اين اماكن الترفيه في الرياض

[deemuck]

اخوكم منقول جديد للرياض ويحب يعرف اين اماكن الترفيه العائلية المناسبة لقضاء اجازة العيد

حدائق – منتزهات – ملاهي وخلافه

وكل عام وانتم بخير

[عصام أبوالفتح]

نورت الرياض يا أخ deemuck

http://eid.alriyadh.gov.sa/

ده موقع احتفالات عيد الفطر اللى فات وجدول الاحتفالات مذكور فيه كل الاماكن العامة الجيدة وخرائط الوصول للمواقع موجودة

دى الاماكن الرسمية اللى ماسكاها الحكومة

الحاجة التانية منتزهات الثمامة الخاصة ودى انا لسه مخلصتهاش وكلها حاجات خاصة وتجربة مختلفة

الحاجة الثالثة الهايبر ماركت وده لما يكون الجو حر اوى او برد اوى .. فالافضل بيكون على طول هو المكان المغلق

الحاجة الرابعة الحدائق الصغيرة اللى فى كل حى تقريبا ودى ممكن الولاد يترددوا عليها وممكن تشوى فيها او فى البر زى ما تحب

الحاجة الخامسة .. أكلة ديليفرى وقعدة حلوة مع العيال فى البيت ودى اكتر حاجة بحبها شخصياً

[nash]

دائما هذا السؤال بحسه محرج جدا....

شوف يا أخي العزيز...أنا سمعت عن منطقه الثمامه..الحقيقه لم اذهب إليها يوما...

غير كذا المطاعم والمولات ...والمولات أغلبها مغلق في العيد :h!!!h:

إن شاء الله تنبسط معانا...

كل عام وأنت والأسرة الكريمه بخير

[عصام أبوالفتح]

يامدام ناش ارفعى رأسك .. انتى فى الرياض :h!!!h:

امسكى ورقة وقلم من فضلك واكتبى الاماكن اللى ممكن الواد يتفسح و(ينبسط ) فيها فى مصر والاماكن اللى هنا

الرياض تكسب عندى بدون شك .. لسه فاكر يوم ما خططت انى اروح جنينة الاسماك وخدنا 3 ساعات فى الطريق منهم ساعتين فى التحرير فى اشارة القصر العينى الملعونة و نص ساعة فى الزمالك اللى كلها قد كف اليد ... وبعدين سواق التاكسى راسه والف سيف ينزلنا الناحية التانية وطبعا غصب عنه لف ووقف قدام البوابة الرئيسية ولقيت البواب طالع يقولى خلاص قفلنا .. وقضينا اليوم فى نادى المهندسين فى ابو الفدا غصب عننا .

المواقف دى معتادة فى مصر ولازم خناقة سواء انتى طرف او بتسلكى او بتتفرجى .. لازم فى مصر فى اى خروج من البيت

هنا لأ .. فى لغة تانية

مصر تكسب فى الجو والاماكن التاريخية لكن الزحمة بتقتل اى انبساط بالجو او المكان .

فارفعى روحك المعنوية واستعينى بالله ثم بالخمس حاجات اللى ذكرتهم علشان تغيرى نظرتك للرياض ..

على قكرة الرياض افضل مدينة فى المملكة بلا جدال من جميع النواحى ( طبعا مكة والمدينة موضوع مستقل )

[nash]

أهلا يا باش مهندس عصام...كل سنه وأنت طيب..

شوف يا سيدي....

أنا هارفع راسي...وأنت هات أسامي أماكن نقضي فيها يوم جميل من غير الألف

وخمسميه ريال بتوع تأجير إستراحه بحمام سباحه لمده يوم....

الرياض بلا شك مدينه عملاقه وجميله..لكن أماكن الفسح العائليه تبق محدوده...حتي حديقه الحيوانات يوم للرجال ويوم للسيدات ومش مهم جمع شمل الأسرة بعضها ببعض مع ان الوضع غير في جده...( بحقد علي ناس جده )...

الحقيقه نريد اماكن فعلا للاسر لتقضي فيه اليوم علي راحتها والجميع ينبسط فيه...ياريت اللي عنده أقتراحات بجد...

[deemuck]

والله انا اشكركم بشدة على روح التعاون معي

قبلها انا كنت في الطائف مدينة جميلة جدا كلها منتزهات ، جبال ، مرتفعات ، حدائق ، منتجعات زي مانتا عايز

و برضه روحت جدة كتير احسنها الشلال والكورنيش بس مش زي الطائف.

في اماكن مثل :

-مركز الملك عبد العزيز التاريخي يعني معقول

-منتجع المرسى على مخرج 10.

-والحدائق اللي في الملز معقولة

ايه تاني مش عارف. والله انا بكتب الكلام دة وانا مفتقد الطائف

[MZohairy]

اخوكم منقول جديد للرياض ويحب يعرف اين اماكن الترفيه العائلية المناسبة لقضاء اجازة العيد

بالمعنى الحقيقي للترفيه العائلي يبقى مفيييييش :h!!!h:

[nash]

أخي الكريم deemuck

مسيو زهيري ...جاب من الأخر.....

عيش حياتك معانا وأنبسط....

الرياض غير....

[أسد]

العيد في الرياض ..

الأجازت في الرياض ..

مملة ..

ولكن كي تكون مقبولة .. يجب أن تجتمع مجموعة من الأسر .. ويقضون أوقاتاً في أحد المنتزهات ..

ويمكن في تلك الأماكن استئجار فيلا أو شاليه في أحد المنتزهات الموجودة في الثمامة مثلاً ... وهناك بيكون ملاهي وألعاب أطفال وحدائق وبحيرات .. وتكون كويسة جداً إذا كانت المجموعة منسجمة مع بعض ..

أما عن الحدائق فهي كثيرة .. ويوجد حديقة صغيرة في كل حي تقريباً بالإضافة إلى الحدائق الكبرى في مناطق كثيرة في الرياض .. ولكنها في العيد تكون مزدحمة... أنا شخصياً لا أفضلها

هذا بالإضافة إلى المولات التجارية والتي تحتوي على ملاهي فيها جميعاً ... وبتكون فاتحة في ا لعيد ... المشكلة إنها بتكون زحمة ..

هناك أيضاً على طريق المطار .. مابين مخرج 9 و 10 .. حتلاقي المرسى .. والحكير لاند وهي ملاكي كبيرة ومنزهات كبيرة تشمل على معظم ماسبق ذكره ..

وأيام العيد في المساء .. في أماكن متعددة .. تقوم السلطات المحلية في الرياض .. بالإحتفال بإطلاق الصواريخ الملونة .. كل يوم مساء حوالي الساعة التاسعة ... والتي يسعد بها الأطفال بشكل كبير .. والكبار أيضاً ...

وأماكن إطلاق الصواريخ هي ..

الديرة

طريق الملك عبد الله

الملز .. عند ملعب الملز ..

أرض الإحتفالات في طريق المطار ..

الثمامة

إذا كان لديك أي إستفسار محدد .. تحت أمرك

[muslim4ever]

الاخ deemuck

اولاً كل عام واعضاء المنتدى بخير حال

اخى العزيز كما اوضح لك الاخ عصام الرياض فيها كل ماتريد

ولكن انتى اللى تحدد انتى عايز اية

خلينا نتكلم بوضوح اكتر انتى بدور على اماكن علشان الاولاد

خلاص خلى اولادك وزوجتك هما اللى يختاروا يعنى اعرض عليهم كل المتاح ودعهم هما اللى يختاروا لان باختصار هما لما يفرحوا انتى حتفرح حتى لو المكان اللى اختاروة مش عجبك

تحياتى لك وكل عام وانتى بخير حال

[suzanne]

السلام عليكم

كل عام و انتم جميعا بخير و صحة و سعادة

انا اسمي سوزان جديدة برضة في الرياض بقالي خمس اشهر ، مبسوطة انكم بدأتم الكلام عن الرياض ، انا كان نفسي اخد الخطوة دي بس لاني جديدة في المنتدى كنت خايفة مايجليش زباين و ما حد يرد عليا.

انا كنت عايشة في جدة اربع سنوات، و كنت مبسوطة فيها، لما جيت الرياض كنت مكتئبة و لكن بدأت اتعود عليها.

انا طبعا من مصر و عايشة في السعودية و مقدمة على الهجرة لكندا ، متابعة كلام الناس العايشين في مصر، و الناس اللي عايشين في الخليج و الناويين على الهجرة، انا لحد دلوقتي ما شفتش غير نسبة قليلة من الناس سعيدة باللى هيه فيه.

و رأيي الشخصي ان الانسان بيجد السعادة في اي مكان ينجح فيه سواء ماديا او عمليا او اجتماعيا او معنويا.

في ناس عايشين في مصر عمرهم ما بيفكروا يخرجوا براها لانهم ببساطة ناجحين فيها و عندهم كل اللهم عايزينه سواء عائلة حلوة مترابطة او

وظيفة كويسة و مستوي مادي مرضي بالنسبة لهم، و بيعتبروا اللى بيفكر يخرج بره البلد مجنون.

ناس عايشين في الخليج اخر سعادة، ماديا مسترحيين و بيقولوا لو الجي على اد اللى رايح احنا مسترييحين هنا، راكبين عربية حلوة و سكانين في مكان كويس و بعيد عن مشاكل مصر و المشاكل الاجتماعية، و ليهم اصحابهم بيخرجوا معاهم و بيتفسحوا و ولادهم في مدارس كويسة و مستمتعين بوقتهم بجد.

و ناس عايشة في كندا شيفين ان كندا جنة الله على الارض، و انها تمنحهم الفرصة اللى بيحلموا بيها في عيشة كريمةذو احترام و تعليم لاولادهم و تأمين مجاني و غيره.

يعني في كل مكان فيه المبسوط و فيه المضايق

ناجح= مبسوط مش قادر يحقق اللي عاوزه=مضايق

الرياض بلد فيها فعلا كل حاجة، اماكن الترفيه فعلا كتيرة و اكتر من مصر كمان بكتير ، بس احنا مش حاسيين بيها لعدة اسباب:

- ان نكون مش مبسوطين في الرياض اصلا (اهلنا واحشنا، العمل مضايقنا، مش قادرين نحوش و الحياة غالية)

- ان احنا المصريين مش متعودين نخرج اصلا في العيد احنا بنزور الاهل و الاصحاب، و طبعا ما نقدرش نعمل كده في الرياض.

- ان نكون مالناش اصحاب في الرياض، طب حنضحك و نهرج ونلبس لبس العيد لمين، و مين حيدي العيدية للأولاد.

انا طولت اوي و الناس اكيد زهقت مني. انا اسفة

احنا في العيد:

- حنصلي العيد، ونفهم اولادنا ان ده عيد، و نديهم العيدية

- نرجع البيت نفطر

- نروح حديقة في شارع الستين تابعة للبعيجان، الاولاد يلعبوا بالكورة و يجروا و يبهدلوا نفسهم و بعدين نجيب كباب نتغدى بيه في الحديقة و نلعبهم في الملاهي شوية و نروح .

سلام

[nash]

أهلا يا سوزان...

مرحبا بك معنا في الرياض...وقبل ذلك في المحاورات...

بالطبع كلامك منطقي جدا....والحقيقه أنا لا أحب زيارة الحدائق..طبع سيء للاسف..كذا مرة الحقيقه أخذت الاولاد وهم صغيرين عليها وركبوا دراجاتهم وخلاص...

مفهوم الترفيه في حد ذاته..هنا لا وجود له ..حتي أهل البلد الأصليين يعترفون بذلك..لإن حتي بهجه العيد نفسها ليس لها وجود..اللهم إلا من بعض الزيارات للأصدقاء..

عيد مصر غير أي عيد اخر في العالم..مش عارفه ليه الحقيقه..بيكفي كما قلتي اللمه مع الأهل والأصحاب...

هنا وبصراحه كبيرنا..تأجير أستراحه ومثل ما قال الكريم أسد بنحتاج صحبه جيده..وقد تكون هذه الصحبه غير متوفرة ( التجانس ) يعني ما اقصد...

ماذا تبقي؟؟ أمامنا الحدائق سواء المدفوعه أو المجانيه...وفي النهايه جلسه نقضيها وخلاص...

الملاهي...وهي فقط للأطفال المسموح فيها دخولها للزوج مع زوجته...إذا كبر الأبناء انفصلت الأسرة...

المطاعم..هي المتوفرة فقط...يعني الخروج فقط لتناول الطعام ولا شيء أخر..أو زيارة المولات..والتي غالبا اكثر محلاتها مغلقه في العيد....

تظل منطقه الثمامه ...سمعت أنها حلوة..ولكنها نوعا ما بعيده...يعني علي أطراف الرياض...فمن يريد ترفيه سريع عليه الخروج علي الحدود....

أنا بالعكس لست تعيسه بوجودي هنا..فهذه إراه الله وماكتبه لنا..وقبلت به والحمدلله...

بيتهيالي ياجماعه اللي معاهم أطفال ممكن ينبسطوا أكثر من اللي عندهم شباب..أو صبايا...

ربي يوفق الجميع...وكل عام وانتم جميعا بخير

[عصام أبوالفتح]

رأيي الشخصي ان الانسان بيجد السعادة في اي مكان ينجح فيه سواء ماديا او عمليا او اجتماعيا او معنويا.

مضبوط تماما

واحب اضيف حاجة سادسة هى تجربة جديدة زى كده لو كنا فى كندا ولا سويسرا كنا هانستمتع بالتزلج على التلج ونتباهى بكده .. ففى عادات محلية هنا برضو مثيرة للاهتمام زى الخروج للبر والتخييم والشوى .. طبعا هاتقولوا تخلف ..زى مفارقة الجينز والجلابية البيضا بالضبط

التغريب متعمق اوى

المهم انا باحب الشوى برا البيت جدا واغلبه فى الحدائق العامة ومتشوق لتجربة تخييم لكن الخبرة معدومة طبعا فى موضوع التخييم ده ولازم عدة واستعداد وعربية 4 * 4 و طبعا قبلها تهدئة مخاوف المدام و الولاد الناتجة من حلقات طاش ما طاش . :rolleyes:

انا مستعد اتعلم من احدى الاسر فن التخييم ونجربه كاسرتين او اكتر وربنا يستر .. يشترط خبرة لاتقل عن 3 مرات :lol:

تم تعديل 16 ديسمبر 2007 بواسطة عصام أبوالفتح

[deemuck]

كل عام وانتم بخير كل المحاوريين

دايما سمع من الناس في الرياض انا في الاعياد والاجازات طالعين على الشرقية. فيها ايه الشرقية؟

منطقة الثمامة اسمع ان احيانا المصريين بيعملوا تجمع في احد الاستراحات واتعمل بالفعل في عيد الفطر المبارك

طيب سؤال كدة عالسريع.. الاماكن اللي ممكن نشتري منها ملابس العيد اطفال ورجال؟

ديم مق

[Mohamed Fayek]

كل عام وانتم بخير كل المحاوريين

دايما سمع من الناس في الرياض انا في الاعياد والاجازات طالعين على الشرقية. فيها ايه الشرقية؟

منطقة الثمامة اسمع ان احيانا المصريين بيعملوا تجمع في احد الاستراحات واتعمل بالفعل في عيد الفطر المبارك

طيب سؤال كدة عالسريع.. الاماكن اللي ممكن نشتري منها ملابس العيد اطفال ورجال؟

ديم مق

الأخ الفاضل / ديم مق

اولا كل عام وانت بخير

الرياض مدينة جميلة وفيها كل ماتتمناه حسب قدرتك المادية .. يعنى ممكن تروح برج الفيصلية وحتلاقى هناك كل ملابس الأطفال وفيها كمان ملاهى ومطاعم أو ممكن تروح برج المملكة وبرده حتلاقى كل ماتتمناه وبعدين عندك بقى طريق الملك عبد الله وده بقى فيه كل شئ محلات كتير جدا ومطاعم فاخرة وعندك كمان ياسيدى الفاضل طريق العليا العام اسواق الموسى وفى طريقك لشمال الرياض حتلاقى محلات كتير على اليمين واليسار وعندك كمان العقارية أظن كفاية كدة ... بس انت تقل جيبك وادعيلى

Mohamed Fayek

[عصام أبوالفتح]

خد عندك طريق التوفير عنده تصفيه و بعده الشامل والهرم ... الثلاثة على العليا العام بعد اشارة الملك عبدالله باشارة .. على اليمين

[nash]

شوف ياسيدي هنا محلات اللبس متنوعه بين الغالي الفخم والعادي واقل من العادي...

الحاجات الشيك واسعارها معقوله بالنسبه للاطفال محلات ( آدمز )...وخاصه في موسم التخفيضات

وهذه كانت المفضله عندي وهناك غيرها بس هذا مايحضرني...

الحريمي موجود أشياء متنوعه وجميله في مجمع الفيصليه والمملكه...وبالطبع افضل الاوقات وقت التخفيضات الموسميه...

الرجالي أيضا في البيت السعودي وديبنهامز والاخير موجود في المملكه...

بالنسبه للشباب محلات بلو أيج...وكويك سيلفر وجوردانو.....واسعارهم تكون مناسبه في التخفيضات أيضا...

وايضا سيتي بلازا عنده توكيلات لي كوبر وبوسني ..وكلها ماركات حلوة.....

البنات ...الحقيقه لا أعرف...لإن للاسف عندي شباب فقط....ربي يحفظهم...

هذا مايحضرني الأن....بالنسبه للملابس...

الشرقيه اخي الكريم المقصود بها الخبر والظهران والدمام...تبعد حوالي 400 كيلو إلا قليل عن الرياض...تقع علي الخليج العربي ..الطقس فيها يشبه جده إلي حد بعيد..وإن كان الأن الطقس أسمع انه رائع....طبعا طرق السفر من أروع مايكون الحقيقه....المجتمع فيها منفتح ووسائل الترفيه فيها متنوعه كثيرا عن هنا....

بالمناسبه سمعت عن متنزه السلام وانه متنزه جميل في الرياض..وبه بحيرة صناعيه..ولكن للأمانه لم أزورة ولا مرة واحده....

[عصام أبوالفتح]

الأخ الفاضل / ديم مق

اولا كل عام وانت بخير

الرياض مدينة جميلة وفيها كل ماتتمناه حسب قدرتك المادية .. يعنى ممكن تروح برج الفيصلية وحتلاقى هناك كل ملابس الأطفال وفيها كمان ملاهى ومطاعم أو ممكن تروح برج المملكة وبرده حتلاقى كل ماتتمناه وبعدين عندك بقى طريق الملك عبد الله وده بقى فيه كل شئ محلات كتير جدا ومطاعم فاخرة وعندك كمان ياسيدى الفاضل طريق العليا العام اسواق الموسى وفى طريقك لشمال الرياض حتلاقى محلات كتير على اليمين واليسار وعندك كمان العقارية أظن كفاية كدة ... بس انت تقل جيبك وادعيلى

Mohamed Fayek

الله يسامحك يا شيخ :rolleyes: .. الشراب فى الفيصلية اطفالى مقاس من 0-3 والله ب 200 ريال .. مش عارف معمول من ايه .. الظاهر معمول بالتمر .. انت ذكرت اغلى الاماكن و المفيد ان احنا نتجنبها .. وطبعا كل واحد حر .. عن نفسى باروح بنية الفرجة .. لان الشراء من الاماكن دى فى رايى حراااااااااام :lol:

فى اماكن وسط زى اللى ذكرتها وزى سيتى ماكس وسناء وسيتى بلازا وسماء وباى ليس .. كتيييييييييييييير اوى

[nash]

أخي العزيز عصام....

هذه المولات في موسم التخفيضات اسعارها بتكون رائعه وعلي ضمانتي والله...

يعني كمثال بنطلون البلو أيج سعرة العادي تقريبا 160 ريال..ممكن يوصل ل70 ريال في التخفيضات...

بس الحقيقه خامه جميله وشكله مرتب....

لكن بالنسبه للأسعار اللي ذكرتها صادفني مثلها كثيرا...طبعا جنان ...

[deemuck]

والله يا جماعة اشكركم بشدة مش عارف اقول ايه دة الواحد عمال يلف عشان العيال. وربنا يخليلك اولادك يا مدام ناش

واشكرك يا باشمهندس عصام على المولات اللي ذكرتها لا ان كنت بدور عليها ولقيت الشامل فين! اخر البطحاء وانا ساكن قريب من مخرج 10.

واشكرك اخي الفاضل Mohamed Fayek انا فعلا روحت برج المملكة والفصلية للتنزه والعشاء في الركن الصيني خطير اللي في الفيصلية. بس الملابس اول ما زوجتي دخلت محل كدة تشوف عبايى لقيت سعرها 2800 ريال . قولتلها يلا نجري قبل ما يمسكونا.