الشامى رجع من كندا يا رجالة

[ELSHAMY]

أخوانى أخواتى أعضاء النتدى و المهتمين بموضوع الهجرة الى كندا...وحشتونى

أسف على التأخير فى المشاركات لأنى لسه راجع من رحلة كندا لعمل landing وفعلا كان صعب عليا انى ألاقى وقت و أكتب لكم عن انطباعاتى أول بأول وأنا هناك زى ما كنت متخيل لضيق الوقت لكنى كنت متابع المنتدى بقدر الامكان.

عموما الرحلة كانت ناجحة بفضل الله وكل شىء تمام.

و أنا جاهز للرد عن أسئلة الأخوة المقدمين على هذه الخطوة لأن الأحداث كثيرة وفيها كلام كتير من أول نزول المطار مرورا بانهاء الاجراءات كافة و حتى العودة.

تحياتى

اخوكم (الكندى) الشامى سابقا.

[ELSHAMY]

الأخت مصرية و مغتربة

ده السؤال اللى كنت خايف منه

حاحاول أحكى بس بالتقسيط عشان ما تزهقيش منى.

أولا: الطيران

هذا الموضوع قتلته بحثا قبل السفر لمدة 3 شهور على النت و من خلال شركات السياحة لأنى محتاج (عقبال عندكو) عدد 6 تذاكر و طبعا معظم ميزانية الرحلة هتروح فى التذاكر. و لذلك كنت مستعد السفر حتى على خطوط بوركينا فاسو بس تكون معقولة الخدمات لأن الرحلة طويلة.

وبعدين جاتلى فكرة ثورية و هى ليه الواحد ما يستغلش طول الرحلة و يزور مكان تانى فى الطريق منها يريح شوية و منها خمسة سياحة لأن الرحلات الطويلة دى ما بتتكررش كتير. و كان ان استقر الأمر على الخطوط المغربية وكان خط السير كالأتى:

جدة - كازابلانكا - مدريد - كازابلانكا - مونتريال - جدة.

و على فكرة لما تاخدى DESTINATION فى الطريق ( زى مدريد مثلا) سعر التذكرة مش بيزيد كتير ان لم يكن مش حيزيد خالص فى بعض الشركات.

ما علينا تم التجهيز للرحلة من أخذ التأشيرات للمغرب و أسبانيا قبلها (وده فى حد ذاته موضوع يطول شرحه) وتم السفر من جدة فحر الخميس 13 مارس وبعد حوالى خمس ساعات و نصف طيران وصلنا الدار البيضاء و على الفكرة الخطوط المغربية نص نص و يبدو ان المضيفات ما يعرفوش ان فيه ناس فى الكون ما بيتكلموش فرنسى wst:: وهم حتى لو اتكلموا عربى ماحدش حيفهم حاجة و تبقى لغة الأشارة هى الحل.

الحلقة الجاية بعد شوية

تحياتى

[ELSHAMY]

الحلقة الجاية حتبدأ.

استكمالا لما سبق وصلنا الدار البيضاء حوالى الساعة 6 ونصف صباحا (عشان فرق التوقيت 3 ساعات) والناس فى المطار كانو لطاف و لكن نفس الاحراءات المصرية المشوبة بالرعب الأمنى الخفى موجودة ولكن الحقيقة المطار شيك و نظيف و منظم و خدماته جيدة. طبعا انا كنت شحنت الشنط على مدريد مباشرة و لذلك بقينا فى صالة السفر ترانزيت فى انتظار طائرة مدريد بعد 3 ساعات ونصف (الخطوط الأسبانية IBERIA.

وصلنا مدريد بعد ساعة ونصف طيران و طبعا المطار تحفة من كل شىء. و كانت أول مفاجأت الخطوط المغربية هى عدم و صول الشنط wst:: و ما ادراك ما فى الشنط من كافة مستلزمات مواجهة برد كندا القارص. يعنى الرحلة كلها بقت فى الطراوة.

المهم الشنط وصلت فى الطيارة اللى بعدها بعد حوالى 3 ساعات انتظار فى المطار. و بقينا فى مدريد الخميس و الجمعة و السبت فسحة و زيارة لأستاد ريال مدريد و غيره مما يطول شرحه و مالوش علاقة بكندا الا اذا حد عاوز تفاصيل يبقى يكتب طلب مخصوص و حأرد عليه فى منتدى (الحياة و الهجرة الى أسبانيا)

الحلقة خلصت ونكمل بعد شوية

[ELSHAMY]

الف حمد لله على السلامة يادكتور

ويرب تكون انبسطت هناك وقضيت وقت كندي ممتع

شكرا أخى ماجد غنيم الحمد لله استمتعنا بكل لحظات الرحلة

[ELSHAMY]

الحلقة اللى بعديها

أخدنا الطيارة من مدريد الساعة 10 صباحا الى الدار البيضاء (تانى) و انتظرنا طائرة مونتريال وكان ميعادها الساعة 3 عصرا.

ملحوظة : المرة دى أخدنا الشنط فى حضننا خوفا من الضياع.

فى الطائرة الى مونتريال طبعا كنا محاطين بناس كتير من الشعب الكندى الشقيق من مختلف الأعمار و الفئات و الملاحظ ان الجميع كانوا ناس فى منتهى اللطف و الترحيب بينا خصوصا لما عرفوا اننا مهاجرين جدد و تنافس الجميع فى ابداء النصح و الحقيقة أعطونا راحة نفسية طوال الرحلة اللى استغرقت حوالى 7 ساعات ونصف. و الجميل ان جزء منهم يكلمنا بالفرنسية و أخرين بالانجليزية بل تبرع بعضهم بتعريف بقية الركاب بينا و كانت مظاهرة ترحيب خففت التوتر الى حد كبير.

و بصيت من الشباك على مدينة مونتريال الجميلة و كانت المفاجأة لما أعلنت المضيفة ان درجة الحرارة بالخارج كانت ناقص 19 . يا للهول.... هذا الرقم لم يمر بى فى أى مرحلة من مراحل حياتى و لا فى أى بلد أوروبى زرته من قبل. المنظر من شباك الطائرة كان تحفة......مساحة بيضاء مهولة من الثلج يتخللها خطوط سوداء رفيعة (عرفت بعضها ان دى الشوارع بعد ما بيشيلوا منها التلج) معلش كنت لسه محدث ثلج و ما عنديش خبرة.

الحلقة الجاية بعد شويتين

[ELSHAMY]

الله يسلمك يا عم زيدان... طبعا حكمل و مقدرش أخسرك أبدا.

الحلقة اللى بعديها:

حأخليها لبكرة لأن فيها البهريز كله و أنا خلصت دوامى فى المستشفى و لازم أروح (أعتقد كده خسرنا بعضينا) :blink:

أشوفكم بكرة

[ELSHAMY]

الأخت سها... الأخوة و الأخوات الأعزاء

بالنسبة لتوقيت الأجراءات أرجو انك لا تأخذنى كمثال جيد لما يمكن أن يحدث معك أو مع أخرين

أنا مثلا قدمت أوراقى عن طريق محامى منذ حوالى 3 سنوات ونصف وبعد فترة حوالى 4 شهور تم فتح ملف و أخذت رقمه... وبعدين جالى حالة زهد فى الموضوع من أساسه وتركت كل شىء لمدة حوالى 14 شهر كان خلالها المحامى بيجرى ورايا فى كل مكان لأنهاء الأجراءات و انا لا أرد عليه .... وتغيرت بعض الظروف وقابلت المحامى وأقنعنى انى مش خسران كتير اذا أكملت الموضوع حتى الحصول على كارت الأقامة وبعدين ربنا يحلها....وهكذا دخلت امتحان IELTS فى رمضان قبل الماضى والحمد لله نجحت من أول مرة.... وبعدها بحوالى 4 شهور جاءنى خطاب لعمل الميديكال ... وعملته فى يونيو الماضى.... وبعدها ب 3 شهور طلبوا منى الباسبورات لطبع الفيزا واستلمت الفيزا بالفعل فى أكتوبر الماضى.... وعرفت انه تم استثنائى من عمل ال INTERVIEW ...

أرجو انى اكون وضحت الصورة بقدر الأمكان.... و اللى أقدر أقوله ان صلاة الاستخارة مهمة جدا قبل و أثناء الشروع فى الأجراءات.... ماحدش عارف الخير فين... الله يقدر للنا جميعا الخير و يرضينا بقدره

بالتوفيق للجميع

[ELSHAMY]

اخوانى تورونتو - هشام الكندى - ميزو وبس - Einestien شكرا جزيلا على مشاعركم الجميلة

حلقة الجزء الأول من البهاريز:

وصلنا مطار مونتريال حوالى الساعة 7 مساء و المطار طبعا فى منتهى الشياكة و النظام. مشينا مستدلين بعلامات الشنط (baggage ) حتى وصلنا صالة الجوازات و كان هناك طابور طويل نظرا لوصول عدة طائرات فى نفس الوقت و لكنه طابور منظم جدا و ينتهى بسرعة. على فكرة يقف فى هذا الطابور كل الناس (كنديين - جنسيات أخرى - حتى المهاجرين الجدد) كله نفس الطابور. ولما وصلنا عند ضابط الجوازات كانت لطيفة جدا و رحبت بينا و أخبرتها اننا Perminent resdidents to Canada وعلى فكرة هما يحبوا هذا الوصف عن وصف ال Immigrants أطلعت على الجوازات بسرعة و راجعت مسمى التأشيرة وشافت وتأكدت من المرافقين وختمت ختم دخول وأرشدتنا الى مكتب خلفها خاص بال immigration توجهنا اليه و فيه عدة موظفين من ادارة الهجرة و اللافت للنظر ان أعمارهم لا تتجاوز 25 سنة بالكتير.

استقبلنا أحدهم بابتسامة كبيرة و ترحاب شديد و كأنهم جميعا متفقين على هذا الأسلوب الراقى فى معاملة الناس مما يخفف كثيرا من أى توتر.

لابد من استطراد سريع هنا و هو ضرورة وجود عنوان فى كندا (مش مهم فين) أى عنوان لأنه حيطلب منكم عند الوصول و ذلك لتتمكن ادارة الهجرة من ارسال (Perminent Resident Card) و يعرف اختصارا ب P R Card اليه بعد حوالى 4 اسابيع من عمل ال landing وهنا كان دور المحامى اللى أعطانى عنوان فى اوتاوا و اعطيته بدورى لموظف الهجرة

الملحوظة الأخرى انه أهم شىء فى حياتك هى مجموعة الأوراق المكربنة اللى حتاخدها عند الحصول على الفيزا. وهى نسخة لكل فرد من أفراد الأسرة وهى هامة جدا فى انهاء كافة الاجراءات الحكومية بعد ذلك مثل Social Insurance Number و كذلك رخصة القيادة و بالتالى يجب الاحتفاظ بها خلال سفرك فى شنطة ايدك لعدم ضياعها و ما تحطهاش فى شنطك خصوصا اذا كنت مسافر على الخطوط المغربية

اشتغل شوية و بعدين اكتب لكم الجزء التانى من حلقة البهاريز

تحياتى

[ELSHAMY]

الجزء التانى من البهريز:

أخذ الموظف الاوراق واعتذر لى بكل أدب انه حياخد من وقتى عشر دقايق لملأ بعض الاوراق الروتينية ( bv:- روتين ممل) ما علينا استحملته طبعا و كان خلال هذه الفترة يسأل أسئلة عادية عن بلد المنشأ و أخبار الجو هناك وازاى انه شىء جميل ان تكون لك أسرة كبيرة و فرحته اننا من مصر بلد الحضارة العريقة كما درسوا ذلك فى مدارسهم الابتدائية و يبدو ان المهاجرين الاوائل من أمثال اساتذتنا هادى و وجدى وايهاب سالم و تورونتو تركوا انطباع جيد عند الكنديين عن مصر. :rolleyes:

و حاول يقول لى بعض الكلمات العربية و لما سألته عرفتها منين أخرج لى من درج مكتبه كتاب عن أحوال الشيعة فى العراق !!!

وفى النهاية اعطانى نسخة كربونية من أوراق الهجرة و هنا يسمونها Proof of Landing وهى هامة جدا كما سبق ان ذكرت ثم أعطانى بعض الكتيبات التعريفية و النشرات عن كندا و طبيعة الحياة فيها و سألته عن الاعداد التى يستقبلونها من المهاجرين فقال انها أعداد كبيرة جدا من مختلف بلدان العالم يوميا وقد يصل العدد (حسب كلامه ) الى 15 الف شهريا و ذلك من مطار مونتريال فقط.

ثم قال لى الأن انت مواطن كندى مبروك و تمنى لى طيب الاقامة فى كندا.....هكذا بمنتهى السلاسة.

توجهنا بعد ذلك لأخذ الشنط و الحمد لله لقيناها هذه المرة و كنت عارف انى لازم أروح بعد ذلك الى مكتب ال Custom لاظهار ما لدينا من بضائع لأنه من حقنا عند عمل اللاندينج ادخال مستلزماتنا بدون جمارك واذا كانت هذه المستلزمات سيتم شحنها بعد فترة فيجب تحضير قائمة بكل ما يمكن التكهن بشحنه و هذه القائمة يتعمل منها نسختين يتم تسليم أحدها فى المطار و الاحتفاظ بالأخرى بعد ختمها.

و يمكن تحميل هذه الفورمة من النت من موقع ال Immigrants و تحضيرها قبل الوصول.

و انا الحمد لله كنت محضر كل الحاجات دى و لم أكن أتخيل ردة فعل ذلك على الموظفين و فرحتهم بينا على اننا ناس متحضرين و فاهمين و محضرين الفورمة بتاعتهم و كل شىء جاهز و سألونى عن المبالغ اللى معايا و هل فيه أكل فى الشنط أم لاو لم يتم فتح أى شنطة لأنهم ناس محترمين و بيفترضوا انك صادق فى كلامك.

على فكرة انا شفت ناس اتبهدلوا علشان ما حضروش اللستة فتم تفتيشهم مع شنطهم و احنا عدينا فى دقيقة مع ان معانا 8 شنط شكلهم يخوف.

نكمل بعد شوية لأحسن تناموا منى.

[ELSHAMY]

شكرا أخى أبو مروان

على فكرة انا كمان أبو مروان.

[ELSHAMY]

أخى هشام الكندى ان شاء الله..... الناس هنا حتتجنن عليك...كل ما أمشى فى حتة و يعرفوا انى مصرى يتلموا عليا و يهرونى أسئلة عنك ...هشام حييجى امتى ؟ ايه الى معطله ؟ انت شفته ؟ طب شكله أيه ؟

أخى تورونتو...أخى ايهاب سالم...أعتقد انكم مش فى كندا أساسا لأنى لفيت فى أوتاوا و تورونتو و كينجستون و لندن أونتاريو طولا و عرضا و ما شفنش حد منكم هناك.... الظاهر انكو بتكتبولنا من مصر.... bv:-

تحياتى

[ELSHAMY]

اخى ابو مروان هذا سؤال جيد وانا كنت ناوى أتطرق اليه لاحقا لكن حيث انك سألته أفيدك بأن محتويات الشنط قد تتأثر بالفصل اللى أنت ناوى تسافر فيه ... يعنى مستلزمات الشتاء غير مستلزمات الصيف.... وكمان مستلزمات الاقامة الدائمة حتفرق عن مستلزمات اللى رايح يعمل لاندينج و راجع.

فى مثل حالتى انا كنت حأصل فى الشتاء و ده استلزم الأتى لكل فرد على حدة: ملابس داخلية من نوع THERMAL وهى عبارة عن بنطلون و فانلة داخلية (منها نوع بكم أو نصف كم ) و هذه تجدها فى السعودية مثلا فى محلات Debenhams او Marks & Spincer وهناك منها أنواع رخيصة صوف أو قطن لكنها تسبب حساسية و احمرار فى الجلد. و هذه الملابس لبسناها فى الطيارة قبل الهبوط و تقريبا ما تقلعتش الا و احنا مروحين..... هامة جدا للبرد خصوصا للأطفال.

طبعا لا تنسى الكوفيه و غطاء الرأس Ice cap و الجوانتيات ويستحسن تكون جلد أو شمواه لأن الصوف و القماش بيتبلوا بسرعة خصوصا لما الأولاد يمسكو التلج بايديهم.

شرابات صوف مهمة جدا و كذلك الأحذية البوت عشان حوسة بلل الشرابات مع المشى فى التلج و المطر.... وعشان ما تضطرش تشترى شرابات و انت فى اى مشوار....

أكيد طبعا ملابس ثقيلة و ضرورى جدا سويترات مع كابيشون..... اصل انت مش متخيل يعنى ايه ناقص 19 ما علينا.

بالنسبة لموضوع الاكل قد يحتاج الأمر منك الى شوية حاجات تمشى بيهم حالك لأنك فى الأول مش حتبقى عارف أماكن الأكل فين و كمان عشان زنقة المطارات و فترات الانتظار و أعتقد ان العيش التوست و التونة و علب اللانشون و الجبنة قد تكون حل جيد.

خلى معاك سكينة بلاستيك

تحياتى

[ELSHAMY]

الأخت دعاء .. الشكر موصول لك لمشاعرك الطيبة ...وفقكم الله (على رأيك)

الأخ agmaa الحقيقة المحامى بتاعى لحد الأن وطول فترة الأجراءات و هو رجل جدع ...أمين....وسلس....ومخلص...وكذلك المندوب بتاعه فى أوتاوا كان على نفس القدر من المسئولية.... اذا كنت حابب تعرف معلومات عنه أرسل لى على الخاص... لكن أنا مش عارف انت مقيم فين حاليا....وشكرا لك

وفقكم الله (على رأى الأخت دعاء) bv:-

[ELSHAMY]

أخوانى أخواتى الأحباء

يرجع مرجوعنا للجزء الثالث من حلقة البهاريز.... هو بس لو فيه حد يفكرنى احنا وقفنا فين...أه...افتكرت....انتى بتشتغلى ايه ؟ bv:-

ده سؤال سأله لى الموظف قبل ما نخلص الاجراءات و على فكرة ...كان فيه موظف مصرى موجود وسط موظفى الجمارك وكان برضه عنده نفس اللطف و الذوق فى المعاملة.....الظاهر انه اتعدى.....بس انا و الاولاد كنا فخورين جدا بيه.

ما علينا..... أخدنا الشنط و طلعنا الى حيث مكان استقبال الزوار...وبسرعة لقيت مندوب المحامى جاى يتعرف علينا... د.الشامى ...أهلا وسهلا حمدا لله على السلامة...أنا حاروح بسرعة أحضر السيارة من الباركينج...بس انتظرونى امام بوابة المطار....لحد هنا و أنا مش عاطى خوانة...تأكدنا من ان الأولاد تسلحوا بملابسهم المدرعة.... و أنا مع اللهوجة نسيت ألبس الجوانتى.... و السوستة بتاعة السويتر علقت... و ثوانى و الراجل أحضر السيارة و يادوب مشينا 10 متر لحد السيارة و حصلت لى حالة من التخشب من شدة قروصة (مش عارف ايه قروصة دى لكن أصلها من البرد القارص)...مش عارف أحرك جسمى مع حالة تنميل على تثليج على تسقيع... والراجل عمال يحمل الشنط فى السيارة وانا عامل نفسى باساعده... :rolleyes:

المهم بعد دقائق مميتة ركبنا السيارة ..وبدأ الحرارة تدب فى أوصالى مرة تانية...بالضبط زى أفلام الكرتون لما واحد يطلع من الفريزر و يبدأ يفك... أول مرة الحقيقة أشعر يعنى ايه درجة الحرارة ناقص 19 و انا اللى جاى من درجة حرارة تصل الى زائد 49 ... يعنى نقلة مش بس حضارية ...لكن كمان حرارية فى حدود 70 درجة مئوية. :rolleyes:

أنا الحقيقة سقعت لما أفتكرت اللى حصل.... حألبس تقيل و أكمل لكم بعد شوية.

[ELSHAMY]

أخواتى ...أخواتى.....شكرا لمشاعركم الجميلة.

د.حسام....أخىMedzoro لكم جزيل الشكر

الاخت مصرية و مغتربة.... الرحلة كلها أستغرقت 17 يوم....مش لأن الاجراءات طويلة لكن أنا كنت عاملها سياحة وزرت عدة بلاد...لكن أجراءات اللاندينج بتاخد ربع ساعة....و الجمرك عشر دقايق....و SIN عشر دقايق.... وفتح حساب البنك....20 دقيقة..... ورخصة القيادة ساعة (G1).... و ده للى حصل معايا ممكن يكون أطول أو أقصر من كده مع حد تانى..... يعنى الموضوع كله يخلص فى يومين

ألمر...أسف الحقيقة ما عنديش فكرة عن ظروف التمريض ...لكن أعرف انهم محتاجين بشدة ...وفيه عندى ممرضات كتير فى المستشفى سافروا لكنهم فلبينيين.

أخى أبو مروان بالنسبة للشنط الحجم مش مهم بقدر الوزن....وحسب خطوط الطيران...لكن المهم وزن الشنطة الواحدة ما يزيدش عن 23 كيلو.... و الهاندباج لها قياس معين موجود فى المطارات ...وهو المتعارف عليه.

أخى agmaa ساحاول ان اراسلك على الايميل

Totonto...انا عارف انك ابو الواجب....انا عديت على ميسيساجا و انا رايح تورونتو بس من على الطريق الزراعى (قصدى الثلجى) و ما دخلتش لأنى معرفش انك هناك.... شكرا على مشاعرك

تحياتى للجميع

[hosiny]

السلام عليكم

عندي كام سؤال كده ارجو ان اجد اجاباتهم

1- ما هي الاوراق المطلوب اعتمادها من الخارجية المصرية والاوراق المطلوب اعتمادها من الخارجية المصرية ثم الكندية (سواء المطلوبة عند دراسة الحالة عند فحص ملفك او لاحقا عندما تكون في كندا)؟؟؟

2- انا استلمت رقم الملف علي النظام الجديد (اللي هوا بعد 28-2) لكن بعتولي نفس الخطاب و الذي يقول ان الرد خلال 42-44 شهر فهل هناك من عنده علم بالنظام اكثر؟؟؟؟

3- عند وصولك للمطار لعمل اللاندنج لاول مرة لازم تديهم عنوان بالمطار عشان يبعتولك عليه كارت الاقامة الدائمة.طيب ازاي وانا معرفش حد هناك و مليش حد؟؟؟؟هل حد عنده علم؟؟؟

4- هل من الافضل ان اخذ عائلتي معايا عند ذهابي لعمل اللاندينج لاول مرة او ابعتلهم يجوا بعدين لما اكون ظبطت اموري. وهيسلكوا في المطار لو جم لوحدهم بعدي؟؟

[ELSHAMY]

أخوانى أخواتى:

لا شكر على واجب و انا طبعا باعمل بالحديث (ان الله قى عون العبد مادام العبد فى عون أخيه).. و الحقيقة انت اتعلمت كتير من هذا المنتدى و لنا قدوة فى مداخلات العشرات من الأخوة و الأخوات سواء منهم من كان قى كندا أو مازال على الطريق... فواجب علينا جميعا ان لا نبخل بكلمة أو معلومة لعل فيها أغاثة للهفان أو توضيح لأمر خفى.... و ليس من رأى كمن سمع.

بالنسبة للمدارس.... ماسمعته من أصدقائى اللى زرتهم سواء فى كينجستون أو لندن أونتاريو ان الموضوع و لا أسهل أيا كان مستوى الطفل أو سنه أو لغته فالموضوع ميسر حتى لمن جاء فى نصف العام الدراسى يتم وضعهم فى فصول تتناسب مع أعمارهم وبعد فترة من المتابعة يتم تعديل وضعهم و مناهج دراستهم و كذلك امتحاناتهم بما يتناسب مع امكانياتهم و قدراتهم... و لم يطلب منهم اية شهادات دراسية سابقة... لكن يجب تحضير شهادات التطعيم.

و المدرسة بتكون تبع الحى اللى انت حتسكن فيه...كل حى فيه مدرسة ابتدائية على مسافة سير على الاقدام و احيانا تكون المدرسة الثانوى بعيدة شويه....حسب الحى و المدينة.

أخى محسن:

موضوع العنوان ده هو العقبة اللى خلتنى استعين بمحامى هناك عشان يعطينى عنوان أذكره فى المطار عند اللاندينج...وده أمر لا مفر منه الا اذا كنت تعرف حد هناك....لكن اللى لاحظته ان معظم الناس (حتى الاصدقاء ) ما بيحبوش يعطوا عنوانهم لحد... يمكن لدواعى أمنية أو عشان ما يكلفوش نفسهم مسئولية ارسال الخطابات و فيها ال PR Card وده طبعا حاجة مهمة و خطيرة و ضياعه يمثل مشكلة كبيرة.....أو الحل انك تختار من على النت مكان (فندق او شقة) وتكون ناوى تقعد فيها على الاقل شهر لحين ما تستلم ال PR Card

وبعد كده ربنا يحلها.

المهم عند اللاندينج الأول وجود Main Applicant يعنى مقدم الطلب بنفسه و مش مهم من كانوا مرافقين معاه بس بشرط انهم يعملوا لاندينج قبل مرور سنة على تاريخ الفحص الطبى

ان شاء الله حاكمل تفاصيل الرحلة لما أخد نفسى.... تعبتونى :sad:

[Einstein]

اخي الفاضل الشامي

معلش انا عندي استفسار بسيط

هو انت كنت مقدم علي هجرة لكيبك ولا فيدرالي ؟

وبالنسبة لموضوع اللستة اللي قدمتها في المطار هل كانت تشمل كل شيء في الشنط ؟

يعني مثلا لو هاخد معايا بعض الادوية ، هل لازم اكتبها كلها بالاسم و العدد ؟

ويا ريت معلومات مفصلة عن رخصة القيادة

اسف علي الاطالة و شكرا :sad:

[ELSHAMY]

اخى Einstien انا كنت مقدم فيدرالى

بالنسبة لموضوع العنوان هذه المعلومة صحيحة

بالنسبة لمحتويات اللستة ..انا كان قصدى على الحاجات اللى انت ناوى تشحنها فى مرحلة لاحقة و هى تسمى List for Goods to come وهى مختلفة عن لستة الحاجات اللى انت مصطحبها معاك وقت اللاندينج ويجب اظهارها لموظف الجمرك اذا سأل عليها...وانا ماحدش سألنى على محتويات الشنط.

بالنسبة للأدوية ...كان معى أدوية و لم يسأل عنها أحد و لم أسمع عن حد اتسأل عليها...ودى معلومات انا عرفتها من أماكن أخرى...الا اذا كانت فيها مواد مخدرة أو مهدئة فيجب الحرص.

بالنسبة لرخصة القيادة و منعا للتكرار...فان الأخوة الأفاضل قد سبقونى بتفصيل ذلك فى الملف المثبت عن الهجرة لكندا...باب رخصة القيادة فى أونتاريو و يمكنك الرجوع اليه

تحياتى

[ELSHAMY]

أخوانى agmaa & heshamelsayed

يمكننا التواصل عبر الايميل لأن يبدو هناك مشكلة فى البريد الخاص:

my email: melshamy@hotmail.com

تحياتى