عقد عمل محاسب فى القصيم بالسعودية

[amr fahmy]

اخوانى الاعزاء , اطلب منكم الراى و المشورة

انا جالى عرض عمل فى شركة هنا للمياه المعدنية فى القصيم و التى تنوى ان تتوسع و تقيم مشروعا للعصائر و مشروبات الطاقة , بوظيفة رئيس قسم التكاليف بالشروط التالية :-

راتب اساسى 7000 ريال سعودى

بدل سكن 1300 ريال سعودى

بدل سيارة 700 ريال سعودى

الاجمالى حوالى 9000 ريال سعودى , و يوجد تامين طبى شامل لى و للاسرة , تذكرة طيران سنوية , شهر اجازة مدفوع الاجر , و يونص شهرين و لكن يعتمد على التقييم السنوى و ليس مكتوبا فى العقد , كما ستتحمل الشركة ايضا مصاريف الاقامة فى السعودية

هذا , علما باننى حاصل على شهادة CMA , و خبرة 6 سنوات فى شركات مالتى ناشيونال واعمل فى مصر حاليا براتب يصل عل اساس استحقاق شهرى لمبلغ 6200 جنيه

لذلك ارجو من الاخوة الافاضل التكرم بايضاح هل العرض مناسب و يستحق الغربة و لا لا باسرع وقت ممكن لو تفضلتم , علما بانى متزوج و عندى طفلين

[عماد حمدي]

7000 ريال أساسي ومعاك CMA و خبرة 6 سنوات من وجهة نظري قليلة ..

راتبك ف يمصر حلو أوي تبارك الله ما شاء الله ...

مقارنة بالراتب الجديد الفرق يكون الفرق مش كبيرة للدرجة اللي تستحق

دور أكيد هتلاقي فرص تانية يا راجل انتة معاك CMA دي لواحدها مش أقل من 20 او 25 ألف ريال وفية مواضيع هنا إتكلمت قبل كدة عن الحاصلين ع CMA بس مش فاكر انهي موضوع بالظبط

عاما ً انته أدري واحد بظروفك والقرار قرارك

وربنا يوفقك ويرزقك من حيت لا تحتسب او تدري

اخوك

عماد

[amr fahmy]

شكرا لك اخى الكريم على الرد , انا اميل لرايك و اعتقد انه الصواب , ولكن اين بقية الردود من بقية الاخوة الافاضل ؟

[lovelyramy]

اخى الفاضل عمرو

فعلا كلام اخونا عمده صحيح 100%

لا تخرج من بلدك الا على عقد جيد

وهذا العقد ليس جيد كان من الممكن ان نقول عليه جيد لو انك طالب حديث التخرج وحصلت على ال CMA بعد التخرج وليس لديك خبره

لكن انت الحمد لله بسم الله ماشاء الله لديك خبره 6 سنوات

لذا لاتقبل اقل من 15000 ريال بجانب باقى المزايا

نصيحه اخرى من مجرب

لا تتفق على اى شىء دون كتابته فى العقد لان الكلام فى مصر بيسيح فى الطريق وبتيجى تلاقى نفسك قدام وضع مش جيد

وربنا يوفقك لما فيه الخير ليك

واهم حاجه استخاره ربنا

كمان راتبك فى مصر مقبول بالنسبه لحد فى قدراتك وماتفرطش فيه بسهوله

تم تعديل 16 مارس 2010 بواسطة lovelyramy

[عماد حمدي]

لا تتفق على اى شىء دون كتابته فى العقد لان الكلام فى مصر بيسيح فى الطريق وبتيجى تلاقى نفسك قدام وضع مش جيد

وربنا يوفقك لما فيه الخير ليك

واهم حاجه استخاره ربنا

كمان راتبك فى مصر مقبول بالنسبه لحد فى قدراتك وماتفرطش فيه بسهوله

ونعم الرأي والنصيحة يا أخ lovelyramy وجزاك الله خيرا ً

[the consultant]

قولا واحدا من وجهة نظري البحته "لا" . 7000 اساسي راتب كويس بالنسبة لمستوى الرواتب العادي لكن مش لحضرتك و ذلك للاسباب الاتية :

1: و ده اهم حاجة 7000 اساسي اكيد حتاخد منهم عشان تزود على السكن و قسط العربية . لان براتب حضرتك في مصر اعتقد انك عايش في مستوى معين لن تريد النزول عنه في غربة و ده لن يتوفر في سكن ب 1300 في الشهر و لا في عربية ب 700 في الشهر. و بالتالي شيل من 7000 على الاقل 1500 كمان يبقى اساسي 5500 ريال يعني اقل من مرتبك في مصر طبقا لنظرية الجنيه في مصر يساوي الريال في السعودية.(نظرية اثبتت صحتها مطلقا)

2: استحالة الادخار طبعا . خلينا واقعيين . معدل الانفاق الشهري العادي لاسرة مكونة من زوج و زوجة و طفلين (نفس تكوين اسرتي بالظبط) يمكن حوالي 4000 الى 5000 ريال( انا عايش في جدة لكن لا اعتقد ان القصيم فارقة كتير). المشكلة هي زيادة معدل الانفاق الترفيهي للتخفيف من اثر الاكتئاب العام الذي تخلفه الغربة و الانغلاق في السعودية.

3: تذكر جيدا المااااااااارس . 10000 ريال في السنة للطفل الواحد من وجهة نظري هو اقل ما يمكن ان يدفع في مدرسة لتضمن لاولادك قدر جيد من التعليم . (الا لو في في الاوفر سكولينج)

4: حتى و لو كان هدفك ليس الادخار انما ما يسمى " GULF EPERIENCE" برده التضحية اللي حتعملها نسبتها اعلى من الخبرة.

5: انا معنديش فكرة عن ال CMA بس انا محامي و معايا LL.M و MSC اعتقد انهم زي بعض ماستر يعني . و لو كنت مكانك لن اوافق على هذا العرض خاصة بعد لما جيت و شفت.

[elrasy]

انا راى علشان الانسان يسافر لازم يكون دخلة ثلاث اضعاف دخلة فى مصر على الاقل

علشان يكون السفر لية معنى

[هيشو]

متسافرشي بعقد اقل من 4 اضعاف راتبك في مصر و بكل المميزات ايضا السابقة

[herohero]

والله مش شرط 4 اضعاف يعني ممكن تنفع لو مرتبك ف مصر قليل اما لو مرتبك كويس يبقى صعب شويه غير اننا ف مصر مفيش منافسه يعني السوق مقفول اما لو بلد زي دبي مثلا السوق مفرمة

هو عموا انا مش محاسب لكن اللي قاله الاخوة صح وكمان لاتنسى حضرتك انك ف السعودية فيه كفيل وتحكمات تقف ادام تطور حضرتك المهني ع الاقل وتحكم تنقلك

[كدة رضا]

[/siالze] [/fontاليومين دول كثر الكلام عن الcmaالشهادة صعبة ومكلفة يعنى ممكن اى شاب يبتدى مشروع صغير بتكلفتها فهل هى تستحق العناء والتكلفة دائما بنسمع انهم بيقولوا مرتبتها تفوق كذا وكذا ولكن نفسى حد يقولى انا اخذتها ورفعت راتبى من كذا الى كذا انا اعلم انها ارزاق وحسب الخبرة لكن اكيد الموضوع لية لمتد الى كل المحاسبين المغتربين والمتعاملين مع المحاسبين والمدراء الماليين الى يعرف حد واخدها ياريت يقولنا راتبة وصل لحد فين مش معقول اول ملاقى حد معه الشهادة ومعة خبرة 5سنين وفى شركة انترناشونال ىجيلة عقد ب7000 ريال بس امال فين ال15 وال20 الى بيقولوا عليها انا كل خوفى ان الى يكون بيروج للرواتب دى مراكز تدريس الشهادة لجذب اكبر عدد ممكن وهى عارفة ان مش كل الى هايدخلوا الامتحان هينجحوا لصعوبتها ارجوا الاهتمام والرد للاهمية ولسرعة اتخاذ قرار بالدراسة من عدمه

[عماد حمدي]

[/siالze] [/fontاليومين دول كثر الكلام عن الcmaالشهادة صعبة ومكلفة يعنى ممكن اى شاب يبتدى مشروع صغير بتكلفتها فهل هى تستحق العناء والتكلفة دائما بنسمع انهم بيقولوا مرتبتها تفوق كذا وكذا ولكن نفسى حد يقولى انا اخذتها ورفعت راتبى من كذا الى كذا انا اعلم انها ارزاق وحسب الخبرة لكن اكيد الموضوع لية لمتد الى كل المحاسبين المغتربين والمتعاملين مع المحاسبين والمدراء الماليين الى يعرف حد واخدها ياريت يقولنا راتبة وصل لحد فين مش معقول اول ملاقى حد معه الشهادة ومعة خبرة 5سنين وفى شركة انترناشونال ىجيلة عقد ب7000 ريال بس امال فين ال15 وال20 الى بيقولوا عليها انا كل خوفى ان الى يكون بيروج للرواتب دى مراكز تدريس الشهادة لجذب اكبر عدد ممكن وهى عارفة ان مش كل الى هايدخلوا الامتحان هينجحوا لصعوبتها ارجوا الاهتمام والرد للاهمية ولسرعة اتخاذ قرار بالدراسة من عدمه

باااااااااااشا

دا رابط هنا في المنتدي قسم التعليم والعمل .. انا بتكلم فيه عن الـ CMA وكل ما يخصها وتطرق الحوار الي الرواتب ياريت تبص وتاخد فكرة والموضوع متجدد بإستمرار .. لان النظام القديم اتلغي ونزل نظام جديد .. وبفضل الله الموضوع منظم وفية إجابة علي كل الإستفسارات والأسئلة اللي تختر ببالك او لا تختر .. وكل الكتب والسديها والمراجع الخاصة بالنظام الجديد فقط ... فقط مجرد زيارتك لنا شرف كبير .. وان شاء الله هتستفاد ... والموضوع زي ما قلتلك فية كل كبيرة وصغيرة عن الـ CMA وممتاز بشهاده الأعضاء الكرام .. وفعلا ً رواتبها فوق اللي لسة متخرج ومعاه الـ CMA بدون خبرة راتبة من 5 الي 7 آلاف واللي خبرة من 2 الي 3 سنوات راتبة من 8 : 12الف ريال ... واللي اكتر من أربع سنوات بيدأ من 15 وانتة طالع

وع فكرة مش غالية وهتلاقيني بردة إتكلمت عن مصروفاتها .. لو هتذاكر لوحدك مش هتتعدي 4000 ريال بالإمتحانات بكلة ..

والسوق عرض وطلب والأخ اللي عارض الراتب بتاعة .. شوف راتبة في مصر كام .. أكتر من 6 الاف جنية ماشاء الله تبارك الله .. بس هوه لو دور كويس أكيد هيلاقي أكتر خاصة انه معاه خبرة 5 سنوات الفروض أقل شيء أقل شيء مش اقل من 15 ألف أساسي بدون البدلات

دا الرابط

http://www.egyptiantalks.org/invb/?showtopic=98252

وياريت تشرفنا ..

اخوك عماد

تم تعديل 21 مارس 2010 بواسطة omda2006

[doha]

[/siالze] [/fontاليومين دول كثر الكلام عن الcmaالشهادة صعبة ومكلفة يعنى ممكن اى شاب يبتدى مشروع صغير بتكلفتها فهل هى تستحق العناء والتكلفة دائما بنسمع انهم بيقولوا مرتبتها تفوق كذا وكذا ولكن نفسى حد يقولى انا اخذتها ورفعت راتبى من كذا الى كذا انا اعلم انها ارزاق وحسب الخبرة لكن اكيد الموضوع لية لمتد الى كل المحاسبين المغتربين والمتعاملين مع المحاسبين والمدراء الماليين الى يعرف حد واخدها ياريت يقولنا راتبة وصل لحد فين مش معقول اول ملاقى حد معه الشهادة ومعة خبرة 5سنين وفى شركة انترناشونال ىجيلة عقد ب7000 ريال بس امال فين ال15 وال20 الى بيقولوا عليها انا كل خوفى ان الى يكون بيروج للرواتب دى مراكز تدريس الشهادة لجذب اكبر عدد ممكن وهى عارفة ان مش كل الى هايدخلوا الامتحان هينجحوا لصعوبتها ارجوا الاهتمام والرد للاهمية ولسرعة اتخاذ قرار بالدراسة من عدمه

مع احترامي الكامل لصاحب الموضوع الي بيسأل عن العقد المعروض عليه في القصيم فقد تعاملت معاه من البدايه على انه اعلان للشهاده باكثر منه استفسار عن عرض عمل .. مش بشكك في نية صاحب الموضوع وانما الطريقة الي عرض بيها شهادته بالفعل تخلي كل محاسب ـ وانا منهم ـ يتسائل ياترى ايه الشهاده دي الي راتبها في مصر 6 الاف فاكثر ..

وبرغم ذلك اقول لحضرتك لو هي اعلان يبقى ليه لاه .. ليه منروحش ندور على الشهاده دي فعلا مش عشان رواتبها في مصر سته ولا عشرة وانما عشان الكل اجمع انها ( صعبه ) و( مبياخذهاش اي حد ) وبالتالي فلو انت محاسب من الي الكلية بتخرج منهم 4 الاف على الاقل كل سنة واخذت الشهاده دي يبقى كده انت معاك شهاده مش بس انك محاسب وانما انك ( مش اي حد ) ..

نصيحتي لحضرتك لو مهتم بدراسة الشهاده دي وكنت واثق من نفسك انك تبدأ تقرأ في بعض المراجع الخاصه بيها .. حسيت نفسك ممكن تكمل خلاص توكل على الله وكمل .. ملقيتش نفسك فيها يبقى لايكلف الله نفسا فوق وسعها ومتزغللش عينك بالمبالغ ( الطائلة ) الي ممكن تحصل عليها من جراءها خاصه وان مش شرط الواحد ينجح من اول مرة او مش شرط تلاقي نفس الي ذاكرته هو الي جاي لك في الامتحان ..

وبرغم كل ده مفيش مانع ابدا يطلع اصحاب الشهادات دي فعلا بياخذوا رواتب كبيرة ( وان كنت اتوقع انها متوصلش للارقام الي بنقراها مع سنين خبرة ضعيفه او عدم وجود مؤهلات تانيه ) ..

لو كنت شايف نفسك مميز ومش زي كل المحاسبين الي حواليك فكر تاخذ حاجه صعبه فعلا ومميزه . فكر يبقى معاك شهادة بتميزك الي انت عليه ..

[mohamed mongy]

سيدي الفاضل انا عايش في القصيم من 20 سنة في بريدة

وعارف شركة هنا للمياه كويس وهي من ااكبر الشركات هنا

بص ياسيدي بالنسبة للمرتب والشهادة انا ما اعرفش كتير عشان

انا دكتور بس باالنسبة للمرتب فده مرتب حلو في القصيم يعني تقدر تحوش

في حدود 4000 ريال في الشهر.......

بالنسبة لبدل السكن فده يسكنك هنا في شقة اقرب للفيلا....

[عماد حمدي]

عدد الحاصلين علي الـ CMA في مصر 150 واحد فقط .. والدليل تابع الموضوع بتاعنا ..

بس انا مش هحط الدليل غير لما تقولي إسمك بالكامل اية وانا ياعم هطلعلك رقم الشهاده بتاعتك قدام كل الناس ... وسنة الحصول عليها وهحطلك كمان أسماء اللي اخدوها من سنة 2007 حتي 2009 سواء كانوا الحاصلين عليها عرب أو أجانب ودا تقرير طالع من الموقع الرسمي للمحاسبين الإداريين بأمريكا ..

منتظر تقولي إسم سيادتك إية أو العكس ...

وبعد كدة هحطلكم الملف اللي فيه الأسماء .. بس عذرنا في الموضوع بتاعنا فقط

http://www.egyptiantalks.org/invb/?showtopic=98252

وبالنسبة لموضع الدعاية والكلام دا أبسط حاجة جيب جريدة الأهرام كل يوم جمعة لازم هتلاقي شركة طالبة محاسبين سواء معاهم CMA او CPA اديهم بس تليفون كدة وأسالهم عن الراتب .. أو خش ع جوجل وإكتب مطلوب محاسب حاصل ع CMA وشوف إسم الشركة واتصل بيهم أعرف الراتب .. مكتب حازم حسن بتاع المحاسبة في مصر بيطلب محاسبين معاهم الـ CMA براتب 5000 جنية ...

اتصل ومش هتخسر غير ثمن المكالمة اللي هتحدد مصيرك ومستقبلك

ثانيا ً يا أخي مش شرط تدرسها في معهد أو أكاديمية او كدة ذاكر مع نفسك وأنا أعرف ناس كتير ذاكرت النظام القديم اللي هوه 4 أجزاء مع نفسهم وامتحنوا ونجحوا ومتكلفتش أكتر من 2500 ريال .. ومدفعوش الفلوس دي لمعهاد ولا لبطيخ كل دا رايح أمريكا بالدولار

ثالثاً ودا الأهم إسال عن الإستفادة العملية ..اللي هتكتسبها من دراستك لهشاده زي دي .. إسال واحد خد الـ CMA مش ع الراتب لأ قولة انته كنت اية وبقيت اية ؟؟ دا اللي يهمك في المقام الأول .. هقولك ذاكرها وبس ولا تمتحن ولا تاتخد شهادة ولا حاجة كفاية الإستفادة العلمية بتاعتها اللي هتطور المستوي بتاعك وتنقلك نقلة كويسة .. يكفي انك تكتب في السي في انك بتدرس الـ CMA والله والله والله شركات كتير هتاخدك لمجرد انك بتدرسها بس ..

اوعي حد يتناصح ويكتبها كدة وخلاص من غير ما يذاكر ولا يوجع دماغة .. هيبان كل حاجة في الإنترفيو ..

يا اخي الكريم الشهاده قيمتها العلمية والمهنية أكبر بكثير من كونها تتعلق برواتب عالية .. إدرسها للهدف دا

انا عن نفسي بذاكرها الأن وكل يوم تفكيري بيكبر عن اليوم اللي قبلة وبكتسب معلومات جميلة جدا واثق إنها هتساعدني في المستقبل جرب كدا تذاكرها لواحدك قدرت يبقي خير وبركة مقدرتش يبقي تقطع الشك باليقين ولا عاد ليك دعوه بيها ... ولا اية ؟؟؟

انا مش مستفاد أي حاجة بردي دا .. ويعلم الله اني اقولة ونيتي سليمة والله والله والله والله أني نفسي فعلاً كل المحاسبين ياخدوها علشان يبقي للمحاسب المصري ثمن ؟؟ مش يجيلك واحد يقولك راتبك 1200 ريال عجبك ولا مش عجبك !!!

هنخليه يفكر مليون مرة قبل ما ينطق الراتب اللي هيعرضوا علينا خوفا ً من رد فعل قاسي قد يتعرض لية

بص للإستفادة العلمية في المقام الأول ومش غالية النظام الجديد مش هيكلفك 1050 دولار فقط وانته بتدرس لواحدك

يارب اكون وضحت الفكرة

تم تعديل 21 مارس 2010 بواسطة omda2006

[herohero]

انا مش محاسب انا مهندس اتصالات ولي زميلي انا اتكلمت معاه فيها لان شوفتها من ضمن مؤهلات الهجرة مثلا لاستراليا يعني مطلاوبين وافتكر لومش غلطان انها مع مجموعة شهاداتتانيه برده تنفع ف الهجرة لكندا

لكن مشكلتها كاي شهاده هل ياترى كل الشركات المتاحه ف عالمنا العربي بتستخدم ما في هذه اشهاده وغيرها

انا اعرف ان فيه ناس معاهم شغالين ف شركات كويسة وبتاخد مرتبات قد تكونف نظرنا كبيرة لكن السبب هو ان هذه الشركات عملاقة يعني بيطبق اللي بياخده ف الشهاده اما لو انا ادتها وماوفقتش ف الحصول ع مكان مناسب يبقى كده مالهاش لازمة وماتنسوش الخبره لان الورقه لوحدها لا تكفي

انا زميلي محاسب فالكويت بيقولي ع مديره وهو 35 سنة بياخد 2000 دينار معرفش ايه خبراته لكن معاه شوية الحاجات الحلوة بتاعت المحاسبة وقالي هو قبل كده كان ف ميكروسوفت ايجيبت اللي احلى من كده وقت الازمة الماليه ف الشركة بتاعته في الكويت قالوا هنقلل المرتبات لاننا خسرنا ف شغلنا فكان نصيبه تقليل 100 دينار

يعني يكون مرتبه 1900 دينار رفض وبشده وفضل مرتبه زي ماهو

فالحكاية نسبية والارزاق مش بالشهادات الارزاق من عند ربنا ، شوفتوا بقى اخوانا بتوعم التجارة يلا بقى نقر شوية

[كدة رضا]

يا عماد احنا مش عاوزيين نشخصن الموضوع او نشكك فى حد على فكرة الى حاصلين على الشهادة اكتر من 150 بس مش كلهم بيدفعوا الاشتراك السنوى فمش هتلاقى اسمائهم من ضمن الاعضاء انا هدفى الى برجوا من جميع المحاسبين المتواجدين بالمنتدى لو حد حاصل على الشهادة او يعرف حد حاصل عليها ينقل لنا خبرتة مع الشهادة وازاى فرقت معاة مش معقول كل المحاسبين فى المنتدى وما اكترهم لم يصادف احدهم واحد حاصل على الشهادة

[عماد حمدي]

انا مش محاسب انا مهندس اتصالات ولي زميلي انا اتكلمت معاه فيها لان شوفتها من ضمن مؤهلات الهجرة مثلا لاستراليا يعني مطلاوبين وافتكر لومش غلطان انها مع مجموعة شهاداتتانيه برده تنفع ف الهجرة لكندا

لكن مشكلتها كاي شهاده هل ياترى كل الشركات المتاحه ف عالمنا العربي بتستخدم ما في هذه اشهاده وغيرها

انا اعرف ان فيه ناس معاهم شغالين ف شركات كويسة وبتاخد مرتبات قد تكونف نظرنا كبيرة لكن السبب هو ان هذه الشركات عملاقة يعني بيطبق اللي بياخده ف الشهاده اما لو انا ادتها وماوفقتش ف الحصول ع مكان مناسب يبقى كده مالهاش لازمة وماتنسوش الخبره لان الورقه لوحدها لا تكفي

انا زميلي محاسب فالكويت بيقولي ع مديره وهو 35 سنة بياخد 2000 دينار معرفش ايه خبراته لكن معاه شوية الحاجات الحلوة بتاعت المحاسبة وقالي هو قبل كده كان ف ميكروسوفت ايجيبت اللي احلى من كده وقت الازمة الماليه ف الشركة بتاعته في الكويت قالوا هنقلل المرتبات لاننا خسرنا ف شغلنا فكان نصيبه تقليل 100 دينار

يعني يكون مرتبه 1900 دينار رفض وبشده وفضل مرتبه زي ماهو

فالحكاية نسبية والارزاق مش بالشهادات الارزاق من عند ربنا ، شوفتوا بقى اخوانا بتوعم التجارة يلا بقى نقر شوية

اهو هوه دا الكلام يا Heroooo الأرزاق مش بالشهادات .. يسلم فومك والله عجبتني أوي

احنا لية مش بنبص علي اللي هنكتسبة لية دايما ً نقول انا عايز اخد دي علشان اخد الراتب دا لية دايما ً نظرتنا مادية ؟؟؟

بالنسبة للشركات اللي بتسخدم الـ CMA يا هيرووو ,, فعلا ً مش أي شركات وغالبا ً ما بتكون أجنبية ..

بس في مصر عندك مثلا ً بعض الشركات اللي بتطلب محاسبين حاصلين يا إما علي CMA او CPA والـ CPA بالتحديد علشان التدقيق والمراجعة بدل مال الشركة تتفق مع مكتب مراجعة وتدفعلة قد كدة في السنة تقولك اما اجيب واحد معاه CPA واوظفة عندي ويوقم هوه بالمهمة دي .. وعلي فكرة CPA ياعني محلل مالي ومش بتمتحن غير في امريكا بس .. بس الحين ممكن في الإمارات وممكن في اليابان .. الزمالات الأمريكية دي قوية جدا جدا جدا يا راجل دي نسبة النجاح ع مستوي العالم من 2007 حتي 2009 تعتقد كام ؟؟؟ 56 %

ياعني المعادلة كدا المعروض من لحاصلين عل الـزمالات الأمريكية أقل من المطوب لشغر الوظائف

ولذلك رواتبها عالية .. لأن مفيش أصلا ً في السوق ناس معاها CMA لو الشركة دي مخدتوش فية 1000 شركة تانية تاخدة

نرجع تاني بقا لموضوع الشركات اللي بتطلب المحاسبين الحاصلين علي الزمالات دي :-

عندك سيراميكا كليوباترا - كريستال عصفور - غبور أوتو - مجموعة طلع مصطفي - شركات البترول بلا إستثناء - شركات العقارات الأجنبية

اوعي حد يكون معاه CMA ويروح لمؤسسة نونو ولما صاحب العمل يقولك 2000 ريال تيجي تصوت لينا وتقول ضحكتوا علينا روح الشركات الكبيرة وبقلب جامد لانك مش هتحس إنك جامد وواثق من نفسك فعلا ً إلا لما تذاكرها ذاكر بس 3 او 4 فصول مش اكتر وانته تقيم نفسك

الشركات العملاقة في الإمارات بتحتاج الـ CMA السعودية شوف في الوسيلة عندكم هتلاقي شركات محتاجة CMA و CPA

[عماد حمدي]

يا عماد احنا مش عاوزيين نشخصن الموضوع او نشكك فى حد على فكرة الى حاصلين على الشهادة اكتر من 150 بس مش كلهم بيدفعوا الاشتراك السنوى فمش هتلاقى اسمائهم من ضمن الاعضاء انا هدفى الى برجوا من جميع المحاسبين المتواجدين بالمنتدى لو حد حاصل على الشهادة او يعرف حد حاصل عليها ينقل لنا خبرتة مع الشهادة وازاى فرقت معاة مش معقول كل المحاسبين فى المنتدى وما اكترهم لم يصادف احدهم واحد حاصل على الشهادة

خش ع الفيس بوك علي جربوات الـ CMA هتقابل ناس كتير معاها الـ CMA

[amr fahmy]

شكرا لجميع الاخوة الذين قاموا بالرد , ولكن اوضح فقط ان اجتزت الامتحانات الاربعة للشهادة النظام القديم و كان اخر امتحان هو بارت 4 و النتيجة ظهرت فى فبرابر الماضى و انا الان بصدد متطلبات الخبرة و البكالوريوس المعتمد , اعتمادهما فقط من المعهد الامريكى للمحاسبين الادريين IMA حتى تصدر الشهادة و اظهر على القوائم اللاتى اشار اليها الاخ فى 30/6/2010