أول صورة لرئيس وزراء بالمايوه .......بسرعة قل الحذف

[essamalshaaer]

أول صورة لرئيس وزراء لمصر بالمايوه

فى لحظة استجمام غير مسبوقة وبعيد عن أستجوابات الحكومة ومشاكل الشعب المفعوص

التقطت هذه الصورة النادرة للدكتور أحمد نظيف رئيس وزرائنا بالمايوه على أحد شواطئ شرم الشيخ الجميلة

الدكتور نظيف شارك أسرته قضاء عدة ساعات على الشاطئ ، واستمتع بالمياه الزرقاء فى شرم، بينما كان أبناؤه يمارسون بعض الرياضات المائية.

وفى مساء اليوم نفسه قضى الدكتور نظيف سهرة موسيقية خاصة على أنغام المطربة اللبنانية كارول سماحة والمغنى المصرى محمد نور.

المصدر(جريدة اليوم السابع)

[se_ Elsyed]

معليش يا عصام

اسمح لي يعني

اولاً : من عنوان الموضوع نفسه انا شكيت اني اكون النت حولني غلط على المواقع اياها بتاع فضايح الفنانين والحق قبل الحذف ويالا قبل ما يعقل يا جدعان واللي ما عرفش بيجيبوا عناوين ايملاتنا منين وبيهرونا رسايل عبيطة

ثانياً : حتى الصورة ليس فيها ما يعيب .. وياما رؤساء دول في العالم كانت الصحافة بتغطى لحظات استجمامهم على البحر او غيره

ثالثاً : رئيس الوزراء او رئيس الجمهورية حتى .. بني ادم ومن حقه يروح جمصه او راس البر يبلبط وياكل فريسكا برضوا .. مش عيب ولا حرام

رابعا : لما جريدة تنشر خبر زي ده .. قولي بالله عليك القاريء استفاد ايه ؟ ما يلبس مايوه يا سيدي ولو بكيني حتى ... فهل هذا سيؤثر على اتخاذه لقرارات مهمه لادارة البلاد ؟

[Diab]

فى لحظة استجمام غير مسبوقة وبعيد عن أستجوابات الحكومة ومشاكل الشعب المفعوص

غير مسبوقة ليه ألاف قبله لبسوه و ملايين بعده هيلبسوه

صحافة الباباراتزي دي متنفعش في مصر علي فكرة لأنها بتحاول تحاول أن تجعل من أي لقطة عادية كما لو كانت فضيحة

[jessika]

واية العيب اللى عملة الراجل يعنى دة احناشعب غريب بجد مش لاقيين حاجة نتكلم فيها راجل بيمارس حياتة الطبيعية جدا واقل من الطبيعى كمان بيصيف ولابس مايو كمان محترم جدا اية العيب فى دة وكمان مع اسرتة مش مع حد غريب علشان يكون مجال للحديث اصلا ولا الصحافة تكتب عنة سبحان اللة علينا شعب كل ما الواحد بيقرا الكلام دة بيشوف اد اية الغرب ناس متحضرة واحنا اللى عاملين كدة فى نفسنا رغم اننا حضارة عريقة يارب اكتبلنا الهجرة بجد يااااااااااااااااااااااااااا الواحد زهق

[الممول العجيب]

والله العظيم ما في تعليق ااحلي من تعليق الاستاذ الكبير سي السيد

لانه موتني من الضحك

هههههههههههه

خلي الراجل يبلبط واهي مصر كلها بلبلطه ومحدش عارف ولا فاهم حاجه

[essamalshaaer]

تسلملي على الرد يا سي السيد وفعلا ....على رأي الممول العجيب ما البلد كلها بتبلبط منبلبط معاه ....

وفعلا شر البلية ما يضحك وعجبي .....

[ssmaly]

رد سى السيد اقل شىء يقال عنه انه زى العسل

و حسب طريقية سى السيد يتغير المانشيت الى"

رئيس الوزراء بالمايوه الحق قبل مايلبس ياجدعان(على وزن الحق قبل ما يعقل)

اعتقد ان الموضوع كبر بسبب رد سى سيد اللى موتنا من الضحك

انا نفسى نقرا مانشيت يقول ان رئيس الوزاراء بيعمل حاجة مفيدة بجد للشعب اللى فيه ناس لابسين مثل المواطن(هانى رمزى) فى مسرحية تخاريف يعنى اقل من مايوه سيادته

[اسماعيل امين]

ليه حلال عليهم حرام علينا ؟

1- بن جوريون رئيس وزراء اسرائيل .قبل اتخاذ قرار حرب 1965 يوجد صور له هو يسبح في حاله استرخاء وسمو وتعمق في التفكير قبل اتخاذ قرار الحرب .

2- اشكول رئيس وزراء اسرائيل .اعتراف من زوجته انه كان يعزف ويستمع لمقطوعات موسيقيه طوال ليله 4 يونيو 1967 .

لماذا نضن علي الرجل بعدت ساعات او ايام يقضيها مع اسرته واصدقاؤه .

سؤال الي كل رجل او شاب .

بعد ارهاق اسبوع عمل او دراسه .كيف تستمتع بعطله نهايه الاسبوع ؟

لا نعرف كيف نعمل ؟او كيف نستمتع (من منظور شرقي يتناسب مع عاداتنا وتقاليدنا )؟

[essamalshaaer]

عزيزي الأخ أسماعيل ....انا على سبيل المثال بعد نهاية أسبوع طويلة في العمل هنا في الرياض

يجي يوم الخميس تلاقي نفسك مش عارف تروح فين ....بجد الرياض او السعودية مش زي مصر

بتاتا .... تلاقيك تروح حديقة مفتوحة تقضي انت واسرتك يوم مع أسرة أحد الزملاء او أحد المراكز التجارية

تشتري ومها تفسح العيال في الملاهي الموجودة جواه راح عليك الخميس ....

نيجي للجمعة تصحى الصبح تروح تصلي الجمعة ترجع تتغدى أو في أحيان كتييير تفطر وبعد المغرب تتغدر...

كده مفيش فرصة تخرج لأن الولاد عندهم مدارس يعني لازم نوم بدري ..... وتدور بينا الغربة

وصدقني بجد الأيام هنا زي بعضها متفرقش غير في الخميس والجمعة فقط .... والحمدلله إحنا أحسن من غيرنا بكثيييييير

أنما أخوانا الوزراء والشخصيات الكبيرة معندوش المشاكل دي خالص صدقني ده ترفيه عن النفس وشكليات بس لا أكثر ولا أقل

وهل انت متخيل انه ممكن بيستجم علشان يركز في قرارات مصيرية تهم الناس زي بن جوريون أو اشكول رئيس وزراء اسرائيل

الفرق كبير بنهم وبينه دول أخذو قرارات زي ما تفضلت وكتبت ألى الآن بننكوي بنارها مبالك هو .... هل يصدر قرار يهم الناس في:

1- أيقاف مذابح المصريين على الطرق بسبب سوء عملها وكل يوم نسمع عن ناس بتموت توصل الى 10 ألاف في السنة.

2- أنهيار الصناعة الوطينة وأحتكار المواد ورفع أسعارها على الناس أضعاف مضاعفة.

3- إنهيار الزراعة في مصر وتشمل على تقلص المساحة الزراعية وسوء توزيع المياه وتسمم الزراعات بالمبيدات المسرطنة وتشريد الفلاحين وسحب أراضيهم.

4- بيع املاك الدولة وتبديد تلك الأموال على مصروفات فارغة علشان سياته يستجم ويركب عربيات.

5- أستشراء الفساد الإداري في جمييييييييييييييع المصالح الحكومية بلا استثناء وجميع الوزارات.

6- سرطان البطالة الذي يستشري بين الشباب وخلق شباب مريض نفسيا وخلقيا ليس له طموح او هدف سوى الهروب بالموت على شواطيء الدول الصديقة.

7-أنهيار المجتمع خلقيا من قضايا القتل والنصب والبلطجة وأصبحة دولة القانون هي الآن دولة البلطجة والحرامية ورجال الأعمال اللصوص.

في النهاية صدقني أنا اشفق على مثل هذا الرجل عارف ليه .... لأنه لا يعلم ما هو قادم .....لأنه سيكون أكبر مما تتوقعه الناس ... وحفظ الله مصر وشعبها.