المصريين المغتربين بالكويت

[Michohat]

السلام عليكم ورحمة الله وبركاتة

يا شباب عاوزين عاوزين نجمع المصريين اللى شغالين او المتواجدين فى الكويت

[ahmedbenwasef]

وعليكم السلام ورحمة الله وبركاته

أعرفكم بنفسي

أحمد أعمل في الكويت

واحب جدا اتعرف عليكم ايضا

بارك الله فيكم جميعا

[adelas]

السلام عليكم ورحمتة انا عادل من مصر اريد اسئل عن توقف الفيزا الحرة او كارت الزيارة التجاري اية السبب ياراجلة

[احمد حمدى]

السلام عليكم

انا ياجماعه جايلى عقد فى الكويت على 105 دينار فى شركه أمن

والانتقالات والسكن وكمان وجبتين عليهم

لوحد يعرف يفيدنى ياريت ياجماعه

يقولى ايه اخبار العيشه هناك

وهل المرتب ده كويس ولا لاء

عشان المكتب عايز 14000 جنيه

وياترى المبلغ ده كبير ولا معقول

منتظر الافاده منكم افادكم الله

[HDarwish]

السلام عليكم

انا ياجماعه جايلى عقد فى الكويت على 105 دينار فى شركه أمن

والانتقالات والسكن وكمان وجبتين عليهم

لوحد يعرف يفيدنى ياريت ياجماعه

يقولى ايه اخبار العيشه هناك

وهل المرتب ده كويس ولا لاء

عشان المكتب عايز 14000 جنيه

وياترى المبلغ ده كبير ولا معقول

منتظر الافاده منكم افادكم الله

14000 عفريت ينططوه ..

أنا آسف لاستخدام اللهجة دي ..

بس فعلا حاجه تغيظ ..

أنا هقولك الكلام ده وعارف إنه مش هيغير من شيء .. لإني قولته قبل كده لصديق لي وبرضه ما اقتنع غير لما جيه وشاف الوضع بنفسه ولسه من فتره قريبه سألته .. لو حد عزيز عليك وحابب يجي بنفس الوضع اللي انت جيت بيه ده تقوله إيه .. وكان جوابه انه لو اللي جاي ده ما اقتنع بكلامه هيمنعه بالعافية علشان هو ده الصح ..

يا عزيزي إنت بتسأل عن المبلغ اللي هتدفعه للمكتب ده كثير ولا قليل .. معنى كلامك إنك خلاص موافق على الراتب والعرض الزفت ده وكل اللي شاغلك الفلوس اللي هتدفعها للمكتب ..

عالعموم أنا هاعمل اللي عليا وخلاص ..

أن هاحكيلك على اللي حصل مع صديقي ده وانت بئا تحكم وتقدر ...

صديقي ده من سنتين إتعرض عليه نفس الموضوع بس براتب 120 دينار ويدفع 14 ألف للمكتب وكلمني وانا طبعا حاولت اقنعه بالرجوع عن الفكرة الهباب دي ولكن دون جدوى واتخذ قراره .. برغم إنه كان أنزه وأشيك واحد في الشله وبيلعب بالفلوس لعب من ورا الشغل مع والده لإنه كان شايل الشغل على اكتافه (مصنع تعبئة سكر) وأعمال أخرى .. المهم أول يوم وصل الكويت ما عرفتش اقابله ورحتله تاني يوم اللي أول ما قاللي على المنطقة اللي هو فيها قولت في بالي آدي البداية .. منطقة غير آدمية بالمرة .. إسمها الحساوي تبع جليب الشيوخ .. السكن عباره عن غرفة مترين في مترين عايش فيها 6 أفراد الباب علشان تفتحه يادوب يتفتح ربعه مش نصه علشان واحد يدخل .. علشان إثنين ينزلوا من على السرير اللي في الدور الثاني مع بعض استحاله يعرفوا ينزلوا لإن المساحة اللي بين السراير لا تسمح إلا بنزول واحد فقط من على السرير .. المهم سلمت عليه واتعرفت على الناس اللي معاه في السكن .. تسمع قصص وحكايات وندم إنهم سافروا بالطريقة دي وإن دي كانت أكبر غلطه غلطوها في حياتهم وقد إيه كانوا في مصر وضعهم كويس ومعظمهم كانوا موظفين وبرواتب معقولة .. والكل أجمع على إنهم عايزين بس في خلال سنتين ثلاثه يلموا المبلغ اللي دفعوه للمكتب في مصر ويرجعوا أحسن.

قولت لصاحبي يلا بينا تعالى نخرج شويه .. وكان مازال محتفظ بأناقته وشياكته المعهود بيها .. لابس تي شيرت جميل جدا والبارمودا الجينز والشراب القصير والكوتش اللي ما يقلش ثمنه عن 350 جنيه في مصر .. وحاطط برفان من البرفانت الغالية الأصلية .. بئيت قاعد بقول لنفسي سبحان الله .. إستحاله حد يصدق إن ده يكون خارج من الغرفة أو السكن ده .. فضلنا ماشيين يجي عشر دقايق من غير ولا كلمه لإن إحنا عارفين كل واحد هيقول إيه وكل واحد مستني يسمع إيه من التاني .. على نهج أنا قولتلك قبل ما تيجي .. وأنا ما كنت اتوقع ان الموضوع بالطريقة دي .. وبدأنا نتكلم .. قاللي إنه أول ما وصل الغرفة دي ويا دوب دخل برجل والرجل الثانية بره الغرفة إتصدم على طول والرجل اللي دخلها الغرفة طلعها تاني جنب الرجل اللي بره من هول المنظر ..

المفاجأه ،،

الراتب مش 120 الراتب 80 لو هتشتغل 16 ساعه .. و 60 بس لو كنت فرفور وهتشتغل بس 10 ساعات ...ليه يا اخوانا هي عمليه نصب ولا إيه .. وطبعا الاجابة إن دي مصاريف الإقامة هتتخصم منكم وهو ده اللي موجود عاجبكم أهلا وسهلا .. مش عاجبكم برده أهلا وسهلا..

تخيل إنك بتشتغل 16 ساعة .. ضايع منهم ساعة رايح وساعة جاي من الشغل .. وكمان نصف ساعة تجهيز نفسك قبل ما تروح الشغل علشان تلبس البدله العسكرية المحترمة .. ونصف ساعة تانية لما تيجي من الشغل .. يعني يادوب يتفضل لك اربع او خمس ساعات بالعافية علشان تنام فيهم .. واحد يقوللي إيه المشكلة .. أقوله مافيش مشكله .. لإن أنا عملتها مره وقولت أشتغل بئا واتعب علشان اختصر سنين الغربة والكلام الكبير ده واشتغلت أكثر من 16 ساعة وكانوا ثلاث دوامات بشد الميم .. من 11مساءا إلى 7 صباحاً إداري في مركز عمليات لشركة نقل بترول ومن 9 صباحا إلى 1 ظهرا في مكتب طباعه وبعدين من 6 مساءاً للساعة 10 مساءاً في نفس مكتب الطباعة (وده طبعا في شهر رمضان) لكن قبل شهر رمضان اشتغلت بدل من 6 مساءا كانت 4 مساءا .. يعني من 16 إلى 18 ساعة .. عارف كانت إيه النتيجه .. النتيجه إني بعد شهر بالتمام والكمال على النظام ده .. لقيت نفسي جالي صداع مستمر غير منقطع وكإن دماغي هتنفجر بالإضافه إلى رعشه غير طبيعيه تظهر بوضوح عند وضع يدي على الكيبورد .. ومن بعدها خلتني في دوام الليل بس وكده رضا قوي.

أقصد إن اللي يقوللي ممكن يستحمل شغل حتى لو 18 ساعة أنا أوفقه لكن عمره ما يكون بصورة مستمره أقصاها شهر واحد ويلاقي نفسه في المستشفى.

طولت عليك .. لكن برغم ده كله انا اختصرت كثير جدا .. لإن فيه مآسي وحاجات كثير تانية عايز اتكلم عنها لكن للأسف ما فيش معايا وقت كفاية .. بكره لما تيجي تقول إن فيه واحد إسمه Hdarwish قاللي الكلام ده وانا ما سمعتش كلامه ..

تمنياتي بالتوفيق

تم تعديل 29 أبريل 2009 بواسطة HDarwish

[زعلان]

كنت باحاول احط رد بس ما نفعش بس يا بني منه لله الي جابلك الشغلانه ده حرام عليكم نفسكم يا جماع 100 دينار ايه الي حتاخدها مرتب بس يا ابن الحلال

وكمان حتدفع 14 الف جنيه على الأملة الي انت رايحها دول ناس معندهاش ضمير اتقي الله في نفسك يا ابني وبلاش ترمي نفسك للتهلكه الشغالى بتاخد المرتب ده و بتعد في غرفة خاصة بيها وحمام خاص و اكل وشرب وعلاج و هدايا و ملابس وليها يوم اجازة في الاسبوع يعني العرض بتاعك ده عرض شغالة لو حابا تيجي على العرض ده يبقى تعالى اشتغل سواق عند حد على الاقل حيدوك غرفة السواق في فيلا نظيفة في الملحق بدل البهدلة بتاعة السكورتي

لا حول ولا قوة الا بالله

[الجدار]

السلام عليكم

انا ياجماعه جايلى عقد فى الكويت على 105 دينار فى شركه أمن

والانتقالات والسكن وكمان وجبتين عليهم

لوحد يعرف يفيدنى ياريت ياجماعه

يقولى ايه اخبار العيشه هناك

وهل المرتب ده كويس ولا لاء

عشان المكتب عايز 14000 جنيه

وياترى المبلغ ده كبير ولا معقول

منتظر الافاده منكم افادكم الله

أوعى تقبل أوعى أوعى

كلام الأفاضل HDarwish وزعلان والله كله صح

المبلغ ده ما يعيشكش سوري في اللفظ زبال في الكويت

شركة الأمن دي أقل حاجه شغل 12 ساعة متواصل واقف على رجلك في عز الحر 48 و50 درجة

ومش حقولك ان الجو كده حيبقى حلو

ممكن يبقى جنب الحرارة دي شوية رطوبة يخلوك واقف أكن واحد راشش عليك جردل ميه

أو شوية تراب (زي الخماسين عندنا) بس دي بتستمر على مدار الصيف

بصراحة HDarwish وزعلان جابوا من الآخر ووالله انا شفت المناظر دي بعيني في الكويت 7 في أوضه واحده

وشفت أربع أوض كل أوضه فيها 5 وكلهم بيستخدموا حمام واحد

وتوقع ان الشركة اللي حتروحها مش حتختلف عن كده كتير

احمد ربنا انك لقيت حد ينصحك

وماتقلش اي حاجه احسن من مصر وحالنا فيها

لأ غلط

يا تروح على شغل يناسب مؤهلاتك ويحترمك

يا انت في مصر مش حتموت من الجوع

أصبر بجد

أصبر وماتستعجلش رزقك جايلك

وتقبل مني التحية

تم تعديل 29 أبريل 2009 بواسطة الجدار

[ابو حودة]

في حاجة عاوز اضيفها للكلام اللي قالوه الجماعة قبلي وهي ان محدش من اللي عاوزين يجيوا يقولوا ان ده وضع مؤقت لحد ما الاقي حاجة احسن

هنا في الخليج ( السعودية ، الكويت ) في حاجة اسمها عدم ممانعة يعني الكفيل القديم مش هيسمح لك انك تيجي على شغل تاني الا بموافقته يعني كرسي في الكلوب

يمكن يكون فعلا الوظائف متوفرة بعض الشئ بس ده في حالة الناس اللي عندها فعلا امكانية نقل الكفالة وطبعا اللي بيدفع 100 دينار او 1000 ريال وحاجات زي كده حاجة من

اثنين الاولى انه مش هيسيبك لانك مش مكلفه حاجة وبالتالي هيخوفك بموضوع عدم الممانعة ويمكن ينفذ

الثانية انه يكون بيقسم مع المكاتب في مصر والناس لما تيجي وتلاقي الوضع كده بعضهم ما يقدرش يستحمل ويرجع وبالتالي المبلغ يتاخد من واحد تاني

[HDarwish]

يا جماعه والله الواحد لما اشتغل في شركة كبيرة وشاف الناس بتيجي ازاي من مصر وغيرها استغرب على اللي بعض الناس بتعملوا في نفسها ده وبترخص نفسها بالطريقة دي ...

أنا اشتغلت فترة في ال HR وشوفت حاجات تخليك تتحسر إن فيه ناس بتقبل بأقل من كده ..

شاب خريج تجاره انجليزي دفعة 2006 ومعاه شوية دورات بس محترمة وكنا في 2007 بعتناله أوفر على 350 دينار رد علينا إنه مش موافق على العرض ده وإن مؤهلاته تعادل أكثر من كده حسب ما سمع وعرف عن الرواتب والمعيشة في الكويت .. مش عايز اقولكم فرحت قد إيه إن لسه فيه ناس في مصر عنده وعي زي كده .. غيرنا العرض وخليناه 400 برضه رفض .. ولم يقبل إلا ب 450 دينار وتذكرة طيران سنوية وبونس شهر ونصف على السنة وتأمين صحي خاص مش عادي ممكن بيه يدخل أحسنها مستشفى خاص زي السلام ودار الشفا وهادي ويتعالج فيها ببلاش .. ده غير إن أول شهر بنوفر له سكن عباره عن غرفه في شقه وبتبقى يا في الرقعي يا في المهبوله .. ده غير حاجات تانية كثير زي الريتايرمينت بلان أو النظام التقاعدي وده حكايه لوحده ... وأول ما وصل وحاط رجله في الكويت كان مدفوع له نصف راتب علشان يعرف يمشي نفسه في أول أيامه هنا ... الناس هتقول دي حالات نادره وصاحبنا ده مع مؤهلات .. طب ليه ما نجاوب نفسنا بنفسنا ونقول لأ أنا لما اجي اخرج من مصر لازم اكون مستعد علشان اعيش عيشه كويسه واشرف نفسي وبلدي مش اروح اتمرمط واقول بكره هتتعدل .. واحنا بتوع الفهلوه ..

وللحديث بقية

تحياتي

[MoHaMMeD EgYpT]

السلام عليكم

انا ياجماعه جايلى عقد فى الكويت على 105 دينار فى شركه أمن

والانتقالات والسكن وكمان وجبتين عليهم

لوحد يعرف يفيدنى ياريت ياجماعه

يقولى ايه اخبار العيشه هناك

وهل المرتب ده كويس ولا لاء

عشان المكتب عايز 14000 جنيه

وياترى المبلغ ده كبير ولا معقول

منتظر الافاده منكم افادكم الله

أوعى تقبل أوعى أوعى

كلام الأفاضل HDarwish وزعلان والله كله صح

المبلغ ده ما يعيشكش سوري في اللفظ زبال في الكويت

شركة الأمن دي أقل حاجه شغل 12 ساعة متواصل واقف على رجلك في عز الحر 48 و50 درجة

ومش حقولك ان الجو كده حيبقى حلو

ممكن يبقى جنب الحرارة دي شوية رطوبة يخلوك واقف أكن واحد راشش عليك جردل ميه

أو شوية تراب (زي الخماسين عندنا) بس دي بتستمر على مدار الصيف

بصراحة HDarwish وزعلان جابوا من الآخر ووالله انا شفت المناظر دي بعيني في الكويت 7 في أوضه واحده

وشفت أربع أوض كل أوضه فيها 5 وكلهم بيستخدموا حمام واحد

وتوقع ان الشركة اللي حتروحها مش حتختلف عن كده كتير

احمد ربنا انك لقيت حد ينصحك

وماتقلش اي حاجه احسن من مصر وحالنا فيها

لأ غلط

يا تروح على شغل يناسب مؤهلاتك ويحترمك

يا انت في مصر مش حتموت من الجوع

أصبر بجد

أصبر وماتستعجلش رزقك جايلك

وتقبل مني التحية

والله كلام الاستاذ حسن ( HDarwish ) و الاستاذ جدار عين العقل

14000 ده جنون علشان تيجي تشتغل حارس امن و صدقني حراس الامن متمرطين و هيطلع عينك و فعلا الجو زي ما الاستاذة قالوا ده يدوبك عبال ما تجمع المبلغ اللي انت دفعته اصلا هتحتاج سنتين تلات ده غير ان الكويت مش سهلة يعني تسيب بلدك و اهلك علشان مبلغ زي دا بجد مبلغ اقل شئ يقال عنه زبالة فعلا و شغلة زي دي طب ليه ؟؟ احسن لك اصبر و رزقك هيجيلك

و حكاية بتاعت حراس الامن انا بصراحة مش متاكد لكن سمعت ان حصلت حكاية مشابهة للحكاية دي و الناس دفعوا نفس المبلغ تقريبا و في الاخر اتنصب عليهم

و لو انت متجنن اوي علي الكويت هو فيه حل بس مش سكتي ولا اعرف صراحة تجيب له سكة ازاي المهم تجيب لك اقامة و دي سعرها بيكون من 900 - 1200 دينار يعني 18000 - 24000 جنيه انا عارف انه رقم فلكي لكن بالاقامة بتاعت العمل دي تقدر تشتغل وظيفة معقولة نسبيا و نظيفة لكن تجيبها ازاي انا اسف ما اعرفش سكتها يعني لو ليك قرايب هنا في الكويت هتبقي سهلة لان اول ما هتيجي الكويت اساسا هتيجي علي مين هو ده السؤال ثانيا انت هتعرف تجيبها ازاي يعني انت مستحيل هتعرف تيجي الكويت سياحة و زيارة برده مافيش و ماظنش انها سهل ان واحد يجبهالك لانها فيها نصب كتير اوووووووووووووووووووووووووووووووووووووووي

ربنا يكون في عونك

و طور نفسك في تخصصك اكتر و في الكمبيوتر و الكلام ده كله

و تقبل تحياتي

ولا تنسوني انا معاكوا في ديونية المصريين في الكويت ان شاء الله mft: يا هلا و يا مرحبا بالكل

اشلونك :wub:

تم تعديل 29 أبريل 2009 بواسطة MoHaMMeD EgYpT

[HDarwish]

كلامك صح ميه في الميه يا ابو جوده

حتى في الشركات الكبيره .. المعروف ان اول كفيل هو اللي بيتحكم فيك أقلها إنه لا يعطيك تحويل وإنما بيعطيك مغادره .. زي ما حصل مع ناس زمايلنا كثير جدا .. إنه جاي على شركة سواء كبيره او صغيره .. ويتعرض عليه شغل بضعف المرتب اللي هو فيه لكن للاسف ما ينفع يحول من على الشركة وبيضطر في الحالة دي يا إما يرضى بالأمر الواقع يا إما يدفع فلوس لو شركة صغيرة يا إما ياخد مغادره ويرجع بفيزا تانيه ...

المهم في الموضوع ... إن اللي عايز يسافر ويجي الخليج قدامه طريقتين واحده فيهم أفضل كثير من الثانية

- يأهل نفسه كويس بحيث الشركات هي اللي تتهافت عليه زي الأمثلة اللي بشوفها قدامي .. وبتشرف بجد .. وساعتها يشوف الشركات الكبيره وفروعها ومكاتبها في مصر ويقدم ويعمل مقابلات لحد ما يحصل على الوظيفة أو حتى من على مواقع التوظيف المحترمة زي بيت ومونيستر وجالف تالنت والمواقع دي ... وهي دي الطريقة المفضله

- يشتري فيزه .. وهوه ونصيبه .. لكن لا أنصح بها إلا في الحالات النادره .. وفي هذه الأوقات لا أنصح بها إطلاقاً ..

تحياتي

[HDarwish]

آسفين يا ميشوهات

الأستاذ / أحمد حمد خلانا نخرج عن موضوعك الأساسي ..

خلينا نكمل التعارف

أنا

حسن

مقيم في الكويت منذ خمس سنوات بس :lol: يعني الحمد لله خلصت الربع الأولاني عقبال الربع الأخير

تحياتي

[ssmaly]

اساذ حسن

فينك ياباشا

قلت حتتصل بى لما تيجى من الأجازة

منتظر اتصالك

انا اسمى محمد

صيدلى من رماااااااااااااااااااان يعنى عديت التلات تربع

المشكلة فى ابداء النصيحة لاى واحد جديد و نقوله وضع العمل الى معروض عليك مش كويس

يقولك سيبنى اجرب ما انت عاقد فى الكويت سنيين طولية ليه ما رجعتش لو الوضع مش كويس

ويدفع الاف الجنيهات المقترضة (معظم الاوقات) و يجيى و يلاقى الوضع مش كويس يسعى انه يدفع القرض اللى عليه وبعدين يشوف يرجع ولا يستمر

يعنى بيشتغل ببلاش

[الحاج فوزى]

الحاج فوزى .. بالكويت من حوالى 6 سنوات ..

كل التحية للأفاضل الكرام . .

وللأخ العزيز حسن درويش ..

[HDarwish]

اساذ حسن

فينك ياباشا

قلت حتتصل بى لما تيجى من الأجازة

منتظر اتصالك

انا اسمى محمد

صيدلى من رماااااااااااااااااااان يعنى عديت التلات تربع

المشكلة فى ابداء النصيحة لاى واحد جديد و نقوله وضع العمل الى معروض عليك مش كويس

يقولك سيبنى اجرب ما انت عاقد فى الكويت سنيين طولية ليه ما رجعتش لو الوضع مش كويس

ويدفع الاف الجنيهات المقترضة (معظم الاوقات) و يجيى و يلاقى الوضع مش كويس يسعى انه يدفع القرض اللى عليه وبعدين يشوف يرجع ولا يستمر

يعنى بيشتغل ببلاش

على فكره دي ثالث مرة أكتب رد على التعليق وكل مره يحصل خطأ والكلام يطير زي العصافير .. يارب المرة دي ما يطير

د/ محمد ...

بجد أنا كنت ناوي أول ما اوصل الكويت اتصل عليك لكن للأسف الظروف شغلتني شويه .. إن شاء الله اتصل عليك النهارده ونرتب أعدي عليك إمته .. أنا فاكر إنت قولتلي إنك في حولي .. صح كده؟ .. وبعدين يا راجل يا طيب أنا إنشغلت شوية وإنت أكيد معاك تليفوني .. خليك إنت الأسبق ..

تحياتي وتمنياتي بدوام الصحة والعافية

حسن

الحاج فوزى .. بالكويت من حوالى 6 سنوات ..

كل التحية للأفاضل الكرام . .

وللأخ العزيز حسن درويش ..

الحاج فوزي .. الراجل المحترم .. بأمانه وبدون مجاملة إنت ليك عندي كمية احترام وتقدير ما لها حدود .. كفاية ذوقك واحترامك للآخرين اللي بيبقى واضح جدا من بين سطور كلماتك ..

أظن يا حاج فوزي إننا اتقابلنا قبل كده على ما اظن على قهوة الخيمة .. بس ممكن ما تفتكرني لإن ما طولناش يومها لإن أنا كنت بستعد إني أمشي وكنت إنت يادوب لسه واصل .. صح كده؟؟ ولا الزهايمر بدأ يشتغل معايا ...

تحياتي .. وتمنياتي بدوام الصحة والعافية

حسن

[الحاج فوزى]

أشكر مجاملاتك التى تنم عن شخصك الجميل ..

لم أتشرف بعد بلقائكم ..

لكن إن شاء الله يكون قريبا ً ..

[adelas]

السلام عليكم اريد ا ن اسئل اخواني المصريين عن توقف الفيزا او كارت الزيارة التجاري لية السبب وامتي ترجع تفتح تاني

[قلب ابيض]

هلا هلا هلا

يا جماعه الخير 000الديوانيه دى رجالى فقط اححححم

طب ممكن فرع لآخواتكم المصريات بالكويت ؟؟

انا سعيده بتجمعكم جدا لعلنا نفيد بعضنا البعض بخبراتنا كل فى مجاله

وانا قضيت بالكويت تلات ارباع المده كما سميتموها 000 انا ام نور وعملت بالكويت لسنوات والان انا من منازلهم برغبتى والحمد لله

واحب اعرف منكم بكل صراحه مين قيكم مضطر للاقامه بالكويت ؟ وليه ؟

ومين بيشعر بأنها بلده فعلا 00وليه برضه ؟؟؟

تحياتى لكم جميعا

[HDarwish]

هلا هلا هلا

يا جماعه الخير 000الديوانيه دى رجالى فقط اححححم

طب ممكن فرع لآخواتكم المصريات بالكويت ؟؟

انا سعيده بتجمعكم جدا لعلنا نفيد بعضنا البعض بخبراتنا كل فى مجاله

وانا قضيت بالكويت تلات ارباع المده كما سميتموها 000 انا ام نور وعملت بالكويت لسنوات والان انا من منازلهم برغبتى والحمد لله

واحب اعرف منكم بكل صراحه مين قيكم مضطر للاقامه بالكويت ؟ وليه ؟

ومين بيشعر بأنها بلده فعلا 00وليه برضه ؟؟؟

تحياتى لكم جميعا

أهلا بيكي يا ام نور .. برغم إني مو راعي هالديوانية لكن حيالله من يانا (يعني حيالله من جانا بس الأولى كانت كويتي حريمي).

ما شاء الله يا أم نور .. ثلاث أرباع المدة ؟! والله كثر خيرك .. ده يادوب أنا بخلص في الربع الأولاني وجبت آخري

بالنسبة لسؤال مين مضطر للإقامة في الكويت .. فأنا والحمد لله مش واحد منهم خالص .. وإن شاء الله مش هقدر أكمل حتى لحد نص المدة .. عارف زمانك بتقولي في سرك .. إنسى يا عمرو والكل كان بيقول نفس الكلام اللي انت بتقوله ده في البداية وفي الآخر بيقعد بالعشرين والثلاثين سنة .. عندك حق .. وده كمان مقلقني .. ده حتى في مرة كنت بتحاور مع مهندس كهربا شغال في وزارة الكهرباء وعنده يجي 60 سنة ومن كلامي معاه اتضح انه يادوب خلص الجامعة وسافر على الكويت ومن ساعتها ما تركها ..سألته بصراحه كده يا بشمهندس بعد العمر ده كله اللي قضيته في الكويت هل حاسس إن اختيارك كان صح ولا لأ .. يعني لو رجع بيك الزمن من تاني هتفضل المدة دي كلها في الكويت ولا اصلا من البداية كنت هتسيب مصر وتيجي الكويت خصيصا.. وكانت إجابته كالتالي.. يابني في البداية ماحدش بياخد أكثر من نصيبه .. لكن لو رجع بيا الزمن من تاني .. كنت هاسافر برضه الكويت لكن ما كنت هحدد مده ولكن كنت هحدد هدف أحققه وارجع تاني لكن للاسف الهدف كان بيجيب هدف وكل ما تخلص حاجه ترجع للبدايه من تاني .. وبعدين سألته يعني تنصح واحد في نفس ظروفي بإيه .. قاللي نفس اللي كان هيعمله من زمان وإن ما تضيعش يابني ثمرة شبابك هباءاً وشوف إنت عايز إيه من الكويت حققه وإرجع على طول بغض النظر عن أي ظروف وأي أهداف أخرى يمكن تحقيقها وانت في مصر.

بالنسبة للسؤال الثاني ..

أنا لا أشعر بتاتا إنها بلدي .. ودايما بحس إني غريب فيها .. كثير حاولت إني أتقرب ليها .. لكن كل ملامحها كانت ضد مخيلتي وأحلامي .. وكل ما اقتنع واقول ده نصيبي والمفروض إن الواحد يرضى بنصيبه علشان يرتاح .. ألاقيني مش قادر .. والقلب وما يريد بئا .. إيه ده شكلي خرجت عن الموضوع ..

لأ بجد .. أنا بحس دايما إني غريب في البلد دي .. الناس والأماكن حوليا كلها غريبه عني .. ما بين هندي وبنغالي وباكستاين وإيراني حتى العرب فلسطينيين ولبنانيين وسوريين ده حتى المصريين اللي هنا مش زي اللي هناك .. ما تعرفيش بئا هل الغربه اللي غيرتهم لما وصلوا الكويت ولا اساسا ما بيجيش الكويت إلا العينة الغير مرغوب فيها .. آه والله صدقيني حاسس كإن فعلا المصريين اللي هنا مش مصريين حاجه تانية بس مش مصريين..

طولت عليكي .. أنا آسف .. لكن حضرتك سألتي سؤالين عايزين مجلدات الواحد يكتب فيها علشان يقدر يجاوب عليهم .. سؤالين اللي يجاوب عليهم لازم يفضفض ويقول كل اللي مضايقه ورافضه.

تحياتي .. وتمنياتي بحياه ملؤها السعادة والهناء

حسن

[RAli]

السلام عليكم ورحمة الله وبركاته

انا اسمى رمزى فى الكويت من حوالى سنتين

عاوز اشترى سيارة

وباقارن بين هيونداى ماتريكس موديل 2009 (على اساس انزلها مصر بعد كده يعنى بعد ما اخلص اقصدها واستهلكها هنا بدل ما ابيعها) او تريل بليزر 2006 (للاستخدام الشخصى هنا ) او اجيب سيارة قديمة شوية امشى بها حالى وخلاص

مش عارف اخدت قرار ياريت حد يفيدنى برأيه

ولو فيه حد عنده سيارة عاوز يبيعها ممكن نتواصل

جزاكم الله خيرا