هوة احنا لية بنحب مصر؟؟؟؟

[سونة]

الاغلبية من الناس الكبار هنا (مكانة وليس سنا طبعا)

بيعملوا حا جات كتير

ايشي مطالب للمصريين

علي حزب جديد

وحاجات تانية كتير

اكيد الدافع ورا كل دة هوة في الاول والاخر الحب لمصر وللمصريين

زمان وانا صغيرة كنت با فتكر ان مصر دى واحدة ست

ساعات صحبتى مثلا واعد كلام معاها مخ عيلة بئي

دلوقتى

ساعات احبها اوى واحس بجد انها واحدة عزيزة علي اوي ممكن بنتى

اختى بجد ببئي بعشقها

وبرضة افضل كلمها بس غير الكلام القديم

وساعات احس انى مش بحبها أوى عادى يعنى

يمكن انا عارفةلية انا ساعات مش بحبها

يمكن السبب الرئيسى هوة الناس في مصر

الناس كرهوا البلد وكرهوا روحهم وكرهوا بعض كرة فظيييييع

كل ماروح في حتة الاقي الناس بتتخانق ويمكن انا عايشة في مجتمع شعبى جدا جدا

في الفرن

في المطعم

في الاتوبيس

عند اللبان(بتاع اللبن MILKيعنى)

يمكن هيا مش قاعدة ومش كل الناس طبعا

بس يمكن 97 في المية كدة

مافيش حد عامل حساب لحد

مافيش حد بيفكر في التانى

كلة بيقول

نفسي000نفسي000نفسي000نفسي000000نفسي0000ثم الاخرون

المشكلة مش مشكلة رئيس ولا حكومة ولاغفر

المشكلة مشكلتنا احنا

عمالين ناكل في بعض

المهم يبقي السؤال

احنا لييييية بنحب مصر؟؟؟؟؟؟

[Farah]

b]احنا لييييية بنحب مصر؟؟؟؟؟؟

تعرفي شكل السؤال سهل بس ده صعب جدا لما ساءلت نفسي معرفتش السبب

هو يبدوا مفيش سبب هو تكوين الانسان المصري حاجه كده في الدم

[se_ Elsyed]

ما تقصده العزيزية سونة وعبرت عنه بتلقائية ممكن نسميه " أخلاقيات الزحام " وهذا شيء ملاحظ جداً جداً فى مصر الآن فى كل مكان ... وما تفعله الحكومة بالناس من فوضى وعدم توفير الحد الادنى من المعيشة الكريمة الادمية لهم ينعكس بشكل تلقائي على تصرفاتهم ، لدرجة تجعلك تشعر بأنك في غابة يريد ان يأكل الكبير فيها الصغير ...

هذ بالإضافة إلى ندرة المثل العليا التى يجب ان يقتدي بها الناس وخاصة الشباب .... و طفا على السطح فئة من الفنانيين المبتذليين ولاعبي الكورة والمطربين الهابطين وأصبحوا هم صفوة المجتمع والذين تسلط عليهم الأضواء مما أفقد الشباب الثقة بنفسه وأصبح كل واحد يسأل نفسه لماذا أجتهد واتعب طالما الهرم مقلوب ؟ وأدى ذلك كله إلى عشوائية فى التصرفات وأختفت اخلاقيات القرية التى كنا نتحلى بها زمان حتى عندما أنتقلنا من الريف للعيش فى المدينة ....

أضف إلى ذلك شيء خطير جداً جداً وهو السموم التى تنشرها وسائل الإعلام وهي أشد فتكاً من المخدرات ..... فبدلاً من ان تكون وسائل الإعلام خاصة المرئية أداة توجيه وتوعية للناس أصبحت ادوات مفاسد وإثارة للشهوات ونشر الرذيلة متمثلاً ذلك فى ما يسمونه اعمال فنية وأغاني فيديو كليب وحفلات ماجنة تذاع من على الشواطيء وترى الناس بها شبه عرايا ........ فمحصلة ذلك كله ضاعت الاخلاق وضاع معها إنتماء عماد الوطن وهم الشباب ولو سألت كثيراً من الشباب الضائعين الأن أنت باللي بتعمله ده مابتحبش بلدك ... هايجوبك ببساطة وهي يعني بلدي كانت إديتلي أيه ما أنا خلصت الدراسة أهو وقاعد على القهوة لا شغلة ولا مشغلة ....

[disappointed]

احنا لييييييه بنحب مصر ؟؟؟؟

دعاء النقشبندى...

ونور الصبح بيشقشق

فى طبق الفول...

ايدين العيله بتنقنق

وجنب الشيش..

صوت عصفوره بتزقزق

رغيف فينو فى شاى بحليب....

غلابه على القهوه وبتسقسق

باحبّك , وحزنى عليكى ويّايا...

ودمعة غربه جوّايا وبترقرق

بأحبّك...ومن غير ليه

بأحبّك... يا بنت الايه

[القلب المجروح]

الاغلبية  من الناس الكبار هنا (مكانة وليس سنا طبعا)

بيعملوا حا جات كتير 

ايشي مطالب للمصريين

علي حزب جديد

وحاجات تانية كتير

اكيد الدافع ورا كل دة  هوة في الاول والاخر  الحب لمصر وللمصريين

زمان وانا صغيرة كنت با فتكر ان مصر دى واحدة ست 

ساعات صحبتى مثلا واعد كلام معاها مخ عيلة بئي

دلوقتى

ساعات احبها اوى واحس بجد انها واحدة عزيزة علي اوي ممكن بنتى 

اختى بجد ببئي بعشقها

وبرضة افضل كلمها بس غير الكلام القديم

وساعات احس انى مش بحبها أوى عادى يعنى

يمكن انا عارفةلية انا ساعات مش بحبها

يمكن السبب الرئيسى  هوة الناس في مصر

الناس كرهوا البلد وكرهوا روحهم وكرهوا بعض كرة فظيييييع

كل ماروح في حتة الاقي الناس بتتخانق ويمكن انا عايشة في مجتمع شعبى جدا جدا

في الفرن

في المطعم

في الاتوبيس

عند اللبان(بتاع اللبن MILKيعنى)

  يمكن هيا مش قاعدة ومش كل الناس  طبعا

بس يمكن 97 في المية كدة

مافيش حد عامل حساب لحد

مافيش حد بيفكر في التانى

كلة بيقول

نفسي000نفسي000نفسي000نفسي000000نفسي0000ثم الاخرون

المشكلة مش مشكلة رئيس ولا حكومة ولاغفر 

المشكلة مشكلتنا احنا 

عمالين ناكل في بعض 

 

المهم يبقي السؤال

احنا لييييية بنحب مصر؟؟؟؟؟؟

[فــيــروز]

احنا لييييييه بنحب مصر ؟؟؟؟

دعاء النقشبندى...

ونور الصبح بيشقشق

فى طبق الفول...

ايدين العيله بتنقنق

وجنب الشيش..

صوت عصفوره بتزقزق

رغيف فينو فى شاى بحليب....

غلابه على القهوه وبتسقسق

باحبّك , وحزنى عليكى ويّايا...

ودمعة غربه جوّايا وبترقرق

بأحبّك...ومن غير ليه

بأحبّك... يا بنت الايه

هو ده الكلام

[القلب المجروح]

بسم الله الرحمن الرحيم

الأخت العزيزه سونه

اعتذر عن هذا الخطأ انا كان قصدى اقتبس فقط ولأنى اول مره احاول الأقتباس فنقلت الموضوع كله من غير قصد فاعذرينى

آنا آسفه

و كلتى كنت عايزه اقول كما قال FARAHELYOM

هو سؤال شكله سهل و لكن أجابته صعب لكننا نحبها و تعشقها و نضحى بارواحنا فداها و نختلف مع بعض و نتخانق و لكن فى لحظه كله يذوب لو واجهها خطر ليه بقى مش عارفه0

تحياتى و اعتذر مره اخرى

[Farah]

كنت عايزه اقول كما قال FARAHELYOM

معلهش يااداره سطر خارج الموضوع

أقر انا -------------المعروفه في هذا المنتدي باسم FARAHELYOM بانني انثى

[elbana]

الموضوع ده واضح إيه بيشغل بال كل المصريين ، لأن مصر في بالهم على طول ،وده طبيعي ، وكان هناك موضوع تحت إسم (إيه اللي عاجبك في مصر) والحقيقة الزملاء هنا بدعوا كلهم في الرد ، وكل واحد قال ع اللي جواه ، وأثار الأمر شجون الكثيرين ، وكان ردي أنا شخصياً في الموضوع كالتالي :

___________________________

كل اللي قلتوه عاجبني ...

وأضيف عليه ركوب قطر الدرجة الثالثة في الدلتا بالليل وروايح الأفران الوالعة ، ومنظر البيوت اللي طالل من شبابيكها شعاع نور خافت ، وواحد قاعد في كرسي قدامك بينام ، وأنفاس غيطان الرز والقطن بتهفهف .

ولا لما تاخد فلوكة في أسوان بيجدف بيها راجل نوبي عجوز لافف العمة ومشمر دراعاته وعارف إنك تلميذ ومزوغ من المدرسة علشان تتفسح لك شوية في النيل .

ولا لما تمشي ف جنازة معدية من شارع ضيق وتلاقي اللي قاعدين قدام البيوت راحوا قايمين جري وجم يساعدوا في شيل الخشبة وهم بالبيجامات .

ولا لما تقعد تاكل في مطعم فول غلبان وكحيتي الساعة ستة الصبح ويبدأ طبق السلطة يخلص قدامك وتلاقي الراجل جه من نفسه وراح مالي لك الطبق تاني من غير مايزود ولا مليم وكأنه أبوك وعايزك تاكل لما تشبع .

ولا منظر التلامذة بالمرايل الصبحية في الشتا وهم بيمدوا عشان يلحقوا قبل الجرس ما يضرب ، وصوت غناهم السلام الجمهوري (والله زمان يا سلاحي) أو (بلادي بلادي) ، وتمارين الصباح ، ومدرسة صفا ، مدرسة انتباه ، وصوت الأكورديون اللي بتعزف عليه صوابع تلميذ صغير قدام ميكروفون المدرسة ، وفرقة الخطابة وهم عمالين يتحضروا علشان يفتتحوا الإذاعة المدرسية .

ولا أشرعة المراكب البيضا وهي قاطعة زرقة النيل في أسوان وعمالة ترفرف بفرحة ومن وراها الجبل برملته الصفرا وعند سفحه خط من الأشجار الخضرا يفصل بين صفرة الجبل وزرقة الميه .

ولا العربيات لما تكون بتزف عروسة وتلاقي عربيات مالهاش دعوة بالموضوع داخلة تزمر وتساعد في الزفة .

وبالمناسبة أنا كنت سايق العربية مرة على الدائري ولقيت قدامي عربية نص نقل شايلة شوار عروسة (يعني جهاز عروسة بالفلاحي) واللحافات الساتان الحمرا المزهزهة والمخدات البيضا الجميلة وكده يعني ، وكنا وقت العصر ، ولقيت جنب العربية النص نقل عربيتين ثلاثة ميكروباص وفيهم ناس استنتجت بذكائي الحاد إنهم أصحاب الشوار (يعني جهاز العروسة بالفلاحي) المهم ما اطولش عليكم .. قولوا طوِّل ، كانوا ماشيين ساكتين خالص ، رحت دايس بنزين وداخل وسطهم وكانت معايا الحاجة والدتي ، وجيت مزمر زمارة الزفة (بيب بيب بيب .. بيب بيب) ، بصيت لقيت اللي في العربيات كلهم بصوا ناحيتي ، وهاتك يا زغاريد ، وزمامير ، وراحوا مطلعين طبلة كانت معاهم ، وهاتك يا غنا وسقف ، وقعدوا يطبلوا على صاج العربيات ، وأخوكو كان ح يموت م السعادة ، وفضلنا كده ييجي خمس دقايق في زفة متواصلة وكأني واحد من العيلة صاحبة الشوار (يعني جهاز العروسة بالفلاحي) .

الله يسامحكوا مين اللي قلب علينا المواجع ، ما احنا قاعدين في الغربة وراضيين باللي احنا فيه ..... ياللا .

---------------------------------------

وآدي وصلة الموضوع :

http://www.egyptiantalks.org/bforums/viewt...der=asc&start=0

[crossfield]

فاكرين الأغنية دى؟

كنت باسمعها زماااااااااااااااان و أنا لسه فى ابتدائى و لا زالت معلقة فى ودنى:

واحنا فايتين عالحدود ... مستمرين فى الصعود

واختفى النيل الجميل من تحتنا ... و المدن والريف

و أول عمرنا

و ابتدى شئ ينجرح جوة القلوب

و ابتدينا اسئله مالهاش ردود

ملنا عالشباك نخبى دمعة فرت مننا

بصة مالشباك على البحر البعيد

و احنا رايحين بالأمل عالم جديد

كنت فاكرة يا مصر ان تعبت منك

و اكتشفت انى محال استغنى عنك

حتى دوشة صوت جيرانى

و الزحام وحشونى يانى

بسمة حلوة لطفلة لسة صغيرة

لما كنت اديها حتة سكرة

قبل ما نسيبك وحشتينا يا مصر يا امنا

قبل ما نسيبك وحشتينا يا مصر يا امنا

و ابتدى شئ ينجرح جوة القلوب

و ابتدينا اسئلة مالهاش ردود

ملنا عالشباك نخبى دمعة فرت مننا

ملنا عالشباك نخبى دمعة فرت مننا

كنت بأتذكر و انا فى غاية الأسى

لعبنا الكورة فى حوش المدرسة

والشقاوة و احنا لسه صغيرين

و البراءة و الصحاب الطيبين

لما سألتنى اللى جنبى

انت مصرى؟ دق قلبى

اسم زى السحر رفرف عالمكان

زى نسمة مهفهفه بصوت الأدان

ايوة مصريين لآخر كل نقطة فى دمنا

ايوة مصريين لآخر كل نقطة فى دمنا

و ابتدى شئ ينجرح جوة القلوب

و ابتدينا اسئلة مالهاش ردود

ملنا عالشباك نخبى دمعة فرت مننا

ملنا عالشباك نخبى دمعة فرت مننا

الوجوة من تلج و عيون من ازاز

شوقى زاد للعشرة للناس العزاز

و أبتديت أكتب و انا فوق السحاب

أبتديت يا حبيبى فى أول جواب

مصر انت حتة منى

مش مجرد اسم وطنى

قالوا فاضل نص ساعة عالوصول

قولت اية معنى الساعات و الا الفصول

الا فى الأرض اللى فيها ذكريتنا و حبنا

الا فى الأرض اللى فيها ذكريتنا و حبنا

و ابتدى شئ ينجرح جوة القلوب

و ابتدينا اسئلة مالهاش ردود

ملنا عالشباك نخبى دمعة فرت مننا

ملنا عالشباك نخبى دمعة فرت مننا

أغنية رائعة فعلاً ؛يا خسارة فريق الأصدقاء.

[amir]

ماتقولش ايه اديتنا مصـر

قول ح ندىايه لمصر

بعد كلام اخونا البنا مفيش كلام تانى يتقال

هى حاجات صغيره بتعشش جوه تلافيف المخ و تبقى ذكريات حلوه بنفتكرها لما تصعب علينا نفسنا و احنا فى الغربه

و على فكره احلى مصر هى مصر اللى فى الذاكره

لأن مصر الواقع مش هى مصر اللى أنا اعرفها

[DARWEEN]

منكم لله كلكم

أنا بأكتب السطرين دول ومش شايف الكيبورد من الدموع

يمكن عشان كل اللي قاله محبط و البنا ويمكن علشان حاجات أكتر من كده

صعب تقولي ليه بتحب أبنك مع أنه شقي ومغلبك

صعب تقولي ليه بتحب أبوك مع أنه دايما يضربك

والله رحت بلاد أكتير أنضف وأشيك وناس متلمعه ومتعلمه بس مالقيتش فيهم اللي تستاهل أني أموت علشانها أنا وأولادي وأهلي غير مصر اللي مجننانا بظرفها وفقرها وجدعنة ولادها

يمكن حاجه بتتولد ويانا يمكن حاجه جوانا ومش ممكن تطلع مننا

[freefreer]

من غير ليه ..

[ديكارت]

لانها بلدنا بكل بساطة!!!!

[بنت شعنونة]

بصي يا سونة

خلينا نقلب السؤال للعكس

ليه فيه مصريين مش بيحبوا مصر؟؟

لو عرفتي الأجابة دي

اعتقد ها تعرفي الأجابة بتاعت سؤالك اكيد..

[Salwa]

احنا ليه بنحب مصر ؟؟

انا كتبت كتير فى الموضوع ده .....ولو فضلت أقول لآخر يوم فى عمرى ....مش حازهق.

مرة كنا بنسمع اغنية تتحدث عن حب الوطن .....وفجأة وجدت نفسى وانا اترنم بكلمات الأغنية ....ابكى ...وأقول لأولادى ....

رغم ايمانى ....واسلامى ...

لكن أكيد عندما صور الله الجنة فى كتابه العزيز .....كان يقصد الاسكندرية .

برضه حقولها تانى .....مصر بالنسبة لى ....اسكندرية ....اسكندرية ....ثم اسكندرية ....والباقى حبة حبة ....صغننين من الحب .// بس برضه يكفوا الكون كله محبة //

مصر ....

اول نسمة هواء .....تدخل جسدك .....خلاص ...

تشكلك...

مفيش مفر ...

تبقى واحد من المجموع ....

مكتوب عليك تفضل تتعبد فى محرابها من الميلاد للموت .

تعمل فيك ...طيب ...تعمل فيك ...رضى .......// انت مصرى //وهذا يكفى .

وكأنها ضريبة ....تظل تدفعها حتى الممات ....

لايمكنك الفرار..

بحبها .....لمليون سبب .....وكما قلت سابقا ......فيه اسباب اعرفها واسباب معرفهاش ...

بحبها لأنى بشعر فيها انى .....اندمج مع هواها ......ببقى نسمة تسبح فى فضاءها ....بحس انى ........طفلة صغيرة جدا جدا ...تاهت وعادت لأحضان امها ....

لاأرى اخطاءها .......اعمى عن اخطاءها ....اراها بعيون المحبين ....احيانا .....

تؤلمنى ........حاشا لله ......

يؤلمنى تصرفات بعض ناسها ....

مصر لاتؤلم احد ...

احيانا اخرى .......اعاتبها .....بينى وبين نفسى ....ليه يامصر تركتى كل من هب ودب يعمل فيكى كدة ؟؟....وعلى رأى اغنية قديمة لمحمد عبد الوهاب ...

وبتسألينى بحبك ليه ......سؤال غريب مجاوبش عليه ....

سلام.

[سونة]

وما تفعله الحكومة

لأ ياعم ماليش دعوة بالحكومة

ياااااااة معقول كلنا بنحب مصر الحب دة كلو

بس فية حاجة

بجد الاكلام اللي قاللو الاستاذ سي السيد صح

يعنى الناس هنا شقيانا

في الحر بتشتغل تحت الشمس

وفي الشتا بتموت من البرد وبتشتغل برضة

وبتستحمل البهدلة والكلام والشتيمة

بيسييب كرامتة تتداس عشان يجيب لعيالة اللقمة

ليل ونهار بيشتغل

سايب بيتة وعيالة

دة ياريت هوة وبس

علي ناحية تانية

اللي قاعد في مكتبة والتكيف شغال

واللي بيلعب ساعتين

واللي يغنى كلمتيين

بيقبضوا بالالافات

والملايين كمان

ورغم كل دة لسة بنحب مصر

مصر 00مصر00مصر

عشان هيا مصر

كلام بيتقال هنا كتير وبشوف غيرة في الواقع اللي عايشة فية

بصراحة مش عارفة اقول اية والا اية

الناس كل همها انها تاكل وتأكل ولادها ويناموا ويعيشوا في امان

وخلاص

مش مهم بئي اي حاجة تانية

ايوة الناس بتفكر كدة

مش مهم بئي الحكومة تعمل اية

تتحرق واحنا مالنا

والمهم لقمة العيش وخلاص

واحنا برضة احسن من غيرنا

[سونة]

الاستاذ أمير قال:

و على فكره احلى مصر هى مصر اللى فى الذاكره 

لأن مصر الواقع مش هى مصر اللى أنا اعرفها

لأ واللة يا أٍستاذ أمير

كل حاجة في مصر زى ما هيا

مافيش اي حاجة اتغيرت

كل اللي قال علية الاستاذ البنا لسة موجود

بس احنا اللي اتغيرنا

خلينا ننظر للجانب المشرق0000000بس

اسمحلي يا استاذ محبط اخد اخر بيتين

هوة دة شعر حضرتك اللي كتبتة

[Amira Khaleel]

ربنا يسامحكم ربنا يسامحك يا مهيب .... قلبتوا علينا المواجع ..... صدقونى دموعى نازلة و مش شايفة قدامى مع إنى ................ فى مصر

[عصفور طاير]

عمي وتاج راسي العبقري الراحل صلاح جاهين اختصر كل اللي ممكن يتقال في عبقريته الطويلة جدا (على اسم مصر).. هاقول لكم منها جزء، في رأيي إنه جامع مانع:

مصر النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

على اسم مصر

مصر السما الفزدقي وعصافير معدية

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال

ومصر قدامه اكتر كلمة مقرية

قريتها من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

على اسم مصر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر