمكنك الحياة في السعودية بنفس المستوى الذي تعيش به في دبي .. بنصف المبلغ الذي تحتاجه في دبي ..

أما عن الحياة في السعودية ..

فالحياة في السعودية بالنسبة لشخص محافظ وطبيعي هي عادية جداً ..

وكما تعلم .. فيوجد في السعودية أكثر من مليون مصري يعملون وسعداء بعملهم هنا .. وحريصون على البقاء ..

وإذا كانت تجربة مومو الأمور السلبية في السعودية قد شوهت الصورة لديه .. فهذه نقطة أخرى ..

وإذا كان من يفضل الإقامة في السعودية هو مجنون ..

فكما تعلم .. فهناك أكثر من مليون مجنون مقيمون في السعودية .. وراضون بجنانهم ... أقصد بإقامتهم في السعودية ..

[مومو الامور]

السلام عليكم

الاخ مسلم

التجارب خير برهان

واذا كنت بقالك 4 سنين

انا بقالى 11 سنه

يعنى تقريبا 3 مرات ما شفت انتا و3 مرات ما عاشرت انتا و3 مرات ما جربت انتا

ومهنتى مهندس كومنكيشن

انا تقريبا كل شهرين بروح الامارات وشفت هناك انك لو عاوز تبقا شيخ تقدر ومحدش هيعارضك

ولو عاوز اللى انتا شرحته مسبقا هتلاقيه

وايضا فى السعوديه ( اعتقد مفهوم قصدى )

الاخ اسد

اما بخصوص انى من المليون مجنون فممكن تعتبرنى رقم 25044 من المجانين المتواجدون والراضون بجنانهم

وهذا اقرار منى بذلك

اما بخصوص التجربه السيئه والخاصه بى فانا ارى مليون تجربه سيئه الا واحد وهو الاخ مسلم اعتقد مالوش تجارب

لذا ومن مكتبى هذا اشكر الاخ اسد على توضيح الحاله النفسيه للمتواجدين فى السعوديه

الاخ مسلم

وارجو ملاحظه الحاله النفسيه التى عليها المليون الا واحد

ولكم وافر التقدير والاحترام

[amrhoras]

اده انتو مليون الا واحد ونستوني طيب

عامة انا بالنسبة ليا واللى شيفه عندى هنا ان الواحد يفكر الف مليون مره قبل ما يستقدم زوجته وعياله الا كزيارة احسن وافضل لانك مامن مره تيجي الا ويتم السطو على جوازك من جهة كفيلك طبعا او معذبك هههه وتبقى قاعد مرعوب تسايس فيه عشان مره واحد ممكن يقولك بالسلامة ياحبيبي بالسلامة وتحتاس باولادك خصوصا تعليم الاولاد هنا غالى اوى اوى اوى

بالنسبة للعيشة حتعيش والحياه عادية هو مفيش الا الاسواق والكورنيش

بالنسبة للراتب اوعى تتنازل عن هلله واحده من حقك لو اتنازلت حتكون اعوذ بالله صورة مني احنا مش مسافرين عشان نشتغل لله على اد تمن غربتك خد ومتهيألى كلامى واضح لو حد عاوز يسافر سيبوكم من مكاتبنا الحرامية دول

ونسالكم الدعاء عشان انا بنهى عملى الايام دى ياما الاقى فيزا ياما رجع وعايا الخفين بتوع حنين ودمتم ارجو لكم التوفيق

بس زودو المليون شويه عشان انا مش عارف هل انا مليون وواحد ولا واتنين عموما معتدتش فارقة سنه من وسونيا

[muslim4ever]

السلام عليكم ورحمة الله وبركاتة

الاخ المحترم الامور

من الواضح فى اسلوب كلامك انك من فئة المتشنجين .. الموضوع بسيط جداً ولا يحتمل كل هذا ومن الواضح انك من اصحاب نظرية التعميم فتجعل تجربتك او تجربة فئام من الاشخاص تنطبق على مليون شخص كما اوضحت ولو انى على ثقة تامة انك لم تشاهد مليون تجربة كما تدعى ولكنها حبكة درامية لا لزوم لها وخاصة اننا ننصح الاخ السائل فيجب ان يكون الكلام صريح وواضح وصادق ولا ينقل تجارب شخص او شخصين تعرضوا لمضايقات لنجعلها ظاهرة عامة .. نعماحمد الله ان تجربتى هنا جيدة جداً ونتعامل مع كل الاشخاص ويتعاملون معنا بكل ود واحترام لانى مقتنع ان الطيور على اشكالها تقع وكما تعامل الناس سوف يعاملونك وايضاً يتوقف على اسلوبك فى العمل ومدى كفائتك ومكانتك واخلاقك داخل العمل !!!!

تحياتى لك

[مومو الامور]

السلام عليكم ورحمة الله وبركاتة

الاخ المحترم الامور

من الواضح فى اسلوب كلامك انك من فئة المتشنجين .. الموضوع بسيط جداً ولا يحتمل كل هذا ومن الواضح انك من اصحاب نظرية التعميم فتجعل تجربتك او تجربة فئام من الاشخاص تنطبق على مليون شخص كما اوضحت ولو انى على ثقة تامة انك لم تشاهد مليون تجربة كما تدعى ولكنها حبكة درامية لا لزوم لها وخاصة اننا ننصح الاخ السائل فيجب ان يكون الكلام صريح وواضح وصادق ولا ينقل تجارب شخص او شخصين تعرضوا لمضايقات لنجعلها ظاهرة عامة .. نعماحمد الله ان تجربتى هنا جيدة جداً ونتعامل مع كل الاشخاص ويتعاملون معنا بكل ود واحترام لانى مقتنع ان الطيور على اشكالها تقع وكما تعامل الناس سوف يعاملونك وايضاً يتوقف على اسلوبك فى العمل ومدى كفائتك ومكانتك واخلاقك داخل العمل !!!!

تحياتى لك

الاخ اللى مش متشنج

اولا انا عاوز اهديك شويه لانه فعلا الموضوع بسيط ونظريه التعميم اللى هتتكلم عنها والحبكه الدراميه اللى بتحلم بيها وظاهرة التشنج اللى شفتها فيا وكل ما سبق ذكرة ان دل على شيئ يدل على انك مبتدئ فى المحاورات ومعندكش حنكه الرد يعنى ظروفك صعبه شويه لذا اقولك موضوع الطيور على اشكالها تقع تدل على انه انتا من النوع اللى بيطاطى ( وسبق وتناقشنا فى اسلوب الاخوة المصريين فى الغربه علشان الريال يعملوا اى حاجه والا مقولتش الطيور على اشكالها تقع وكفائتك واسلوبك فى العمل ومكانتك واخلاقك داخل العمل على حد قولك :lol:

لذا ارجو لما ترد على حد ترد من غير متتشنج احسن تصرف ريالاتك على الاطباء

وربنا الهادى

[حسام يوسف]

الاخوة الاعزا

كم يكلف ايجار شقة

صغيرة فى الهفوف بالاحسا؟

[muslim4ever]

السلام عليكم ورحمة الله وبركاتة

الاخ المحترم الامور !!!

تحدثت معك على اساس انك كما تدعى مهندس !!! ولكن خاب ظنى فسوف اتكلم معك باللغة التى تفهمها

اولاً انا لم اشتكى انى اعانى ظروفاً صعبة بل انى احمد الله على ما انا فيه سواء فى مصر او السعودية ولكن من يشتكى ويولول هو انت وتحاول ان تنقل تجربتك الى الاخرين ومن اسلوب كتابتك يتضح انك تحتاج الى الفطنة والفهم لانك للمرة الثانية عممت تجربتك واسلوبك فى التعامل مع الاخرين على انا ايضاً !!! من قال لك انى اطاطى كما تدعى هل انت تعرفنى هل تعرف اين اعمل !!! ولكنك اسقط تجربتك على الاخرين واتهمتهم بما فيك وبما تفعلة وتقوم به فى عملك .. يؤسفنى ان اقول لك انك من الامثلة السيئة التى نراها هنا وبالتالى تقابل بنفس السوء سواء من ارباب العمل او الاشخاص العادين وللعلم يا امور انا لا اعمل فى اى جهة سعودية ولا اتعامل معهم الا فى الحياة العادية وعملى فى جهة تتبع جامعة الدول العربية قلى بالله لمن اطاطى كما تدعى !!!! قد تعانى من مشاكل فى عملك ونصيحة منى راجع نفسك وراجع اسلوبك فى تعاملك مع الاخرين وراجع سلوكياتك وسعتها الامر اكيد حيكون احسن .. ولو فعلا كفيلك مسود عليك عشتك ومخليك يالشكل ده كلمنى وانا اساعدك.

تحياتى يا امور

[مومو الامور]

الله يسهل عليك

اكتر من كدة وربك الشافى المعافى

سلامى لجامعتك ولاسلوبك الراقى

الامثله السيئه ظهرت والان استطيع ان استنتجها عبر المحاورات

اخيرا وليس بأخر

الله يشفيك :lol:

[amrhoras]

ربنا يهديكم يارب هى دى اخر المناقشات بتعتكم يامصريين نتمسك فى كلمه او كلمتين ونترك لب الموضوع الراجل بيسأل سؤال وكل واحد يقول رأية اللى هو من خلال التجربة برده يا أخ مسلم فور ايفر والاخ مومو الامور كل واحد بينظر للموضوع من خلال وجهة نظره

مفيش مجال انا بشتغل او بعمل لاننا ف الهوا سوا كلنا مغتربين ومهما كنا مرتاحين تعبانين لاننا بندفع تمن بعدنا عن اهالينا طبعا كفاية انك عايش لوحدك متعرفش اهلك عايشين ازاى

بالنسبة للارزاق كلها تبعا للخالق وحده سواء قليل او كتير ربنا بيبارك مادام الرزق ده حلال

بالنسبة للتعميم مش كله مرتاح ومش كله تعبان

ناس كتييييير بتجتهد بس اتذكر مثل قديم عاجبني اوى اللى يربي ولد غيره زى اللى بانى في حلال غيره

كل اللى اتمناه التكاتف والكف عن امساك كل كلمة وتحليلها والبعد عن لب الموضوع لانى تعبت من المهاترات اللى ملهاش لزمة و محاولة فرض القوة او استعراض بالالفاظ متهيألى كلنا لغتنا العامية وكلنا متعلمين تعليم عالى ولو عوزين نتكلم مفيش مانع بس هنا المكان الوحيد اللى بتحس فيه انك مع اهل بلدك لسه لك صله بوطنك فكفاية استعراض الفاظ لانى شايفها نقص سوري يعنى كلنا عاقلين فعيب نقول لبعض الطيور ع اشكالها تقع بدال ما نساعد بعض اقل الايمان بالنصيحة والدعاء

انما موضوع الطيور على اشكالها تقع دى كلمه كبييرة جدا لان كل واحد له ظروفة ياما فى ناس ممتازة ف كل اخلاقها او معظم اخلاقها وبتشتغل شغل جنون بس برده تعبانة لسبب ما مش حكاية ان ربنا بيخلص ابدان من ابدان والظالم ربنا بيديله ظالم اكتر منه يظلمه ويطلع عنيه عيب يامتعلمين وياعاقلين ويامثقفين بطلو قنعرة فارغة بطلو

لاتعليق

[jojammal]

اخوى M YEHIA

معلوم ان العيشة فى دبي تروق لبعض الناس بسبب التطور والانفتاح ووجود الاماكن المختلفة

وتوفر كل شىء تريدة وفى اى مجال لكن اصبحت البلد قبلة الناس من كل

مكان وأصبح الغلاء والازدحام طابعا لها وكان الحل قديما السكن بالشارقة

والعمل فى دبي الا ان الغلاء طال الامارات القريبة من دبي أيضا

بالنسبة للسعودية كما ذكر بعض الاخوة هادئة وتقدر تعيش بنصف اللى تصرفة فى دبي

واذا رغبت بالقدوم للمملكة عليك بهذة المدن الخبر - الدمام - الاحساء - جدة - المدينة .....

اخوى hossamup

تكلفة الشقق على حسب الحى والمساحة فية من 6 الاف ( ما انصحك فيها بتكون فى حارة تعبانة) الى 16 ألف ريال سعودي

واتمنى لك التوفيق

[حسام يوسف]

اخوى M YEHIA

معلوم ان العيشة فى دبي تروق لبعض الناس بسبب التطور والانفتاح ووجود الاماكن المختلفة

وتوفر كل شىء تريدة وفى اى مجال لكن اصبحت البلد قبلة الناس من كل

مكان وأصبح الغلاء والازدحام طابعا لها وكان الحل قديما السكن بالشارقة

والعمل فى دبي الا ان الغلاء طال الامارات القريبة من دبي أيضا

بالنسبة للسعودية كما ذكر بعض الاخوة هادئة وتقدر تعيش بنصف اللى تصرفة فى دبي

واذا رغبت بالقدوم للمملكة عليك بهذة المدن الخبر - الدمام - الاحساء - جدة - المدينة .....

اخوى hossamup

تكلفة الشقق على حسب الحى والمساحة فية من 6 الاف ( ما انصحك فيها بتكون فى حارة تعبانة) الى 16 ألف ريال سعودي

واتمنى لك التوفيق

السلام عليكم يا أخ

أشكر حسن ردك وأعتذر عن التأخر فيه

وجدت فرصة عمل فى جدةومرة ثانية أشكرك.وأتمنى رد جميلكJOJAMMAL

[Dr orl]

السلام عليكم

ياريت لو حد ممكن يفيدنى

كم تبلغ مصاريف تأسيس السكن

مثل أسعار الأجهزة الأساسية ,, ثلاجة ,,, غسالة,,,,,

و الأثاث تقريباً