لوحة القادة

طبعا انتوا عارفين انى اعيش فى الرياض فى السعوديه ...دلوقت حالا جاتلى رساله على موبايلى وده نصها الراسل:CIV.DEF"المديريه العامه للدفاع المدنى" ورد للمديريه العامه للدفاع المدنى تحذير من الرئاسه العامه للارصاد و حمايه البيئه يشير الى تأثر مدينه الرياض واجزاء من المنطقه الشرقيه هذا اليوم برياح نشطه مصحوبه بعوالق ترابيه تقل فيه مدى الرؤيه و نهيب بالجميع توخى الحذر والحيطه مش قادره افسر و اقول غير ان السعوديه دوله محترمه ...تحترم المواطن وادميته وانا بقرأ الرساله خطر ببالى حال الاسكندريه و حال البرد و العواصف فى مصر و العمال ال ماتوا بأنهيار المصنع فى الاسكندريه جراء حاله الجو....هو ليه المسئولين فى مصر ما يرسلوش تحاذير على الجوالات...لتحذير الناس بيكتفوا بنشره الاخبار فقط ...ولا هما عاوزين يخلصوا من جزء من ال80 مليون ولا يمكن مصر كارت مش خط تحيه وتسجيل اعجاب و ارفع القبعه للدوله المحترمه السعوديه والمسئولين بها ودعاء لملكهم ان يتم الله شفاءه.

الفاضلة / المهندسة لقد حدث بالفعل فى مصر أو فى الأسكندرية على وجه التحديد ان اذاعوا فى التليفزيون عن العواصف والحو البارد الذى حدث قبلها بيومين أو أكثر ( حسب ما أبلغت به ). فكرة الأتصال بالموبايل تعتبر رفاهية لاتحدث هنا فى أمريكا وفى حالات الأعاصير فقط فى المناطق التى لايصلهااو ليس بها إرسال تليفزيونى محلى يكون الإتصال على التليفونات الأرضية فقط، غير ذلك فهناك قناة الطقس وهى قناة خاصة تتحصل على مواردها من الإعلانات والتبرعات وهى قناة فضائية بمعنى انها غير متاحة لمن ليس مشترك بخدمة التليفزيون الكابل او الدش والمواطن مسئول أن يأخذ التحذيرات بجدية. مشكلتنا فى بلداننا العربية اننا نعتبر أن الحكومة هى ماما وبابا وأنور وجدى وواجب عليها انها تتصل بالناس تقول لهم افتحوا التليفزيون وشوفوا النشرة الجوية ، واللى مايشوفش النشرة الجوية نبعث له رسالة على الموبايل ، ولو ماعندوش موبايل الحكومة تشترى له موبايل علشان تعرف تحذره. مش عايزين نلقى باللوم فى كل شيئ على الحكومة ونخلى مسئولية المواطن عن أشياء يجب عليه أن يتخذها لحماية نفسه وأسرته. أما ماحدث فى الإسكندرية ، فصدقينى حتى لو كانت الحكومة فعلت عشرة أضعاف مافعلته لم يكن ليجدى لأن الرياح والعواصف والأمواج لها طاقات رهيبة لايقدر عليها سوى الخالق. نعم كلنا يعلم ان أوجه القصور كثيرة ، ولكن فى احداث العواصف الأخيرة ففى رأيى أنه لالوم على أحد.

اختي الفاضلة / المهنــدسة ،، اولاً اشكرك جزيل الشكر على حسن الثناء على المملكة العربية السعودية وقيادتها واحب ان احيي فيك حب هذه البلاد التي تتشرف باقامتك بها كواحدة من اهل البيت لا ضيفة او عابرة .. ثانيا ادعو من الله ان يحفظ اخواننا في مصر ويلطف بهم و يجعل الامطار خيرا لهم ... اللهم حواليهم ولا عليهم .. اللهم اجعلها سقيا خيرا وبركة لا سقيا غرم ولا هدم والاسكندرية بالذات .. بلد عزيزة على قلبي جدا .. فهي اكثر مدينة زرتها في مصر .. ادعو الله بان ينجي اهلها من كل مكروه انه سميع مجيب اما عن المسؤولين في مصر .. فلا اعتقد ان من حقي التدخل .. لكن للاسف الشديد رأينا ما حدث في جدة العام الماضي ولا اعتقد اننا سنساه مدى الدهر كلنا بالهم شرق يا اختي :sad:

انا ارجع سبب الحفظ والتلقين الى تعودنا عليه و للاسف البعض يعود اولاده على غرس سياسه الاول و ليس الافضل بمعنى "ذاكر علشان تطلع الاول"..."ذاكر علشان تنجح"...محدش بيقول "ذاكر و ابحث و اقرأ وزيد من اطلاعك علشان تكون الافضل و المميز" بمعنى اخر الاطفال بتحفظ عن ظهر قلب للحصول على الدرجات النهائيه او درجه النجاح فقط ..لم يغرس الاباء فى اولادهم سياسه الافضل و هو فهم ما نحصل عليه سواء بالمدرسه او الجامعه و مزيد من الاطلاع بأستخدم مراجع اخرى وبحث لتنميه المعلومات اكتر و يصبحوا حينئذ افضل من اقرانهم وبالتالى اكثر تميزا. هذا بالنسبه لدور الاباء اما دور الجامعه والمدرسه ...فأننا لم نعرف كلمه بحث الا فى الجامعه لدرجه ان اغلبنا لا يعرف ما هو البحث و اسسه يذهب للمكتبه وينقل ما فى الكتب كما هو ويقول "هذا بحث"..و ذلك لاننا افتقدنا فى المدرسه اسلوب البحث و اتباع منهج علمى لتطوير التفكير و الابداع والتخلى عن الاسلوب النمطى فى التعليم. الفرق بين سياسه الاول و سياسه الافضل مثل مباراه بين شخصين احدهم يكون الغالب و يكون مكسبه جاء بفرق نقطه واحده جاءت بالحظ او الصدفه وعندما ينهى المباراه يقول انها كانت من اصعب المباريات لان الخصم كان قوى جدا ويعلق الحكام قائلين ان برغم الهزيمه فكان المهزوم هو الافضل فى الاداء...لابد من تعزيز سياسه الافضل وليس الاول ...هل وصلكم ما اريد ان اقوله.

أعتقد إن مافيش مصري بيحب بلده ممكن أن يحزن للإفراج عن المقبوض عليهم لكن كالعادة الدولة تعالج الازمة بمنتهى منتهى الغباء الـ 154 اللي إتقبض عليهم دول .. كانوا مدانين وأعترفوا ولا لأ ؟ طب إذا كانوا مدانين .. لماذا لم يتم تطبيق القانون عليهم جميعاً ؟ وإذا كانوا عير مدانين .. لماذ تم تجديد حبسهم عدة مرات ؟ ولماذا كان هذا البيان الهزيل من النيابة اللي قالوا إن الأفراج تم بناء على حالتهم الصحية وعشان كمان مستقبلهم الدراسي .. اصل يا حرام فيهم ناس في جامعة ؟ وإذا كانت دي حيثيات مقنعه .. فماذا عن طلبة الأخوان اللي بيتم فصلهم نهائياً من الجامعات والزج بهم في السجون ؟ وماذا عن شباب حركة 6 إبريل ؟ وماذا عن المدونون اللي بيتم الزج بهم في السجون لعدة سنوات ؟ ------------- سيناريو سخيف ومعروف بالقوة الجبرية .. تم تحويل المبنى لكنيسة بدون ترخيص وبرسومات مخالفة للرسومات بتاعت المبنى الإداري .. يا سلام .. طب ما كان من الأول ؟ واللي مش عاجبه يخبط راسه في الحيط كل الإحترام للأماكن الدينية .. لكن عندما تكون مع القانون مش ضده ... وبالقوة الجبرية ومن سكات وبقت خطواته محفوظه .. البابا يعتكف .. يلغي العظه بتاعت كل يوم اربعاء ... يلغي توزيع دعوات الإحتفال برأس السنة الميلادية .. وأتحدى إن خلال يومين سيتم الافراج عن الـ 80 المتبقيين ليقضوا الكريسماس مع أهاليهم .. ويرجعوا الصعيد محملين بأكاليل الغار ... وميليشيا مسيحية بقت تحت الطلب .. نشد لهم تلغراف في اي وقت ييجيوا يقفلوا العاصمة لكي ينخسف بكرامة الدولة أكتر وأكتر .. ولكي نرى غداً خروج عن الشرعية أكتر وأكتر لأن ديتهم بقت معروفه ومحفوظه ويرجعوا في النهاية يقولوا : هو في إحتقان ليه بين المسلمين والمسيحيين ؟

السلام عليكم الاخوه الكرام جزاكم الله خيرا . الفاضل ريمون يا اخى و هو حد قال يتحاكم المتظاهرين بس و نترك قوات الامن الحق حق و العدل عدل هى قوات الامن دى جاءت لماذا بل المتظاهرين اللى جايين من الصعيد سبب وجودهم ايه .. المفروض كل من تجاوز يتم عقابه إيه الصعب و ايه اللى مش مفهوم فى كده مجموعه ..اى كانت هى مين .. قامت بمخالفه القانون ..حسب ما ظهر بعد ذلك من كذب الكهنه على الشباب و قولهم ان الترخيص لكنيسه فى حين انه مجمع خدمات و تم مخالفه شروط الترخيص ايه الغريب فى ان الحى يتدخل لتنفيذ القانون طيب هو النظام معمول ليه .؟؟ انا مش فاهم انتم بتفكروا إزاى و هو علشان ابو عمر هو اللى بيتكلم ناخد الجانب المضاد حميه فقط فى اى عرف و اى قانون فى الدنيا تحدث احداث شغب و تجمهر و يتم القبض على المسئولين عن ذلك فيقوم كبير تلك الجماعه بالضغط على الحكومه للافراج عنهم . اخى محمد انا مش زعلان يا محمد انا بقيت مرعوب من اللى هايحصل فى البلد بكره اروح اختلف مع واحد مسيحى و الحق معى و نروح احنا الاثنين الى القسم انا هايتقبض على و هو هايجى واحد من الكنيسه او حتى تليفون يخرج معزز مكرم . لا يا محمد ده مش شغل قضاء و لا نيابه ده لوى دراع زى س س ما قال فى البدايه من اربع ايام تم تجديد الحبس كما يحدث مع اى متهم بجريمه مماثله تانى يوم البابا اعتكف بعد يومين طلعت قرارات الافراج بالضبط زى ما حصل فى موضوع وفاء قسطنطين يا محمد قانون الطوارئ تفصيل على المسلمين فقط و اتحدى وجود معتقل مسيحى وااااااحد . فى نفس الوقت يا محمد اتحدى لو ان قرار كهذا يحدث مع مسلم متهم بالتجمهر ضبطوه واقف مع نفسه :happy: . كل ده و دخل البابا ايه و طبعا اللعبه لها اصول لانهم مش من السذاجه يفرجوا عنهم مره واحد فيهيجوا الدنيا عليهم و لكن شوف الترتيب امس صباحا فى الاهرام الخبر يقول ان النائب العام يأمر بالنظر فى الطلبات المقدمه من بعض المتهمين المحبوسين لدواعى انسانيه مثل الطلبه و المرضى ..و هذا شئ طيب لو يطبق على الكل ...و إنما !!!!! مساء امس الخبر على موقع الاهرام بأمر النائب العام بالافراج عن 70 اى نصف المتهمين كده الدنيا هديت شويه و الرساله اللى ارسلها البابا لشعبه تحققت عندما جعل الافراج عن هؤلاء مسئوليته المباشره و الرجل وفى بالمسئوليه و بعد كام يوم و فى هدوء سيتم الافراج عن باقى المتهمين او معظمهم و يتبقى بضعه افراد يتم محاكمتهم ذرا للرماد فى العيون ....بجد حاجه تكسف . اخى محمد القانون هو اللى ما فيهوش البابا شنوده يا محمد . الفاضله اغابى ما اسهل توزيع الاتهامات يعنى علشان ابقى بأحب بلدى يبقى اخد على قفايا و ابتسم و بكده ابقى باحب بلدى اشوف الظلم و الافتراء و الاستقواء و اسكت و اجامل علشان ابقى باحب بلدى اشوف مسلمات يتم اعتقالهن و حبسهن بسبب اسلامهن ثم ابتسم و اجامل علشان ابقى باحب بلدى اسمع بيشوى يشتم دينى و رسولى و يريد طردى من البلد باعتبارى اجنبى و اسكت علشان ابقى باحب بلدى إستحاله دى فى عرف المتعصبين فقط قسما بالله يا اغابى لو رايتينى كيف اتعامل مع المسيحيين لتعجبتى اكثر و ذلك هو خلق الاسلام الذى امرنا الله به هل ارسل لك رقم تليفون صديقى ماجد المسيحى لتسأليه عن ماذا فعل ابوعمر معه ليتزوج فى الميعاد المحدد مع اهل زوجته و لولا الله ثم ما انعم الله على من خلق إسلامى و امكانيات ماديه ووقوفى بجانبه يعلم الله فقط ماذا كان مصير تلك الزيجه . اقولها لك ليس منا منى و نيتى على الله و لكن لتعلمى من هو ابوعمر و كل ابوعمر مسلم يتقى الله . لكن هذا شئ و ما نتكلم عنه شئ اخر انا اتكلم عن تجاوزات بحقى و حق المسلمين فى مصر بدء من تطاول على الدين و القرأن وصولا الى فرادى المسلمين هذا ما اتكلم عنه و تصمين اذانك عنه و تغمضين عينيك و كأنكى لا تريه ..و هذا شأنك إذا كنتى لم تعرفى ما يفعله كباركم بدء من بيشوى رقم 2 وصولا الى اصغر كاهن ممن كذب على الشباب المغرر بهم فتلك مسئوليتك انت و من يجاملك من المسلمين اما انا فلست من تطاول و لا اعتقل و لا احتجز و لا تظاهر و لا كسر و حرق ثم تلومون على ان اقول ..اه ... اى عدل هذا ؟؟؟؟؟؟؟؟؟؟؟

اسمحولى ابدا موضوع جديد فحواه ازاى استغل كل سنتيمتر من الشقة اللى بالشئ الفلانى اللى المفروض مهدرش منها مللى متر واحدو خصوصا ان فى اخوة كتير ابتدوا يشتروا شقق فى المدن الجديدة وهم على وشك استلامها و اليكم بعض الافكار لغرف نوم الاطفال و الشباب الضيقة و التى مساحتها يدوب 3.6 *3.6 متر فى المدن الجديدة و نكمل بعد شوى

قصة قرأتها في بريدي الخاص أعجبتني وأحببت أشارككم فيها طالما كل شئ حتما سيمر ....يبقي لازم الواحد يتعلم ويعود نفسه يستمتع باللحظة الحلوة ويعيشها كويس ....و اللحظات المرة يزعل عليها بمقدار مناسب ليها يعني ميكبرش الأمور لأنها هتعدي وتنتهي.

السلام عليكم، اختي المهندسة، انا جاتلي نفس الرسالة تقريبا الساعة 5:15 الفجر، وانا فعلا جالي نفس الاحساس الي جالك بالتقدير و الاحتررام جدا لموقف زي ده بما اني عايش في الرياض برضه، وانا بحي فعلا حكومة المملكة على حاجة زي كده، و بتمنى انها تستمر،

صحيفة «العربي الناصري» قالت ان وكالة «الأهرام» للاعلان تعاقدت مع شمس بدران لنشر مذكراته مقابل «170» ألف دولار أميركي (نحو مليون جنيه مصري) ونقلت عن الصحافي يسري فودة قوله: ان مذكرات بدران لن تكون سياسية أو عسكرية فقط، بل ستشمل الأسرار الشخصية التي يدعي أنه يعرفها عن الرئيس جمال عبد الناصر واللواء عبد المنعم رياض ووزير الدفاع السابق محمد فوزي. ياخسارة يامصر .. ياخسارة يامصر . ليه ينتسب لك واحد زى ده؟؟؟ 170 الف دولار ؟؟؟ بيبيعوا تاريخنا ويشوهوه ب170 الف دولار ؟؟؟ ده لو 170 مليون دولار ...وده مصرى (( حتى لو مش اصيل )) مكانش باع وشوه وحرق تاريخ زعيم مشهود له بحاجات كتير حلوة .. عبد الناصر له أخطاء كتير....لكنه لم يكن شخصية مهزوزة كما يصورونه...!!! يعنى هما خلاص ؟؟ مش لاقيين شئ محسوس او ملموس يمسكوه عليه....مش لاقيين صور او تسجيلات قذرة يمسكوها عليه.. يقوم يقولك ... كان بيتفرج على افلام ( خاصة ) لسعاد حسنى .... ايه الانحطاط ده؟؟؟ايه الهيافة دى ؟؟؟؟ هو بيتكلم . مع شعب ...عاوز يتفطم؟؟؟ بيكلم ناس ساذجة ؟؟ بيكلم ناس هو واثق وعارف ومتأكد ان اتعمل لهم غسيل مخ على مدار سنوات ...(( هو لخص الشعب كله ف شوية الحثالة اللى بيلحسوا احذية بعض رجال السلطة كما كان يحدث ..على ايامه..اللى كانت بداية واسباب النكسة )).. يدارى ...خيبة ..ووصمة عار ...ويحاول يجمل نفسه شوية ويزيح الخيبة عن كاهله...ده لو كان فعلا حاسس بفداحة اللى حصل على ايامه ..بس يظهر ان فيه ناس بتعيش وتموت من غير ما تحس فعلا ...,لا تتوب ... دلوقت بيكتب مذكراته؟؟ ..عملا بالمثل اللى بيقول ..(( لاتعايرنى ولا اعايرك ده الهم طايلنى وطايلك )) هذه المذكرات....ممكن ان ترى الظلام..لكنها لن ترى النور ابداااا. هذه الخزعبلات ..يمليها كهل (( يأست منه الحياة ..ولم يياس هو منها )).. وعلى الجيل الجديد ....جيل ...(( اسعده الحظ وعاش الحقيقة ...وتابع ما حدث .مثلا...( ويكيلكس ) ...وعرف ان الحق يظهر دائما موثقااا )).. ان يحكم على الأشياء بطريقة منطقية ...ويضع العقل مكان العاطفة ويحكم بحياد تام .. بعيد عن اى اهواء شخصية .. كفانا تدمير لكل الرموز .. الخطأ السياسى لايبرر التشويه الانسانى ... صباح الصدق... :clappingrose:

:protest: يعنى حضراتكم مقتنعين بأننا ( الشعب ) عالم لئيمة وزى القطط نأكل وننكر وان الحكومة المصرية مضبطانا فى كل مكان واننا وكما قلت لأننا لئام الطبع لإننا ننكر لها محاسنها العظيمة ونتذكر مثالبها .... طيب ان شاء الله بامارة ايه ؟ استاذ محمد بيقول ما معناه ليس فى الإمكان الإبداع اكثر مما كان طيب هو ايه اصلا الإحتياطات اللى اتاخدت علشان تحمى الأسكندرية من اللى حصل محافظ همه منع الشيشة وسايب البلد مزبله زى محافظ النافورات اللى كان عندنا الأخ ماهر الجندى وهو اصلا فيه فى مصر احتياطات ولا خطط لأى حاجه ولا احا ماشين بنظام البركة فى كل حاجه ما تصلوا بينا على النبى يا جماعه حكومة ايه ؟ شى الله يا حكومة

المؤكد أن الجميع إستغرب من عنوان هذا الموضوع و أرجح أن أقل القليل من رواد محاورات المصريين من سمع هذا الإسم من قبل. ما سبق كان إستهلالا لابد منه أدعو الفاضل psychologyteacher أن يقوم بإثراء هذا الموضوع و أن يقوم بتعريفنا بتلك القرية الواقعة فى حضن الجبل ... أعرف هذه القرية فزوج أختى من هذه القرية و كلمنى زوج أختى كثيرا عنها و كذا أختى أزعم أنها قرية تمثل غاية الرقى رغم تواضع الإمكانيات أقصد إمكانيات القرية العلاقة الإنسانية فى تلك القرية بين المسلمين و المسيحيين مثلا يحتذى أو هكذا ذكر لى زوج أختى.

وبدء مسلسل لوي الدراع السخيف .... عارف إن الكلام ده ممكن يزعل المسيحيين .. لكن ... هناك أمور لابد أن نزنها بالعقل .. يعني الاف من الغوغاء بيتظاهروا ويكسروا .. يبقى ده هبل ... في حين كان ممكن يحصل ده من وفد مكون من عقلاء الكنسية ويتوجهوا للمحافظة أو للجهة اللي اصدر قرار إيقاف البناء بالرغم من إني مش عارف خلفيات الموضوع إيه لكن لو سيبنا الموضوع للغوغاء والثورجية . يبقى النتيجة هاتيجي على دماغهم هم هما دلوقت بيعملوا كده لوي دراع للدولة عشان ظروف الإنتخابات وفاكرين إن الامن مشغول بها .. لكن إحنا لنا الظاهر ... الظاهر بيقول إن البابا شنودة أصدر امر باباوي بمنع أي تجمهر او تظاهر في اماكن العبادة المسيحية .. وبالتالي اللي حصل النهاردة ده يُعتبر مخالفاً لقراره ... يبقى المتظاهرين يستاهلوا اللي يجرا لهم خصوصاً لو تزامن هذا مع عنف وتكسير سيارات وتخريب ... وأظن كاميرات التليفزيون هاتذيع وتورينا ده كله

مش اتفقنا ان الاختبارات تبقى بالليل ؟ طيب اول حاجه الاختبار ده مش ياباني خالص ,, بس هو جريا على الموضه اللي جرت في الايام الاخيره وتلاقي ان الموقع عربي 100 % - طيب ايه علاقت الياباني :happy: الاختبار اجراه عالم النفس ا لياباني الشهير - كاتا ميتو ياما تاني - وهو بعنوان كيف تستطيع ان تعرف انك وقعت في الحب وقد تم اجراءه على عينه كبيره مكونه من 17 فرد تقريبا لم يستطع اي منهم ان يتم الاختبار من كتر ماهو صعب الطريقه سهله جدا ,,اذا اجبت بنعم لا تضع اي نقطه واذا اجبت ب لا ,, ايضا لاتضع اي نقطه لانه تحت شارح كل اختيار من اختياراتك لكل سؤال بشكل منفصل :happy: معلش طولت عليكم ,, اسيبكم مع الاختبار من خلال الاسئلة التالية يمكنك التمييز بين الحب الحقيقي أو الوهم بالحب لا تجب بنعم إلا إذا كنت واثقاً من إجابتك، أما إذا ساورك الشك فأجب لا. 1 - هل حدثت هذه المشاعر فجأة؟ نعم لا 2 - هل تشعر بالغيرة الشديدة والغيظ إذا حاول شخص آخر التقرب إليها أو (إليه)؟ نعم لا 3 - عندما لا تكونان معاً، هل تظل تفكر فيه وتعطل كل أعمالك أو دروسك؟ نعم لا 4 - هل تشعر بالحب عندما تكونان معاً أكثر مما تكون بمفردك؟ (فكر جيداً) نعم لا 5 - هل تشعر أنه أو (إنها) أكمل إنسان في الوجود؟ نعم لا 6 - هل تشعر بالتعاسة - بصفة عامة - وأنت مع أسرتك؟ نعم لا 7 - هل تعرف رأيه بصراحة بالنسبة لموضوعات حيوية مثل: المال، الأطفال، تحمل المسئولية، العمل؟ نعم لا 8 - هل تجد أنك تتوق دائماً إلى الظهور في أفضل صورة أمامه؟ نعم لا 9 - هل يشترك كل منكما في الشكوى من عدد كبير من المتاعب المشتركة في المنزل، أو من الأبوين أو من أي شئ آخر في حياتكما؟ نعم لا 10 - هل تطلع أصدقائك على رسائلها عبر النت أو في الموبايل؟ نعم لا الإجابة 1. إن الحب الحقيقي لا يحدث فجأة، و لكننا عندما نقابل شخصاً يتكلم أو يتصرف بالطريقة التي نتخيلها فإننا نعجب به، أما الحب فيحتاج الى الوقت. 2. الغيرة ليست دليلاً على الحب ومن الممكن ان يكون الشخص شديد الغيرة حتى لو لم يكن يحب مطلقاً، فالغيرة هي غريزة الطمع وحب التملك، ولكن الاهتمام والحرص على مشاعر الحبيب هو الدليل على الحب. 3. الحب مشاعر إيجابية وترتبط بها باقي تصرفات المحب، لذلك السرحان والإهمال في العمل أو في استذكار الدروس لا يدل على الحب، ولكن مادمنا نحب فالدليل هو أن ننجح ونتقدم وليس العكس. 4. إن الحب لا يقل عندما تكون بعيداً عنه، ولكن إذا شعرت ببعض الشكوك وأنت بعيداً عنه ولكنها تزول عندما تقابله وتنسى كل شكوكك، فهذا دليل على أن تأثيره عليك قوي وأنه يمسك ذمام الأمور بيده هو، وهذا أكبر دليل على أن المشاعر سطحية لا ترقى أبداً إلى الحب. 5. إن الحب ليس أعمى كما يقول الناس، ولكن الشخص الذي يحب، يعرف ويفهم عيوب الآخر ومع ذلك فهو يحبه بعمق، أما الشخص المنوم مغناطيسياً فهو لا يرى أي عيب وقد يحسبها مزايا. 6. عندما تكون تعيساً في حياتك العائلية أو بصفة عامة فإن ذلك يصور لك أنك وقعت في الحب، فكل اهتمامك يكون منصباً في شخص ينقذك من معاناتك، وبأنك ستهرب من كل ذلك بالحب. 7. إن الحب لا يجب أن يظل شاعرياً دائماً بل يجب أن يكون واقعياً أيضاً، لذلك فيجب ألا يشغلك الحب عن معرفة رأي حبيبك في هذه الموضوعات الحيوية. 8. لا يضر عندما يراك في أفضل صورة، ولكن هل أنت على هذه الصورة الأفضل في كل دقيقة في حياتك؟ وهل تشعر أنه سيصدم لو رآك على حقيقتك عندما تستيقظ من نومك؟ 9. المشاركة في البؤس والمتاعب لا تعني الحب، فكثيراً من الشباب عندما يجد زميلة تشاركه نفس ظروفه يظن أن هذه الظروف قد جمعتهما وأنهما خير لهما أن يرتبطا سوياً لاشتراكهما في نفس المصاعب، ولكن هذا بالطبع ليس حباً ولكنه قد يكون إحساس بالراحة لوجود شخص آخر مثلنا. 10. إن الحب رابطة خاصة بين اثنين، وهو لا يمكن أن يكون حباً إذا سمح أحد الطرفين باطلاع حتى أصدقائه على رسائله أو تفاصيل علاقته بعد أن اطمأن إلى أن الحبيب سيحترم هذه الخصوصية. إذا وجدت أن أفكارك قد اهتزت بعض الشئ بعد أن عرفت كل هذا عن الحب الحقيقي، فالوقت مازال أمامك لكي تراجع نفسك قبل اتخاذ قرار قد تندم عليه كل العمر.

محظوظة انت يا شهرزاد فلك من الفرسان فارسك المغوار يعذب لبعاد حبيبته ويصبح بلا عنوان فليعطى نساء العالم صبرا فغيرتهم تلتهم كالنيران تفوقتى عليهن جميعا يا اميرته ومعذبته لانه شهريار وقد وصفك بادق واعذب المعانى يا شهد الجنة وحب الرومان وشذا الريحان كم انت محظوظة يا شهرزاد فليعطى نساء العالم صبرا شهرزاد

تسرعتى كثيرا يا شهرزاد الساكنة بقلب مغتربة الصقتى به الكثير من الم الصفات فهو عليك يخاف كطفل صغير كمن يتبع امه فى الخطوات يتبع خطاك فى شوق حب ولهف هو ليس بمغرور ولا يعرف الزيف له كلمات اعطيه واهديه من كلماتك واحلامك كما تهدى الاغاني للعشاق فصوتك يقويه لانك ملهمته الم تسمعيه ينادىكي يا اميرتى يا شهرزادى تمهلى قليلا فقد تاتى ليلة - بها تسترقي الهمسات ولا تصبح ذكريات شهرزاد

ربنا مايجيب خناق احنا اخوات هنا وبنتفاهم بس حضرتك نسيت كام حاجة فى النقط اولا خبرة المرافق لو الوظيفة بتاعت المين ابليكانت مطلوبة دى عليها بوينت لو الوظيفة بتاعت المرافق مطلوبة دى عليها بوينت شهاة التجنيد لو المين ابليكانت اعفاء من الجيش عليها بوينت(غير صحيح) لو ليك قريب من الدرجة الاولى عليها بوينت كل النقط دى ممكن تعدى بلد دا اللى انا اقصدة الحاجت اللى مستخبية دى كل الناس بتتكلم عن البوينت الواضحة بس دول مش واضحين للكل ياريت افادة اكتر للى يعرف وشكرا هانى طبعا اول شىء انا اسف جدا للاخ هانى يعقوب على اى كلمة طلعت منى و كانت سبب فى مشكلة عن غير قصد و انا على فكرة يا اخ هانى بعتلك رسالة اعتذار على الخاص و ارجو انك تقبلها منى اما النقطة الثانية اللى عايز اسال بخصوصها تادية الخدمة العسكرية عليها نقاط ولا لا و يا ترى ممكن فى المقابلة المستشار يسالنى على فترة التجنيد ولا لا

السلام عليكم ورحمة الله وبركاته موقع به ركن تسجل فيه إذا كنت محفظا وآخر إذا كنت تريد محفظا أو ومحفظة بجوار بيتك أينما كنت هلموا يا أهل القرءان

عمال اقرا كلام سى السيد وردود الاعضاء عليه مش عارف ليه جه فى بالى حمدى قنديل وبيقولنا..عاشت اسرائيل وطظ فيكم.. مش عارف اقول ايه تانى..انا قعدت تقريبا 3 ايام الكهربة مقطوعه عننا فى موجه المطر اللى فاتت..وتليفونات بردوا عطلت..وبمناسبه الغاز بردوا رحنا نملى انابيب الغاز سبناهم فى المستودع تقريبا 10 ايام وكانوا انبوبتين ادونا واحده وقالونا التانيه لما يجيلنا تانى..فين بئا الناس اللى هرتنا كلام عن ان اسرائيل عدوتنا ولازم اى مصرى من اللى بيشتغلوا فيها نعتبره خاين ونرفع عنه الجنسيه..طيب ده اذا كان الحكومه المحترمه بتاعتنا بتدى دعم للصناعه وللمواطن الاسرائيلى.. ولا يمكن دى سياسه ياجدعان احنا منفهمش فيها. او ممكن خطة طويلة الاجل للقضاء على اسرائيل..تكون مثلا الحكومة بتاعتنا بتقول نديهم غاز يشتغلوا بيه يمكن يولعوا بغاز..او يجيلهم كحه من دخان مصانعه ويموتوا بالكحه الصدرية. يارب يطلع كلام جرايد.. مش عارف

محدش بيقول انك غلطانة فى شكرك للحكومة السعودية واحنا بنشكرها معاك على الخدمات الجليلة اللى بتقدمها للحجيج لكن معلومة بسيطة احب اقول لك وليعذرنى الاخوة السعوديين الذين لو اتحيت لهم فرصة التعبير زينا حتسمعى اللى يوجع قلبك يعنى حالهم من حالنا غير ان وضعهم الاقتصادى افضل بكتير عن مصر ويمكن ده الظاهر للكثيرين ان الحياة بمبى هناك اما بخصوص الاتصال بالاسعاف بالموبايل فحجتهم ورود كثير من البلاغات الكاذبة اليهم ودى حجة واهية طبعا لان مش حيقف واحد على الصحراوى عشان يعاكس واكيد مافيش ارضى فى الصحراوى الكارثة ان الاسعاف بتتفق مع مستشفيات خاصة بعينها تنقل لها المصابين بدلا من العامة وكل واحد ونصيبه بقى بخصوص تكريم قدامى المحاربين انا حاسة ان والدك زعلان على اصابته اللى راحت على الفاضى والبلد رجعت للعدو ببلاش غاز ببلاش وشركات خصخصة بملاليم وعايشين فى سينا ميت فل وعشرة كان لزمتها ايه من الاول دماء شهدائنا اللى راحت هدر لما فى اخرتها طاطينا وبناخد على قفانا

تعجبت حينما لم أر لولا وتعجبت أكثر لما قرأت الجملة دي ارحل وفى حقائبى الذكريات !! "انتهى" وكمان الأستاذ الفاضل : أحمد سيف ممكن حد يطمنا عليهم يارب يكونوا في صحة جيدة وفي أحسن حال ونراهم على خير

تعرف يا استاذ اسد انا ابى كان من المحاربين القدماء ...مصاب فى 67 و 73 وحاليا معاش لكبر السن ايام ما كان المعاش بملاليم كل 6 اكتوبر من كل عام بيكون يوم نكد علينا عارف ليه؟؟؟لان اخواتى ال تولدوا بسنين بعد الحرب بيدخلوا عليه ال اتصرفلوا علاوه وال واخد هديه بمناسبه 6 اكتوبر وهو خد ايه؟؟؟؟!!!لما الضباط الصغيرين ال ما يعرفوش يعنى ايه حرب يتقدروا على شىء لا يفقهوا فيه قولا ولا فعلا وال حياته كادت ان تنتهى ورجع من الحرب ماشيا على قدميه تاركا طفل لم يتعدى عمره سنه؟؟!!!بياخد ولا حاجه..شهاده تقدير من السادات الله يرحمه..ماعملهاش ال حارب بنفسه معاهم .. .يبقى براحه..براحه على ايه؟؟؟ طبعا عذرا للخروج عن صميم الموضوع ولكن كلمه براحه فكرتنى بدموع ابى الغالى من كل عام فى هذا اليوم.. مع احترامى لوالد حضرتك انا والدى الله يرحمه من الناس اللى حاربوا فى 73 وقعد فى الجيش ست سنين شاف فيهم اللى محد شافه ومكنش منتظر حاجه من مصر ولا عمرى سمعته فى يوم بيسب على مصر ولا زعلان منها ولا عمره قال انه ادى ومخدش بالعكس كان يقعد يحكى لينا على الحرب وازاى كانوا بيعشوا فى الظروف الصعبه دى اسف يا باشمهندسه منطق غريب لا اقبله عندما احارب دفاعاً عن بلدى احارب بدون مقابل وبدون انتظار المقابل ياريت لو فهمت كلام حضرتك غلط تصححى ليا تحياتى

ابعتلي يا فيتو معاد الارسال وفتح الملف وانا هنزلك معاهم يلا بسرعة شكرا ياهاني بس ورد مش كفاية دي لستة سحرية اقل من هدية دهب مش هقبل

لي طلب بسيط من اساتذتي الكرام ,, لما تيجي حضرتك تتكلم عن المسلمين ماتقولش الاسلام قال كذا ,, قول انا رأي كذا ,, او الفكر الفلاني اللي انا انتمي اليه رأيه كذا ,, انما ماتقولش رأي الاسلام كذا ,, لان ماحدش فينا يقدر يدعي انه بيتكلم باسم الاسلام ,,

السلام عليكم و رحمة الله و بركاته طبعا انا كنت داخلة التوبيك دوت و انا لابسة اللكلوك في رجلي....و في ايدي كوباية السحلب اللي مليانة مكسرات و لسه هشعر بقي في الشتا و ايام الشتا....و هنزل باغنية اليسا...(كنا في اواخر الشتا بيلطعني بالساعة ع المحطة و كده يعني) لقيت الجدعان و الجودعانت...كفوا ووفوا....و حسسوني ان احنا قاعدين حوالين الدفاية و هناكل حرنكش....(مين ده...وش حد مبيعرفشي يقزقز لب....و بيبلعه بقشره) طب انا بقول يا دريمي....انتي برضه تشيلي الزعبوط الشتوي الفزيع اللي انتي لابساه....ما هو مش منكن تكرهي الشتا كل ده....وسط جمعية محبة الشتاء :P مقدرشي افتي في موضوع الاكتئاب خالص....و ان كنت قريت انه فعلا ممكن بيرتبط بتغيير الفصول ع جنب بقي دامو يا ضنايا....احنا مبنتكلمشي عن الشتا بتاعكم بوتاتا.... يا امي....انتوا الدنيا هونيك ابيض...في ابيض في ابيض..... يعني الناس تصحي الصبح تحس انها قاعدة في الفريزر....تروح الشغل لابسين زلاجات...تسلم علي بعضها تحس انها كانت بتدخن سجاير كليوباترا....انتو حالة تانية خالص مساااكم الشتا اللي بيدق ع البيبان....و بيصحي دفا حاجات تانية كتير كان معكم لماضة ابو العافية مراسل قطاع البرورة يا رب نفسي البس هاي كول.....طب بوت....طب قطوط....يااااااه وحشني احساس انك لابس الدولاب

السلام عليكم ورحمة الله وبركاته جاءني إيميل أعجبني وحبيت أشارككم فيه .... ويدور حول سؤال إذا أختلف الخيال عن الواقع من سيكسب؟

الف مبروك يا كريم كنت بتفكر انك تاجل و اديك اهو عديت الحمد للة ان اخرها كان مسك على فكرة يا كيمو انا امبارح و النهاردة كنت بادعيلك فى الصلاة و الحمد للة ربنا استجاب بكدة نبدا فى الاعداد لدفعة 2011 ربنا يوفقهم جميعا

ياسي السيد سيدي الحكومة هتقولك مصر مش بتبيع غاز لاسرائيل وده حقيقه النكتة الظريفة ان الحكومة باعت كمية كبيرة من حقوق امتياز للغاز لشركة غازشرق المتوسط وكما اعلم هي بتاعت حبيب قلبي وحبيب قلب الراجل الكبير حسين سالم وياريت تبقوا تعملوا سيرش وتعرفوا مين حسين سالم قوم حسين سالم باع الغاز لشركات اسرائيلية قوم ايه يبقى الحكومة مالهاش دعوة مستثمر وبيبيع سلعه بس طبعا ع اساس اننا مغفلين وان الحكومة كانت بايعه الغاز بسعر كويس عموما انا مش شايف الخبر فيه شيئ مستفز عادي يعني بكملة لما حاولنا نقدم مساعده لحرائق حيفا وسيبنا 1200 مصري بيتسلى فيهم اسماك القرش واسكندرية بتغرق ف هذه الموجه البارده عموما اه اسرائيل وعيالها فوقنا كلنا واللي مش عاجبه يشرب من النيل قبل ما يتمنع عننا لان طبعا انفصال الجنوب هياثر جدا علينا هنيئا لكم يا ابناء اسرائيل بجارة حنينة زي مصر

ايوه شوفى بقى الشتا اجمل من الصيف - الصيف حر جدا وبرضوه مش باقدر اخرج كتير بسبب الرطوبة لكن الشتا عندنا فى الكويت هو داه - الجو البديع والدنيا ربيع اعتقد اغلب الناس اللى فى الخليج بيحبو الشتا والخليجين نفسهم كمان الاكتئاب فى الشتا عندى مش عاوزة اقول انى بحب جو الامطار والسقعة والحاجات دى بصراحة بتعجبنى اوى اوى لكن عاوزة اقول ان الشتا بالنسبالى هادي ومفيش دوششششة والناس بتنام بدرى يعنى السهر جنب الدافيه والهدوء اجمل بالنسبالى متعة حقيقي - يمكن اكون عكس الناس بس مش عارفة انا طبعى احب البرد والتكتكة - انا يجينى اكتئاب لو فيه رطوبة وحر شكرا يا دريم موضوعك جميل اوى

ما اهو احنا دايما بنهرب من التحدي الحقيقي ده و نستنفد كل طاقاتنا في محاولات مستميتة لتغيير الآخرين و نتجاهل أمر الله عز وجل {لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللّهِ إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ وَإِذَا أَرَادَ اللّهُ بِقَوْمٍ سُوءاً فَلاَ مَرَدَّ لَهُ وَمَا لَهُم مِّن دُونِهِ مِن وَالٍ }الرعد11

http://www.youtube.com/watch?v=iTBwW7GKx_8&NR=1

أيام الدراسة .. بانام بالكتير الساعة 12 .. ده لما أقول سهرت جامد وأصحى من النوم الساعة الخامسة والنصف علشان أودي ابني المدرسة .. ومش بانام بالنهار .. يوم الخميس .. مفيش مدارس .. باصحى الساعة السابعة .. وممكن أسهر ليلة الحمعة جامد .. يعني للساعة واحدة كده تقريباً .. وباصحى الجمعة الساعة التاسعة تقريباً .. أعتبر نفسي إني عوضت حرمان النوم بتاع الاسبوع كله في الاجازات .. مش باسهر كتير .. يعني أعتقد إن أكثر يوم ممكن أسهر فيه لما يكون فيه ظروف .. ممكن يكون الساعة الثانية .. باصحى في الاجازات غالباً مابين الثامنة إلى التاسعة مش بعد كده في العادة أنام قليل .. لكني أحب الحياة في النهار أكطثر أيام الشباب .. كنت باسهر جامد الحقيقة .. لكني أعتبر نفسي على مدار حياتي .. أنام بالليل ,,, وأصحى بالنهار .. يعني أنا كائن .. نهاري ...

بعض الناس لا يستطيع السهر ,, والاخر لا ينام الا بضع ساعات لا تتخط اصابع اليد الواحده ,, دي قدرات وامكانيات بشريه تختلف من شخص لآخر ,, ايام التسليم بفضل 3 ايام متواصلين مرزوع ادام الجهاز من غير ما احس باي تعب ,, وتتوالى الشيفتات عليا وانا والله احس بالساعات تمر كالدقائق من الاستغراق في التفكير ,, ولو كان هذا منافيا لطبيعة البشر او ان اللي بيسهروا عندهم هس هس في نافوخهم :happy: كان الدين لم يمدح قيام الليل والعين التي باتت تحرس في سبيل الله ,, مش بقول اني زي المجاهدين والقائمين خالص ,, بس بقول ان الموضوع نسبي ويتنوع بين الناس كل حسب قدراته ,,

بداية أرى أن السهر ليس مضادا للفطرة فلو كل الناس نامت بالليل مين اللي حيسهر يحرس الأمن زي الشرطة مثلا او حراس الأمن أو حرس الحدود أو الأطباء في الطوارئ و الممرضات أو من يعملون في المطارات و غيرها من المهن التي لا بد أن تتم ممارستها ليلا ربنا سبحانه و تعالى خلق الناس و جعل كل ميسر لما خلق له ده كان استهلالا لابد منه عن نفسي و بحكم نشأتي في المملكة فالحياة هنا تبدأ من بعد صلاة العصر حيث يعتدل الجو و تنخفض درجة الحرارة فلا يوجد في الشارع الا من لديهم دوام في المدارس كمعلمين و طلبة أو الموظفين فطبيعي اننا في الاجازات نسهر للفجر و احيانا لبعد الفجر كمان بس حياتي انتظمت لما رحت الجامعة في مصر لأن طبعا الحياة في مصر صباحا رائعة سواء في القاهرة او الاسكندرية و طبعا لأني اشتغلت في التدريس فطبيعة حياتي أخدت شكل النوم بدري و الاستيقاظ بدري بس طبعا مع و جود بيبي فالأم طبعا بتبقى تحت أمر البيبي و اوقات نومه و صحيانه فلما تكون المودموازيل سلافة صاحية بالليل تلاقوني موجودة هنا و لما ربنا يهديها و تنام فبنام معاها المرهق بقى بجد اني عندي اطفال في المدرسة دوام عادي من الصبح للساعة 1 ظهرا و عندي في الحضانة بيرجعوا 11 ص و طبعا باصحى معاهم من 5 إلى 7 صباحا ده غير سلفلف باشا و مواعيدها اللي حسب التساهيل ده غير ان شغلي دوام مسائي علشان اقعد بالبنت الصبح فمحدش يسألني انا بانام امتى

وانا من موقعي هنا وعلى هذا المنبر اعلن عن شكوكي في بتوع الكويت التي تكاد تصل الى حد اليقين لان خط الانتاج قد توقف بغياب الرفيق لماضة .. والجناح الاعلامي لحركة مغتربي السعودية اصيب في مقتل وهنا نهيب بالقائد الاعلى الزعيم المفدى ابو الاسيان ادام الله ظله بان يعطينا الضوء الاخضر في التحقيق معهم .. لا سيما وان العزيز اوزاوز متشوق لممارسة بعض هواياته القديمة حتى يتم اعترافهم عن بكرة ابيهم الحقنا يا كبييييير

مغتربة .... شكرا جزيلا لأنك طمنتينا على لماضة أكرم .... شكرا جزيلا لأنك طمنتنا على نايت مير هدف أساسي من الموضوع كان للاطمئنان على أختنا لماضة و أخونا نايت مير .. و كمان كان هدفي نتشارك مع بعض في فكرة إزاي نحافظ على بعض في هذا البيت الافتراضي يعني إننا يكون عندنا متابعة على قدر الإمكان لتواجد الأعضاء و السؤال عنهم في حال عدم تواجدهم ... أكيد كل واحد له حد مقرب منه أو أنتيمه يعني أو العلاقة أصبحت في مرحلة تالية على الواقع زي ما مغتربة طلبت لماضة في الاستخبس كدة و اطمنت عليها ... وزي ما أكرم بيطمن على نايت مير ... وزي كمان ما اخوانا في الكويت بيتقابلوا وشغالين شوي و فسيخ ماشاء الله عليهم ... و زي ما أخونا الغالي الغريب فتح توبيك عن افتقاده لنايت مير .. و مش هو لوحده .. المنتدى هنا في روح عالية من الإخوة و الشخصيات المحترمة و فيه مزايا كتيرة أعتقد كتير مننا وصل لمرحلة إدمان لهذا المكان ... عشان كدة لما يكون فيه حد له مكانة و احترام في قلوب الكثير ممكن يكون مشغول عن المشاركة أو لا قدر الله عنده ظروف و يمكن سؤالنا عليه يفرق معاه دا غير إننا نتطمن عليه ... طبعا الواحد المفروض بيحاول الأول على الخاص بس لما يلاقي مفيش رد هيعمل إيه ... أكيد كل واحد هنا في ناس هو فاكرهم و نفسه يطمن عليهم ... وممكن يكون ما بيردوش ع الخاص لكن لما يسأل سؤال عام يتحط على مجلة الحائط أكيد هتظهر أخبار عنه تطمنه عليه مش ده بيت العيلة ؟؟ ... يبئى في رأيي كبير أو كبارات العيلة لازم يحافظوا على العيلة دي نفر نفر ويسألوا على اللي غايب .. مش هم اللي بيفتحوا الباب و يرحبوا بأي وافد .. يئى لازم برده يكونوا على الباب ويسلموا على أي واحد قرر إنه ماشي ... و كمان لو اختلف اتنين اخوات ده دور الكبار برده و في الحالة دي ده مش تطوع ده واجب ... لأن الكبير كبير .. دي رأيي ياريت يكون فيه فكرة جديدة زي ما اخترعوا فكرة Time Online ليه ميكونش فيه فكرة Time Offline من تاريخ آخر مشاركة مثلا :unsure: تحياتي للجميع

الفاضله / المهندسه حضرتك تتكلمين عن حكومه.. او نظام دوله.. وانا من الذين اقاموا فى المملكه.. فتره واعرف نُظمها. لكننى سوف احدث حضرتك : عن سلوك فرد اوربي.. كونى اُعول على الشعوب قبل الحكومات حالت التردى الذى نحن به.. كنا فى اليونان.. واردنا ان نشترى مكرونه من السوبر ماركت.. دخلنا احضرت لنا صاحبة المحل اكياس المكرونه.. ونوعان من الصلصه.. واخبرتنا ان احدهم قد زاد سعره بما يوازى خمسه قروش.. وانهم مقاطعين له.. ولنا حريه الاختيار.. هل رآيت الوعى الذى عند البائع.. والذى يبثه الى المستهلك هو عليه ان يوفر كل المعروض فى الاسواق من السلع.. وانت عليك الاختيار او المقاطعه.. وعى بالغ وليس كما يحدث فى بلدنا.. الممنوع مرغوب.. بل ونزايد على بعض حتى تحصل ( الانا ) عليه.؟ اخر زياره لى الى المملكه كانت فى 26 رمضان. وحتى الان الخط السعودى يعمل معى.. ويرسل لى يوميا مواعيد الصلاه وبعض الادعيه.. ومجانا.. لكننى ايضا لم اشترى سلعه واحده فى المملكه من مكانين بنفس السعر؟..شكرا لحضرتك : على اثارتك الموضوع.. عل تنابلتنا يتعلموا.؟ دام لك الفرح

هذه القائمه التى طلبتها منى استاذ محمد لافكار الاحتفال بعيد ميلاد المنتدى ارجو الا اكون تاخرت فى انزالها جمعت فيها مقترحات الاعضاء التى وصلتنى حتى الان و مقترحاتى انا لونتها باللون الاحمر ان كان هناك اى شيىء غير واضح او غامض استفسر عنه و ان شاء الله اوضحه 1- عقد اجتماعات للاعضاء على ارض الواقع سواء اجتماع واحد فى مصر او عده اجتماعات فى عدد من البلدان 2- تحديد ميعاد لاجتماع الاعضاء جميعا فى غرفه الشات مع مراعاه ان يلائم التوقيت معظم الاعضاء على اختلاف الدول التى يتواجدوا فيها 3- لوجو سريع موحد يرفعه جميع المشتركين ...بدل الصورة الرمزية للاعضاء 4- موسيقى احتفالية .....عند تشغيل الصفحة سواء عند فتح المنتدى نفسه او موضوع التهنئه و عن نفسى اقترح تشغيل اغنيه we are family ل sister sledge 5- فتح اوتجراف للتوقيع بمناسبة الاحتفالية . 6- ان يقوم كل الاعضاء برفع صورهم الشخصيه بدلا من صورهم الرمزيه 7-عمل فيلم وثائقى عن المنتدى 8- ان تستمر الاجواء الاحتفاليه فى المنتدى عشره ايام على عدد سنوات عمره 9- فتح اوتوغراف تهنيئه فى باب الزوار بحيث ان حتى من هو ليس عضو يقدر ان يهنىء المحاورات 10- عمل لوجو مخصوص للاحتفال يستمر رفعه على المنتدى لمدى عشره ايام 11- ان يرسل المنتدى رسائل لجميع الاعضاء لدعوتهم للشاركه فى الاحتفالات 12- عمل موضوع خاص بان يتحدث الاعضاء عن علاقتهم بالمنتدى و اثره و خواطرهم عنه و حوله 13- عمل استفتاء موجه للاعضاء حول افضل اكثر المشرفين تميزا من وجهه نظرهم يمتد طيله العشر ايام و اكثر مشرف يحصل على نتيجه فى الاستفتاء يحصل على وسام او ميداليه مصممه بهذا المعنى 14-تختار الاداره اسماء عشره اعضاء لعمل استفتاء للاعضاء حولهم ايضا يستمر عشره ايام و فى النهايه صاحب اعلى اختيار يحصل على وسام بمعنى العضو المميز 15 – استضافه استاذ عادل ابوزيد فى كرسى الاعترف طيله ايام الاحتفال ليجيب الاعضاء فى اسئلتهم عن المنتدى و نشاته 16 – تختار الاداره عدد من الاعضاء القدامى الذين رحلوا و تكرمهم بوسام لن ننساكم او لن ننسى مجهوداتكم 17 – عمل موضوع تجميع لصور لقاءات الاعضاء السابقه 18-عمل مسابقه للاعضاء باسئله متعلقه بالمنتدى مثل اسئله تتمركز حول قوانين المنتدى او اعضاءه طيله العشر ايام و الشخص الفائز فى النهايه هو الذى يجيب عن اكثر الاسئله قبل غيره بشكل صحيح و يمكن ان تكون جائزته بان يسمح له بالمشاركه فى الاشراف مثلا لمده يوم واحدبشكل شرفى 19- يقدم استاذ عادل كلمه فى المنتدى بمناسبه مرور عشر سنوات على خروجه للنور 20-رفع موضعات معينه تعتبر من كنوز المحاورات ليتسنى للاعضاء الجداد الاطلاع عليها 21- اختيار احد الاعضاء ليحصل على وسام العضو الشرفى للمنتدى تقديرا لمجهوداته و عن نفسى اتمنى ان يتم اختيار استاذ الافوكاتو رحمه الله و عمل موضوع عنه طيله ايام الاحتفال مع دعوه اسرته اذا امكن اتشهد معنا احتفالنا به 22- استحداث نظام نقاط مكافئات للاعضاء تمنح لهم نظير مدى فاعليه مشاركتهم فى الاجواء الاحتفاليه على ان تحدد نظام لاستبدالها بمميزات معينه على حسب المعدل التراكمى هذا ما لدى حتى الان و ان جدت فكره لدى او لدى احد الاعضاء ساعمل قائمه جديده محدثه بها و ارجو ايضا ان اسمع اراء الزملاء الافاضل فى اقتراحاتى تحياتى

إذا اردت أن تعيش سعيداً فلا تبالغ في تحليل كل شئ فإن المبالغه في التحليل تجعلك ترى الإشياء قبيحه. فإن الذين بالغوا في تحليل الالمــــاس وجدوا أصله فحماً. د / عمرو خالد

طيب يا ابو عمر وانا عارف انك راجل بجد وحقاني استحلفك بالله لو انعكس الوضع ودول كانوا اخوانك وجيرانك وعلى نفس قناعاتك الذهنيه كان حيبقى ده ردك ؟؟

متفقه مع المقال فى جوانب كثيره استضافه المونديال بالنسبه لقطر كان هدف و هو هدف كما انه له ايجابيات له سلبيات بالتاكيد و لكن واضح ان القياده فى قطر كانت على استعداد لفعل اى شيىء للفوز بالاستضافه مما يعنى انه فى نظرها مكاسبها سواء السياسه او ايا كانت ستفوق حجم التضحيات التى سيتوجب عليها تقديمها و بالتالى قبلت بتقديم هذه التضحيات بسهوله فالسماح بالخمور و الاستعانه بطفل اسرائيلى فى ملفها و السماح للمنتخب الاسرائيلى باللعب على ارضها فى حال تاهله هى امور ليست بمزاجها و انما هى تبعات للموافقه على التنظيم لكن لا اتفق مع الكاتب فى موضوع تكوين هيئه و الذى اقترحه ربما تاثرا بثقافه سائده فى بلده اولا لان الهيئه فى السعوديه تحظى بالموافقه الحكوميه لذا لا يوجد صدام معها فى عملها اما فى قطر لا اعتقد ابدا انها من الممكن انها توافق على قيام هيئه للتصدى لما هى سمحت به اساسا لذا فهو اقتراح غير واقعى من وجه نظرى كما ان مده المونديال هى شهر من الزمان لا اتوقع انها تستطيع ان تطمس الهويه الاسلاميه كما قال فانا ارى فى ذلك مبالغه الخمور مسموح بها فى دول خليجيه كثيره بدون مونديال كالامارات و البحرين و بالطبع انا لا اشجع على هذا لكن لا اعلم لما يوجه الكاتب سهام حديثه عن الهويه و التقاليد للبلاد التى تسمح بكل ما وعدت به قطر وبشكل مستمر على مدى سنوات و ليس مجرد شهر فى السنه تحفظاته له حق بها لكنه لم يعالجها بشكل صحيح هذه هى خلاصه ما استنبطه من مقاله تحياتى

موقع لتحميل كتاب + audio TCF& TEF http://www.langacademy.net/vb/showthread.php?11108-TEF-Test-d-Evaluation-de-Francais-Livre-de-l-eleve-and-TCF-250-activites

ترقبو نزول اللستة ونزول جدول الميشن قريبا علي منتدي المنتظرين فقط وحصريا انتظرونا

الموضوع ده امتداد لموضوع تاني عن افكار لاشياء بنشتريها عاده بس اتضح ان ممكن جدا نعملها في البيت وبتكاليف اقل .. وعشان ميكونش في لخبطه فالموضوع الاول هيخصص لطرق عمل الادوات والاحتياجات المنزلية المختلفة والموضوع ده للحاجات اللي ليها علاقه باي حاجه ممكن ينقال عليها أكل .. واترككم مع الوصفات الي شايفه كتير منها يستحق التجربة ... --------------

شوية نكت طازة ... مش خسارة فيكم دول الجزء الأول لأنهم كتير أسيبكم بقى مين اللى حرر المصريين؟ أكيد أكيد اللى قفل المروحه ----------------------------------- واحده بتسأل شيخ: هى عدة المطلقة إيه؟ قال لها N73 ----------------------------------- لو حسيت إن الدنيا ضلمه إذكر الله لو حسيت إنها لسه ضلمه قوم صلى ركعتين ولو حسيت إنها ضلمه ما تستغباش وقوم ولع النور ---------------------------- واحد بيعيط فى جنازة مراته سألوه: بتحبها؟ قال: لأ ... بس سمعت إن البكا بيعذب الميت --------------------------------- ثلاثة أندال بيتنافسوا مين أندل واحد فيهم لقيوا ست عجوزة ماشيه على عكاز - الأول: خد العكاز منها فوقعت - الثانى: خد العكاز وضربها بيه - الثالث: قعد يضحك سألوه: بتضحك ليه؟ قالهم: أصل الست اللى انتوا بتضربوها دى تبقى أمى -------------------------------- أهديك قول الشاعر: زحلقنى الصابون فى الطرقة – من كتر البعاد والفرقة ----------------------------- صعيدى دخل الجيش زميله بيسأله: إنت منين؟ قاله: أنا من دشنا، وانت كمان من دشنا؟ قاله: لأ راح ضربه بالنار وقال: تبقى من ديش العدو. ------------------------------------- الشباب الفافى بيشتروا اللبن إزاى؟ عمو ... بليز ممكن عصير بقر. ------------------------------------ مساطيل عاملين ندوة ثقافية كبرى بعنوان: " نجيب محفوظ ولا ما نجيبوش" ---------------------------------- سألوا مصرى: ليه المصريين بيحلفوا كثير؟ قال: طب والله العظيم دى إشاعه قسماً بالله ده افترى والمصحف ما صحيح وعهد الله ده ظلم وربنا احنا مش كده. ---------------------------------- مثقف ركب الطياره فقال للمضيفه This is no talking, student one tea from 1 clock بالمصرى: ده مش كلام أنا طالب واحد شاى من ساعه --------------------------------------- بشرى ساره لأعزائنا الطلبة والطالبات من فودافون لو اتزنقت فى سؤال ممكن تبعت رسالة غششنى شكراً فقط اطلب *868*برشام# ------------------------------------- عملوا مسابقه "مين اللى يقدر يقعد سنه ياكل نفس الأكله" الفرنساوى قال لهم هاتوا لى طن بطاطس اليابانى قال لهم هاتوا لى طن رز بلدياتنا قال لهم: هاتوا لى سيجاره وبعد سنه فتحوا الباب على الفرنساوى لقوه مات فتحوا الباب على اليابانى لقوه مات فتحوا الباب على بلدياتنا قال لهم هاه جبتوا الولاعه؟ -------------------------------------- واحده ساكنه عند محطة قطر كل ما يعدى القطر درفة الدولاب تقع فجابت النجار يشوف الدرفة دخل جوزها من بره وفتح الدولاب لقى الراجل قاعد فى الدولاب قاله: نهارك اسود، بتهبب ايه هنا؟ قاله: لو حلفت لك انى قاعد مستنى القطر هاتصدقنى --------------------------------------- لو عايز تروح القمر ومعاكش غير جنيه تعمل ايه؟ ؟ ؟ ؟ ؟ تعمل مصيبه توديك ورا الشمس ومن هناك تاخد توكتوك بجنيه للقمر ------------------------------------- مسطول عنده حسنة فوق عينه وقف قدام المرايا يقول ياربى عين دى ولا غين ------------------------------------------------ ظابط مسك عيل بيشم قاله هو الشمام الصغير اسمه ايه قاله كنتلوب ياباشا ------------------------- واحد بيسال شيخ لو شوفت اسد وانت بتصلى تكمل ؟ قاله لو فضلت على وضوئى اكمل واحد بلدياتي بعت لامه علبة كبريت قالتله مش شغالة قالها ازاي انا مجربهم واحد واحد ------------------------------------ جماعة بلدياتي قاعدين ف خيمة وعاوزين يولعوا عشان يطبخوا بعتوا واحد يجيب كبريت خرج من باب الخيمة ودخل من الباب اللي ورا قالهم عندكوا كبريت قالولوا اقعد بعتنا نجيب -------------------------- بلدياتي بيعاكس واحدة في التليفون قالتله شكلك صعيدي قالها ينعل ابو اظهار الرقم ديه -------------------------- صعيدي سال اجنبي انت مرتبك كام قاله 1000 دولار بدل معيشة دولار بدل سفر 1000 دولار بدل تغذية 1000 ....... دولار بدل 1000 قاله وانت قاله 200 جنيه وسكت الاجنبي قاله دا بدل اية الصعيدي قاله بدل ما امد ايدي عليك ------------------------------ بلدياتي كشف نظر جاب 6 علي 6 قال لصاحبه كنت هاجيب اكتر بس الدكتور وترني ------------------------------------ بخيل حبتين وعلي فراش الموت بيقول لولادوا: يا محمد قاله اناهنا يا بابا يا مني انا هنا يا بابا يا سعاد انا هنا يابابا امكوا فين يا ولاد اناهناياحاج قالهم لما انتوا كلكوا هنا سايبين نور الصالة والع ليه؟؟ -------------------------------- بلدياتي بخيل راح يزور امه ف المستشفي لقي الباب مكتوب عليه ادفع قال ربنا يقومك بالسلامة يا حاجة اجيلك لما ترجعي البيت ان شاء الله بالسلامة -------------------------------- واحد صعيدى حب يطور طيارة هليكوبتر شال المروحة وركب تكييف

<H3 class=ecxRTE align=center>اختبار الولاء في المخابرات </H3> نشرت مؤسسة الاستخبارات إعلانا في الجرائد تعلن فيه عن وجود وظيفة خالية لمخبر سري عالي المستوى. ‏بعد الانتهاء من جميع الاختبارات الاولية، رسى الاختيار على رجلين و امرأة، فتم استدعاؤهم للإختبار الحاسم و الأخير، الذي سيتقرر بموجبه تعيين واحد من الثلاثة في الوظيفة ‏جاؤوا بالرجل الأول و قالوا له: "‏سوف نمتحن ولاءك لنا ، ‏لقد قمنا باختطاف زوجتك و ربطناها بكرسي في داخل هذه الغرفة المغلقة. ‏نأمرك بالدخول عليها و قتلها الان. ‏معك دقيقة واحدة. و اعطوه مسدسا." ‏أجابهم الرجل: "‏هذا فظيع! ‏لن أستطيع أن أتابع معكم. ‏أنا منسحب." فجاؤوا بالرجل الثاني و قالوا له نفس الكلام. ‏فدخل الغرفة، و بعد عدة ثواني خرج باكيا و لم يستطع أن يقتل زوجته. ‏فقالوا له إن قلبه ضعيف و هو لا يصلح. ‏ فجاؤوا بالمرأة و قالوا لها أنهم خطفوا زوجها و أعطوها مسدسا و طلبوا منها أن تثبت ولاءها لهم بقتل زوجها. ‏فدخلت الغرفة، فسمع الحاضرون صوت صياح و ضرب و تكسير، و بعدها خرجت المرأة. ‏فقالوا لها، "‏ماذا حدث؟" ‏قالت، " ‏تبين أن المسدس ليس حقيقيا، فاضطررت لضربه بالكرسي ضربا مبرحا حتى مـــــات

السلام عليكم ورحمه الله وبركاته اهلا بيك يا اخ وليد اخوك مختار لسه راجع من دبى من شهرونص وعلى فكره كنت بشتغل فى بنك راس الخيمه راك بنك فى القروض الشخصيه فى دبى نفس الشغل اللى انت كنت فيه يعنى ان شاء الله اكتر واحد ممكن يفيدك بكل التفاصيل الممكنه وغير الممكنه هو العبد لله اولا انت هتنزل الاول دبى اللى فيها الفرع الرئيسى لاداره المبيعات ودى فى منطقه اسمها ابو هيل قريبه جدا من مطار دبى وعلى فكره اداره المبيعات اللى فيها شغلك ملهاش دعوه بالفروع وفندق اللوتس للشقق الفندقيه بينه وبين الشغل 3 دقايق مشى واللوتس هتتبسط جدا من الاقامه فيه لان هيبقى طكل اتنين فى شقه فندقيه كامله من كل حاجه وفيه فى الفندق حمام سباحه وجاكوزى وجيم يعنى عيش يومين حلوين قبل ماتدخل فى معمعه الشغل واللوتس بيقدم افطار فقط بوفيه مفتوح ان شاء الله لما تدور على سكن ابدا دور من بدرى ودور فى المنطقه اللى حواليك وجنب البيك هتلاقى معظم البنك ساكن فى بنايه كبيره جدا اسمها الختان وفى بنايه تانيه جنب اللونس على طول اسمها الزعفرانه طبعا ده فى حاله انك تكون فى دبى وغالبا نسبه كبيره بتكون فى دبى واقل شويه بيروحوا ابوظبى ومفيش حد بيروح راس الخيمه الشغل كله فى دبى وابو ظبى وبعد كده اثناء الشغل انت هتلاقى نفسك بتلف الامارات كلها اسعار السكن فى البايات دى الشيرنج ممكن الواحد تقريبا يعمل من 900 ل 1200 ممكن اكتر وممكن اقل لان قبل مانزل من شهر ونص الايجارات كانت بدات تنزل شويه انت بتقول انكم تلاته ممكن تاخدوا اوضه ماستر جوه شقه بحمامها يعنى تبعكم وتقريبا هتدفع نفس الرينج من 1000 ل 1200 وممكن اقل وممكن اكتر وطبعا موضوع الشارقه وعجمان ده انساه اطلاقا دلوقتى لان الشارقه وعجمان عايزين عربيه من الاخر وطبعا المشكله مش عدم وجود العربيه اد ماهى فى صعوبه الرخصه اللى بتصل تكلفتها فى دبى لحد 4000 درهم وصعبه جدا وفيه ناس بتاخدها من اول مره وفيه ناس بتسقط مرتين تلاته اربعه وكمان بالرغم ان الشارقه بينها وبين المنطقه اللى انت رايحها اللى هى ابو هيل مسافه صغيره جدا الا انها ممكن بالعربيه تاخده الصبح فى ساعتين وانت جاى لان معظم العاملين بدبى ساكنين بالشارقه وعجمان وشارع الوحيده اللى بيربط بينهم بيكون زحمه جدا وماتحاولش تسكن ابعد من كده لان شغلك ان واوت دور يعنى فى اوقات ممكن تعدى على البيت وانت عارف المواصلات مع الحر بهدله ميزه دبى عن باقى مدن الامارات والخليج انها متوفر فيها مواصلات كتير يعنى فيه خطوط باصات اتوبيسات يغنى لكل منطقه فى دبى ورخيصه حوالى من 2 ل 3 درهم حسب المسافه المقطوعه وبتركب الباص ومعاك بطاقه ممغنطه مشحونه رصيد من اى محطه او محطه مترو او مكنه فى الشارع تحطها على الجهاز يسجل دخول وانت نازل تحطها تانى عليه عشان يسحب المبلغ المقدر للمسافه برضه مترو دبى كويس جدا وبيحل ازمه وبيوديك فى اماكن بعيده زى شارع الشيخ زايد وجبل على وبر دبى وفيه الخط التانى بيتعمل هيزبط المسافات اكتر المواصلات للامارات التانيه متوفره وسهله يعنى باص للشارقه ب 5 درهم ولعجمان ب 7 درهم وراس الخيمه وابو ظبى والعين والفجيره ب 20 درهم لو على اختيار الشغل الافضل دبى لان دبى السكن فيها ارخص من ابو ظبى وفيه مواصلات اكتر من ابو ظبى ابو ظبى تاكسات بس وخطوط الباص قليله الامارات مافيهاش الا شركتين محمول شركه اتصالات بتبدى ب 050 وشركه دو 055 و 056 اسعار مكالمات اتصالات المحليه تقريبا 30 او 35 فلس للدقيقه بس فيها نظام حلو للدولى تشترك فيه يخلى سعر المكالمه الدولى 70 فلس من بعد الساعه 11 بليل للساعه 9 الصبح تقريبا والرساله الدولى ب 50 فلس والمحلى ب 25 فلس شبكه دو للمحمول اسعارها الملحيه بتتحاسب بالثانيه بس الدولى مش عارف بس اغلى من اتصالات سعر الخط اتصالات اشتريته من السوق الحره من مطار دبى اول مانزلت كان ب 75 درهم اللاب توب الجديد احسن هتلاقى ممكن اجهوع ايسر او اتش بى باسعار معقوله فى حدود 1600 ا و1800 درهم اشتراك النت انا كنت واخده ب 50 درهم يعنى هو واحد فى الشقه بيجيب النت وايرلس من اتصالات ب 250 درهم فى الشهر 8 جيجا ويوزعه على اللى عايز فى الشقه او اللى حواليها و فى حدود 50 درهم الاكل فيه حاجدتين اولا لو بتعرف تطبخ وليك فى الحوار ده ممكن يبقى اوفر طبعا لان المطاعم فى دبى مش رخيصه اوى يعنى لو بتجيب حاجات من كارفور او اى هايبر ماركت يبقى احسن وخصوصا لو انتم اصحاب مع بعض وبتجيبوا اكل سوا وتطبخوا طبعا هتوفروا بس هادى متوسط 500 للاكل اما لو بتاكل بره فطبعا اغلى من كده بس كل حاجه موجوده هناك وطبعا احسن من اللى فى مصر واوعى تعمل زيى كنت بشترى اكل هشان اطبخه وارجع بعد كده اكسل واروح اكل بره فالعمليه كانت بتخرم معايا معلش انا ماشفتش الموضوع غير النهارده على مالحقت ارد وان شاء الله ربنا يكرمك ويوفقك فى شغلك

يعني الغفير جه يسرقهم ولما معرفش قرر ينتقم بانه يلبسهم تهمة سجاير ...ممممم وبعدين :closedeyes:

السلام عليكم الاخوه الكرام جزاكم الله خيرا . عاجبك كده يا س س الحلقه الثالثه اهى النظام ما استحملش يومين اعتكاف من البابا مش عارف اقول ايه لكن ...تذكرت ...لعن الله قوم ضاع الحق بينهم . حسبى الله و نعم الوكيل http://www.ahram.org.eg/380/2010/12/13/25/52883.aspx#comments الأفراج عن 70 متهما بأحداث العمرانية القاهرة ـ من محمد عياد وسناء عبدالعاطي‏:‏ أمر المستشار الدكتور عبد المجيد محمود النائب العام اليوم بإخلاء سبيل 70 متهما من بين 154 متهما محبوسين احتياطيا على ذمة التحقيقات في أحداث الشغب التي جرت مؤخرا بمنطقة العمرانية في الجيزة. مراعاة لظروفهم الصحية والتعليمية، حيث تم إخطار قطاع مصلحة السجون بتنفيذ قرار الإفراج على الفور ، وكان النائب العام قد تلقى طلبا من عدد من المتهمين المحبوسين احتياطيا على ذمة التحقيقات في القضية، يلتمسون فيه الإفراج عنهم نظرا لظروفهم بعضهم الصحية والمرضية التي تتطلب إخلاء سبيلهم، وكون البعض منهم طلبة بالمدارس والجامعات. وفور تلقيه الطلب أمر النائب العام بتشكيل فريق من محققي النيابة العامة لبحث وفحص حالة جميع المتهمين، وبعد استعراض آخر ما توصلت إليه تحقيقات نيابة جنوب الجيزة الكلية في شأن المتهمين في تلك الأحداث، تقرر إخلاء سبيل 70 متهما من بين 154 متهما على ذمة التحقيقات التي لا تزال تباشرها النيابة العامة، حيث تبين من الفحص أن بعض المتهمين المخلى سبيلهم يعاني من إصابات، والبعض الاخر من المتقدمين في السن بالإضافة إلى عدد من طلبة المدارس والجامعات حرصا على مستقبلهم التعليمي. كما أمر النائب العام باستمرار دراسة موقف بقية المتهمين المحبوسين احتياطيا على ذمة التحقيقات للوقوف على طبيعة أوضاعهم الصحية والإنسانية، تمهيدا لعرض أمرهم عليه لاتخاذ القرار اللازم بشأنهم في ضوء التحقيقات الجارية في أحداث العمرانية . وكانت قد ترددت معلومات مؤخرا عن أعتكاف البابا شنوده بدير وادى النطرون أحتجاجا على عدم الأفراج عن المتهمين بأحداث العمرانية وهو ما لم تؤكده مصادر بالكنيسة . يذكر أن المتهمين في أحداث العمرانية قد تم تجديد حبسهم قبل نحو أسبوع لمدة 15 يوما على ذمة التحقيقات التي تتم معهم بمعرفة نيابة جنوب الجيزة الكلية بإشراف المستشار مجاهد علي مجاهد المحامي العام الأول لنيابة، بشان وقائع تعديهم على رجال الأمن ورشقهم بالحجارة وزجاجات المولوتوف الحارق وتحطيم واجهات عددا من المباني وحيازة أسلحة بيضاء بدون ترخيص