لولا

ههههههههههههههههه اييييييه ياريت كنت طلعت طباخة شعبيه معتبره و مكنتش طلعت خايبه ومش عارفه المحشي بيترص بالطول ولا بالعرض :closedeyes: بقالي شهر نفسي فى محشي فلفل رومى بس حالياعماله افكر طب لو عملته هرصه ازاى ؟؟ مش جابت غاليه سيرة الموضوع دوت :blink:

طائرة استطلاع !!! لو صنفنا جريمة كل الأوغاد مجتمعين فى شعوبهم بداية من سفاح تونس مرورا بمصر واليمن وحتى ليبيا لفاقت جرائم هذا البشار كل من سواه وتجاوزتهم معا مجتمعين فى جرائمهم النكراء حسبي الله ونعم الوكيل اللهم اسكن شهداء سوريا المنازل العليا من الجنة واسكن هذا الطاغية السفاح فى الدرك الأسفل من النار فقد ران على قلبه وعُمى على بصره وبصيرته وفاق هتلر فى جنون عظمته .

لالالالالالالالا اثبتو على كلمة طيب احسن انا دماغى ساحت خلاص بالطول ولا بالعرض بالعرض ولا بالطول ماهو انت ياعبير مش تقوليلي الحكايه تجى بالعرض عادى بعد ما انا استحقرتنى خااااالص خاااالص على الجهل المدقع اللى كنت فيه وانا بخالف قانون غالية سرسخوس فى فن رص البتنجان فى حلل المحشي :sad: ثم انا مش فاهمه انتى متوقعه انى هسمع حاجه من غاليه وافكر بعدها اساسا :P ايش دخل المنطق فى قوانين الطبيخ طيب ؟؟ بذمتك كده لو احنا هنشغل دماغنا فى منطقيه رص البتنجان بكره الموضوع يبقي اخطر ونحلل منطقيه شهقة الملوخية :blink: ههههههه تسدقى عندك حق .. بس انا اتدايقت انى مش كنت اعرف اانه بيترص بالطول وفكرت انه الأنسب فعلا كان يبقي بالطول بدل ما بلاقي ساعات حبة رز ممكن تخرج شويه من البتنجان . اممممم طب عادى يعنى اقلي السمكه بطولها مش لازم اقطعها نصين :P :P

الله يا أشرف .. الله عليك مش بصدق كل ما بتيجى تطل على هنا وتخرج من قلب الصدفه لؤلؤه تسيبها وراك عليها بصمتك للمرة الواحد بعد المليون حقول شهية هى الأوقات التى اقرأ لك فيها اشرف حسين لا احد قد يكتب ما تكتب ولا احد سيكتب كما تكتب ولا احد يدهشنى بالدرجة التى لا تتوقف عن ادهاشي بها فى كل سطر وفكرة وآنات روحك التى تخرج كلماتها من عمق سحيق . كن دوما بخير يا صديقى لولا

شكرا على الوردة, انا شوفت الست غالية ( علشان محدش يفهم غلط كانت زوجتى بتشوفها على اليوتيوب), وعجبنى قوى الاسلوب البسيط الى بتقدمة كمان عدم الاحراج عن الكلام عن التوفير والفصال مع البياعين وتقديم الوصقات السهلة الى مش بتحتاج كتير من العناء, واتمنى ليكم بالهنى والشفاء :) ايووووووووون لازم تفهمنا تومامن لماذا كنت تشاهد الست غاليه وهل كنت تفعل ذلك بصحبة زوجتك او ... من وراها :blink: بهزر انت منور وياريت ديما تتابع غاليه مع المدام وتنقلنا تعليقاتك هنا . ههههههه اكتر حاجه كانت بتضحكنى فى الحلقات الأولى ان فى رجاله بتتصل وتسلم وتسترسل وهوووووووب تقولها والنبى ياغاليه خدى المدام اشرحليها طريقه عمل شوربه كذا ولا الرز مش بيطلع معاها مفلفل خدى قوليلها الطريقه هههه بيموتونى من الضحك استحالة العالم ده كله كده على بعضه من الشرق للغرب يكون فيه رجالة جميلة كده زى شخصية الرجل المصرى فعلا .. عظيم ياشعب والله عظيم

الحق بس يا احمد ده بيقول سبراجوس :blink: غالبيه الناس فى مصر متعرفش الهليون من اساسه عربي لما تعرفه باالآفرنجى جوس :P نفسي اشوف وش غاليه وبندق بيشرحلنا وبيجيب سيره السراسخوف دوت smk: شوف يا بندق انت تسهل الأكله شوية علينا وتلفحها بالبيئه المصرية وما هو متوفر وكدهوت .. نرق الفراخ ونلفها على شرايح فجل مثلا ونكرملها بعودين قصب :P " على جنب بقي نعمل شوربه اساسي على العظم ترم العظم فى الشتا دوت محدش يرمى حاجه :happy: ههههه تسلم ايدك والله فعلا زي ماقالت عبير تحفه تحفه من غير مجاملة ومش قادره اتخيل تتبيله خل العنب مع عصير التفاح لاحقا وكمان حلاوة الفلفل الرومى الملون هتطلع نكهه ايه بس واثقه من تفرد وتميز ولذاذه كل اللى بتعمله مفيش كلام . طبخاتك كلها والله مرهفه الحس بكل تكوانيها هههه ايه رايك تجرب تعمل سخينه الموز كطبق حلو وتقولنا رأيك ;)

آه يا قلبي مش مسدقه " عارفه يا عمو محمد انها مش تكتب كده :P " بابا عادل ابو زيد بذات نفسه هنا وبقي من جَمهورك يا غاليه :happy: :happy: : انشاء الله بقي كل حد مش لسه بيتابع الطبخات المصرية الجميلة الأصيله البسيطه دى يبقي يتابعها ونبقي نتشاور فى طبخاتها ونصايحها النهارده كان صديق عزيز بيحكيلي احساسه لما كان بيتفرج بالصدفه على جزء من حلقتها واذ بها بتطلع ببطرمان اللفت المخلل .. فجأة الولد حصله فلاش باك ياعينى للعصر السحيق ايام ماكانت الأمهات بتعمل لفت مخلل وانقرضت الحاجات دى خلاويص اممممم عايزه اقول ان عشت سنين الجواز كلها بعمل محشي بتنجان وارصه بالعرض ويادى الكسوف يادى الخيبه يادى الوكسه اكتشفت من غاليه انه بيترص بالطول :blink: حتقولى دى معلومه عبيطه واساسي حقولكم مانا مكنتش اعرف :sad: ياحلاوة الأكلة الشعبيه ياجدعان بطريقتها الأصيله المعتبره :egyflag:

ايوة والله يا لولا دي أغلب ذكريات طفولتي أيام الشتاء و الأكلات الساخنة اللذيذة و أيام الصيف و الحلويات الخفيفة و العصائر الطبيعية و الا ايام رمضان المحفورة في الفؤاد خصوصا رمضان 84 له أجمل ذكريات وكان أول رمضان أصومه كله :wub: يااااااااااااه تعرفي انا دخلت الموضوع و شجعت الأكلة من غير ما اشوف الست دي بس اما شفتها حسيت بألفة غريبة و جذبتني بشكل غير طبيعي اموت انا في الستات المدبرة وده سر نجاحها على فكرة تعرفي انا لما بالاقي برنامج طبخ مليان اسماء اجنبية و حاجات جاية من كوكب تاني باحول القناة على طول في برامج فعلا مستفزة جدا مش بس انها حاجات غالية في سعرها بل كمان لأني باحسها مكلكعة كده و استعراضية هو في احلى من مصر و أكل مصر البلدي يوكل يا ناس وحشتني مصر اوي اوي اوي وخضار مصر و أكلات مصر الشعبية اوي تعرفي يا لولا أنا بامووووووووووووت في الفول و الطعمية و الكشري و العدس و البصارة و القرنبيط و الباذنجان و الفجل و الجرجير و الخس و التوابل المصرية و المشروبات المصرية كل ما هو مصررررررررري يارب احفظ مصر و زيح الغُمة يااااااااااااارب آمين آمين آمين آمين يا عبير ... آمين يا حبيبتى ربنا يحمى مصر وشعبها من كل شر ونشوفها فى المكانه اللى تستحقها ويستحقها الشعب العظيم دوت. مين بس مش يحب الأكلات الشعبيه البسيطه بطعمها ..بجوها .. بناسها كمان وحتى بأماكنها الشعبيه مرة كنت حكيت من زمان اول ما كنت بروح مع اهلى الحسين واكل الحمام فى مطعم فرحات والزحمه لحد الفجر فى الشارع الضيق قوى دوت وشعبيه كل كل حاجه هههه اول مره كنت لسه فى مرحله المراهقه بقي وفضلت اتنطط وحلفت ميه يمين مش واكله من الأكل دوت ولا فى الجو دوت والقطه عاملالى رعب وهى بتعدى من تحت الطربيزه تخيلي بعدها لما فتح فرع لفرحات فى ميدان لبنان ورحت وكان الجو مختلف واطباق صينى وشوك وسكاكين ونظام مطاعم حسيت ان روح الأكل مختلفه جدا جدا وحنيت جدا لمطعم الحسين والشارع الضيق واطباق الميلانين والقطه اللى بتعدى من تحت الطربيزه :happy: الطبقه الشعبيه فى مصر هى الروح الأصيله لمصر .. وناسها المغمورين الغلابه المطحونين هما اللى بيعملوا لمصر لون وريحه وطعم بكل تفاصيلهم وكلنا مهما علينا وسافرنا وشفنا بيوحشنا ساندوتش طعميه بسيط وطيق كشرى وطبق فول الصبح معصور عليه نص لمونه . شيء ساحر قوى ان المطابخ البسيطه جدا جدا للشريحه دى والمكونات الأبسط تطلع الأكلات الجميله دى كلها بالطعم دوت عايزه اقول بعنصريه بقي مش هتلاقي كده غير فى مصر ولما تلاقي كده هتبقي اكيد فى مصر. ايا كانت بقي الست غاليه واجنداتها الخفيه :P انا بحب البرنامج دوت وبحب الست دى وكل ما بفتح البرنامج بفتح صدرى واخد نفس جامد اشم فيه ريحه مصر البسيطه اللى بتوحشنى قوى قوى :wub: حاولى بقي تشوفيها ياعبير الحد والتلات والخميس لو فتحتى من سبعه لتمانيه هتلاقيها على قناة خمسه وعشرين .

ماما سلوى :wub: ههههه تصدقى انا قعدت كذا حلقه افكر فى موضوع المطبخ دوت ... بعدين عرفت تالت حلقه كنت خلاص طبعا استوعبت انه مش مطبخها شور شور ..قصدى آه عارفه ان دوت استديو متجهز فيه مطبخ بسيط يحاكى اى مطبخ بسيط جدا لأى ست بسيطه وهى بتتعامل معاه بالروح دى بتشريله ادوات الطبيخ اللى بتجيبها فى بيتها الأصلى زى لما فى حلقات رمضان نزلت تشترى كام شفشق بلاستيك بسعر بسيط عشان العصيرات وسيرفيس وقالت ان مرايل الطبيخ دى مش بتاعتها لأنها اصلا مش تقدر تشترى مرايل طبيخ غاليه هو انا مش حسيت ابدا انها بتكدب بمعنى تكدب او تتظاهر هى ذكيه طبعا وبسيطه وقعدت مع معدين ومخرج وفريق اعداد لشرح وتوصيل فكره وروح البرنامج اللى عايزينها توصل عن طريقها للجمهور من خلال محاكاة مطبخ بسيط وميزانيه بسيطه وادوات بسيطه وبهارات متوفره فى كل بيت وطرح امثله شعبيه وكل دوت الثوره اسفرت عن ظواهر كتير كتير الست غاليه وشريحتها الإجتماعيه لو كان حد فكر يديهم المساحه البسيطه دى لبرنامج زى دوت قبل الثورة كان برضو هينجح بنفس القدر. هههههه بس مش حتقوليلي انك مش بتفتحى صدرك كده تاخدى جرعات مصريه مركزه مركزه وانتى بتابعى الطبخات اللى بتفكرك بريحه وطعم الأكل فى مصر وتفاصيل الحياة الحلوه . على فكره اقدر اقولك بمنتهى الثقه بمنتهى الثقه ان كل المكالمات اللى بتتصل من السعوديه بالست غاليه هى مكالمات حقيقيه جدا وان شعبيتها فى السعوديه رهيبه فى الأوساط الحجازيه مكه والمدينه وجده يعنى خصوصا عند الأجيال اللى عاشت روح مصر فى السبعينات والتمانينات وكانت مصر جزء اصيل مؤثر فى كل شيء وبتحتل بكل تفاصيلها مكانه فى وجدان كل عربي قبل الدمار اللى احدثه مبارك وده شيء انا عارفاه كويس من احاديث وعلاقات مع ناس كتير من مراحل عمريه مختلفه ليها فى مصر ذكريات وارتباطات وجدانيه كبيره للمصرين واكل مصر والشخصيه المصريه الأصيله معزه كبيره . امممم بس اول مره فى حياتى اعرف ان فى فته سمك ... بتشتغلنا غاليه فى الحته دى يعنى :P

الست غاليه عدت يا جودعااااااااان :P تسلم ايدك على التقرير

تصدق انا كنت لسه بقول لعمو ابو محمد انى بحب فقرة التليفونات .. بحسها جزء اصيل من اصاله البرنامج على فكره فى ناس بستمتع جدا بطريقتهم البسيطه قوى فى الكلام ولهجتهم وتنوع الأماكن اللى بيتصلو منها فى مدن وقرى واقاليم مصر شيء جديد ومختلف جدا مش اتعودت عليه ولا سبق شفته .. كأنى بشوفهم من خلال صوتهم وروحهم وهى بتتكلم وتحكى جزء من مشكله او تفاصيل حياة او تبعت تهنئه بحب كبير وبساطه محصلتش .. تفتكر غياب كل دوت وتفاعل الشريحه الرهيبه دى من الشعب مع البرنامج لايف كان هيخليه يحتل نفس المكانه فى نفوسنا ؟؟ انا عن نفسي حبيته جدا كده .. وبدأت اعرف الست فيفي لما بتتصل من مصر الجديده مثلا واسمع حكايتها وانا مستمعه بحكايات الست المصريه اللى بتحكى بمنتهى خفه الدم والبساطه كأنها حد من جيرانك .. لسه بضحك كل ما افتكر حكايتها انها جربت تطبخ الخرشوف لأول مره فرمت قلب الخرشوف وطبخت القشره :) والأسبوع دوت اتصل راجل بسيط بيشتغل فى تجاره وتحميل الخضار وكان بيقول ان خضروات امشير كلها مسكره وفضل يوصفها بطريقه حسستنى انى مفتقده تفاصيل مصر دى .. نكهه الخضار .. الفلفل الرومى وريحته .. والبطاطس اللى بتيجى مسكره .. الناس البسيطه دى جواها كنوز مهوله من الرضا وحب الحياة وسط كل اللى هما فيه.. كنت بسمعه وبفكر زى كل مره الناس دى بسيطه قوى وغلبانه قوى وراضيه قوى واصيله قوى .. كان بيحكى انهم طلعوا يجيبو شحنه خضار واتغدو فى البلد وكان الجو والقعده جميله جدا جدا ... ياااه شوف ازاى الناس دى بكل اللى هما فيهم اكله جميله وبسيطه وشويه هوا حلو خلوه يحس انه سلطان زمانه .. عظيمه يا مصر بشعبك .. و ,,, شعب مصر نسبه الناس البسيطه قوى دى اللى فيه اكبر من النسبه اللى محتله كل القنوات الفضائيه والأرضيه .. هنستكتر عليهم حتى البرنامج الشعبى ده يطلع فيه صوتهم ونقول مصطبه :protest: تحياتى لحضرتك

ههههه نو نو مش دخلت المطبخ لسه اطبقها انا قلت حد يطبقها ويقولى فأتشجع اكتر انا اصلا عاجبنى جدا اسمها وبساطه مكوناتها الحاجات البسيطه دى بتفكرى لما كنا اطفال كانت ماما بتعملنا حاجات بسيطه من اصناف الحلويات فى البيت وبتشكل جزء جميل من ذكريات الطفوله ... بيصعب عليا الجيل الحالى هيكبر يفتكر ايه بس ؟؟ انه كان بيجب كريسبي دونات ولا سينابون من بره ؟؟ ريحه الفرن والكيك والحلويات اجمل شيء بيعمل فى البيت دفا وتتجمع حوليه العيله ... :wub: آه طبعا ليها حق ام محمد تحبها حقيقي الست دى بتطبخ من قلبها وبصدق ومن غير تكلف وبحس انها قدرت تدخل قلوبنا عشان هى فعلا حد بسيط واصيل ومش مصطنع .. انا بستمتع جدا جدا بفقرة التليفونات .. عارف بحب فى الفقره دى انى ناس مختلفه من كل شكل ولون وطبقه اجتماعيه بتتصل واحس فى الساعه اللى بتتذاع فيها الحلقه انى خدت جرعه مهوله من ريحه مصر واصالتها فى صدرى ياااااااه احساس مش يتوصف ابدا ابدا . كنت لسه عايزه انزل بأى يوتيوب ليها عشان لو حد مش عارفها يعرفها ويتابعها على القناه بتاعتها هى بتقدم حلقه كل يوم احد وتلاثاء وخميس . منور التوبيك ياغالى

بيرو حبيبتى حتعمليها وتصوريها كماااان :wub: هتبقي حاجه لطيفه جدا .. آه والله نفسي نبقي نتشارك فى النتايج ههههه الست دى عامله انقلاب ثورى محصلش وبتقول نصايح فضيعه وسط ما بتطبخ .. عايزين نعرف بيها اى حد مش لسه مش يعرفها عشان اللى مش بيتابعها فعلا فاته نص عمره :happy:

الست غاليه .. ايييييييه مين بس بقي ميعرفش الست غاليه اشهر طباخة فيكى يا مصر بتطبخ اكل شعبي محصلش على الهواء مباشره عبر الأقمار الصناعيه فى اول برنامج فريد من نوعه على قناة خمسه وعشرين فاكرة اول مره اكتشفت فيها البرنامج عن طريق الصدفه فى رمضان يااااه مش معقول قد ايه حصلتلي حاله ازبهلالالالالالالال واعجاب بفكرة البرنامج والطبيخ والبساطه و .... برطامانات المخلل والقلل اللى فوق الثلاجه :P وهووووب عينت نفسي فى منصب مديره الحملة الإعلانيه لبرنامج الست غاليه مش سبت حد الا وحكتله عن البرنامج وفضلت وراه لغايه ما شافه :egyflag: . فكرت افتح الموضوع دوت عشان نبقي نتشاور فى طبخات الست غاليه اللى فعلا مدرسه والله رغم بساطتها الشديده.. تيب اول حاجه غريبه جدا حابه اقولها هى طبخه اول مره اعرفها شكلها حلو مش جربتها لسه بس حابه اتشاركها معاكم عشان لو حد حابب يجربها .. الأكله دى صنف حلو اسمه سخينه الموز :egyflag: اول مره اسمع عنها الأكله دى المقادير عباره عن موز ، سمنه/ زبده، وكيلو برتقان نعمله عصير ونحطله سكر وندوب بره تلات ملاعق نشا نسخن السمنه ونحمر فيها كويس شرايح الموز اللى اتقطت بالطول نرصها فى صينيه ونحط عليها عصير البرتقال اللى بالنشا وندخلها الفرن تتحمر ... وبالهنا والشفا ياخبر ايه السهوله دى بس .. ممكن حد يجربها بليز ويقولى طعها ايه انا عايزه اعرف لو هى هتطلع متماسكه زى الكيكه ولا بتماسك المهلبيه مثلا ؟؟ انا مش شوفت الطبخه هتطلع ازاى للأسف .. عمار يا مصر . لولا