ثمن الغربة

[se_ Elsyed]

دفعني إلى كتابة هذا الموضوع ما شاهدته من حالة كثيراً من المغتربين الذين تركوا زوجاتهم وأولادهم فى مصر وسافروا إلى الخارج لكسب العيش ...

وأصبحت علاقتهم بأهلهم لا تتعدى الإجازة السنوية التى يزورونهم فيها وهي في حالات كثيرة لا تتجاوز شهر بالعام ... وشب الأبناء وأصبحوا ينظرون إلى الأب على انه شخص يرسل لهم النقود اول كل شهر ويقضي معهم بضعة أيام سنوياً كسائح اجنبي جاء ليرى معالم البلد .... اما حال الزوجات فحدث ولا حرج من تدمير لنفسياتهن وتدمير لأنوثتهن وحرمان من أشياء خلقها الله فينا كبشر ....!!!!

وكبر الأبناء وكبرت الزوجات ومازال هؤلاء المغتربين فى غربتهم يركضون وراء لقمة العيش .. وكأنها حكاية بلا نهاية ....

وقد قابلت منهم الكثير هنا ولكم أن تتخيلوا شخص ما متزوج منذ ما يقرب من 20 عاماً وتغرب من اول يوم زواج وقد قضى مع زوجته ومن بعدها أولاده 20 شهر فقط خلال هذه الفترة الطويلة كإجازة سنوية كل عام ...

لدرجة أنني سألت بعضهم بعشم ... ألا تشتاق إلى زوجتك بقية العام ؟... أليس لها كأنثى حق عليك ؟ ... يعني من اول سنة جواز وأنت عمال تسافر ... طيب انت لو عازب ممكن تسافر أن شاء الله تروح بلاد الواق الواق .. انما اللي سايب عروسة لم يمضى على زواجها شهر يبقى أيه ... ؟ والغريب ان إجابتهم كانت غريبة المعنى .. يا عم احنا كبرنا خلاص على الحاجات دي وأدينا بننزل كل سنة كام يوم وخلاص !!!! طب واولادك المراهقين دول يا عم ... ماتخافش ماهي مامتهم بتاخد بالها منهم وشديدة عليهم...!!!!!

أنا لا أتكلم عن حالات فردية ولكن المغتربين فى دول الخليج خاصة يرون الكثير والكثير من هذه الحالات .

وحكى لي بعض الزملاء من هذه العينة بإن أولادهم فى فترة المراهقة الان وقد انحرفوا واتجهوا للمخدرات وأصبحوا فاشلين فى الدراسة ومنهم من إتجه لطريق الزنا حيث تتوافر معه النقود اللي بابا بيبعتها ..... طب يا عم مستني أيه ما تتنيل تنزل .... يقول طيب السنة دي وخلاص .. وسنة تجر سنة تجر سنة ..... والسنة دي عايز يشتري شاليه فى مارينا والسنة اللي جاية البنت بتتجوز ..... وهلم جرا .... .

وحجتهم بإنهم يفعلون ذلك لتوفير حياة كريمة لإبناءهم !!!!!

أي حياة كريمة هذه وهل الحياة الكريمة تكون بالمال فقط ؟!! وما هو تعريف الحياة الكريمة اللانهائية هذه ؟!!!

حكى لي صديق من أصدقائي المقربين قصة مخيفة لم تنمحى من ذاكرته ولا ذاكرتي انا أيضاً

فقدعمل بالكويت لمدة 5 سنوات في بداية التسعينيات.. وكان له احد الزملاء يعمل معه مقيم بالقاهرة فلما عرف أن صديقي نازل بعث معاه مبلغ من المال - فلوس بس لا خطاب ولا غيره - لتوصيلة لزوجته وأولاده بالقاهرة -

وبالفعل ذهب صديقي لتوصيل الامانة وطرق باب الشقة خرجت له السيدة فقال لها ان أستاذ فلان باعت لحضرتك المبلغ ده فقالت له .. أيه ده هو مش نازل السنة دي كمان دي تالت سنة .. قالها لأ ما اعتقدتش .. فأصيبت السيده بحالة هستيريا ورمت الفلوس على السلم وأخذت تهذي بكلام - يعف لساني عن قوله - ولكنه تعبير عن حالة زوجة غاب عنها زوجها مدة 3 سنوات متواصلة ولكن بطريقة أنسانة بسيطة وعلى ما يبدو انها لم تتلقى حظاً طيباً من التعليم ... فما كان من صديقي إلا ان فر هارباً لتجمع الجيران والدنيا كلها على صراخها ..

ولقد شعرت بالأسى والحزن لهذا الموقف وتخيلت حالة هذه السيدة وأمثالها .....

فهل نلتمس العذر لهؤلاء الأباء الذين ضحوا بشبابهم وبزوجاتهم وأولادهم من اجل بضعة دراهم ؟

[فــيــروز]

نلتمس لهم العذر فى حاله واحده فقط

لو كنا نؤمن ببمبدا الغايه تبرر الوسيله

والغايه هنا تبدو نبيله وهى تامين مستقبل الاولاد

لكن تامين المستقبل لا يكون بالاموال فقط

ولكن بتربية الابناء كما ينبغى ان يربوا

فى اسره متكامله ودور الاب فيها واضح مثل دور الام تمام

المشكله ان كثيرين لا يحددون هدفهم من السفر من البدايه

يعنى الانسان بيكون غاية طموحه يبقى له شقه مثلا له و لاسرته يعيشوا فيها و يؤثثها كويس

بعد كده يقول عاوز عربيه

وبعدها عاوزين شاليه نصيف فيه

بعدين نحتاج شقه لكل ابن من الابناء

لا مانع اطلاقا من كل هذه الطموحات المشروعه لكن ليس على حساب ابنائى .. ليس على حساب استمتاعى بالقرب منهم و استمتاعى بصحبة زوجى او زوجتى

ما قيمة النقود اذا لم نستطع ان نستمتع بها مع من نحبهم وهم الزوجه و الابناء؟ وهل يكفى شهر كل سنه لتعويض باقى شهور السنه

الصراحه لا اظن انى ممكن اوافق ان اتزوج شخص يتركنى مع الابناء ليسافر ليكون نفسه

ممكن فى البدايه لو كان اصطحابى معه صعب لكن ليس للابد لان الاب ليس محفظة نقود او ضيف عابر فى حياة الابناء شهر كل سنه

ثم ان تامين مستقبل الاولاد بهذه الصوره يحرمهم من حقهم ان يكافحوا ليعتمدوا على انفسهم و اللى بييجى سهل بيروح سهل

ولا احبذ فكرة ان ناتى بكل شئ لاولادنا ونشعرهم طول الوقت ان كل الامور سهله و متيسره

كده نحن لا نبنيهم نحن نجنى عليهم

فيروز .. الى ربات البيوت

[Guest Mohd Gramoun]

بسم الله الرحمن الرحيم...

.....الخلاصة ماكتبته....

السنة دي وخلاص.... و سنة تجر سنه؟؟!!

مافيش هدف محدد و مافيش قناعة

[صعيدي]

طيب ما يقسموا البلد نصين

بمعنى بدل ما يرجع للبهدلة فى مصر ويتحرم من الرزق اللى فى الغربه يجيب مراته واولاده معاه وحتى لو التحويشة قلت او انعدمت كفاية انهم مع بعض و عايشين كويس

[se_ Elsyed]

طيب ما يقسموا البلد نصين

بمعنى بدل ما يرجع للبهدلة فى مصر ويتحرم من الرزق اللى فى الغربه يجيب مراته واولاده معاه وحتى لو التحويشة قلت او انعدمت كفاية انهم مع بعض و عايشين كويس

في حالات كثيرة جداً لا ينفع ذلك يا عزيزي ومنها "

1- المرتب بسيط ولا يحتمل تكلفة معيشة أسرة فى الغربة.

2- الاولاد كبار ومنهم من بالجامعات .

3- جهات عمل كثيرة لا تسمح للعامل أو الموظف بإستقدام عائلته لتجنب تحملها تكاليف سكنة وتنقلاته وعلاجهم ... إلخ.

وزي ما قال أخونا م جرمون ... مافيش هدف .. يعني لو واحد مخطط انه يسافر يقعد سنتين أو تلاته فقط ممكن يقنع اولاده بإنهم يتحملوا فترة تغربهم بالإضافة إلى ان هذا لن يؤثر على حياتهم بالشكل الكبير.

[بنت شعنونة]

طب تقول ايه عن طبيب بقاله28 سنة في السعودية

بعت بناته يدرسوا الكلية لوحددددددهم في مصر

واحدا في القاهرة و التانية في المنصورة

وبعد سنة حصلهم اخوهم اللي بيدرس في اسكندرية!!!!

والولد توووووووتووووووو جدااااا لآن اخواته كلهم بنات

وبعد 5 سنين نزل مراته عشان تخلي بالها من البنات!!!

وفضل هوا

وجاله سرطان

جه خد كيماوي هنا ورجع لمجرد انه ارخص من السعودية

جاله القلب وعمل عملية

وفضل هناك

رئيسه بيقوله ابوووووس ايدك امشي

عيالك بيضيعوا؟؟

ها يطلع معاش السنادي وعاوز يدور على شغل خاص في السعودية

هوا ملياردييييير دلوقتي

ومافكرش يجيب لعيلته عربية تخدمهم بدل المرمطة!!

النتيجة دلوقتي

الولد مدمن وشكله مش طبيعي قالب على بنات

بنته الكبيرة... ست بيت ممتازة وكداااااابة ممتازة درجة اولى

بنته التانية خارجا داخلا لوحدها في القاهرة مع شلة شكل كل يوم

وابوهم فرحان بيهم!!!!!!!!!

[elbana]

لم أترك أسرتي يوماً واحداً منذ زواجي ، أحرص على الجلوس مع زينب ومياً والحديث إليها والاستمتاع بمالطعة عينيها الجميلتان وابتسامتها الرائعة ، أما علياً فأحرص على الفرار منه :lol: :lol: :lol: ، أصله بيهبش ويخربش (7 شهور) ، أما أمهما فأدعو لها بطيب العيش والسعادة وأعدها إحدى نعم المولى عز وجل علىّ .

ولا أتخيل الحياة بدونهما ، وأعيش منذ الآن حالة كآبة داخلية لأنهم سيسبقوني إلى مصر في يناير المقبل على أن ألحق بهم بعد بضعة أشهر في عودة نهائية إلى المحروسة ، ويأتي تأخري لاستكمال إجراءات العودة ولأمور متعلقة بعقد عملي ، وعلى الرغم من أن الأمر لا يعدو كونه بعضة أشهر وأعود - بمشيئة الله - للقائهم إلا أنني أشعر بغصة كلما تذكرت الأمر .

وقد صادفت نماذج مما ذكرت أعلاه ، وصادفت أكثر منها ، وأعجب لحالهم وأدعو الله أن يهديهم ويغير حالهم .

[se_ Elsyed]

شعنونة كتبت

النتيجة دلوقتي 

الولد مدمن وشكله مش طبيعي قالب على بنات 

بنته الكبيرة... ست بيت ممتازة وكداااااابة ممتازة درجة اولى 

بنته التانية خارجا داخلا لوحدها في القاهرة مع شلة شكل كل يوم 

وابوهم فرحان بيهم!!!!!!!!!

مش عارف الواحد يقول أيه فى حاجة زي كده ... يعني الأب من دول بيفضل يحلم باليوم اللي يجني فيه حصاد تعبه .... وهؤلاء يجنون الشوك والعلقم .....

البنا كتب

ولا أتخيل الحياة بدونهما ، وأعيش منذ الآن حالة كآبة داخلية لأنهم سيسبقوني إلى مصر في يناير المقبل على أن ألحق بهم بعد بضعة أشهر في عودة نهائية إلى المحروسة ، ويأتي تأخري لاستكمال إجراءات العودة ولأمور متعلقة بعقد عملي ، وعلى الرغم من أن الأمر لا يعدو كونه بعضة أشهر وأعود - بمشيئة الله - للقائهم إلا أنني أشعر بغصة كلما تذكرت الأمر .

صديقي عزيزي البنا أودباتي المنتدى .....

أرجو من الله ان يوفقك ويجمعك بعائلتك سريعاً ... كما أرجو منك رجاء خاصة حينما تستقر بك الأمور فى مصر أن تحكي لنا عن كيفية التاقلم مع البيئة المحيطة بك ... حيث أعتقد انها مسألة صعبة بعد سنوات الغربة بالخارج والتعود على نمط معيشة معين ... ونفسي بجد حد يحكيلي هو عمل أيه فى مصر بعد ما رجع نهائي.

[se_ Elsyed]

يحكي لي احد أصدقائي هنا بأنه تربطه زمالة بإحد المهندسين العاملين بالرياض وكان كبير السن ويعمل منذ سنوات طويلة تاركاً اولاده وزوجته بمصر ويكتفي بالنزول سنوياً لهم .. وكانوا ينصحونه بإنهاء عملة والإستقرار بجانب عائلته وبارك الله فيما رزق وكفاية كده خاصة وأنه ميسور الحال .. فكان يؤكد لهم بإنه لن ينزل إلا إذا اكمل المليون جنية ....

وكانوا معتادين أن يتلاقوا هو ومجموعه من الزملاء كل فترة وفي أحد المرات تأخر عليهم ولم يظهر له أثر ، فدب القلق فى قلوبهم وقرروا أن يذهبوا إلى منزله وبالفعل وجدوا سيارته أسفل البيت وطرقوا باب الشقة فلم يجيبهم فقاموا بإبلاغ الشرطة التى جاءت وكسرت الباب فرأوا منظر إنساني عجيب .....

وجدوا الباشمهندس حاطط قدامه على الترابيزة شنطة مفتوحة ومليانة فلوس ومنكفأ عليها وقد صعدت روحه إلى بارئها منذ عدة أيام .........

ولا حول ولا قوة إلا بالله

[فــيــروز]

وجدوا الباشمهندس حاطط قدامه على الترابيزة شنطة مفتوحة ومليانة فلوس ومنكفأ عليها وقد صعدت روحه إلى بارئها منذ عدة أيام ......... 

ولا حول ولا قوة إلا بالله

فعلا .. لا حول ولا قوة الا بالله

[White heart]

se_ Elsyed كتب:

فهل نلتمس العذر لهؤلاء الأباء الذين ضحوا بشبابهم وبزوجاتهم وأولادهم من اجل بضعة دراهم ؟

انا من وجهه نظرى لا ألتمس لهم العذر!!! خاصه نوع معين منهم،

نوع يتسبب فى مشكله نتيجه سؤ تخطيط .... الأطفال ..... كيف نقوم بانجاب الطفل أولا و من ثم نبدأ بالبحث عن مصدر رزق أو نحسن من المصدر الموجود فعلا (ان وجد !)

انا من رأيي انه فى بدايه الزواج يجب أن يكون هناك تخطيط أكثر من ذلك فأما ان يرحلوا "سويا" للعمل و الكسب و اما أن يبقوا سويا .... و فى الحالتين يجب التفكير و التخطيط ألف مرة فى مستقبل الأطفال...

و ان لم يكن هناك رؤية واضحه و مخططه لمستقبل هذا الطفل ....

اذن فالأمتناع .... حتى تتضح هذه الصورة و الا زادت الأعباء و المشاكل على الجميع ثمن الغربه الباهظ حقيقى هو انتاج جيل ضائع لا مستقبل له، ثمن يدفعه مجتمع بأكمله ... و فى نظرى هذه احدى أنواع الأنانيه أن نفكر فقط فى أنفسنا و فى سعادتنا بأن نصبح أباء دون التفكير فيمن هو قادم و سيصبح يوما وحيدا!!!!

[elbana]

صديقي عزيزي البنا أودباتي المنتدى ..... 

أرجو من الله ان يوفقك ويجمعك بعائلتك سريعاً ... كما أرجو منك رجاء خاصة حينما تستقر بك الأمور فى مصر أن تحكي لنا عن كيفية التاقلم مع البيئة المحيطة بك ... حيث أعتقد انها مسألة صعبة بعد سنوات الغربة بالخارج والتعود على نمط معيشة معين ... ونفسي بجد حد يحكيلي هو عمل أيه فى مصر بعد ما رجع نهائي.

شكراً على كلامك الحلو ، وأنا فعلاً ناوي بمشيئة الله أكتب كل انطباعاتي بعد الاستقرار في مصر لأن موضوع العودة والاستقرار مقلق للمغتربين جميعاً وخطوة هامة ومصيرية خصوصاً في ظل الظروف الصعبة في مصر دلوقتي .

عندك حق يا وايت هارت أنا موافق على حكاية (سوياً) دي ، فعلاً يا إما مع بعض يا بلاش ، يعني ع الحلوة والمرة ، لكن أسيبهم علشان الفلوس وأحرمهم مني ومن الشعور بالأمان لما أكون وسطهم ، وأحرم نفسي منهم فده في رأيي نوع من الجنون .

[حشيش]

بالفعل هذه النماذج موجودة بكثرة فى الخليج... ولكن الشئ اللى أنا مش قادر أفهمه هو موقف الزوجة من هذا الأمر...لأن الموضوع بيتم برضى الطرفين...يعنى الزوج مبيسبش مراته 20 سنة بدون رغبتها!!!

[linux]

والولد توووووووتووووووو جدااااا لآن اخواته كلهم بنات

قمة الأراء النمطية (Stereotype) المصرية !!!

أعز أصدقائي من أيام الطفولة، خالد، ولد على تلات بنات ... و كان و مايزال أبعد مايكون عن "توتو"!! بالعكس ... من أرجل و أشهم الرجال اللى ممكن تقابليهم فى حياتك!

بصراحة ... الجملة بتاعتك دى حسيت أنك أهنتية بيها !!! و ربنا شاهد أنى أعرف واحد له آخين و مع ذلك "دلوعة" جدا ...

صوابعك مش كلها زى بعضها يا دكتورة

[بنت شعنونة]

"وش مصدوم"؟؟؟؟؟

انا يا ليونكس؟؟؟؟

طب ربنا شاهد اني والله ما كان دا قصدي ابدا والله العظيم تلاتا

بس فعلا الولد من يومه توتووووو جداااااا

وبيتصرف ويتكلم ويتحرك زي البنات

ولم اقصد باي حال من الأحوال لا التلميح الى انه بنوته بسبب انه ولد وحيد!!!!!!!

الله يسامحك

"وش زعلان "

[linux]

ربنا ما يجيب زعل ياشعنونة و آسف لو كان ردي بايخ

أصل عندي حساسية زايدة من التعميم و وضع الناس فى أطار أو نمط محدد كأنهم قوالب و ستمبات ...

و دى أكتر حاجة مثلا بتنرفزنى فى أفلام عادل أمام السطحية ... كل المتدينين ما عندهمش ضمير أو زمة ... كل المغتربين بقوا بتوع فلوس و غير وطنين و ولادهم ماشين على حل شعرهم وهكذا

[بنت شعنونة]

أصل عندي حساسية زايدة من التعميم و وضع الناس فى أطار أو نمط محدد كأنهم قوالب و ستمبات

في دي انا مصدقاااااااااك

ما الحساسية كلها طلعت عليا اهييييييييييي

بس ولا يهمك فداك يا فندم :))

بس والله انا ما عممتش انا قلت السبب اللي انا شايفاه مش اكتر

وربنا يسامحنا بقى "وش محرج"

تيجي نعمله موضوع؟؟

قولبة الشخصية المصرية؟

[Farah]

المشكله مش بس في غياب رجل البيت المشكله الكبري عندما

يطول الغياب وفي الحاله دي الكل بيتأقلم علي عدم وجود الاخر علي طول معه

فالزوجه تستعد طول السنه لمقابلة الزوج في الأجازه التي لا تتجاوز غالبا 60يوما ؛؛من أكل؛لنظافه ، لإهتمام بنفسها؛بالضبط زي مايكون ضيف وكذلك الاولاد

عند عودة الزوج والاب بيكون معظم الوقت مشرف في البيت وهي اخدت علي الحريه مش لسمح الله بتعمل غلط ولكن حريه الحركه التصرف علي راحتها حل المشكله دي قبل دي مش لازم ترجع لاحد ولكن في حالة وجود الزوج لازم ترجع له في كل صغيره وكبيره لما كان مش موجود كانت بتكلمه في الموضيع اللي من رأيها تستاهل او بتقوم بكل الاعباء عشان متشغلوش في الغربه

الاولاد اخدوا علي الاحتكاك بماما وده سيكون تعدي علي الأب

ومن هنا تبدأ مشاكل كثيره ليست في الحسبان

علي فكره الكلام ده من ناس عاشوا التجربه دي

[abdulmuttaleb]

up

[zamalkawi fe el kuwait]

تمن الغربة كبير اوى يا جماعة ...................................ومحدش بيحس بالتانى المشكلة ان الناس فى مصر فاكرة ان ما دام الواحد فى الخليج يبقى هيرجع بالملايين ودة اكبر حاجة بتحبطنى .........