طبيب ناجح بالصعيد أفكر فى الهجرة .. أشيروا على

[qenawy]

اولا يشرفني ان يكون هذا اول موضوع لي في هذا المنتدي الرائع والذي يبدو انه يتكون من خيرة ابناء مصر العظيمة باهلها وناسها

ادخل في الموضوع مباشرة

انا اخصائي امراض جلدية خريج طب عين شمس وحاصل علي دبلوما من سنة 2005 في الامراض الجلدية والتناسلية

لدي عيادة خاصة وشغالة تمام التمام اعمل في الصعيد بالمناسبة

متزوج واعول 3 اطفال ملائكة

لكن رغم كل هذا مخنوق من البلد خنقة سوداء ومدرك تماما ان مستقبل اولادي سيء جدا فيها لاسباب لا تخفي علي احد

وددت استشارة الجميع وطبعا انا متاكد ان هناك من سيستغرب لطلبي هذا وهو لو انت مكاني هل تفكر في الهجرة لكندا

اراها حلما رائعا للولاد ولي

مع العلم اني دخلي السنوي من العيادة واوعي يكون حد منكم تبع الضرايب لا يقل عن 90 الف جنيه قابلة للزيادة لان العيادة كل يوم في الطالع

وهنا فيي الصعيد تكاليف الحياة رخيصة نسبيا

يعني بوفر سنويا حوالي ستين الف جنيه وانا مرتاح جدا وبدون مجهود ضخم

قيمة ومركز في وظيفة ميري

ولكن بصراحة الكنز الذي املكه هو اولادي وللاسف التعليم سيء جدا جدا جدا

ورغم اجتهادي في تعليمهم انا وزوجتي الفاضلة الا ان الوضع التعليمي سيء جدا

هل اهاجر علما باني خلال عدة سنوات لن تزيد عن ست ساكون مليونيرا وانا طبعا بدات حياتي صبي ترزي ب 2جنيه في الاسبوع

يعني عصامي من الاخر

هل اترك كل هذا وادخل في اجراءات الهجرة

موضوع الصبر علي حال البلد وما اعرفش ايه اراه ليس من سماتي فاولادي اولا

وانا اعرف اني لو طلعت كندا مش هاشتغل دكتور لان يبدو ان الطريق الي ان اكون دكتور كندي صعب جدا جدا

عفوا لو ازعجتكم ولكن اضحي من اجل اولادي ام اعيش في مصر مهموما وطبعا لدي ايضا بعض الاسئلة الغبية فسامحوني مقدما

هل الدبلوما تجعل نقطي 22 ولا 20 وخصوصا انها دبلوما سنة واحدة

وهل ارفق صور فوتوغرافية وصورة من البطاقة مع طلب الهجرة ولا لا وبالنسبة الي العنوان البريدي هل انشيء صندوق بريد في البوسطة افضل ولا الجوابات بتوصل عادي من غير قلق واسف علي رخامتي

[مصري جدا]

أخي وزميلي

أنت في نعمه...ربنا يديمها عليك ويزيدك...وأنا معاك أن الحياة الأن في مصر حتي لو الواحد معاه فلوس صعبه ...لكن أنت قلت الحل بتاع سؤالك وسط كلامك وهو أن مستقبل أولادك هو محور أهتمامك علشان كده لو أولادك فيهم بنات ..يبقي تفكر كويس في موضوع الهجره ....وحتي لو أولاد{ وانا عارف أن الشعبه الكنديه في المحاورات حتحل دمي} برضه أعتقد أن الهجره مش حل ....ممكن تلاقي دراسه كويسه في مصر بس حتدفع لها هي ممكن ماتكنش متوفره لافي الصعيد ...بس ممكن تعملها ...مع مجموعة من أصحاب الأموال واللي عاوزين يعلموا أولادهم كويس ......أنا ابن خالي عايش في شرم الشيخ .....ومسجل أولاده في مدرسه فرنسيه هو وبعض اصحابه اللي عندهم اولاد وجايبين مدرسين من فرنسا يعني بأختصار ....ماتخليش الهروب الي الهجره والمجهول حل.....مدام عندك وربنا يرزقك كمان فكر في حل ممكن يتكلف بس ماتسيبش وطنك....وربنا يوفقك ....

[qenawy]

اشكر الاخ الفاضل مصري جدا علي رده السريع وبخصوص التعليم عندنا فانه حديث له شجون

بصراحة دمار في دمار لمستوي الاولاد الاذكياء انهم يعلمونهم الجبن والاتكالية والخنوع وقلة الادب حتي اني شخصيا صرت مكروها من المدرسين من كثرة الشكاوي التي احررها ضدهم وهي شكاوي اراعي ضميري فيها ولا اظلم احدا

مثلا المدرس يضرب الولد قلمين امام الفصل كله علشان مش قادر يشوف كويس المكتوب علي السبورة طيب الولد يا حبيبي myope خلقة ربنا وبنضارة

المهم لا تقلب علي المواجع

التعليم في مصر لا يهتم الا بالتلقين فقط ولا يستطيع ان ينجب اجيال تعتمد علي انفسها مائة في المائة قد تقول وما هو دور المنزل

دور البيت يتم هدمه يوميا كل ما ابني طوبة يهدوها

زهقت فعلا احاول ان اغرس فيهم الارادة والاصرار والتفكير المنطقي واصادق ابنائي وياتي التعليم الابتدائي ليسكب الدموع من اعينهم سامحوني انا بفضفض

فلوس ايه يا عم في البلد دي

انا لست سوداويا ولكن الصراحة اغور انا في داهية واولادي لا

وشكرا

[حسام يوسف]

السلام عليكم

يا دكتور حضرتك مش سوداوى

انت بتقول جزء من الحقيقة المرة

لويهمك رأيى خد الزمالة البريطانية

وقدم على كندا

لوهدفك الاول الاولاد

وهمايستاهلوا فعلا يبقوا الهدف الاول

[samehelassad]

دكتور قناوي تحية طيبة وبعد:

انا مقدم للهجرة من سنتين ونص والمفروض انشاء الله ان في المستقبل القريب يجيني الميديكال واخلص.

انا بشتغل في قطر ومرتاح فيها بس مش ابن البلد وبصراحة الخليج ياما تعيش فية على طول يائما يبقى مقلب كبير عشان هترجع مصر مش هتلاقي شغل ومش هتكون محوش فلوس تعمل مشروع حلو زي ماكانو بييعملو زمان.

شوف ياسيدي الهجرة مشروع جنسية محترمة وتخلي العالم كل يحترمك. وتاخد اعلى المرتبات لو اشتغلت باجنسية الكندية في اي حتة في العالم وليك حق الحماية وكل حاجة.

تانيا: الاولاد هيتعلمو احسن تعليم في العالم وهتبقى ثقافتهم وتفكيرهم احسن منك كمان بس هيبقو اجانب مصريين. ولو مركزتش معاهم هيضيعو من ايدك اقصد الانحراف والمخدرات والجنس والدين هيضيع دة لو لاقدر الله مركزتش. ولو ركزت اعرف امثلة مولودة في امريكا مش كندا كمان واحسن مننا. وطبعا كلة على الله.

ثالثا: لو محوش قرشين حلوين لية متعملش المعادلة وتاخد دكتور متدرب هناك وبعد تلات سنين بس هيبقى معاك احسن فلا واحسن عربية واكتر فلوس.

ومدام ابتديت حياتك صبي ترزي يعني بيتهيئلي تقدر تصبر وتقدر تاخد المعادلة وتقدر كمان تبقى مليونير فى سنة مش ستة بعد ماتاخدها.

وعلى فكرة انت مش هتخسر فلوسك في كندا في التلات سنين دول لا. دخلك كمتدرب يكفيك تفتح بيتك على قد الحال يعني لو معاكش فلوس مش هتشحت.

اوزن الامور انا لسة ماروحتش بس نويت اروح انشاء الله وربنا يستر ويديني على قد نيتي هحاول اعيش في مجتمع مسلم وجنب جامع وادخل ولادي مدارس اسلامية بس ربنا يحققلي اللي نفسي فية دة بس كل دة لو قدرت الاقي شغل جنب المنطقة دي والمدارس دي وربنا يكرم.

عاوز اقولك حاجة اخيرة (تغور مصر عشان ولادي ومستقبلهم وتغور كندا لو ولادي هيضيعو منني!!!!!!) احسبها كويس وصلي استخارة وتوكل على الله. اللتنين مخاطرة تقدر على كندا روح وارجع لو معجبكش الحال ومعاك الجنسية بعد تلات سنين وعيادتك في مصر موجودة وواحدة واحدة الزبون هيجي تاني. طلعت حلوة اكسر قلة ومترجعش. والله اعلم.

[megy]

السلام عليكيم

انا مقيم في كندا من حوالي 3 شهور والحمد لله الحياه جميله وسهله مقارنه بمصر والقرف الي في مصر.

موضوع الهجره بياخد 4 سنين فتوكل علي الله وابتدي فيه وعيش حياتك في مصر وبعد 4 سنين لما تاخد الفيزا ان شاء الله ممكن تاخد قرارك يا تكمل يا تخليك في مصر

[حلواني]

اهلا يا دكتور

ايه دا دكتور هجره ايه يا دكتور بعد ما عملت لنفسك اسم وحققت النجاح بعد تعب السنين

الهجره دي للشباب في مقتبل العمر بعد الجامعه بسنه ولا اتنين ولا لواحد مش عارف ينجح ويحقق طموحه

انما انت بسم الله ما شاء الله عندك كل اسباب النجاح تسيبه وتروح للمجهول ليه ...................

علشان الولاد الحل مش صعب قوي كدا شوف اقرب مكان ليك فيه مدرسة محترمه انجليزيه او امريكيه او كنديه وما اكثرها

في محافظات مصر حتي لو في القاهره وخد شقه جنبها واسكن فيها وقعد ولادك فيها حتي لو هاتروح لهم مرتين في الاسبوع

او افتح عياده جنبهم وشوشه شويه ها تمشي الامور بخطا مدروسه ليست فيها المخاطره الكبيره

ختاما اتمني لك كل التوفيق

[mozaboza]

انا مش عارف ليه اللي برة مصر يقولك دايما انه تعبان وخليك في مصر يا جماعه يا اللي برة لو هنا احسن وعندكم برة مصر اوحش اتفضلوا ارجعوا انا مش عارف لية الحكايه دي وبصراحه مش لاقي تفسير ليها

[ايهاب سالم]

يا دكتور

معروف إن كندا بها نقص أطباء حاد و اللي بيصبر و بيعمل المعادله .... بيعدي جامد و بيركب الصاروخ

أنا لما جيت كندا سألت أصدقائي عن طبيب مصري family doctor قريب نسجل عنده

دلونا على ثلاثه .. كلهم في محيط سكننا .. إخترنا الأقرب

طبيبه مصريه زي الملايكه .. و مش ملاحقه على الزباين ...و شهاداتها منوره الريسيبشن

دول مش أشطر منك و مصريين زيك و زيي

و برضه هتلاقي أطباء شغالين في محطة بنزين .. و بيلعنوا كندا

بالنسبه للتعليم أنا لو فضلت احكيلك عليه مش هتتصور مدى جودته

كل يوم بأحس إني عملت الصح لأولادي

يا راجل ده ناظر المدرسه وصل بنتي بعربيته في يوم لحد البيت عشان حصل مشكله للباص

و من يومين كانت حفلة ختام العام الدراسي و بنتي إستلمت جائزه ضمن 6 طلاب متفوقين فقط من المدرسه كلها و هذا هو عامها الدراسي الأول

و لا تسل عن جمال الحفل و فرحة الأطفال

هأنزل صوره لما يكون عندي وقت

و الله أنا فرحان إن لسه ف ناس بتفكر صح زيك

هاجر يا راجل

[capitshino]

انا مش عارف انت عايش فين - بس انا لو منك - كنت شوفت مدينة هادية وقعد فيها وبالنسبة للتعليم ده بيتوقف عالبيت. يعنى اعرف ناس كتير اتعلمو كويس وبقو محترمين رغم انهم من مدارس حكومة

عالعموم الله الموفق

[~Heba~]

هاجر زى ما قالك ايهاب سالم :wub:

بس خلى فى بالك هناك حتبدأ من الصفر و النجاح صعب لشدة المنافسة (كندا مش زى الصعيد)

ايهاب...بنتك عندها كام سنة

وياترى استأمنت مدير المدرسة عليه......مفيش تحرش بالاطفال هناك يعنى :blink:

[moheltohamy]

سيبوهولي الراجل ده يا جدعان...

د. قناوي أو جناوي زي ما بينطجوها...

بقى التعليم بس هوه اللي مش عاجبك في مصر؟ والصحة؟ والمرور؟ والأسعار؟ والتموين؟ والمباني؟ والشرطة؟ والقضاء؟ والسياسة؟ والنظام؟ والحرية؟ والأمان؟ والتلوث؟ والحب بين الناس وبعضها؟ ولا يمكن جوها الحار جاف صيفا ، دفئ ممطر شتاءً!

واحد محامي صاحبي قالها: البلد مش عارفين رايحة على فين!

هاقول لك حاجة أنا لمستها في كندا... أعصابك دايماً مرتاحة هناك. مش باتنشن وأعصابي بتتشد غير لما بارجع مصر!

باحس إن الناس هناك بتحب بعض... ما باحسش إن فيه عدوانية والناس مش طايقة بعضها غير لما بارجع مصر!

الهدوم دايماً نضيفة في كندا... ما بتتبهدلش وتتوسّخ غير لما بارجع مصر! :bro:

مش خايف على نفسك طول مانتا ف كندا... في مصر لو - لا قدر الله - جالك تيومَر ، هتبيع اللي وراك واللي أدامك عشان تتعالج صح ، وبرضه الله أعلم! (ومش محتاج أقول لك النظام العلاجي في مستشفياتنا عامل ازاي)

الأسعار في كندا عالية شوية (بس متناسبة مع الدخل هناك) ، والزيادات ف الأسعار منطقية ، وبنسب متوقعة كل سنة... الأسعار هنا قليلة (أو كانت) ، بس بيحصل لها جنون حالياً ، واللي بيعلى ما بينزلش ، ومفيش مبرر لارتفاعها أصلاً!

مفيش مشكلة إسكان في كندا... هنا بقى فيه مشكلة إسكان ، ومحدش قادر ع الأسعار ، والمباني كتيييير ، وأسعارها نااار ، وكلها محجوزة مقدماً ، ومحدش فاهم حاجة!

في كندا، ما بتشوفش أفراد البوليس في المعتاد (ممكن واحد تايه بيشيّك على الباركنج) ، أو عربية بوليس مشغلة السارينة ، و واخدة الشارع قص... هنا بقى ، تحس هنا إن فيه عداء بين الشرطة والشعب! ويا ويلك لو احتجت لهم في حاجة!

وبالنسبة لكندا ، إنتا ملاك نازل من السما ، لا بتكذب ولا بتسرق ولا تعرف العيب... هنا بقى ، إنتا متهم إلى أن يثبت العكس ، واثبت إنك ما عملتش! وان قالو للحرامي إحلف!

هناك كل حاجة ماشية بنظام ، والطوابير في كل مكان حتى في تيم هورتونز (مش كده برضه يا إيهاب؟)... هنا بأه مسخرة المساخر لو فيه طوابير! ومش محتاج أقول لك ع اللي بيحصل ، أنتا مننا وعارف اللي فيها!

المصالح الحكومية أتخن مصلحة ممكن تاخد ساعة ، وبتوصلك الأوراق ع البيت بالبوسطة... هنا بقى ، كنت دايماً بابتسامة عريضة ، أقول لبابا الله يرحمه كل ما يسألني إن كنت خلصت إجراءات الأجازة (هيا فيه حاجة ف الحكومة بتخلص)! وخلّصت الإجراءات بعد شهرين!!!

هناك أمن الناس له الأولوية ، والبوليس هناك عنيف جداً لو حد بيمثل خطر ع اللي حواليه... هنا بأه مفيش أي نوع من الإحساس بالأمان ، والبوليس نفسه ساعات ما بيعملش حاجة ، والبلطجية تلاقيه بيتلاشاهم! ماهو ظباط البوليس دول ليهم عيال عايزين يربوهم يا عم الحاج!

هناك كل حاجة نضيفة وصحية ، والأكل في نو فريلز زي ما يكون ناشيونال جيوجرافيك رايحين يصوروه (ولاّ إيه يا إيهاب؟)... هنا بقى قل لي إيه حواليك ما فيهوش تلوث؟! (الجو ، المبيدات ، مياه النيل ، بحر اسكندرية اللي د. الشامي راجع له :wub: ، الألبان ، الدم ومشتقاته ، ...)!

هناك الجو بارد جداً ف الشتا ، لطيف ممطر صيفاً (يمكن تورونتو فيها رطوبة بعض الأيام ف الصيف عشان موقعها بالنسبة لبحيرة أونتاريو) ، وعلى فكرة أنا كنت مستمتع جداً في درجة -29 ، آه والله... هنا بقى ، الجو الحار جاف صيفاً (كنا بندرسها كده والله!) ، فين الجاف ده؟!

واسمع إن الناس في كندا لبست شورتات عشان الجو بقى حر ودرجة الحرارة بقت 21! أروحش انتحر واخلص؟!

الناس هناك بتحب بعض بجد ، وبيتلككو عشان يساعدو بعض! والله بيتلككوا! هنا بقى ، ... قول انتا!

والأمثلة كتير ، وهاتكلم ف الموضوع ده قريب.

أما لو أساس الهجرة هيه إنك تعمل قرشين وترجع ، يبقى خليك في عيادتك ، هنا ممكن تحوّش فلوس ، أو اطلع الخليج ، دي اللي ممكن تجيب منها فلوس! الفلوس مش في كندا ، أو ع الأقل مش ف الأول ، ومش بسهولة.

الأساس من فكرة الهجرة إنك تكسب مجتمع تحبه ويحبك ، وتعيش فيه سعيد ومرتاح وآمن.

على أي حال ، هناك مش الجنة الموعودة... روح وجرب ، مش هتخسر حاجة! لكن نظام اللي تعرفه أحسن م اللي ما تعرفوش ، والبلد دي أحسن من غيرها... ده تهريج.

إمسك يا سيدي العصاية م النص ، ولما يكون ليك جنسية تانية معاك ، مش هتضرك ، ده بفرض إنك رحت هناك وكرهت البلد ، وده اللي أقدر أؤكّدلك إنو مش هيحصل (حسب فهمي لشخصيتك من كلامك - فيها كتير من شخصيتي بالمناسبة).

عموماً ، زي ما دايماً باقول لأصحابي ، كندا مش واقفة مستنية أبو الجناوي يفتتحها. wst::

الموضوع هياخد وأت. شوية ورق هترميهم ف السفارة ، وانساهم خااالص ، وامشي ف حياتك زي مانتا ماشي حالياً ، ولما السفارة تتصل بيك تقول لك تعالى عاوزينك ، ساعتها ابقى احسبها تاني!

لكن لو البلد حالها ساء أكتر ماهو سيئ اليومين دول ، يبقى فيه عندك بديل ، بدل ما ييجي يوم ، وتقول يا ريتني!

وأتمنى أكون قدرت أفيد... :blink:

هاجر زى ما قالك ايهاب سالم :lol:

بس خلى فى بالك هناك حتبدأ من الصفر و النجاح صعب لشدة المنافسة (كندا مش زى الصعيد)

ايهاب...بنتك عندها كام سنة

وياترى استأمنت مدير المدرسة عليه......مفيش تحرش بالاطفال هناك يعنى :sad:

مفيش الكلام ده هناك يا هبه... أو ، بمعنى أدق ، ما سمعناش عنه خالص! الحياه هناك أمااااان جداً ، يمكن عشان مفيش كبت :waf:

[qenawy]

اولا اشكر كل من رد واجهد نفسه معي

اولا الاخ الفاضل سامح الاسد كلامك منطقي وممتاز وخصوصا موضوع القلة حيث ان القلل دي بقي تبعنا ونملك مصانع انتاجها ملكية كاملة فالقلل القناوي registered mark

الاخ الفاضل حسام يوسف فعلا الاولاد هدفي الاول وانا ثانيا حتي لا اكون مدعيا

الاخ الفاضل حلواني لا توجد مدرسة جيدة بالنسبة الي الاولاد الاعلي بعد 700 كيلو يعني الموضوع عاوز هجرة داخلية مرفوضة حيث ان باسبور جمهورية الصعيد لدي افضل الف مرة من باسبور القاهرة بحكم العمل وبحكم كراهيتي الشديدة للزحام وجو القاهرة الخانق لذا فانه رغم وجاهة فكرة حضرتك الا ان الموضوع عمليا مستحيل

الفاضل موزا بوزا اعتقد ان الرجل رد بمنطق لسان حالي وليس حاله يعني بص الي ظروفي لقيها ممتازة اذا مصر افضل له من وجهة نظره والعكس بالنسبة الي ظروفه

الاخ الفاضل والكبير ويبدو لي انك عمدة في المنتدي هنا وفي كندا(اعلي رتبة عندنا في الصعيد نخلتين متقاطعتين ونسر) المهم

كلامك اثلج صدري

واشكرك علي دعمك المعنوي الهائل وتشجيعي وبالنسبة للعمل بقولك انا ابتديت صبي ترزي ومريت باغلب المهن البسيطة من ماركة صبي نقاش ونجار والذي منه

يعني ارميني في بنزينة عادي

المعادلة مخي مؤكسد اليومين دول وباين عليها صعبة اسافر الاول وان كنت طبعا لن اسكت وهاحاول اخد الجزء الاول من مصر بيقولوا انه ممكن من مصر وبعدين تفرج

المهم انه يبدو اني ساضع نفسي قريبا في اول الطريق

شكرا

الزميل كاباتشينو

الموضوع للامانة ليس تعليما فقط التعليم جزء منه والباقي افاض فيه الزملاء ما هو انا خريج مدرسة النقراشي الاعدادية والثانوية يعني تعليم حكومي لكن النقراشي النهاردة غير النقراشي زمان

حتي التعليم الخاص شفط فلوس فقط اريد تعليما ذو اصول تربوية وليس تلقين

شكر ايضا لهبة

واخير الفاضل التهامي

يبدو ان شخصياتنا فعلا متقاربة كلامك كله في الصميم وخصوصا موضوع البوليس نجن هنا مجرمون الي ان يثبت العكس

واقسم لك اني مثل كل المصريين بخاف اعدي قدام القسم زرعوا فينا الجبن منهم لله

طبعا بعدي وانتفش ولا يهمني حد لكن من جواي قلقان غصب عني رغم اني مسالم لاقصي درجة وده كمان مخليني اصر اني ابعد اولادي عن هكذا جو

شكرا للجميع ولا زلت منتظر اراءكم القيمة

حاسس اني زي المريض اللي معمول عليه كونسلتو لمصلحة المريض

لذا وجب الشكر للجميع

[Bassam El Sayed]

د قناوى

جايز كلامى مش هيفيد كتير لان الاخوة الاعضاء قبلى شرحوا وافووا كل الى هيتقال لكن انا هتكلم فى نقطة واحدة بس الا وهى تعليم اطفالك بناء عن خبرتى مع اقربائى فى كندا لهم اطفال فى مراحل سنية مختلفة ,

المشكلة مش فى التعليم للاطفال فقط يا دكتور المشكلة ان الحياة هناك فى كندا بتخلى تفكير الطفل حاجة تانية خالص بمعنى انها بترفع من مستوى ذكاءة جدا يعنى الاخ الى قالك ليا واحد قريبى مدخل عيالة مدرسة فرنساوى فى شرم الشيخ ولا ليها لازمة لانة هيطلع برة يتعامل مع ناس عاديين جدا هيتعامل مع عامة الشعب . انما هناك الحياة كلها فى المدرسة فى البيت فى الشارع فى كل حتة هيتعلم اسلوب للحياة تانى وانت وشطارتك تخلى اطفالك ياخدوا الحلو ويسيبوا الوحش

اقسم لك ان اطفال اقربائى الى فى كندا لما بينزلوا اجازة واتكلم مع حد فيهم والله اشعر انة اعلى منى ذكاء واحس انى امامه اقل ذكاء مع انة طفل.

توكل على الله وامشى فى الهجرة علم اولادك صح فى المكان الصح وسيبك من الى بيقلك الهجرة عايزة شاب فى مقتبل العمر لا ابدا انت راجل معاك فلوس ولله الحمد يعنى هتروح مش هتتعب وفلوسك تكفيك للدراسة والعيشة كمان.

وربنا يكرمك ان شاء الله

[qenawy]

شكرا للاخ الفاضل بسام السيد وانا علي قولك

علي فكرة موضوع الهجرة هذا ايضا ضرب وجداني وللامانة منذ زمن بعيد لاني ولست مطلعا علي الغيب رايت ان البلد ايامها حالها بيسوء لكن ما كان يمنعني اني زي ما قلتلكم كان دخلي 2 جنيه في الاسبوع :wub: وابتديت بمرتب عبقري 137 جنيه والله هو اللي كان حيلتي

فيييييييييييييييييييييييين لما استعدلت نفسي والامور سلكت

يعني اقصد ان موضوع هجرة الشباب الصغير جدا شبه مستحيلة الا اذا كان وارث

ولذلك لم يدب في اوصالي موضوع الهجرة ثاني الا عندما شعرت اني استطيع ان احققه واتمني في يوم من الايام ان افتح المنتدي للمداخلات هذه واقول ياه كانت ايام

عموما انتم بس استحملوني لانكم ستجدوا اسئلة في منتهي الغباء واستفسارات بتاعة طالب ابتدائي وليس دكتور

فمقدما اعتذر عن كل سؤال عبيط اساله

[Bassam El Sayed]

اسال يا دكتور واحنا هنجاوب ما تقلقش معانا ناس ماشية فى الهجرة جديد ومعانا ناس ماشية فى الهجرة بقى لها سنتين وتلاتة زيى انا كدة ومعانا الوحوش الى فى كندا واولهم ايهاب سالم

[qenawy]

اول الاسئلة العبيطة

بالنسبة للغة المقابلة انا افضل ان اكتب العربية مع اني كويس في الانجليزي بس اكيد هاقدر اعبر عن نفسي افضل باللغة العربية

السؤال ايهما افضل اكتب لغة المقابلة العربية ام الانجليزية وما هو انطباع ضابط السفارة عني لو كتبت اللغة العربية مش هيقول اكيد ما بيعرفش انجليزي كويس

الفكرة اني عاوز ارد بطلاقة بدون تفكير في التعابير والكلمات والتراكيب اللغوية والذي منه

[qenawy]

سؤال غبي رقم 2

انا حاصل علي دبلوم جلدية تناسلية والسؤال رقم 22 ما فيهوش سيرة دبلوما خالص هي كانت سنة واحدة من جامعة عين شمس وتعبت فيها بجد

دبلومة الجلدية في منتهي الصعوبة اعرف ناس سقطت فيها 11 مرة لكن الحمد لله انا عديت علي طول الخلاصة اكتب بكالوريوس في سؤال 22 وامري لله واخد 20 نقطة ولا اكتب ماجستير واسوق الهبل مؤقتا عشان رقمي يعدي 67 نقطة وبعدين اشرح للبيه الظابط ان الدبلوما شهادة محترمة post graduate وتعبت فيها

[qenawy]

وبخصوص اللغة الفرنسية اكتب basic ام none حيث اني لا اعرف من الفرنسي الا منهج سنة ثالثة ثانوي ولا اخد دورة في الفرنساوي واكتب basic وخلاص وطبعا هتبقي مصيبة لانه لو حد كلمني فرنساوي هاكلمه صعيدي

طبعا الاليتس مش ناوي اقدمها الا لما اجيب 7 فيها زي ما هو مطلوب واظن انها ليست صعبة بالدرجة

هافضي نفسي ليها قريبا

[جويرية]

أما مقدرش افيد حضرتك في موضوع الهجرة

بس ممكن اتكلم في موضوع تعليم الأولاد

أول معاملة المدرسين للأولاد دي بسبب قوانين التعليم السيئة يعني الكلام ده ممكن يبقي غصب عن المدرس

و الله المدرس معذور

لو ادوا للمدرس حق واحد بس

اللي هوه ان حضور الطالب للحصة او المدرسة ده شئ أختياري

ده حيحيل مشاكل كتير

كنت فاكرة دكتور في الجامعة كان أول ما يلاقي الطلبة عملوا دوشة يفتح باب المدرج و يقول اللي عايز يخرج يتفضل

المشكلة ان المدرس منزوع منه الحق ده

الطالب المظلوم بيقعد 8 ساعات عي كرسي خشب مش مريح اصلا في الجلوس ، ده غير الوسيلة التقليدية بتاعت السبورة و التلقين ، ده غير ان 8 ساعات دي كتيرة علي واحد كبير مش علي طفل

المهم

الطالب بقي مش عاجبه اللي بيحصل ده وعايز يخلص من الحصة بأي طريقة ، فيقعد يزق في زميله ، يتكلم مع اللي جنبه ، وطبعا الحاجات دي بتقطع تركيز المدرس في الفصل ، فلازم يسكت الطالب ده بأي طريقة ، وكمان عشان لو سكت لطالب حيلاقي الفصل كله بنفس الشكل ده ، وكدة باظت الحصة و بقت زي ماتش الكورة ، و ممكن ييجي ناظر المدرسة يديلوا كلمتين هوه في غني عنهم

فأتمني الناس اللي مسئولين عن التعليم يصدروا قانون يريح الطالب و المدرس ، ان من حق ولي الأمر او المدرس او الطالب نفسه عدم الألتزام بالحضور اليومي للمدرسة

أما الحل حاليا فمتهيألي

وده حل مش محتاج مدارس غالية و لا حاجة ، ممكن حضرتك تدي للأولاد دروس خصوصية عند مدرسين الفصل اللي بيدرسولهم ان شالله يكون في كل المواد ، و اسعار الدروس الخصوصية في الصعيد قليلة جدا ، حتلاقي الأولاد بيتعاملوا معاملة مختلفة تماما

لو حضرتك استقر رأيك علي عدم الهجرة

الفلوس في مصر ممكن تعيش الواحد كأنه في بلد هادية و مفيهاش زحمة و لا فيها مشاكل ، لو حضرتك بدخلك ده - ربنا يباركلك فيه - أمنت مستقبل الأولاد سواء بسكن او تعليم خاص فيما بعد أن شاء الله مش حيعانوا من أي مشاكل