رجعت مصر نهااااااائى ............وياريتنى ما رجعت

[من أنا]

انا اللى كنت بستفسر عن الخروج النهائى وكنت مقرر النزول علشان المهنة اللى متسرش

بس للأسف رجعت مصر والوضع اسوأ مما تخيلت منتهى البطاله

ياريت اى حد يقترح عليا اى مشروع(فى حدود 10000ج) يناسب راجل مؤهل ومتعلم

يعنى محدش يقوللى اسرح فى القطر وابيع مناديل هههههههههههههه

هم يبكى وهم يضحك وحسبنا الله ونعم الوكيل

تم تعديل 11 مارس 2010 بواسطة من أنا

[محمد الششتاوي]

انا معرفش انت كنت فين

لكن على العموم محدش بيسيب مصر ويعرف يعيش فيها تاني

الفلوس اللي معاك يا دوب تسفرك تاني

ارجع على طول احسنلك :)

تم تعديل 11 مارس 2010 بواسطة محمد الششتاوي

[elrasy]

حاول تدور على شغل وكل ما كان المحاولات اكتر هتلاقى الفرص اكتر

وربنا يوفقك يا رب

[doha]

ياسيدي الفاضل هون عليك ..

بدايه اقولك حمد لله على السلامة ..

ايا كان الوضع الي حضرتك فيه دلوقت فهو وضع مؤقت . . جدا وسرعان ماهيتغير باذن الله وهيتغير تبعا له موقفك من الرجوع ووجهة نظرك عن الحياه في مصر اجمالا ..

اجمل مافي الغربة فلوسها وهو ذاته للاسف اسوأ مافي مصر .. فطبيعي جدا انك لما تسيب الاولى وتروح للثانية هتقارن مابين الاثنين ومش هتكون المقارنة في صالح مصر فيما لو فكرت من الناحية المادية .. وللاسف هتكون الناحية دي هي اول ماتفكر فيه لانها هي الي ناقصاك حاليا ..

شعورك بالاسى وافتقاد الحياة الي كنت فيها مش عميق عشان الي راح منك مهم بقدر مالان الفرق بين المعيشة هنا وهناك من ناحية الفلوس الى حد ما .. كبير .

ياسيدي الفاضل لا حيلة في رزق .. انت كنت بتاخذ مبلغ في الغربة مش لان فيها فلوس وانما لان ربنا كاتبه لك

النهرده انت معدتش بتاخذ الي كنت بتاخذه لان خلاص رزقك هناك خلص .. ودي حاجه منقدرش نقول فيها ليه او عشان ايه ..

اجمل مافي الموضوع ان الي كان بيرزقك هناك سبحانه هو برضه موجود هنا .. وماادراك هو عاين لك ايه ولا ناوي لك على ايه ..

عندك النهرده وبكرا قرر انك مش هتفكر في اي حاجه تخص الفلوس وهترتاح شويه ومتشغلش بالك نهائيا والدنيا مش هتخرب لو عملت كده ولا القيامه هتقوم .. ريح اعصابك وخليك ريلاكس ولا تفكر هتعمل ايه بكرا ولا تفكر هتشتغل ايه .. خذ لك اجازه لغايه يوم الاثنين الجاي .. تروق فيها وكل مايجي في بالك فكرة عن السفر او الشغل او الفلوس ارميها ولا ظهرك وقول انا مش هفكر قبل يوم الاثنين .. وبرضه متفكرش ابدا هيكون ايه بعد الاثنين ..

يوم الاثنين بقى صلي لله ركعتين وادعي له من قلبك انه يرزقك .. وخلاص سيبها عليه ..

روح قدم في شغل يمين وشمال وطبعا مش هيجي لك الشغل في ساعتها بس طالما انك دعيت ومن ثم سعيت فتاكد رزقك جاي لك جاي وربنا كريم مستحيل يدي حد حاجه ويرجع ياخذها منه الا لو كان ناوي سبحانه انه يديه قدها وفوقها زياده كمان ..

اتمنى اكون موجوده في اليوم الي تكتب فيه موضوع تاني تقولنا فيه كان اي مصدر الي فتحها عليك منه وغناك بالحلال ازاي .. اصله هيحصل باذن الله وبكرا هتفتكر ..

[fatfouta]

معلش ان شاء الله خير

طب بص على الموضوع ده يمكن تستفيد

http://www.egyptiantalks.org/invb/?showtop...993#entry576086

[ozoozo]

عشر الاف جنيه هايكون مكسبهم اد ايه

بالكتير 500 جنيه في الشهر

انا شايف ان دلوقتي سهل جدا تلاقي شغل بالف جنيه في الشهر قي مصر

او فعلا الاحسن تدورلك علي فيزا تانيه بالمبلغ ده

[se_ Elsyed]

لو فضلت بالحالة النفسية دي .. يبقى مش هاتلاقي شغل وحالتك هاتزداد سوءاً

عاوز أسأل سؤال ؟

من القاعدة ومن الأستثناء ؟

يعني اللي ما سافرش خارج مصر عشان يشتغل .. كده خلاص يموت من الجوع ومش هايلاقي ياكل ولا يسكن ولا ولا ولا ؟

وبعدين .. إنت بقالك قد إيه راجع ؟

من الواضح إنها أيام او أسابيع قليلة .. فهل كنت تتصور إن أصحاب الأعمال هايتنظروك بالمطار عشان تشتغل عندهم .. ام البحث عن عمل يتطلب ثقة بالنفس وجهد ؟

ثق في نفسك يا عزيزي وفي قدراتك .. وأعمل اللي عليك والباقي على ربنا

[عماد حمدي]

رأي بالفلوس اللي معاك شوف تاشيرة جديدة وسافر تاني .. ومش شرط السعودية

قعدتك في مصر بالحالة دي هتخلي حالتك النفسية تسؤ يوم بعد يوم وأنت الخسران . زي ما قال Se Elsayed

إعتبرها فتره نقاهه .. وإبدء من جديد ..

وإن شاء الله ربنا يصلح ليك الحال .. وييسر ليك كل أمورك

و ع فكرة انا كمان خدت نهائي بتاريخ 28/10 وحتي الأن انا لسة موجود في مصر .. من غير شغل !!

إنتابني شعور من القلق والتوتر فترة قليلة والحمد لله تغلبت عليه ..

ونزلت ودورت ع شغل تاني ( برة مصر طبعا ً ) , ولقيت كتير ..

وبدأت أفاضل .. وأتعلم من أخطائي ..

وهنبدأ من جديد ..

أوعي تخلي القلق والعصبية وتتملك منك ..

ربنا معاك

تم تعديل 11 مارس 2010 بواسطة omda2006

[الغريب]

فعلا شكلك يادوب لسه راجع مصر علشان كدة مستعجل لأنك قطعا مش واخد على قاعدة البيت وخايف القرشين يضيعو

بس عاوز أقولك أول حاجة أن الحياة كر وفر ومغامرات وقرارات ومدمت أخدت قرارك وأنت راضي يبقى تمسك بيه وأن كنت هتندم شويتين بس معلش أصبر..

ثانيا يلا بقى ورينا الشقاوة والهلوة المشهورة عن المصريين يعني نبش عن فرصة عمل مناسبة وخوض غمار المجهدة شويتين في مصر ومتقلقش ممكن حاجات بسيطة تديك دفعة معنوية من أمك وأبوك وزوجتك وأهلك وهكذا

كن متفائل ولا تندم على قرارك والله معك ولن يخزلك

[herohero]

ياسيدي هون ع نفسك القصه لو انت مضايق عشان الشغل فمعلش ممكن تكون في مصر وتمشي من شغلك وتقع فترة تور ع شغل ولو قصة الفلوس فما اظنش انها هتفرق كتير لان بجد وده ناس كتير هتتعرض عليا فيه مش هي الاساس

وانا ياما قولت اللي عايش بره القاهرة مصر بالنسبة له حلوة قوي اما اللي ف زحام القاهرة هيعرف ان الحكاية مش فلوزس بل ان امتلاكك لسيارة مشكلة هتركنها فين وهتمش فين ف وسط الزحمة وخلي عقلك يتهف وتفكر تخرج بالعربية وتركن ابقى قابلني هتركن امتى

سيدي ه فترة مؤقتة والرزق بايد ربنا لكن لازم تحس بعدم راحه ع الاقل سهولة الحياة بره مصر

وه تفرق مع ناس كتير بس احنا كمصريين اللي بنحب نناقد نفسنا عدم وجود استغلال من التجار ولا انك تروح شغلك مرتاح وتاخ خدمات دافع تمنها اما ف مصر بتفع كتير ومش بتاخد

ربنا يقويك ويوسع عليك

[من أنا]

اولا أسأل الله أن يظلنا تحت عرشه يوم لا ظل الا ظله

فهذه هى الأخوة التى لانريد من ورائها أى مصلخه ولا خدمه انما هى ابتغاء وجه الله

وااله الذى لا اله غيره لقد أثلجتم صدرى بردودكم البناءه وشكر لفيلسوفة الموقع مدام ضحى

ثانيا أحب أتقدم بالشكر لصاحب الصدر الرحب والأخلاق الجمه المحترم سى السيد

أسأل الله ان يجعلك دائما مصدر خدمة للمسلمين

شكراً لك اخي الكريم

تم تعديل 12 مارس 2010 بواسطة من أنا

[من أنا]

يا ريت يا جماعه اى حد يفيدنى اذا كانت مهنة طاهى عام ليها استقدام او زياره ام لا

ارجو الافاده ومؤهلى تربيه انجليزى[/color]

[محمد افندى]

يا ريت يا جماعه اى حد يفيدنى اذا كانت مهنة طاهى عام ليها استقدام او زياره ام لا

ارجو الافاده ومؤهلى تربيه انجليزى[/color]

لا يا سيدى طاهى عام ملهاش استقدام حتى الان ودة كلام اكيد

اما عن الزيارة على حسب الظروف بس عموما مهنة طاهى عام لو مش كفالة فردية ليها زيارة لو الزيارة مفتوحة

شكلك لسة راجع مصر مش من كثير بس عموما مش هقدر اقولك اكثر من اللى قالته مدام ضحى

بس بأكد عليك متستعجلش وواضح انه بقى يظهر قدامك فرص والحمد لله بس يا ريت توضح مؤهلك وكنت شغال اية فى السعودية واية الفرص المعروضة عليك دلوقتى وان شاء الله نقدر نفيدك

[أكسيلانس]

طاهي عام - يعني executive chef

لو كان حضرتك بتشتغل في الفنادق ,, يبقي أكيدليك أتصالتك بزملائك في المهنه و الشيفات مطلوبين بشكل مستمر و مرتباتهم ممتازه

يا ريت توضح مجال عملك ايه بالضبط فنادق مستشفيات و لا مطاعم ,, مين عارف يمكن نقدر نساعد

و بالله التوفيق