ربنا يكون فى عون الناس اللى حاطة فلوسها فى البورصة

[محمد عبدالعزيز]

مؤشر البورصة امبارح فقد فوق ال 16% من قيمته, بما يعادل 53 مليار جنيه خساير زى ماتقال فى الفضائيات والجرايد.

واليوم المؤشر يواصل نزيف الخساير حيث بدأ الجلسة بخسارة وصلت لأكثر من 13% وبعدين رجع يرتفع تانى بس ببطء طبعاً, حتى كتابة هذه السطور المؤشر خسران 10,86% , يعنى بنلعب فى خساير بالمليارات برضه زى امبارح.

بصراحة الأخبار تخض وتنذر بكارثة ربنا ينجينا منها, لأن فى ناس خسرت خساير فادحة فى الأزمة دى وأكيد ده ممكن يؤثر على الاقتصاد ككل. وربنا يكون فى عون المتضررين.

وبالمناسبة ياريت المحامين اللى رفعوا قضية على إبراهيم عيسى عشان خسارة 80 نقطة فى البورصة لا راحوا ولا جم, ياريت نسمع صوتهم ويرفعوا قضية على المسئولين فى الحكومة وأولهم أحمد نظيف رئيس الوزراء اللى صرح من حوالى 3 أيام إن البورصة بتاعتنا فى أمان ولن تتأثر بالأزمة العالمية, وبالتأكيد ده خلى ناس تطمئن وتدخل البورصة فى الوقت الخطر ده وتسبب فى خساير فادحة ليهم وصلت لمليارات الجنيهات.