ابنى مراهق

[كارمن]

السلام عليكم ورحمة الله وبركاتة\\ ياجماعة محتاجة نصايحكم للتعامل مع ابنى وهو فى بداية سن المراهقة وهو دلوقتى12سنة مجننى لوقلت شمال يقول يمين والى غايظنى انة بيعاندنى انا مش والدةلو قلت لة بمنتهى الادب بحكم طولة رحم الله امراْ عرف قدرنفسة ياحبيبى بلاش ترجع شعرك اوى مش حلو يرجعة اكتر طيب بلاش جيل هيبوظ شعرك يشترى اردء انواع الجيل لو سالنى وهو خارج البس اييييييةاقولة البس مثلا التى شيرت الاسود ميكدبش خبر ويلبس الابيض طيب مش هو اللى ساْل وبيتهمنى هو وباباة ان انا اللى بعاملة وحش مع انى ام كووووووول خالص بس بصراحة كل دة هين انما المشكلة الاكبر انة بيكلم بنات على النت واللى غايظنى ان كل كتاباتة انجليزى وانا اللى بدوخ فى الترجمة وانا طبعا مش سيباة كل صغيرة بسجلها على الايميل ولقيت خير اللهم اجعلة خير انة بيحب زميلة لة فى المدرسة وبيقول لها كلام مكنتش اتخيل ان القطة الصغيرة دى تعرفة افلام عربى على حق انامش عارفة اقولة مباشر ولا من بعيد لبعيد علشان ميعرفش انة مراقب واجيبها لة ازاى مع العلم انى شاغلة لة وقتة طول الصيففى انتظار ارائكم القيمة مش بس كدة تجاربكم ايضا

[se_ Elsyed]

الأخت كارمن .. كان الله في عونك لإن لديكي الان قنبلة موقوته في البيت ..

يُمكن نزع فتيلها وتبقى شمعة مضيئة

أو سكب النار عليها لتنفجر وتُدمر نفسها ومن حولها

أولاً لازم حضرتك تعترفي إن إبنك في مرحلة يريد أن يُثبت فيها ذاته وإن له شخصية مستقلة .... وده باين طبعاً من تصرفاته وموضوع خالف تُعرف اللي بيتبعه ..

وصدقيني العنف أو العند من جانبكم لن يأتي بنتيجة إيجابية ولكنه سيسبب حالة من العند المقابل لديه ...

عشان كده عليكي بالحوار ... ثم الحوار ثم الحوار

وعليكي بكسب ثقته وتخليكو أصحاب ويتلقى منك النصح والإرشاد بصفتك امه ومن ابوه برضوا .. بس بطريقة غير مباشرة ...

أنا هاحكي لحضرتك عن إبن أختي اللي في الصف الثالث الثانوي الأن وكان السنة اللي فاتت في الصف الثاني .. وكنت أنا في مصر ولقيت في بيت أختي قلق وقنابل وحريقة ومهرجانات وإنسان عنده طاقة زائدة عايز يدمر كل اللي حواليه

بالرغم من إنه ولد متفوق جداً وذكي جداً

المفاجأة إن والدته مدرسة ثانوي ... تخيلي ؟

ووالده كان مدرس لكن إتجه للمجال المالي .

ومع ذلك حتى وقت قريب كانوا يعاملوه على إنه طفل وإنه لازم يسمع الكلام من غير مناقشة وإن دوره فقط أن يتلقى الأوامر وينفذها بالحرف الواحد ..

بالمناسبة .. هو في مدرسة لغات ومختلطة وكان عنده اللي حضرتك بتقولي عليه ده وإن في بنات زميلاته ورايح جاي معاهم

وكانت الطامة الكبرى إن المُدرس بتاعه إتصل بالبيت ليُبلغ والدته إنه عمل خطأ بسيط معين في المدرسة ولازم تنصح الولد وتوجهه التوجيه السليم ..

ولإن والدته شخصيتها شديدة فقالت أخده على مشمه وأدبه من أولها ... فأنتظرته في الشارع لما نزل من الباص وراحت مواجهاه بالخطأ ده وراحت لطشاه عى وشه ... طبعاً زمايله وزميلاته شافوه ه وهو بينضرب وهو زي الشحط كده واطول من والدته بمراحل وبالتأكيد كان فيهم واحده بيحبها أو حاجه ومنظره بقى زبالة قدامها ..

ومن هنا كانت نقطة تحول في شخصيته وأصبح اكثر عنداً ... وتحولت القطة الوديعة إلى نمر شرس لا يستطيع أحد ان يقترب منه ..

وأقسم بالله قالها صراحة وأنا اتحدث إليه وقال لي : بص يا خالو .. من الأخر .. أنا من هنا ورايح هاعمل كل حاجه عكس ما يريدها أبي وأمي عشان أعرفهم أنا مين ... ومش رايح الإمتحانات كمان ...

فأضطريت أجيبه عندي البيت وقعد يذاكر عندي وده تقريباً كان في نص الاختبارات تقريباً ... وبما إن ما فيش فرق بيني وبينه إلا ييجي 20 سنة .. فيتعبر مش سن كبير قوي وأنا كنت زيه وأكتر فعرفت أقرب منه وأتحاور معاه وألبسه العمه ..

ووالله العظيم المواد اللي ذاكرها عندي جايب فيها أكبر مجموع لأني عارف إن مخه مازال مخ طفل وعرفت أكل به حلاوه ...

فلما كان ييجي عندي كنت أسيب له اللاب توب بتاعي .. ولإن شكله أول مره يشوف اللاب توب التابليت بي سي اللي بيتكتب بالقلم على شاشتة فالولد كان فرحان جداً وهو بيذاكر على الشيء العجيب ده ...

وكنت اخده معايا نتفرج على الماتشات لو في ماتش ونخرج نقعد على اي قهوة بره لما يخلص ونروح ونييجي مع بعض وأخليه يسوق العربية اللي أبوه حارمه من سواقت عربيته عشان لسه صغير ...

وأكبره وأخليه يقضي مشاوير مهمه ..

لدرجة كنت باعمل عمليه لإبني الصغير بنزع شريحة من أيده وكان هو اللي بيقوم بكل حاجه ..

وما أقوله الان والله العظيم حدث ..

فمع إنشغال الولد معايا لم يريد أن يذهب ليعرف نتيجته في الثانوية العامة وقال لامه : لأ انا رايح مع خالو المستشفى وإنتو إبقى إتصلوا بي وقولوا لي على النتيجة ...

فلما سألته : ليه كده ده كل العالم بيبقى عايز يعرف النتيجة من الكنترول حتى ؟

قال : مش فارقه معايا ... أنا متأكد إنهم عايزين يفرحوا بالنتيجة وانا مش عايزهم يفرحوا

ومع ذلك الجبان جاب 93 % لإنه شاطر ...

وحتى الان الولد قريب مني لإن لقى اللي يفهمه ويفهم عقله ويشاركه هواياته وهيافاته - من وجهة نظرنا نحن الكبار - .. مش بس كده .. ده عُمر إبني عنده 7 سنوات .. والتاني داخل الجامعة ... لكن تشوفيهم وهما بيلعبوا كورة أو بلاي ستيشن مع بعض تقولي دول من سن بعض وشغالين تليفونات هما الإتنين حتى وانا هنا في السعودية وبقوا أصدقاء جداً ...

من ضمن كلام إبن أختي ليبرر ما يفعله بأبوه وأمه هو : الاوامر المباشرة منهم ... والزن على الودان وإنه لازم يذاكر ويجتهد عشان يدخل كلية الهندسة زي اخته اللي أكبر منه بسنيتن ... مع إنه ما بيحبش الهندسة ..

وكانت البدايات خالص واللي كسرت نفسه ولم ينساها لأبوه وامه هو إنهم الإتنين إنشغلوا ولم يحضروا الحفل الذي أقامته المدرسة لأوائل الطلبة وكان هو في الصف الأول الثانوي وأجروا قاعة المؤتمرات بمدينة نصر لذلك ... وقال لي : يرضيك كده اطلع الحفلة واستلم جائزتي وكل واحد جايب أبوه وامه معاه وانا كنت عامل زي اليتيم .... هل ده حُب يا خالو ؟

أنا بصراحة إتأثرت جداً بكلامه وقلت له عندك حق ..

حتى بعد ما كان مواظب على الصلاة في المسجد الذي لا يبعد عن بيتهم أكثر من 5 امتار ... من ساعة العناد ده أصبح لا يُصلي لا في ااسمجد ولا في البيت ولا يستجيب لأوامرهم له بالصلاة ..

ومن ضمن كلامه أيضاً حكاية المعايرة كل شوية من أبوه وأمه : إحنا بنصرف عليك دم قلبنا .. إحنا بيعنا عمرنا عشانك .. حنا مدخلينك مدرسة بتاخد ألوفات .. إحنا حارمين نفسنا من كل حاجه عشانك ..

فقال لي الولد : ياريتهم كانوا دخلوني مدرسة حكومة من أم إتنين جنية وما كنتش سمعت الكلام ده ...

فالخلاصة يا مدام كارمن : سيبي الولد يعيش حياته ويجرب ويثبت شخصيته .. مع رقابة من بعيد لبعيد منك وتدخل حازم في الوقت المناسب ...

وحافظي دائماً على شعرة الصحوبية معاه والثقة المتبادلة بالتوازن مع الشدة والحزم والتدخل في الامور الحساسة والخطيرة .. وربنا يعينك لإن الامور دي أشبه بالمشي عالحبل ..

[HDarwish]

سي سي .. كل يوم عن يوم بيزيد إعجابي بيك وبآرائك

المشكلة فعلا حساسة ولازم التعامل معاها بحذر وبذكاء ..

وعن تجربة شخصية مماثلة جدا جدا لإبن أخت سي السيد لدرجة إني شوية كنت هافكر إنه خالي وأنا مش عارف

العنف عمره ما بيجيب نتيجة في الحالات دي ومهما اتطورت الحالة ما ينفعشي نثور ونغضب وفي لحظة غضب نندم عليها يوم لا ينفع الندم

كان ليا صديق عزيز عليا جدا شخصية ممتازة جدا .. رجل بكل معاني الكلمة في مواقف عديدة ... مخ نضيف جدا .. شاطر ومن أصحاب الدرجات النهائية ... كرامته فوق كل شيء .. لكن والده كان قاسي جدا

وفي يوم كان عندنا مدرس من المدرسين اللي مايستاهلوش فعلا إنهم يكونوا مدرسين شتم صاحبي بأمه وبأبوه طبعا صاحبي لم يصمت أو يردع بل واجهه وبرغم قوة المدرس وعنفوانه إلا انه تغلب عليه وقام بضرب المدرس طبعا الدنيا اتقلبت ووالده جه المدرسه وبدون ما يعرف الاسباب قام ضارب صاحبي قدامنا كلنا وضرب مبرح وبطريقة فيها كثير قوي من المذلة

بعدها صاحبي ده اتغير 180 درجة ساب البيت وراح على اسكندرية وقعد هناك حوالي ثلاث أيام ورجع البيت تاني لكن للاسف بعد انحراف كامل تدخين ومخدرات وكل ما تتخيله من أنوع الضياع وحاول الاب إصلاح ما يمكن إصلاحه لكن للاسف بعد فوات الآوان والنتيجة إنه بعد ما كان متفوق اصبح راسب في مادتين في الثانوية العامة وكنا بنرحله ايام الاجازة ونقعد نذاكر معاه برغم انتهاء دراستنا ووالده كان بيقابلنا أحسن مقابله وفي عينيه دموع الندم

اللي أحب أقوله في النهاية إن مش كل مراهق تبقى تصرفاته كلها غلط أكيد زي ما بيعمل حاجات غلط فيه حاجات صح بيعملها نشجعه عليها قبل ما نعاقبه على الحاجات الغلط

وكل اللي إحنا بنعمله وبنخطأ فيه نتيجة حبنا الزائد لأولادنا وإن إحنا بنكون عايزينهم ملايكه وده طبعا مستحيل

[se_ Elsyed]

شكراً لمداخلتك الواقعية يا إتش ..

عندي لكي يا مدام كارمن حتت فوكيرة بخصوص كلام إبنك مع واحده بيحبها وهو لسه في سن 12 سنة إنما تستاهل مليون جنيه ... هاتي خمسين ويبقى عليكي الباقي ..

أولاً .. لا يُمكن بأي حال من الاحوال إننا نقارن زماننا بزمانهم .. زمانهم بتاع الإنترنت والشات والفضائحيات اللي تعدت أكثر من 3000 قناة وكله موجود وكله مباح إلخ ... وكل ده أصبح بمثابة النار اللي سوت الطبخة قبل اوانها وأصبح الطفل أبو 12 سنة بيحب وبيتكلم في الحب زي ما حضرتك قولتي .. بالرغم إن الواحد مننا وأنا هاتكلم عن نفسي اللي من مواليد أوائل السبعينات .. كنت لحد ثانوي عبيط وبشورت ومش عارف راسي من رجليه وكذلك ابناء جيلي إلا ما ندر ... وما كناش نعرف حاجه غير المذاكرة وإن اللي في سنة تانية لازم يذاكر توماتيكي توماتيكي عشان يطلع تالته مع بعض اللعب البريء احياناً والشقي أحياناً أخرى وهكذا

يعني لو كان الواحد راح سنيما ولا مسرح مره .. فبكده يبقى صاع الصياعة اللي هي ...

بإختصار : إحنا اللي كنا بنذهب لأماكن الترفيه والثقافة أو الصياعة برجلينا ..

أما الأن : فكل شيء بقى هوم ديليفري وعند أطراف أصابعك

أنا أبني حضرتك عنده 7 سنوات وبيعمل حاجات على الكميوتر .. والله العظيم أنا ياللي إتعجنت شغل في شركات الكمبيوتر طول عُمري ما بأعرف اعملها وده لإنه قاعد عمال يجرب ويعجن طول اليوم وبيكتسب خبرات ...

من كام إسبوع كده كنت بأغديه في احد المطاعم اللي بيحبها لإن فيها بلاي ستيشن وألعاب مجانية وبيلعب لما ينتحر فيها ... فلقيته بيقولي : عارف انا نفسي في إيه يا بابا ؟

قلت - أستر يارب : إيه يا عمر يا حبيبي ؟

قال لي : نفسي بكره ألاقي نفسي في جريد فايف عشان ما احتاجش لك وأنا رايح المطعم المفضل بتاعي ده .. وساعتها هاصيع بقى - بنفس اللفظ والله - واجي لوحدي وبراحتي كل يوم بعد ما أخلص المدرسة !!!!!

فبأقوله : طب ومين اللي هايدفع لك الفلوس بتاعت الاكل والصياعة كل يوم يا حبيبي ؟

فقا لي : إنت طبعاً

-----------

نخش على الفكرة أم مليون جنيه واللي متبقى عليكي فيها مبلغ محترم

حضرتك تيجي في يوم كده تكونوا بتتعشوا كلكم .. وتكوني متفقة مع زوجك على السيناريو التالي ..

وتقولي لزوجك : اسكت يابو تامر ... واحده صاحبتي وحببتي الروح بالروح بتاخد رأيي في مشكلة واقعة فيها ومحتارة اليومين دول .. وهي إنها اكتشفت إن بنتها اللي عندها 14 سنة بتكلم ولد على الماسنجر وبيحبوا بعض .. فكتمت الموضوع والبنت لسه ماعرفتش إنهم عارفين كل حاجة وفاتحت والدها اللي صمم إنه يروح يضرب الواد ده ويضرب اهله بالمرة خصوصاً إنهم يعرفوه كويس .. لكن صاحبتي بتفضل إبلاغ الشرطة عشان يحطوه في الاحداث ويأدبوه ...

إنت رأيك إيه يابو تامر ؟

أبو تامر طبعاً هايدلي برأيه العنيف وإن الراجل ومراته ممكن ينفذوا الخطتين على التوازي .. يعني يضربوا الواد وأهله .. وفي نفس الوقت يبلغوا الشرطة عن الولد ..

وتقومي عامله حركة إلتفافية مفاجأة وتوجهي السؤال لتامر نفسه : قول لي يا تامر لو إنت عندك أخت في نفس سن بنت صاحبتي .. كنت تعمل إيه لو عرفت إنها بتكلم ولد غريب وبتحب فيه ؟

ولنا تكمله

[ايهاب سالم]

الأخت الفاضله / كارمن

هو حضرتك عايشه في كندا أو في أي بلد غربي أخر

تم تعديل 7 يوليو 2008 بواسطة ايهاب سالم

[كارمن]

الأخت الفاضله / كارمن

هو حضرتك عايشه في كندا أو في أي بلد غربي أخر

ايهاب انا شايفة ان كندا مجنناك بس انا الحقيقة فى بلد عربى اخر السعوية

[ايهاب سالم]

الأخت الفاضله / كارمن

هو حضرتك عايشه في كندا أو في أي بلد غربي أخر

انا الحقيقة فى بلد عربى اخر السعوية

غريبه

[Tala]

عزيزتي كارمن

انا فعلا مقدرة قلقك على ابنك وفكرة عندة معاكي في حد زاتها حاجة بتدايق الام لكن انا شايفة الموضوع يمكن ان يعالج بطريقة ابسط من كدة حاولي دايما تفوتي علية فرصة عندة معاكي يعني لما يسالك على حاجة بينيله ان المضوع يخصة و خلية يتصرف هو (في حدود انة مايعملش مشكلة) و اعتقد انه بعد فترة حيبطل عند لان العند بالنسبةلة وسيلة لاثبات الذات

اما بالنسبة لموضوع انة بيكلم بنات او غيرة ده شيء طبيعي عاجلا او اجلا سواء حصل ده دلوقتي او كمان 3 او 4 سنين هو لسة مراهق و محتاج توجية افضل حاجة تصاحبية و تبينيلة ان اهتماماتة هي نفسها اهتمامتك وانك بتعجبك الحاجات اللي بيعملها حتزيد الثقة بينكم و يبداء يحكيلك وبعدين لازم توجهي وقتو الفاضي لاي رياضة هو يحبها خلية يجرب كذا نشاط وشوفية بيحب اية و خلية يكمل وكل اللي بيحصل دلوقتي مش حيكون له مجال عندة وحينساه انا ابني ست سنوات ونص وبيلعب كراتية بشكل الحمد لله منتظم رغم ان ده بياخذ من وقتي كثير بس لازم .

[ايهاب سالم]

هو في مدرسة لغات ومختلطة وكان عنده اللي حضرتك بتقولي عليه ده وإن في بنات زميلاته ورايح جاي معاهم

حتى بعد ما كان مواظب على الصلاة في المسجد الذي لا يبعد عن بيتهم أكثر من 5 امتار ... من ساعة العناد ده أصبح لا يُصلي لا في لاسمجد ولا في البيت ولا يستجيب لأوامرهم له بالصلاة ..

فالخلاصة يا مدام كارمن : سيبي الولد يعيش حياته ويجرب ويثبت شخصيته .. مع رقابة من بعيد لبعيد منك وتدخل حازم في الوقت المناسب ...

بعدها صاحبي ده اتغير 180 درجة ساب البيت وراح على اسكندرية وقعد هناك حوالي ثلاث أيام ورجع البيت تاني لكن للاسف بعد انحراف كامل تدخين ومخدرات وكل ما تتخيله من أنوع الضياع

أولاً .. لا يُمكن بأي حال من الاحوال إننا نقارن زماننا بزمانهم .. زمانهم بتاع الإنترنت والشات والفضائحيات اللي تعدت أكثر من 3000 قناة وكله موجود وكله مباح إلخ ...

أما الأن : فكل شيء بقى هوم ديليفري وعند أطراف أصابعك

قال لي : نفسي بكره ألاقي نفسي في جريد فايف عشان ما احتاجش لك وأنا رايح المطعم المفضل بتاعي ده .. وساعتها هاصيع بقى - بنفس اللفظ والله - واجي لوحدي وبراحتي كل يوم بعد ما أخلص المدرسة !!!!!

تسجيل متابعه و إستفاده

:unsure:

تم تعديل 7 يوليو 2008 بواسطة ايهاب سالم

[iloveegypt]

الا خت الفاضلة كارمن

بس لى ملاحظة واحدة هوممكن تنقلى ابنك من المدرسة المشتركة لانه فى هذا السن الاختلاط يؤدى الى مشاكل كثيرة للمراهقين وشكرا

تم تعديل 7 يوليو 2008 بواسطة iloveegypt

[كارمن]

شكراً لمداخلتك الواقعية يا إتش ..

عندي لكي يا مدام كارمن حتت فوكيرة بخصوص كلام إبنك مع واحده بيحبها وهو لسه في سن 12 سنة إنما تستاهل مليون جنيه ... هاتي خمسين ويبقى عليكي الباقي ..

أولاً .. لا يُمكن بأي حال من الاحوال إننا نقارن زماننا بزمانهم .. زمانهم بتاع الإنترنت والشات والفضائحيات اللي تعدت أكثر من 3000 قناة وكله موجود وكله مباح إلخ ... وكل ده أصبح بمثابة النار اللي سوت الطبخة قبل اوانها وأصبح الطفل أبو 12 سنة بيحب وبيتكلم في الحب زي ما حضرتك قولتي .. بالرغم إن الواحد مننا وأنا هاتكلم عن نفسي اللي من مواليد أوائل السبعينات .. كنت لحد ثانوي عبيط وبشورت ومش عارف راسي من رجليه وكذلك ابناء جيلي إلا ما ندر ... وما كناش نعرف حاجه غير المذاكرة وإن اللي في سنة تانية لازم يذاكر توماتيكي توماتيكي عشان يطلع تالته مع بعض اللعب البريء احياناً والشقي أحياناً أخرى وهكذا

يعني لو كان الواحد راح سنيما ولا مسرح مره .. فبكده يبقى صاع الصياعة اللي هي ...

بإختصار : إحنا اللي كنا بنذهب لأماكن الترفيه والثقافة أو الصياعة برجلينا ..

أما الأن : فكل شيء بقى هوم ديليفري وعند أطراف أصابعك

أنا أبني حضرتك عنده 7 سنوات وبيعمل حاجات على الكميوتر .. والله العظيم أنا ياللي إتعجنت شغل في شركات الكمبيوتر طول عُمري ما بأعرف اعملها وده لإنه قاعد عمال يجرب ويعجن طول اليوم وبيكتسب خبرات ...

من كام إسبوع كده كنت بأغديه في احد المطاعم اللي بيحبها لإن فيها بلاي ستيشن وألعاب مجانية وبيلعب لما ينتحر فيها ... فلقيته بيقولي : عارف انا نفسي في إيه يا بابا ؟

قلت - أستر يارب : إيه يا عمر يا حبيبي ؟

قال لي : نفسي بكره ألاقي نفسي في جريد فايف عشان ما احتاجش لك وأنا رايح المطعم المفضل بتاعي ده .. وساعتها هاصيع بقى - بنفس اللفظ والله - واجي لوحدي وبراحتي كل يوم بعد ما أخلص المدرسة !!!!!

فبأقوله : طب ومين اللي هايدفع لك الفلوس بتاعت الاكل والصياعة كل يوم يا حبيبي ؟

فقا لي : إنت طبعاً

-----------

نخش على الفكرة أم مليون جنيه واللي متبقى عليكي فيها مبلغ محترم

حضرتك تيجي في يوم كده تكونوا بتتعشوا كلكم .. وتكوني متفقة مع زوجك على السيناريو التالي ..

وتقولي لزوجك : اسكت يابو تامر ... واحده صاحبتي وحببتي الروح بالروح بتاخد رأيي في مشكلة واقعة فيها ومحتارة اليومين دول .. وهي إنها اكتشفت إن بنتها اللي عندها 14 سنة بتكلم ولد على الماسنجر وبيحبوا بعض .. فكتمت الموضوع والبنت لسه ماعرفتش إنهم عارفين كل حاجة وفاتحت والدها اللي صمم إنه يروح يضرب الواد ده ويضرب اهله بالمرة خصوصاً إنهم يعرفوه كويس .. لكن صاحبتي بتفضل إبلاغ الشرطة عشان يحطوه في الاحداث ويأدبوه ...

إنت رأيك إيه يابو تامر ؟

أبو تامر طبعاً هايدلي برأيه العنيف وإن الراجل ومراته ممكن ينفذوا الخطتين على التوازي .. يعني يضربوا الواد وأهله .. وفي نفس الوقت يبلغوا الشرطة عن الولد ..

وتقومي عامله حركة إلتفافية مفاجأة وتوجهي السؤال لتامر نفسه : قول لي يا تامر لو إنت عندك أخت في نفس سن بنت صاحبتي .. كنت تعمل إيه لو عرفت إنها بتكلم ولد غريب وبتحب فيه ؟

ولنا تكمله

انا طبعا سعادتى لاتوصف ان اول رد يكون سى السيد لك كل الاحترام بص انا موت من الضحك من القصة وخفت تقلب جد ويضربو ابوة وامة فاية رايك فى تعديل بسيط ونخليها يضربو ابوة بس :unsure: مبداْيا انت بتقبل الفيزا كارت ولا هنتحاسب ازاى شوف انا بعمل معاة تقريبا كل اللى انت قلتة عن ابن اختك مع فارق السن وان الاول ممكن يفهم اكتر وبعدين انا ضد اسلوب الضرب نهائى لانى عايزة اطلعة راجل شخصيتة مش مهزوزة ولا جبان وعندة ثقة بنفسة ولانى اعرف كويس مدى الجرح النفسى الذى يمكن ان يعلم فى شخصيتة طول العمر انا مرة اخويا الكبير كلنى قلم والله الى الان مش نسياة واْد اية حسيت بالقهر لانة بيتحكم فيا لمجرد انة اكبر منى بالتالى انا ببعد تماما عن السكة دى وبعاملة انة انسان من حقة يحترم ويعبر عن راية و بديلة بريستيجة قصاد الناس بس باخدة لما اروح ولا ارضى ان اهينة قصاد حد او اقلل من شاْنة انا اكتفى بنظرة شريرة اللى هو هوريك لما اروح بس دة لانى بخاف علية وعايزاةراجل بمعنى الكلمة مشكلتة فى ردة السريع وصوتة العالى ودة بيوترنى وانا اقبل اى شىء الا قلة الادب وانا فى الحقيقة مش مع اختك فى تصرفها مع ابنها انا على العكس تماما انا بحاول اكبرة حتى السواقة الى بتقول ان ابن اختك بباة رفض مع انة اكبر من ابنى لما لقيت نفسة يتعلم خليت بباة يعلمة كمان بياخدة شركة كمبيوتر على اساس يتجراء ويعرف يتعامل مع الناس بدل ما هو عامل زى القطر كدة واخد فى وشة انت عارف الولاد فى السعودية هنا من قلة الاختلاط عاملين ازاى وزى انت ماعملت مع ابن اختك بديلة الفيزا يشترى ويحاسب ويعتمد على نفسة لكن مش لاقية مقابل انا متفهمة تماما ردودة وصوتة العالى بحكم المرحلة العمرية انما حكاية الحب دى لامممكن ابدا اقبلها بالنسبة للقصة اللى اقترحتها مش مكشوفة شوية خصوصا ان كل معارفنا اولادهم صغيرين اية رايك لو قلت ان ام البنت اشتكت من تصرفاتة وخصوصا انى اعرفها من بعيد[يمين][/يمين] وافهمة ان سنة صغير وادخل من سكة الحلال والحرام وافهمة انى مش هقول لبابا حاجة المرة دى على اساس تكون ورقة للضغط علية بعدين او انت شوف لى قصة تانية والحساب يجمع تحياتى لك وانا متابعة جيدة لردودك حتى لو لم اشارك وبتعجبنى جدا

[كارمن]

الا خت الفاضلة كارمن

بس لى ملاحظة واحدة هوممكن تنقاى من المدرسة المشتركة لانه فى هذا السن الاختلاط يؤدى الى مشاكل كثيرة للمراهقين وشكرا

والله فصلو البنات عن الولاد لكن فى نفس المدرسة هما مش بيشوفو بعض لكن الايميلات والفيس بوك شغاال دا انا قعدت شهر مش عارفة ادخل الفيس بوك الله المستعان

[كارمن]

عزيزتي كارمن

انا فعلا مقدرة قلقك على ابنك وفكرة عندة معاكي في حد زاتها حاجة بتدايق الام لكن انا شايفة الموضوع يمكن ان يعالج بطريقة ابسط من كدة حاولي دايما تفوتي علية فرصة عندة معاكي يعني لما يسالك على حاجة بينيله ان المضوع يخصة و خلية يتصرف هو (في حدود انة مايعملش مشكلة) و اعتقد انه بعد فترة حيبطل عند لان العند بالنسبةلة وسيلة لاثبات الذات

اما بالنسبة لموضوع انة بيكلم بنات او غيرة ده شيء طبيعي عاجلا او اجلا سواء حصل ده دلوقتي او كمان 3 او 4 سنين هو لسة مراهق و محتاج توجية افضل حاجة تصاحبية و تبينيلة ان اهتماماتة هي نفسها اهتمامتك وانك بتعجبك الحاجات اللي بيعملها حتزيد الثقة بينكم و يبداء يحكيلك وبعدين لازم توجهي وقتو الفاضي لاي رياضة هو يحبها خلية يجرب كذا نشاط وشوفية بيحب اية و خلية يكمل وكل اللي بيحصل دلوقتي مش حيكون له مجال عندة وحينساه انا ابني ست سنوات ونص وبيلعب كراتية بشكل الحمد لله منتظم رغم ان ده بياخذ من وقتي كثير بس لازم .

تحياتى tala صدقينى لو قلت لك انا بعاملة كانة اخويا لان فرق السن بنا مش كبير وبخلية هو ياخد القرار بس قبلها ابين الصح فين واسيبة ومع الوقت بيعرف انة كان على خطاء اقولة شوفت هة راى مين طلع صح يضحك ببرود وبقولة مش مهم عندى تغلط المهم تتعلم حاجة من الغلط بكرة تجربى

[semsema]

استاذ س س عجبني موقف حضرتك مع ابن اختك ومعاملتك ليه....ياريت كل الاباء كدا (معتقدش ان في طبعاً).....

لو الاباء والامهات يعرفوا ابناءهم عايزين ايه ويعرفوا يتعاملوا معاهم ازاي مكنش بقى في مشاكل بينهم ولا خلافات..ولا حتى عناد

وطبعاً في النهاية يجيبوا الغلط عندنا احنا!!

[se_ Elsyed]

تحياتي لكل المشاركين

--------

سمسمه ... بصفتك من جيل الوسط اللي بعدنا بشويتين

ما تسمعينا شويه عن صراع الاجيال اللي بتحسي به

-------------

مدام كارمن

انتو طلعتوا ولاد ديرتنا ومعانا في السعودية ؟

ممكن تبعتيلي كرت توصية من تامر ؟

بقى عنده 12 سنة ويعرف بنات في السعودية .. وانا نشفت هنا اكثر من عمره كله وما عرفتش دبانه حتى ؟

والله بأتكلم جد

اول ما جيت كنت مراهق صغير بس مراهقة متأخرة وعندي 23 سنة ويقولك بقى معاكسات التليفون والناس ما بتنامش من مكالمات المعاكسة اللي على ودنه .... واحمض 6 سنين يا مؤمنة ان التليفون يرن مره بالغلط ... ابداً وكأن عليه عفريت .... مش بأقولك انا عايز كرت من تامر

----------

نتكلم جد

من الواضح يا ست الكل ان حضرتك مستعجلة النتائج

يعني عايزة تصاحبيه النهاردة .. تروحي هوب لاقيياه زي الخاتم في صوباعك تاني يوم ... ود مش هايحصل دلوقت

وياريت تفضلي على طريق الصحوبية والحوار انتي ووالده وبإذن الله ده هايساعد في بناء شخصيته القوية المستقلة

وإذا ما عجبتكيش الخطة أ ... يبقى ننقل على البلان بي

وهي انك في اوقات الصفا كده تكلمية عن علاقة الحب بين الولد والبنت

والله بأتكلم جد

بس تعرفيه ان الحب لا هو حرام ولا هو عيب

لكن بشرط

ان يكون حب حلال وفي وقته

يعني الواحد ياخد شهادته الاول وبعدين ان شالله يحب على نفسه مش هاتفرق

وفهميه ان البنت او الست ما بتحبش الولد العواطلي اللي لسه بياخد مصروفه من بابا

والحب لازم يقترن بالرجولة وهي ان الانسان يبقى قد المسئولية

وبرضوا اللي الواحد ما يرضهوش على اخته ما يرضهوش على اخوات الاخرين

وفهميه ان الرسول قال " الاثم ما حاك في الصدر وخشيت ان يطلع عليه الناس " وان اللي بيحب في الخباثة تحت جنح الظلام .. طالما خاف من الناس يبقى ده حرام حرام حرام

وهكذا زي ما قلت لك .. الحوار بيجيب نتايج هايلة

وبعدين حاولي تشغلية برضوا بالرياضة شوية عن طريق الاشتراك في نادي او ما شابه

انا عارف انه صعب شويه في السعودية لكن في بدائل لنوادي العامة وهي النوادي الصحية بالفنادق الكبر مثلاً او الانشطة الرياضية في المدرسة واللي ممكن في بعض الاحيان تستمر في الصيف ..

اية رايك لو قلت ان ام البنت اشتكت من تصرفاتة وخصوصا انى اعرفها من بعيد

وافهمة ان سنة صغير وادخل من سكة الحلال والحرام وافهمة انى

والله خايف تامر يكون عامل بلان بي هو راخر ويقلب البنت اللي فقستي حكايتها دي ويشوف غيرها

[لولا]

الأخت الغاليه كارمن

بصراحة انا معنديش اى نصيحة اقدمها بعد كل الكلام الهايل

اللى نصحوكى بيه الأخوه الأفاضل واللى انا نفسي استفدت منه.. بس مش عارفه انا لسه

معنديش اولاد يعنى حينفع اطبقه بعد 15 سنه ولا لأ :unsure: عموما اتمنى ربنا يديك الصبر

وطولت البال عشان تقدرى تتصرفى بمنتهى الهدوء.

وخدى اقرى القصيده دى لصلاح جاهين وروقى دمك دى مرحله مفيش مفر منها لكل المراهقين.

البنت و الولـــــــــــــد

البنت فارت و الولد خنشر ...

يا داهيه دقّى ! .. ألف بعد الشر ..

يا ريتها كانت نزلة شعبية ،

و الا وجع فى البطن .. يتدبر .

الا اللى نابهم ، كان قضا وصابهم ،

مالوش دوا ، و لا طب ، يا سى أنور .

البنت فى الاعدادى لسّاها ،

كان إيه لزوم الغصن يتدور ...؟

و الا الولد ، ده يا دوب دخل ثانوى ،

ليه خده ينطر شوك ، بدا المنظر ؟

مش لما بس يكملوا علومهم .. ؟

ما كانش يومهم ، يا النهار لا غبر !

لو كان عليا .. لا واد ، و لا بنّيه ،

أخلى فيهم ( مللى ) يتغير ،

غير لما يبقوا أساتذه ، بماهيه ،

و بيت جميل ، مفروش على صغّير !

[semsema]

مش عارفه اكتب ايه والا ايه والا ايه.............

ولكن هكتب اللي اقدر عليه

....................................

من ضمن كلام إبن أختي ليبرر ما يفعله بأبوه وأمه هو : الاوامر المباشرة منهم ... والزن على الودان وإنه لازم يذاكر ويجتهد

ومن ضمن كلامه أيضاً حكاية المعايرة كل شوية من أبوه وأمه : إحنا بنصرف عليك دم قلبنا .. إحنا بيعنا عمرنا عشانك .. حنا مدخلينك مدرسة بتاخد ألوفات .. إحنا حارمين نفسنا من كل حاجه عشانك ..

نفس الكلام اللي بسمعه في اليوم سبعتلاف مرة

دا غير: شوفتي فلانة عامله ازاي؟ طب شوفتي علانة اللي الناس بتتحاكى بيها

شوفتي البت مريم الجابت 100% طب دي تنقصي عنها ايه؟

شوفتي البت بسمة بنت محترمة جدا وماتسماعيلهاش نفس!!

شوفتي اية بنت عمك مابتخليش ماماتها تعمل حاجة في المطبخ وشايلة شغل البيت كله..

.... مع ان فلانة وعلانة ومريم وبسمة وايةدول يبقوا اصحابي وانا عارفاهم وعاجناهم وما يختلفوش عني في اي حاجة.....

وطبعا الضغط علينا في المذاكرة.........

وكل ماحد يشوفتي فاتحة اللاب توب بعد ماعملت كل اللي عليا....يخلقولي اي حاجة عشان اقفله

وعلى الرغم من ان كل دي حاجات مزعجة جدا.........زبس مش هاماني,,,,لاني هبدأ اكتب في التقيل واللي بسببه بتحصل مشاكل نفسية للابناء

....................................

اغلب الاباء والامهات للاسف مش عارفين اولادهم عايزين ايه ومش فاهمنهم ومش عارفين او يحاولوا يعرفوا المشاكل اللي اولادهم بيقعوا فيها.......

احدى صديقاتي حاولت تنتحر اكتر من مرة بسبب مشاكلها الشخصية ومشاكلها مع مامتها......مش هقول هنا اكتر من كدة :D

.....................

وحدة تانية - صحبتي بردو - سألتها: امتى اخر مرة حضنتي فيها ممتك؟

قعدت تفكر شوية: مممممممممم من زمان اوي...

انا: ليه كدا؟

هيا: انا مش بحب كدا

انا: ليه؟

هيا: شوفي هيا اينعم بتحاول انها تحضني بس هيا ماعودتنيش على كدا من وانا صغيره عشان كدا مش بحب احضنها......

وبعدين احضنها ليه وهي كل شوية تزعقلي وتقولي كلام يخنق اوي.....الغريب بقى انها قال يعني بتقولي انا عايزه ابقى صحبتك وكدا.....تخيلي ياسمسم اي مشكلة اقولها عليها الا والاقي بابا عارفها على طول ويقعد يزعقلي.....ال وعايزه تبقى صحبتي....ياشيخة بلا هم!!!

انا: عيب يا بنتي ماتقوليش كدا دي ممتك بردو..

هيا: طيب انتِ امتى اخر مرة حضنتي فيها ممتك؟

انا: من زمان اوووووووووي :)

.....................................

وبردو.....احنا على ايامنا كان وعلى ايامنا مكنش وعلى ايامنا وعلى ايامنا وعلى ايامنا ...... داانتوا ايامكوا دي......ايه الجيل المايع ده

ايه الجيل البايز ده.......ايه الجيل الـ (نسيت الكلمة :wub: )

كفاية كلام كدا..........

مع العلم ان الكلام لسا ماخلصش :unsure:

تم تعديل 7 يوليو 2008 بواسطة semsema

[semsema]

لي رجاء لكل الاباء والامهات.......

بليز يعني........اولادكوا وهما صغيرين حاولوا تقربوا منهم وتبقوا بالنسبة لهم زي الاصدقاء......تعرفوا مشاكلهم وتحاولوا تحلوها - مش تعقدوها :wub: - بس لازم وضروري يكونوا صغيرين......لأنكوا لو استنيتوا لغاية مايكبروا وقتها هتبقى كل حاجة صعبة جدا ومش هاتعرفوا تتعاملوا معاهم

وبليز تاني لو شوفتوا اي برنامج بيتكلم عن كيفية المعاملة مع الابناء في المرحلة دي او قريتوا كتاب عن كدا.......ياريت تعملوا بيه مش تطنشوا وكأن ابناءكوا غير او مش زي الاولاد التانيين......

واسفة ان كان كلامي جارح شوية

تحياتي :unsure:

تم تعديل 7 يوليو 2008 بواسطة semsema

[كارمن]

بصى ياسمسمة انتى جايز يكون عندك بعض الحق فى كلامك وان فى اباء مقصرة لكن كمان لازم تلتمسى لهم بعض العذر احنا احيانا نقسو من كثرة حبنا لابنائنا وبعدين اعرفى انك لايمكن هتلاقى حد يخاف عليكى وعايز مصلحتك اكتر منهم ربما تكون طريقة التعبير غلط انما القصد خير مش هتعرفى قيمة النصايح و الشخط والخناقات دى غير لما تتجوزى ويبقى عندك طفل انا عمر ابويا ماحضنى وكنت بقول زيك كدة انة مش حنين بس لما كبرت اكتشفت هو اد اية حنين بس لايجيد التعبير عن مشاعرة ودة حال الرجالة كلها وكنت بعمل زى صحبتك كدة واقول اية الخانقة دى الواحد امتة يبقى لة حياة خاصة الان بعد ما بقيت ام مش ممكن ارفع صوتى على امى او ازعلها بعد ما كان صوتى مجلجل لانى عرفت هى اد اية تعبت وياسيتى يعنى انتو اللى ملائكة دانتو ساعات تعملو حاجات تخلى الحجر ينطق

تم تعديل 8 يوليو 2008 بواسطة كارمن

[كارمن]

ربنا يخليكى يالولا ويارب يرزقق بالخلفة الصالحة احب اطمنك كمان 15 سنة هما اللى هيربونا ويدورو على الطريقة المثلى للتعامل معانا

بس انا مش فى الحسبة دى لانى خلاص بطلت وحرمت احتمال ابقى ساعتها اساْل عن الاحفاد

تم تعديل 7 يوليو 2008 بواسطة كارمن