قصتي مع كندا

[د هشام ابراهيم]

الأخوة الأفاضل ... أخوكم طبيب مصري مغترب في كندا حاليا

الصراحة ده أول يوم لي في المنتدى انما طلب مني حكاية قصتي كلها في كندا للاستفادة .... أرجو أن يتسع صدركم لي و بسم الله توكلنا على الله

[ايهاب سالم]

صحيح انا مش طبيب

لكن بافكر اغير الكاريير

تسجيل متابعه في الصف الاول

[jundi]

متابع انشاء الله

[qenawy]

اهلا يا دكتور

كل امنيتي انك تستحملنا وربنا يبارك لك بجد وياريت بقي (مش عارف حاسس اني استغلالي لكن سامحني) يا ريت بالتفصيل فكل معلومة من حضرتك كنز كبير لانك خضت التجربة فعلا

[د هشام ابراهيم]

يا دكتور هشام

يبدو ان تجربة حضرتك ثرية وبصراحة كلنا طمع في كرم حضرتك تحكيها لنا

يعني انا لقيت تورنتو نوتس 1350 صفحة وبصراحة انا استقليتهم اي نعم انا لسة ما بداتش اذاكر ولكن هل توجد مصادر افضل

ثانيا انا ناوي ابتدي المعادلة من مصر حيث انا موجود الان لغاية ما طلب الهجرة ان شاء الله يتقبل ام نصبر افضل لما نهاجر

تحياتي

انت بس فضي نفسك ساعة لنا كده الوقت الي يناسبك وستجدنا اذانا صاغية

أهلا و سهلا بالاخوة الأفاضل

إسمحولي أرد على السؤال ده الأول

Toronto Notes هي أفضل ما موجود .... فيها غلطات و مش منظمة و كبيرة على الفاضي ....انما أحسن الموجود ..... أهم الأجزاء على الأطلاق

Psychiatry

Pediatrics

Family Medicine

Obstetrics & Gynecology

General Surgery

Ethics & Legal issues

Emergency

طبعا الباقي مهم بس مش زي دول

الأهم من ده كله لازم تحل اسئلة ... لا لهاش حل تاني مهما ذاكرت من غير حل اسئلة ما ينفعش

الأسئلة موجودة على الشبكة العنكبوتية و في موقع ال-MCC كمان

و طبعا كل ما ابتديت بدري يبقى أحسن

تم تعديل 27 نوفمبر 2008 بواسطة د هشام ابراهيم

[د هشام ابراهيم]

حابدأ الحكاية من الأول خالص كما طلب مني " من طأ طأ لسلام عليكم " :rolleyes:

لحد سنة ٢٠٠٣ لو حد قالي اني حاهاجر بره مصر كنت قولتله مستحيل .....

٢٠٠٣ أخدت الدكتوراه و عشت تجربة مرض حمايا الله يرحمه مع مرض السرطان لحد ما توفاه الله ..... بهدلة ما بعدها بهدلة إن الواحد يعيي في مصر ...علما بانه كان دكتور و أنا و المدام دكاترة و أعضاء هيئة تدريس في جامعة القاهرة و بنشتغل في المستشفيات اللي أتعالج فيها و بندفع فلوس كاش ... ما فيش أحسن من كده يعني.... بس المهازل اللي الواحد شافها ملهاش آخر.....

٢٠٠٤ رحت رحلة لاوروبا رجعت بعدها بعين ناقدة بقت تجننني ....بقيت اركز قوي في الطابور المعووج و المرور البايظ و البيئة الملوثة و الفساد المستشري و انهيار القيم إلخ كمان الشغل بقى فيه حاجات مش راضي عنها بس مش قادر أعمل فيها حاجة لحد ما ضغط دمي علي فعليا و ضربات قلبي بقت غير منتظمة ....روحت لدكتورة في عين شمس بعد ما سألتني عن نمط حياتي (شغل من غير مواعيد ٧ أيام في الأسبوع منهم أيام ٢٤ ساعة في ال-٢٤ ساعة ) قالتلي لا تغير أسلوب حياتك لا تموت (أبويا الله يرحمه كان دكتور برضه و مات في الخمسين بالقلب)

في نفس الاسبوع كنت باقرأ في كتاب الله زاي عادتي على قد ما ربنا يقدر قريت الآية ديه و بعدها قررت أسافر أشوف فرصة تانية

" إِنَّ الَّذِينَ تَوَفَّاهُمُ الْمَلائِكَةُ ظَالِمِي أَنفُسِهِمْ قَالُواْ فِيمَ كُنتُمْ قَالُواْ كُنَّا مُسْتَضْعَفِينَ فِي الأَرْضِ قَالُواْ أَلَمْ تَكُنْ أَرْضُ اللَّهِ وَاسِعَةً فَتُهَاجِرُواْ فِيهَا فَأُولَئِكَ مَأْوَاهُمْ جَهَنَّمُ وَسَاءَتْ مَصِيرًا " ... النساء ٩٧

ابتديت أدور على فرص السفر ما بين زملائي اللي سافروا قبل كده و عن طريق النت و قدمت طلب هجرة في السفارة الكندية في نفس الوقت

القصة ابتدت ب-google ....دخلت Toronto + Fellowship و ابتديت أقدم على الوظيفة ....بعت يمكن ل ٦ أو ٧ مستشفيات واحدة بس اللي ردت ..... بعد حوالي سنة في نفس الوقت جالي ٣ فرص سفر ...كندا و انجلترا و السعودية ....أنا كنت مقرر اني ما أسافرش دولة عربية و اني أسافر دولة متقدمة اكمل فيها دراستي .....لازم طبعا تكون بتتكلم انجليزي مع استبعاد أمريكا و أستراليا .... فاضلت ما بين عرضين كندا و انجلترا و اخترت كندا ....ربنا كان ميسرها قوي ....أنا و المدام لقينا شغل و سكن من على النت

بس حصلت مشكلة مع السفارة الكندية كادت تنسف الموضوع من أساسه

[qenawy]

كمان الشغل بقى فيه حاجات مش راضي عنها بس مش قادر أعمل فيها حاجة لحد ما ضغط دمي علي فعليا و ضربات قلبي بقت غير منتظمة ....روحت لدكتورة في عين شمس بعد ما سألتني عن نمط حياتي (شغل من غير مواعيد ٧ أيام في الأسبوع منهم أيام ٢٤ ساعة في ال-٢٤ ساعة )

متابعين يا دكتور

الجزء اللي فات ده حاصل معايا تمام

شغل بايظ ولا قادر اعمل حاجة لغاية ما خلاص (لسه كاشف والدكتور صديقي عمل لي رسم قلب وقالي بلاش توتر )

المهم

متابعين بشغف وبعدين

[Torontotruk]

[quote name='د هشام ابراهيم' date='Nov 27 2008, 10:34 PM' post=بين عرضين كندا و انجلترا و اخترت كندا ....

اتمني من الله انك ماتكونشي ندمت علي اختيارك لكندا.

[د هشام ابراهيم]

( أسف على تقطيع الحكاية بس يعلم الله اني مشغول جدا و باكتب اللي أقدر عليه كل شوية )

يشاء السميع العليم إن الموافقة على طلب الشغل تيجي الاول قبل الموافقة على الهجرة ... رحت للسفارة الكندية أطلع فيزا دخول لكندا علشان ابتدي شغل الموظف المصري الكشر رفض .... قالي ما أقدرش أديلك فيزا work permit و أنت مقدم على طلب هجرة .... قلت خلص مشوا طلب الهجرة .... قال ما ينفعش لسه ما خلصناهوش ... و بقت دائرة مفرغة مفادها أني مش عارف أخش كندا

[د هشام ابراهيم]

Torontotruk باشا الحمد لله ما فيش ندم على كندا خالص .... بالعكس تماما راضي و شاكر و بادعي ربنا يبارك في كندا و يحفظها كمان

حل مشكلة السفاره جه من كندا .... مكتب ال PGME في جامعة تورنتو اتصل بالسفارة و خلص الموضوع .... و الحكاية خلصت على خير ... قرروا انهم يسرعوا طلب الهجرة و جيت كندا في يونيو ٢٠٠٥ كمهاجر و أنا و المدام لينا عقد عمل من أول يوليو ك Fellows في مستشفيتين في تورونتو

و توالت الصدمات بعد كده .... أول سنة ديه كنت بافكر أسيب كل حاجة و أرجع مصر تقريبا كل يوم

[اسكندرية تانى]

متابعين و مركزين يا دكتور هشام

انا جبت كوباية القهوة و معاك يا دكتور

[د هشام ابراهيم]

أول صدمة كانت الحرارة ... أنا كنت فاكر إن الطيارة نزلت غلط في المكسيك من كتر ما الدنيا حر و رطوبة :rolleyes:... التصور إن كندا بلد برد .... تورنتو بالذات صيفها حر فعلا

تاني صدمة كانت الطوابير على ظابط الجوازات مطار بيرسون أصلا مش مبهر خالص و كبير قوي على الفاضي و بعد رحلة غاية في الأرهاق (KLM بعد ترانزيت في أمستردام ) ما كانتش ناقصة طبور طوييييييل كده

ظابط الجوازات كان محترم جدا بس ظابط الهجرة كان مشكلة ... الأخ من أصل هندي و لكنته تقيلة جدا و ما كنتش فاهم منه كلمة .... بعد جهد جهيد و سؤال مضحك منه (اذا كنت ما بتفهمش انجليزي ممكن أكلمك فرنساوي ...و طبعا الفرنساوي بتاعه أصلا أضيع من الأنجليزي ) الموضوع خلص و لقيت نفسي في الشارع بادور على تاكسي و ديه كمان صدمة .... التاكسي ليه نظام و دور و أماكن محددة و لو معاكم شنط كتير ذي أي مصري أصيل يبقى لازم فان ....طبعا على واحد لسه جاي من عاصمة السبهللة كان الموضوع بالنسبة لي في غاية التعقيد

[moheltohamy]

تسجيل تواجُد...

الله ينوّر عليك يا دكتور ، بداية قوية ع المنتدى...

وانا شايف د. الشامي متواجد برضه :rolleyes:

مش قلتلك كلامك هيكون زُبد؟

يللا تحمّل بقى... إنتا اللي جبته لنفسك ، وهتنزّل مشاريب لمّا تتعمي!

شيل بأه شويّة :rolleyes:

[د هشام ابراهيم]

و من صدمة إلي صدمة .... الفندق اللي حجزت فيه على النت طلع في ال-Boys Village و طلع إن ٢٠٠٥ ده العيد ال-٢٥ و لا الخمسين و لا هباب الطين بتاع استعراض مثلي الجنس ال-Pride parade ... و ناس جاية من أنحاء العالم كله علشان يشاركوا و يساندوا اقرانهم في كندا

طبعا مناظر ما أنزل الله بها من سلطان و أشكال يندي لها الجبين و أنا و المدام نازلين في قلب الأحداث ....احنا قولنا ما لناش عيش في البلد ديه و لازم نرجع .... بعد تفكير عقلاني اكتشفنا إن المجتمع ده من قيمه تقبل الاخر مهما كان و الحرية الشخصية ما دامت لم تتعدي على المصلحة العامة و التسامح مع الآخر .... ده كله حيضمن لينا شخصيا العيش في كندا من غير ما حد يتعرض لينا و لا لديانتنا و لا معتقداتنا و لا عاداتنا

الصدمة التالية بقي كانت الشغل

[ايهاب سالم]

اتمني من الله انك ماتكونشي ندمت علي اختيارك لكندا.

Torontotruk باشا الحمد لله ما فيش ندم على كندا خالص .... بالعكس تماما راضي و شاكر و بادعي ربنا يبارك في كندا و يحفظها كمان

ليه بس كده يا دوك

معلش خيرها في غيرها

[ELSHAMY]

ELSHAMY, moheltohamy, newcomer, Nouna, د هشام ابراهيم, drbeso, Torontotruk

ايه الحلاوة دى.....متجمعين عند النبى

تسجيل متابعة يا دكتور

[د هشام ابراهيم]

الله يخليكم يا اخواني الأفاضل و لو أني مش فاهم خلفيات الحوارات الجانبية ما بينكم بس مسيري أفهمها إن شاء الله

لقيت شقة كويسة جدا جنب المستشفيات ... ١٠ دقايق مشي للمستشفي بتاعتي و ١٠ دقايق مشي لمستشفي المدام ... الشقة كنت طلبتها بمواصفات معينة من سمسار برضه عن طريق النت ... جابلي ٤ شقق فيهم كل اللي أن طالبه و اداني معاد في تورنتو اختار واحدة منهم (كل ده خلص في مصر على النت قبل ما أجي )

رحت أقابل رئيسي المباشر في الشغل و هو من أصل برازيلي و ساعدني جدا و لحد النهارده افضاله علي ... الراجل قعد المقابلة كلها يحذر في من اللي حيحصلي و من ناس معينة و من الفترة الاولي الأختبارية اللي ممكن تنتهي على انهم ينهوا عقدي لو ما أثبتش اني على المستوى المطلوب ( الفترة ديه بتقعد حوالي ٣ شهور و بتبقى فتره عصيبة جدا لانك كل يوم تحت أشراف و ملاحظة و اللي بيراقبك بيبقى "breathing down your neck" ذي ما بيقولوا

خلصت المقابلة مع الدكتور البرازيلي و رجعت البيت و أنا هايب الموقف ... طبعا أول كام أسبوع ده لا كان فيه تلفزيون و لا نت و لا تليفون ... لا فاهمين نظام المواصلات و لا ألاكل و لا التسوق .....أصعب وقت فعلا

[moheltohamy]

هاهاهاهاهاهاهاهاه

ما تنساش دول كمان (17 الزوار)

بصراحة يا د. الشامي... الراجل ده جوهرة ، وهيقاسمنا ف الزباين بتوعنا! :hi:

مش تسجيل متابعة المرّادي... ده تسجيل إعجاب واستمتاع ومخمخة

كمّل يا راجل... لا فُضّ فوك :blink:

تم تعديل 27 نوفمبر 2008 بواسطة moheltohamy

[د هشام ابراهيم]

التهامي باشا و د الشامي ... شاكر لحضراتكم كلمات الاطراء و متابعتكم تشرفني

و ابتديت الشغل ....أنا أصلا مدرس في جامعة القاهرة و ياما اشتغلت في مستشفيات في مصر لكن تورونتو كأني شغال في سفينة فضاء كل حاجة مختلفة و غريبة و عايزة ميت سؤال و أنا المفروض في فترة اختبار و علي العين ..فيه ناس كانت كويسة و متفهمة و فيه ناس ما تفهملهاش و ناس شرانية .... زاي أي مكان في الدنيا .... أقرب اتنين في الوقت ده لي كانوا دكاترة مصريين في نفس المستشفي ... واحد أصلا من المنصورة و التاني من عين شمس .... الاتنين أكبر مني سنا ... دكتور المنصورة في قمة البشاشة و الذوق .... على طول بيساعدني و بينصحني .... دكتور عين شمس ما يشوفنيش غير ما يكسر مجاديفي و يحبطني و يقعد يشتكي من كل كبيرة و صغيرة لحد ما بقيت أتجنب اني أقابله أو أكلمه

المهم عديت ال-٣ شهور على خير و أنا و المدام أجتازنا الفترة الأختبارية بنجاح و ابتديت الدنيا تتظبط شوية

[moheltohamy]

دكتور المنصورة في قمة البشاشة و الذوق .... على طول بيساعدني و بينصحني ....

ثـُكراً ... ثـُكراً