استفسار بخصوص التجنيد

[proxy]

انا شاب عندي 24 سنه بعمل في الامارات من سنه تقريبا .

لما سفرت من مصر كنت واخد تاجيل من الخدمه العسكريه لمده 3 سنوات تنتهي في 14-1-2010 .

هل هذا يعني اني لازم في تاريخ انتهاء التاجيل اتقدم لمركز التجنيد ؟

و البعض نصحني بعدم النزول الي مصر حاليا لاني لن استطيع الحصول علي تصريح سفر من مركز التجنيد ؟

هل هذا الكلام صحيح ؟؟ و يا ريت لو في حد مر بموقف زي ده يا ريت يفدني .

[الباشمهندس ياسر]

انا كنت واخد تاجيل 3 سنين

و كنت بسافر وارجع ...عادى جدا

و بطلع تصريح السفر ببساطة تامة ..

المهم انت تقدر تروح وترجع لغاية قبل يناير 2009 .. يعنى خلاص بخ ((معلومة غير موثقة ))

الافضل بقى انك تكمل لغاية ما يخلص التاجيل الجميل

بالنسبة لانك لازم تسلم نفسك

الكلام ده مش حقيقى الا ف حالة واحدة و هى انهم يطلبوا الدفعة بتاعتك و ده مبيحصلش اصلا

انما انا شخصيا قابلت ناس كانت مسافرة ورجعت بعد سنة واتنين من انتهاء التاجيل وراحت خدت الشهادة النهائى ببساطة تامة

ملحوظه هامة : كل ما سلف من واقع تجارب شخصية او تجارب بعض المعارف ولا علاقة له من قريب او بعيد باى اطلاع ع القوانين العسكرية

[Digital]

يا جماعة انا واقع في عرضكم اي حد عنده معلومة عن الموضوع ده او مر بالتجربة دي يفيدني انا في نفس حالة الاخ بروكسي لكن مشكلتي ان تاريخ تاجيلي انتهي فعلا في شهر يتاير 2009 يعني اكتر من 6 شهور و مقدمتش النموذج او الشهادة بتاعة التاجيل لمنطقة التجنيد في مصر لان انا و كل اهلي هنا فمش عارف هيكون ايه النظام لما انزل مصر ناس قالولي بيعندوا و بياخدوا الناس دول و بيبقي فيه قضية و غرامة و حجز جوا البلد، مش مشكلة غرامة ياخدوا ان شا الله 10000 جنيه بس قضية و حبس دي مصيبة او حتي لو حجزوني شهر او اتنين او تلاته ممكن اتفصل من شغلي هنا، و ناس تانية قالوا لا عادي بتروح تاخد الشهادة النهائي بدون مشاكل، ممكن حد يفيدني و لو بصورة مبدئية او اي معلومة اكون له من الشاكرين، لان هذا الموضوع بسببه لا انام !!!!!!!!!

[Digital]

للرفع

[زعلان]

روح اسأل محامي ثقة ما اظنش في حبس الا لو استدعوك انت شخصيا رسمي وطالما انت شغال بره مصر غالبا ما بيعملوش مشاكل وبيدوك تأجيل

طب سؤال للي يعرف معلومة على الماشي هو ازدواج الجنسية بيحتاج تعمل تأجيل قانونا وهل لازم تروح تأخد اعفاء ولا مفيش داعي لكل ده ويكفي انك تثبت انك مزدوج الجنسية لو سألت من قبل اي جهة عن التجنيد

طيب سؤال كمان هلى لما بتعمل بطاقة طبيعي انهم يسألوك عن الجيش و الخدمة العسكرية ولا ما بيسألوش اصل انا محدش سألني عن حاجة فهل ده بسبب ازدواج الجنسية ولا هما اصلا ما بيسألوش حد

وهل بيتكتب في البطاقة موضوع الجيش و هل لو اي جهة مسؤلة سألتك انت مطالب بانك تثبت لها انك معفي او انك خلصت الجيش يعني هل بيدوك لما تخلص الجيش ورقة بكده

[Digital]

يا جماعة حد تاني عنده معلومات عن الموضوع ده او مر بنفس التجربة اتمني يطمني بس لا اكثر و لا اقل و شكرا لكم جميعا

[Digital]

ان الله في عون العبد مادام العبد في عون اخيه

[زعلان]

يا عم دجيتال الناس الي عارفه حاجة اول ما تقرأ حترد عليك ولا انت عايز حد يقول اي كلام وخلاص اصبر لما الناس تشوف الموضوع والي عنده معلومة مش حيبخل بيها و في ناس ردت قبل كده

[المخنوق دائما]

انا اللى اعرفه من تجربة واحد صاحبى انه خلى اخوه فى مصر هوه اللى يعمله شهادة الاعفاء النهائى وبدون اى مشاكل

بس اهم حاجه انهم مايكونوش طالبين حد من الدفعه اللى كانت متأجله معاه

وربنا يكرم

[Digital]

يا استاذ مخنوق ان شاء الله مفيش حد مطلوب من الدفعة لان ببساطة القانون بيقول انه لا يجوز استدعاء اي حد اتعمله تاجيل الا في حالة الحرب و التعبئة العامة او بقرار من رئيس الجمهورية تمام كده؟

حتقولي طيب خايف من ايه

انا خايف من حاجتين

(1) انه يتعملي قضية و انا عارف انها بتخلص علي غرامة لاني لو كنت عاوز اهرب كنت هربت من الاول لكن انا كنت مسافر بره وقت ما فترة التاجيل (تاجيل دفعة و ليس تاجيل لظروف شخصية او عائلية) و الباسبور و اختام الدخول و الخروج و الاقامة تثبت كده، طبعا مش بتكلم علي الفلوس لا انا بتكلم ان انا عاوز اقدم علي هجرة لاستراليا ان شاء الله و لو اتعملي اي قضية و لو كانت تافهة و متحكمش فيها حتي باي شيء غير الغرامة موقفي غير مضمون في الموافقة علي الهجرة ... يعني شكرا كده روح بلدك

(2) ان لو انا نزلت مصر بشخصي ابقي قابلني لو عرفت اطلع بره مصر لو مخدتش منهم شهادة الاعفاء النهائي او تاجيل لفترة تانية، عشان كده حتضيع عليا الاجازة و حوكل والدتي بتوكيل رسمي من السفارة هنا انها تاخدلي الشهادة من هناك و تسويلي موقفي و تدفع اي غرامات او اي حاجة من الحاجات دي

شكرا لاي حد مر بتجربتي يدخل دقيقة يقولي عمل ايه اكون شاكر لييييه جدااااااااا

او حتي يعرف اي حد مر بنفس القصة دي

[Digital]

اضافة بسيطة ان المشكلة الاساسية ان فترة تاجيلي انتهت شهر يناير السنة دي يعني من 6 شهور و انا مخدتش اي اكشن يمكن ده اللي قالقني شوية ياريت حد يقولي دي فيها مشكلة و لا عادي؟

[Digital]

:)

[عنبو]

ياعم متخفش ولا حاجه الموضوع بسيط جداً انا واحد صاحبى كان مسافر وكان عامل توكيل عام لابوه ولما جه موعد استلام النهائى ابوه راح استلمه وهو رجع بعدها بسنه وعادى خالص مافيش اى مشكله يعنى انت تنزل وتروح تاخد بطاقتك عادى خالص طالما اخدت تأجيل من الاول ومافيش اى حروب يبقى خلاص

[Digital]

يا استاذ محمد ما دي المشكلة، هوا (ابوه راح في المعاد) لكن انا مرحتش في المعاد و لا اي حد من طرفي و من 6 شهور فاتوا سؤالي انا علي الحتة دي بالذات .........

[Hazemmagdi]

طيب ما ممكن تعمل الخطوة ديه من السفارة زي ما انا عملت , بتروح تسلمهم الشهادة اللي فيها تأجيل يقولك تعالى بعد شهرين وتستلم شهادة الاعفاء

أو تعمل توكيل لحد تعرفه في مصر قريبك او غيره

أنا اعرف احد كان وحيد اهله ومرحش خااااااااالص الا بعد كام سنة عشان يطلع شهادة الاعفاء والموضوع مشي عادي جدا

وعموما اللي انا اعرفه انه عادي خالص التأخير مفهوش مشكلة الا لو دفعتك اطلبت بعد التأجيل وانت مرحتش ومااظنش ده بيحصل أما لو انت متأكد انها اخدت اعفاء يبقى ان شاء الله مفيش مشكلة

في الأخير رايي عشان تضمن لإما تعملها من السفارة أو حد يعملهالك في مصر

[غريب الخبر]

طيب لو سمحتم بالنسبة للى انهى خدمته العسكرية وطلع تصريح السفر من الجيش علشان السفر . هل كل مرة يسافر فيها ( يعنى خروج وعودة ) مطلوب منه يجيب تصريح جديد ولا هى اول مرة وبس .

تحياتى للجميع

[Guest السندباد...]

السلام عليكم اخواني 

لو سمحتو عايز افاده 

انا عل قيد عائلي وواخد تاحيل بتلت سنين وباقي منهم خمسه شهور 

واخويا اللي تحت مني كل ميروح التجنيد يرجعوه تاني ويقلولو ان ورقك مش عندنا 

ما علينا انا عايز اعرف دلوقتي هل لو انا رجعت مصر  وكان باقي فالتاجيل شهر ويخلص ممكن ارجع تاني السعوديه.. انا عايز انزل مصر اقعد شهرين ولا حاجه وارجع تاني السعوديه علشان طالما اخويا مدخلش الجيش كده انا مش هفضل العاىل للعيله ولا اي الدنيا 

يا ريت افاده 

ويا ريت حد يقولي لو ينفع ارجع  السعوديه ولسه باقي فالتأجيل شهر مش هتمنع من السفر يعني 

[Guest احمد سمير]

كل قنصليه بيكون فيها ملحق عسكري ممكن تخلص منه اجرائات التجنيد الخاصه بيك من غير ما تنزل مصر اسال عليها في القنصليه وهيقولوا لك عليها