سمك مع الثوم والمايونيز والفلفل جرب ومش هتندم

[بندق أفندى]

هى ببساطة .. سمكة لوت .. اللى نبهنى لها الحاج فوزى أكرمه الله .. كنت باتعامل معاه فى مصر فيليه .. بس لقيته هنا هو قليل ومع ذلك سعره رخيص .. يعنى من 10 الى 25 ريال لليكلو ..

المهم لقيت واحدة حوالى كيلو ونص طازة أوى .. قلت للولد بس يقشرها ويتركها من غير ما يفتحها .. وفى البيت فتحتها من ظهرها مرتين .. كل جنب مرة عشان أشيل الحسك وكده بقت مخلية بالكامل .. على بعد 1.5 عملت فيها شرحات بالعرض من ناحية اللحم لحد ما توصل للجلد ..

ثم تتبل بالخل والملح لمدة 3 دقايق .. وبعدها تدهن بخليط مفروم الثوم والزنجبيل الطازج .. (يمكن الاستغناء عن الزنجبيل) .. وزيت زيتون .. وندخلها فرن حامى لمدة 10 الى 13 دقيقة .. بعدها نخرجها نضع خط مايونيز وخط مسطردة .. ثم شرائح الفلفل وندخلها الفرن لمدة 10 دقائق أخرى .. طبعا لأنها بتكون ضعيفة صعب التعامل معاها .. لابد من طهوها فى صينية للتقديم مباشرة .. حتى لا تتهرى زى ما حصل معايا كده

المهم طلع طعمها جبار ..

كنت عامل معاها سلطة خص مع فجل احمر فقط وأرز أبيض .. من الاستمتاع نسيت انه فيه رز أصلا ..

وبعدين حليت بتين مشوى .. مكرمل بالسكر وغرقان فى الصوص اللى طلع منه (شكله وهو مفتوح كده بيفكرنى بالعصافير المشوية .. عشان التين كن اخضر ومالوش طعم .. بس بقى له طعم

[لولا]

تؤتؤ .. بجد بجد .. هايل .

يعنى الواحد لما بيقرا وصفه ويشوف صور حقيقه للنتيجه بيتشجع جدا انه يجرب الطبخه على طول.

طبعا الوصفه هايله والمشجع فيها انها سهله وسريعه.. حضرتك قلت ممكن نستغنى عن الجنزبيل .. بس مش عارفه لو ممكن نستغلى عن المايونيز اوكى ونخليها بس مسترده ولا فى تأثير على الطعم .

كمان التين المشوى بالسكر فكره ممتازة للتين اللى بيجى ماسخ جدا الأيام دى .

ميرسي على الوصفات .. والصور اكيد.

تحياتى

لولا

[سهيلة]

كعادتة بندق افندى بيتحفنا باكلاتة اللذيذة وبيفتح نفسنا كمان

طب اعمل اية انا دلوقتى والساعة واحدة ونص ليلا انزل اشترى سمك منين ؟؟

تسلم ايدك يا افندم

:rolleyes:

[Torontotruk]

هى ببساطة .. سمكة لوت .. اللى نبهنى لها الحاج فوزى أكرمه الله .. كنت باتعامل معاه فى مصر فيليه .. بس لقيته هنا هو قليل ومع ذلك سعره رخيص .. يعنى من 10 الى 25 ريال لليكلو ..

المهم لقيت واحدة حوالى كيلو ونص طازة أوى .. قلت للولد بس يقشرها ويتركها من غير ما يفتحها .. وفى البيت فتحتها من ظهرها مرتين .. كل جنب مرة عشان أشيل الحسك وكده بقت مخلية بالكامل .. على بعد 1.5 عملت فيها شرحات بالعرض من ناحية اللحم لحد ما توصل للجلد ..

ثم تتبل بالخل والملح لمدة 3 دقايق .. وبعدها تدهن بخليط مفروم الثوم والزنجبيل الطازج .. (يمكن الاستغناء عن الزنجبيل) .. وزيت زيتون .. وندخلها فرن حامى لمدة 10 الى 13 دقيقة .. بعدها نخرجها نضع خط مايونيز وخط مسطردة .. ثم شرائح الفلفل وندخلها الفرن لمدة 10 دقائق أخرى .. طبعا لأنها بتكون ضعيفة صعب التعامل معاها .. لابد من طهوها فى صينية للتقديم مباشرة .. حتى لا تتهرى زى ما حصل معايا كده

المهم طلع طعمها جبار ..

كنت عامل معاها سلطة خص مع فجل احمر فقط وأرز أبيض .. من الاستمتاع نسيت انه فيه رز أصلا ..

وبعدين حليت بتين مشوى .. مكرمل بالسكر وغرقان فى الصوص اللى طلع منه (شكله وهو مفتوح كده بيفكرنى بالعصافير المشوية .. عشان التين كن اخضر ومالوش طعم .. بس بقى له طعم

الفلفل لازم يكون حامي..

[بندق أفندى]

دول الصور كما يجب أن تكون لأنها أوضح ... بعد المرحلة الأولى من الطهى وبعد تمامه

تم تعديل 7 فبراير 2009 بواسطة بندق أفندى

[Amr Radwan]

بندق افندي .. اية اخبارك ؟؟

بجد تسلم ايدك .. و اكيد طعمها ممتاااااااااااز ..

و اللي عجبني اكثر هو طريقة تزويق الطبق و خاصة التين اللي بطلت اكله بسس انه بيكون ماسخ و مالوش طعم .. كده ممكن احاول اشتريه تاني ...

شاكر ليك مجهودك ngh:

[بندق أفندى]

شاكر لكم جميعا ..

الأخت لولا المايونيز بعطيها تسكيرة بتكون غريبة على طعم السمك ..

مسطردة بس ممن بس تخليها مع التتبيلة اللى قبل الطهى مع التوم وحطى عليها الفلفل واديها 15 دقيقة على بعض فى الفرن ..

سهيلة اله يكرمك ويمتعك بالصحة والعافية .. وممكن تجربى فى وقت .. انا بأجرب الخميس والجمعة بس .. عشان الوقت

تورنتو الصور الأخيرة فيها فلفل حراق .. كل واحد يفعل ما يريد حسب ذوقه

[se_ Elsyed]

بندق باشا

ممكن الأستعاضة عن سمك التوت ده بأي نوع كويس فيليه برضوا .. ولا لازم توت ؟

[مغتربة]

وااااااااااااو يظهر انى وصلت متاخرة فمش عارفه لسه ليه نايب و لا لا

بس بصراحه روعه و تفتح النفس

و معلش اطمع منك انك تحط وصفه التين المكرمل دة بالتفصيل

لانه بصراحه عجبتنى الفكرة جدا

الف شكر و تسلم ايدك wst::

[fatfouta]

شكراااااا على الجمال ده كله يا اخ بندق

هتبوظلنا الرجيم بتاع ام بلال يا اخى والله بالوصفات اللذيذة دى

[بركة]

شكرا جدا جربتها النهارده بفيليه هامور وعجبتنا جدا

شكرا للمرة التانية

[بندق أفندى]

بندق باشا

ممكن الأستعاضة عن سمك التوت ده بأي نوع كويس فيليه برضوا .. ولا لازم توت ؟

رد عليك أخونا بركة تحت أهه .. أى سمكة ناعمة .. هطلع كويسة .. فيه الحمام هتبقى كويسة .. ممكن البورى بس محتاج سمكة كبيرة شويتين

وااااااااااااو يظهر انى وصلت متاخرة فمش عارفه لسه ليه نايب و لا لا

بس بصراحه روعه و تفتح النفس

و معلش اطمع منك انك تحط وصفه التين المكرمل دة بالتفصيل

لانه بصراحه عجبتنى الفكرة جدا

الف شكر و تسلم ايدك :lol: :phar:

الموضوع بسيط خالص .. بنشق التين شقين من ناحية العنق .. دون ان نقطعة مرش عليه سكر خشن .. نضع عليه قطعة زبد صغيرة .. بعدين ندخله الفرن

لما بنخرجه بنفحته ونسقيه من الصوص المتكون

شكراااااا على الجمال ده كله يا اخ بندق

هتبوظلنا الرجيم بتاع ام بلال يا اخى والله بالوصفات اللذيذة دى

على فكرة .. .. وجود الخل فى الأكل يحل مشكلة الدهون بنسبة كبيرة جدا .. من سنتين كان وزنى 114 كيلو (مع طول 190 مش باينة أوى)

أمس وزنى 93 كيلو .. كل اللى شيلته من أكلى هو أكل الفوووول .. وبآكل كل حاجة وخصوصا الشيكولاتات والمقرمشات وخلافه .. بس كله أكل من جوة مفيش أكل مطاعم الا نادرا

شكرا جدا جربتها النهارده بفيليه هامور وعجبتنا جدا

شكرا للمرة التانية bk:

بالهنا والعافية

[بركة]

أنا مدام بركة يا اخواني الاعزاء

عملت النهارده الخلطة نفسها مع دجاج بالعظم وطلعت تمامممممممم

ولسة اللحم والفراخ الفيلية هاقولكم اخر الانباء

سلام عليكم دلوقتي :lol:

[ام بلال]

أتوقع هتطلع تحفة ، لا تقلقي عزيزتي فتفوتة السمك عموما صديق للنظام الصحي، و بعدين نظامنا بناكل فيه كل حاجة، مع تظبيط الكميات و تنظيم مواعيد الوجبات فقط ، و أهم حاجة مسألة القلي في الزيت تجنبناها لأن لها مضار صحية كبيرة جدا ،

شكرا أستاذ بندق

تم تعديل 9 فبراير 2009 بواسطة ام بلال

[بندق أفندى]

أتوقع هتطلع تحفة ، لا تقلقي عزيزتي فتفوتة السمك عموما صديق للنظام الصحي، و بعدين نظامنا بناكل فيه كل حاجة، مع تظبيط الكميات و تنظيم مواعيد الوجبات فقط ، و أهم حاجة مسألة القلي في الزيت تجنبناها لأن لها مضار صحية كبيرة جدا ،

شكرا أستاذ بندق

الله يكرمك يا أم بلال .. تصدقى انى مش بأعرف أقلى السمك من أصله؟ وكل مرة أجربها يطلع بشع ..

بس فيه طريقة صحية للقلي بيكون نسبة الزيت قليلة جدا ..

[Emo]

استاذ بندق..هعمل ان شاء الله طريقة السمك دي النهاردة..

وهبلغ حضرتك بالنتائج..

اكيد هتطلع رووعة..مدام وصفة حضرتك..

الله يسعدك..

[بندق أفندى]

ودى آخر اصدار

بخلطة الخل البلسمك والليمون اللى عملنا بيها اللحم سابقا