إبتزاز السفارة المصرية بالرياض

[أسد]

اليوم إتصلت بالسفارة المصرية بالرياض على رقم الهاتف 4831469 لأستفسر عن إجراءات تجديد جواز سفر

فرد على جهاز للرد الآلي يقول :

إذا أردت الاستفسار عن أي شئ .. تجديد جوازات .. إستصدار تأشيرات ... الخ وعلى مدار 24 ساعة ... سبعة أيام في الأسبوع .....

وحينها استبشرت خيراً ... ماشاء الله السفارة المصرية تقدم الخدمة على مدار الساعة .... إيه التطور ده ...

ولكني وجدت التسجيل يقول .. إتصل على رقم 70027412

ولمن لا يعرف ... تكلفة الإتصال على هذا الرقم يعني تكلفة مضاعفة 100 مرة عن تكلفة المكالمة العادية ...

المكالمة العادية الدقيقة تكلف 5 هللات (قروش) أما في تلك الخدمة فهي تكلف خمسة ريالات ...

وطبعاً مزود الخدمة لتلك الأرقام .. هي شركات خاصة تقتسم قيمة المكالمات مع السفارة وشركة الإتصالات السعودية ... وهي عادة أرقام تستخدم للمسابقات والخدمات المتنوعة الأخرى كسماع الأغاني .. الخ.

أليس هذا إبتزاز .....

وإحتيال ....

الناس دي مش مكسوفة من نفسها ....

ضحكوا العالم علينا ....

بالذمة ... فيه كده .؟؟؟؟؟؟؟

:rolleyes: rs: :P lo:: lo:: :P

[se_ Elsyed]

أيه التسول ده ؟!!!! ... الموضوع ده لو حقيقي يبقى كده بنعمل زي مسابقات الأغاني ورنات المحمول والموضوع بقى هيصة ...

لكن الحق يقال بإن في السنوات الثلاث الأخيرة تحسنت معاملة السفارة المصرية بالرياض بعد أن تم نقلها من مقرها القديم والذي كانت فيه اشبه بالجمعية التعاونية بتاعت الفراخ وهي الوحيدة ومعها سفارة بنجلاديش على ما أعتقد اللتان كانت بعديتان تماماً عن الحي الدبلوماسي الذي يضم جميع السفارات ..

ولكن تم تخصيص مكان مميز لهم بالحي الدبلوماسي واماكن إنتظار للمراجعين والموظفين شكلهم إتغير وبقوا أخر جمال ...

[ragab2]

ياخسارة

الحلو مايكملش

والظاهر زهور وورود والباطن خداع ووعود

هذا مثل يعمل به المسؤولون المصريون منذ أمد بعيد

بلغى قانون بحجة خدمة الشعب ونفاجأ بأنه استبدل بأسوأ منه

مثل ضريبة الاستهلاك التى تحولت الى ضريبة مبيعات تقضم ظهر الشعب

وقانون الصحافة الذى تفكر الحكومة فى استبداله بأسوأ منه

وتسهيلات السفارة التى تبتز بها المصريين فى السعودية

[أسد]

الموضوع ده لو حقيقي يبقى كده بنعمل زي مسابقات الأغاني ورنات المحمول والموضوع بقى هيصة ...

الموضوع حقيقي طبعاً ...

إتصل على رقم الهاتف 4831469 لتتأكد بنفسك

والإعلانات الخاصة بالموضوع ده مثبتة على مدخل السفارة .. وفي أماكن مميزة بالصالة الداخلية ...

وطبعاً الإعلانات مصممة بمعرفة شركة الإتصالات .. وليس بواسطة السفارة

لكن الحق يقال بإن في السنوات الثلاث الأخيرة تحسنت معاملة السفارة المصرية بالرياض بعد أن تم نقلها من مقرها القديم والذي كانت فيه اشبه بالجمعية التعاونية بتاعت الفراخ وهي الوحيدة ومعها سفارة بنجلاديش على ما أعتقد اللتان كانت بعديتان تماماً عن الحي الدبلوماسي الذي يضم جميع السفارات ..

ولكن تم تخصيص مكان مميز لهم بالحي الدبلوماسي واماكن إنتظار للمراجعين والموظفين شكلهم إتغير وبقوا أخر جمال ...

مفيش حاجة إتغيرت ...

المبنى هو فقط اللي إتغير ...

والموظفين هم .. هم ... شكلهم لم يتغير ....

ولكن الكاونتر الزجاجي الذي ترى الموظفين من خلفه هو اللي جديد وبيلمع ...

نفس الموظفين .. ونفس المعاملة ... ونفس الإجراءات .. ونفس التعقيدات ... وبنفس الواسطة السابقة تخلص أي إجراءات ...

وصالة إستقبال المراجعين ... ليس فيها كرسي واحد ...

الجميع يقفون ... كبار أو صغار ... أو نساء ...

ولكن الحق يقال ....

المبنى جديد ... والرخام حلو ... والحمامات نظيفة ... وموظفي الأمن لابسين يونيفورم ....

[se_ Elsyed]

مش عارف والله يابو الأسود .. دي كده حظوظ بقه .. أنا إتعاملت معاهم كام مرة والناس كانوا أخر لطافة .. والمره الوحيد اللي روحت بنفسي لقيتهم مخصصين مكان على اليمين أول ماتدخل منخفض شوية وفيه شجر لإنتظار الجماهير ..

بس غريبة أن لك في السعودية فترة طويلة ولسه ماعندكش سواق او حد يخلص لك المعاملات اللي زي دي :rolleyes: ؟!!!!

لأ بجد والله من فترة قصيرة كده بعثت أستفسر عن حاجة وكتبت للسواق ورقة وقولت له روح اديها للموظف اللي على الكاونتر .. ولقيت الموظف باعت لي خطاب معاه وفيه كلام في منتهى الذوق وبيعرض علي إني لو محتاج مزيد من الإستفسارات ممكن أشرفه هناك وأستفسر براحتي عن اللي انا عايزه وموقع بإسمه ...

بس حكاية الواسطه دي برضوا أول مرة أسمع عنها ...

[Mohammad Abouzied]

انا مش عارف الناس دي عايزة ايه من السفارة بتاعتنا يا ابو السيد

هما فكرين نفسهم في اوربا ولا امريكا

يعني عوزين يغيروا عادتهم وتقاليدهم في تعقيد الامور علشان خاطر سواد عيونهم

وفيها ايه لما يدفع كام ريال كدا على الماشي

ولا انتم عوزين يقولو ان المصريين لما بيكونو بره بيغيرو جلدهم وبيعملوا نفسهم خوجات ويسهلوا امور الناس

امال يبقوا مصريين ازاي

ياراجل حاجة تزهق

دا حتى لو الامور مشيت لوحدها كدا ما تبقلهاش طعم ابدا

[فــيــروز]

يعنى ينقلوا لمبنى جديد

ويجيبوا قصارى زرع

ويزرعوا كام شجره دبلانه زى ما بنعمل اما المحافظ يزور الحوارى العشوائيه

ويلبسوا الموظفين يونيفورم !!

كل ده بللوشى يعنى ولا بللوشى !!

مش لازم حد يدفع !! ومين هيدفع غير ابناء مصر البرره الكرام !!

[ragab2]

وموظفين السفارة الكرام

مش عارفين ان فيه معتربين زوار لازم يجلسوا على كراسى فى بهو انتظار ومنهم أطفال ونساء وشيوخ

والا بيعتبروا ان كل مصرى مغترب مش لاقى ياكل ولا يستحق الجلوس والراحة وكتر ألف خيرهم ان بيعبروه ويكلموه

كان بناقص متر رخام ويشتروا كراسى لراحة الزوار الغلابة

...........

نشوف فيهم يوم

[SANAA]

هما فكرين نفسهم في اوربا ولا امريكا

حتي في امريكا التعامل مع سفارة مصر فيه تعقيدات كثيره وكمان لوفيه واسطه كل حاجه بتمشي علي مايرام مكنش الروتين شغال

[أسد]

بس غريبة أن لك في السعودية فترة طويلة ولسه ماعندكش سواق او حد يخلص لك المعاملات اللي زي دي  ؟!!!!

الذهاب إلى سفارة بلدك وأنت خارج مصر .. الذهاب في حد ذاته .. أو الإتصال هاتفياً بهم .. له مردود عاطفي وإحساس خاص جداً ... بغض النظر عن نوع المهمة التي تقوم بإنجازها ... فعندما أذهب إلى السفارة المصرية في أي بلد ... أشعر بإحساس مختلف ...

والمره الوحيد اللي روحت بنفسي لقيتهم مخصصين مكان على اليمين أول ماتدخل منخفض شوية وفيه شجر لإنتظار الجماهير ..

طيب ما هو الشارع بره السفارة كله شجر وحدائق .. إيه الفرق ..

وعلى كل حال ....

تحيا جمهورية مصر العربية ....

[se_ Elsyed]

الذهاب إلى سفارة بلدك وأنت خارج مصر .. الذهاب في حد ذاته .. أو الإتصال هاتفياً بهم .. له مردود عاطفي وإحساس خاص جداً ...

لأ يا عم ... الله الغني عن المردود اللي في بهدله ووقوف في طوابير جمعيات ...

قولتلكم على الواد الأمريكاني اللي زوجته كانت عيانه في أجازة العيد اللي فات وأتصل بي وكنت في المستشفى عشان أساعده أن أحنا نطلع له تأشيرة يسافر بها وكلم القنصل بتاعهم والقنصل كلم صاحب الشركة والدنيا أتقلبت مع انه من أصل باكستاني ومسلم ...

قولــــــــت آه .. خليني كده أتصل على سفارتنا وهما في أجازتهم .. يــــــــــــــــــيه كان زمانهم اعتقلوني ورحلوني على مصر مكبلاً بالأصفاد ومحبوس في قفص حديد .

بس بغض النظر عن جودة الخدمات اللي بتقدمها سفارتنا دولقت .. بس أيه رأيك في الرُخام ؟

[Modest]

بصراحة و لإعطاء الحق لأصحابه .. مساء يوم الأربعاء الماضي كنت في قنصليتنا في جدة للسؤال عن شروط قبول الحاصلين على الـ I.G.C.S.E في الجامعات المصرية و حيث إن المسئولين المتواجدين لم يكن لديهم علم تام بالموضوع فوجئت بسيدة فاضلة من العاملين بالقنصلية تصطحبني أنا و زوجتي و معنا أسرة أخرى لها نفس السؤال إلى مكتب بمدخل القنصلية و من هناك قامت بالإتصال بالمستشار الثقافي بالرياض (من تليفون القنصلية) و الرجل كان في غاية الذوق و الأخلاق لدرجة إني كنت مُحرَج من طول المكالمة و لكنه كان يشجعني على الاستمرار و طرح أي أسئلة أخرى.

كان نفسي أكون فاكر اسم السيدة الفاضلة و إسم المستشار الثقافي لشكرهما بالإسم هنا في الموقع.

أهم ما في الموضوع إنها عزمت علينا ببونبون :lol:

[se_ Elsyed]

أهم ما في الموضوع إنها عزمت علينا ببونبون  :lol:

شوفت عشان تبطل إشاعات يا أسد ...

رُخام وبونبوني ... عايز إيه تاني ؟ يعني نشيل السفير ونعينك بداله .. أما غريبه والله ...

على العموم أنا مستعد أعطيك كرت توصية وتروح به يخلصولك كل حاجة وانت بتشرب الشاي وبتاكل الكرامله

الخطة ماشية صح .. أنا عمال أسخن في أسد لحد ما ينفجر ويروح يولع في القنصلية 

[zamalkawy]

قشطة انا هعمل اللايف شات عندي على رقم 0900 و اهي تبقى سبوبة :lol:

[سيد كبريتة]

المستشار الثقافي المصري في الرياض اسمه الدكتور صابر أبو زيد

وده بقى وحده حكاية

راجل يغرد خارج السرب

1 - بيرد على التلفون بنفسه

2 - مكتبه مفتوح دائما ولا يوجد عنده سكرتير

3 - ممكن جدا يخلص لك المعاملة والأوراق بنفسه لو الموظف مش موجود

4 - صوته واطي ومنخفض شكله ابن باشوات من القدام

5 - مفيش عنده روتين ولا تعقيدات ولا بلاوي زرقاء وفي نفس الوقت صعب ينضحك عليه

6 - مفيش عنده وسايط كله زي بعضه

7 - المكتب الثقافي المصري ماشي زي الساعة

على فكرة اعتقد المكتب الثقافي المصري الحالي اللي في السليمانية هو مكان السفارة القديمة

دي شهادة صادقة لراجل فعلا يعتبر خير ممثل لابناء مصر في الخارج

[se_ Elsyed]

المستشار الثقافي المصري في الرياض اسمه الدكتور صابر أبو زيد

وده بقى وحده حكاية

راجل يغرد خارج السرب

1

لى فكرة اعتقد المكتب الثقافي المصري الحالي اللي في السليمانية هو مكان السفارة القديمة

دي شهادة صادقة لراجل فعلا يعتبر خير ممثل لابناء مصر في الخارج

إيه ده أنت جارنا بقى على كده ..

بس خلي بالك ان الملحق الثقافي والكلام ده مافيش عليهم ضغط زي المعاملات اليومية التانية من تجديد جواز سفر وتصاريح عمل ... و خلافة ..

وعلى فكره السفارة المصرية من السفارات الوحيد إللي بتبيع نموذج تجديد جواز وسعره تقريباً 15 ريال .. طب يا جماعة الخير ماتخلوها مجاناً وتضيفوا الفلوس دي على الرسوم الإجمالية ، بدل ما أبعت جد يشتري النموذج وبعدين أعبيه وأروح أقدمه .. فهو لومجاناً انا ممكن أجيب نمذجين تلاتة واخليهم معايا للضرورة ..

بالظبط زي الغباء اللي كان موجود زمان لما تروح مصر تجدد تصريح العمل وكانوا بيطلبوا دمغه معينة تقريباً بـ 3.40 ج .. حاجة عبيطة وهايفة وتقعد تدوخ دوخة الارملة على معاش جوزها اللي ماكنش قايلها أنه متجوز واحده تانية هاتقسمها في الـ 80 ج المعاش ، ولحد ما تلاقيها وغالباً بيبقى الموظفين موقفين بلطجية بره المكتب يبيعولك الدمغة دي بـ 10 ج ويقسموا مع بعض لكن كانوا بيجبروا بدري بدري ويروحوا .. ونتلطم إحنا بقى ...

وكذا مرة أطلب من الموظفين يا جماعة .. يا حبايب قلبي أنا وأي حد بيسافر بره مستعد أدفع اللي إنتوا عايزينوا بس إرحمونا من الدمغة دي وخلى النموذج يبقى جاهز مع الدمغة وخلافه وكله في مكان واحد ...

بس أخيراً إستجابوا ولغوا العذاب ده .. الحمد لله ...

نفس الشيء برضوا على دمغة الشرطة الإختيارية - سبق وان حكيت عنها - دي برضوا الموظف بيخيرك بصراحة : سيادتك دي بـ 10 ج وإختياريه تحب تدفعها : فأول رد هايكون إيه : لأ طبعاً ( برافو عليكم ) يقوم على طول رامي ورقك في الزبالة لا مؤخذه وإبقى قابلني لو خلصهولك فأرد عليه مقهوراً خلاص خلاص هادفع بس من غير ضرب ... ( أيوه كده يا عدو الشرطة .... أومال نصرف على الناس اللي بتضربكوا دي منين ؟ )

بس بصراحة دي لغوها قريب برضوا وشكل الضرب زاد علشان بتوع الشرطة زعلانين إنهم فقدوا مورد دخل هام جداً :)

[linux]

هما فكرين نفسهم في اوربا ولا امريكا

أحم ... أحم ...

أسمح لي يا عزيزي أزف اليك الأخبار ...

القنصليات في أمريكا (تعاملت مع أتنين) أقسم بالله كأنك في المجمع. أول ماتخش السفارة تحس أنك خدت ماكينة الزمان و المكان و أنتقلت فجأة الي عالم تكرهه ...

تطلبهم فى التليفون يقولولك معلهش فلان بيه في الدور التاني (!!)، ممكن تكلمه بعد الغدا؟

أخر مرة دخلت القنصلية قعدت في الريسبشن مستنى، قلت أقرا مجلة لقيت المجلات من سنتين فاتوا.

الموظفين بينموا على بعض و بألفاظ سوقيه.

و لعلم سعادتك، القنصل صديق لى، و رفضت أقول له أني كنت جاي، و لما لقاني قاعد تحت بالصدفة زعل و خدنى مكتبه ... قبل ما أخلص القهوة كان ورقي جاهز!!

ما تقلقش ... الكوسة و الروتين و الرغبة في زل المواطنين موجودة بقنصلياتنا بأمريكا برضه!

[se_ Elsyed]

ما تقلقش ... الكوسة و الروتين و الرغبة في زل المواطنين موجودة بقنصلياتنا بأمريكا برضه!

كده أموت وانا مطمئن على أولادنا بالخارج ...

لأن المساوة في الظلم عدل

[أسد]

وصالة إستقبال المراجعين ... ليس فيها كرسي واحد ...

الجميع يقفون ... كبار أو صغار ... أو نساء ...

كنت قد كتبت هذا الكلام من قبل ..

ولكني كنت في السفارة هذا الأسبوع ..

والحق وجدتهم قد وضعوا كراسي كثيرة في صالة إستقبال المعاملات ..

كما أن الكافيتيرا قد تم تنشيطها ....

الظاهر إنهم قرأوا كلامنا هنا ..

على كل ..

شكراً لهم على ذلك .. ولكن لا زال الرقم الخاص بالإستفسار مكلف جداً

أتمنى أنهم يلغوه

[BenNeal]

SANA said:

حتي في امريكا التعامل مع سفارة مصر فيه تعقيدات كثيره وكمان لوفيه واسطه كل حاجه بتمشي علي مايرام مكنش الروتين شغال

من كام شهر كان لى تجربة شخصية مع السفارة المصرية فى واشنطن. حيث توفى قريب لى اثناء زيارته لفلوريدا و قمت بالاتصال تيليفونيا بالسفارة لاستخراج شهادة الوفاة المصرية لارسال الجثة الى مصر لدفنها. و بالرغم من انى اقيم فى تكساس و الجثة كانت بفلوريدا الا ان موظفى السفارة كانوا متعاطفين و متعاونين معى لأقصى درجة مم مكننا من ارسال الجثة فى ثالث يوم من الوفاة بل و ارسلوا نسخة من الأوراق الى وزارة الخارجية بمصر التى ارسلتها بدورها الى ارملة المتوفى رحمة الله عليه.