المعلم أبو اشرف الجزار .. بجد مش هزار

[se_ Elsyed]

جزارررررررررررررر نضييييييييييييف

العيد الكبير قرب وكل سنة وانتو طيبين وكل واحد بالتأكيد عمال يدور من دلوقت على حتة لحمه نضيفه ياكلها ويا سلام على طبق الفتة بالخل والتوم .. آآآآآه ياني يابا ..... مع طبق شوربه سخن بالليمون يعطيك جرعة طاقة لا تقل عن 230 ميجا وات ... ولا تقولي فودكا ولا مية طرشي ..

اخوكو سين سين كانت علاقته باللحمه لفترة طويلة وتحديداً حتى تخرجي من الجامعة وقبل نزولي الى مضمار – حلوه مضمار دي وخصوصاً انها على وزن ممبار – الحياة العملية كانت علاقتي بها إعلاقية فلزية لا تتعدى حدود طبق الشوربه ونصيبي من اللحمة اللي بيكون عادة جوا رغيف على اساس ما فيش حد يغير من اخواته ولو واحد زغر كده لقى اخوه واخد 5 جرام اكتر منه بتبقى مشكلة وممكن تقلب بغم وقطيعة بين الأخوة كرمازوف ...

وبالتالي ماكنتش باشغل بالي بالموضوع ده خصوصاً واني كنت – ومازلت – بأسمع كلام ماما اللي كانت دايماً تقولي " يا س س يابني لو عايز تعيش في الدنيا دي بسلاسة ... لا لك دعوة باللحمه ولا السياسة "

ففعلاً كنت بأمشي جنب الحيط وزيادة في الامان كنت ساعات بأمشي عالحيط .. وماليش دعوة بقى دي لحمة ضاني ولا بتلو لأ دي لحمة راس ولا لخمة راس ..

لكنني دفعت الثمن غالياً واول مره اتعامل مع جزار – لسه فاكرها ... لسه فاكره ياختشي وزي ما يكون امبارح .. ما كانش يومك يا ام اسماعين لما ضحكوا عليكي الجزارين –

كان بعد وصولي بشهرين ودخل علينا العيد الكبير وكنت في مدينة الدمام وكنت انا ومعايا 3 زملاء مصريين وبيننا زميل عزيز مسيحي إسمه مدحت ابى الا ان يشاركنا فرحة العيد واخد نوبة من نوبة الحراسة جنب حلة اللحمة علشان يعطينا نفير ونوبة صحيان لو اللحمة أستوت

المهم عملنا اجتماع قمة وقلنا هانعمل ايه ياولاد فقلت لهم بما ا ن ده العيد الكبير فأنا باسمع ان لازم ناكل لحمه ضاني يعني لحمة خرفان ... وافقنا بأجماع وقلنا ننفذ ... ونزلنا السوق وتوجهنا الى احد الجزارين وقلنا له مامي بتسلم عليك وبتقولك : استنضف لنا كام كيلو لحمه ضاني يا عمو الجزار وكل سنة وانت طيب .. ولإنه كان راجل مخضرم وخبرة فأكتشف من الوهلة الأولى اننا محدثين لحمه وإننا فرافير ولا نعرف الفرق بين فخدة اللحمة البتلو وبين زر البطاطا بتاع فيلم فاتن حمامه اللي راحت في داهيه بسبب بطاطية ، فبالتالي لو كان اعطانا لحمه كتاكيت ما كناش هانناقشه وهانصدق ان دي لحمه ضاني ..

وقد كان يا سادة ... فاللي اعرفه ان اللحمه ممكن تاخد لها نص ساعة او قول ساعة عشان تستوي .. واللي عرفته بعد كده ان اللحمه الضاني بتستوي اسرع من باقي اللحوم ...

لكن ربنا لا يوريكو يا ولاد ولا يعصلج لكو لحمه يارب ولا يفضي لكو حله ولا يعجن لكو رُز .. عمركو شوفتوا لحمه تقعد تستوي من بعد العشا لحد الفجر ؟ وكل ما نكشف الحلة وندب الشوكة في حتة لحمه نلاقيها عاملة زي الكاوتش ... فلما اكتشفنا كده في اللحظات الاولى قلنا نقسم نفسنا نوبات حراسة وكان معانا زميلنا مدحت اللي أخد نوبة هو كمان ... ونتيجة لذلك راحت علينا صلاة العيد – الله لا يوفقك يادا الجزار –

اشرقت علينا شمس يوم العيد وقومنا زي اللي مضروبين على دماغهم ونحن حزانى مكتئبين وعاملين زي الأيتام الثكالى والعجائز أمام مدافئهم والفلاحين في الحقول .... وجلسنا في المطبخ نبكي على اللبن المدلوق واللحم الغير مهضوم

طب نعمل ايه ونروح فين ونيجي منين ويا ترى نرمى الحلة باللي فيها ؟

فأنبريت وشهرت سيفي وقلت لهم على جثتي طبعاً .. ده لو وصلت ان كل واحد يعلق حتة لحمة في ميدالية المفاتيح عشان تجيب لنا الحظ .. اشرف لنا اننا نرمي شقى عمرنا وقال على رأي المثل " وجعك يابطني ولا رمي الطبيخ " .. ولكن بين شد وجذب توصلنا لاقتراح وسط وهو اننا نستفيد من البهاريز بتاعت اللحمة ونعمل طبق فتة محترمة واهو تبقى حاجه من ريحة المرحومة

وقد كان .. وبصراحة كان احلى طبق فتة اكلته في حياتي لإن اكل العزوبية بيبقى له شكل تاني خصوصاً ان الكل بيشارك في اعداد الطعام .. ده بجانب افتكاسات العُزاب .. فبيطلع في الاخر يخن عجب وبرضوا بيتاكل ... ما فيش حاجه بتترمي ... هييييه كانت أيام - الله لا يعودها -

قعدت شويه . قول شويتين عُزابي وخلاص بقى قلت لازم انتزع الخبرة اللحمية بنفسي بدل ما جزارينك يا سعودية يشتغلووني وشويه شويه ممكن ألاقي نفسي باكل لحم كلاب وأنا مش داري ولو إن الفلبينيين مش مخليين هنا خيال كلب يمشي في لاشارع وبيطلعوا يجروا وراهم في الشوارع عشان يقتنصوهم ويعملوا عليهم وليمه ( هوت دوج ) ، لكن برضوا في العزوبية ما كانتش بتفرق معانا نوع اللحمة .... واي حاجه بتتاكل وان لم تأكُل فسوف تؤكل ... ده قانون الغاب العزوبي .... بجد مش هزار

خصوصاً إني جيت من مصر مُحمل بعادات غذائية او لنقل دلع مِرق مالوش حل

يعني لا كنت بأكل ( القرنبيط مطلقاً وبتاتاً .... البسلة بجزر او من غير ... السمك المقلي – دلوقت السواحلية يزعلوا مني – الكوسة المطبوخه ... الرز بأنواعه طالما مش سخن ومطبوخ في نفس اليوم وقائمة اخرى طويلة كانت ماما عارفها ربنا يديها الصحة ويا خيبت اللي يلقى دلع ولا يدلعش )

لكن لما نبقى 5 او 6 عُزابية مستحيل افرض اراداتي عليهم وأقولهم ما أشربش الشاي .. أشرب أزوزه أنا ... واذا ما مدتش ايدي للأكل قبلهم يبقى عليك البحث عن اجهزة تعويضية لان ايدك هاتتاكل لو عملت فيها عبدو المؤدب..

---------------

نلتقي بعد الفاصل

[مصري أصيل]

انت فكرتني بأول أكله أكلتها في الغربة وكنت نازل علي واحد قريبي . فقالي هاعملك حتة اكله ني في ني هتاكل صوابعك وراها . قلتله لما نشوف . المهم جاب الحله اللي هيطبخ فيها وحط فيها الفراخ نيه لا تشويح في سمن ولا يحزنون وجاب البصل وحطه ني وبعدين البطاطس وبعدين الطماطم وبعدين جاب كيس خضار مشكل وحطه وكان ناقص يقلع الشبشب اللي في رجله ويحطه في الحله . والله ما خلي حاجه ما حطها. فقلت له انا هاسألك سؤال قالي قول قلتله الأكله دي اسمها ني في ني ولا عك في عك . تعرف شكل ايه شكل اليخن العجب بتاع مسلسل أحلام الفتي الطائر بتاع عادل أمام بالظبط . بس ياعم وأكلنا وعينك ما تشوف الا النور .

موقف تاني من مواقف الغربة . كنت واخد من أختي واصفة عمايل المكرونة البشامل في ورقه وأنا أعز الماكرونه الباشمل جداً المهم في يوم أتجرأت وقلت للشباب هاعملكم صنية مكرونة باشمل النهارده . قالولي أنت أجننت أكيد قلتلهم طيب هاتشوفوا ودخلت المطبخ زي الأسد بعد ما جبت الأغراض وبدأت أطبق المكتوب في الورقه بحزافيره وكان معانا واحد جاي جديد بس كان أستاذ في المطبخ . بس طبعاً سابني أعمل اللي أنا عايزه عشان يضحك عليا في الأخر . المهم الصينيه طلعت من الفرن وأكلنا وكانت بلا فخر جميله جداً وعجبت الشخص اللي كان عايز يضحك عليا . المهم بعدها بأسبوع هوه نفسه الشخص اللي طلب مني أعمله صينيه تانيه ودخلت المطبخ وأنا كلي فخر أن أستاذ المطبخ يطلب مني أعمله حاجه . بس ما أخبيش عليكم كان مزاجي وحش وما كنتش عارف بأعمل أيه . المهم قعدنا نأكل وأول ما ضرب الشوكه في الطبق وقام باصصلي حته بصه وقالي ( هيه الورقه ضاعت ولا أيه )

بس الحمد لله الأيام دي راحت عليها وبناكل الشهد من أيد أم كريم والحمد لله . تحياتي للجميع

[seeem]

خصوصاً إني جيت من مصر مُحمل بعادات غذائية او لنقل دلع مِرق مالوش حل

يعني لا كنت بأكل

... السمك المقلي – دلوقت السواحلية يزعلوا مني –

امال سيادتك بتحب تاكل السمك ازاي

يعنى علشان نعرف....ونفرش الارض زيت wst::

[zizetta]

تعليمات بخصوص تسوية اللحمة

علي فكرة يا جماعة معظم الستات برضة كانت بتقع في الورطات دي أول الزواج خصوصاً لو كانت مبتعملش حاجة في بيت أهلها .. أنا شخصياً زوجي (إستوى) مني أول الزواج .. وكان فرحان بي وقال بيعزم الناس .. وما انساش ابداً اني عملت شملولة مرة وجبت عرق اللحم اللي المفروض بيتعمل روزبيف .. لحمة باردة يعني وقطعته وشويته .. طبعا نوع اللحمة في العرق ده بيكون ناشف يعني اللحمة نشفت وقددت علي الشواية وبرضة ما همنيش وقدمته للناس .. (حاجة تكسف كل ما بفتكر الموضوع ده ) .. وكنت عاملة نفسي شاطرة في المحشي وانا أصلاً لا بعرف احشي ولا أسوي ... ودايماً الرز كان يطلع ني .. وكنت بشك ان المشكلة في نوع الرز ...

ما أنساش برضة أني ياما دبيت له هدومه الغالية في الغسالة (مكانش عندي اتوماتيك وقتها ) وقال ايه بوفر ثمن الدراي كلين ..

ومحتفطة لحد دلوقتي بجيليه كشمير كان جايبة من فرنسا .. ورحت دباه في مية سخنة في الغسالة وطبعا ما بنساش المسحوق والكلور علشان النظافة ... الجيلية ده بعد ماكان يلبس مقاس 44 مثلا بقي يلبس مقاس 9 ... وحاطاه في المتحف بتاع الأيام الأولي للزواج .. والله زوجي ده بطل .. بس دلوقتي بقى بقيت ايه .. اوعي وشك ..

المهم وبمناسبة العيد برضة اقولكم علي بعض النصائح المجربة في تسوية اللحمة ( ده طبعا للقراء من العزاب والمتزوجون حديثاً )

طبعاً اللحمة الطازة بتاخد وقت أطول في السوا .. يعني يفضل وضعها في الفريزر شوية قبل السوا.

النار العالية تتطول برضة فترة السوا .. فيفضل أول ما المية تغلي باللحمة شوية يتوطي عليها النار لدرجة أقل شوية من المتوسطة.

إضافة الملح للحم أثناء السوا يأخر السوا .. فيضاف الملح في الآخر قبل أخر غلوتين علي النار

اللحمة بتكمل سواها في الشوربة .. يعني لما تطفي عليها وتسيبها للصبح متغطية كويس في الشوربة المغلية .. حتصبح تلاقيها مستوية ..

ملحوظة : طبعاً غرز الشوكة ما يبينش ان كانت استوت والا لأ .. لازم تاخد لك حتة حلوة كده وتحطها في لقمة عيش بلدي طازة وعليها شوية ملح وفلفل .. وتمزمز .. وفي الآخر أظن ممكن لما وقت السوا يخلص .. حتلاقي شوية شوربة تشربهم بعد ما تكون خلصت اللحمة دواقة ..

كل عام وأنتم بخير ..

تحياتي

زيزيتا

[se_ Elsyed]

شكراً لأودلانا اللي شاركوني همومي اللحمية

-------

نكمل

بني وبينكو أنا أكتسبت خبرة ( نظرية ) لا بأس بها من اخويا الكبير اللي كل أجازة اقعد اخد منه معلومات قيمة ... وهو هاوي دبح خرفان ... يعني لما يكون عندنا مناسبة زي العقيقة أو العيد الكبير هو اللي بيدبح واتعلم ده من بابا الله يرحمه .. لإن أبويا قضى بدايات شبابه في الريف فبالتأكيد عنده خبرة في الحاجات دي .. لكن الدبح نفسه عايز قلب جامد وخبرة عشان ما تبهدلش الحيوان اللي إنت بتدبحه ..

ونزلت معاه مرتين تلاته سوق الخرفان وشفته بيدخل إزاي على التجار اللي معظمهم مشهورين بالغش ... على فكره ده في كل مكان حتى هنا في السعودية ينضحك عليك وإنت زي الباشا

يعني على سبيل المثال :

- يبيع لك خروف أنثى على إنه ذكر .... والخروف الأنثى لو مخلف ومرضع وجيت تدبحه وتاكله تلاقي لحمته فيها طعم زفارة كده ...

- يبيع لك خروف عيان وضاربه السلك على إنه سليم .

- يبيع لك خروف واكل زبالة لما طالع عينه ... وده صعب تكتشفها والخروف صاحي قدامك اللهم إلا لما تلاقي اللحمة طعمها وحش

- أشهر الحركات القرعة هو إنهم بيجوعوا الخروف يعني لمدة يومين تلاتة وقبل ما يبيعوه بيوم يشربوه ميه بملح فالخروف يا عيني يفضل يشرب ولا يرتوي لحد ما بطنه تبقى عامله زي البالونة .. ييجي البيه اللي مالوش في البطيخ يلافي الخروف مبطرخ وسمين كده يتغش فيه .. على ما يندبح يلاقيه منفوخ على الفاضي وما فيهوش لحمه .

- يبيع لك خروف كبير في السن ... وفي الحالة دي بيسموه خروف " كاسر " يعني كاسر أسنانه اللبنية - زي بتاعت الأطفال كده - ومبدلها بأسنان دائمة ... وعشان كده تلاقي الواحد الخبير بيدخل الأول على بؤ الخروف ويعمل له كشف مجهري على اسنانه مش عشان يشوفه بيستعمل معجون سيجنال تو ولا لأ .... ولكن عشان يشوفه كاسر كام سِنة ... والخروف يا ولاد لو كاسر السنتين الوسطتين الأماميتين يبقى كده عنده سنيتن وفي السليم وشيل وإنت مطمئن يا باشا .. أما لو لقيت كل أسنانه بقت بيضا ... يبقى نهارك مش أبيض وده خروف كبير في السن وهايبقى مليان دهون - الدهن في العتاقي - زائد إن لحمته مش هاتستوي وهايحصل لك بعيد عنك زي اللي حصل لروزيتا لما كانت بتعمل بلوبيف في العزومة الأولانية ...

دي أمثلة كده عالماشي

المهم بأكلم اخويا المعلم عكوه الجزار من كام يوم وبأقوله إيه النظام السنة دي يا عكوه ياخويا ؟ ...

فقالي فاكر شوية اللحمه البتلو اللي بعثتهم لك السنة اللي فاتوا بعد العيد واللي دخلوا مزاجك ؟

فقلت له : ايوه فاكر إنت هاتذلني وتسمم بدني في اللقمة اللي اكلتها من سنة ؟

فقال لي : مش قصدي يا ريس .... المهم يا معلم أنا وقعت على منجم لحمه بيييييور ومن الأخر . فقلت له فين ؟ قالي فاكر محطة البنيزن اللي وقفنا فيها على طريق إسكندرية الصحراوي قبل القرية الذكية بخمسميت متر .. فقلت له فاكر ... قالي تدخل من جنب البنزينة دي يمين تيجي لك " مزارع التونسي " وهو رجل اعمال عنده مزارع على مساحة 80 فدان هناك وشكله هبر كام مليار من الحكومة وخلع فالبنك وضع إديه على المزارع دي وهو اللي بيديرها الأن ... قلت له : طب إيه الميزة في الشرا من المكان اللي في أخر الدنيا ده ؟

فقالي : أنا وخالتك وحماتي إتشاركنا وقلنا نجيب دبيحة عشان العيد ... فروحت إشتريت إسم الله عل مقامك عجل إبن ناس ومن عيله محترمه ..

فقلت له : عجل مره واحده ؟!!!! دي نقل حضارية جامده قوي ... بقى من خروف لعجل ؟

فقال لي : العجل وزن بالصلاتو عالحبيب 600 كيلو قايم يعني بشحمه ولحمه ... صاحي يعني ... والكيلو هناك بيقف بــــ 14 ج ؟ يعني توتال 8400 ج

تخيلوا يا ولاد ؟!!!1

كيلو اللحمة اللي بيتاكل دلوقت بـ 40 ج كحد ادنى ... أقل من كده اللحمه هي اللي تاكلك مش إنت اللي تاكلها

فقلت له طب وده يصفي كام بعد الدبح والسلخ والذي منه يا معلم

فقالي : التلت والتلتين

يعني تلت راس وعضم وجلد وحركات وحاجات مش مفيده وبتترمي

وتلتين لحمه صافي من اللي وصى عليه داود في تذكرته

يعني كده نقول الكيلو صافي واقف بـ 21 ج

والميزه بقى هناك إن البنك مش هايغش أو يتلاعب زي ما يكون صاحب المزرعة هو اللي بيديرها ومعاه الطاقم بتاعه ... والميزة كمان إنك بتشوف الحاجه على الطبيعة وبتشوف كمان نوعية الطعام اللي بتاكلها المواشي وبيعطيك شهادة لكل حيوان ..

وهناك كمان خرفان ... بس سعرها غالي السنة دي عشان الإنتاج قليل والإستيراد قليل بعد إنتشار مرض الحمى القلاعية في السودان اللي هي أكبر مورد للخرفان لمصر

وكمان في أرانب ودجاج وحركات

والواحد بقى في حالة العجول والحاجات دي لازم يستعين بصديق جزار لإن مش أي حد يدبحها والجزار بياخد أجر ضعيف جداً لا يتعدى 100 ج بس اهم حاجه عنده ياخد في المقابل جلد الحيوان عشان بيبيعه غالي للمدابغ

كان معكم أخوكم سين سين الشهير بالمعلم عضمه الجزار من أمام المدبح

[الحاج فوزى]

يبيع لك خروف أنثى على إنه ذكر .... والخروف الأنثى لو مخلف ومرض وجيت تديحه وتاكله تلاقي لحمته فيهاطعم زفارة كده ...

- يبيع لك خروف عيان وضاربه السلك على إنه سليم .

- يبيع لك خروف واكل زبالة لما طالع عينه ... وده صعب تكتشفها والخروف صاحي قدامك اللهم إلا لما تلاقي اللحمة طعمها وحش

- أشهر الحركات القرعة هو إنهم بيجوعوا الخروف يعني لمدة يومين تلاتة وقبل ما يبيعوه بيوم يشربوه ميه بملح فالخروف يا عيني يفضل يشرب ولا يرتوي لحد ما بطنه تبقى عامله زي البالونة .. ييجي البيه اللي مالوش في البطيخ يلافي الخروف مبطرخ وسمين كده يتغش فيه .. على ما يندبح يلاقيه منفوخ على الفاضي وما فيهوش لحمه .

- يبيع لك خروف كبير في السن ... وفي الحالة دي بيسموه خروف " كاسر " يعني كاسر أسنانه اللبنية - زي بتاعت الأطفال كده - ومبدلها بأسنان دائمة ... وعشان كده تلاقي الواحد الخبير بيدخل الأول على بؤ الخروف ويعمل له كشف مجهري على اسنانه مش عاشن يشوفه بيستعمل معجون سيجنال تو ولا لأ .... ولكن عشان يشوفه كاسر كام سِنة ... والخروف يا ولاد لو كاسر السنتين الوسطتين الأماميتين يبقى كده عنده سنيتن وفي السليم وشيل وإنت مطمئن يا باشا .. أما لو لقيت كل أسنانه بقت بيضا ... يبقى نهارك مش أبيض وده خروف كبير وهايبقى مليان دهون - الدهن في العتاقي - زائد إن لحمته مش هاتستوي وهايحصل لك بعيد عنك زي اللي حصل لروزيتا لما كانت بتعمل بلوبيف في العزومة الأولانية ...

يا س س ..

عرضت علينا الإشتغالات ولم تعرض كيف إكتشافها ..

أفيدنا من علمك افادك الله واحنا داخلين على أيام مفترجه ..

وموضوع السنان ده برضو مش واضح .. يعنى ايه كاسر كام سنة .؟ واعرف ان كاسر اصلاً ده ازاى ؟!!

خلينا نفتكرك وندعيلك واحنا بتشترى الخروف السنة ده ..

[se_ Elsyed]

يبيع لك خروف أنثى على إنه ذكر .... والخروف الأنثى لو مخلف ومرض وجيت تديحه وتاكله تلاقي لحمته فيهاطعم زفارة كده ...

- يبيع لك خروف عيان وضاربه السلك على إنه سليم .

- يبيع لك خروف واكل زبالة لما طالع عينه ... وده صعب تكتشفها والخروف صاحي قدامك اللهم إلا لما تلاقي اللحمة طعمها وحش

- أشهر الحركات القرعة هو إنهم بيجوعوا الخروف يعني لمدة يومين تلاتة وقبل ما يبيعوه بيوم يشربوه ميه بملح فالخروف يا عيني يفضل يشرب ولا يرتوي لحد ما بطنه تبقى عامله زي البالونة .. ييجي البيه اللي مالوش في البطيخ يلافي الخروف مبطرخ وسمين كده يتغش فيه .. على ما يندبح يلاقيه منفوخ على الفاضي وما فيهوش لحمه .

- يبيع لك خروف كبير في السن ... وفي الحالة دي بيسموه خروف " كاسر " يعني كاسر أسنانه اللبنية - زي بتاعت الأطفال كده - ومبدلها بأسنان دائمة ... وعشان كده تلاقي الواحد الخبير بيدخل الأول على بؤ الخروف ويعمل له كشف مجهري على اسنانه مش عاشن يشوفه بيستعمل معجون سيجنال تو ولا لأ .... ولكن عشان يشوفه كاسر كام سِنة ... والخروف يا ولاد لو كاسر السنتين الوسطتين الأماميتين يبقى كده عنده سنيتن وفي السليم وشيل وإنت مطمئن يا باشا .. أما لو لقيت كل أسنانه بقت بيضا ... يبقى نهارك مش أبيض وده خروف كبير وهايبقى مليان دهون - الدهن في العتاقي - زائد إن لحمته مش هاتستوي وهايحصل لك بعيد عنك زي اللي حصل لروزيتا لما كانت بتعمل بلوبيف في العزومة الأولانية ...

يا س س ..

عرضت علينا الإشتغالات ولم تعرض كيف إكتشافها ..

أفيدنا من علمك افادك الله واحنا داخلين على أيام مفترجه ..

وموضوع السنان ده برضو مش واضح .. يعنى ايه كاسر كام سنة .؟ واعرف ان كاسر اصلاً ده ازاى ؟!!

خلينا نفتكرك وندعيلك واحنا بتشترى الخروف السنة ده ..

ما احنا قولنا يا معلم حسين

نقول تاني :

- عشان تعرف تشتري خروف من غير ما ينضحك عليك ... يبقى لازم تتبع الاتي :

1- قبل ما تنزل السوق لازم تلبس جلبيه وتكون قديمة كمان ... ما بأهزرش والله .. أصل التجار لو شافوك بقميص ومنطلوم او جاكيت وكرافته يبقى عليه العوض يا ريس وإنت كده أفندي وهايشتغلوك ..

2- اهم حاجه دخلتك على التاجر من دول ... وسيبك إنت داخلتك علينا تساوي كنوز مش خرفان .

3- نيجي للجد ... دايماً نقي الخروف الشقي كثير الحركة ... وما تجيش على خروف مؤدب ومطاطي راسه وفي حاله وتقول ده إبن ناس لإنه ممكن يكون عيان فعشان كده حاله مايل وأفحص رجلين الخروف أحسن تكون واحده مكسورة أو مقطوعة وخليه يمشي شويه قدامك ويعمل حركات ..

4- أعمل تشيك آب سريع للخروف وتتأكد إن ودانه مش مقطوعة او عينه مقلوعة أو عنده جروح على أثر معارك داميه خاضها من اجل الحرية الخرفانية ..

5- خلي بالك من الخروف اللي عنده إفرازات واضحة من أنفه أو فمه وإبعد عنه ، إنفلونزا طيور وكده بعيد عنك .

6- لا تنخدع بشكل وملمس صوف الخروف لإنهم ساعات بيحموه ويسرحوا له شعره .. فتأكد إن ده طبيعي مش متصنع يعني .

7- اهم حاجه تضغط على بطن الخروف عشان تتأكد إنه مش مليان ميه .. عشان زي ما قلت لك بياكله أكل مختلط بملح وبيشربوه ميه كتير عشان يبان إنه مبقلظ .

8 - إمسك الخروف يكلتا يديك من العمود الفأري اللي في ضهره واتأكد إنه مش معضم زيادة عن اللزوم عشان كده مش هايبقى فيه لحم .

9 - عيش في دور طبيب أسنان وأنف واذن حتى لو كنت أدبي وأفتح بؤ الخروف وشوف أسنانه الأمامية ... لو كلها لونه بُني وحجمه صغنن يبقى كده صغير في السن وما ينفعش يندبح ... لكن شوف لو زوج الأسنان الاماميتين لقيتهم أبيض وباقي أسنانه بُني يبقى كده كويس وده خروف محترم ترك مرحلة الطفولة وأبتدا يبدل أسنانه وداخل في مرحلة المراهقة الخروفية ... لو لقيت بقى اسنانه نصها بُني ونصها أبيض يبقى شغال برضوا ... لو لقيت اسنانه كلها بيضا يبقى إبعد يا معلم ده خروف عجوز ومالكش دعوه بيه

[مصري أصيل]

بسم الله ما شاء الله ده مش أر ولا حسد

ايه يا عم س س ده سياسي مافيش منك أراضي وعقارات مافيش أخوك . وكمان لحمه وخرفان والذي منه والله انت بجد مشكله

بس تعرف معلومة الخرفان دي جايه في وقتها . أنا هاطبع الورقه دي وأخدها معايا وأنا بشتري الخروف عشان أشيك عليه والورقه معايا بدل ما أنسي حاجه . أصل تبقي مصيبه سوده بعد كل الشرح ده الواحد يروح يتسك.

علي فكره معلومه علي السريع بالنسبه لتسويه اللحمه . انصح بوضع الماء مره واحده أي أنه غير مستحب تزويد اللحمه كل شويه بالماء البارد في حالة جفاف الماء . وأن كان ولابد من تزويد اللحمه يكون بالماء المغلي . طبعا من حله منفصله .

[engmido]

كل سنة وانتم طيبين

وعيــــــ سعيد ــــــد

للرفع

تم تعديل 9 نوفمبر 2010 بواسطة engmido