لخبطه بتاريخ: 28 فبراير 2008 تقديم بلاغ مشاركة بتاريخ: 28 فبراير 2008 السودانيين نصفنا الأخر من تعاملي مع السودانيين لاحظت عليهم حاجات كتير منها انهم معتزين جدا ببلدهم ووطنهم الام فعلا بلاقي كتير أوي من السودانيين رغم مرور عشرات السنين على إقامته هنا إلا إنه مازال محافظ على لهجته وزيه لدرجة انه قابلت بعض السودانين الاصل بالفعل حصل على الجنسية السعودية ولسه بيتكلم بلهجته الاصلية ودي احنا كمصريين بنفتقر لها فعلا بتلاقي الواحد مننا له 5 شهور في السعوديه وبيتكلم سعودي حتى مع أهل بلده السودانين لو قابلوا بعض في أي مكان ( على كثرهم ) بيسلموا على بعض بحميمية زايده وبيعرضوا خدماتهم على بعض والسلام بيكون حتى بالطريقة السودانيه ( الضرب باليد على الكتف ) احنا بنعمل نسفنا مش شايفين أو نسوق التلاهي ونخلع لما نلاقي واحد مصري بل بعضنا لما يكون في موقع ما ويلاقي مصري جاي له يقلب وشه ويركبه ميت عفريت .. السودانيين نافذين جدا وشغال منهم كتير مع الأمراء ( مش عارف السبب ) لكن نفوذهم بيظهر في تخليص معاملات كتير لبعض وكتير من السودانيين المجنسين بيساعدوا أبناء جلدتهم بشكل كبير في عمل مشاريع بأسمائهم وكفالتهم ( نفس الشىء حاصل مع اليمنيين ) السعوديين بيحبوا السودانيين أكتر يعني يتحمل كسل السوداني وعصبيته ويبقا على قلبه زي العسل لكن مننا إحنا كمصريين بيقفوا لنا على الواحدة لدرجة إن المدرس السوداني أقل كفاءه لكنه محبوب وشغال زي الفل السودانيين بيحبوا المطار القديم ( منطقة فاضية في وسط جدة كانت مطار واتلغى ) بشكل غريب يعني سهرات الخميس فيه واعياد الميلاد فيه والأفراح فيه وهما عباقره في الموضوع دا صراحه لانهم بيعملوا الفرح في الشارع ويوفروا مبالغ كبيره أوى تدفع لصالات الأفراح هنا وتلاقيهم واقفين يستقبلوا المعازيم ومن السهل أوي تلاقي سوداني بيعزمك على فرح ابنه من غير ما يعطيك عنوانه والسبب أنه منطقي أنك عارف أنه على منطقة المطار طوالي هتلاقي لامه وناس قاعد تاكل تعرف أنه الفرح دا هو ذاته . السودانيين عندهم اجتماع شبه دوري مش عارف مسمى التجمع بس موجود ويبدو إن السفاره لها دور في الموضوع وخلال اجتماعتهم دي بيكون في تواصل كبير مع الوطن الام ومشاركته آلامه وأماله. السودانيين أكتر شعب في الكون بيحلف بالطلاق مش عارف اتعلموا العادة الزفت دي منين :rolleyes: 95 % من السودانيين اللى قابلتهم بيحبوا المصريين( على عكس اللى ممكن تسمعه من المصريين ) ويتكلموا لهجتهم ويعشقوا أفلام عادل إمام ويعرفوا مناطق القاهرة أكتر مني السودنيين مسيطرين على بعض النشاطات التجارية منها المكتبات ( بس موظفين لأنها مريحه ) الخردة ( التشليح ) مواد البناء ، سيارات النقل الثقيل ، مكاتب العقار ( مكاتب بيع العقار ) خلال 10 سنين تقريبا ما قابلتش سوداني حلاق ( حد قالى أنه عيب عندهم ) ولا سوداني شيف في مطعم ولا سوداني في محل حلويات أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
semsema بتاريخ: 28 فبراير 2008 تقديم بلاغ مشاركة بتاريخ: 28 فبراير 2008 السودانيين نصفنا الأخر السودانيين بيحبوا المطار القديم ( منطقة فاضية في وسط جدة كانت مطار واتلغى ) بشكل غريب يعني سهرات الخميس فيه واعياد الميلاد فيه والأفراح فيه وهما عباقره في الموضوع دا صراحه لانهم بيعملوا الفرح في الشارع ويوفروا مبالغ كبيره أوى تدفع لصالات الأفراح هنا وتلاقيهم واقفين يستقبلوا المعازيم ومن السهل أوي تلاقي سوداني بيعزمك على فرح ابنه من غير ما يعطيك عنوانه والسبب أنه منطقي أنك عارف أنه على منطقة المطار طوالي هتلاقي لامه وناس قاعد تاكل تعرف أنه الفرح دا هو ذاته . اموت واعرف ايه السبب في حبهم للمكان ده.........انا عن نفسي مش بحبه ومسمياه مثلث برمودا :rolleyes: السودانيين أكتر شعب في الكون بيحلف بالطلاق مش عارف اتعلموا العادة الزفت دي منين بقى دا سؤال............من جيرانهم طبعا رابط هذا التعليق شارك المزيد من خيارات المشاركة
semsema بتاريخ: 28 فبراير 2008 تقديم بلاغ مشاركة بتاريخ: 28 فبراير 2008 كنت عايشة قبل كدا في الباحة وكان عندنا جيران سودانيين عندهم عادة غريبة اوي......كانوا يجيبوا فحم ومش عارفه ايه ويدخنوا (اقصد يعني يخلوا البيت فيه دخان) لاحظت انهم دايما يعملوا كدا وكنت صغيرة فمرة بابا وماما مش كانوا موجودين واتفقت انا واخويا نجرب.......وفعلا جربنا ندخن و.....بعدين اللي حصل حصل بقى :rolleyes: رابط هذا التعليق شارك المزيد من خيارات المشاركة
deemuck بتاريخ: 28 فبراير 2008 تقديم بلاغ مشاركة بتاريخ: 28 فبراير 2008 السودانيين نصفنا الأخر من تعاملي مع السودانيين لاحظت عليهم حاجات كتير منها انهم معتزين جدا ببلدهم ووطنهم الام فعلا بلاقي كتير أوي من السودانيين رغم مرور عشرات السنين على إقامته هنا إلا إنه مازال محافظ على لهجته وزيه لدرجة انه قابلت بعض السودانين الاصل بالفعل حصل على الجنسية السعودية ولسه بيتكلم بلهجته الاصلية ودي احنا كمصريين بنفتقر لها فعلا بتلاقي الواحد مننا له 5 شهور في السعوديه وبيتكلم سعودي حتى مع أهل بلده هذه الجزئية فكرتني بموضوع كتبته تحت عنوان عتاب على المغتربين المصرين الحلقة الثانية واشرت فيه ان اغلب المصريين بشكل عام يلجئون الي اللهجة السعودية بدلا من المصرية مجرد تأييد لرأيك قلبك عربية تاكسي ....................... ماشي فالحب عكسي عمال يدهس حبايب ....................... ولا بيسمع كلاكسي عواطف سيد التاكسجي رابط هذا التعليق شارك المزيد من خيارات المشاركة
لخبطه بتاريخ: 28 فبراير 2008 كاتب الموضوع تقديم بلاغ مشاركة بتاريخ: 28 فبراير 2008 منوره الموضوع استاذه سمسمه وشكلك جداويه صميمه بخصوص المطار القديم هو فيه كذا ميزه ( زي كرانشي كدا ) أولاً قريب من وسط البلد وكمان مش زحمه ولا فيه الرخامه اللى ممكن تقبليها في البحر أو حتى أبحر الشماليه والجنوبيه وهو مكان مناسب جدا للشوي انا شخصيا طلعت مع الشباب اكتر من مره لما كنا بنحب نشوي بخصوص البخور بتاع السودانين اسمها الدلكه أظن أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
لخبطه بتاريخ: 29 فبراير 2008 كاتب الموضوع تقديم بلاغ مشاركة بتاريخ: 29 فبراير 2008 والله استاذ deemuck انا شخصيا بتكلم لهجة سعوديه في أغلب تعاملى مع الناس لكن الناس السعوديين لانه فعلا فيه فايده كبيره انه بيوصل المعلومه في وقت أقل كتير من انك تكلمه مصري و مع ذلك انا بشوف انه دا عيب كبير وبحاول فعلا اقلع عن العادة دي أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
badroora بتاريخ: 29 فبراير 2008 تقديم بلاغ مشاركة بتاريخ: 29 فبراير 2008 (معدل) لاء يا جماعة انا مش شايفة ابدا ان عيب اننا نتكلم لهجة خليجية ولا دا يتعبر تقرب منهم بالتخلى عن لغتنا . كتير جدا خليجين يتحدثون لهجتنا المصرية بل يعشقوها عشق وبيتعلموها من خلال التليفزيون ومابيصدقوا يقابلوا اى حد مصري ويتكلموا معاه . موضوع اللهجة يتوقف على حسب انت بتتعامل مع مين يعنى مثلا انا فى المشتسفي اللغة الاولى عندنا هى الانجليزية فى النحدث مع بعضنا اقصد كزملاء او فى الشغل لكن مع المرضي الوضع بيختلف . فى كتير جدا مرضي وخصوصا كبار فى السن مش بيفهوا معظم كلمتنا فتلاقينا بنحاول على قد مانقدر سواء اجانب او مصريين اننا نتعلم الكلمات المشهورة عشان نقدر نتعامل بها مع المرضي . وحتى كمان المستشفي عندنا عاملين كورسات لغة عربية بحرينية خاصة للاجانب وفيه كورسات لغة هندية بسيطة لغير الهنود كمان لان معظم المرضي ياهنود يا خليجين . فاشوف بقي كام مريض بتتقابل معاه خلال ال12 ساعة ولمدة 10 دقايق مع كل مريض بس بتتحدث باللغة الخليجية فغصب عن اى حد فينا انه بيخلط بين لهجتنا المصرية واللهجة الخليجية وانا شايفة ان دا مش عيب ولا فيه تقليل لانتمائنا للغتنا . واللى خلانا بنتكلم انجليزى ومش شايفين انه مشكلة مابلك بقي لغة عربية شقيقة افتكر مرة مريض خبطنى 3 كلمات وراى بعض وكنت متنحة وقالى هو انا بتكلم هندى قالى ممكن افتح الدريشة تنحت دخل على بالتانية قالى عاوزة بانكه ومردتش قالى ايش فيج اتحاجى هندى انا ولا شنهوا . وجت زميلة هندية اتكلم معاها بالهندى لاننا طبعا عارفين ان معظم الخليجين يجيدون الهندية المهم المريض فكرنى مش عربية عشان مفهمتهوش . فكان لازم اتعلم عشان اعرف اتفاهم معاهم بالمناسبة دريشة يعنى شباك وبانكة يعنى مروحة تم تعديل 29 فبراير 2008 بواسطة Badria Mekkawy A liberal is a man or a woman or a child who looks forward to a better day, a more tranquil night,and a bright, infinite future . رابط هذا التعليق شارك المزيد من خيارات المشاركة
se_ Elsyed بتاريخ: 2 مارس 2008 تقديم بلاغ مشاركة بتاريخ: 2 مارس 2008 عايز أعلق على نقطتين في الموضوع ده : 1- أتفهم جيداً سبب التحدث بلغة خليجية بين المصري مثلاً والخليجي لإيجاد وسيلة للتفاهم خصوصاً مع كبار السن او البدو لإن التعامل اللغوي معاهم صعب ... اما الفئات الأخرى فيفهمون لهجتنا أحسن مننا .... لكن لا أرى مبرراً إلا عفواً - عقدة النقص- عند مصريين يتحدثون مع أبناء بلدهم بلهجة خليجية ..... طب ليه وعشان إيه ؟ نقول كلمة أو مصطلح أو إتنين ... ماشي إنما حوار كله خليجي ... ده شيء مش مفهوم اللهم إلا لو الإنسان ما لوش جذور من أساسة ... ده بالنسبة للتحدث ... أما الكتابة بلهجة خليجية ... فحدث ولا حرج وساعتها اللي بيعمل كده يبقى لازم يروح ياخد له جلستين كهربا 220 عشان يتعالج يمكن الفيوزات ترجع زي ما كانت او تضرب خالص ونبقى أرتحنا . 2- بالنسبة لحب الخليجيين للسودانيين وخصوصاً السعوديين فتحب تسمع الأسباب من السعوديين أنفسهم وهي : 1- السوداني مش مجادل وقليل الكلام بطبعه .. تقوله يمين يروح يمين .. تقوله شمال يروح شمال وطبعاً السعودي مش هايقوله يمين أو شمال عشان سواد عيونه لكن عشان يؤدي عمل معين ... وأتحدى لو العمل ده تم إنجازه في وقته أو إنجازة من أصله وهذا ينطبق على معظم الإخوة السودانيين الطيبين لكن قلة إنتاجهم يعوضها مهاودتهم وطيبتهم . 2- تسمع من الخليجي إن المصري بتاع مشاكل ... عارفين ليه ؟ وأقسم بالله هذا ما أراه بعيني ... ييجي صاحب العمل او المدير السعودي يكلم إتنين محاسبين .. واحد مصري والأخر سوداني يقول للمصري عايزك تظبط الميزانية والديبيت يبقى كريديت والكريديت يبقى ديبيت ... وبالنسبة لمخصص الإهلاك فخليه ديون معدومة وروشنه ... طبعاً أي محاسب محترم وعنده ذرة كرامة هايقول له : مامتك في العِش ولا طارت ؟ ... مستحيل طبعاً ودي جريمة محاسبية ... - السوداني هايهاود السعودي ويعمل كده وفي الاخير تحصل كارثة وولا هايبقى في دماغه .. أنا هاحكي موقف كده عشته وشوفته أو ما وصلت السعودية وكنت اعمل في أحد البنوك والمفروض إحنا جايين من الإدارة الرئيسية نفتش على نظام الأرشفة والملفات وكان المسئول عن الملفات شخص سوداني وفي أول جلسة صور لنا الأمور إن إحنا هانبقى في أرشيف مكتبة الكونجرس وكل شيء تماما وهاتفاجئوا بنظام ما يخرش الميه وبعد جلستين تلاتة فوجئنا بالأخ السوداني إختفى وتركنا للمجهول وعرفنا إنه كان بيخطط لنزول اجازته السنوية ولم يذكر لنا ذلك من بعيد او قريب ونزلنا الأرشيف وفوجئنا فعلاً بنظام هائل يفكرك بأنظمة العصور الوسطى وحسينا إننا داخلين كهف او مغارة نن بتوع توت عنخ امون اللي ما أتفتحتش من مئات السنين من كثر العنكبوت والتراب اللي فيها ... لكن بصراحة اخدنا منه طيبة وحلاوه لسان 10/10 لكن شغل ... تعيش إنت يا حاج .؟.. وخد عندك بقى عشرات المواقف معهم ... ويبقى أنت هايجيلك شلل نصفي من ضغط الشغل وعصبيتك وغيرتك عالشغل وهو حاطط أعصابة في كمية تلج من بتوع الإسكيمو اللي جايين من بلدهم عدل ...... واتحدى تلاقي واحد سوداني رُفيع أو نحيف بعد 5 سنين من وجوده في الخليج ... ولكن بروده وتنفيضه بيخلوه يتخن ويربرب ... وعشان كده في شغلانات محتكرينها من بابها ومنها فعلاً المكاتب العقارية حيث إنه بيقعد طول اليوم ما فيش زبون بيدخل له .. كمان شغلانة إدارة مؤسسات نقل الأثاث والسيارات وتلاق يمنهم مئات قاعدين قدام المحلات بيقزقزوا لب - آه والله العظيم - عندنا هنا في منطقة إسمها البطحاء مكان إسمه الحراج يعني سوق الحاجات القديمة عامة وفيه محلات لأثاث وادوات منزلية وكهربائية جديدة برضوا ومحلات مشهورة وفي داخلة عشرات المكاتب بتاعت شحن العفش وتشوف هناك منظر غريب لناس مترصصه قدام المحلات وبيكلوا كمية لب تكفي مديرية ما بالك بقى في العمل مع الامراء اللي المفروض إنه لو قالك إن الشمس تشرق من الغرب ... المفروض تقوله : سم طال عمرك وحاضر ونعم ... وهذا ما لا يستطيع أن يفعله المصري .. لكن يفعله السوداني ويزيده من الشعر بيت إن الشمس ساعات كمان نصها بيطلع من الغرب والنص التاني بيتمخطر ويطلع من الشرق على مهله يا طويل العُمر .. ملحوظة : انا من أشد المعجبين بالشخصية الإنسانية السودانية ولدي عشرات الأصدقاء هنا وفي مصر ولا أخفي عليهم تلك الإنتقادات التي يؤيدوها وبيزيدوا عليها كمان بضحك أشياء أخرى. الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
badroora بتاريخ: 2 مارس 2008 تقديم بلاغ مشاركة بتاريخ: 2 مارس 2008 (معدل) - عقدة النقص- عند مصريين يتحدثون مع أبناء بلدهم بلهجة خليجية ..... طب ليه وعشان إيه ؟ نقول كلمة أو مصطلح أو إتنين ... ماشي إنما حوار كله خليجي ... ده شيء مش مفهوم اللهم إلا لو الإنسان ما لوش جذور من أساسة ... ده بالنسبة للتحدث ... أما الكتابة لهجة خليجية ... فحدث ولا حرج وساعتها اللي بيعمل كده يبقى لزم يروح ياخد له جلستين كهربا 220 عشان يتعالج يمكن الفيوزات ترجع زي ما كانت او تضرب خالص ونبقى أرتحنا . ياه هى عقدة النقص انك تتكلم خليجيى :Exclam: ؟؟!! ليه يعنى احنا هنا كمصريين بنتكلم مع بعض خليجي من باب الدعابة ليس الا عمرنا ماخطر ببال حد فينا انها نقص او بنتمسح بالخليج الواحد يتمسح بلغة عدلة شوية ممكن ترفعه مش تنزلة لسابع ارض مع كامل احترامى للاخوة الخليجين ولغتهم . يا جماعة الموضوع ابسط من كدا بكتير مش اللغة اللى هتحدد انتمائنا بلاش الشكليات دى وحيات باباكم يلا يعطيكم العافية جميعا :D تم تعديل 2 مارس 2008 بواسطة Badria Mekkawy A liberal is a man or a woman or a child who looks forward to a better day, a more tranquil night,and a bright, infinite future . رابط هذا التعليق شارك المزيد من خيارات المشاركة
se_ Elsyed بتاريخ: 2 مارس 2008 تقديم بلاغ مشاركة بتاريخ: 2 مارس 2008 يا أيها الذين أمنوا لا تقربوا الصلاة ... إنتي قرأتيها كده يا بدريه ... صح ؟ الله يكرمك كملي كلامي وما تقتطعيش جزء منه لا يروق لكي أنا قولت بالحرف الواحد وبلغة عربية سليمه لكن لا أرى مبرراً إلا عفواً - عقدة النقص- عند مصريين يتحدثون مع أبناء بلدهم بلهجة خليجية ..... طب ليه وعشان إيه ؟ نقول كلمة أو مصطلح أو إتنين ... ماشي إنما حوار كله خليجي بالله عليكي لو وإنتي في المستشفى ولقيتي واحد بحريني بيكلم واحد بحريني زيه بلغة مصرية عاميه صرفه .... هل ده هايبقى شيء طبيعي بالنسبة لك ؟ يلا يعطيكم العافية جميعا الله يعافيكي يا بدريه :Exclam: الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
رمضان بتاريخ: 2 مارس 2008 تقديم بلاغ مشاركة بتاريخ: 2 مارس 2008 يا اخت بدرية طبعا لما اتنين مصريين يتكلموا مع بعض خليجي يبقى عندهم عقدة نقص **** خرج الثعلب يوما في رداء الواعظين ومشى في الأرض يهذى ويسب الماكرين رابط هذا التعليق شارك المزيد من خيارات المشاركة
إيزيس بتاريخ: 2 مارس 2008 تقديم بلاغ مشاركة بتاريخ: 2 مارس 2008 بصراحة أنا موضوع اللهجة ده مشكلة بالنسبة لي عايشة في الإمارات منذ أكتر من 10 سنوات ولا يمكن أعرف ولا أحاول أتكلم بلهجتهم بافهم كلامهم أيوة لكن ولا أي لهجة تانية أعرف أتكلمها يمنك ماحاولتش أو مش شايفة سبب لأن الكل بيفهم مصري يعني أتعب نفسي بكلام غريب ليه؟ المشكلة الكبرى مع الهنود و الجنسيات اللي مايعرفوش إنجليزي ولا عربي بنتكلم لغة آسيانجلعربية تحفة لو حد سمعنا يموت من الضحك السودانيين لاحظت عليهم حاجات كتير منها انهم معتزين جدا ببلدهم ووطنهم الفكرة دي سليمة بيعتزوا ببلدهم بشكل مبالغ ويتسم بالتحفز والحساسية و أغلب المصريين عندهم عكسها وبكل أسف بشكل بمالغ فيه ودي ثقافة جديدة من 10 سنين تقريبا كان الوضع غير احنا ماعندناش وسط فريق شايف إن مصر فوق الكل بشكل حاد وفريق العكس قُل لَّوْ كَانَ الْبَحْرُ مِدَادًا لِّكَلِمَاتِ رَبِّي لَنَفِدَ الْبَحْرُ قَبْلَ أَن تَنفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا رابط هذا التعليق شارك المزيد من خيارات المشاركة
لخبطه بتاريخ: 2 مارس 2008 كاتب الموضوع تقديم بلاغ مشاركة بتاريخ: 2 مارس 2008 الموضوع أخد منحى تاني ياجماعة لكن على أيه حال نكمل الحوار انا شايف أن /بدرية متقفة معاي ومعاك ياسي السيد في جزئية أننا لو تطلب التعامل مع سعوديين وخصوصا زي ماتفضلت ( تكون بدوية لا تعي الكلام المصري ) لو دا حصل فلا حرج أبدا أننا نتكلم لهجة خليجية بل هتكون شطارة لو قدرت توصل المعني للشخص المخاطب ،، لكن فعلا عقدة النقص دي أنا متفق معاك ،، فيها أنا تعرضت لموقف مع واحد مصري كان من أزبل المواقف اللى تعرضت لها هنا الموقف كان انه واحد صاحبي اشترى تأشيرة من مصر وجه نزل جده علي ومعاه رقم تليفون وكيل كفيله اتصلنا بالراجل وكان في منتهى الفظاظه بل الوقاحه وهو بيكلمنا سعودي صرف لدرجة اننا ظننا أنه الكفيل نفسه وطبعا انا صابر أنا وصاحبي لأن رقبة صاحبي في أيده وطبعا قعدنا نحايل فيه ونهنن فيه لغايه ما حدد لنا موعد نقابله فيه ولما قابلناه كانت المفاجأه انه مصري الغريب انه حتى لما قعدنا معاه أصر على الحديث باللهجه كامله ويبدو أنه قديم لانه كان جايبه صح ( الموقف دا كان أحد الحاجات اللى كرهتني في فكرة كلام المصريين باللهجة الخليجية ) ايه بقا رأيك بدريه كدا يبقا هزار ويبقا عادي ما تبقاش عقده نقص فكرة ذكر لفظ أو لفظين على سبيل الهزار دي كلنا بنعملها ومش دا اللى قصدناه وأنا وسي السيد أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
إيزيس بتاريخ: 2 مارس 2008 تقديم بلاغ مشاركة بتاريخ: 2 مارس 2008 افتكرت حكاية خاصة بالسودانيين أول ما وصلنا الإمارات أجرنا فيلا 5 غرف لسبب إن مفيش وقت للبحث عن شقة صغيرة مناسبة فقلنا أهي نكمل السنة وربنا يفرجها بعد حوالي 4 شهور وجدنا شقة صغيرة وحبينا ننقل لأن الفيلا مالهاش لزوم أبدا على زوج و زوجة و حتة طفلة مفعوصة لكن دافعين سن مقدما فلازم نجيب بديل يكمل اتفقنا مع أسرة سودانية و كنت مستغربة لأنهم كانوا عيلة من 4 أفراد والفيلا كبيرة واحنا مالنا ...رحنا لصاحب البيت ولا يمكن يوافق و قال لزوجي مجنون أنا أعطيها لسوداني بعد يومين تلاقي عشرين من أهله معاه وفهمنا إن السودانيين كل ما حد ينزل البلد يستضيفوه أد سنة لحد ما يستقر قُل لَّوْ كَانَ الْبَحْرُ مِدَادًا لِّكَلِمَاتِ رَبِّي لَنَفِدَ الْبَحْرُ قَبْلَ أَن تَنفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا رابط هذا التعليق شارك المزيد من خيارات المشاركة
لخبطه بتاريخ: 2 مارس 2008 كاتب الموضوع تقديم بلاغ مشاركة بتاريخ: 2 مارس 2008 (معدل) سبب حب السعوديين للسودانين سي السيد ذكرت 3 أسباب الأول أن السوداني قليل الكلام والجدل - ودي ميزه - ودا فعلا سبب أساسي وانا للموضوعيه بشوف أنه عيب كبير فينا الكلام الكتير وعمل البحر طحينه والمناقشة في كل حاجه ،، لكن السبب الثاني إللى هو تمشية الحال طبعا واقعي بردو لكن مش بس السودانين اللى بيمشوا حالهم كتير من الجنسيات كدا . منور أستاذ رمضان اتفق معاك منوره مدام قرنفل فيه جزئية يمكن انا مش قولتها لكن اظن الكل يعرفها وهيا انه قد لا يتطلب عمل بعضنا التعامل مع أهل البلد بشكل كبير أو مكثف ودا بطبيعه الحال هيؤدي لعدم تكلمه اللهجة او حتى محاولة تعلمها لكن اللى زي حالتي بتعامل مع 200 واحد في اليوم فدا بيعلمنا اللهجة شئنا أم أبينا وفهمنا إن السودانيين كل ما حد ينزل البلد يستضيفوه أد سنة لحد ما يستقر شديد التعليق ضحكتني الله يسعدك تم تعديل 2 مارس 2008 بواسطة لخبطه أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
badroora بتاريخ: 2 مارس 2008 تقديم بلاغ مشاركة بتاريخ: 2 مارس 2008 (معدل) يا أيها الذين أمنوا لا تقربوا الصلاة ...إنتي قرأتيها كده يا بدريه ... صح ؟ الله يكرمك كملي كلامي وما تقتطعيش جزء منه لا يروق لكي أنا قولت بالحرف الواحد وبلغة عربية سليمه لكن لا أرى مبرراً إلا عفواً - عقدة النقص- عند مصريين يتحدثون مع أبناء بلدهم بلهجة خليجية ..... طب ليه وعشان إيه ؟ نقول كلمة أو مصطلح أو إتنين ... ماشي إنما حوار كله خليجي بالله عليكي لو وإنتي في المستشفى ولقيتي واحد بحريني بيكلم واحد بحريني زيه بلغة مصرية عاميه صرفه .... هل ده هايبقى شيء طبيعي بالنسبة لك ؟ يلا يعطيكم العافية جميعا الله يعافيكي يا بدريه gjy:: لا والله مش كدا انا بس معترضة على كلمة نقص اصل نقص دى معناها انك بتكمل نفسك بلغة اعلى من لغتك . طيب ايه رايك بقي فى واحد بحرينى كان مريض عندنا وبيكلمنى مصري صرف بكسر الصاء وبعدين بقوله حضرتك مصري قالى لاء بس معى جنسية مصرية mf_p: قولتله ازاى قالى اصلي درست بمصر فى الجامعة 5 سنين واعتبرت نفسي مصري :D . بس بصراحة وبجد لما بلاقي حد مصري جاى ولابس لبس خليجي وبيكلمنى كلمة خليجي وكلمة مصري ببقي مش طايقة ابص فى وشة مع انى معظم الوقت كلامى انا مخلط . عموما حصل خير :Exclam: ******* تم حذف بعض الكلمات من مداخلة الأخ رمضان الأصلية سي السيد تم تعديل 2 مارس 2008 بواسطة se_ Elsyed A liberal is a man or a woman or a child who looks forward to a better day, a more tranquil night,and a bright, infinite future . رابط هذا التعليق شارك المزيد من خيارات المشاركة
رمضان بتاريخ: 2 مارس 2008 تقديم بلاغ مشاركة بتاريخ: 2 مارس 2008 *** تم حذف التعليق لحذف المداخلة نفسها سي السيد خرج الثعلب يوما في رداء الواعظين ومشى في الأرض يهذى ويسب الماكرين رابط هذا التعليق شارك المزيد من خيارات المشاركة
لخبطه بتاريخ: 11 مارس 2008 كاتب الموضوع تقديم بلاغ مشاركة بتاريخ: 11 مارس 2008 حتى هنا بردو طبقات لاحظت في المصريين اللى في جدة أنهم طبقات نبدأ التسلسل العمرة العمرة في ذهن أغلبنا هي النسك اللى بنؤديه في الحرم الشريف لكن في مجتمعنا الجدواي تحمل معني مختلف تماما لما تسمع كلمه عمره يجي في بالك أي جاي بطريقة مخالفه وبيجرى من الجوازات والطبقة دي عندها شويه أساسيات الأولى انهم جم بطريقة مخالفه لانه لم يكن متاح غيرها طريقة العمره سهله تأشيره عمره من مصر وخلعان هنا وطبعا لو اتكلمنا بالواقعية فهي طريقة زي الفل ( رغم أنها غير قانونية ) يعني في ظرف شهر يكون معاه اللى صرفه وزياده شويه وممكن الامور تضبط أكتر ويشتغل في مكان ويستقر ويبقا احسن من مية مقيم لانه مميز والسبب أنه لا كفيل ولا إقامة ولا إي حاجه يعني العمره دا مافيش عليه أي التزامات الظريف في الناس دي أنهم بيكونوا ظاهرين أوي وواضحين وبالخبره ممكن تطلعه من وسط ميه رغم أنه بيحاولوا التخفى أو عدم إظهار موضوع العمرة دا ، ليهم علامات بقا لا تخطأها العين أول حاجه أغلبهم ملتحين بعضهم للالتزام والبعض الاخر بيهيء له أنه اللحيه قد تكون حمايه له بحكم أنه في بلد بيحترم الملتزمين والبعض الأخر وضعه بيخليه يلتزم بمعنى انه في وضع مرعب فبيلجأ للدين والالتزام للاحساس بالأمان ، لبسهم واضح أوي ، بيروحوا يصلوا الجمعه يا أما في ترنج أو عبايه نوم وشبب بلاستيك أول ما يقابلك يتعرف عليك ويستأنس بيك وخصوصا لما يعرف إنك مصري وبعد أقل من نصف ساعه يطلب منك تأشيره أو إنك تساعده في الحصول على تأشيره و في الغالب أنته بتقولى حاضر وبتنسى الموضوع بعدها بدقيقه ،، بيقولك أن واضعه كان حلو أوي في مصر وانه كان شغال شغلانه كويسه وبيكسب كويس أمال ايه اللى جابك ياعم بالطريقة دي يقولك ظروف !!!!!!!!! يتبع أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
Scorpion بتاريخ: 20 مارس 2008 تقديم بلاغ مشاركة بتاريخ: 20 مارس 2008 فين يتبع يا عم لخبطة .... الموضوع ده عاجبني جدآ .. و المناقشات اللي فيه مخلياني عمال اعمل مقارنة ما بين التصرفات الأنسانية هناك ... و التصرفات الأنسانية عندي هنا... الاقي ان احنا المصريين طبعنا واحد في الدنيا كلها .. مهما كان المكان اللي عايشين فيه ... ياللا بقي .... بطل خبط دماغك في الكيبورد شوية و شغل صوابعك عليه .... wst:: كل اللي حيلتي زمزمية أمل... و إزاي تكفيني لباب القبر "صلاح جاهين" رابط هذا التعليق شارك المزيد من خيارات المشاركة
لخبطه بتاريخ: 27 مارس 2008 كاتب الموضوع تقديم بلاغ مشاركة بتاريخ: 27 مارس 2008 (معدل) عمي Scorpion بجلالة قدرة بيتابع موضوعي دا كرم ولا أحلم بيه وعلى أيه عمنا انا اسف على التأخير بس المودام والاولاد كانوا جايين من مصر وانشغلت معاهم نيجي للطبقة الثانية اللى هما بقا المحولين ( مش بتوع العمليات ) من عمرة لمقيم والعكس المحول من عمرة لإقامة هو شخص جه عمره وربنا كرمه بتأشيره نزل ورجع مقيم ودول لهم مجموعة من المواصفات أول حاجه بتلاقيه لسه عايش جوا العمره بمعني أنه ساكن في نفس السكن وفي نفس الشغل ونفس اللبس مع فارق أنه أول ما يقابلك مش بيسالك على موضوع التأشيره بيسالك عن حاجه ثانيه وهيا عمل استقدام لزوجته لأنه في الغالب بيكون جاي على مهنه أي كلام وبتمنعه من الاستقدام وانته بردو بتقوله أعرف واحد في الجوازات يخلصها وبعد ما بتقوم من معاه بدقيقه الراجل بتاع الجوازات بتاعك عربيه بتدوسه فبيموت الموضوع . النوعية دي متلزمين دينيناً بس أقل من العمرة يعني فكرة اللحية الكبيره بتختفي وبتظهر مكانها لحيه خفيفه خليجي ، كمان وهو عمرة كان نفسه يبقا مقيم علشان يعمل عمره كل يوم وطبعا بعد ما بياخد الاقامه بيتحول الشعور دا لشعور عادي يعني العمره في المواسم بس ( المواسم بنسبة لأهل جدة هيا رمضان وقبل النزول مصر وبعد الرجوع من مصر ) أغلب المجموعة دي مش بيشتغل عند كفيله يعني شاري تأشيره وشغال في السوق ومع كل تجديد يحصل التالي : يعطي لكفيلة 2000 ريال حق السنتين (لجيب الكفيل ) وكمان 1500 ( رسوم حكومية ) تجديد السنتين ، كفيله بعد كدا يحصل عنده خلط ويعتبر إن 3500 كلها لجيبه ويصرفها كلها ويضطر هو يدفع رسوم التجديد مره تانيه دا لو كان كفيله طيب لذلك لو قالك أن صارف على التأشيره لغاية دلوقتى 25 الف صدقه لانه بردو لو طلب من الكفيل أي خطاب تعريف بيكون ب 500 ريال ، كل أحلامه انه يكون معاه فلوس التجديد ولو قعدت معاه في أول سنة من وصوله هيقولك أنه مش مطول وان حلم حياته يجمع قرشين مش كتير يفتح بيهم ورشه أو يعمل مشروع صغير في مصر ويستقر بقا بدل الذل اللى هو عايش فيه ولو قابلته في السنه الثانيه هتلاقي الحلم دا تغير تماماً ويسألك عن حد كويس ينقل عليه كفاله بدل الراجل اللى هو عليه واللى غالباً بيكون مش من جدة وإنته هتقوله انك تعرف واحد كويس بيموت بعد كدا الواحد دا في الحلقة اللى بعد كدا .. المحول من الإقامة لعمرة طبعا دي حالة قد تكون غريبه( حتى على بعض المقمين ) بس موجوده الحالة دي بتحصل كتير مع الناس اللى جات بتأشيرات وحصل خلاف مع كفيلهم وفي الوضع دا بيهربوا من الكفيل ويبقا زيه زي العمره بيشتغل في السوق عادي وكتير منهم يجدد الاقامة بتاعته برشوه بدون علم الكفيل ويقعد المدة كلها مره واحد ووقت النزول ينزل ترحيل ودول بيكونوا تعبانين جدا وكارهين الدنيا كلها لانهم بيكونوا في وضع معلق ولا هما عمره ولا هما مقمين والشغل بيكون على قد المصاريف ولو قعدت معاه هيسألك على حد يروحه بدون ما يدخل الترحيل وإنته بردو هتقوله على صاحبك اللى في الجوازات واللي بيموت بعد كدا بدقيقه . تم تعديل 27 مارس 2008 بواسطة لخبطه أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان