zemanova

السادة الأفاضل إسمحولي بالتعليق علي المشاركة الأخيرة للفاضل أسد حضرتك فتحت موضوع مفاده إنك حانق وناقم علي بعض الأوضاع, وأخذت تشكو وتهجو بعض المسئولين والقائمين علي الأمر وفي مقدمتهم السيد رئيس الحكومة نفسه. ولما انزلقت قدم أحد السادة الأعضاء لما يمكن أن أسميه أنا "الفخ" إتهمته بالتحزب وبالبحث والنكش عما قد يشير للأسوأ .. علي الرغم من أنه كان بيستعرض تجاربه الشخصية وبناء علي مواقف حدثت له بالفعل. إعذرني موقف حضرتك هو اللي أحادي فيما يخص هذه النقطة بالذات, وواضح إن حضرتك كنت بتبحث عن نوع من المواساة من وراء الموضوع فلما صرح الأخ herohero باستحالة حدوث ما كنت حضرتك تتمناه في ظل رؤيته للمشهد الإقتصادي والسياسي المفروض علي البلد اليومين دول - مع إنك أقمت بالسعودية وعارف قد إيه الفرق في مستوي الخدمات الحكومية م بينا و م بينهم إلي درجة إستخراج جوازات السفر للسعوديين عن طريق موقع الحكومة الخاص بيهم - ف ساعتها صرحت بإن أكيد هذا الشخص من المعسكر المضاد وكل من يخالفك الرأي. إذا كنت حضرتك فعلا ممن يهاجم من يستحق الهجوم ويدافع عمن يستحق الدفاع عمه, هات لي قرار واحد لوزير أو مسئول مصري ف العام المنصرم تم اتخاذه ومن شأنه أن يدعم الحياة الإقتصادية أو الإجتماعية في البلد بأي شكل من الأشكال, وساعتها ممكن نتفاهم ما إذا كان مطلبك الخاص بتفعيل نظام للحكومة الإليكترونية في مصر ممكن من عدمه. وبالمناسبة .. أنا برضه من حزب "ضد"

عجبني أوي التحليل ده وبالذات مصطلح "الحكومة الموازية". فعلا تحس كل واحد ف مصر بيسعي إنه يكون له عالمه الخاص بعيد عن الحكومة مدعوم طبعا بفلوس كتير غالبا قعد عمره كله يحوش فيها وبعض المعارف الواقعين تحت ما يسمي بمنظومة الجهات السيادية أو منظومة العدالة (بالمناسبة الفيديو بتاع خالد صالح عالمي ي ي ي .. أول مرة أشوفه) .. واضح ان احنا الإثنين بنتكلم ف نفس الإتجاه واحنا مش واخدين بالنا .. وده هيشجعني اسألك: مش ناوي تخبط علي باب أستراليا ولا حاجه عشان تشجعني حتي ؟ بالمناسبة أنا امتحنت أيلتس من يومين والنتيجة ان شاء الله كمان 10 أيام (الإمتحان كان ف&%*خ جدا مع إني كنت محضر نفسي كويس, يمكن جالي الإحساس ده عشان أول مرة أمتحنه) .. دعواتك

مش عارف ليه مش قادر اتقبل المنطق ده أخي الفاضل ! بالطبع لا أحد منا يقدر يدعي قدرته علي معرفة الطالع أو التنبؤ بالغيب, لكن علي الأقل كلنا نقدر نحلل الواقع ونستنتج منه حاجات .. ومن تحليلي الشخصي للواقع اللي يخصني ومن رؤيتي لواقع ناس كتير حواليا عارف إن المستقبل ممكن يكون فيه بعض الصعوبات ومش هنقول "مظلم" زي م حضرتك قلت عشان الناس اللي بتحب تبص لنص الكباية المليان متزعلش. إنما إني بعد التحليلات دي أقبل إني أعيش حاضر عارف إنه هيوصلني لمستقبل مظلم ده بقي اللي غلط .. غلط ف حق نفسك وف حق أسرتك. طبعا كلامي كله واضح إنه موجه نحو فكرة الهجرة بالتأكيد .. وللأسف كلامي بتأكده دراسات كتير مفادها إن بلدنا الحبيب علي رأس قائمة طويلة من البلدان اللي بتسمي "طاردة للعمالة" .. وإسمحلي أفكر معاك بصوت عالي: إيه اللي ممكن يربطني أوي بمكان أو بأخر للدرجة اللي معاها يكون مستحيل إني أسيبه واسافر؟ أكيد أهلي وأصحابي وجيراني سبب ويمكن هو السبب الوحيد من وجهة نظري لا أنكر هذا. لكن إسمحلي أصحابك وجيرانك فعلا غير قادرين علي إعانتك في حالة وجدت نفسك في يوم من الأيام مضطر تتسول لقمة العيش, ولا حتي هم قادرين علي إعانة أنفسهم. تبقي مشكلة الأهل واللي أنا شايف إنها بقليل من المجهود ممكن حلها عن طريق لم الشمل مرة أخري ف البلد المراد الهجرة إليه. شقتي وعربيتي وكل ما يربطني بالمكان كلها أشياء إحنا اللي بنصنع لها أهمية من لا شيء بدليل إنها ف وقت من الأوقات كانت غير موجودة, ومع ذلك ف كلها أشياء يمكن تعويضها مرة أخري. إذن ما المانع من السعي وراء مكانة أفضل طالما إن بلدي نفسها مفيهاش مكانة ولا مكان ؟! لي صديق عزيز يقطن دولة الإمارات من 10 سنوات تقريبا ومؤخرا عرفت إنه مهاجر بالفعل لنيوزيلند, ولما سألته عن السبب أبدي إشمئزازه من قوانين العمل هناك وكتير من التعقيدات اللي واجهته وفي النهاية بيزعم إنه "معرفش يحوش" والله أعلم بيكذب ولا بيتكلم بجد. أنا لا أزعم إن الحياة ف بلاد المهجر خالية من المشاكل. عزائي الوحيد إن كل الناس اللي اعرفهم من اللي راحوا إنقطعت أخبارهم تماما وده دليل إنهم ممكن يكونوا نجحوا هناك أو العكس الله أعلم .. كل اللي أعرفه إنه من حقي أنا كمان إني احاول .. ولو حد سألني طب ليه ! هاجاوب بإجابة مختصرة .. because I can

م انا عشان كده قلت لحضرتك حط تحتها كذا خط ..

أستاذي الفاضل herohero معاك حق طبعا ومش مختلف معاك في إن عدم الإستقرار هو الضريبة الواجبة الدفع لكل العاملين بالقطاع الخاص أو ال private sector زي م بيقولوا. إنما ما يزيد حنقي فعلا وبيخلليني ناقم علي وضعي الحالي إني أساسا واقع تحت ظلم الشركــة منذ زمن. ومستحقاتي متأخرة منذ فترة تزيد عن 4 شهــور, وحرفيا كلنا بنسف التراب ف السعــودية أنا وزمايلي. يكفي أن تعلم إن راتب شهر أبريل الماضي لم أتقاض منه هللة حتي الأن. وبعدها عايزني أقتنع إن الخليج جنة بالنسبة للعمل في الغرب !! سامحني أنا عملت ف الغرب بالفعل لفترة قصيرة في بداية حياتي المهنية, وكان في بلد أوروبي فقير وبيشحت اللي هو اليونان, ولكني لم أتعرض لمواقف مماثلة ولا لأي تمييز من جانب الناس هناك فيما يخص إستحقاقاتي كموظف. وحتي في عز الأزمة الإقتصادية الطاحنة هناك إنتظروا حتي نهاية عقدي الشخصي كموظف وإعتذروا عن التجديد لأن مكتب العمل نفسه رفض إستخراج تصاريح عمل جديدة للأجانب بسبب إن البطالة إرتفعت نسبها جدا بين ال natives اللي هم أهل البلد وهم أولي بالوظائف مننا كأجانب. لا يا سيدي .. العمل في الخليج له مميزاته صحيح لكنه بلا شك أقل أدمية من العمل في الغرب, كما إنه في الغرب العمل أقل استعبادا للأفراد من العمل ف داخل وطننا العربي. وحط تحت كلمة العربي كذا خط.

عزيزي أبو زياد ما يعكر صفوي فعلا ليست فكرة أن أجد نفسي بلا عمل أو إني أضطر للعودة لمصــر في الوقت الحالي. ف "رب هنا هو رب هناك" زي م بيقولوا ولا حيلة ف الرزق. المحبط لي فعلا فكرة إني أستني mail أو memo من الإدارة مذكور فيه إني عليا تسليم مهامي الوظيفية ويفيد بإن أخر يوم عمل لي هيكون يوم كذا .. فكرة إنتظار ده ف حد ذاته شايف انها مهينة وبتسبب لي مغص حاد ف أمعائي بجد مش بهزار .. لدرجة إني بافكر إني أنا اللي اطلب ده لمجرد الحفاظ علي ماء وجهي مش أكتر. شكرا جزيلا محاولاتك إنك تساعدني .. وإن كنت انت تخطيت المرحلة دي من زمان ف أنا ب اعتبرك مستشاري القانوني من أيام موضوعي القديم ومحاولاتي الأولي للسفــر. موضوع أستراليا نفسه كان فكرتك من البداية .. بس متتوقع مني أتعاب غير بعد ظهور التأشـــيرة .. إتفقنا ؟

شباب .. واضح إنه لا بديل عن موضوع الهجرة فعلا ع الأقل بالنسبة لي مؤخرا في مكان عملي عرفت إن الشركة قررت تخفيض عدد العمالة بعدد من المشاريع ومن ضمنهم المشروع اللي أنا فيه. قائمة طويلة بأسماء عدد من المهندسين ممن إنتهت فترة عقودهم وينتظرون التجديد زي حالاتي وذلك لعدم قدرة الشركة علي دفع رواتب هذا العدد من الموظفين. أنا عقدي مع الشركة بينتهي 20 أغسطس, وعلي الرغم من أنه لم يصلني أي إشعار رسمي من الشركة حتي الأن إلا إني غير متفائل بالمرة. عدد من زملائي تم إقالتهم بالفعل والبعض منهم ممن هم أحسن حظا تم إعطاؤهم أجازات مفتوحة تصل إلي 6 شهور. أنا في انتظار دوري ف الإقالة أو في أحسن الظروف أجازة مفتوحة. واضح إن الظروف بتدفعني دفعا لإتخاذ قرارات متعجلة تجاه السفر لأي بلد بيحترم حقوق الإنسان غير دول الخليج وبعيدا عن نظام الكفالة بكل تعقيداته وسلبياته. معنوياتي تحت الصفر ..

الموضوع فعلا كبير لكن مش صعب. أنا موجود بحجة إني درايتي بالموضوع أعتقد أصبحت كفاية للرد علي أي استفسار (ياريت تقوللي انك نويت عشان نمشي ف الإجراءات سوا عشان محتاج حد يشجعني بصراحة) وكل سنة وحضرتك طيب وجميع السادة أعضاء المنتدي .. ربنا يرزقك هدي النفس والتقي والغني والصلاح في الدنيا والأخرة.

تعرف إن كل دي أشياء الواحد ممكن يتكيف معاها من وجهة نظري. أنا عشت سنة ونص ف اليونان وعندي فكــرة تقريبية عن اللي انت بتقوله. الفشل بالنسبة لي هو إني أروح هناك أقعد فترة أبحث عن وظيفة واصرف الفلوس اللي معايا وأضطر أرجع صفر اليدين زي م بيقولوا. ده اللي كنت بسألك عنه بخصوص فرص النجاح والفشل.

معلومــة ع الماشي: تكاليف الهجــرة لأستراليا (بالنسبة لعائلة مكونة من زوج وزوجة وطفلين صغيرين أصغر من 18 سنة) هيكون تقسيمها كالتالي: 1. مصاريف معادلة شهادة التخرج تساوي تقريبا 700 دولار أسترالي * 5.88 جنيه مصري = 4,000 جنيه مصري 2. مصاريف التأشيره (تدفع لحساب إدارة الحدود والهجرة بأستراليا) 3600 دولار أسترالي للفرد الأساسي + 1800 للزوجة + 900 لكل طفل * 2 = 7200 دولار أسترالي * 5.88 جنيه مصري = تقريبا 43,000 جنيه مصري 3. تذكــرة طيران لفرد واحد فقط = 20,000 جنيه مصري 4. مصروف شخصي لفرد واحد فقط لفترة تتراوح م بين 3 - 4 شهور حتي الحصول علي فرصة عمل مناسبة (شاملا الإيجار والأكل والشرب وخلافه) = 2000 دولار/الشهر * 4 شهور * 5.88 جنيه مصري = 47,000 جنيه مصري الإجمالي في حدود 114,000 جنيه مصري ملحوظة: عن كل فرد عمره +18 (الزوجة علي سبيل المثال) ولم ينجح في تحقيق score = 4.5 في امتحان ال IELTS بيتم دفع رسوم حوالي 4000 دولار أسترالي كمصاريف تغطي نفقات كورس تعليم اللغة الإنجليزية هناك ف أستراليا بعد الوصول. وبيتم دفعها في مرحلة الInvitation

بص يا نجم القائمة اللي حضرتك لقيتها دي قائمة بأكواد الوظائف المطلوبة بشكل عام في أستراليا ونيوزلندا مرتبة أبجديا .. القائمة دي بيسموها قائمة ال ANZSCO Australian and New Zealand Standard Classification of Occupations (ANZSCO) codes طبعا دي بتشمل كل الوظائف بصرف النظر عن الغرض المطلوب من وراءه الهجرة. لكن القوائم اللي مذكورة ف البوست بتاعي هي الخاصة بهجــرة العمالة المهــرة بالتحديد واللي بتحدد شروطها الفيزا رقم 189 و 190 بس. عشان زي م اتفقنا التأشيرات أنواعها كتير حسب الغرض من الدخول للبلد. بمعني أخر الوظائف االي ف القائمة الأولي (الخاصة بالفيزا 189 و 190) مشمولة أكيد ف الوظائف اللي ف قائمة ال ANZSCO

ملخص الخطوات لهجــرة أستراليا: 1- لازم تعرف إذا كنت مؤهل للهجرة لأستراليا ولا لأ. بإنك تشوف وظيفتك موجودة فى قايمــة الوظائف أم لا. القائمة دي بتتعدل كل ســنة وفي وظائف بيتم حذفها وأخــري بيتم إضافتها حسب حاجة سوق العمل. القائمة دي (بيسموها Skilled Occupations List) موجودة ف الرابط ده:http://www.border.gov.au/Trav/Work/Work/Skills-assessment-and-assessing-authorities/skilled-occupations-lists/SOL 2- أســتراليا بها أكثر من 50 نوع مختلف من تأشــيرات الدخول متقســمة حسب الغرض من السفــر (سياحــة - عــمل - دراســة .. إلخ), وبالتالي هم مقسمينها subclasses بأرقام مختلفة. لو انت إسمك موجود ضمن لائحة الوظائف المطلوبة, ده بيؤهلك للسفر علي subclass 189 or 190 اللي هي مخصصة لهجــرة العمالة المهــرة. شروط السفر وكيفية التقديم علي النوعين دول من التأشيرات مذكورة ف الرابطين: http://www.border.gov.au/Trav/Visa-1/189- http://www.border.gov.au/Trav/Visa-1/190- 3- تدخل على الCheck List لحساب درجاتك, الفئات المذكورة فوق بيبقي مطلوب منها تحقق score = 60 عشان تبقي eligible أو مؤهل للتقدم بطلب الحصول علي التأشيرة. النقاط دي موزعة علي العمــر, المؤهل, عدد سنوات الخبرة الوظيفية, مدي إجادتك للغة الإنجليزية + عوامل أخري. 4- من قائمة الوظائف هتعرف انت محتاج تعادل شهادتك مع أي جهة (بيسموها Assessment Authority)، تدخل على الwebsite بتاعهم وتشوف متطلبات المعادلة وتعرفها كويس لأنها بتختلف اختلاف جذرى من وظيفة لاخرى، واحيانا الجهة دي نفسها بيطلبوا IELTS أكاديميك ب score أعلي من المطلوب للحصول علي التأشيرة نفسها، وفى الحالة دي إنت هتعمل اتنين إمتحان IELTS واحد جينيرال للتأشيرة وواحد أكاديميك لل Assessment Authority. 5- هتبدأ تذاكر للIELTS وتعادل شهادتك ف نفس الوقت, إمتحان ال IELTS المفروض يبقي سابق شويه عشان جهة المعادلة بتطلب نسخة من نتيجة الإمتحان. 6- اول ما معادلتك تخلص (غالبا بتاخد وقت من شهرين إلي 3 شهــور) بتعمل حاجة اسمها Expression of Interest على الموقع بتاع الهجــرة, بتكتب فيه كود المعادلة بتاعتك وكود شهادة ال IELTS اللى معاك وال score بتاعها وتفاصيل شخصية تانية متعلقة بالخبرة والسن. 7- المفروض ان فى اخر ال Expression of Interest بيحسبلك درجاتك لو جبت 60 او أكتر (بالنسبة لفيزا 189 و 190) هيقولك انك ينفع تقدم. 8- تستنى لحد ما يبعتوا Invitation، المفروض انهم بيعملوا الاختيار ده مرتين فى الشهر، فممكن الInvitation تيجى بسرعة أو تتأخر. 9- لما تيجى الInvitation بيكون صلاحيتها شهرين بس ، لازم فى الفترة دي تدفع الرسوم كاملة (حوالى 3600 دولار أسترالى عن كل شخص بالغ فوق ال18 سنة) وتحمل كل الورق المطلوب اللى يثبت اللى انت كتبته فى ال EOI ولازم يكون الكلام والتواريخ كلها متجانسة ، وإلا مش هتاخد الفيزا حتى لو درجاتك تعدى ال60, ولو تم الإشتباه في تزوير الأوراق ممكن يتعملك Ban من إنك تقدم مرة تانية لفترة معــينة. 10- لو الشهرين خلصوا بتوع الInvitation - ال EOI بتاعك هيرجع ال pool تانى لمرة تانية لكن لو المرة التانية والInvitation بتاعتك وقتها عدي بيشيلوها خالص من ال pool وبيعتبروا إن انت خلاص غير مهتم بالحصول علي التأشيرة. 11- بتفضل مســتني فترة طويلة لحد م تفقد الأمل (الفترة دي بتصل لشهــور ومحدش يقدر يقولك إمتي بتنتهي, حتي هم نفسهم علي موقع الهجرة كاتبين كده), لحد م تلاقي حد بيتصل بيك يقولك مبروك, أو للأسف طلبك اترفض وف الحالتين مصاريف التأشيرة اللي حضرتك دفعتها Irreversible. 12- المفروض طبعا في كشف طبي ف مرحلة ما ف النص + بيان بالحالة الجنائية بيتعمل بس الحقيقة مش قادر احدد إمتي بيتعملوا بالظبط. غالبا بعد الInvitation.

عجبني جدا أسلوبك في تلخيص الفرق بين غربة الخليج وغربة الهجــرة, وزودت حماسي لفكرة الهجـــرة بالمناسبة لأن الدافع من وراء سفري لم يكن سعيا وراء الماديات من البداية. وإن كانت عبارة "في الغالب بتنجح" فرحتني وقلقتني ف نفس الوقت, وفكرتني إن إحتمالات الفشل ف الخارج قائمة بالضبط كما هي إحتمالات النجاح. خايف جدا بعد الهجرة يتبين لي إن العيش مستحيل ف بلاد المهجر أو لسبب أو لأخر أقع في مشكلات لا قبل لي بحلها وأضطر ارجع بدون تحقيق هدفي من الهجـــرة.

بخصوص إختبار ال IELTS هتلاقي معظم الأجوبة علي أسئلتك ف الرابط ده .. بيشرحلك بالظبط الإمتحان بيتم ازاي ومثال محلول علي كل module من ال modules الأربعة اللي هتمتحن فيها .. Listening, Reading, Writing & Speaking http://www.ielts.org/test_takers_information/test_takers_faqs.aspx بخصوص الدعاء أنا كنت باهزر طبعا. خصوصا إن بعد م اتكلمت معاك موضوع ألمانيا أصبح بالنسبة لي باهت ومبقتش متحمس له بالمرة, وموضوع أستراليا حاسس إنه أقرب لي من كندا لعدة أسباب هاذكرها لاحقا .. وإن شاء الله لك عندي دعوة حلوة النهارده ف التراويح ودعوة تانية إذا اتقبلت ال Application ف موضوع الهجرة. أنصحك تطرق باب الهجرة من جديد .. 34 سنة تمنحك 25 نقطة من إجمالي 60 إذا ما رغبت ف التقديم لهجرة أستراليا (إنت ف نفس عمري, أنا 33 سنة تقريبا). الميزة في تأشيرة أستراليا عن كندا - من وجهة نظري - إن ال processing period فيها أسرع من كندا بكتير اللي ممكن الفترة دي فيها توصل لسنتين و3 سنين. ده بالإضافة إلي إن معادلة مؤهلك الدراسي ممكن تعمله من عندك بدون داعي إنك تسافر وتعمله من هناك, وده شيء سمعت إنه مينفعش تعمله غير بعد الlanding بالنسبة لكندا. أنا عرفت شويه معلومات تخص هجــرة أستراليا هاعرضها علي حضراتكم ف بوست منفصل لو حبيتوا ..

عزيزي أبو زياد عملت بنصيحتك الأخيرة بعد اقتناع إن فكـــرة السفر لمجرد الإقامة بالخارج والعمل بدون الحصول علي مزايا البلد اللي أنا فيه كاملة هو مجرد تضييع للوقت. وإن ده هيدخلني ف مرحلة أخــري من العيش المؤقت مما لا يتناسب مع هدف الإستقرار النفسي اللي كنت أطمح إني أحققه. أنا بدأت البحث بالفعل في موضوع كندا وأستراليا. وكخطوة مبدئية حجزت بالفعل لإمتحان ال IELTS يوم 1 أغسطس الجاي ان شاء الله. وتفاءلت بعد م تصفحت قائمة الوظائف المطلوبة ببلد كأستراليا علي موقع الهجــرة الرسمي الخاص بهم .. صحيح الموضوع محتاج لبعض الإختبارات والمعادلات وتقييم لكفاءتي المهنية من قبل هيئات حكومية هناك, ولكن أعتقد الموضوع يستاهل المحاولة. في طبعا تفاصيل كتيرة تخص موضوع الهجــرة, أنا حاليا في مرحــلة جمع البيانات. لك جزيل شكري بالطبع علي نصائحك ومتابعتك, لكن إعمل ف حسابك لو قدرت اهاجر فعلا وحصلت لي مشاكل هناك هافضل ادعي عليك إنك كنت السبب :old: