العين صابتني ورب العرش نجاني

[se_ Elsyed]

من العادات الغريبة التى كنت أحرص عليها لما كنت فى مصر وحتى لما انزل أجازات هي قراءت الحكم والمواعظ المكتوبة على العربيات اللى فى الشارع من أول عربية الفول اللى فى الميدان الى النقل اللى بيحمل طوب وزلط ، ومنها :

1- العين صابتني ورب العرش نجاني.

2- سولار فى التنك ولا فلوس فى البنك.

3- طريق السلامه يا أبو أشرف ، ودى جملة قرأتها كتير جداً على الميكروباصات ومش عارف هو أى سواق بيطلع رخصة سوائقة ميكروباص لازم من الشروط والمتطلبات أنه يبقى أسمه أبو أشرف ؟ أرجو الأفادة من الأسطى شعنونة.

4- يا تعدي يا تهدي.

5- take care i'm from Upper egypt ... يعنى فتوة أنت مثلاُ ولا أيه.

6- أما أطرف التعليقات واللى مت على نفسي من الضحك لما قرأتها .... " يا ناس سيبوني أسدد ديوني وبعدين أحسدوني " وتخيلت منظر الحاسدين وهما رايحين للأسطى كل يوم يسألوه خلصت تسديد الديون ولا لسه ، خلص بأه عايزين نشتغل .

7- الحلوه دى جايبها بخلع الضرس.

8- دى عليها أقساط يا جدعان.

9- يا ناس يا شر كفاية قر.

10- don't kiss me ، ودى مش معناها اللى أحنا عارفينه ولكن يقصدوا بيها ماتلزقش فى عربيتي .

فى حد قرأ حاجات تانية ؟ :) :)

[se_ Elsyed]

أما بالنسبة لعربيات الفول فقد قرأت الأتي

1- إن خلص الفول أنا مش مسئول .

2- إن خلصت البليلة ما باليد حيلة.

3- ما خطرتش على بالك يوم تفطر عندي ،،،،، الله يا ست.

وبالنسة لعربيات السمين ( ودى أكله كده من ضمنها الممبار والفشة والكلاوي .. وبصراحة منظرها وهى متعلقه على العربيات الخشب فى الشوارع والميادين يخلي الواحد يشعر بالغثيان ... يعععععععععع )

1- كُل سمين زين واقرأ الفاتحة للحسين.

2- كُل سمين وأضرب التخين.

وكلنا عارفين محلات العصير وشعارها أيه :

" وسقاهم ربهم شراباً طهورا "

حد عندو أكلات تانية .. قصدى تعليقات تانية

[Katamando]

ممكن أضيف

ماتبصش كده يا عبيط.... ده جايه بالتقسيط

هي جت كده واللي عنده كلمة يلمها

كلمة الله آيه ولكل ظالم نهاية

يا ناس يا عسل أبو حنفي وصل (حمدلله ع السلامة)

طريق السلامة يا شربات

الحلوة الأمورة جاية من المنصورة

ومنهم من يكتب أسماء اولاده او حبيبته مثل

شيماء أخت أمير (طب وأحنا مالنا)

سماح (ماشي بس من مين)

[وسام]

سوقوا بالراحة يا بهايم عشان سواق العربية نايم

تعمل حسابى اقدرك ... تهزر معايا اعورك

ما تبحلقش كدة يالوح...دى جت بطلوع الروح

ماتبصش كدة يا عبيط الحلوة دى بالتقسيط

سولار فى البنك و لا دولار فى البنك

حلوة و متدلعة و على السكة متشخلعة

عدى و اجرى على اخرك و عند كمين الرادار حاقبلك

التنك وعمرناه و الموتور دورناه واللى بيجرى على رزقه ربك ما بينساه

[ســيد مرزوق]

أوعى تقرب ياعبيط .... أصلي واكل قرنبيط

ماتحاسب ياطور .... لاتفوت الماتور

الحق عليا اللي طاوعتك ..... ياندل

اجري جري الوحوش ..... مش هاتحصلني يابوش ( توقيع : بن لادن )

عايزين همة ..... ياعالم يارمة

اديها ميه .... تديك طين

رشة جريئة ... يعقبها الندم

ماتنقوش فيها يا عواطلية .... دانا رايح أبيع العربية

فتح عينك ... تاكل على قفاك

احترس .... السائق ... صعيدي

[Cleo]

دى مش ورس..... دى جايا بخلع الضرس

ماتبصليش بعين ردية... دول سبع سنين فى السعودية

طريق السلامة يا أبو أحمد

الطير المسافر

[Arabisc]

إبراهيم الطـاير ' هل تذكرون المسلسل '

يقيـني بالله يقيني

If you can read this, you are too close

[se_ Elsyed]

أنا حاسس أنكم بتستغلوا صغر سني وبتضحكوا عليه وبتألفوا حاجات من عندكم ، لأنى أتضح إني ماعرفش 90 % من التعليقات اللتى كتبتوها دى خاصة تعليق كليوباترا " ماتبصلش بعين ردية دول 7 سنين فى السعودية " وممكن بأه لو واحد كان فى الكويت يكتب

" أنا أشتريت الونيت .. لما رجعت من الكويت " والونيت فى دول الخليج هو العربية الربع نقل.

" ماتبحلقليش كده يا جبان دول 7 سنين فى سلطنة عمان "

" تسألني جايبها منين .. أصلي كنت فى البحرين " مع تحيات أخونا حشيش

" لا بأنجم ولا بشوف الأطر ... ده أنا أتبهدلت فى قطر "

والله لأهريكوا تأليف ... بمناسبة شهر الخريف ماشي ماشي

[Lancelot]

اللي منتشرة أوي اليومين دول علي الميكروباصات .... يالا باي ... كل الناس لاصقها ...

و الجديد بقه .... تلاقي الواحد كاتب كلمة عربي عادية جدا و لكن بحروف إنجليزي ...

Rehlet Omry ... رحلة عمر سيادته .....

Rewesh Tahen ...... روش طحن ... ديه بقه مش علي الميكروباصات بس و لكن علي العربيات الملاكي

Ya Mammmmmeeeeeeee ..... يا مامــــــــــــي

الموضوع إنتقل من الميكروباصات إلي العربيات الملاكي إلي عربيات الناس الكلاس ... تلاقي العربية أوعي جامدة جدا و عليها الإستيكر .... لكن طبعا إستيكرز ستايل تاني ... مثل ...

If you can read this, you are too close ..... اللي ذكرها الأخ أرابيسك ..

Don’t follow me I am lost too .... مش شرط

Women drive cars like fish ride bicycles ..... أحيانا

If you think this car looks bad you should see my other one

دول اللي فاكرهم دلوقتي .... لكن فيه من كده حاجات كتير ... و دمهم بيبقي خفيف أوي .......ساعات..

[وسام]

يلالالالا دى بقت موضة

سير لانسلوت ...... انا كنت زمان ايام الشقاوة حاطط على عربيتى ( :lol: Haty bosa)

و مخبيش عليك كنت بحصل على نتائج فى بعض الاحيان :lol:

[Lancelot]

و مخبيش عليك كنت بحصل على نتائج فى بعض الاحيان

أيوه يا عم ... بس المهم تكون البوسة مش من عربية تانية .... يا يعني ممكن تصحي الصبح تلاقي عربيتك واخدة بوسة كبيرة في الكبوت ..... اللهم إحفظنا .....

[crossfield]

عزيزى سى السيد:

شوفت دول قبل كده؟:

يا أم المخلص خلصينى.

الكيمى كيمى كا سواقنا باشا ياه.

[crossfield]

أخ سى السيد:

تخيل إكتشفت إن عندى كتاب عن الموضوع ده! بصراحة كنت شرياه من زمان و ركنته و نسيته لحد ما قربت العتة تاكله.الكتاب إسمه"هتاف الصامتين" و مؤلفه إسمه سيد عويس (تقريباً يقرب لزكى جمعة) المهم موضوع الكتاب هوه العبارات اللى بيكتبها المصريين على العربيات (بدءأ من العربيات الكارو و مروراً بعربيات النقل و اللورى و إنتهاءاً بالملاكى ) و كمان الجمل اللى بتتكتب على الجدران و بيوصف إزاى دراسته شاملة لدرجة إنه ضمنها العبارات اللى لقاها مكتوبة على جدران بعض دورات المياه :s: معلش البداية مش مشجعة بس نستحمله شوية.فى الدراسة دى بيربط الظاهرة بالرغبة فى مواجهة المجهول عند الإنسان المصرى البسيط بشكل صامت من خلال العبارات دى .المهم الكتاب مليان بالعبارات إياها دى و هقولك شوية منهم دلوقتى.خد عندك :

بعضها أجزاء من أغانى:

إدلع يا رشيدى على وش المية

تراعينى قيراط أراعيك قيراطين

تتوه أنا عنيه بنظرتك ليه(مش عارفة إزاى يعنى؟بيحول؟)

جددت حبك ليه بعد الفؤاد ما ارتاح

على الصبر محناش قادرين ليه بتحسد الصابرين

كايدة العزال يا سكينة

ماخدش العجوز أنا

للصبر حدود و أنا صابر

ما زلت كايدة العزال

ما قدرش على كده و مقام السيدة

من فرحتى تهت مع الفرحة(خرج و لم يعد؟)

مين ينصر المظلوم و يحاسب الظالم

وصفوا لى الصبر لقيته خيال

يا بنت يااللى المولى أعطاكى الجمال وزعيه على إخواتك(عشان الضرايب؟؟؟؟؟)

ورد عليه فل عليه....

و بعضها تعبيرات شعبية تحفةةةةةةةةةةةةة:

آخر طريقك فين

إدينى من وقتك ساعة

العب مع غيرى يا ظالم

المية زلال اشرب حلال آخر جمال

أنا اللى حلوة فيهم

أنت اللى فيهم يا أبو عزام

أهى جات كده و اللى معاه كلمة يلمها :twisted:

بص بعينك و ارحم بقلبك(ناقص يقول و امشى على رجلك)

بص شوف الفلوس بتعمل إيه

بطل تقل بقى

حرام عليك يا عبده سبنى فى حالى :(

حلوة يا حاجة

حمال الأسية

خطر على بالى

ربنا عاوز كده و أنا أعمل إيه

عينك فيك توريك شغل الزغاليل-----> :alien:

كفاية يا عين

مش بنام الليل يا ليلى

معلش يا زمن الهجرة غربتنا و الأيام علمتنا

متبصليش قوى لتحسدنى

و النبى حيجننونى :mrgreen:

و النبى لتتفرج

وبعضها يتضمن تحذيرات:

احذر خطأ الغير

النار بتجرى ورايا :aa:

إن خلص الفول أنا مش مسئول(سواق كارو الظاهر)

إن خلصت الكراسى أنا ماشى

أنا خايف عليكى يا نجوى

أنا شايفك يا حرامى

اوعى الهوى

اوعى من قدامى احسن أدوسك :devil:

حاسب عليه أنا غلبان :oops:

حاسب معنديش الا هيه :?

حاسب وراك وراك حاسب

حاسب وراك محاسب

خلى بالك منى

شوف قدامك بص وراك(دعوة صريحة للحوادث) :lookaround:

على مهلك يا أبو سريع

ممنوع البصق و اللصق :cool:

و بعضها أمثال شعبية:

البانى طالع و الفاحت نازل

العيشة منجهة والحياة أبهة

العين وسع الحلق بس النظر تعبان :shock: ايه يعمل الحاسد فى الرازق

دوس على المرايا دوس هى حكاية والا فلوس :mad:

صبرك يا قلبى على نفسى و لا صبر الناس عليك

و فيه نصايح كمان:

احترم العامل يحترمك

اشرب العصير المنعش(مقلش إسمه إيه) :cool:

اشرب زبيب وصفه الطبيب طه الحبيب

الرأفة بالحيوان واجب على كل انسان

لا تسرع و عد سالماً

لا تندم على ما فاتك

وفيه عبارات تتضمن تحيات:

صباح الخير يا حسنة

صباح الخير يا اولادى أيمن و محمد

صباحى فل و النبى

مكتوب على وجهك صباح الخير يا صفاء

و فيه أدعية و ابتهالات:

الحمد لله على نعمائه

الفاتحة لحضرة النبى

الله أكبر النصر للعرب :sat:

الله كريم –الله معانا –الله يرعاك

اللهم اعطينى خير الزاد و اكفينى شر العباد

تندب فى عينك رصاصة ياللى تبص :devil:

رضا يا بنتى العيش و رب العرش

روح منك لله

طريق السلامة يا أبو شريف_يا أبو على_يا أبو هشام

على بركة الله يا زمزم

فى حفظ الله يا نوسة

فى رعاية الله يا ريرى(ريرى إزاى وابوها عبد العال؟؟؟؟؟؟؟)

فى رعاية الله يا أبو نانا(نفس السؤال؟)

قاصد كريم فى سبيل لقمة العيش

قلباً شاكراً و لساناً ذاكراً و زوجة صالحة

كده رضا _محروسة بإذن الله

مدد يا أهل البيت-يا أم هاشم

مون بالسولار و صلى على المختار :D

نظرة يا أبو العباس

نظرة يا بدوى جاب اليسرى(؟؟؟؟؟؟)

و حياتك يا ظالم ما تمسك حاجة عليه

يا حامى السويس يا غريب

و فيه أقوال مأثورة:

إذا سفه السفيه فلا تجبه و خير الكلام السكوت

اغنى الغنى العقل

اكبر الفقر الحمق

الحسود لا يسود

الزمن أحسن معلم

الصبر طيب ولكن الأسى يضر

إله الرياسة سعة الصدر

جمال الدنيا بالمال و الآخرة بالأعمال

عاشق الأمل مغرور(يعنى الواحد يموت من الاكتئاب أحسن) :(

عامل الناس كما تحب أن يعاملوك

كيف أخشى الفقر و أنا عبد الغنى(حلوةةةةةةةةةةةةةةةةةةة)

كيف أقول ملكى و الملك لله

لا تتعجب فإنها إرادة الله

و فيه شويه بقى مش ممكن:

(بيعتمدوا على الأسماء الموصوفة):

أبو السباع سيارات الوحش الجبار :twisted:

أبو حلاوة قاهر الدركسيون :twisted:

أسطول المنوفية(فيه قطعة منه لزقت فى مصر الجديدة) :oops:

بترول بلدنا

ترمس سنجام

جيلاتى أمل حياتى_جيلاتى نور الهدى و الحب كده

حسنية أخت كوثر

دليل الصحراء

زهرة البرنس

زهرة المنوفية(حتى فى الشعارات دى واكلها والعة؟؟؟؟؟؟ :twisted: )

شادية الصحراء-شيال الحمول يا متولى-عروسة المنصورة_عصير العطشان-فوال الحرية و بياع الطعمية-قاهر المانش-ليلى أخت طارق_مقطورة مستورة_ملاحات البحر المتوسط…

و شوية بقى فعلاً فظااااااااااااااع:

إن كنت عايزنى قابلنى

انت اللى قتلت سكينة

انت جبان و الرب شاهد عليك :(

بص و بص و بص تسوا مليون ونص :cool:

بلاش تروح الكلية و كل جيلاتى و مهلبية :aa:

بلاش تنسانى مفيش لقلبى بديل ليك تانى

جايز و انت شاغلنى تشغل ناس تانيين :inlove:

روحى و روحك كده(؟؟؟؟؟؟)

سأصبر حتى ينظر الله فى أمرى

طلباتك يا حمادة

لما أشوفك بنسى نفسى

نزيه يا مرور بلدنا :baaa:

هنحارب و مش خايفين

و النبى أنا حلوة و عارفة انى حلوة

و حبيبى لما قاطعنى رحت له أنا برجليه(ناس معندهاش دم :shock: )

[crossfield]

بسسسسسسسسسسس .و كفاية كده النهارده أحسن أبو هشام قصدى بابا بينده عليه :oops:

[se_ Elsyed]

والله المصريين دول ناس عسل ....حد عمره شاف الحاجات دى فى اى دولة . شكراً لكروس فيلد على هذة التعليقات الظريفة .

بس برضوا مش هاسمحك يا كروساية على طلبك سحب رخصتي ... قصدي عضويتي .... :twisted:

[Lancelot]

كروس فيلد ... شكرا علي العبارات الجميلة و المضحكة جدا ... و التعليقات و الإيموشينز الأكثر إضحاكا ... مش ممكن أنا مش قادر أمسك نفسي من الضحك ....

العبارات اللى لقاها مكتوبة على جدران بعض دورات المياه   :s:  

عينك فيك توريك شغل الزغاليل-----> :alien:

فى رعاية الله يا ريرى(ريرى إزاى وابوها عبد العال؟؟؟؟؟؟؟)

عاشق الأمل مغرور(يعنى الواحد يموت من الاكتئاب أحسن)

شوف قدامك بص وراك(دعوة صريحة للحوادث)

أبو حلاوة قاهر الدركسيون

أبو حلاوة .... إلحق بينادوا عليك ...

[crossfield]

كروس فيلد ... شكرا علي العبارات الجميلة و المضحكة جدا ... و التعليقات و الإيموشينز الأكثر إضحاكا ... مش ممكن أنا مش قادر أمسك نفسي من الضحك ....

أبو حلاوة قاهر الدركسيون

أبو حلاوة .... إلحق بينادوا عليك ...

يا عم لانسلوت الله يخليك إحنا مش قد الإدارة و على رأى أبو شريف "حاسب عليه أنا غلبان" :cry: :cry: :cry:

[Lancelot]

يا عم لانسلوت الله يخليك إحنا مش قد الإدارة و على رأى أبو شريف "حاسب عليه أنا غلبان"

ياه ... صحيح ... ده أبو حلاوة في الإدارة ... أنا مش واخد بالي ....

خلاص يا أبو حلاوة ... لا مفيش حاجة ....

false alarm .... عيال بتهزر ....

[crossfield]

أعزائى:

فلنواصل المسيرة:

إجرى جرى الوحوش غير رزقك لن تحوش

أحب الناس و اكره كلامهم

أراك عصى الدمع شيمتك الصبر

أروح لمين

أحلاهم

احذر خطأ الغير

اسعى و صلى على النبى

اقولك ايه عن الشوق يا حبيبى

الإسماعيلى بطل افريقيا

البطل الرومانى

الحب جنان و جنان

الحسود لا يسود

الزمن أحسن معلم

الضحك من غير سبب قلة أدب

الطشت قلى...الطشت قلى

العتبة جزاز

الغش حرام...وكل البضاعة حلال

الفاتحة لحضرة النبى

الكلمة الحلوة و الابتسامة العريضة تصنع المعجزات :D :D

الله أكبر يا أبو النيل

المحروسة

المعدة بيت الداء و الحمية رأس كل دواء

الورد مش للى زرع الورد للى جنى

أما نعيمة نعمين

ان خلص الفول أنا مش مسئول أما الطعمية كباب مأكول

أنا فى الهوا غلاب

أوحش الوحشة العجب(؟؟؟)

بترول بلدنا

بحمد الله شاكرين

بطل نقل بقى(صباحه قرررررررررر يا سيدى؟؟؟؟؟؟) :lol:

حاسب يا مجدى احسن تضيع

حامدين

حرام عليك البعد ده

حرام عليك بص قدامك

دائماً فى المقدمة

زوبة

سامحنى يا بيجو

سولار بلدنا

سيارات النهر الخالد

سيرى على بركة الله

طوف و شوف

عايز تصيبنى أنا عملت فيك ايه :cry: :cry:

عزيزة علينا يا بلدنا

على عينى كرملة

على مهلك يا أبو سريع

غرباء على الطريق

فلسطين عروسة و مهرها الدم

فلسطين هترجع

فلفلة يا كايداهم

فواكه

فى حفظ الله يا نوسة

فى يوم فى شهر فى سنة تهدى الجراح و تنام

قاصد كريم

قطايف الحاج صبحى

قوللى آخر طريقك فين يا حلو ياللى ماشى

كايداهم لوحدى

كده شربات

كفاية يا عين

لا نوم و لا دمع فى عنيه

لهاليبو

ليك يوم يا ظالم

ليلى أخت طارق

ليلى بنت المعلم

ما زلت كايدة العزال(الجزء التانى من "كايدة العزال")

ما شاء الله عليكى يا هدى

مرحبا يا شباب

مع السلامة يا لولو

مع السلامة و القلب داعيلك

نظرة ياابو العباس

نظرة يا ست

نظرة يا ست حورية

يا دلع ادلع

يا اجمل هدية من امى و ابويا

يا أم المخلص خلصينى

يقينى بالله يقينى

و إلى اللقاء .

[Mohammad Abouzied]

اهو يا سيدي ها نقل موضوعك لباب الابتسام بس بطل قر عليا