أنقلاب في نفاقستان

[Scorpion]

هناك في هذه الدولة البعيدة جدآ جدآ جدآ عنا... ( يعني علي بلاطة مش بتاعتنا يا سيادنا ياللي معانا)... في قصر السلطة دار هذا الحوار بين السلطان و أبنه :

- صباح الخير يا حبيبي... ايييه الأخبار ؟

- صباح الخير يا بابا.. مافيش أي حاجة جديدة.. بس أمبارح ما نمتش كويس.. يعني نمت و الشباك مفتوح... و الظاهر أن بنطلون البيجامة أتسحب مني.. أو سحلية عدت علي قفايا.. فقضيت طول الليل في كوابيس..

- أحكيلي يا جمال الدين يا حبيبي.. حلمت بأيه؟؟؟؟

- قال ايه يا بابا.. خير اللهم أجعله خير...قال الأمريكان هجموا علي السلطنة.. و أحتلوها بحجة أن الديموقراطية ناقصة في السوق عندنا...و هما عندهم فايض عايزين يصدروهولنا بالعافية بدل ما يرموه في البحر زي اللبن كده..

- و بعديييين ؟

- و بعدين أول ما دخلوا... هوببااااااااااا الشعب كله هاج.. بس مش عليهم ... دول هاجوا علينا النماردة دول.... ما لحقناش نِكُت و مسكونا كلنا.. انت و انا و كل مستشارين السلطنة.. و علقونا كلنا عل فلكة و وقفوا طوابير ورانا... و كل واحد ييجي دوره يفش فينا غيظه بطريقته.. و مافيش أي حاجة ممنوعة.. و مش كفاية ده بعد ما يفش غله.. يرجع تاني يقف في الطابور من جديد و يستني دوره... و فضلت يا بابا طول الليل أعيط و أعيط و أقول كفاية كفاية لحد ما صحيت لما حسيت أن المرتبة تحتي بقت مبلولة...

- ايه يا حبيبي الكوابيس دي؟؟... لأ لأ لأ... أنت من الليلة تيجي تنام في حضني..و عالعموم يا روح بابا ديه أحلام مش ممكن حتحصل أبدآ.

- و أفرض يا بابا ده حصل فعلآ..ما هو السلطان بن حسين كان متأكد برضه أن ده مش ممكن يحصل أبدآ.. و أديك شفت عملوا أيه فيه هو و ولاده..

- يا حبيبي ده حمار.. أحنا مع الأمريكان مش ضدهم زي ما هبب البجم ده... و بعدي شعب أيه اللي هتخاف منه ده... ده شعب معيز تلمهم بحتة عصاية...

- يا بابا مش فاكر كان فيلم ايه االي قالت فيه الست.. ده دود يالاه.. و بعدين الدود طالهم... لأ يا سيدي أنا مش مقتنع أنا عايز أكون مقتنع مليار في المية... ده مستقبلي أنا يا بابا....

- يعني هأعمل أيه أكتر من اللي بعمله يا كبد بابا... أنت باين عليك عايز فلوس تانية.. ما تقولها بصراحة لبابا ..

- كلك نظر يا سيد الكل..

- خلاص يا حبيبي.. عشان خاطر عيونك نلغي الدعم نهائيآ عن أي حاجة.. ماهو وجوده زي عدمه دلوقتي..بكده نضرب عصفورين بحجر واحد.. صندوق النقد الدولي يرضي عنا و يوافق علي السلفيات و المنح المطلوبة حلال بلال عليك يا عم.. و السوق يبقي في جيبك تاخد توكيل الدقيق.. و الأدوية... و اللبس و الشرب وكله.. السوق كله بتاعك يا حبيبي .. ده انت أغلي حاجة عندي..

- و هتقنع الشعب أزاي ؟

- الشعب.. آأأأأه.. المعيز.. يعني هأقولهم ايه يا حبيبي.. الحتتين بتوع كل مرة.. الأقتصاد العالمي بايظ.. و عنق الزجاجة و شدوا الحزام و الذي منه..يعني هنِغلَب...

- ربنا يخليك ليا يا بابا.. يا أحسن بابا في الدنيا.

في أحدي شوارع العاصمة القديمة... شوارع حالكة .. مظلمة..تنوء بحملها من بيوت قديمة .. متهالكة.. حزينة.. و في احد هذه البيوت مجموعة كبيرة من الأصدقاء تتناقش في حماس شديد :

- أحنا هنفضل ساكتين لحد أمتي.. أنا مش قادر خلاص..

- عندك حق.. ده أحنا وصلنا خلاص للقاع..

- يا ريت القاع و بس..ده أحنا وصلنا للقاع و أبتدينا نحفر..

- أصبروا يا جماعة.. الصبر مفتاح الفرج.. بكره ربنا يفتكره و يغور

- و بعد ما يغور يا خويا هتتحل في رأيك.. ديه هتتنيل زيادة

- انا مش هاقدر أصبر أكتر من كده.. خلاص.. خلاص... حنشد الحزام أكتر من كده أزاي؟.. ده انا كل شوية أخرم خرم جديد في الحزام لحد ما آخر خرم وصل جنب الأبزيم.. يعني ايه.. حاخرم الأبزيم بعد كده؟؟؟

-يا عالم..يشيلوا الدعم كله...و مرة واحدة كده ؟؟؟..يعني يرضي ربنا اني مش قادر اجيب حق سندوتشات العيال اللي يروحوا بيها المدرسة...و الا حق المدرسة نفسها و الكتب و الهدوم.. ده انا عملت أستبدال معاش عشان أجيب حقهم.

- خلاص... وقت الكلام أنتهي و جه وقت الفعل... أحنا لازم نعمل حاجة.. كفاية ولولة زي النسوان.. نطلع بقي من القوقعة و نغير بأيدينا الأحوال.. ما فيش حد هييجي يغيره لينا عشان سواد عيوننا.

- ايييه..عايزنا نعمل مظاهرات؟؟؟

- المظاهرات مش هتجيب نتيجة.. أحنا هنعمل ثورة.. أنقلاب..

- يا نهار أسود.. ثورة حتة واحدة.. ده كلام كبير قوي قوي يا عمنا... ده الواحد لو قال لواحد من الحراس صباح الخير بينفخوه.. ده اسمه محاولة قلب نظام الحكم.. و خيانة عظمي... و اعدام..و..و..و..و

- ما فيش حاجة ببلاش...اللي عايز يغير ما يفكرش في اللي حيحصله.. و اللي يخاف ما يجيش.. و اللي ييجي ما يخافش.. الجماعة معانا خلاص قررت... البلد جاهزة و محتاجة بس الفتيلة اللي تولعها.. و احنا اللي هنولع الفتيلة دي.. ايه رأيكم.. معانا و الا لأ ؟

- يا عم دي حاجة كبيرة قوي.. اشمعني أحنا اللي نولع الفتيلة ديه.. ده احنا عالم بسطاء.. عاديين.. غلبانين.. بنجري علي لقمة عيشنا.

- ما هو ده اللي جايبلنا الكافية..اللي مخليهم راكبيننا و مدلدلين رجليهم من سنين و سنين... بس لأ.. تاريخنا مليان ناس زينا كده.. بسطاء.. غلبانين.. هما اللي قاموا بالثورات.. هما اللي دوروا علي مستقبل جديد..و دلوقتي جه دورنا...عالعموم أنا مش بجبر حد.. اللي عايز يشارك أهلآ و سهلآ.. و اللي مش عايز . برضه أصحاب.. أحنا مش مستنيين أن الجميع هيشاركوا.. بس لازم نكّون النواية في الأول.

- يعني حنعمل ايه ؟

- حنعمل ايه.. ده لازم ندرسها كويس قوي.. المهم النية تكون موجودة و من غير خوف... ديه البداية.. يالله مين معانا ؟؟؟

- أنا

- أنا

- و أنا معاكم..ضربوا الأعور علي عينه

- أنا.. أنا لأ..معلهش يا جماعة أنا ورايا عيال

- و أنا كمان لأ... عمرنا ما هنقدر نغير حاجة..مستحيل.. ده غول كبير يا سيادنا.. ده أنا متأكد أن كل اللي قولناه دلوقتي متسجل.. و أول ما حنخرج هنتمسك و أعدام دوغري..

- أنا قلت الي خايف يرجع بيته..

- سلامو عليكو

- و عليكو السلام

و بعد كثير من المناقشات و أنضمام البعض و أنسحاب الآخر بقت مجموعة من الأصدقاء..

- دلوقتي حنعمل ايه ؟

- دلوقتي ترجعوا كلكم بيوتكم.. و نتقابل بعد يومين تلاتة نكون رتبنا أفكارنا..

- سلام

- سلام

ألان حاولوا معي ايجاد تكملة لهذه القصة (الخيالية)... يعني جرجرة رجل..عشان انا في المعتقل لوحدي حيكون شكلي وحش قوي.. يعني اللمة حلوة برضه و أخواننا اللي بره لما ييجوا يزورونا يبقوا يشتروا الحلاوة و البرتقال بسعر الجملة و نوفر عليهم.

فيروز ... وصيتك المانجة بلاش القصب في المعتقل أبوس أيديك

[se_ Elsyed]

والله أنت مشكلة من مشاكل الزمان يا سكوب ... وعندك حقيقي موهبة الكتابة الساخرة ( كوميديا سوداء من بتاعة عمنا نجيب الريحاني )

إستمر فى الكتابة وظبطلنا فى الأخر حاجة حلوه على ذوقك .

( وش بيقول الحقيقة لكنه فى نفس الوقت واقف ورا سكوب وبيذوقوا علشان ينزل فى الحفره )

[صعيدي]

بص يا سيدى

بعد تفكير عميق استقروا على الخطة التالية عمل تنظيم الاحرار الروشين

نشر كثير من الاشاعات عن قوة تنظيمهم وعدد الافراد الكبير و تغلغل التنظيم فى القوات المسلحة والشرطة والاعلام

وقرروا ان ساعة الصفر تكون يوم الاحتفال بعيد ميلاد الدكتاتور

وقسموا انفسهم مجموعتين المجموعة الاولى تتنكر فى شكل ممثلين وتدخل التليفزيون وفى استديوا الاخبار يرشوا بودرةعفريت على كل الموجودين ثم يتقدم على فجله ويلقى بيان الثورة رقم واحد "لان على فجله له خبره فى الاذاعة المدرسية من ثلاثين سنة"

ويعلن ان الكيل قد فاض من اعمال الدكتاتور و حاشيته ومن ثم قرر الاحرار الروشين الاستيلاء على السلطة و ان اخوانهم فى القوات المسلحة والشرطة يساندونهم

تتحرك المجوعة الثانية فى الشارع فى نفس اللحظة لتعلن للناس نهاية عصر الدكتاتور وان ثورةالاحرار الروشين قد نجحت و ينفجر بركان الفرح فى البلاد وتخرج المظاهرات وتعم الاضطرابات فى انحاء البلاد .

يصل الخبر الى قصر الدكتاتور وابنه فينتابهم الفزع والرعب من ثورة ويصرخ جمال الدين فى والده مش قلتلك الحلم بيتحقق و هنروح فطيس.

الدكتاتور يحاول ان يطمئن ابنه و يقوله متخافش ان عامل حساب يوم زى ده واحنا هربنا كل فلوس البلد اقصد فلوسنا الى سويسرا و هنروح لحبايبنا الامريكان علشان يخرجونا

المشهد فى التليفزيون بعد ازاعة البيان الاول الناس تعرف ان فيه ثورة لكن مين هم الاحرار الروشين محدش يعرف غير على فجلة ....و فجأة

.

.

يتبع

[سقراط المصري]

الاخ Scorpion

الفكره حلوه كمل.

بس ياريت تنهي القصه بشىء واقعي ممكن ان يحدث.

الاخ صعيدي كتب:

الاحرار الروشين

الروشين مابيقوموش بثوره. ولا يقدروا حتى يهشوا ناموسه.

وعلى رأي الجمله الشهيره في أحد الافلام:

إحنا كنا رجاله ووقفنا وقفة رجاله

بلدنا عايز يد واحده ، وعزيمه ، ونيه صافيه.

تحياتي

سقراط

[زهــZــرة]

حلو قوي الموضوع ده

ده احنا ح ناكل اكل

استنوا اجيب لكم عمود مليان خضار ورز وشوية طرشي ف كيس واجي استربع واقعد جنبكم ونكمل سوا

حد بيحب يمص قصب

اصل القعدة عايزة حاجة حلوة واي حاجة حلوة غالية ومولعة نار

جاية لكم بعد شوية

حد عايز حاجة او نفسه ف اكلة معينة يعني

اتمنوا

مين عارف ح يحصل ايه بكرة ( وش عامل نفسه خايف ههههههه وهو مرعوب )

[صعيدي]

الحلقة الثانبة

أعلن ضباط الجيش والشرطة ولائهم للثوار و تخليهم عن الدكتاتور اللعين مما أعطى الثوار دعما قويا

المشهد فى السفارة الامريكية الدكتاتور وابنه والحاشية جميعهم ينتابهم الرعب ويطلبون الحماية من السفارة الامريكية و يطلبون بتدخل القوات الامريكية للقبض على المخربين وردع الانقلاب

وصلت الاوامر من البيت الابيض بضرورة القبض على الدكتاتور وحاشيته وتسليمهم للثوار لكسب ثقةالثوار ولان دور الدكتاتور انتهى ولم يعد لو فائدة أو ثمن

لاتزال المظاهرات مستمرة وفى الصباح اليوم التالى خرجت جميع الصحف تؤيد الثوار الابطال وتلعن ايام الدكتاتور الهباب و تذكر الناس بفساده

وترفع راية الولاء للثورة وزعيمها.....زعيمها

لا احد يعرف اسم الزعيم ولكنهم يعرفون على فجلة

اذن فليكن على فجلة هو الزعيم

.

.

يتبع

[صعيدي]

أعزائى

انا استكملت الرواية بإسلوبى البدائى بناء على طلب سكربيون واللى خلع ومحدش شايفه

وأى واحدشايف ان الرواية مفروض تاخد منحنى مختلف يحاول معانا

[سقراط المصري]

صعيدي كتب:

أعزائى 

انا استكملت الرواية بإسلوبى البدائى بناء على طلب سكربيون واللى خلع ومحدش شايفه 

وأى واحدشايف ان الرواية مفروض تاخد منحنى مختلف يحاول معانا

صباح الخير يا صعيدي

اعطني بس يومين على اما افوق من شوية البرد اللي دغدغوا العضم ، وهكتب معاكم سيناريو للحكايه.

وربنا يسهل وافوق من البرد بسرعه اصله دايماً البرد يجي في مواعيد بايخه .

( طبعاً دي حجه حلوه عشان الواحد يزوغ له يومين )

تحياتي للحميع

سقراط

[فــيــروز]

يبدا التليفزيون اذاعة الاغانى الوطنيه التى تشيد بالثوره المجيده

ويجهز الشاعر اللوذعى حسنين بلانص اغانى شهيره ترددها الجماهير احتفاء بالتغيير .. فمثلا هناك اغنية : تووونه تووونه تووونه .. كلنا كده واكلين تونه "اصلى انا باحب التونه اوى يا سكوب زى القصب كده" و اغنية : يا فجله يا حبيييييييييييييييب الملاييييييييييين .. كلك على بعضك غذا و فيتامين

يقرر على فجله البدء فى جذب الشعب تجاهه .. فيقرر اعطاء الجميع اجازه من اشغالهم لمدة شهر .. وطبعا الجماهير الهبله تفرح و تهلل عشان بيموتوا فى الرحرحه و التنبله .. بينما على فجله يخطط لاحتواء الموقف و اعتبار وجود اى شخص خارج بيته خلال هذه الاجازه خارج على قانون حظر التجوال !! اصل الجماهير هتتجول ليه وعلى فجله مديهم اجازه !!

next in نفاقستان :

بلد بالكامل قاعده فى البيت !! اما منظر ..

على فجله يقرر تغيير علم البلد ليحل الفجل محل الغراب فى العلم

تغيير اسم نفاقستان الى فجلستان !!

join us again with the bold "fegla" and the beautiful "nefakestanz"

[Scorpion]

أخوتي الأعزاء.. سي السيد ( والله انت ليك في قلبي معزة خاصة يا بو السيد.... المعزة عشان عارف ردك هي شعور و ليست بحيوان) ... زهرة .. سقراط.. و فيروز ( المفضلة عندي بعد شعنونة)... اشكركم من صماصيم قلبي علي مداخالاتكم... كده علي الأقل ضمنت اربع أصحاب معايا في المعتقل ( يا زهرة قولنا بلاش القصب أبوس أيديكي )..

عزيزي صعيدي.. أولا يا عسل انا ما خلعتش.. بس هي ظروف شغلي بتخليني اقضي متوسط 14 ساعة متواصلة يوميآ بره البيت.. و ساعات بالأسبوعين من غير أجازة.. و لما أرجع اسمحلي يعني بأن المدام و ولي العهد يكونوا أولي بقعدتي جنبهم...انا بكتب بس لما أكون في أجازة أو زي دلوقتي ماعنديش نوم.. مع أني عرف أني هصحي الصبح بكره.. يعني بعد 4 ساعات و كأني مضروب 100 بلغة قديمة.... و لكن كل ده ما يساويش السعادة اللي بحس بيها لما بكون في وسطكم..

كل ده كان أولآ ... أما ثانيآ.. بما أنك ستكون التاني مباشرة ( بعد العبد لله) في لستة المتهمين بمحاولة تنظيم قلب نظام الحكم.. فأنا أحييك و أشكرك بشدة.. هما دول الصعايدة الرجالة.. مش بقية العالم هنا اللي قاعدة تتفرج ببلاش..يا عالم يا خايفة... عالعموم تعبيرآ عن أعجابي..أسمح لي أن أقتبس بعض أفكارك لتكملة الأنقلاب...

و صدقوني... اللي عايز أقوله مش هزار..

[Scorpion]

في الشوارع.. البشر تسير كالزومبي.. عيون فارغة...شجار بلا سبب..لا تستطيع أن تميز صوت ضحكة... بل حزن و يأس و غضب في العيون... و في نفس البيت المتهالك الذي تركناه منذ أيام قليلة.. أبتدأت تدب فيه الحياة من جديد.. مع توافد دخول أفراد مجموعة الأصدقاء...

- أهلآ يا جماعة... أنا شايف ناس جديدة

- دول أصحابنا يا كابتن... أضمنهم برقبتي

- أهلآ بالشباب... و اللهي حاجة تشرح القلب

- فكرت هنعمل ايه ؟

- علي فكرة انا مش لوحدي اللي بفكر يا جماعة.. مش هنبتدي نخلق شخصية أسطورية جديدة... أحنا كلنا بنفكر مع بعض. ... علي العموم اللي وصلناله أننا نقسم نفسنا 3 مجموعات.. مجموعة تراقب قصر السلطان و تحركات السلطان و أولاده و أحتياطات الأمن.. و ديه لازم تكون مجموعة عزاب... و يا ريت أيتام... عشان هما اللي هيكونوا متعرضين لأكبر مخاطرة لما تيجي ساعة الجد. فاهميني يا شباب؟

- طبعآ يا كابتن ... كمل

- المجموعة التانية يكونوا تخصص فني.. و عالم بتعرف تتكلم بلباقة و حلوة كده.. و الآنسات اللي معانا ممكن ينضموا للمجوعة ديه... عايزكم تراقبوا التليفزيون و من فين بيخشوا أستوديوهات التصوير.. و الذي منه...

- ممكن انا كمان انضم ليهم يا أثتاذ ؟( صوت نسائي ألسغ )

- لأ معلهش يا مدموازيا.. بلاش حضرتك.. أحنا هنحتاجك في المجموعة التالتة... مجموعة سلاح الأشاعات... و ديه اللي هتكون أول خطوة عملية لينا... حرب الأشاعات من دلوقتي تبتدي... البلد لازم تتملي أشاعات تخلي الناس من غضبها تسيب خوفها و تطلع من القمقم...

- و الجيش يا أستاذ ؟

- ديه أهم حاجة لازم نضمنها.. من غير مساعدته مش هنقدر نعمل حاجة..

- و البوليس ؟

- البوليس أول ما هيشوف الناس هايجة.. هيكش.. لأنهم عارفين قد ايه العالم محروقة منهم... دول مش هشيل همُهُم.. أهم حاجة زي ما قلنا الجيش و الأمن المركزي.. فيه حد في الجيش معانا ؟

مجموعة ترفع أياديها

- شوفوا يا شباب.. أنتو كل واحد لما يرجع لوحدته يفضل يقول لكل اللي يشوفه أن عنده أخبار أكيدة أن مدة التجنيد هيخلوها 5 سنين.. و أنهم هيضموا الجيش و الأمن المركزي في سلاح واحد.. و مافيش فرق بين عادة أو مؤهلات.. كله هيشتغل في رفاعي في الصحرا لحساب السلطان عشان عايز يعمل مشروعات أستثمارية لأبنه.. الخبر ده لازم يلف الجيش و الأمن المركزي كله..

- يخرب بيتك يا كابتن.. خبر زي ده هيولع الدنيا

- ما أحنا عايزينها تولع.. بس مش بس كده. احنا لازم نطلع كام أشاعة من النوع ده في السلطنة... حد عنده فكرة ؟

- أيه رأيك يا كابتن.. ... أحنا ندور علي أي مشروع فيه حفر في المناطق السكانية... و نقول انه هيعملوه مقبرة للنفايات النووية بتاعت أمريكا.. و أن السلطان واخد العملية لحسابه.. و مش مهم أن الناس يجيلها سرطان..

- معلهش أثمحلي يا أثتاذ ( نفس الصوت النسائي الألثغ).. الناث في الثلطنة ما بتفهمش في الكلام ده.. هيفتكرونا بنتكلم عن نوا مشمش أو بلح.. و مش تفرق معاهم.. أحنا نمشي أشاعة أن الثلطان أتفق مع أثرائيل .. بأمر أمريكا طبعآ.. أنهم يدولو مادة كيميائية تتحط في محطات الميه تخللي الرجالة يقطعوا الخلف.. عشان موضوع تنظيم النثل.. في الأول ماحدش هيشرب مية الحنفية.... و هيفضلوا يغلوا و يقبقبوا في جواهم.. و هيضطروا يشتروا ميه معدنية.. نقوم نقلهم أن كل المية المعدنية واخد توكيلها ابن الثلطان وهيرفعوا تمنها لخمثة جنيه الأزازة..أكيد الناث هتهج...

- يخرب عقلك .. أسمحيلي أعبر عن أعجابي بحضرتك يا أنسة.. والله عفارم عليكي.حضرتك أسمك ايه انت هيكون ليكي مستقبل معانا..

- ثوثن يا فندم

- عاشت الأسامي... فهمتوا يا جماعة .. الأشاعات ديه لازم تلف السلطنة كلها.. من ساسها لراسها....

- احنا نسينا الأعلام و الصحافة يا كابتن

- يا عم صلي.. هو أحنا عندنا أعلام.. دول زي الحرباية.. بيتلونوا دايمآ باللون الجديد.. أول يومين هيفضلوا ساكتين ... مستنيين. و بعدين هتلاقيهم بيمسحولنا الجوخ.. المهم زي ما قلتلكم..هو التلفزيون.. اللي بيتقال فيه.. الناس كلها بتسمعه و تنفذه..لما هنحدد ساعة الصفر.. و اللي زي ما أنا نتوقع هتكون في خلال 3- 4 أيام بالكتير.. مجموعة العزاب اليتامي هتهجم علي قصر السلطان و تقبض عليه هو و كل عيلته.. ماحدش لازم يفلت.. و لو حصلت أي مقاومة..لازم تتوقف في ساعتها.. حتي و لو وصلت لدرجة أعدامه الفوري.. بس الأفضل انه يتحاكم زيه زي أي مجرم تاني.. المجموعة التانية زي ماتفقنا تهجم علي مبني التليفزيون و تحتله... كل مجوعة تبتدي تدرس من دلوقتي بالمللي حركتها...و أعتبروا أن الثورة أبتدت من اللحظة ديه... آدي القرآن و الأنجيل.. حطوا أيديكم عليهم و أحلفوا...

تقدم الجميع مادين أيديهم.. و بعد أن أقسموا بالوفاء بالعهد و عدم الخيانة.. شرعوا في الخروج في جماعات متفرقة... بداخلهم مشاعر متضاربة.. خليط من الخوف.. و القلق...و الأمل ... و لكن كان في الأمكان أن تري ف عيونهم لمعة الأصرار و بريقه.. و علي وجوههم شبح أبتسامة

[White heart]

يا سلام ... ماشاء الله عليك يا سكوربيون،

ماشى فى كام سيناريوم على التوازى و لا "اسامه أنور عكاشة"....

اللة ينور...

Scorpion كتب:

هناك في هذه الدولة البعيدة جدآ جدآ جدآ عنا... ( يعني علي بلاطة مش بتاعتنا يا سيادنا ياللي معانا)...

انت متأكد؟؟

أصل انا أعرف بلد مش بعيدة ينطبق عليها نفس المواصفات ....

ما تبعدش كتير عن حدود " سلطنه نفاقستان " ...

أن الديموقراطية ناقصة في السوق عندنا...و هما عندهم فايض عايزين يصدروهولنا بالعافية بدل ما يرموه في البحر زي اللبن كده..

لأ دة تاهت عليه نقطه مهمه جدا كان لازم ياخد باله منها ...

اللبن نرميه فى الميه ....ماشى .... اهه السمك يتغذى و يتكاثر و تزيد الثروة السمكيه .... انما لو رمينالهم ديموقراطيه شوف بقى ايه اللى ممكن يحصل؟؟!!!

و مش كفاية ده بعد ما يفش غله.. يرجع تاني يقف في الطابور من جديد و يستني دوره...

يااااااة فكرتنى بذكريات أليمه ..

الله يرحمه بقى الأستاذ "عزت" مدرس الرياضيات ... كان بيضيع لنا تلات اربع الحصه بالطريقه دى!!!!

[الباشمهندس ياسر]

و بعدين؟

[هشام الجنيدى]

يا رجالة ........................

يا سكوربيوووووووووووووووووووووون

يا صعيدىىىىىىىىىىىىىىىىى

......... باين الثورة فشلت ولا ايه

:)

[أحمد رشاد شلبى]

لا أجد كلمات أجمل من كلمات

أغنيه بنتحدى

لعلى الحجار

بنتحدى

طريق الظلم والفوضى

بنتحدى

يضيع العمر فى الفوضى

بنتحدى

طريق الظلم والفوضى

بنتحدى

يضيع العمر فى الفوضى

بنتحدى ضياع امة

بنتحدى نفوس سامة

بإسم الحق تتسمى

بنتحدى

خلاص كبرت امانينا خلاص

خلاص فاض الحنين فينا

خلاص ولا عودنا نبوس كف القضى

بنتحدى

سمانا الحرة مفتوحة بدون قبطان

ولا الجنة بقت معنى ولا السجان

اذا عشنا نعيش بإيمان

واذا متنا نموت فرسان

ونبضات القلوب رافضة

بنتحدى

[Scorpion]

في قصر الرئاسة

- الحق يا بابا فيه ناس ماشية في الشارع عمالة تهتف

-و ايه الجديد يا حبيبي ... ما هم كل يوم يهتفولي و يمسحولي جوخ

-لأ يا يا سيدي .. دول بيهتفوا ضدك ... عمالين يقولو قولو للفاجر .. كفاية مش قادر... و ناس تانية بتقول قولوا للسلطان نهايته قاراميدان

- يا نهار اسود .. ده عندنا هنا ده

- آه و حياة ماما

في توتر شديد يرفع السلطان سماعة التليفون ة يخاطب مستشار الداخلية ...

-ايه يا سي زفت اللي بيحصل في البلد ده .. انتوا نايمين علي ودانكم

- يا مولانا دول شوية عيال شيوعيين عمالين يهبهبوا .. قلنا نسيبهم شوية علشان نوري لأمريكا ان احنا عندنا ديموقراطية

- و ديني يا هابلي الكلب لو العملية دي ما اتلمتش فورآ لحبعتك سجن ابو زعتر و اسيبك في ايدين اللي سحلتهم

تنزل العسس في الشوارع تطيح بالمتظاهرين الضرب مستخدمين كل ادوات القمع من كرابيج و سنج ... رصاص .. و قنابل مسيلة للدموع ... و لكن ما ان يبدأ القمع حتي زاد غضب المتظاهرين .. و كسبوا تعاطف من كان يشاهد من بعيد ممصمصآ شفاه

- شوفي ولاد الكلب نازلين في العيال ضرب ازاي .. كفاية مش قادر

- رايح علي فين يا بو عادل ... مالناش دعوة

- ماهي مالناش دعوة دي اللي جابتلي الكافية ... اللي مخلياني مش عارف اعيش لا أنا و لا أنتي و لا عادل نفسه .. ياللآ العمر واحد و الرب واحد ..

و يذهب الي المظاهرات و معه آخرين و آخرين ...

السلطان متابعآ ما يحدث علي شاشات السي ان ان و أبتدأت المكالمات المحمومة مع مستشار الداخلية في سلطانيته

- ايه الأخبار يا هابلي

- الأمر تحت السيطرة يا مولانا

- سيطرة ايه يا معفن ... انت مش شايف اللي بيحصل في ميدان العروبة .. ده فيه ما يقلش عن 5 تلاف واحد اتصرف يا هباب بسرعة

- ننزل شوية عيال بدقون وسطيهم يا مولانا .. تقوم امريكا تخاف و تكش و تبعتلنا المساعدة

- و احنا لسه حنستني مساعدة امريكا .. اضرب يا هابلي .. اضرب

يزيد الضرب .. و تتضاعف الأعداد التي تنزل الي الشوارع منادية بسقوط السلطان

يدور السلطان في ارجاء قصره متوترآ ... و يفكر .. انا طول عمري بتاع امريكا .. اتصل بيهم يقولولي اعمل ايه

- الو .. جود مورنينج يور هاينسي

- هو ايز توكينج

- انا سلطان نفاقستان

- آه .. هو انت ... خير .. عايز ايه

- ايه الوش الأبلاكاش ده .. انت مش شايف اللي بيحصل هنا ... اعمل ايه ؟؟

- تعمل ايه ... اعمل شوية ديموكراسي في البلد

- يعني ؟

- ادي للكلب عضمة يتلهي فيها

- يعني ؟

- اديهم حاجة ... ادي الناس حاجة ..

- منحة يعني ؟؟

- لأ موش بقت تنفع دلوقتي ... لازم تعمل تغييرات سياسية

لحظة سكوت ... و يهز السلطان راسه .. ثم يتصل بالأذاعة و التليفزيو ليذيع بيان علي الشعب

- يا شعبي الحبيب ... وصلت لي تطلعات شوية عيال من الناس ... و بما اني عمري ما كسرت كلام ليكم .. فلقد قررت اعدام مستشار الداخلية بعد ما اكتشفت انه كان بيعاملكم بقلة ادب

لا يرضي الشعب و تزداد المظاهرات

بيان آخر .. يا شعبي الحبيب .. بعد تفكير وجدت ان مستشار الداخلية ما هو الا مخلب القط لكل المستشارين الوحشين اللي كانوا حواليا و اللي اكتشفت انهم كانوا بيخبوا عليا دايمآ الحقيقة .... و بناء عليه قررت القبض عليهم كلهم و توزيع املاكهم علي الفقرا .. و اختيار مستشارين جدد يحظوا بحبكم

لا يرضي الشعب و تزداد الجموع ...

بيان آخر ... يا شعبي الحبيب .. سمعت ان فيه اشاعات مغرضة بتقول ان ابني الصغير سيحكم من بعدي متخطيآ دور اخيه الأكبر .. و الكلام ده و عهد الله كذب .. و النيعمة الطاهرة دي .. كذب .. و لأثبات ده .... انا خلاص بعت ابني الي مدرسة داخلية في سويسرا .. و مش حيرجع منها ابدآ ...

لا يرضي الشعب و تزداد الجموع حتي لا يبقي مكان لقدم في شوارع السلطنة ....

اعمل ايه يا ربي .. اعمل ايه يا ربي ... يقولها السلطان و الخوف يقتله ... و في تلك اللحظة يدخل محلاوي رئيس الجيش و بهدؤ يقول

يا مولانا ... فيه عربية مستنية حضرتك تحت .. من غير مناهدة تلم خلجاتك و تركبها و تسيب السلطنة النهارده

- دي آخرتها يا محلاوي ... بعد كل اللي عملته لك و لأصحابك .. تعملوا انقلاب عسكري عليا انا ؟؟

-اتشطر الأول علي امريكا و بعدين ابقي تعال اتنطط عليا ... ياللالا يا مولانا سكة السلامة

- هي دي أخرتها ... هي دي اخرتها ...

كانت تلك آخر كلمات ينطقها قبل ان يصاب بشلل نصفي

في التليفزيون في نفس المساء .. يظهر الطنطاوي معلنآ رحيل الطاغية .. و ان الجيش الآن هو الحاكم الفعلي و سيعمل جهده علي اعادة الحق الي اصحابه ...

تهتز البلاد فرحآ ... و تسمع الأغاني و الأناشيد في كل مكان .. و ترجع الناس الي بيوتها مهنئة بعضها البعض بنجاح الثورة آملين في يومآ جديدآ مشرقآ .. و مستقبلآ يحمل الخير .. و الذي ظهرت اول بوادره مع البيان الأول من القوات المسلحة :

البيان الأول

تطبيقآ لمباديء الثورة الشعبية فلقد تقرر

واحد : تأميم جميع الأراضي الزراعية و توزيعها مجانيآ بواقع 3 فدادين لكل فلاح

اتنين ... تأميم ...

يستمر الحاكم العسكري في سرد القرارات بينما يتعالي صوت عبد الحليم حافظ و هو يغني ... تاني تاني تاني

تمت

وصيتكم جونيور و أمه ...

[الباشمهندس ياسر]

وصيتكم جونيور و أمه ...

ياااااااااااااااني

هو لسه فيها وصاسا و خوف ع العيال

ده احنا كنا بنموت عشان الحاجات دي تبطل و الله

[psychologyteacher]

و في تلك اللحظة يدخل محلاوي رئيس الجيش و بهدؤ يقول

يا مولانا ... فيه عربية مستنية حضرتك تحت .. من غير مناهدة تلم خلجاتك و تركبها و تسيب السلطنة النهارده

- دي آخرتها يا محلاوي ... بعد كل اللي عملته لك و لأصحابك .. تعملوا انقلاب عسكري عليا انا ؟؟

-اتشطر الأول علي امريكا و بعدين ابقي تعال اتنطط عليا ... ياللالا يا مولانا سكة السلامة

- هي دي أخرتها ... هي دي اخرتها ...

كانت تلك آخر كلمات ينطقها قبل ان يصاب بشلل نصفي

في التليفزيون في نفس المساء .. يظهر الطنطاوي معلنآ رحيل الطاغية .. و ان الجيش الآن هو الحاكم الفعلي و سيعمل جهده علي اعادة الحق الي اصحابه ...

دى فلتت يا استاذنا

كدة ضمنت المعتقل رسمى

ربنا يصبر جونيور ... كلها 120 سنة

[Scorpion]

دى فلتت يا استاذنا

كدة ضمنت المعتقل رسمى

ربنا يصبر جونيور ... كلها 120 سنة

اصيل والله ياpsychologyteacher

جاييلي بعد سنتين تسيحلي وسط الخلق ....

:unsure:

:unsure:

:unsure:

ماشي ... ماشي يا بشرية...

[doha]

الحلقة الثانبة

أعلن ضباط الجيش والشرطة ولائهم للثوار و تخليهم عن الدكتاتور اللعين مما أعطى الثوار دعما قويا

المشهد فى السفارة الامريكية الدكتاتور وابنه والحاشية جميعهم ينتابهم الرعب ويطلبون الحماية من السفارة الامريكية و يطلبون بتدخل القوات الامريكية للقبض على المخربين وردع الانقلاب

وصلت الاوامر من البيت الابيض بضرورة القبض على الدكتاتور وحاشيته وتسليمهم للثوار لكسب ثقةالثوار ولان دور الدكتاتور انتهى ولم يعد لو فائدة أو ثمن

لاتزال المظاهرات مستمرة وفى الصباح اليوم التالى خرجت جميع الصحف تؤيد الثوار الابطال وتلعن ايام الدكتاتور الهباب و تذكر الناس بفساده

وترفع راية الولاء للثورة وزعيمها.....زعيمها

لا احد يعرف اسم الزعيم ولكنهم يعرفون على فجلة

اذن فليكن على فجلة هو الزعيم

.

.

يتبع

في الشوارع.. البشر تسير كالزومبي.. عيون فارغة...شجار بلا سبب..لا تستطيع أن تميز صوت ضحكة... بل حزن و يأس و غضب في العيون... و في نفس البيت المتهالك الذي تركناه منذ أيام قليلة.. أبتدأت تدب فيه الحياة من جديد.. مع توافد دخول أفراد مجموعة الأصدقاء...

- أهلآ يا جماعة... أنا شايف ناس جديدة

- دول أصحابنا يا كابتن... أضمنهم برقبتي

- أهلآ بالشباب... و اللهي حاجة تشرح القلب

- فكرت هنعمل ايه ؟

- علي فكرة انا مش لوحدي اللي بفكر يا جماعة.. مش هنبتدي نخلق شخصية أسطورية جديدة... أحنا كلنا بنفكر مع بعض. ... علي العموم اللي وصلناله أننا نقسم نفسنا 3 مجموعات.. مجموعة تراقب قصر السلطان و تحركات السلطان و أولاده و أحتياطات الأمن.. و ديه لازم تكون مجموعة عزاب... و يا ريت أيتام... عشان هما اللي هيكونوا متعرضين لأكبر مخاطرة لما تيجي ساعة الجد. فاهميني يا شباب؟

- طبعآ يا كابتن ... كمل

- المجموعة التانية يكونوا تخصص فني.. و عالم بتعرف تتكلم بلباقة و حلوة كده.. و الآنسات اللي معانا ممكن ينضموا للمجوعة ديه... عايزكم تراقبوا التليفزيون و من فين بيخشوا أستوديوهات التصوير.. و الذي منه...

- ممكن انا كمان انضم ليهم يا أثتاذ ؟( صوت نسائي ألسغ )

- لأ معلهش يا مدموازيا.. بلاش حضرتك.. أحنا هنحتاجك في المجموعة التالتة... مجموعة سلاح الأشاعات... و ديه اللي هتكون أول خطوة عملية لينا... حرب الأشاعات من دلوقتي تبتدي... البلد لازم تتملي أشاعات تخلي الناس من غضبها تسيب خوفها و تطلع من القمقم...

- و الجيش يا أستاذ ؟

- ديه أهم حاجة لازم نضمنها.. من غير مساعدته مش هنقدر نعمل حاجة..

- و البوليس ؟

- البوليس أول ما هيشوف الناس هايجة.. هيكش.. لأنهم عارفين قد ايه العالم محروقة منهم... دول مش هشيل همُهُم.. أهم حاجة زي ما قلنا الجيش و الأمن المركزي.. فيه حد في الجيش معانا ؟

مجموعة ترفع أياديها

- شوفوا يا شباب.. أنتو كل واحد لما يرجع لوحدته يفضل يقول لكل اللي يشوفه أن عنده أخبار أكيدة أن مدة التجنيد هيخلوها 5 سنين.. و أنهم هيضموا الجيش و الأمن المركزي في سلاح واحد.. و مافيش فرق بين عادة أو مؤهلات.. كله هيشتغل في رفاعي في الصحرا لحساب السلطان عشان عايز يعمل مشروعات أستثمارية لأبنه.. الخبر ده لازم يلف الجيش و الأمن المركزي كله..

- يخرب بيتك يا كابتن.. خبر زي ده هيولع الدنيا

- ما أحنا عايزينها تولع.. بس مش بس كده. احنا لازم نطلع كام أشاعة من النوع ده في السلطنة... حد عنده فكرة ؟

- أيه رأيك يا كابتن.. ... أحنا ندور علي أي مشروع فيه حفر في المناطق السكانية... و نقول انه هيعملوه مقبرة للنفايات النووية بتاعت أمريكا.. و أن السلطان واخد العملية لحسابه.. و مش مهم أن الناس يجيلها سرطان..

- معلهش أثمحلي يا أثتاذ ( نفس الصوت النسائي الألثغ).. الناث في الثلطنة ما بتفهمش في الكلام ده.. هيفتكرونا بنتكلم عن نوا مشمش أو بلح.. و مش تفرق معاهم.. أحنا نمشي أشاعة أن الثلطان أتفق مع أثرائيل .. بأمر أمريكا طبعآ.. أنهم يدولو مادة كيميائية تتحط في محطات الميه تخللي الرجالة يقطعوا الخلف.. عشان موضوع تنظيم النثل.. في الأول ماحدش هيشرب مية الحنفية.... و هيفضلوا يغلوا و يقبقبوا في جواهم.. و هيضطروا يشتروا ميه معدنية.. نقوم نقلهم أن كل المية المعدنية واخد توكيلها ابن الثلطان وهيرفعوا تمنها لخمثة جنيه الأزازة..أكيد الناث هتهج...

- يخرب عقلك .. أسمحيلي أعبر عن أعجابي بحضرتك يا أنسة.. والله عفارم عليكي.حضرتك أسمك ايه انت هيكون ليكي مستقبل معانا..

- ثوثن يا فندم

- عاشت الأسامي... فهمتوا يا جماعة .. الأشاعات ديه لازم تلف السلطنة كلها.. من ساسها لراسها....

- احنا نسينا الأعلام و الصحافة يا كابتن

- يا عم صلي.. هو أحنا عندنا أعلام.. دول زي الحرباية.. بيتلونوا دايمآ باللون الجديد.. أول يومين هيفضلوا ساكتين ... مستنيين. و بعدين هتلاقيهم بيمسحولنا الجوخ.. المهم زي ما قلتلكم..هو التلفزيون.. اللي بيتقال فيه.. الناس كلها بتسمعه و تنفذه..لما هنحدد ساعة الصفر.. و اللي زي ما أنا نتوقع هتكون في خلال 3- 4 أيام بالكتير.. مجموعة العزاب اليتامي هتهجم علي قصر السلطان و تقبض عليه هو و كل عيلته.. ماحدش لازم يفلت.. و لو حصلت أي مقاومة..لازم تتوقف في ساعتها.. حتي و لو وصلت لدرجة أعدامه الفوري.. بس الأفضل انه يتحاكم زيه زي أي مجرم تاني.. المجموعة التانية زي ماتفقنا تهجم علي مبني التليفزيون و تحتله... كل مجوعة تبتدي تدرس من دلوقتي بالمللي حركتها...و أعتبروا أن الثورة أبتدت من اللحظة ديه... آدي القرآن و الأنجيل.. حطوا أيديكم عليهم و أحلفوا...

تقدم الجميع مادين أيديهم.. و بعد أن أقسموا بالوفاء بالعهد و عدم الخيانة.. شرعوا في الخروج في جماعات متفرقة... بداخلهم مشاعر متضاربة.. خليط من الخوف.. و القلق...و الأمل ... و لكن كان في الأمكان أن تري ف عيونهم لمعة الأصرار و بريقه.. و علي وجوههم شبح أبتسامة

في قصر الرئاسة

- الحق يا بابا فيه ناس ماشية في الشارع عمالة تهتف

-و ايه الجديد يا حبيبي ... ما هم كل يوم يهتفولي و يمسحولي جوخ

-لأ يا يا سيدي .. دول بيهتفوا ضدك ... عمالين يقولو قولو للفاجر .. كفاية مش قادر... و ناس تانية بتقول قولوا للسلطان نهايته قاراميدان

- يا نهار اسود .. ده عندنا هنا ده

- آه و حياة ماما

في توتر شديد يرفع السلطان سماعة التليفون ة يخاطب مستشار الداخلية ...

-ايه يا سي زفت اللي بيحصل في البلد ده .. انتوا نايمين علي ودانكم

- يا مولانا دول شوية عيال شيوعيين عمالين يهبهبوا .. قلنا نسيبهم شوية علشان نوري لأمريكا ان احنا عندنا ديموقراطية

- و ديني يا هابلي الكلب لو العملية دي ما اتلمتش فورآ لحبعتك سجن ابو زعتر و اسيبك في ايدين اللي سحلتهم

تنزل العسس في الشوارع تطيح بالمتظاهرين الضرب مستخدمين كل ادوات القمع من كرابيج و سنج ... رصاص .. و قنابل مسيلة للدموع ... و لكن ما ان يبدأ القمع حتي زاد غضب المتظاهرين .. و كسبوا تعاطف من كان يشاهد من بعيد ممصمصآ شفاه

- شوفي ولاد الكلب نازلين في العيال ضرب ازاي .. كفاية مش قادر

- رايح علي فين يا بو عادل ... مالناش دعوة

- ماهي مالناش دعوة دي اللي جابتلي الكافية ... اللي مخلياني مش عارف اعيش لا أنا و لا أنتي و لا عادل نفسه .. ياللآ العمر واحد و الرب واحد ..

و يذهب الي المظاهرات و معه آخرين و آخرين ...

السلطان متابعآ ما يحدث علي شاشات السي ان ان و أبتدأت المكالمات المحمومة مع مستشار الداخلية في سلطانيته

- ايه الأخبار يا هابلي

- الأمر تحت السيطرة يا مولانا

- سيطرة ايه يا معفن ... انت مش شايف اللي بيحصل في ميدان العروبة .. ده فيه ما يقلش عن 5 تلاف واحد اتصرف يا هباب بسرعة

- ننزل شوية عيال بدقون وسطيهم يا مولانا .. تقوم امريكا تخاف و تكش و تبعتلنا المساعدة

- و احنا لسه حنستني مساعدة امريكا .. اضرب يا هابلي .. اضرب

يزيد الضرب .. و تتضاعف الأعداد التي تنزل الي الشوارع منادية بسقوط السلطان

يدور السلطان في ارجاء قصره متوترآ ... و يفكر .. انا طول عمري بتاع امريكا .. اتصل بيهم يقولولي اعمل ايه

- الو .. جود مورنينج يور هاينسي

- هو ايز توكينج

- انا سلطان نفاقستان

- آه .. هو انت ... خير .. عايز ايه

- ايه الوش الأبلاكاش ده .. انت مش شايف اللي بيحصل هنا ... اعمل ايه ؟؟

- تعمل ايه ... اعمل شوية ديموكراسي في البلد

- يعني ؟

- ادي للكلب عضمة يتلهي فيها

- يعني ؟

- اديهم حاجة ... ادي الناس حاجة ..

- منحة يعني ؟؟

- لأ موش بقت تنفع دلوقتي ... لازم تعمل تغييرات سياسية

لحظة سكوت ... و يهز السلطان راسه .. ثم يتصل بالأذاعة و التليفزيو ليذيع بيان علي الشعب

- يا شعبي الحبيب ... وصلت لي تطلعات شوية عيال من الناس ... و بما اني عمري ما كسرت كلام ليكم .. فلقد قررت اعدام مستشار الداخلية بعد ما اكتشفت انه كان بيعاملكم بقلة ادب

لا يرضي الشعب و تزداد المظاهرات

بيان آخر .. يا شعبي الحبيب .. بعد تفكير وجدت ان مستشار الداخلية ما هو الا مخلب القط لكل المستشارين الوحشين اللي كانوا حواليا و اللي اكتشفت انهم كانوا بيخبوا عليا دايمآ الحقيقة .... و بناء عليه قررت القبض عليهم كلهم و توزيع املاكهم علي الفقرا .. و اختيار مستشارين جدد يحظوا بحبكم

لا يرضي الشعب و تزداد الجموع ...

بيان آخر ... يا شعبي الحبيب .. سمعت ان فيه اشاعات مغرضة بتقول ان ابني الصغير سيحكم من بعدي متخطيآ دور اخيه الأكبر .. و الكلام ده و عهد الله كذب .. و النيعمة الطاهرة دي .. كذب .. و لأثبات ده .... انا خلاص بعت ابني الي مدرسة داخلية في سويسرا .. و مش حيرجع منها ابدآ ...

لا يرضي الشعب و تزداد الجموع حتي لا يبقي مكان لقدم في شوارع السلطنة ....

اعمل ايه يا ربي .. اعمل ايه يا ربي ... يقولها السلطان و الخوف يقتله ... و في تلك اللحظة يدخل محلاوي رئيس الجيش و بهدؤ يقول

يا مولانا ... فيه عربية مستنية حضرتك تحت .. من غير مناهدة تلم خلجاتك و تركبها و تسيب السلطنة النهارده

- دي آخرتها يا محلاوي ... بعد كل اللي عملته لك و لأصحابك .. تعملوا انقلاب عسكري عليا انا ؟؟

-اتشطر الأول علي امريكا و بعدين ابقي تعال اتنطط عليا ... ياللالا يا مولانا سكة السلامة

- هي دي أخرتها ... هي دي اخرتها ...

كانت تلك آخر كلمات ينطقها قبل ان يصاب بشلل نصفي

في التليفزيون في نفس المساء .. يظهر الطنطاوي معلنآ رحيل الطاغية .. و ان الجيش الآن هو الحاكم الفعلي و سيعمل جهده علي اعادة الحق الي اصحابه ...

تهتز البلاد فرحآ ... و تسمع الأغاني و الأناشيد في كل مكان .. و ترجع الناس الي بيوتها مهنئة بعضها البعض بنجاح الثورة آملين في يومآ جديدآ مشرقآ .. و مستقبلآ يحمل الخير .. و الذي ظهرت اول بوادره مع البيان الأول من القوات المسلحة :

البيان الأول

تطبيقآ لمباديء الثورة الشعبية فلقد تقرر

واحد : تأميم جميع الأراضي الزراعية و توزيعها مجانيآ بواقع 3 فدادين لكل فلاح

اتنين ... تأميم ...

يستمر الحاكم العسكري في سرد القرارات بينما يتعالي صوت عبد الحليم حافظ و هو يغني ... تاني تاني تاني

تمت

وصيتكم جونيور و أمه ...

ياخبر ابيااااااااااااااااض ..

لو مكنتش قريت الموضوع ده زمان كنت قلت لاه ده حد بيسجل لحظة بلحظة الي حصل في اليومين الي فاتوا دول .. ايه ده .. ايه التفاصيل دي .. بجد حاجه تخلي شعر الراس يقف .. معقول التطابق ده ؟؟

مفيش تفسير منطقي غير ان فعلا في ناس بتبص لابعد من موطيء قدمها بكتير لدرجه ان كلامهم عن المستقبل بيكون اقرب لقراءة الكف او ضرب الودع ممكن يتفق معهم البعض ويختلف آخرون لكن الي بيحصل انه في النهايه ..بيتحقق .. استقراء المستقبل بشكل صحيح هو النتيجه الطبيعية للقراءة السليمه لمعطيات الواقع الحالي .. للاسف مش كل الناس عندهم المنحة الربانية دي ..

الله يرضى عليكم بقى انزلوا ضروري بالجزء الثاني خلوا الواحد يطمئن شويه على مستقبله ..